Қуллаҳои сарбаланди гулбасар дорад Ҳисор,

Мардуми меҳмоннавози боҳунар дорад Ҳисор.
Сабздомон боғу гулгашташ ба монанди биҳишт,
Ҷой андар дидаи аҳли башар дорад Ҳисор.
Воқеан, водии Ҳисор яке аз минтақаҳои зеботарини диёрамон буда, имрӯзҳо беш аз пеш зебову дилрабо гашта истодааст. Иморату хонаҳои хуштарҳу дилкаш ва иншооти замонавии басо муфидро мебиниву ба офарандаашон гаштаву баргашта сано мехонӣ.
Давоми чанд соли охир дар ин диёри соҳибтамаддун як қатор иншооти бузург, аз қабили мактаби №1, Мактаби президентӣ, майдони варзишӣ барои 20 000 ҷойи нишаст, чойхонаи «Харбуза», Қасри фарҳанг, Китобхона, Осорхона, меҳмонхонаҳо дар маҳаллаи Н. Қаюмов ва дар маркази шаҳрак як қатор хонаҳои баландошёна, бинои Маркази савдои Ҳисор, роҳҳо, нуқтаҳои хизматрасонӣ ва савдо сохта ба истифода дода шуданд.
Мардуми сарбаланд, бахусус соҳибкорони ҳамаи ҷамоатҳои шаҳр барои гулгулшукуфии он заҳматҳои худро дареғ надоштаанд. Дар Ҷамоати шаҳраки Ҳисор, Ҷамоати шаҳраки Шарора, Ҷамоати деҳоти Ҳисор, Ҷамоати деҳоти Ориён, Ҷамоати деҳоти Дурбат, Ҷамоати деҳоти Сомон, Ҷамоати деҳоти Деҳқонобод, Ҷамоати деҳоти Алмосӣ, Ҷамоати деҳоти Хонақоҳи Куҳӣ, Ҷамоати деҳоти Навобод, Ҷамоати деҳоти Мирзо Ризо ва Ҷамоати деҳоти Мирзо Турсунзода корҳои зиёди ободонӣ ба хотири пешрафт ба сомон расонида шудаанд. Инҷо аз ёрмандиҳои соҳибкорон Тошев Бобокалон, Маҳмуродов Бобокалон, Бахтиёр Убайдуллоев, Луғмон Нарзуллоев, Иброҳимов Саъдӣ, Усмонов Абдуҳалим, Икромиддин Баҳодуров, Музаффар Усмонов, Дилшод Камолов, Маҳмадӣ Тӯраев, Ҷӯра Маҳмудов, Ибодулло Шарифов, Нуралӣ Умаров, Амонулло Камолов, Диловар Назаров, Бекмурод Шеров, Маҳмадӣ Ғаниев, Бахтиёр Нуров, Рустам Холиқов, Суннатуллоҳ Давлатов, Исмат Раҷабов, Шералӣ Зуҳуров, Сайфиддин Тӯхтаев, Умед Файзуллоев, Шеров Дӯстмурод, Холматов Аҳлиддин, Бобомуродов Зафар, Сафаров Муҳаммадамин, Эшназаров Бекмурод, Бобоҷонов Муҳибулло, Ҳикматов Муқим, Убайдулло Саъдуллоев, Меликов Ҳасан, Холов Баҳром, Сулаймонов Бобокалон, Каримов Холмурод, Собиров Бобоалӣ, Қурбонов Насриддин, Холов Азиз, Сабзов Заробиддин, Неъматов Илҳомиддин, Мансуров Шараф, Зайдов Воҳид, Норбеков Муҳаммадалӣ, Раҳимов Воҳид, Миров Дилшод, Миров Муҳиддин, Раҳмонов Усмоналӣ, Расулов Тоҳир, Қодиров Ҳабибуллоҳ, Мирзомақсуд Солиҳов, Ашӯралӣ Ҳакимов, Ҳақризо Юсуфов ва дигарон метавон махсус зикр намуд. Ин нафарон ва дигар соҳибкорони шаҳри зарнисори Ҳисор бо хидматҳои арзандаи худ дар бештару беҳтар обод гаштани ин минтақаи диёри азизамон саҳм гузоштаанд, ки мардум аз онҳо миннатдору сипосгузоранд.
Ҳамагон медонем, ки вақте сайёҳ ва ё меҳмоне ба диёрамон ворид мегардад, аввал ба осорхонаҳо таваҷҷуҳ медиҳад. Бинои хуштарҳу замонавии Осорхонаи таърихию кишваршиносии шаҳри Ҳисор бо фароҳам овардани имконияту шароити зарурии корӣ соли 2015 бо ибтикори Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сохта, мавриди баҳрабардорӣ қарор дода шуд. Бинои мазкур сеошёна буда, дорои 12 толори намоишӣ, ҳуҷраҳои корӣ, фонди асосию захиравӣ ва 5 шуъба мебошад, ки алҳол 30 нафар кормандон дар он фаъолият доранд. Аз ҷумла, 10 нафар бо маълумоти олии соҳавӣ, 2 нафар бо маълумоти олии умумӣ, 11 нафар — миёнаи касбӣ, 6 нафар бо маълумоти миёнаи умумӣ. Фонди асосии осорхонаро 4514 осор, 880 адад фонди ёрирасон (захиравӣ), 555 адад китобҳои бадеӣ, 64 адад дастхатҳо, 47 адад энсиклопедияҳо, 35 адад китобҳои нодир ташкил медиҳанд.
Дар соли 2017 аз Осорхонаи шаҳри Ҳисор зиёда аз 2000 нафар тамошобинон ва меҳмонон (ба истиснои нафароне, ки дар рӯзҳои иқдоми «Дарҳои кушод» ворид шудаанд) дидан кардаанд.
