.

Alternative flash content

Requirements

Get Adobe Flash player

Муроҷиати шаҳрвандон

Роҳи ҳавлиамро бастанд

Сен 23, 2017
Хонданд: 1204

Ба таваҷҷуҳи Асосгузори сулҳу ваҳдати миллӣ - Пешвои миллат,

Президенти Ҷумҳурии Тоҷикистон, муҳтарам Эмомалӣ Раҳмон

Имрӯз ман маҷбур шудам ба Шумо муроҷиат намоям, зеро дигар илоҷе наёфтам. Манзили ман дар яке аз тангкӯчаҳои шаҳри Хуҷанд ҷой гирифтааст. Дар кӯчаи мо ҳамаи ҳамсояҳо бо ҳам дӯсту тифоқ буданд, вале ҳамсояам Арипов Орифхуҷа бо мақсади нишон додани бартарии худ ва гирифтани қасд, гӯё падараш аввал дар ҳавлиаш ва баъдан дар ҳудуди кӯчаи роҳгузар, ки истифодаи умум ва даромад ба хонаи ман ҳисоб меёфт, ибтидои соли 2016 манзили боҳашаммати сеошёна сохтааст, баромадгоҳи моро деворпеч кард. Рафту ягон нафари аҳли оила вафот кунад, илоҷи аз тангкӯча баровардани тобут намешавад. Ман борҳо ба О. Арипов муроҷиат карда, хоҳиш намудам, ки роҳгузарро банд накунад. Вай бошад, қарори Ҳукумати шаҳри Хуҷандро нишон дода, мегуфт, ки ба ин қитъа ҳаққу ҳуқуқ дорад ва ба он қонунӣ соҳиб шудааст. Ман ба гуфтаҳои вай бовар накарда, ба Ҳукумати шаҳр ва прокуратураи Хуҷанд муроҷиат намудам. Вақти санҷиш онҳо муайян карданд, ки қарори мазкур сохтакорона будааст.

