.

Alternative flash content

Requirements

Get Adobe Flash player

Муроҷиати шаҳрвандон

Ба прокурори генералии Ҷумҳурии Тоҷикистон, мушовири ҳақиқии давлатии адлия, мӯҳтарам Раҳмон Юсуф Аҳмадзода,

Ба вазири корҳои дохилии Ҷумҳурии Тоҷикистон, генерал - полковники милитсия, мӯҳтарам Раҳимзода Рамазон Ҳамро 

Як қабил одамоне, ки маконеро обод кардан намехоҳанд, ҳамеша ба порчаи замини нафари дигар чашм ало карда, мехоҳанд онро соҳиб шаванд. Дар роҳи расидан ба мақсади худ, яъне барои соҳиб шудан ба порчаи замини як меҳнатдӯсти дигар, аз ягон амал рӯй намегардонанд. Он чи ки дар зер зикр мегардад, бозгӯи ин гуфтаҳост. 

Ба самъи Шумо мерасонем, ки зиёда аз ду сол инҷониб, масъулини прокуратура ва  муфаттиши ШВКД-и ноҳияи Зафаробод ду ҳалномаи қувваи қонунӣ пайдо кардаи Суди иқтисодии вилояти Суғд ва қарорҳои Суди Олии иқтисодии Ҷумҳурии Тоҷикистонро эътироф намекунанд.

Бояд гуфт, ки ман, Даминов Мамадкарим солҳои тӯлонӣ бо меҳнати ҳалол  замини бекорхобидаро ҳамроҳ бо аъзоёни бригадаам обод карда, ҳосили хуб мерӯёнидем. Вале ин пешравии мо ба гурӯҳе, аз ҷумла ҳамсояамон, аъзоёни оилаи Муродовҳо  писанд наомад. Номбурдаҳо, гӯё оромии моро нахоста бошанд, ки моро ба гирдоби тӯҳмат гӯтавар гардониданд. Муродов Ғулом бо се нафар пайвандонаш, ки бо хоҳиши худ соли 2008 аз ҷониби хоҳарони дар Ҷумҳурии Ӯзбекистон ба шавҳар баромадааш, ки ҳамчунин шаҳрвандии Ӯзбекистонро низ доранд, ва Муродов Алишер, раиси собиқи хоҷагии деҳқонии «Орзуҳо», ки соли 2006 вафот кардааст, қарори ғайриқонунӣ ва қалбакӣ омода намуда, имзои онҳоро гирифта, бо замимаи сертификати аслӣ ва дигар ҳуҷҷатҳо ба Кумитаи замини ноҳияи Зафаробод пешниҳод кардааст.

Онҳо иддао аз он кардаанд, ки  гӯё Даминовҳо заминҳои худро ба иҷора додаанд. Ин дар ҳолест, ки аз соли 2009 бо Қарори Раиси ноҳия ин замин аз фонди махсуси МИҲД-и ноҳия  ба истифодаи мо дода шудааст.

Бояд гуфт, ки аъзоёни собиқи хоҷагии деҳқонии «Орзу-2, 4, 5, 6, 7» соли 2008 бо сабаби истифода карда натавонистани заминашон, аз истифодаи он ихтиёран даст кашида буданд.  Баъди 9 соли истифода бурдани замин ва ободу ҳосилхез гардонидани он, нафароне пайдо шуданд, ки ба ҳар роҳу восита ин заминҳоро ба даст овардан мехостанд. Номбурдаҳо мехоҳанд қарорҳои раиси собиқи ноҳияи Зафарободро аз солҳои 2008 ва 2009 бекор карда, заминеро, ки аз истифодаи он даст кашида буданд, соҳиб шаванд.

17 марти соли 2018 муфаттиши ШВКД дар ноҳияи Зафаробод  Ф. Қурбонов ғайриқонунӣ маро ба шӯъба бурда, нисбатам  тибқи моддаи 340 қисми 1 КҶ ҶТ парвандаи ҷиноятӣ оғоз намуд ва баъдан бо сабаби гузаштани мӯҳлаташ онро қатъ кард. Аз амали муфаттиш ба Прокуратураи вилоятӣ муроҷиат намудам. Қарори мазкур дар асоси шикояти ман, санаи 11 июни соли 2018 аз ҷониби масъулини прокуратураи вилояти Суғд бекор карда шуда, ба тафтиши иловагӣ ирсол гашт.

7 июли соли 2018 муфаттиши прокуратураи ноҳияи Зафаробод И.Усмонзода қарори аз  прокуратураи вилоят ирсол шударо дуруст баррасӣ накард. Заминхоҳон бо ҳамаи ин қаноат накарда, тӯҳмати нав фикр карда бароварданд. Аъзоёни хоҷагии деҳқонии «Орзуҳо» бардуруғ иброз намуданд, ки гӯё аз соли 2008 то соли 2016 замини мазкур дар истифодаи онҳо қарор дошта буд. Нисбати мо арзу шикояти беасос намуданд. Муфаттишони милитсия ва прокуратураи маҳал, дар асоси шикоятҳои бофтаю сохтаи онҳо нисбати оилаҳоямон тибқи моддаҳои 334 қисми 2 ва 247 қисми 2 парвандаи ҷиноятӣ оғоз намуданд.

