.

Alternative flash content

Requirements

Get Adobe Flash player

Муроҷиати шаҳрвандон

Шарикони қотилро наёфтанд

Дек 18, 2017
Хонданд: 1733

Ба таваҷҷӯҳи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон

Ба раиси Суди Олии Ҷумҳурии Тоҷикистон, мӯҳтарам Шермуҳаммад Шоҳиён
Ба Прокурори генералии Ҷумҳурии Тоҷикистон, мӯҳтарам Раҳмон Юсуф Аҳмадзод

 

Ман Фозилов Маҳкамбой, зода ва сокини деҳаи Далёни поён, ҷамоати деҳоти Далёни болои ноҳияи Деваштич мебошам. Баъди хатми Донишкадаи омӯзгории шаҳри Душанбе ба зодгоҳам баргаштам ва солҳои 1981-1992 дар мактаби миёнаи деҳа ба таълиму тарбияи насли наврас шуғл варзидам. Солҳои 1992-1999 ба мақомоти корҳои дохилии вилояти Суғд шомил шудам ва дар вазифаҳои масъули ВКД-и Ҷумҳурии Тоҷикистон фаъолият намудам, дар барқароркунии сохти конститутсионӣ фаъолона иштирок кардам.

Ман падари 4 фарзанд, 3 писару як духтар мебошам. Писарам Фозилов Хуршед, соли таваллудаш 1982, баъди хатми факултаи ҳуқуқшиносии ДДХ ба номи академик Б. Ғафуров дар ШВКД-и ҶТ дар шаҳри Исфара фаъолият намуд. Писари дуюмам Фозилов Шавкат соли 1984 таваллуд шудааст. Вай баъди хатми Академияи ВКД-и Ҷумҳурии Тоҷикистон фаъолияташро ҳамчун лейтенанти милитсия аз ШВКД-и ҶТ дар ноҳияи Айнӣ оғоз намуд, баъдтар ӯро ба ШВКД-и ҶТ дар ноҳияи Деваштич гузарониданд ва ӯ то 11-уми июли соли 2017 бо рутбаи капитани милитсия дар ШВКД-и ҳамин ноҳия хизмат кард.
Писари сеюмам Фозилов Равшан, соли таваллудаш 1987, баъди хатми факултаи таърихи Донишгоҳи давлатии Хуҷанд ба номи академик Б. Ғафуров дар соҳаҳои гуногуни хоҷагии халқ хизмат мекунад.
Зиндагии оилавии Фозилов Шавкат барор накард ва ӯ 5-уми июли соли 2017 ба ҷои зани ҷудошудааш ба ҳамдеҳаамон Ҳомидова Дилноза хонадор шуд. Д. Ҳомидова аз шавҳараш Шодиев Абдуфаттоҳ (ҳоло Ғафоров Наврӯз) бо сабаби фарзанддор нашуданаш ҷудо шуда буд. Н. Ғафоров дар ин муддат ба зани дигар - Рано Акрамова хонадор шуд ва онҳо аз зиндагии якҷояашон ду фарзанд ёфтанд. Гумон мерафт, ки Ғафоров бо зани аввалааш Д. Ҳомидова муносибат надорад, вале дертар маълум шуд, ки вай ҳар замон бо Дилноза дар ҳавлии падараш вомехӯрдааст, тавассути телефон гуфтугӯ мекардааст.
Вақти тафтишот Д. Ҳомидова баёнот дод, ки шавҳари собиқаш Н. Ғафоров мунтазам вайро таъқиб мекард, шабона ба ҳавлиашон омада, дар кунҷе пинҳон мешуд ва вақти ба ҳоҷатхона баромаданаш вайро медошт, таҳдид менамуд, ки ба шавҳар бароям, мекушад. Ҳамин гапро Fафоров ба падару модари Ҳомидова Дилноза низ гуфтааст, таҳдид кардааст, ки духтарашонро ба шавҳар диҳанд, шавҳарашро мекушад. «Ман ба милитсия шикоят кардам, вале ин суд набахшид. Баъди ба Ш. Фозилов шавҳар карданам вай дигар бо ман вонахӯрд».
Воқеаи даҳшатбор 11-уми июли соли 2017 тахминан соати 11-12-и шаб рӯй дод. Он шаб рӯзи шашуми хонадории Шавкату Дилноза буд. Шавкату Дилноза дар диван, ду фарзанди Шавкат - Фозилова Оишабону (таваллудаш 19-уми июли соли 2012) ва Фозилов Шамсиддин (12-уми феврали соли 2013 таваллуд шудааст) рӯйи фарш хобида буданд…
Ғафоров Наврӯз ҳамчун гумонбаршуда дар пурсиш чунин ҷавоб дод: «Ҳамон рӯз, 11-уми июли соли 2017 ҳамроҳи ҳамдеҳаам Расулов Орзу як шиша арақ нӯшидем. Бевақт ба саҳро, назди заминам омадам, Орзу ба корҳои худ рафт. Дар сарам фикре пайдо шуд, хостам ҳамдеҳаамон Фозилов Шавкатро кушам, зеро вай 6 рӯз пеш ба зани собиқам Ҳомидова Дилноза хонадор шуда буд, вале чӣ тавр куштанро хеле фикр кардаму ба хулоса омадам, ки бо яроқи оташфишон кушам. Ман аз ҳамдеҳаамон Насрулло камони шикории тамғаи ТОЗ-ро ба маблағи 7000 рубли русӣ харида будам ва онро дар сой пинҳон медоштам. Барои ҳамин милтиқро аз сой гирифтам. Тахмин соати 23 ба хонаи Фозилов Шавкат омадам. Дарвозаи ҳавлӣ пӯшида буд, онро кушодам, ба ҳавлӣ даромадам ва дидам, ки дару тирезаи ҳуҷрае кушода буд. Ба пешайвон рафта, аз тиреза дидам, ки Ш. Фозилов бо ҳамсари собиқам Д. Ҳомидова дар кат хобидааст. Ман ин манзараро дида, хашмам дучанд шуд. Ба ҳуҷра даромада, мили туфангро ба сари Ш. Фозилов рост карда, кулангро пахш намудам. Тир ба тарафи рости косаи сар расид. Баъд ӯро бо қундоқи милтиқ зада, бовар кардам, ки мурдааст, оқиб баргашта, аз хона баромадам ва бо роҳи омадаам баргаштам. Яроқро бо се тираш ба замин гӯр карда, болояшро бо хоку санг пӯшидам, баъд ба бошишгоҳи саҳроӣ рафта, назди ҷиянҳоям хобидам…».