Нисбати ин ҳодиса ба О. Арипов ва кормандони масъули Ҳукумат ва Кумитаи идораи замини шаҳри Хуҷанд аввал бо моддаи 340 қисми 2 бандҳои «б», «в» ва баъдан бо моддаи 338 қисми 2-и Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, мавриди тафтиш қарор дода шуд. Зимни тафтиш ҳудуди худсарона ишғол намудаи О. Арипов ва сохтмони худсарона бунёд кардаи вай ва қалбакӣ будани қарори дар даст доштааш ба пуррагӣ тасдиқи худро ёфтанд, нафарони бевосита қарорро бо роҳи сохтакорӣ омода намуда ба гуноҳашон иқрор шуданд. Гуноҳи О. Арипов ва дигар ҳаммаслаконаш бо моддаҳои 340 қисми 2 бандҳои «б, в» ва 338 қисми 2 Кодекси ҷиноятии Ҷумҳурии Тоҷикистон тасдиқ шуд. Бо ҳукми Суди шаҳри Хуҷанд аз 20-уми марти соли 2017 нисбати онҳо Қонуни ҶТ «Дар бораи авф» татбиқ гашт.
Баъдан дар асоси шикоятии О. Арипов бо таъиноти коллегияи суди вилояти Суғд аз 31.05.2017 ҳукми суди марҳилаи аввал бекор ва парвандаи ҷиноятӣ барои баррасии нав ба ҳамон суд ба ҳайати дигар равона карда шуд.
Шикояти мо нисбати ҳамон таъинот ҳоло баррасӣ нагардида, бо таъиноти судӣ аз 14-уми августи соли 2017 парвандаи ҷиноятӣ бе ягон асос ва тафтишоти иловагӣ баргардонида шуд, гӯё дар кирдори О. Арипов ҷиноят мавҷуд набуда, он бояд қатъ карда шавад. 
Ин дасисабозӣ беҳуда нест. Аз гуфтаи кормандони суд маълум мешавад, ки баъзе масъулини прокуратура ва суди вилоят тарафи О. Ариповро мегиранд. Онҳо овоза паҳн карданд, ки ҳамаи ин бо роҳбарони мақомот мувофиқа карда шудааст. 
Чӣ гуна мувофиқаоварӣ? Агар ба тафтишоти иловагӣ зарурат бошад, пас барои чӣ коллегияи суди вилоят на ба тафтишоти иловагӣ, балки барои баррасии нав ирсол намуд? Зери ин коса кадом нимкоса бошад, ки як қатор кормандони суди шаҳр ва вилоят оид ба мувофиқа шудан бо «боло» ва аз «бозӣ» баровардани О. Арипов ҳарф мезананд? Агар кас бо таъиноти судӣ аз 14-уми августи соли 2017 шинос шавад, асоси воқеӣ надоштанашро мефаҳмад. 
Дар тафтишоти пешакӣ, ки беш аз шаш моҳ кори худро давом дод, пурра таркиби ҷиноят аз тарафи мутахассисони дахлдори ҳам шаҳри Хуҷанд ва ҳам вилояти Суғд ҳаматарафа омӯхта шуда буд ва натиҷаи он зиёда аз 600 варақ дар се боб, ки пурра айбдории судшавандаро бо факту далелҳо, бо нишондодҳои шоҳидони зиёд нисбати вуҷуд доштани ҷиноят, ҳамчунин ишғоли қитъаи замин, қарори раиси шаҳри Хуҷанд №365 аз 15.08.2016 оид ба ҳолати аввала баргардонидани қитъаи заминро пурра собит намуд.
Ҳатто судя, ки қарори мазкурро қабул кардааст, дар ҳайрат мебошад. Чанд маротиба намояндагони ҳифзи ҳуқуқ аризаи маро баррасӣ карданд ва ба ҷои ҳодиса наомаданд. Онҳо бо қоғазбозӣ мехоҳанд ҷинояти ошкоршударо рӯйпӯш намоянд ва адолати судиро поймол созанд. Як солу ҳашт моҳ инҷониб дар таҳқири ошкоро мебошам ва мақомоти тафтишотиву судӣ дидаву дониста шахсеро, ки аз ҷиҳати моддӣ доро асту ҷиноят содир намудааст, тарафгирӣ менамоянд. Нафареро тарафгирӣ менамоянд, ки бинои қаср монанди сеошёна сохта, роҳи ягонаи умумро худсарона забт намудааст.
Гуноҳи О. Арипов натанҳо ба мақомоти тафтишоти пешакӣ ва суд, ки дорои донишҳои махсус мебошанд, балки ба сокинони кӯча низ бараъло маълум буда, ба манфиати мардум зарари моддӣ ва маънавӣ расонидааст. Зеро роҳрави кӯча хеле танг шудааст, ки ин ҳолат боиси норозигии сокинон ва сабаби ба мақомоти дахлдор муроҷиат кардани онҳо гаштааст.
Суди марҳилаи кассатсионӣ бархилофи талаботи моддаи 364 КМҶ Ҷумҳурии Тоҷикистон амал карда истода, парвандаи ҷиноятиро яктарафа ва ғайрихолисона баррасӣ намуда, ҳолатҳои дар боло зикршударо сарфи назар карда, ба хулосаи нодуруст омадааст.
Суди марҳилаи кассатсионӣ танҳо дар асоси ваҷҳҳои шикояти кассатсионии маҳкумшуда тафтишоти пешакӣ ва судиро яктарафа ҳисобида, бекор кардани ҳукми суди марҳилаи якум ва ба тафтиши иловагӣ баргардонидани парвандаи ҷиноятиро хоҳиш кардааст ва ба дигар далелҳои парвандаи ҷиноятии гунаҳгории маҳкумшуда аҳамият надодааст.
Суди номбурда ба ҳолате, ки судшаванда худашро гунаҳгор наҳисобидааст ва аз ҷониби маҳкумшуда дар рафти мурофиаи судӣ қарори сохтакоронаро ба корхонаи фаръии бақайдгирии техникӣ супоридаашро сарфи назар кардааст. Инчунин, суд ҳолати ишғол кардани қитъаи замини умум, яъне кӯчаро сарфи назар карда, бо таъиноти худ манфиати ҳифзшудаи сокинонро поймол кардааст. Зеро мутобиқи қарори раиси шаҳри Хуҷанд таҳти №365 аз 15-уми августи соли 2016 сохтмони худсарона дар қитъаи замини ғайриқонунӣ ишғол намудаи О. Арипов дар масоҳати 130 метри мураббаъ, воқеъ дар кӯчаи А. Расулов, №143, шаҳри Хуҷанд бартараф карда шуда, он бояд ба ҳолати аввала баргардонида мешуд. Қарори мазкур бинобар мавҷуд будани парвандаи ҷиноятӣ ва баррасӣ нашудани он то ҳол ба иҷро нарасидааст. О. Арипов бо баҳонаи зиёд иҷрои қарори мазкурро кашол медиҳад.
Хулосаи дигари суди марҳилаи кассатсионӣ вобаста ба ташхиси гузаронидашуда, ки тибқи он ҳар ду қарор ҳақиқӣ мебошанд, беасос ва ғайриқонунианд. То ҳол бо сабабҳои номаълум қарори №365 аз 15-уми августи соли 2016 оиди ба ҳолати аввала баргардонидани замини худсарона ғасб намудаи О. Арипов мавриди иҷро қарор дода нашудааст. 
Хулосаи дигари марҳилаи кассатсионӣ, ки гӯё суди зинаи якум хилофи талаботи моддаи 334 КМҶ Ҷумҳурии Тоҷикистон амал кардааст, беасос мебошад.
Суди марҳилаи якум бо парвандаи ҷиноятӣ, маҳал, вақт, тарзи содир шудани он, намуди гуноҳ, сабаб, мақсад ав оқибатҳои содир шудани ҷиноятро бараъло нишон додааст. Вале суди марҳилаи кассатсионӣ хулосаҳои суди марҳилаи якумро беасос ва хилофи қонун ҳисобидааст, ки мутлақо нодуруст аст.
Мутобиқи қисми 2-и моддаи 412 КМҶ Ҷумҳурии Тоҷикистон, таъиноти суди марҳилаи кассатсионӣ бояд бекор карда шавад.
Бинобар ҳамин, аз Шумо, муҳтарам Пешвои миллат, хоҳиш менамоям, ки қазовати ин масъаларо ба Суди Олии ҷумҳурӣ ва Прокуратураи генералӣ вобаста кунед. Ин гуфтаҳои ман ҳавоӣ нестанд, зеро муддати беш аз як соли сарсонӣ ман ба чунин хулоса омадам. Мақомоти дахлдор дар ин муддат рӯирост сафедро «сиёҳ», сиёҳро «сафед» гуфтанд. Нафарони ин масъаларо баррасикарда ҳатто ягон маротиба ба ҷойи ҳодиса омада воқеаро надиданд. Магар бо чунин корбарӣ масъала ҳалли худро меёбад? Куҷост масъулият ва адолат?...