Зиёда аз 2 сол аст, ки баҳс оиди қарорҳои маҷлиси умумии собиқ хоҷагии деҳқонии «Орзу» дар судҳои иқтисодӣ мавриди қарор дорад. Маълум гашт, ки бо хоҳиши шахсии аъзоёни хоҷагии деҳқонии «Орзуҳо», Муродов Ғулом ҳамаи ҳуҷҷатҳоро «Дар бораи қатъи фаъолияти хоҷагии деҳқонӣ» тартиб дода, ба Кумитаи идораи замин пешниҳод кардааст. Дар ин бора ду ҳалномаи Суди иқтисодии вилояти Суғд ва Суди Олии иқтисодии Ҷумҳурии Тоҷикистон қабул шуда бошад ҳам, оташи дили аризадиҳанда Муродов Ғулом таскин наёфт Вай ду маротиба дар мурофиаи Суди иқтисодии вилояти Суғд иброз намуд, ки имзоҳои дар қарор бударо худаш гузоштааст. Вай дар суд, назди адвокаташ ба гуноҳаш иқрор шуд, вале чанде пас боз ба дурӯғгӯиву бӯҳтоннавозӣ машғул шуда, дигаронро ба иштибоҳ гирифтор намуд.

Дар ин муддат вай бо моддаи 244 (дуздӣ) КҶ ҶТ нӯҳ сол аз озодӣ маҳрум шуд, вале чор сол пас дар асоси қонуни авф озод шуда бошад ҳам, рафтору кирдораш дигар нашуд. 

Дар як пурсуҷӯ, худи ӯ иқрор шуд, ки «бо қарори маҷлис имзоро ман гузоштам» ва ҷои дигар гуфта буд, ки Даминов Акмал ҳуҷҷатҳоро оварду вай имзо гузошт. Соли 2017 бошад, ба ҷойи ман додарам, Даминов Зафарро гунаҳкор хонд ва соли 2018, дар пурсуҷӯи сеюм, Даминов Мамадкаримро дар ин кор айбдор хонд. Ин  нишондоди вайро муфаттишон ба инобат нагирифта, ман, Мамадкарим ва Зафарро ғайриқонунӣ тибқи моддаи 340 КҶ ҶТ айбдор хонданд. Дар асл мо, Даминовҳо ягон гуноҳ надорем. Бояд таъқид кард, ки оилаи Муродовҳо соли 2008 аз ташкилотҳои қарздиҳанда маблағҳои ҳангуфтро гирифта, барои ба амал овардани манфиатҳои худ истифода карданд. Баъди тамом шудани маблағи мазкур ба замин «часпиданд».

Моҳи марти  соли 2018 тибқи қарори суди иқтисодӣ истифодаи қитъаи замини мазкур ба зиммаи мо гузашт ва нисбати раиси ноҳияи Зафаробод, барои роҳ додан ба хатогиҳои ҷиддӣ, суд таъиноти хусусӣ баровард. 17 марти соли 2018 ман, Даминов Мамадкарим дар ҳолате, ки гирифтори бемории фишорбаландӣ будам, нозири минтақа бо супориши муфаттиш Қурбонов наздам омад ва бо таҳдид гуфт: «шуморо сардор даъват мекунад, сабабашро намедонам» ва бо вуҷуди бемор буданам, маро  ба шӯъба бурд.

Нозири минтақа аризаи худиқрории пешакӣ тартиб додаашро наздам гузошта, талаб кард, ки имзо гузорам. Мехостанд, кореро, ки асло накардаам ба душ гирам. Нисбати ман парванда оғоз намуда, баъдан бо сабаби гузаштани мӯҳлаташ онро қатъ карданд. Аммо масъулини прокуратураи ноҳияи Зафаробод қонуншикании муфаттишро ба назар нагирифтанд. Муфаттиш ба ҳуҷҷатҳои нозироти андоз ҳам баҳои ҳуқуқӣ надод. Вай ба инобат нагирифт, ки Муродовҳо шартномаи ба иҷора додани заминро надоранд ва гуфтаҳои онҳо бофтаю сохта мебошанд. Ин дар ҳолест, ки 8 сол инҷониб хоҷагии деҳқонии «Орзуҳо» дар нозироти андози ноҳия қайд нашудааст. Наход инро касе дарк накарда бошад. 

Куҷост мантиқ ва тарозуи адолат? 

Бо қарори раиси ноҳияи Зафаробод аз 13 июли соли 2009 дар асоси моддаҳои 7, 12 ва 66-и Кодекси замини Ҷумҳурии Тоҷикистон ва ҳамчунин бо пешниҳоди кумитаи заминсозии ноҳия, таҳти рақами 235 аз 3 апрели соли 2009 ба хоҷагии амалкунандаи «Меҳнат», ки вазифаи раисашро Даминов Мамадкарим ба ӯҳда дорад, барои кишоварзӣ 7 гектар ( замини х/д «Орзу» дасткашида)-ро ба истифодаи якумраи хоҷагии деҳқонии »Меҳнат» гузаронд.

Соли 2014 хоҷагии деҳқонии «Меҳнат» дар баробари ду хоҷагии деҳқонии «Даминбобо» ва «Даминбобо-1» таъсис дода шуд.

Муфаттишони ШВКД ва прокуратураи ноҳияи Зафаробод намедонем бо кадом сабаб, саҳми  саҳмдорони хоҷагии деҳқонии «Орзуҳо», ки аз соли 2008 заминашонро ба мақомоти иҷроия супоридаанд ва аз дигар ҷой бо замин таъмин гаштаанд, ба инобат намегиранд. Охир, қариб ҳамаи онҳо ду саҳмӣ замин доранд, ҳатто хоҳароне, ки шаҳрвандии Ӯзбекистонро доранд ва бародари вафоткардаашон низ соҳиби заминанд. 