Нишондоди вай бофтаю сохта мебошад. Ҳамон вақт дар деҳа чорводуздӣ авҷ гирифта буд, мардум аз дуздон ҳаросида, дарвозаю дари оғилҳояшонро маҳкам мекарданд. Аз ҷумла, дарвозаи мо сахт буд. Атрофи ҳавлиамонро девори баланд иҳота кардааст, аз он Ғафоров бо милтиқ тоқа гузашта наметавонист, пас вай танҳо набуд.
Чи тавре қайд кардам, дар деҳа ҳамон вақт 46 ҳодисаи чорводуздӣ ба қайд афтода буд, баъди боздошти Н. Ғафоров дигар чорводуздӣ рӯй надод. Гумон меравад, ки дар ин ҷиноятҳо Н. Ғафоров бо рафиқонаш даст задаанд. Гумонбаршаванда иброз медорад, ки ҳамон шаб бо Орзу Расулов маслиҳату ҳамкорӣ накардааст. Мувофиқи маълумоти гирифтаи тафтишот, 11-уми июл то соати 10-у 45 дақиқаи шаб ҳарду тавассути телефони мобилӣ борҳо сӯҳбат кардаанд.
Дар мурофиаи судӣ, ҳангоми Н. Ғафоровро посбонон бурдан О. Расулов бо табассум сӯйи рафиқаш даст афшонд, ки он маънӣ дошт. Гӯё кирдори ӯро маъқул мешуморид.
Н. Ғафоров иброз намуд, ки Шавкат вақти ба ҳавлӣ даромаданаш хуфта буд. Дар нишондоди дигараш вай мегӯяд, ки дар ҳавлӣ пинҳон буд ва як вақт дид, ки зане Шавкатро ба хонаи хобаш гусел намуд. Ғафоров куҷо даромадани ӯро дид. Пас Ғафоров барвақт ба ҳавлӣ даромада, вазъиятро мушоҳида карда, кай ба хона даромадани Шавкатро гурбавор мепоид.
Садои туфангро гӯё Д. Ҳомидова нашунидааст. Охир, ин ба ҳақиқат рост намеояд, аз он хона меларзид, сониян, духтари Шавкат - Оишабону дар баёноташ қайд кардааст, ки аз садои тир бедор шудааст ва ду нафар силоҳбадастро дида, аз тарс кӯрпаро ба рӯяш кашидааст.
Баъди аз хона баромадани қотилон вай ба модарандараш Д. Ҳомидова гуфтааст: «Хезед, душманон дадоямро кушта рафтанд». Вале Д. Ҳомидова вайро ба оғӯш кашида, талаб мекунад, ки хомӯш бошад.
Чӣ тазоде, Д. Ҳомидова Оишабонуро аз соати 24 то соати 5-у 30 дақиқаи субҳ аз оғӯшаш сар надод ва гап задан намонд. Танҳо соати 3-и шаб ба Оишабону мегӯяд, ки хомӯш истад, ба милисаҳо ҳарфе нагӯяд, сонӣ ба вай як чиз медиҳад.
Фақат баъди аз оғӯши модари угай баромадан вориди хонаи дигар мешавад ва ба зани амакаш Хуршед Фозилов - Манзура мегӯяд:
- Дадомро душманон парронданд.
Вай ҳамчунин нақл кардааст, ки садои тирро шунидааст, аз тарафи рост парронданашонро фаҳмидааст.
Ташхисгарони табобатгоҳи вилояти Суғд, равоншиносон баъди таҳқиқ хулоса бароварданд, ки Оишабону солимақл аст, ягон хел норасоии рӯҳӣ надорад.
Нафароне, ки аз рафти тафтиш огоҳ буданд, рӯирост мегуфтанд, ки дар фоҷиа Ҳомидова бетараф нест ва пеши роҳи ин ҳодисаро гирифта метавонист. Вай баёнот додааст, ки аз зӯроварии Ғафоров ба ШВКД-и ноҳияи Деваштич ва сарнозири минтақа майор Носирзода арз кардааст, вале маълум мешавад, ки сарнозиру нозиронаш ягон корро ба сомон расонида натавонистанд.
Дар мурофиаи судӣ, судяи Суди вилояти Суғд М. Раҳматуллозода, ки раиси мурофиа буд, зикр кард, ки нозири калони минтақа Назирзода ин вазифаи масъулро ба таври бояду шояд иҷро накардааст.
Агар сарнозир дуруст кор мекард, дар деҳа 46 ҳодисаи чорводуздӣ ба қайд намеафтод.
Ғафоров вақти муҳоҷират барои вайрон кардани қонунҳои Федератсияи Русия «ихроҷ» шуда омад, вале бо роҳи ошнобозӣ ному насабашро иваз кард.
Вале Шавкат тамоман каси дигар буд, ба ҳар корафтода ёрӣ мерасонд. Чанд рӯз пас аз вафоташ мӯйсафеди 80-сола Бобои Ҳамроқул аз деҳаи Вашани ноҳияи Айнӣ, ки замоне Шавкат он ҷо кор мекард, ба хонаамон омада, ҳамдардӣ кард.
- Ӯ писари шумо не, писари ман буд,- ашкрезон афсӯс хӯрд мӯйсафед.
Хуллас, ман фарзандонамро бо меҳнати ҳалол тарбия карда, ба роҳи рост ҳидоят намудаам…
Коллегияи судӣ оид ба парвандаҳои ҷиноятии Суди вилояти Суғд ба Ғафоров Н. чунин ҷазо таъин кард: Бо моддаи 195, қисми 2 КҶ ҶТ 5 сол аз озодӣ маҳрум сохт, бо моддаи 147, қисми 1 КҶ ҶТ 2 сол аз озодӣ ва бо моддаи 104, қисми 2, бандҳои «в», «е» КҶ ҶТ 20 сол аз озодӣ маҳрум намуд. Суд вайро ҳамагӣ 24 сол аз озодӣ маҳрум сохт.
Вале мо, аҳли оилаи Фозиловҳо ва ҳимоятгар аз тафтиши ҷинояти мазкур розӣ нестем. Фозилов Шавкат марди паҳлавон, варзишгар буд, беш аз 90 кг вазну 185 см қомат дошт ва ба Ғафорови 160 см қомат доштаи арақхӯр зӯраш мерасид. Ғафоров тоқа ба ин кор даст зада наметавонист, вай шарик дошт ва ҳамшарики ҷиноятиашро тафтишот ошкор карда натавонист. Аз ин рӯ, ҳоҳиш менамоем, ки ин қазия аз нав тафтишу баррасӣ карда шавад.