Абдурозиқ ОРИПОВ,
сокини кӯчаи А. Расулови шаҳри Хуҷанд

Хонданд 1204

Як гурӯҳ ҷавонони Тоҷикистон ба дафтари намояндагии Иттиҳоди Аврупо дар шаҳри Душанбе ва ба дафтари Созмони амният ва ҳамкории Аврупо (САҲА) дар шаҳри Душанбе вобаста ба нишасти ахири мухолифин дар Варшава муроҷиатнома ирсол кардаанд, ки нусхаи он ба дасти редаксияи мо расид. Матни пурраи муроҷиатнома чунин аст:

«Мо ҷавонони Ҷумҳурии Тоҷикистон чандин маротиба аст, ки ба дафтари намояндагии Иттиҳоди Аврупо ва созмонҳои бонуфузи аврупоӣ, ки муқими Тоҷикистон мебошанд, муроҷиат карда мерасонем, ки гурӯҳҳои ҷиноятпешаи ташкилоти эсктремистӣ-террористии Ҳизби Наҳзати Исломии Тоҷикистон (ҲНИТ) дар якҷоягӣ бо ҳаракати экстремистии «Гурӯҳи-24» ва «Ватандор» бо роҳбарии Муҳиддин Кабирӣ ва ҳаммаслаконаш чанд вақт боз дар ба дари ташкилоту созмонҳои Аврупо гаштугузор доранд ва бо ҳамин роҳ мехоҳанд, ки ҷиноятҳои содирнамудаи худ ва ҳаммаслаконашро пӯшонанд. Лекин аз чӣ сабаб бошад, ки кишварҳои Аврупо аз намояндагони созмонҳои худ, ки дар Тоҷикистон кору фаъолият доранд намепурсанд, ки барои чӣ ба муроҷиатномаҳои чандинкаратаи ҷавонони Ҷумҳурии Тоҷикистон посух намегӯянд.

Ба назар чунин менамояд, ки кишварҳои Аврупо мехоҳанд, ки Тоҷикистон ҳам мисли кишварҳои ҷангзадаи Шарқи Наздик аз сари нав боз ба хуну хок оғушта гардад. Ростӣ мо ҷавонони Ҷумҳурии Тоҷикистон аз чунин рафтори мақомоти расмии кишварҳои аврупоӣ, ки намояндагони худро бо сад орзую умед вакили Парлумони Аврупо интихоб намуда, мехоҳанд, ки чӣ дар кишварҳои Аврупо ва чӣ дар кишварҳои дунё пеш аз ҳама сулҳу субот, озодӣ ва тараққиёту пешравиро дастгирӣ намоянд, на балки дастгири террористону экстремистон бошанд.

