Чӯпонҳо ҳам маст мешаванду мекушанд

Чор чӯпон дар ноҳияи Деваштич пас аз нӯшидани шароб байни якдигар даъво карданд, ки дар натиҷа ду нафар кушта шуданд. Ҳамаи ин ба сужаи як филм шабоҳат дорад, аммо мутаассифона ҳақиқат буда, дар ин бора маркази матбуоти ВКД хабар дод.

Чӯпонҳои ҷамоати деҳоти Даҳқати ноҳияи Деваштич М.А. соли таваллудаш 1971, Б.З. соли таваллудаш 1971, М.С. соли таваллудаш 1978, сокинони деҳаи Даҳқат ва Ҷ.Б. соли таваллудаш 1981, сокини деҳаи Хишекат, рӯзи 7-уми феврали соли 2018, тахминан соати 16:00, дар канори сойи деҳаи Хишекат нӯшокии спиртӣ истеъмол карданд. Мастӣ боис шуд, ки байни якдигар даъво кунанду М.А., Б.З. ва М.С. шаҳрванд Ҷ.Б.-ро зери латукӯб қарор диҳанд. Дар натиҷа Ҷ.Б. ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст. Баъдан, М.А. бо дигарон маслиҳат мекунад, ки ҷасади Ҷ.Б.-ро ба манзили истиқоматиаш баранд.

Аз ин ҳолат М.С. бо фикри он, ки М.А. метавонад оиди ҳодисаи рух дода, ба наздикони Ҷ.Б. хабар диҳад, қасди аз ҳаёт маҳрум сохтани ӯро кашида, дар якҷоягӣ бо Б.З. ин ҳамроҳашонро латукӯб мекунанд. Дар натиҷа М.А. низ ҷароҳати вазнини ҷисмонӣ бардошта, дар ҷойи ҳодиса ба ҳалокат мерасад.

Нисбати шаҳрвандон Б.З. ва М.С. парвандаи ҷиноятӣ бо моддаи 104, қисми 2-и Кодекси ҷиноятии Ҷумҳурии Тоҷикистон оғоз карда шуда, тафтишот идома дорад.