Бо эҳтиром Маҳкамбой ФОЗИЛОВ,
ҷабрдида, сокини деҳаи Далёни поён, ноҳияи Деваштич

Хонданд 1733

Дарди дил дораму ғам сӯхтааст ҷону танам,

Аз шумо лутфу ато, хайру сахо мехоҳам.

Ҷигарам реш зи бемории фарзанди азиз,

Эй Худо, аз карамат нуру сафо мехоҳам.

Азизон, дӯстон ва эй онҳое, ки дили дардошнову гӯши суханшунав доред. Имрӯз як дарди ҷонкоҳ, як ғами бепоён маро водор кард, ки хома ба даст бигираму умеди охирини дили садрешамро бо хуни ҷигар рӯи авроқи сафед бинависам.

Дарди ҷонкоҳ, чашмакони бо сад умеду илтиҷо ба сӯи ман нигарони фарзанди маризам на танҳо ҷисми ӯро, балки садҳо маротиба зиёд вуҷуди маро сӯхтаву хокистар мекунад. Бале, ҳар гоҳ ба чеҳраи маъсум, чашмони маъюси Билолҷонам менигарам, бовар кунед, садҳо маротиба мемираму боз ноилоҷ дар ин дунё мегардам.

Оҳ, чӣ қадар сангин, чӣ қадар ҷонхарош будааст дидани чеҳраи фарзанде, ки дарди ҷонкоҳ дораду ту бошӣ, барои давои он чорае надорӣ. Фикр мекунам, ҷойи он ки саҳнаи ҷонталошии фарзандро бубинӣ, худ бимирӣ, ки он бароят осонтар аст. Маънои ин суханони дардолуди маро, сӯзиши дили ғамнокамро танҳо онҳое дарк мекунанд, ки фарзанди мариз доранд ё фарзанд аз даст додаанд.

Билолҷони ман ҳамагӣ ду солу ду моҳ дорад ва як солу як моҳ мешавад, ки ба бемории диффузонии вируси мағзи сар гирифтор ва дар ҷойгаҳ хоб аст. Хеста гаштугузор карданаш бисёр мушкил, ҳатто аз ҷояш хеста наметавонад. Ман медонам, ки ин дардро агар дар ин синну соли хурдиаш табобат накунам, оҳиста-оҳиста вуҷуди ин азизи диламро фано хоҳад кард. Ин кӯдаки ман ҳанӯз аз нашъаи ҳаёт бӯйе набурда, пажмурда шуда истодааст. Охир, ӯ ҳам бо сад умед ба дунё омада, ки шаҳди зиндагӣ чашад...

Ман худам коргари оддӣ мебошам. Бо маблағҳои ночизи пулии пайдокардаам ҳам рӯзгори оилаамро, ки соҳиби ду фарзанди ноболиғ мебошам, саришта кардан ва ҳам фарзанди беморамро табобат намудан ғайриимкон буд. Ҳамаи он маблағҳое, ки бо ранҷу азоб ба даст меовардам, барои ҷарроҳии фарзанди азизам Билолҷон кифоягӣ намекард. Табибон ба ман фаҳмонданд, ки чунин ҷарроҳӣ кори басо хатарнок аст. Гуфтанд, ки амалиёти ҷарроҳии мағзи сари фарзанди ман дар Федератсияи Россия ё давлати Ҳиндустон бо муваффақият анҷом дода хоҳад шуд. Вале ҳазорон афсӯс, чандон маблағеро, ки дар ин роҳ бояд харҷ кунам, пайдо карда наметавонам.

