Кормандони милитсия марди 31-солаи сокини деҳаи Тудабоёни ноҳияи Ҳамадониро ҳамчун гумонбар ба одамкушӣ дастгир кардаанд. Ин мард гирифтори бемории рӯҳӣ будаааст.
Номбурда, рӯзи 16-уми марти соли 2018, тахминан соати 14:30-дақиқа, дар ҳавлии истиқоматиаш бе ягон асос ҳамсари 24-сола ва ду духтарчаи хурдсоли 3 ва 4-солаашро бо бели дар дасташ буда, ба сару баданашон якчанд маротиба задааст.
Баъдан, номбурда ҳаракатҳои ҷинояткоронаашро давом дода, ба ҳавлии истиқоматии ҳамсояҳояшзани 53-солаи соҳиби 5-фарзанд ва зани 36-солаи соҳиби 3-фарзанд, даромада, бе ягон асос бо бел чанд маротиба ба узвҳои баданашон задааст.
Дар натиҷа духтари хурдсоли 3-солааш ва ҳамсояаш зани 53-сола ҷароҳатҳои вазнини ҷисмонӣ бардошта, ҳангоми ба беморхонаи марказии ноҳия дастрас намудан, дар роҳ ба ҳалокат расидаанд.
Ҳамсар, духтари 4-солааш ва зани 32-солаи ҳамсояаш ҷароҳатҳои гуногуни ҷисмонӣ бардошта, дар беморхона бистарӣ гардидаанд.
Ин ҳодиса мавриди тафтиш қарор дорад.
