Дар ҷумҳурӣ ҳангоми ҳалли баҳсҳо истифодаи корд ҳамчун силоҳ бештар шудааст ва шумораи осебдидаҳо низ аз ин намуди ҷиноят низ афзудаанд. Маркази матбуоти ВКД ҶТ зуд-зуд аз чунин муноқишаҳо хабар медиҳад.
Ба РВКД дар ноҳияи Рашт марди 54-солаи сокини деҳаи Ниширёни ҳамин ноҳия муроҷиат кардааст, ки рӯзи 21-уми октябри соли 2017, тахминан соати 11:30, дар назди ҳавлии истиқоматиаш марди 55-солаи ҳамсояаш бе ягон асос ӯро лату кӯб карда, бо корди кисагии дар дасташ буда, 2 маротиба ба қафаси синааш задааст. Дар натиҷа ӯ ҷароҳати вазнини ҷисмонӣ бардошта, дар беморхона бистарӣ гаштааст. Ҷинояткор аз ҷониби кормандони милитсия ҳамчун гумонбар дар қасдан расонидани зарари вазнин ба саломатӣ дастгир карда шудааст.
Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия 3 нафар мардони 21 ва 22-солаи сокини шаҳри Сарбанди вилояти Хатлон ҳамчун гумонбар дар содир намудани ҷинояти авбошӣ дастгир карда шудаанд. Номбурдагон, 22-юми октябри соли 2017, тахминан соати 15:30, дар назди даромадгоҳи бозори “Фаровон”-и шаҳри Қӯрғонтеппа тартиботи ҷамъиятиро вайрон карда, бо 2 нафар мардони 23 ва 24-солаи сокинони ин шаҳр муноқиша карда, онҳоро латукӯб кардаанд.
Дар вақти ҷангу ҷанҷол марди 21-солаи сокини шаҳри Сарбанд бо корди дар дасташ буда, як маротиба ба бадани марди 24-солаи сокини шаҳри Қӯрғонтеппа задааст. Дар натиҷа номбурда ҷароҳати ҷисмонӣ бардошта, дар беморхона бистарӣ гаштааст. Нисбати ин ҳолат парвандаи ҷиноятӣ оғоз гардида, тафтишот идома дорад.