Айни замон дар бинои дуюми осорхона бахшида ба «Соли рушди сайёҳӣ ва ҳунарҳои мардумӣ» гӯшаи намоиши ҳунарҳои мардумӣ кушода шудааст, ки бинандаро ба ваҷд меорад. Ба гуфтаи корманди Осорхонаи шаҳри Ҳисор Марҳабо Забарова, «ҳунари гулдӯзии тоҷикон санъати нафиси қадима буда, яке аз шаклҳои санъати амалию ороишии мардуми мо ба ҳисоб меравад. Пайдоиши он ба давраи аввали ҳаёти инсонӣ — асри сангин мансуб дониста мешавад. Зеро дӯхтани либос аз пӯсти ҳайвонот дар ҳамин давра пайдо шуда, бо гузаштан аз даравшҳои сангӣ ба даравшҳои устухонӣ ва баъдтар аз сӯзанҳои устухонӣ ба сӯзанҳои оҳанӣ ва оҳиста-оҳиста ба пайдо шудани санъати бофандагиву рангпардозӣ расида, рушду такмил меёбад. Бинобар нисбатан осон будани ҳунари гулдӯзӣ аз давраҳои қадим то имрӯз ин ҳунар аҳамияти худро гум накарда, баръакс инкишоф ёфтааст ва ҳоло ҳам ҷузъи муҳими санъати ороишии халқи тоҷик мебошад. Ин намуди санъати ороишӣ дар шаҳру вилоятҳои қадимаи тоҷикин — Балх, Ҳирот, Ҳисор, Бадахшон, Суғд, Хатлон, Бухоро, Самарқанду Хуҷанд ва дигар минтақаҳо ба таври васеъ ривоҷ ёфта буд».
Бояд гуфт, ки намунаи олии ҳунарҳои мардумиро дар Қалъаи Ҳисор низ метавон вохӯрд. Албатта, ҳамагон медонем, ки ин мавзеъ яке аз беҳтарин ҷойҳои мувофиқ барои сайёҳӣ аст ва мардуми зиёде ташриф овардаву болидаруҳ мегарданд.
Дар ин мавзеъ аз тарафи мутахассисони шуъбаи меъмории мамнуъгоҳ лоиҳаҳои барқарорсозии девори мудофиавии намои қалъа, дӯконҳои ҳунармандон, қасри ҳокими Ҳисор, дарвозаҳои Аскархона ва Уштурхона, чашмаи Аскархона, Чойхона, Наврӯзгоҳ ва бинои Корвонсарой тайёр ва ба Ҳукумати ҷумҳурӣ пешниҳод карда шудааст. Аз тарафи Корхонаи воҳиди давлатии «Шаҳрофар» лоиҳаи ободонии майдони Регистон омода гардидааст. Дар асоси Нақшаи кулл ва лоиҳаи «Азнавсозии Мамнуъгоҳи таърихию фарҳангии Ҳисор» аз тарафи «Дирексияи сохтмони иншооти ҳукуматӣ»-и Дастгоҳи иҷроияи Президенти Ҷумҳурии Тоҷикистон корҳои тармимӣ-барқарорсозӣ дар биною иншооти мамнуъгоҳ — «Дарвозаи Аскархона», «Чойхонаи Миллӣ», «Растаи Ҳунармандон», «Наврӯзгоҳ», «Чашмаи Аскархона», «Девори мудофиавии намои Қалъа», «Суҳбатгоҳҳо бо ороишоти кандакорӣ», «Ободонии майдони Регистон» ва «Таваққуфгоҳ» ба маблағи 11422950 (ёздаҳ миллиону чорсаду бисту ду ҳазору нуҳсаду панҷоҳ) сомонӣ гузаронида шудааст. Дар даромадгоҳи Қалъа дӯконҳои ҳунармандон сохта ба истифода дода шудааст.
Дар марҳилаи дуюми «Барномаи ҳифзу нигаҳдории ёдгориҳои таърихию меъморӣ» 4500000 (чор миллиону панҷсад ҳазор) сомонӣ барои корҳои тармиму барқарорсозии «Қасри ҳоким»-и Ҳисор ҷудо шудааст. Дар соли 2016 корҳои тармимӣ-барқарорсозӣ аз тарафи «Муассисаи давлатии илмӣ-истеҳсолии ҳифзу нигаҳдории ёдгориҳои таърихию меъмории Вазорати фарҳанг» дар теппаи баланди қалъа ба маблағи 893111 (ҳаштсаду наваду се ҳазору яксаду ёздаҳ) сомонӣ ба анҷом расонида шуда буд. Соли 2017 бошад, то аз тарафи «Муассисаи давлатии илмӣ-истеҳсолии ҳифзу нигаҳдории ёдгориҳои таърихию меъмории Вазорати фарҳанг корҳои барқарорсозӣ ба маблағи 1331387 (як миллиону сесаду сию як ҳазору сесаду ҳаштоду ҳафт) сомонӣ ба анҷом расонида шудааст. Ҳоло корҳои барқарорсозӣ дар қасри ҳокимнишини Қалъа идома дорад. Барои корҳои тармимию барқарорсозии ёдгориҳои таърихию меъмории Ҳисор дар соли 2018 маблағи 1500000 (як миллиону панҷсаду ҳазор) сомонӣ пешбинӣ шудааст.
Бо як ҷумла метавон хулоса намуд, ки Ҳисори Шодмон воқеан диёри зарнисор ва дорои намои пуршукуҳу мардуми меҳмондӯст аст, ки ҳатман сайёҳону меҳмононро мафтун мекунад.

«САМАК»

ЯК ҶАВОБ ТАРК

Please enter your comment!
Please enter your name here