Мо ҷавонони Тоҷикистон бори дигар хотиррасон мекунем, ки Ҷумҳурии Тоҷикистон аз давраи ба даст овардани истиқлолияти давлатӣ ба хотири сарҷамъии мардум ва сулҳу осоиштагӣ дар кишвар чун дигар ҳизбҳои сиёсӣ ба собиқ ҲНИТ имконияти васеъ фароҳам овард, ки дар фазои сиёсии кишвар кору фаъолият намуда, дар ба эътидол овардани оромӣ осудагии мардум саҳмгузор бошанд аммо ин ҳизби ба ном исломӣ дар давоми фаъолияташ барои тараққиёту пешрафти ҷомеа, ташаккули фарҳангии ва сиёсии мардуми кишвар алалхусус ҷавонон кореро ба анҷом нарасонид. Баръакс аъзоёни ҲНИТ ба ҷинояткорӣ, фисқу фасод ва тафриқаандозӣ дар байни мардум даст заданду халос.

Мо ҷавонон дар чунин андешаем, ки кӯшишу талоши кишварҳои Аврупо ва созмонҳои бонуфузи он аз Ҳукумати Тоҷикистон барои озод кардани ҷинояткороне, ки хуни ноҳақ рехтанд ва мехоҳанд боз ба сари мардуми азияткашидаи тоҷик, ки талхии ҷангу кашмокашиҳоро дидааст, бараъло ҳақиқат адолатхоҳ ва демократӣ будани созмонҳои кишварҳои тараққикардаи Аврупоро зери суол мегузорад.

Барои мо ҷавонони Ҷумҳурии Тоҷикистон боиси нигаронӣ аст, ки чаро кишварҳои Аврупо ва созмонҳои бонуфузи он ба гуфтаҳои бофтаи М.Кабирӣ бовар мекунанду ба факту рақамҳо, ки далели рӯшани исботи ҷиноятҳои содирнамудаи ҳизбу ҳаракатҳои ифротӣ мебошанд ва аз тарафи мақомоти расмии Тоҷикистон пешниҳод карда мешавад, бовар намекунанд. Талоши кишварҳои Аврупо аз нигоҳи мо ҷавонон «стандартҳои дугона»-ро мемонад. Дар сухан муборизи зидди терроризм ва экстремизм буда, дар амал мақсаду мароми дигар дар андешаашон доранд.

Агар ин хел набошад, пас мисоли равшанеро барои кишварҳои Аврупо барои қазоват пешниҳод менамоем, айни замон ба ҷаҳониён маълум аст, ки маҳз бетарафӣ ва «стандартҳои дугона»-и кишварҳои абарқудрати дунё дар кишварҳои Шарқи Наздик ба он оварда расонд, ки ташкилоти террористӣ ба ном «Давлати исломӣ» пайдо гардид, пурсида мешавад, ки магар имрӯз абарқудратҳо наметавонанд, ки якҷоя ин гурӯҳи террористиро аз байн бубаранд, албатта метавонанд, маҳз ана ҳамон сиёсати «стандартҳои дугона» пеш гирифтани кишварҳои абарқудрати дунё, Аврупо ва аз паси ангуштон назар кардани мушкилоти кишварҳои даргир, мардуми бечора ва бегуноҳи ин минтақаҳоро ба бало гирифтор кардааст. Имрӯзҳо мебинем, ки садҳо ҳазор нафар кушта шудаву миллионҳо нафари дигар бесарпаноҳ дар қаламрави кишварҳои Аврупо сарсону саргардон гашта истодаанд.

Мо ҷавонони аз саҳифаҳои таърихи навини тоҷикон дар ёд дорем, ки дар давраҳои аввали соҳибистиқлолии кишварамон маҳз бо дастгирӣ ва маслиҳати ҲНИТ Ҷумҳурии Тоҷикистон ба ҷангӣ таҳмилӣ кашида шуд ва чӣ қадар шаҳрвандони бегуноҳи Тоҷикистон дар ин ҷанг кушта шуда, садҳо ҳазор нафари дигар аз хонаву дари хеш маҳрум гашта, гуреза шуданд ва оқибати шаҳди мусофирӣ ва ғарибиро дар қаламрави кишварҳои ҳамсоя кашидаанд. То имрӯз падарону модарони мо он рӯзҳоро ба ёд оварда ашки ҳасрат аз чашмонашон ҷорӣ мегардад ва ҳамеша дуо мекунанд, ки дигар ҳеҷ гоҳ он рӯзҳои мудҳиш ба сари мардуми тоҷик наояд.

Аз ин рӯ бори дигар ба кишварҳои Аврупо ва созмонҳои бонуфузи он мо ҷавонон муроҷиат карда гуфтанием, ки дар ҳодисаҳои рухдодаи моҳи сентябри соли 2015 бо иштироки бевоситаи ҲНИТ ҳамчун ҳизби экстремистӣ-террористӣ ва оқибатҳои он дар Тоҷикистон бо чашми ҳақиқат нигаред.

