.

Alternative flash content

Requirements

Get Adobe Flash player

Ҳукумат

Ҳамин ҳоло ҳафтаи сеюм аст, ки нишастҳои матбуотии ниҳодҳои давлатӣ баргузор шуда истодааст. Аммо дар натиҷаи иштирок дар якчанд силсиланишастҳо хулоса кардан мумкин аст, ки кадом мақомот ё ниҳоди давлатӣ то кадом сатҳ аз уҳдаи иҷрои фармони роҳбарияти давлат баромада истодаанд. Хостем перомуни ин мавзуъ каме андаешаронӣ кунем.
Тартиби баргузории нишастҳои хабарӣ бояд тариқи зайл сурат бигирад: Сараввал шиносоии роҳбарияти мақомот ва суханронии кӯтоҳи 10-15-дақиқаина дар бораи фаъолияти нимсолаи ниҳоди дахлдор ва идомаи вақт бо суолу посухгӯйӣ ба итмом расад. Аммо, мутаассифона, тартиби баргузории нишастҳои матбуотии баъзе аз мақомоти кишвар тамоман аз дигар сайёраи галактикаи “Роҳи каҳкашон” пешниҳод гардида, ҳамон тариқ сурат мегирад. Он ниҳодҳо, мисли асри XVIII-XIX - давраи амирии салтанати Аморати Бухоро, аввал сарсухан ба ҳаҷми 5-10 дақиқа ва пасон ба хондани “номаи элчӣ” оғоз мекунанд. Хондани “пресс-релиз”-и эшон 25-35 ва баъзан ҳатто 45-55 дақиқа идома меёбад ва ҳангоми анҷоми хондан ба намояндагони ВАО рӯй оварда, мегӯянд: “Агар суолҳо набошанд, ҷамбаст кунем ҳам мешвад, зеро вақти ҷудошуда низ ба охир расид”. Намояндагони воситаҳои ахбори умум низ “ва бираҳматика ё арҳамар роҳимин” гӯён, дуо карда, аз ҷой мехезанду толори нишастгоҳро холӣ мекунанд.
Акнун сари масъалаи асосӣ меоем, ки чаро имрӯз баъзе аз нишастҳо мисли ҳисобот ё маҷлиси солона сурат мегиранд? Ё ин ки роҳбарияти ниҳодҳо нишасти матбуотиро аз ҳисоботи солона фарқ карда наметавонанд ва ё аз суолгузории журналистон меҳаросанд ва ҳарчи бештар суханро барои гузаштани вақт кашол медиҳанд.
Боре дар рафти нишаст яке аз роҳбарони ниҳоди давлатӣ дар хотима худ бо забони хеш иқрор шуд, ки бояд мо нишасти матбуотӣ мегузаронидем, зеро эшон 1,25 дақиқа ба шахсони ба нишаст омада “лексияи солона” ироа кард ва аз фурсати муносиб истифода бурда, баъзе кормандонашро аз ҷой хезонда, “қадрдонӣ” низ намуд. Дар як нишасти дигари хабарӣ бошад, аз сабаби роҳбарияти дахлдор вақти зиёдро барои хондани варақаи иттилоотӣ сарф кардан, як журналист аз ҷой хеста, “бубахшед, инҷо нишаст аст ё ҳисоботи солона?” гуфта, пурсид. Дар ҷавоб ба саволи журналист “ками дигар, мо ҷамбаст кунем, баъд ба саволҳо мегузарем” гуфту халос. Аммо аҷоиботи нишастҳои мо дар он аст, ки гӯё ҳамаи намояндагони ВАО-и кишвар нобино ё бехату бесавод бошанд, ки вақти зиёдро танҳо дар хондани ана ҳамон “пресс-релиз” сарф мекунанд. Ҳол он ки, то оғози пресс-конфронс журналистон то 2-3 бор варақаи иттилоотиро мехонанд ва ҷойҳои заруриро қайд карда, суолҳои худро барои пешниҳод омода мекунанд. Аммо, мутаассифона, баъзе суолҳои журналистон мисли “номаҳои нохонда” ҳамчун “саволҳои беҷавоб” боқӣ мемонанд. Пас мақсад аз ин сохтаркории баъзе аз мақомоти давлатӣ дар чист ва ё бо ин роҳ мехоҳанд танҳо ба боло расонанд, ки “ҳа, мо нишасти матбуотӣ баргузор кардем”?
Мақсад аз гузаронидани нишасти матбуотӣ - ин хонадани “пресс-релиз” ва ба таърифи ду-се неожурналистон гӯш додан нест, балки баръакс камбудиву норасоиҳои ҷойдоштаи соҳаро дар якҷоягӣ, бо ҳамкории намояндагони ВАО рафъ кардан аст. Пас, худ хулоса кунед, ки агар ҳамин тавр идома ёбад, баъди чор-панҷ сол нишастҳои матбуотӣ тариқи зерин сурат мегиранд:
- Ба намояндагони ВАО ёдрас менамоем, ки барои шинос шудан ба фаъолияти нимсолаи вазорати мо тариқи интернет ба сомонаи мо ворид шуда, нусхаи электронии “пресс-релиз”-ро гиранд. Барои онҳое, ки дастрасӣ ба интернет надоранд, дар ҷойҳои ҷамъиятӣ рӯзҳои фалон аз соати ин то соати он ройгон варақаи иттилоотӣ тақсим карда мешавад. Ногуфта намонад, боз шумо метавонед “пресс-релиз”-ҳоро тариқи аудиоӣ дастрас намоед. Хоҳишмандон метавонанд дастрас намоянд. Ташаккур барои ҳамкорӣ бо вазорати мо...

