Ситоди ҷумҳуриявии пурзӯр кардани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID-19 дар Тоҷикистон ба қароре омад, ки аз 1-уми июл парвозҳои байналхалқӣ ба самтҳои Аморати Муттаҳидаи Араб ва Ҷумҳурии Ӯзбекистон ба роҳ монда мешавад ва тӯйҳо аз 20-уми июл бо ширкати то 100 нафар баргузор карда мешаванд.

Ситоб бо роҳбарии сарвазир Қоҳир Расулзода, ки роҳбари ин ситод аст, ҷаласа баргузор карда, вазъи тадбирҳои вобаста ба пешгирӣ ва интиқоли бемории сироятии коронавирус дар қаламрави мамлакат ва фаъолияти минбаъдаи Ситоди ҷумҳуриявии пурзӯр кардани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID-19-ро баррасӣ кард.

Бо назардошти ба эътидол омадани вазъияти паҳншавӣ ва интиқоли бемории сироятии коронавирус дар Ҷумҳурии Тоҷикистон Ситоди ҷумҳуриявии пурзӯр кардани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID-19 қарор қабул кард, ки тибқи он аз 20-уми июни соли 2020 дар ҷумҳурӣ барои гузаронидани туйи хонадоршавӣ муваққатан дар доираи то сад нафар даъватшуда ва танҳо як маърака дар маҳалли истиқомат ё дигар муассисаҳои хизматрасонӣ, аз ҷумла тарабхонаю ошхонаҳо бо риояи ҳатмии қоидаҳои санитарию гигиенӣ иҷозат дода мешавад.

Ҳамчунин, тибқи қарори Ситоди ҷумҳуриявӣ барои парвозҳо дар хатсайрҳои байналмилалӣ ба самти шаҳри Дубайи Аморати Муттаҳидаи Араб ва Ҷумҳурии Ӯзбекистон аз 1-уми июли соли равон иҷозат дода мешавад ва мусофирон бояд ҳатман маълумотномаи тиббӣ дошта бошанд.

Дар мувофиқа бо Ситод ҳамчунин парвозҳои транзитӣ ва чартерӣ барои интиқоли молу маҳсулот тариқи хатсайрҳои байналмилалӣ анҷом дода мешаванд.

Агентии авиатсияи граждании Ҷумҳурии Тоҷикистон вазифадор карда шуд, ки масъалаи ташкили парвозҳоро ба самти Федератсияи Россия, Туркия ва Ҷумҳурии Мардумии Чин мавриди омӯзиш қарор дода, ба Ситоди ҷумҳуриявӣ таклифу хулоса пешниҳод намояд.

Ситоди ҷумҳуриявии пурзӯр кардани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID-19 ҳамчунин аъзои ситодро вазифадор намуд, ки барои пешгирӣ аз хуруҷи мавҷи дуюми бемории сироятии коронавирус, захира ва нигоҳдории маводи доруворию маҳлулҳои безараргардонӣ, тақвияти корҳои фаҳмондадиҳӣ ҷиҳати пешгирӣ аз хуруҷи мавҷи дуюми ин беморӣ ва пайваста анҷом додани корҳои безараргардонӣ тадбирҳои таъхирнопазир андешанд.

ЯК ҶАВОБ ТАРК

Please enter your comment!
Please enter your name here