Тоҷикистон аз давраи ба даст овардани соҳибистиқлолияш дар кутоҳтарин мӯҳлат ба ҳамаи созмонҳои демократии ҷаҳонӣ пайваст ва бевосита дар Конститутсияи худ меъёрҳои риояи ҳуқуқу озодиҳои инсон ва шаҳрвандро дарҷ карда, ба ҳамаи сокинони кишвар ҳуқуқҳои баробари озодии сухан ва баён фароҳам овард. Тоҷикистон ҳамаи санадҳои аҳамияти байналмилалиро оид ба ҳимояи ҳуқуқу манфиатҳои инсон ва шаҳрвандро қабул ва эътироф намудааст ва ин маънои онро дорад, ки Ҳукумат баҳри бартараф намудани камбудиҳои ҷойдошта ҳамаи чораҳоро дида истодааст. Мо ҷавонон ба ин иқдоми пешгирифтаи давлат ҳеҷ шубҳае надорем.

Тибқи дастуру пешниҳодҳои созмонҳои аврупоӣ Ҳукумати Тоҷикистон дар қонунҳои худ ба таври доимӣ тағйироту иловаҳоро дароварда, онҳоро ба санадҳои меъёрию ҳуқуқии байналмилалӣ мутобиқ мекунонад.

Ба замъи ин чӣ қадар пешравиҳо дар ҷомеаи демократии Тоҷикистон шуда истодааст ва ҳамаи ин маҳз бо кӯшишу талоши Асосгузори сулҳу ваҳдати миллӣ-Пешвои миллат, Ҷаноби Олӣ, муҳтарам Эмомалӣ Раҳмон ва халқи шарифи Тоҷикистон ба даст омадааст ва мо ҷавонон намегузорем, ки суботу оромии кишварамон халалдор карда шавад.

Ҳамчунин мо ҷавонон ба тамоми кишварҳои тараққикардаи Аврупо, ки проблемаҳои Ҷумҳурии Тоҷикистон пайгирӣ мекунанд, изҳори миннатдорӣ намуда, таклиф менамоем, созмонҳои бонуфузи Аврупоӣ ба Тоҷикистон ташриф биёранд ва мо ҷавонон тайёрем онҳоро қабул намоем ва бо тамоми табақаи аҳолии Тоҷикистон ба тариқи озод вохурӣ анҷом бидиҳанд.

Тибқи ахборотҳои ба мо ҷавонон расида, гурӯҳи экстремистиву террористие, ки аз ҳисоби шаҳрвандони Ҷумҳурии Тоҷикистон мебошанд, ният доранд, ки рӯзҳои 9-10 сентябри соли равон дар қаламрави кишварҳои Аврупо даст ба тазоҳурот бизананд.

Ин гирдиҳамоиҳоро шаҳрвандони Тоҷикистон аъзоёни ташкилоти террористии ҲНИТ Илҳомҷонов Ёқуб ва Хоҷаев Азизхӯҷа ва боз 29 нафар дигар шаҳрвандон, ки тайёрии ҷангиро дар лагерҳои террористии кишварҳои Шарқи Наздик гузаштаанд, айни замон бо шиносномаҳои қалбакии кишвари Венгрия дар кишварҳои Аврупо қарор доранд ва мехоҳанд, ки вазъиятро дар кишварҳои Аврупо муташанниҷ гардонанад.

Мо ҷавонони касбу кори гуногуни Тоҷикистон бори дигар қотеъона аз сафоратҳо ва дафтари кишварҳои Иттиҳоди Аврупо, ки муқими шаҳри Душанбе мебошанд талаб менамоем, ки ба террористону экстремистон саҳланкорӣ накунанд, ки оқибатҳои нохубро ба миён меорад.

Дар сурати ҷамъ омадани онҳо дар кишварҳои Аврупо мо ҷавонони Тоҷикистон ҷавобан ба ин агар 10 (даҳ) нафар гирдиҳамоӣ кунанд, мо 1000 (ҳазор нафар) ва агар 100 нафар гиридиҳамоӣ кунанд, мо 10000 (даҳ ҳазор) нафар ба сафоратхонаҳои кишварҳои Аврупо ва дафтари намояндагии Иттиҳоди Аврупо ва дафтари САҲА дар шаҳри Душанбе ҳозир мешавем.

Ҷавонони Тоҷикистон"

Хонданд 1019

Мо - сокинони деҳаи Ҷавонии ҷамоати Ҷомии ноҳияи Зафаробод пешакӣ арзу сипоси худро ба Асосгузори сулҳу ваҳдати миллӣ - Пешвои миллат, мӯҳтарам Эмомалӣ Раҳмон баён намуда, аз ободкорию созандагиҳо дар Тоҷикистони азизамон шоду мамнунем. 