Имрӯз ман худро дар як ҳолате тасаввур карда истодаам, ки гӯё дасту дилам аз дунё кандаву дар лаби як ғори бетаги ноумедӣ қарор дорам. Охир, пеши назарам симои кӯчаки писаракам, ки қадам ба қадам сӯи марг рафта истода, аммо дасти ман ба баргардонидани ӯ кӯтоҳӣ карда истодааст, ҳама вақт намудор аст. Инро дарк карда, имрӯзҳо мемираму боз зинда мешавам. Ҷисми рӯз ба рӯз харобу лоғаршудаистода ва ранги зарди фарзандамро дида, баъзан розӣ ҳастам, ки пештар аз ӯ бимираму чашмони маъюсу ба умеди ёрӣ сӯям нигарон ва ҷисми ранҷурашро набинам.

Худоё, раҳмро дар дили бандагонат ҷой намо, то шояд нафаре пайдо шаваду чун фариштаи наҷот маблағи амалиёти ҷарроҳии фарзанди ман - Билолро пардохт намояд ва азизи маро аз чанголи марг наҷот бахшад. Бо ин амали ҷавонмардона ӯ натанҳо фарзанди ман, дили ғамбемори ману аҳли оилаи маро, ки аз ҳолати фарзандамон шабу руз хун мехӯрем, аз панҷаи ғам раҳо хоҳад кард. Намедонам, агар мабодо аз сабаби ноилоҷиву дасти кӯтоҳи ман ба фарзандам ягон ҳодиса рух диҳад, чӣ тавр мезиста бошам…

Аз ин рӯ, нидои дардолуди маро шунида, шояд нафаре аз Шумо фариштаи наҷоти фарзандам мешавед. Шояд Худованд раҳмати худро тавассути Шумо ба сари ин кӯдаки навшукуфтаи умри ман равона мекунад.

Аз вартаи ноумедӣ наҷотам диҳед, эй одамони нек!

Шарифзода Фирӯзи Ғулом

Суроғаи мо: шаҳри Ваҳдат, ҷамоати деҳоти Чорсу, деҳаи Ғалчигӣ

Телефон: 908-08-28-49

Хонданд 1633

“... Охир ба дасти малахак”

Нояб 25, 2017
Хонданд: 1602

Ё худ дасисабозиву тӯҳматгароӣ - ҷазои тақдир!

Ба ҷойи пешгуфтор…
Шайтон ба нафақа мебарояд.
Рӯзе Шайтонро дидам, ки баҳузур хобидаву чанде баъд бархоста, наҳорӣ мекард. Пурсидам:
- Чаро бекор нишастаӣ? Нисфи рӯзи инсонҳо бе ту гузашт.
Абрӯ чен карда, сӯям нимнигоҳе карду гуфт:
- Мехоҳам пеш аз мӯҳлат ба нафақа бароям.
Кунҷкобиам ғолиб омад:
- Магар виҷдонат бедор шудааст ё мехоҳӣ бандагии Худо ба ҷо орӣ!?
- Ин тавр нест. Баръакс, ман дигар он Иблиси пешинаи тавоно нестам. Он чӣ ман шабона бо садҳо васвасаи пинҳонӣ анҷом медодам, инсонҳо дар рӯзи равшан садҳо дасисаи ошкор анҷом медиҳанд. Дигар ба ман ниёзе намондааст.
Шайтон кӯрпаву болиштро гирифта дар гӯшае барои худ ҷои хоб омода кард. Ҳангоме, ки ба ҷояш дароз мекашид, зери лаб ғурғуркунон мегуфт:
- Эй Одам, агар медонистам, ки фарзандони ту ин қадар ҷоҳилу фиребгар, дасисабозу тӯҳматгаранд дар ҳамон рӯзи аввал ба ту саҷда мекардам. Аммо, ҳоло мебинам, ки бадномиаш ба ман мондаасту ҳама кори маро фарзандони ту соҳибӣ кардаанд. Ҳайронам, баъзе аз насли ту дар кинаву адоват, дурӯғу хиёнату бадӣ ин қадар пеш мераванд. Мефаҳмидам, аввалин шуда, ба Одам саҷда мекардам. Афсӯс, ки пушаймонӣ дигар суд надорад! Алами ман аз он аст, ки шумо, инсонҳо, ҳама корро мекунед, ба гардани ман мезанед, «Шайтон аз роҳ зад» мегӯед.
Инро гуфту кӯрпаро ба сараш кашид. Дилам ба ҳолаш сӯхт. Шайтон дар он кунҷ бекор хобида буду ман ғарқи хаёл мондам.

