Ҷинояткори собиқадор дар ҳолати мастӣ ба сари ноболиғи 11-сола мушт бардошт, ки дар натиҷа дуюмӣ аз бардоштани ҷароҳат ба ҳалокат расид. Дар ин бора маркази матбуоти ВКД ҶТ хабар дод.
Ҳангоми доир намудани чораҳои оперативӣ-ҷустуҷӯӣ аз ҷониби кормандони милитсия марди 30-солаи сокини ҷамоати деҳоти Роҳатии ноҳияи Рӯдакӣ, ки қаблан бо моддаҳои 237 қисми 1 ва 177-и Кодекси ҷиноятии Ҷумҳурии Тоҷикистон суд шудааст, ҳамчун гумонбар дар содир намудани ҷинояти куштор дастгир карда шудааст.
Гумонбаршуда, рӯзи 12-уми сентябри соли равон, тахминан соати 01:30, дар ҳолати мастӣ ба манзили истиқоматиашон омада, ҷияни ноболиғаш, писарбачаи 11-солаи сокини ҷамоати деҳоти Гулистони ноҳияи мазкурро, ки ба хонаи бобояш, пирамарди 78-солаи сокини ноҳияи Рӯдакӣ ба меҳмонӣ омада буд, латукӯб кардааст. Дар натиҷа ноболиғ ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.