Нуралӣ КАРИМ

Нишасти матбуотӣ ҳисоботи нимсола аст!
Худ маълум аст, ки нишасти матбуотӣ ҳисоботи солона не, балки ҳисоботи нимсола аст. Дигар ин хел сарлавҳа нагузору моро ҳам водор накун, ки чунин сарлавҳа гузорем, Нуралӣ.
Ба нишастҳои хабарӣ барои хабар навиштан ва барои ба суоли доштаамон ҷавоб гирифтан меравем. Пеш аз оғози “маҷлис” ба ҳамаи рӯзноманигорон варақаҳои иттилоотӣ дода мешавад. Аллакай мақсади аввал иҷро шуд. Мо метавонем аз рӯйи он варақа хабар нашр кунем.
Хуб, инак ҳама омада нишастанду нишаст оғоз шуд. Маълум аст, ки пеш аз оғози сухан бояд онҳоеро, ки соҳибхона ҳисобида мешаванд, шинохт ва шиносоӣ вақти муайянро мегирад. Баъд аз он аз натиҷаи кори нимсолаи худ намояндагони “нишаста”-и он маълумот медиҳанд. Табиист, ки ироаи маълумоти кори нимсола камтар аз 50 дақиқа намешавад. Дар варақаҳои итиллоотӣ ҳамаи ин намеғунҷад.Ин айби намояндагони ниҳодҳои давлатӣ нест, ки барои нишастҳои матбуотӣ вақти кам ҷудо шудааст. Вале новобаста аз ин ҳам, намояндагони “нишаста” кӯшиш мекунанд, ки барои ба суолҳои рӯзноманигорон ҷавоб гуфтан вақт ҷудо намоянд. Инро набояд инкор кард, ки ягон нишасти матбуотӣ бе суолу ҷавоб бо рӯзноманигорон ҷамъбаст намегардад. Ана, вақти ба суолҳо посух гуфтан ҳам расид. Ин гуноҳи худи рӯзноманигорон аст, ки вақт намерасад, то шумо ҷавоби суолҳои махсусатонро пурсон шавед. Рӯзноманигорон дар нишастҳои матбуотӣ аз намояндаи Вазорати маориф ва илм теъдоди макотиби кишвару аз намояндаи Кумитаи дин вақти намози пешинро мепурсанд. Ҳарчанд шумо онҳоро рӯзноманигор намеҳисобед, вале онҳо ҳуҷҷати рӯзноманигорӣ доранд. Рафта гиребони онҳоро гиред, чунки сабаби ба суолатон ҷавоб нагирифтан онҳо шуданд.
Як чизи дигар ногуфта намонад. Одили Нозир - хабарнигори ҳафтаномаи “Тоҷикистон” ба радиои “Озодӣ” гуфта буд, ки гӯё “масъулони сатҳи аввали вазорату ниҳодҳои давлатӣ кӯшиш мекунанд аз посух фирор кунанд ва агар ҷавоб ҳам диҳанд, беҳад кӯтоҳ аст”. Ин куллан фикри хатост. Ҳамаи масъулони ниҳодҳои давлатӣ ба суолҳои рӯзноманигорон пурра шарҳ дода, ҷавоб мегӯянд. Ин намунааш:
Рӯзноманигор:
- Исм чист?
Ҷавобгӯянда:
- Воқеан саволи бамаврид. Дар ин хусус инро гуфтанием, ки соли 1989 як гуруҳи пажуҳишӣ аз ҳисоби олимон таъсис дода будем, ки дар бораи ҳиссаҳои нутқ тадқиқотҳои илмӣ...
... ва инчунин бояд гӯем, ки айни ҳол ҳам барои дуруст кардани китобҳои забони тоҷикӣ корҳо ҷоннок карда шуданду...
... инчунин, ногуфта намонад, ки гуруҳҳои кории мо ҳамарӯза...
...
Хайёми САРАХОН

Хонданд 483

Ҷоми ҷаҳон дар Душанбе

Фев 10, 2018
Хонданд: 411

Рӯзи 5-уми феврал дар доираи иқдоми «FIFA World Cup Trophy Tour», ки бо дастгирии ширкати «Coca Cola» баргузор гашта истодааст, Ҷоми ҷаҳон оид ба футбол (ё худ Ҷоми ҷаҳонии ФИФА) ба Тоҷикистон оварда шуд. 