Ба деҳаи Ҷавонӣ муҳоҷирони зиёде аз деҳоти дурдасти садамавии ноҳияи Айнӣ ва Деваштич оварда шуданд. Ҳукумати ҷумҳурӣ барои ба ҷои зист таъмин намудан ва дар мавзеъҳои хуб ҷойгир кардани осебдидагон ҳамеша саъю кӯшиш менамояд. Аммо, шояд муттасаддиён дар ноҳияҳои Айнӣ, Зафаробод, Деваштич ва вилояти Суғд аз супоришҳои мақомоти болоӣ бехабар бошанд. Аниқтараш, раисони муҳоҷирони вилояти Суғд, ноҳияи Айнӣ, Зафарободу Деваштич гӯё бо кӯчонидани сокинон аз кӯҳистон ба ин мавзеъ вазифаи худро ба охир расонидаанд! Ҳол он ки, баҳри ташкили шароити хуб дар ин мавзеъ онҳо масъуланд!
Муҳоҷирони сарсону саргардон имрӯзҳо дар гармои тобистон аз набудани шароити вазнин, оби нӯшокӣ, оби полезӣ, ки барои сохтмон низ зарур аст, роҳи мошингард, хати барқ дар ин мавзеъҳо дар азобанд.
Мо - муҳоҷирони бесарусомон имрӯзҳо чӣ кор карданамонро намедонем. Барои сохтани иморат оби полезӣ лозим аст, ки он дастрас нест. Гузаронидани хатҳои барқ, чароғон намудани ин мавзеъ ба хотири касе намерасад. Гузаронидани оби нӯшокӣ, сохтани бунгоҳи тиббӣ ва мактаб дар ин мавзеъ дар нақша нест…
Мо - муҳоҷирони деҳаи Ҷавонии ҷамоати Ҷомии ноҳияи Зафаробод аз масъулони соҳа мадад пурсида, хоҳиши онро дорем, ки барои чароғон намудани ин мавзеъ, гузаронидани хати оби нӯшокӣ, овардани оби полезӣ ва сохтани мактаб ёрӣ расонанд. Мактаби ин мавзеъ - МТМУ №36 дар ҳудуди ноҳияи Зафаробод ҷойгир аст, аммо тобеи ноҳияи Ҷаббор Расулов мебошад. Хонаҳои истиқоматиро чун мактаб истифода мебаранд ва таълим дар он бо забони ӯзбекӣ мебошад. Омӯзгорони таълимгоҳ аз забони давлатӣ маълумоти кофӣ надоранд. Пурсида мешавад, ки мактаб ба тобеияти ноҳияи Зафаробод дохил карда шаваду маорифчиёни ноҳия аз ҳоли он хабар гиранд ва баҳри маълумот гирифтани хонандагон ёрӣ расонанд.

Бо эҳтиром, муҳоҷирон Холов Нуриддин, Шарипов Сайлиддин, Шарипов Шариф, Нуруллоев Насило, Шодмонов Шероз, Гулов Масрур, Ҳомидов Толиб, Аминов Мубин, Салимов Некрӯз ва дигарон

Хонданд 1125

Ё чаро хатоҳои содиркардаи намояндагони САҲШ-ро волидайн бояд ҷуброн кунанд?

Ба таваҷҷӯҳи вазири адлияи Ҷумҳурии Тоҷикистон Рустам Шоҳмурод

 

Ба таваҷҷӯҳи вазири корҳои дохилии Ҷумҳурии Тоҷикистон Рамазон Раҳимзода

Ҳафтаи гузашта дар ҳафтаномаи «Фараж» мақолаи банда таҳти унвони «Тағйири ному насаб ва оворагиҳо дар САҲШ, ё чаро хатоҳои содиркардаи намояндагони САҲШ-ро волидайн бояд ҷуброн кунанд?» чоп шуда буд. Баъд аз чопи мақола ба редаксия занги зиёд шуда, бархе маводро дастгирӣ карданд ва баъзе маҳкум намуданд, ки ман беҳуда масъулини САҲШ-и ноҳияи Панҷакентро танқид кардаам.

