Дар ноҳияи Кӯшониён 39 миллиону 800 ҳазор сомонӣ қарзи андоз ҷой дорад, ки аз он 19 миллиону 800 ҳазор сомониаш бақияи қарзи андоз буда, 20 миллиони дигарашро қарзҳои мушкилситон ташкил медиҳанд.
Сардори нозироти андози ноҳияи мазкур Раҳмонзода Аҳлиддин гуфт, ки дар 8 моҳи соли ҷорӣ қисми даромади буҷети ноҳия 95 дарсад иҷро шуда, ба буҷет 1 миллиону 700 ҳазор сомонӣ ворид нашуд.
Омили саривақт иҷро нашудани қисми даромади буҷетро ин шахси масъул саривақт пардохт накардани андоз аз ҷониби андозсупорандагон арзёбӣ карда, гуфт, ҳоло дар ноҳия 19 миллиону 700 ҳазор бақияи қарзи андоз ҷой дорад, ки 60 дарсади он ба соҳаи кишоварзӣ рост меояд.
Дар ҳамин ҳол, Ҷамшед Гулонов, як масъули Раёсати молияи ноҳияи Кӯшониён, хабар дод, ки қисми даромади буҷети ноҳия дар ҳашт моҳ зиёда аз 28 миллион ба нақша гирифта шуда буд, ки аз он 26 миллиону 308 ҳазору 771 сомониаш иҷро шудаасту халос.
Ҳамчунин, манбаъ гуфт, ки аз ҳисоби маблағҳои буҷети вилояти Хатлон дар ин давра зиёдтар аз 2 миллиону 650 ҳазор сомонӣ маблағҳои мақсаднок ҷудо карда нашудаанд.