Мувофиқи маълумотномаҳои ҷамоати деҳот ва кумитаи маҳалла муайян гардид, ки соли 2008 аъзои оилаи Муродовҳо қитъаи заминро самаранок истифода набурда, онро ба алафзор мубаддал гардониданд. Тафтиши муфаттишон гувоҳӣ аз он аст, ки онҳо ба ин ҷиҳати масъала баҳои ҳуқуқӣ надоданд, баракс, собиқ аъзои х\д «Орзу» Муродов Ғуломро дастгирӣ мекунанд. Аҷаб ба назар мерасад: Муфаттишон нишондоди Муродовҳоро бо ҳарфҳои «заррин» менависанд, вале гуфтаҳои мо, андешаҳои мо барои онҳо заррае аҳамият надорад. Чанд нафари дигареро, ки Муродов назди муфаттишон овардааст, аз ӯ пуштибонӣ мекунанд. Барои мисол,  Акмал Ҳоҷимуродов -корманди бонк, Раҳматбой  Гадоев - мутахассиси идораи замин, Худойдод Абдуназаров - мутахассиси заминсозии ҷамоати Х. Алиев. Номбурдаҳо баёноти қаблан дар суд додаи худро иваз намуда, нишондоди бардурӯғ доданд.

Аз ин дарҳамбарҳамии кормандони мақомотҳои ҳифзи ҳуқуқи ноҳия мо, аллакай дилгир шудаем. 

Ба поси арзишҳои демократӣ, ба поси адлу инсоф, хоҳишмандем, ки

маводро барои идомаи баҳс ба Прокуратураи вилояти Суғд ирсол намоед ва аз прокуратураи ноҳияи Зафаробод парвандаи ҷиноятии № 24315-ро гирифта, ба истеҳсолоти Прокуратураи  вилояти Суғд диҳед. 

 

Зафар Даминов -раиси хоҷагӣ,

Мамадкарим Даминов - аъзои хоҷагӣ ноҳияи Зафаробод

Хонданд 4273

Восеъ: Дарди дилро ба кӣ гӯям?

Авг 11, 2018
Хонданд: 2901

(Ё чӣ тавр 0,4 сотих замин 0,66 сотих шуд?

 

Ба Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон

Ба Прокурори Генералии Ҷумҳурии Тоҷикистон, муҳтарам Юсуф Раҳмон

Пешвои муаззами миллати мо! Ҷаноби олӣ!

 Ба Шумо маълум менамоям, ки дар муддати 10 сол 4 нома ба Дастгоҳи иҷроияи Президент навиштам. Супориши хаттии фиристодаи Дастгоҳи иҷроия ба мақомоти вилоятӣ ва ноҳиявӣ зина ба зина омада расиданд. Вале дар мақомоти сатҳи ноҳия ва минтақа аризаро насанҷида, рӯякӣ барои ман ва ба суроғаи Дастгоҳи иҷроия фиристоданд. Ба чор мактуби навиштаам як ҷавоби нусхабардоришударо ба такрор навишта фиристодаанд. Ҳам ба суроғаи ман ва ҳам ба суроғаи Дастгоҳи иҷроия. Ба Прокуратураи генералӣ низ 7 мактуб навиштам, ки оид ба одилона санҷидани арзи банда буд. Боз ҳам ҷавоби носанҷидаро фиристоданд. 3 нома ба номи Раиси вилоят навиштам, ки ба он ҳам ҷавоби маро қонеъкунанда надоданд. 

Аз ин сабаб, маҷбур шудам ин маротиба ба номи Шумо тариқи рӯзнома арзи худро расонам. Ҷаноби олӣ, ба Шумо боварӣ дорам ва ягона умедам аз Худо ва баъдан аз Шумо аст.

Раиси ноҳияи Восеъ Мӯсо Ғафурзода ба 7 номаи навиштаи банда ягон посухи қаноатбахшкунанда надодааст. Қарори баровардаи ҷамоати деҳоти Гулистон оид ба заминҳои наздиҳавлигии 7 нафараи сокинони деҳаи Гулистони ҷамоати деҳоти Гулистон, аз соли 1999, бояд дар бойгонии ҷамоат маҳфуз мебуд. 11 сол аст, ки мо онро суроғ мекунем, вале он беасос нобуд карда шудааст. Дар посухҳои Раиси ноҳия омадааст, ки қарор дар бойгонии ҷамоат нест, балки дар бойгонии шаҳри Кӯлоб аст. Мо ба бойгонии шаҳри Кӯлоб рафта дидем ва ҷавоби хаттӣ гирифтем, ки дар бойгонии шаҳр ва минтақаи Кӯлоб қарори лозима нест.

Бо арзи эҳтиром аз Шумо хоҳиш менамоям, ки ба мо ҷиҳати барқарор намудани адолати судӣ кӯмак намоед. Ҳалномаи судие, ки суди ноҳияи Восеъ оид ба даъвои даъвогаре, аз замини наздиҳавлигии мо, ки дар он хонаи истиқоматиамон ҳаст ва солҳои зиёде зиндагӣ дорем, кӯмак намоед, зеро, ки ҳукм бо якчанд далелҳои қотеъ, ки дар поён қайд карда мешаванд, ғайриобъективӣ ба манфиати даъвогар бароварда шудааст.

Нафари даъвои заминдошта, як нуқтаи фурӯши сӯзишвориро, ки замони давлатӣ буданаш ҳамагӣ ду колонкаи бензинрезии сайёр, як вагон ва 4 сотих замин дошт, пас аз шахсӣ кардан бо роҳи ғайриқонунӣ васеъ карда, барои 66 сотих замин сертификати шубҳанок гирифтааст. Дар сертификат санаи мушаххаси додани он нишон дода нашудааст. Сертификати мазкур таҳти №101А дар Кумитаи замин ба қайд гирифта шудааст ва Суди ноҳияи Восеъ маҳз ҳамин рақами қайдро асоснок намуда, ҳалномаи нодуруст баровард. Суди кассатсионӣ инро бетағир мононд, дар ҳоле, ки ин рақам, яъне №101А на дар китоби бақайдгирии шӯъбаи Кумитаи замин дар ноҳияи Восеъ ва на дар китоби бақайдгирии Кумитаи давлатии замин ва геодезӣ сабт нашудааст. Дар бойгонии ин мақомот низ ягон ҳуҷҷати тасдиқкунанда нест. Мутаасифона, суд ин сертификати шубҳанокро асоснок намуда, ҳалномаро ба манфиати онҳо баровард. Ягон далели пешниҳоднамудаи маро ба инобат нагирифт. На суди ноҳия ва на суди кассатсионӣ китоби бақайдгирии кумитаҳои замини ноҳияву ҷумҳуриро набардошт ва талаб нанамуд, ки қонунӣ будани ин сертификат исбот карда шавад.