Нахуст мехоҳам ба арзи ҳамагон бирасонам, ки ҳадаф аз навиштани мақола на танқиди роҳбарият ва кормандони САҲШ-и ноҳияи Панҷакент, балки муроҷиат ба вазири адлияи кишвар буд, то минбаъд ба волидайн ҳангоми ислоҳ намудани ному насаби фарзандон сабукӣ дода шавад. Ман шахсан аз роҳбарияти САҲШ-и Панҷакент ва кормандони он ҳеҷ шикояте надорам. Зеро маро раиси САҲШ-и шаҳри Панҷакент Фатҳуллозода Заррина худ шахсан қабул намуд, гӯш кард, ба саволҳоям посух гуфт ва ба зердастонаш дастур дод, ки кори маро буд кунанд ва ман аз эшон миннатдорам.

Ҳадаф аз навиштани мақолаи «Тағйири ному насаб ва оворагиҳо дар САҲШ, ё чаро хатоҳои содиркардаи намояндагони САҲШ-ро волидайн бояд ҷуброн кунанд?» он буд, то ба самъи вазири адлияи кишвар мӯҳтарам Рустами Шоҳмурод бирасонам, ки волидайн на бо гуноҳи худ, балки бо гуноҳи САҲШ-ҳо, ки дар расмиятдарории номҳо дар вақташ ба иштибоҳҳои ҷиддӣ роҳ додаанд, хеле овораву сарсонанд. Банда дар мақола ҳамчун корафтода аз мушкилоти хеле ҷиддие сухан рондам, ки дар САҲШ-ҳои тамоми кишвар, алъон ҳангоми тағйир додани ному насаб ба чашм мерасад. Бояд зикр кард, ки ҳар сол дар ҷумҳурӣ даҳҳо ҳазор нафар мактабро хатм намуда, бори нахуст шиноснома мегиранд. Вале, бинобар он, ки САҲШ-ҳо ба аксари онҳо ному насаби тоҷикиро бо иштибоҳҳои зиёд додаанд, волидайни эшонро зарур меояд, ки маҷбуран ному насабро ислоҳ намуда, шаҳодатномаи нав гиранд ва танҳо баъд барои гирифтани шиноснома ба мақомоти шиносномадиҳӣ муроҷиат намоянд. Масалан то соли 2008 ному насаби аксари кӯдакон дар шакли дунома, яъне бе насаб дода шуда буд, аз қабили Ашӯри Мирзо, Қодири Абдураҳим ва ғайра. Имрӯз ҳамаи онҳое, ки чунин номҳоро доранд, маҷбуранд бо оворагиву сарсониҳои зиёд, ҷамъоварии маълумотномаҳо, дар ба дари САҲШ-ҳо ва ШВКД-ҳо инчунин бо сарфи маблағи зиёд ному насабро на тағйир диҳанд, балки ислоҳ намоянд. Ба назар чунин мерасад, ки на танҳо дар додани дуномаҳо, балки ҳангоми барасмиятдарории сеномаҳои тоҷикӣ низ масъулин иштибоҳҳои зиёде содир кардаанд ва шаҳрвандон пеш аз гирифтани шиноснома маҷбуранд онро низ ислоҳ кунанд. Масалан ба фарзанди дуюми ман чунин ному насаб дода шуда буд: Муҳаммадназариён Салмоншоҳи Холиқназар. Вақте мо барои гирифтани шиноснома муроҷиат кардем, маълум шуд, ки дар ном як ҳарфи «и» зиёдатӣ аст ва бояд Салмоншоҳ Холиқназар бошад, на Салмоншоҳи Холиқназар. Ин аст, ки маҷбур шудем нахуст ному насабро ислоҳ карда, танҳо баъд шиноснома гирем. Ман аз чор фарзанд номи се нафари онҳоро ислоҳ карда, ба онҳо ному насаби нав гирифтам, вале ба фарзанди чорумам, ки дар синфи 7 мехонад, бинобар камбудии маблағ натавонистам ному насаби нав гирам. Бинобар ин, онро ба солҳои оянда гузоштам. Яъне, ҳанӯз натавонистам ба ин сарсониҳо хотима диҳам.

Ҳадаф аз навиштани мақола ин аст, ки мехоҳам бипурсам: Чаро барои иштибоҳҳои Шумо мо - волидайн бояд посух гӯем ва чаро мо иштибоҳҳои Шуморо ҷуброн кунем? Зеро мушкилоте, ки имрӯз дар натиҷаи ин инштибоҳҳо ба сари мо волидайн омадааст, мушкилоти оддӣ нест ва бояд иқрор шуд, ки ин мушкилот ба сари мо дар натиҷаи иштибоҳҳои САҲШ-ҳо омадааст. Чаро Вазорати адлия натавонист, ки дар давоми 25 соли истиқлолияти кишвар як дастури муайянеро барои кормандони САҲШ пешниҳод намояд, то онҳо ба чунин иштибоҳҳо роҳ надиҳанд? Инҳо саволҳоеянд, ки посухи хеле ҷиддӣ мехоҳанд. Ҳадафи банда дар матраҳ намудани мавзӯи мазкур он аст, ки мо волидайн воқеан сабукӣ мехоҳем ва талаб мекунем, ки иштибоҳҳо аз тарафи худи САҲШ, бе овора намудани мо ҷуброн карда шавад.