Ин ҷоизаи олии варзиширо футболбози машҳури дунё, қаҳрамони ҷаҳон ва Аврупо, бозингари маъруфи тими мунтахаби Фаронса - Кристиан Карамбе, инчунин намояндаи Федератсияи байналмилалии футбол (ФИФА) ва намояндаи ширкати Coca - Cola ҳамроҳӣ карданд.
Меҳмононро дар Фурудгоҳи байналмилалии Душанбе Президенти Федератсияи футболи Тоҷикистон Рустами Эмомалӣ пешвоз гирифт. Баъд аз он Ҷоми ҷаҳон оид ба футбол дар маҷмааи "Кохи Борбад" ба намоиш гузошта шуд. Ҳазорҳо мухлиси футбол барои дидани ин Ҷом ва акс гирифтан бо он дар "Кохи Борбад" ҷамъ омаданд.
Дар пайи намоиш бо иштироки меҳмонон ва намояндагони Федератсияи футболи Тоҷикистон нишасти хабарӣ баргузор гардид.
Ҷоми ҷаҳон оид ба футболро ба кишвари мо рӯзи 5-уми феврал аз Қирғизистон оварданд ва рӯзи 6-уми феврал онро ба Ӯзбекистон бурданд. Ба намоиш гузоштани он 9-уми сентябри соли 2017 дар шаҳрҳои Россия шуруъ шуда буд ва баъд он ба кишварҳои хориҷ баровада шуд. Ҷом ба 50 кишвари 6 қитъа бурда мешавад ва моҳи май боз ба Россия бармегардад.

Ҷоми ҷаҳон оид ба футбол чист?
Ҷоми ҷаҳонии футбол (The World Cup) ҷоизаи асосие мебошад, ки ба ғолиби мусобиқаи ҷаҳон оид ба футбол супурда мешавад, аммо дар ихтиёри ФИФА боқӣ мемонад. Ин ҷом аз тилло сохта шудааст ва 6,175 кг вазн дорад. Дар он пайкараи ду шахс, ки курраи заминро бо дастонашон бардоштаанд, таҷассум ёфтааст. Ҷом аз соли 1974 ин гуна шакл дорад. То соли 1970 ба дастаи ғолиби мусобиқаи ҷаҳонӣ оид ба футбол Ҷоми Жюля Риме, ки номи собиқ Президенти ФИФА-ро дошт, супорида мешуд. Он Ҷом аз тилло, нуқраи тамғаи 925 ва лоҷвард омода шуда, дар он акси Нику - Худои пирӯзии Юнони Қадим ҳаккокӣ шуда буд. Соли 1970 Бразилия бори сеюм қаҳрамони ҷаҳон гардид ва охирон маротиба соҳиби Ҷоми Жюля Риме шуд. Баъди он ин ҷомро дуздиданд ва он дигар барқарор карда нашуд. Аз соли 1974 ба тими қаҳрамон Ҷоми ҷаҳон оид ба футбол (The World Cup) тақдим карда мешавад. Аввалин бор Ҷоми ҷаҳонро соли 1974 тими мунтахаби Олмон ба даст оварда буд. Бар асоси қоидаҳои Федератсияи байналмилалии футбол, ба ин Ҷом танҳо ғолибон ва сарони кишварҳо ҳуқуқи даст расонидан доранд. Ҷоми мазкур ба ҳеҷ кас ба таври ҳамешагӣ дода намешавад. Аз ин рӯ, дастаи мунтахаби кишвари ғолиби мусобиқа ба ивази ин Ҷом Ҷоми ғолибони чемпионати ҷаҳон оид ба футболро мегиранд.

Россия - мизбони ЧҶ-2018
Чемпионати ҷаҳон оид ба футбол дар чор сол як маротиба гузаронида мешавад. Имсол мизбонии ин мусобиқаро Федератсияи Россия бар уҳда дорад. Бозиҳои марҳилаи ниҳоии қаҳрамонии футболи ҷаҳон-2018 аз 14-уми июн то 15-уми июли соли 2018 дар 12 варзишгоҳи 11 шаҳри Россия - Маскав, Санкт-Петербург, Қазон, Сочи, Екатеринбург, Самара, Саранск, Ростови соҳили Дон, Волгоград, Нижний Новгород ва Калининград баргузор мешавад. Ба дастаи қаҳрамони нави ҷаҳон 15-уми июл дар варзишгоҳи «Лужники»-и шаҳри Маскав Ҷоми ҷаҳонии футбол тақдим мегардад.
Ёдовар мешавем, ки охирон маротиба соли 2014 тими мунтахаби Олмон қаҳрамони ҷаҳон оид ба футбол шуда, соҳиби ин ҷом гардида буд.
Хайёми САРАХОН

Хонданд 411

Дар орзуи телефони Ленин

Янв 27, 2018
Хонданд: 788

Ин ҳодиса хеле солҳо пеш рух додааст...