Дунёи хусумату кинаи мӯйсафед
Воқеан ҳам ба ном инсонҳое дар зиндагии мо арзи вуҷуд доранд, ки ҳайфи номи инсонист. Ба нобакорӣ, кинаҷӯӣ, хусумату тӯҳматгарии онҳо Шайтон лол мемонад. Тарс аз ғазаби Худованд надоранду умри дурӯзаи худро сарфи навис-нависи бардурӯғи аъмоли дигарон мекунанд, ҳам худу ҳам дигаронро сарсону саргардон менамоянд. Шояд баъди подоши амалашон пушаймонӣ намоянду ҳама кирдори хешро бар сари ҳамон Шайтон бор карданӣ шаванд. Зеро ин зумра хурд нестанд, ки аз беақлӣ ин кирдорро содир кунанд. Шахси солхӯрда, мӯйсафед…
Ман аз зумраи нафароне мебошам, ки қурбони дасисаҳои чунин мӯйсафедони «боимон»-у «ботақво» шудам. Зиндагии хубу омиёна ва солҳои дароз дар мақомоти прокуратура фаъолият доштам, бехабар аз дасисаи замон ба гирдоби нақшаҳои аҳримании нафаре ғарқ шудам, ки аслан вай бегона набуд ва маҳз бо айби эшон ҳаёти наздики 15 соли ахирам талху доғдор гардид.
Ҳамааш аз он сар шуд, ки собиқ хусурам - сокини шаҳри Исфара, ҷамоати деҳоти Навгилем Мирзошариф Раҳмонов аз 14-уми апрели соли 2006 нисбатам қасду хусумат пайдо намуда, аризаҳои тӯҳматангез ва маълумотҳои бардурӯғ навиштанро мақсад гузошт. Банда соли 1996 бо Гулҷаҳон Раҳмонова, духтари номбурда оила барпо намуда, соҳиби ду фарзанд гаштем ва соли 2007 бо сабаби мувофиқ наомадани феълу атвори якдигар бо воситаи суд расман ҷудо шудем. Ман ба дигар зан хонадор шуда, муносибатҳои оилавиро бо Гулҷаҳон Раҳмонова тамоман қатъ намудам. Маҳз аз ҳамон рӯз инҷониб дасисабозиву ниқоргириҳои собиқ хусураму духтараш оғоз гардид. Нахуст ба Прокуратураи вилояти Суғд, баъдан ба Прокуратураи генералии Ҷумҳурии Тоҷикистон «очерк»-ҳои зиёд нисбати ман навишта, ба бадномкунӣ оғоз бахшиданд. Шикоятҳои Мирзошариф Раҳмонов ва духтараш Гулҷаҳон Раҳмонова аз ҷониби мақомоти ҳифзи ҳуқуқ борҳо мавриди санҷиш ва баррасӣ қарор дода шуда, бинобар набудани аломати таркиби ҷиноят дар кирдори ман аз оғози парвандаи ҷиноятӣ рад карда шудааст. Табиист, ки қонунгузор аъмоли чунин дасисабозону тӯҳматгаронро, ки боиси сарсониву саргардонӣ ва масраф гардидани маблағҳои зиёди буҷавӣ мегардад, беҷазо намемонад.
Ҳамин тавр, алайҳи Мирзошариф Раҳмонов ва Гулҷаҳон Раҳмонова моҳи ноябри соли 2007 аз ҷониби Суди шаҳри Хуҷанд бо аломатҳои моддаҳои 135-136-и Кодекси ҷиноятии Ҷумҳурии Тоҷикистон барои тӯҳмату таҳқир парвандаи ҷиноятӣ оғоз ва 11-уми июни соли 2008 бо ҳукми Суди шаҳри Конибодом барои чунин кирдорҳояшон ба мӯҳлатҳои гуногун маҳкум карда шуданд. Бо мурури замон аз файзу баракоти Авфи эълоннамудаи Асосгузори сулҳу ваҳдати миллӣ - Пешвои миллат, Президенти мамлакат, мӯҳтарам Эмомалӣ Раҳмон бархӯрдор гардида, аз ҷазои муносибашон эмин монданд ва мутаассифона, ба ҷойи дарси ибрат шудан ва шукргузорӣ намудан, боз ба дасисабозиҳо, навиштани тӯҳматномаҳо машғул гардиданд.
Мирзошариф Раҳмонов тӯҳматҳои нав, аз қабили гӯё банда кадом як ҷинояткорро дар хонаам пинҳон медоштаам, барои ба кор қабул намудани фарзандаш маблағи пулӣ пурсида бошам, барои аз маҳбас озод намудани маҳкумшудагон пул талаб намудаам ва даҳҳо афсонаҳо эҷод намуда, мунтазам ба мақомоти ҳифзи ҳуқуқ бӯҳтонномаҳои навбатиро менавишт, гӯё аризанависӣ ба машғулияти доимии ӯ, яъне касби ӯ табдил ёфта бошад. Кор ба дараҷае расид, ки банда чун дар прокуратураи вилоят кор мекардам, аз вазифа сабукдӯш ва ба ихтиёри кадрҳо гузаронида шудам.
Шикоятҳои Мирзошариф Раҳмонов ва духтараш Гулҷаҳон Раҳмонова, ки пас аз маҳкум шуданашон дар давоми солҳои 2010-2017 ба мақомоти гуногуни давлатӣ навишта буданд, мавриди санҷиши пурра қарор гирифта, бинобар набудани далелу арқоми воқеӣ тасдиқи худро наёфтанд.