Бигзор онҳое, ки синну солашон аз 18 боло асту аллакай шиноснома гирифтаанд, маълумотнома гиранду дар пайгард қарор доштан ва ё надоштани онҳо мавриди омӯзиш қарор гирад, вале ба назари ман ҳеҷ зарурияти гирифтани чунин Маълумотнома барои хонандаи мактаб вуҷуд надорад. Бояд барои аҳолӣ қарорҳои сабуккунанда ҷорӣ карда шаванд, на ин ки баръакс.

Инчунин дар мавриди нархи Шаҳодатномаи таваллуд низ бори дигар қайд мекунам, ки 150 сомонӣ барои як шаҳодатнома хеле нархи гарон аст ва он бояд бознигарӣ шавад.

Бо дарназардошти ишораҳои боло, омӯзиши масъалаву дидани сарсониҳои мардум, якчанд пешниҳод дорам:

1. Аз вазири адлияи Ҷумҳурии Тоҷикистон мӯҳтарам Рустам Шоҳмурод хоҳиш мекунам, ба ҳама шӯъбаҳои САҲШ дастур диҳанд, ки дар ислоҳ намудани ному насаб ва аз дунома ба сенома гардонидани он ба волидайн сабукиҳо диҳанд. Зеро воқеан волидайн на бо хоҳиши худ, балки аз ноилоҷӣ ба ин иқдом даст зада, маҷбурӣ ному насаби кӯдакони худро на тағйир медиҳанд, балки ислоҳ карда истодаанд. Зеро бе ислоҳ кардани ному насаб мақомоти шиносномадиҳӣ ба онҳо шиноснома намедиҳанд.

2. Арзиши шаҳодатномаҳои таваллуд то 50 фоиз поён оварда шуда, қимати он 70-75 сомонӣ муайян карда шавад. Зеро 150 сомонӣ воқеан нархи гарон буда, на ҳама имконияти пардохти чунин маблағро доранд.

3. Барои ислоҳ намудани ному насаб, дастур дода шавад, ки шаҳодатномаҳо на бо фиристодан ба маркази вилоятҳо, балки дар мӯҳлати 2-3 рӯз дар худи САҲШ-ҳои ноҳиявӣ тайёр карда шаванд.

4. Аз вазири корҳои дохилии Ҷумҳурии Тоҷикистон мӯҳтарам Рамазон Раҳимзода хоҳиш мекунем, ки қарори додани маълумотнома оид дар пайгард қарор доштан ва ё надоштанро нисбати талабагони мактаб боздоранд ва волидайнро аз сарсонӣ дар назди ШВКД-ҳо наҷот диҳанд. Инчунин, аз рӯи имконият ба мақомоти шиносномадиҳӣ дастур диҳанд, ки дар мактабҳо чорабиниҳо гузаронида, хатмкунандагонро акс гиранд ва барояшон шиноснома омода намуда, дар худи мактабҳо тақсим намоянд. Ин воқеан як дастгирӣ ба кулли волидайн хоҳад шуд, ки мо бовар дорем, дар сурати пиёда шудани чунин иқдом мардум миннатдорӣ баён хоҳанд кард.

Ин буд чанд пешниҳоди банда ва умедворам, ки мавриди дастгирии мақомот қарор мегирад.

Холиқи МУҲАММАДНАЗАР,

махсус барои «Фараж»

Хонданд 1458

Хабари-рӯз

Календар

« Ноябрь 2018 »
Пн Вт Ср Чт Пт Сб Вс
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    

Минбари сардабир

  • симКАРта

    Дар ҳафтае, ки гузашт, дар шабакаҳои иҷтимоӣ ин калима аз…

Нигоҳи хос

Парадокс

Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ...
Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ба ...
Гуфтед? Мегӯянд! (№3
Бег САБУР, раиси Хадамоти алоқа:- Ман қарорамро бекор накардаам.Танз: Офарин ба Шумо, оғои Бег ...
Гуфтед? Мегӯянд! (№2
Аскар ҲАКИМ, Шоири халқии Тоҷикистон:- Дар замони шӯравӣ мо асареро пайдо намекунем, ки дар ...
Гуфтед? Мегӯянд! (№1
Абдуалим ИСМОИЛЗОДА, раиси шаҳри Қӯрғонтеппа Хонандаи беҳтарин- Кӯшиш мекунам ҳар рӯз лоақал ...

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.