Варзигарони қаиқрони тоҷик дар Чемпионати қаиқронии Осиё миёни ҷавонони то 23-сола ва Ҷоми Осиё, ки дирӯз дар шаҳри Самарқанди Ҷумҳурии Ӯзбекистон ба анҷом расиданд, сазовори 6 медал — 2 тилло, 4 биринҷӣ гардиданд.
Дар рӯзи охирини Чемпионати Осиё Шаҳриёр Даминов дар каноэи якнафарӣ ба масофаи 500 метр аввалин шуда ба марра расид. Намояндаи Тайбэйи Чин ҷои дуюм, варзишгари Ӯзбекистон ҷои сеюмро ишғол карданд.
Шаҳриёр Даминов ҳамроҳ бо Мустафо Даминов, Абубакр Рустамов ва Дилшод Ҷӯраев ҳамчунин дар байдаркаи чорнафарӣ дар масофаи 500 метр медали биринҷӣ ба даст оварданд.
Ёдовар мешавем, ки Шаҳриёр Даминов дар рӯзи аввали Чемпионати Осиё миёни ҷавонони то 23-сола дар каноэи якнафара ба масофаи 1000 метр сазовори медали тилло шуда буд. Ӯ ҳамчунин дар каноэи чорнафара ба масофаи 1000 метр ҳамроҳ бо Мустафо Даминов, Иван Ковалев ва Дилшод Ҷӯраев медали биринҷӣ ба даст овард.
Ду медали дигарро варзишгарони мо дар Ҷоми Осиё сазовор шуданд. Абдусаттор Ғаффоров дар байдаркаи якнафарӣ ба масофаи 1000 метр медали биринҷӣ гирифт. Дар ин қувваозмоӣ ҷои аввалро Алексей Мочалов аз Ӯзбекистон, ҷои дуюмро Ибрагим Шарафутдинов аз Қазоқистон ишғол карданд. Абдусаттор Ғаффоров ҳамчунин дар байдаркаи дунафарӣ ҳамроҳ бо Саидилҳомхон Назиров дар масофаи 1000 метр сазовори медали биринҷӣ гаштанд. Ҷуфти варзишгарони Қазоқистон – Давлат Султонбеков/Александ Эмелянов медали тилло, ҷуфти варзишгарони Ӯзбекистон – Александр Тропин/Вилям Ибрагимов медали нуқра гирифтанд.
Чемпионати Осиё миёни ҷавонони то 23-сола ва Ҷоми қаиқронии Осиё дар шаҳри Самарқанди Ҷумҳурии Ӯзбекистон бо иштироки варзишгарони 15 давлати Осиё 20-25 октябр доир гардид.