Ҳангоми хусусӣ кардани нуқтаи фурӯши сӯзишворӣ ва «зиёд» шудани замини он, ҳамчунин дар ҳуҷҷатҳои таркиби парванда шубҳаҳо ва қонуншиканиҳо ҷой дорад. Бояд гуфт, ки аслан замини маҳалларо чен накарда, барои 66 сотих замин сертификат кардаанд. Аҳли маҳалла ёд надорад, ки касе заминро чен карда бошад. Ҳуҷҷатҳои зиёд, аз қабили ҳуҷҷатҳои пеш аз ғайридавлатӣ кардан, бо нишон додани масоҳати қитъаи замини пешина, эълони музояда ва протоколи он, ҳуҷҷати савдои нархпайдошавӣ дар рафти музояда нест.

Мувофиқи гувоҳнома ва саҳмияҳои директори Базаи нафти ноҳияи Восеъ (ҳозира АООТ «Искандар») Амиров Қувват, ки ҳоло ҳам соҳибмулки ин муассиса мебошаду нуқтаи фурӯши сӯзишворӣ ҷузъи ин муассиса буд, соли 2001 муассисаи мазкур ғайридавлатӣ карда шуд. Соли 2009 бо тартиб додани санади «супоридану қабул» муассиса пурра ба ӯ, яъне Амиров Қ. тааллуқ дошта, ӯ дар гувоҳномааш мегӯяд, ки нуқтаи фурӯши сӯзишвориро ҳеҷ гоҳ нафурӯхтааст. Пас бо кадом роҳ нуқтаи фурӯши сӯзишворӣ шахсӣ карда шудааст?

Гузашта аз ин, дар харитаи замини Хоҷагии деҳқонии «Ҳулбук» қитъаи замини фурӯши маҳсулоти нафтӣ ва истгоҳи хусусигардонидаи шаҳрванд Бобоев У. 0.66 га дарҷ шудааст, ки ин бо харитаи «Баҳисобгирии давлатии миқдори заминҳои истифодабарии меросии якумра», ки харитаи асосии Кумитаи замин ва геодезии Ҷумҳурии Тоҷикистон буда, аз ҷониба ПДА «Тоҷикзаминсоз»-экспедитсияи заминсозӣ тартиб дода шудааст, мувофиқат намекунад. Қитъаи замини баҳсӣ дар харитаи сатҳи ҷумҳуриявӣ ҳамчун маҳалли аҳолинишин нишон дода шудааст. Дар харитаи кумитаи замини ноҳия низ маҳалли аҳолинишин нишон дода шудааст.

Далелҳои қатъӣ аз мақомоти ҳукуматӣ дорам, ки мувофиқи он ҳуҷҷатҳо ва сертификати замини 66 сотихаи нуқтаи фурӯши сӯзишворӣ ғайриқонунӣ ба шумор мераванд.

Мувофиқи мактуби Кумитаи давлатии идораи замин ва геодезии Ҷумҳурии Тоҷикистон таҳти №2/8-02-55 аз 20.10.2017с. ва маълумотҳои бойгонии КВД «Бақайдгирии молу мулки ғайриманқул» то имрӯз ягон шахси воқеӣ барои истифодабарии нуқтаи сӯзишвории мазкур дар деҳаи Гулистони ноҳия Восеъ ва барои бо тартиби муқарарнамуда ба расмият даровардани ҳуҷҷатҳо, муроҷиат накардааст. КВД «Бақайдгирии молу мулки ғайриманқул»-и минтақаи Кӯлоб низ дар мактубаш таҳти №257 аз 10.10.2017с. қайд намудааст, ки мувофиқи ҳуҷҷатҳои бойгонӣ объекти мазкур дар корхона ба қайд гирифта нашудааст. КДФ «Бақайдгирии молу мулки ғайриманқул»-и ноҳияи Восеъ дар мактубаш таҳти №1-26 15.02.2018с. зикр намудааст, ки сертификати 66 сотих замин таҳти №101а  ба номи Бобоев У. дар китоби бақайдгирии сертификатҳои Кумитаи замин ва КДФ-и ноҳияи Восеъ ба қайд гирифта нашудааст ва нусхаи Протоколи қитъаи замини Бобоев У. дар бойгонӣ вуҷуд надорад. Ин далелҳои қотеъ басанда аст, ки сертификати №101а ба номи Бобоев У. барои 66 сотих замин ғайриқонунӣ шуморида шавад.

Ман ба ҳуҷҷатгузории нуқтаи фурӯши сӯзишворӣ кор надорам, ин кори мақомоти давлатӣ аст. Гап сари он аст, ки соҳиби ин нуқтаи сӯзишворӣ заминҳои маро якҷо бо хонаи истиқоматиам «забт» карда, мувофиқи санад оид ба вобаста намудани қитъаи замин барои нуқтаи фурӯши сӯзишворӣ соли 2005 сертификат кардааст. Дар ҳоле, ки хонаи мо бо ҳудуду деворҳояш аз соли 1999 арзи ҳастӣ дорад.