Бобоям соли 1916 аз ҷониби Импротурии Рус ба мардикорӣ рафта, инқилоби февралиро дар Новосибирск истиқбол намуда, аз ташкили аввалин колхозҳо хоҷагии хурдакаки “Колхозобод”-ро дар деҳаи Молотов сарварӣ карда, соҳиби ордени Ленин шуда, иштирокчии ВДНХ, сохтмончии Канали Фарғона буданд. Вале ин ҷо гап сари тилфон меравад, на сарнавишти бобоям.
Зимистони соли шастум буд ва як рӯз бобоям, ки баъди муттаҳид шудани колхозҳо бознишаста шуда буд, хостааст ба як рафиқаш, ба деҳкадаи Ворух занг занад. Аз деҳаи Молотов то маркази ноҳия 40 километр, то идораи колхоз се километр роҳ буд ва тилфон ҳам дар ҳамин миқдор масофа буд. Хуллас, бобоям субҳи дигар бояд барои телефон мерафту маро низ ҳамроҳ мегирифт, чун набераи нахустин ва хеле эрка будам. Тамоми шаб хобам набурд: метарсидам, ки бобоям бе ман наравад. Субҳ аввалин бор бе нозу нуз “қаҳрамонона” дасту рӯй шуста, омодаи сафар шудам. Бобоям харро ем додаю полон зада баромад ва ҳарду бо бероҳаҳо, қад-қади заҳбур сӯи маркази колхоз равон шудем. Ҳарчанд бобо мани шашсоларо ба пӯстинаш печонда буд, сардии ҳаво аз бару почаам медаромад, аммо ҳаваси дидани тилфон маҷбур мекард, ки тоқат кунам. Хари пир бошад, қадамашро шумурда мемонд.
Раиси колхоз моро нағз истиқбол гирифт, ҳатто аз ҷевонаш ба ман ду дона қанд ҳам дод. Баъд ба як чизи мошинмонанди болои мизаш даст бурда, дасташро мисли дастаи мошини дарздӯзии модарам ғар-ғар чарх занонд. Баъд ба ким-каси ноаён амр дод: “Маро ба район бипайванд!”. Баъди иҷро шудани амраш, раис бо овози баланд “алло, сентрални? Сентрални мегӯям! Маро ба Исфара пайваст кунед! Исфара?! Исфара, маро ба Ворух пайваст кунед! Алло, алло, ин Ворух?! Ворух мегӯям! Ҳа, рафиқ раис, шумо нағзед? Мана бо фарзанди барӯманди диёри мо, рафиқ Юлдошбой гап занед” гӯён, гӯшакро “тантанавор” ба бобоям дод. Гуфтугӯи бобою дӯсташ як соат тӯл кашид, зеро дар ин миён борҳо алоқа канда шуд, телефон фих-фиху хир-хир кард ва раис борҳо дастакро чарх занонда ба “сентрални” радду бадал кард.
Хуллас, ҳамон бегоҳ хушнудона ба хона баргаштем. Бобоям аз шунидани овози дӯст, ман аз дидани як муъҷиза, ки “тилфон” ном доштааст...
Чи айёми хуше буд! Хабари НҶН-ро бастану боз кушодан ва дубора бастани Бег Сабурӣ маро ба ёди он айём бурд ва аз ин иқдоми Бег-акои азиз дудаста истиқбол намудам. Зеро бо он тилфонҳо суҳбат кардан лаззату кайфияти хос дошт. Имрӯз ҳама танбал шудаанд, аз хона набаромада, сари мизу рӯи ҷойхоб ба чор тарафи дунё занг мезананд. Ин ба ягон қолаби одамигарӣ намеғунҷад. Дар як худи оилаи мо ҳашт телефон, ҳатто модари навадсолаам телефон дорад. Тилфон бояд ташвишҳо дошта бошад, дар он сурат гуфтугӯ ба кас кайфият хоҳад бахшид. Бинобар ин, ҳама НҶН-у “Вайбер”-у “Вотсап”-ҳоро баста, ҳатто интернетро зери боли “Тоҷиктелеком” гирифтани Бег Сабурӣ хушам меояд.
Барои амнияти кишвар, барои барҳам додани ин ҳама хараҷу мараