Заъфи ду дастаи тоҷикии иштирокчии Ҷоми КФО-2019 дар бозиҳои сафарӣ маълум шуд. «Истиқлол»-у «Хуҷанд» дар даври чоруми марҳилаи гуруҳии ин мусобиқа бо шикаст мувоҷеҳ шуданд.

Даври чоруми марҳилаи гуруҳии Ҷоми КФО-2019 барои дастаҳои тоҷикӣ нобарор анҷом ёфт. «Истиқлол», ба гуфтаи сармураббиаш Ҳаким Фузайлов, бо ду иштибоҳи кӯдакона бозиеро, ки бо натиҷаи 1:0 дар пеш буд, бохт. Дастаи «Дордой»-и Қирғизистон тавонист, ки маҳорат нишон диҳад ва ду голи ҷавобӣ зада, пирӯз гардад.

«Хуҷанд» ҳам, ба гуфтаи сармураббиаш Виталий Левченко, метавонист, ки бо «Олтин Асир»-и Турманистон мусовӣ бозӣ кунад, аммо «бахт омад накард». Дастаи туруманӣ, ки соли гузашта дар финали ин мусобиқа бозӣ карда буд, бо ҳисоби камтарини 1:0 «Хуҷанд»-ро шикаст дод.

Мубориза барои ҷойи якум дар ин гуруҳ шиддат ёфт. Баъд аз чор давр «Истиқлол» бо 7 имтиёз дар ҷойи аввал аст. «Олтин Асир» баъди ин ғалаба соҳиби 6 хол шуд ва ба зинаи дуюм баромад. Зинаҳои сеюму чорум бо чоримтиёзӣ дар дастаи «Хуҷанд»-у «Дордой» аст.

Акнун тақдири роҳхат дар ду даври охир ҳал хоҳад шуд. Дар даври панҷум, 19-уми июн, «Хуҷанд» дар майдони худ «Истиқлол»-ро қабул мекунад ва «Олтин Асир» дар Ашқобод бо «Дордой» қувва месанҷад.

Даври охир, 26-уми июн дар назар аст. «Истиқлол» дар Душанбе бо «Олтин Асир» ва «Хуҷанд» дар Бишкек бо «Дордой» бозӣ мекунанд.

Танҳо дастаи ҷойи аввали гуруҳ ба даври дигар роҳхат мегирад.

Добавить комментарий