Маро барои кор ба Прокуратураи Вилояти Мухтори Кӯҳистони Бадахшон фиристониданд. Ин ҳам Мирзошариф Раҳмонову ҳаммаслаконашро ором нагузошта, ба навиштани аризаҳои навбатӣ ба Прокуратураи генералии Ҷумҳурии Тоҷикистон идома бахшиданд. Аризаҳо баррасӣ гардиданд, вале тасдиқи худро наёфтанд. Баъди гузаштани ду соли фаъолият, тариқи гузариш маро ба дигар минтақа ба кор нагузарониданд. Дар натиҷаи навиштани аризаҳои тӯҳматбор маҷбур шудам, ки ба унвонии Прокурори генералӣ ариза навишта, ба нафақа бароям. Моҳи марти соли 2013 ба Вазорати адлия ба кор даромадам, он ҷо низ маро ором нагузоштанд. Ба шаҳри Хуҷанд омада, ба ҳайси устоди факултаи ҳуқуқшиносии Донишгоҳи давлатии ҳуқуқ, бизнес ва сиёсати Тоҷикистон кор кардам, вале Мирзошариф Раҳмонов ва ҳаммаслаконаш ба Вазири маориф ва илми Ҷумҳурии Тоҷикистон аризаи бардурӯғ навишта, маро бадном карданд. Моҳи декабри соли 2013 ба мақомоти иҷроияи ҳокимияти давлатии шаҳри Чкалов (ҳоло Бӯстон) ва аз соли 2015 дар мақомоти иҷроияи ҳокимияти давлатии вилояти Суғд фаъолияти меҳнатиамро идома доданӣ шудам, вале боз иғвогарон ва дасисабозон маро таъқиб намуда, ором намегузоштанд. Пас аз ин, Мирзошариф Раҳмонов ва ҳамммаслаконаш соли 2016 боз ба Прокурори генералии Ҷумҳурии Тоҷикистон ва соли 2017 ба унвонии Раиси Кумитаи давлатии амнияти миллии Ҷумҳурии Тоҷикистон нисбати ман аризаву хабарҳои бардурӯғро оид ба содир гардидани ҷиноятҳои вазнин ва махсусан вазнинро расонида, бо ин роҳ шаъну шараф ва эътибори кории маро паст заданд. Хуллас, дар муддати сенздаҳ сол Мирзошариф Раҳмонов ва ҳаммаслаконаш бо маълумотҳои бардурӯғу иғвогаронаашон маро таъқиб намуданд. Аз моҳи августи соли 2015 то моҳи марти соли 2017 бекор мондам ва ба ҳолати ногувори молиявӣ дучор гардидам.
Дар маҷмӯъ, метавон гуфт, ки Мирзошариф Раҳмонов гӯё ба ин дунё барои таъқиби ман омадааст, синну соли ин мӯйсафед ба 80 мерасад, вале ба ҷойи фикру зикри дунёи охират ба молу амволи ин дунё чашм дӯхта, зиндагии хешро ба аризаю сафсатанависӣ сарф намуда истодааст. Ин мӯйсафед мебоист, ки фарзандонашро насиҳат мекард, ба тарбия онҳо вақт сарф менамуд, пулу моли ҷамъкардаашро сарфи роҳкирою сарсониҳо ва дари мақомоти гуногун кӯфтанҳо накарда, фикри ободии хонадонашро мекард. Дар навбати худ, вақти пурқиммати кормандони мақомоти ҳифзи ҳуқуқу тартиботро бо «афсона»-и хеш намегирифту маблағҳои зиёди буҷа дар ин самт сарф намегардид.
Ниҳоят кор ба ҷойе расид, ки санаи 3-юми октябри соли 2017 дар маҷлиси ошкорои судии Суди шаҳри Хуҷанд аъмоли Мирзошариф Раҳмонов ва духтараш Гулҷаҳон Раҳмонова дар мизони қонун баркашида шуд ва ба эшон тибқи ҳукми суди номбурда ҷазои муносиб таъин карда шуд.
Ҳамин тавр, Мирзошариф Раҳмонов ва Гулҷаҳон Раҳмонова ҳарду бо моддаи 346, қисми 3, бандҳои «а, б»-и Кодекси ҷиноятии Ҷумҳурии Тоҷикистон гунаҳкор дониста шуда, бо ҳукми Суди шаҳри Хуҷанд аз 3-юми октябри соли 2017 ба Мирзошариф Раҳмонов ҷазо дар намуди маҳрум сохтан аз озодӣ ба мӯҳлати 6 сол бо адои ҷазо дар колонияи ислоҳии дорои низомаш сахт, нисбати Гулҷаҳон Раҳмонова бошад, ҷазо дар намуди маҳрум сохтан аз озодӣ ба мӯҳлати 5 сол бо адои ҷазо дар колонияи ислоҳии дорои низомаш умумӣ таъин карда шуда, бо дастрасии моддаи 71-и Кодекси ҷиноятии Ҷумҳурии Тоҷикистон ҷазои таъиншуда нисбати Гулҷаҳон Мирзошарифовна Раҳмонова шартан татбиқ карда нашуда, ба ӯ 3 сол мӯҳлати санҷишӣ муқаррар карда шуд.
Ин аст тақдири он нафароне, ки умри шарифи хешро сарфи дасисабозию тӯҳматноманависӣ ба дигарон карда, ба дигарон чоҳ мекобанд, бехабар аз он, ки рӯзе худ ба он меафтанд.

