Кумитаи меъморӣ ва сохтмони назди Ҳукумати кишвар тасмим дорад, ки бомҳои биноҳои шаҳру навоҳии кишвар ба ранги ягона дароварда шаванд. Дар ин бора раиси Кумита Ҷамшед Аҳмадзода зимни нишасти хабарӣ иттилоъ дод.
Ҳамзамон ӯ гуфт, ки дар ин бора раиси шаҳри Душанбе низ қарори дахлдорро ба имзо расонидааст.
Тибқи гуфтаи Аҳмадзода, боми ҳамаи биноҳое, ки дар пойтахт мавриди истифода қарор мегиранд, бояд ранги мушаххас дошта бошанд. Дар ҳамин ҳол, ӯ таъкид дошт, ки дастур ҳамчунин ба биноҳои аллакай сохташуда низ дахл дорад.
— Мо исрор намекунем, ки худи ҳамин рӯз бомҳо иваз ва ба ранги тавсияшуда дароварда шаванд. Ин кор бо мурури замон амалӣ мешавад,- гуфт ӯ.
Мувофиқи қарори қабулкардаи раиси пойтахт, акнун биноҳои истиқоматӣ, маъмурӣ ва истеҳсолии соҳили чапи дарёи Душанбе ранги сабз ва соҳили рост ранги ҷигарӣ мегиранд. Дар қарори мазкур қайд мегардад, ки ин тасмим баҳри «боз ҳам симои зеботару ҷолиб ба худ касб кардани шаҳри Душанбе» гирифта мешавад.
Раиси Кумитаи меъморӣ ва сохтмон ҳамчунин қайд кард, ки ин дастур натанҳо ба шаҳри Душанбе, балки ба ҳамаи шаҳру навоҳии ҷумҳурӣ дахл дорад.