Яке аз далелҳои дигар он аст, ки давоми солҳои зиёд онҳо боре ҳам барои 66 сотих замин андоз насупоридаанд ва ягон расиди супоридани маблағи андоз надоранд. Онҳо гӯё, ки ин объектро ба маблағи 20000 харидаанд, агар чунин аст, бигзор расиди боҷи давлатиро пешниҳод намоянд. Тамоми деҳа медонад, ки ин нуқтаи фурӯши сӯзишворӣ аз худи онҳо буд ва барои хок пошидан дар чашми судҳо ҳуҷҷати хариду фурӯш омода намудаанд. Худи гӯё фурӯшанда Бобоев Пайрав гуфт, ки ба ивази нуқтаи сӯзишворӣ бо 66 сотих заминаш аз касе маблағ нагирифтааст. Чаро Бобоев П.-ро ба суд даъват карда, намепурсанд?

Мо аз соли сохтани хонаи истиқоматӣ ва гирифтани сертификат андози заминро сари вақт месупорем. Нусхаи расиди супоридани маблағи андоз ва маълумотнома дар бораи қарздор набуданро дар даст дорем.

Оне, ки онҳо андози замини 66 сотихаро боре ҳам насупоридаанд, аз он шаҳодат медиҳад, ки ин қитъаи замин ҳеҷ гоҳ ба онҳо тааллуқ надошт.

Ёдовар мешавам, ки мо қитъаи замини наздиҳавлигиро дар асоси ҳуҷҷати тасдиқкунанда - ариза оиди ба мо ҷудо намудани замини наздиҳавлигӣ барои сохтани хонаи истиқоматӣ ба унвони роҳбарияти собиқ «Хоҷагии ба номи М.Маҳмадалиев», (баъдан «Хоҷагии деҳқонии «Ҳулбук» ном гирифт) аз таърихи 20.09.1999с. ҳамчун саҳмдорони ҳамин хоҷагӣ гирифта будем. Дар асоси ҳамин аризаамон намояндаи хоҷагии мазкур омада, ба мо хоҷагидорон иборат аз 7 нафар аз 8 то 12 сотихӣ заминро ҷудо карда дод ва сипас кумитаи замини ноҳия парвандаи замин ва дигар ҳуҷҷатҳои тасдиқкунандаро омода намуд. Аз ҳамон вақт сар карда, ман Иброҳимов Ҷ. ва хоҳарам Боймуродова О. бо аҳли оилаамон дар ҳамин замин, аз соли 1999 хонаи истиқоматӣ сохта, зиндагӣ дорем. Мутаасифона ин дар ҳалномаи судӣ қайд нашудааст. Далели барои мо ҷудо кардани қитъаи замин барои сохтани манзили истиқоматиро Раиси ҷамоати деҳоти Гулистон дар ҷавоби мактуби ман соли 2018 дар мактубаш таҳти №1/139 аз 14.03.2018 с. тасдиқ намудааст.

Сипас дар асоси ҳамин Қарори хоҷагӣ соли 2007 тибқи Қарори ҷамоъати деҳоти Гулистон таҳти №129 аз 13.07.2007с. ба мо (Иброҳимов Ф. ва Боймуродова О.) сертификати ҳуқуқи истифодабарии меросии якумраи замин ба миқдори 12 сотихӣ ба ҳар кадом доданд, ки ин дар китоби бақайдгирии ҳуқуқи истифодаи замини Кумитаи замини ноҳия таҳти № 6536 ва № 6537 ба қайд гирифта шудааст. Ҳуҷҷатҳои номбаркардашуда дар «Парвандаи замин»-и мо М3-2559 аз соли 2005 инҷониб дар бойгонии Кумитаи замин ва геодезии Ҷумҳурии Тоҷикистон таҳти № 19805 маҳфуз аст. Нақшаи замине, ки кумитаи замини ноҳия барои мо ҷудо кардааст дар харитаи заминсозӣ нишон дода шудааст ва он бо харитаи «Баҳисобгирии давлатии миқдори заминҳои истифодабарии меросии якумра», ки харитаи асосии Кумитаи замин ва геодезии Ҷумҳурии Тоҷикистон, ки ПДА «Тоҷикзаминсоз»-экспедитсияи заминсозӣ тартиб додааст, пурра мувофиқат мекунад. Қитъаи замини баҳсӣ дар харитаи ҷумҳуриявӣ ҳамчун заминҳои истифодабарии меросии якумраи аҳолинишин нишон дода шудааст. Дар харитаи кумитаи заминсозии ноҳия низ қитъаҳои замини мо дуруст нишон дода шудаанд, ки бо харитаи ҷумҳуривӣ мувофиқат менамояд.

Қайд кардан зарур аст, ки қариб нисфи 66 сотих замини ба таври шубҳаовар сертификаткарда аз ҳисоби заминҳои ҳамшафати шоҳроҳи нақлиётгарди ҷумҳурӣ мебошад, ки  ин худ мухолифи Қарори Ҳукумати ҶТ, таҳти №214 аз 6 майи соли 2006 мебошад. Инро ҳам суд ба назар нагирифт, ҳарчанд ман инро хаттӣ ба суд пешниҳод намудам. Мувофиқи ин қарор паҳноии 25 метр аз роҳ бояд ҳамчун минтақаи ҳифзшавандаи ҳамшафати роҳ дар тавозуни Вазорати нақлиёти ҶТ бошад, аммо онҳо бе  ягон асос то шоҳроҳи автомобилгард ба сертификат даровардаанд. Нуқтаи фурӯши сӯзишворӣ, ки дар замони шуравӣ ҳамагӣ 4 сотих буд, аз ҳисоби заминҳои аҳолинишини ҷамоати деҳот ва заминҳои ҳамшафати шоҳроҳи автомобилгард бе розигии Вазорати нақлиёти ҶТ 66 сотих карда шудааст.