Исохоҷа ЗАЙНИДДИНЗОДА, ҷабрдида, нафақахӯри мақомоти прокуратураи Ҷумҳурии Тоҷикистон

Хонданд 1602

Номаи кушод

Нояб 18, 2017
Хонданд: 1567

Ба Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон

Дуруду пайёми самимии моро бипазиред, Ҳомии бузурги миллат, Қаҳрамони халқи тоҷик, Пешвои муаззами миллат, Президенти Ҷумҳурии Тоҷикистон, мӯҳтарам Эмомалӣ Раҳмони азиз! Шумо номбардори Ватан, чашми бедор ва ойинаи пурҷилои миллат ҳастед.
Таърих ин сатрҳоро бо оби тилло дар саҳифаҳои ҷовидонааш навиштааст, ки баъд аз садсолаҳои талхи бегонагароӣ ва бедавлатӣ Шумо бо тафаккури баланд ва доштани андешаи миллӣ дар шонаҳои кӯҳҳои азим пояҳои давлатдории миллиро пайванд кардаед. Мо хуб медонем, ки Шумо ҳар як ваҷаби ин замин ва хар як сокини ин ватанро чун фарзанди хеш дӯст медоред, зеро маҳз дар партави сиёсати созанда ва инсонгароёнаи Шумо мо ба ин рӯзҳои офтобӣ расидем. З-ин рӯ, ҳастии Шумо кафили ояндаи дурахшони мо ва андешаҳои хирадмандонаатон бақои ин миллат аст.
Падари азиз, Президенти маҳбуб, мӯҳтарам Эмомалӣ Раҳмон! Мо чанд нафар аз кормандони ширкати «Умед - 88», хешу таборон ва волидайни Одинаев Раҷабалӣ аз Шумо, ки набз ва қалби ин миллат ҳастед, барои бемасъулиятӣ ва сари вақт иҷро накардани вазоифи ба ӯҳда гирифтаи масъулини ширкати мазкур, ки боиси нигаронӣ ва нороҳатии Шумои азиз гаштаанд, узр мепурсем ва назди назари пурмуҳаббат ва садоқати поки Шумои азиз, ки нисбат ба ҳар яки мо доред, сархаму шармандаем. Аммо инро бояд бигӯем, ки мо ба ҳайси кормандони ин ширкат борҳо шоҳид гаштаем, ки роҳбарияти ширкат дар симои Одинаев Раҷабалӣ Ғафорович дар ҳама гуна сӯҳбатҳо, ҷаласаҳои корӣ аз сиёсати хирадмандонаи Шумои азиз ёдовар мешуданд ва ҳар яки моро таъкид мекарданд, ки даст ба дасти ҳамдигар дар ободии Ватан саҳм бигузорем ва ба қадри сулҳу ободие, ки Шумо бароямон овардаед, бирасем. Ҳамчунин, номбурда бо дарназардошти дастгириҳои Шумо нисбат ба фаъолияти соҳибкорон ва имтиёзҳои Ҳукумати ҷумхурӣ, борҳо ба хонаи маъюбон, ятимхонаҳо, хонаи пиронсолон ва барои ҷарроҳии беморони оилаҳои ниёзманд дасти кӯмак дароз кардааст. Инчунин, ширкати мазкур тӯли фаъолияташ дар ғанӣ гардонидани буҷаи давлат зиёда аз 2 миллиард сомонӣ тариқи супоридани андоз саҳм гузоштааст ва зиёда аз 500 нафар шаҳрвандонро бо ҷойи кори доимӣ таъмин намудааст.
Бояд гуфт, ки мувофиқи шартномаи байни ҶСК «НБО Роғун», Вазорати молияи Ҷумҳурии Тоҷикистон ва ҶДММ “Умед-88” ба ширкат ҷиҳати рушди комплекси агросаноатӣ дар Ҷумҳурии Тоҷикистон тариқи таъмини ҳоҷагиҳои кишоварзӣ бо маҳсулоти сӯзишвории дизелӣ ба маблағи 171 000 000 сомонӣ бо меъёри 18% солона то мӯҳлати 31.12 соли 2015 қарз дода шудааст. Аммо, мутаассифона, бо сабаби ба бӯҳрони молиявӣ дучор гаштан, ширкат натавонистааст дар мӯҳлати дар боло зикргашта қарзи мазкурро баргардонад, вале тӯли ин муддат ҷаримаҳо ва фоизҳо дар ҳаҷми 33 миллион сомонӣ ба ташкилотҳои бонкӣ супорида шудааст.
Ҳоло муассиси ширкат Одинаев Раҷабалӣ Ғафорович бо дастрасии моддаҳои 246, қисми 3 ва 295, қисми 2-и КҶ Ҷумҳурии Тоҷикистон ба ҳабси пешакӣ гирифта шудааст. Аммо сари вақт супурдани фоиз ва ҷаримаҳо дар ҳаҷми 33 миллион сомонӣ, ҳамчунин қисм ба қисм бозпас гардонидани қарзи мазкур ба ташкилотҳои бонкӣ далолати он аст, ки масъулини ширкати «Умед-88» аз супурдани қарзи мазкур саркашӣ накардаанд ва нияти баргардонидани қарзро доранд.
Мӯҳтарам Пешвои муаззами миллат, Президенти маҳбуб Эмомалӣ Раҳмон! Мо бақои миллатро дар андешаҳои хирадмандона ва кафолати адолатро маҳз дар оинаи чашмони бедори Шумои азиз мебинем. Зеро маҳз Шумо, мӯҳтарам Ҷаноби Олӣ, бо ҳастии пурмаънои хеш пояҳои ин давлати ҳуқуқбунёд ва демократиро дар асоси қонун бунёд гузоштаед, ки хар як хишти бинои ин давлати миллӣ нақши дастони созандаи Шуморо чун мӯҳр дар хазинаи таърих ҳифз кардааст. Мо бо чашми ақл шоҳиди ҳазорҳо хидматҳои шоистаи Шумо баҳри ободии ин ватан гаштаем. З-ин рӯ, ба ҳар як ҳарфи Шумо, ки ҳарфи таърих аст, аз самими қалб бовар дорем, зеро ҳастии Шумо - кафили зиндагии босаодати ҳар яки мо мебошад.
Шумо, Президенти маҳбуб, борҳо дар баромадҳоятон аз волоияти қонун ва арзишҳои ҳуқуқи инсон ёдовар шуда, мақомоти қудратиро хушдор дода будед, ки дар пойдории адолат, ки мояи ҳастии миллат аст, боандеша ва боэҳтиёт бошанд, то оинаи пурҷилои таърихро ғуборе наафканад. Ҳамчунин, зикр карда будед, ки барои як кадрро тарбият кардан ҳудудан 40 сол лозим меояд ва сокинони ин сарзаминро, ки Шуморо чун фарзанданд, набояд ба хотири содир кардани як гуноҳ пушти панҷараи зиндон гузоранд.
Ҳоло мо кормандони ширкати «Умед-88» ва волидайни Одинаев Раҷабалӣ, аз Шумо Падари хирадманд, ки қалбе бузург чун кӯҳҳои сарбафалак ва шаффоф, чун чашмаҳои кӯҳистон доред, авфи гуноҳ металабем. Илтиҷо мекунем, ки ба Раҷабалӣ Одинаев, ки аз шарофати дастони пурбаракаташ фарзандони азизамон нон хӯрдаанд ва ҳамеша бо лабханди гарм дар ғаму шодиямон ҳузур доштанд, чораи пешгирӣ аз намуди дар ҳабс нигоҳ доштан ба намуди тарк накардани ҷои зист ва ё дигар чораи пешгирӣ тағйир дода шавад.
Ҳар яки мо тариқи соядастҳои хеш, ки дар поёни номаи мазкур мегузорем, кафолат медиҳем, ки дар ҳолати ғайриҳабс будан Одинаев Р. Ғ. метавонад қарзи мазкурро бипардозад, зеро мувофиқи хулосаи экспертизаи нархгузории ВА ҶТ нуқтаҳои фурӯши сӯзишвории ширкати ватании «Умед-88» дар айни ҳол маблағи зиёда аз 175 миллион сомонӣ нархгузорӣ карда шудааст ва илова бар ин, амволи хешу таборони номбурда низ метавонад маблағи муайянеро ташкил бидиҳад. Ҳамчунин, Одинаев Р. Ғ. дар ҳолати ғайриҳабсӣ будан метавонад бо дарназардошти кафолати моликияти ширкат ва боварии соҳибкорони Федератсияи Русия, ки давоми ҳамкориҳои бисёрмуддат сазовор гардидааст, 40 миллион доллари ИМА-ро барои амалӣ намудани ин ӯҳдадориҳо тариқи шартномаи қарзии бисёрсола бигирад.
Бояд зикр кард, ки вазъи саломати Одинаев Р. Ғ. бо иллати осеби сутунмӯҳра, бемории шуш ва сактаи қалб хуб нест ва нигоҳ доштани ӯ дар боздоштгоҳ боиси авҷ гирифтани бемориҳои мазкур мегардад.
Мӯҳтарам Пешвои муаззами миллат, Эмомалӣ Раҳмони азиз! Мо муштариён ва хешовандони Одинаев Р. Ғ. аз Шумо, фарзанди фарзонаи миллати тоҷик, ки соябони сари ҳар яки мо мебошед, қаблан илтиҷо мекунем, ки модари пиронсоли азизи ин соҳибкорро, ки дидаҳои камнураш дар роҳи бозгашти фарзанди азизаш чор аст ва қалби афгоре доранд, ба дидори фарзанди азизаш бирасонед. Зеро мо борҳо тариқи симову садои ватанӣ шоҳид гаштаем, ки қалби пурмуҳаббат ва инсонгароёнаи Шумо ҳатто кӯчактарин ҳоҳишу илтиҷои мардумро беҷавоб нагузоштааст. Аз ин рӯ, боварии комил дорем, ки моро низ аз неъмати бахшоишҳоятон бенасиб намегардонед.
Боқӣ, чун ҳар вақти дигар мо аз самими қалб бо муҳаббати гарм барои саломатии Шумо ва пойдории давлатдории миллӣ дасти дуо мебардорем.