Хоҳиш менамоям, ки аз мақомотҳои дахлдор ҳамаи ҳуҷҷатҳои ибтидоии ин нуқтаи фурӯши сӯзишворӣ, яъне ҳуҷҷатҳои пеш аз хусусигардониро дастрас ва пешниҳод намоянд. Дар он ҳуҷҷатҳо масоҳати аслии замини нуқтаи фурӯши сӯзишворӣ дарҷ шудааст. Қарори раиси ноҳия таҳти №182 аз 20.10.1997с. барои ғайридавлатӣ гардонидани якчанд муассисаву идораҳои умумии техникии худи ноҳия аст, на барои ғасби заминҳои аҳолинишини хоҷагии ҷамоат. Онҳо ҳамин Қарори раиси ноҳияро истифода намуда, қонуншиканиҳои зиёде намудаанд.

Сертификатҳои моро суди ноҳияи Восеъ ҷиҳати аслӣ буданаш ба Маркази ҷумҳуриявии экспертизаи судӣ ва криминалистии назди Вазорати адлияи ҶТ фиристод ва баъд аз гузаронидани экспертиза Маркази мазкур тибқи хулосаи ташхисӣ комплексии судӣ - техникии ҳуҷҷатҳо, таҳти №-01-02-3288/2016, аз 17 октябри соли 2016, аслӣ ва ҳақиқӣ будани сертификатҳои моро тасдиқ намуд.

Инчунин, дуруст будани сертификатҳои моро Кумитаи замини ҶТ бо ирсоли мактуб тасдиқ намудааст.

Аммо суди ноҳияи Восеъ ноадолатона дар «Ҳалномаи судӣ»-и худ сертификатҳои моро беэътибор донист. Мо ин ҳалномаро ноадолатона меҳисобем ва бо он розӣ нестем. Ҳуқуқҳои мо дар вақти баррасии парвандаи шаҳрвандӣ поймол шуда, раискунанда намегузошт, ки озодона баромад кунем, ба тарафҳо саволҳо диҳем. Саволу ҷавобҳои моро дар протоколи маҷлиси судӣ ба пуррагӣ қайд накарданд. Раискунанда яктарафа амал кард ва танҳо нишондоди намояндаи даъвогарро ба инобат гирифта, баррасии парвандаро пеш бурд. Инчунин, дар мурофиа аз кумитаи замини ноҳия ҳамчун намоянда шахсеро даъват карданд, ки оид ба ин қитъаи замин чизеро намедонад ва ба иқрори худаш, дар он ҷо ягон бор  набудааст.

Вақте мо ба суди кассатсионӣ муроҷиат намудаем, он низ ҳамагӣ як бор моро даъват намуда, дар 25-30 дақиқа корашро анҷом дод ва ба мо эътибор ҳам надода, қайд намуд, ки баъди баровардани қарор ҳукмашро хаттӣ пешниҳод менамояд.

Баъдан маълум шуд, ки дар ҳарду марҳила ҳукмро бетағйир монондааст. Суди вилоятӣ низ ба доди мо нарасида, ҳукмро бетағйир мононд.

Ҳамин бедодгариҳо сабаб шуд, ки ба Шумо – Ҷаноби олӣ, бо умед муроҷиат намуда истодаем.

Пешвои муаззами миллат, аз Шумо хоҳиш менамоям, ки барои барқарор намудани адолат кӯмак намоед.

Далел ва ҳуҷҷатҳои лозимаро дар даст дорам ва ҳангоми лозим шудан пешниҳод хоҳам кард.

Бо эҳтиром,

Иброҳимов Ҷ.Б., 

сокини ноҳияи Восеъ, ҷамоати деҳоти Гулистон,

 деҳаи Гулистон

Хонданд 2901

Салом ба ҳафтаномаи дӯстдоштанӣ ва хондании ҳамагон - “Фараж”. Ман низ яке аз хонандагони доимии ҳафтанома ҳастам ва хуб медонам, ки барои ҳалли садҳо масъалаҳои оилавӣ, гражданӣ ва судию иқтисодӣ ин расона мусоидат кардааст ва ҳатто бештар аз баъзе мақомот саҳмгузор шудааст.

Хонданд 2735

Ба Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон

Ба раиси Суди Олии Ҷумҳурии Тоҷикистон, муҳтарам Шермуҳаммад Шоҳиён
Ба Прокурори генералии Ҷумҳурии Тоҷикистон, муҳтарам Раҳмон Юсуф
Ба сардори Агентии назорати давлатии молиявӣ ва мубориза бо коррупсияи Ҷумҳурии Тоҷикистон, муҳтарам Султонзода Сулаймон

Ба маълумоти Шумо, Ҷаноби Олӣ, мерасонем, ки мо якчанд маротиба ба мақомоти марбута нисбати ҳаракатҳои ғайриқонунии сокинони шаҳри Хуҷанд Лимонов Алексей ва ҳамсараш Ховрина Татяна муроҷиат карда будем. Вале шикоятҳои ирсол кардаи мо аз тарафи мақомоти ҳифзи ҳуқуқи Ҷумҳурии Тоҷикистон бевосита баррасӣ нагардида, ба истеҳсолоти мақомоти поён, ки мо аз болои онҳо шикоят мекардем, фиристода шуданд. Дертар ба мо маълум шуд, ки сабаби ҳал нашудани масъалаи ба миён омада дар он будааст, ки гӯё дар ин кор мансабдори воломақоме манфиатдор буда, солҳои тӯлонӣ тарафи Лимонов Алексей ва Ховрина Татянаро мегирифтааст ва маҳз аз ҳамин сабаб аризаю шикоятҳои мо яктарафа баррасӣ шудаанд. Аз ин рӯ, мо маҷбур шудем, ки шахсан ба Шумо, Ҷаноби Олӣ, муроҷиат намоем ва хоҳиш дорем, ки комиссияи давлатӣ аз ҳисоби ҳуқуқшиносони таҷрибанок тартиб диҳед, то ки онҳо тамоми ҳалномаҳо ва ҳукмҳои баровардаи судҳои шаҳрӣ ва вилояти Суғдро нисбати ҳамин ҳодиса таҳти санҷиш қарор диҳанд.
Аз соли 2005 ин ҷониб ҳамаи аризаҳои даъвогии Лимонов Алексей ва Ховрина Татяна аз ҷониби судяҳои суди ноҳиявӣ, шаҳрӣ ва вилоятӣ танҳо ба манфиати онҳо беасос ва ғайриқонунӣ ҳал шуданд.
Айни ҳол моро мақомоти судӣ бесарпаноҳ монда истодаанд, яъне аз манзилҳои истиқоматӣ бо аъзои оилаамон, ки дар байни онҳо калонсолону кӯдакон ҳам ҳастанд, кӯчонида истодаанд. Дар давоми беш аз 30-40 сол инҷониб дар корхонаҳои давлатӣ фаъолият бурда, бо меҳнати ҳалол соҳиби манзили истиқоматии 1-2-3-ҳуҷрагӣ шудем ва зиёда аз 25-30 сол дар қайд истода, зиндагӣ мекунем. Доир ба ин ҳодиса қайд карданием, ки Суди шаҳри Хуҷанд парвандаи гражданӣ бо даъвои Ховрина Татянаро оид ба кӯчонидан аз манзили истиқоматӣ бе додани дигар манзил бо ҳарфҳои «заррин» навишта, аризаи даъвогии моро нисбати Ховрина Т. оид ба беэътибор донистани шартномаи хариду фурӯши манзили истиқоматӣ рад намуд. Судҳои болоӣ дар навбати худ ин ҳалномаҳои ғайриқонунӣ баровардаро дастгирӣ карда истодаанд.
Шаҳрвандон Ховрина, шавҳари марҳумаш Лимонов ва шахси сеюм, ронанда Мамедов Тимур солҳои 2005-2008 ҳамчун қарздиҳандагон «просентчиҳо» ба ҳисоб рафта, гуруҳи калони сокинони вилояти Суғдро фиреб дода, ба боварии онҳо даромада, маблағҳои калонро бо фоизи баланд қарз медоданд ва шарт мегузоштанд, ки ҳар шахси қарзгиранда тамоми ҳуҷҷатҳои манзили истиқоматиашро ба идораи нотариалӣ бурда, дар он бо қарздеҳ шартномаи хариду фурӯши манзилро рӯякӣ бандад, танҳо дар ҳамон ҳолат маблағро ба сифати қарз медиҳанд.
Солҳои 2005-2006 аз онҳо маблағҳои гуногуни пулӣ гирифтем ва ҳар моҳ фоизашро бармегардонидем. Бар ивази ин Лимонов аз мо талаб менамуд, ки манзили истиқоматиамон, воқеъ дар шаҳри Хуҷанд бударо ба номи як зани рус ба расмият дароварда диҳем, аммо он занро тамоман надидаем ва бо ӯ ягон муносибати доду гирифти пулию молӣ надоштем.
Ҳамин тавр, мо тамоми маблағҳои қарз гирифтаамонро ба Лимонов медодем, баъдтар фоизҳои онро ба воситаи ронандаи Лимонов - Мамедов Тимур пардохт мекардем. Айни ҳол мо аз Ховрина ва марҳум Лимонов қарздор нестем.
Ховрина ва Лимонов солҳои тӯлонӣ аз мо бо фиреб маблағҳои калони пулиро бо фоизаш тамаъҷӯёна рӯёнида, намехоҳанд манзили истиқоматиамонро ба номи мо ба расмият дароранд. Айни ҳол ба мо маълум шуд, ки Ховрина ва Лимонов бо ҳамин роҳи ғайриқонунӣ на фақат мо, балки 60-70 нафар сокинони вилояти Суғдро фиреб дода, соҳиби фоизҳои калон шуданд ва аз ин даромади ба даст овардаашон ягон сомонӣ андоз насупоридаанд. Илова бар ин, Ховрина ва Лимонов чандин оилаҳоро бе хонаву дар карда, куҳансолону кӯдаконро сарсон намуданд, ки онҳо бо машаққати зиёд дар хонаҳои мардум иҷоранишинӣ мекунанд. Кайҳо вақти он расидааст, ки Ховрина ва Лимонов барои кирдорҳои ғайриқонуниашон дар назди қонун ҷавоб диҳанд. Болои мурда сад чӯб гуфтагӣ барин, онҳо бо ёрии адвокаташон Турсунов Наим ба суд аризаҳои бардурӯғи даъвогӣ пешниҳод намуда, кӯшиш мекунанд, ки моро аз манзиламон кӯчонанд. Кор ба ҷое расид, ки баъзе мурофиаҳои судиро онҳо ба манфиати худ ҳал намуданд, ҳол он ки дар аксари ин мурофиаҳо Ховрина иштирок накардааст.
Адвокати Ховрина дар асл манзили моро аз назар нагузаронида, фақат дар идораи нотариалӣ имзо гузоштааст. Вай бо ҳамин роҳ мехоҳад, ки асли воқеа ба суд маълум нагардад.
Тамоми шартномаҳо рӯякӣ буда, ҳамчун хариду фурӯш ба расмият дароварда шудаанд, дар асл манзилҳои истиқоматиамон ҳамчун гарав дар идораи нотариалӣ бояд ба расмият дароварда мешуданд. Мо айни замон бовар дорем, ки нотариусҳои давлатӣ ба ин амалҳои Ховрина ва Лимонов алоқамандӣ доранд ё манфиатдор ҳастанд. Мо беҳуда ба чунин хулоса наомадем, зеро агар аз бойгонии нотариуси давлатӣ нусхаҳои шартномаҳо бардошта шаванд, маълум мегардад, ки ба номи Ховрина на кам аз 60-70 манзили истиқоматӣ ба қайд гирифта шудаанд. Он вақт маълум мегардад, ки маҳз кадом нотариусҳои давлатӣ чунин амалиётҳоро ба расмият даровардаанд. Дар асоси аризаҳои мо Прокуратураи вилояти Суғд шартномаҳои хариду фурӯши ба расмият даровардаи Ховринаро талаб карда гирифт. Маълум шуд, ки танҳо дар вилояти Суғд ба номи Ховрина 58 адад шартномаи хариду фурӯш ба расмият дароварда шудааст. Ховрина бо ҳамин роҳ сокинони вилояти Суғдро фиреб дода, соҳиби маблағҳои калон шудааст, вале касе пишаки ӯро «пишт» намегӯяд. Сабаби инро мо фаҳмида натавонистем.
Ховрина аз ҳисоби маблағҳои ба даст даровардааш сарватманд шуда, дар мақомоти гуногун ҳаммаслакон пайдо кардааст ва бо мадади онҳо мурофиаҳои судиро ба манфиати худ ҳал менамояд.
Ҳоло Мамедов Тимур дар суд баёнот дода истодааст, ки қисми зиёди қарзгирандагонро шахсан ӯ бо Лимонов шинос намудааст ва маблағро гирифта додааст. Барои дар оянда тамоми маблағҳояшро бо фоизаш баргардонида гирифтанаш, ба қарзгирандагон шарт мегузошт, ки танҳо дар ҳолати ба гарав гузоштани тилловорӣ ё ба расмият даровардани манзилҳои истиқоматӣ бо бастани шартномаи хариду фурӯши манзил дар идораи нотариалии давлатӣ қарз медиҳад. Дар ҳолати дигар вай ба касе қарз намедиҳад. Аммо судҳо бо сабабҳои номаълум баёнотҳои шоҳид Мамедов Тимурро тамоман ба эътибор нагирифтанд. Ин амалҳои судяҳо тамоман ба қонун ҷавобгӯ нестанд.
Ховрина шаҳрванди Ҷумҳурии Тоҷикистон набуда, метавонад дар дигар давлат паноҳгоҳ ёбад ва аз мақомоти қудратии Тоҷикистон пинҳон шавад. Аз гуфтаи ҳамсояҳо бармеояд, ки Ховрина аз ҳудуди Ҷумҳурии Тоҷикистон баромадааст ва бо ҳамин сабаб дар маҷлисҳои судӣ иштирок намекардааст.
Мо ба раиси Суди вилояти Суғд ва прокурори вилоят бо ҳамроҳи 6 нафар шаҳрвандон муроҷиат карда будем, вале ягон чораи қонунӣ андешида нашуд ва дар охир маҷбур шудем, ки ба Шумо муроҷиат кунем.
Ҳамчунин, намояндаи Ховрина Т. - Турсунов Наим вақти вохӯрӣ бо мо якчанд маротиба талаб намуд, ки дар ҳолати ба миқдори 5000 доллари ИМА ба ӯ додан, вай барои аз сари нав ба расмият даровардани ҳуҷҷатҳои манзили истиқоматиамон кӯмак мерасонад.
Азбаски мо тамоми маблағҳои қарз гирифтаамонро бо фоизаш ба Лимонов Алексей дода будем, бинобар ҳамин таклифи ӯро рад кардем.
Мо бовар надорем, ки ин гуфтаи Ховрина Т. бошад, зеро дар асл ягон маротиба бо Ховрина дар ин бора гуфтушунид накардаем.
Бо такя ба гуфтаҳои дар боло қайдшуда, аз Шумо эҳтиромона хоҳиш менамоем, ки аризаи дастҷамъонаи моро дар доираи қонунҳои амалкунандаи Ҷумҳурии Тоҷикистон санҷед, зеро имрӯз мо танҳо ба Шумо бовар дорем ва медонем, ки Шумо ҳақиқатро рӯйи об бароварда, ҳақро ба ҳақдор мерасонед.

Олимҷонова Сапарҷон,
сокини шаҳри Хуҷанд, маҳаллаи 32, бинои 58, ҳуҷраи 33,
Раупова Дилором,
сокини шаҳри Хуҷанд, маҳаллаи 34, бинои 34, ҳуҷраи 34,
Рустамова Фотима, сокини шаҳри Хуҷанд, маҳаллаи Баҳор, хонаи 3, ҳуҷраи 48,
Турсунова Саломатҷон,
сокини шаҳри Хуҷанд, маҳаллаи 8, бинои 100, ҳуҷраи 106

Хонданд 2774

Хабари-рӯз

Календар

« Ноябрь 2018 »
Пн Вт Ср Чт Пт Сб Вс
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    

Минбари сардабир

  • симКАРта

    Дар ҳафтае, ки гузашт, дар шабакаҳои иҷтимоӣ ин калима аз…

Нигоҳи хос

Парадокс

Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ...
Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ба ...
Гуфтед? Мегӯянд! (№3
Бег САБУР, раиси Хадамоти алоқа:- Ман қарорамро бекор накардаам.Танз: Офарин ба Шумо, оғои Бег ...
Гуфтед? Мегӯянд! (№2
Аскар ҲАКИМ, Шоири халқии Тоҷикистон:- Дар замони шӯравӣ мо асареро пайдо намекунем, ки дар ...
Гуфтед? Мегӯянд! (№1
Абдуалим ИСМОИЛЗОДА, раиси шаҳри Қӯрғонтеппа Хонандаи беҳтарин- Кӯшиш мекунам ҳар рӯз лоақал ...

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.