Бо эҳтироми самимӣ, як гурӯҳ ҳамкорон, хешу таборон ва волидайни Одинаев Раҷабалӣ Ғафорович

Хонданд 1567

Хабари-рӯз

Календар

« Январ 2019 »
Пн Вт Ср Чт Пт Сб Вс
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      

Минбари сардабир

  • ДАВоДАВ

    Масофаи роҳ бо машинае, ки 150 ҳазор доллар нарх дорад…

Нигоҳи хос

  • Баҳонаи зистан

    Мақсад доштан маънои баҳонае барои нафас гирифтанро дорад. Соли 2018…
  • МАСЛИҲАТ

    Аз дидаву шунида Салом, хонандагони гиромии ҳафтаномаи «Фараж»! Мо аз…

Парадокс

Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ...
Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ба ...
Гуфтед? Мегӯянд! (№3
Бег САБУР, раиси Хадамоти алоқа:- Ман қарорамро бекор накардаам.Танз: Офарин ба Шумо, оғои Бег ...
Гуфтед? Мегӯянд! (№2
Аскар ҲАКИМ, Шоири халқии Тоҷикистон:- Дар замони шӯравӣ мо асареро пайдо намекунем, ки дар ...
Гуфтед? Мегӯянд! (№1
Абдуалим ИСМОИЛЗОДА, раиси шаҳри Қӯрғонтеппа Хонандаи беҳтарин- Кӯшиш мекунам ҳар рӯз лоақал ...

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.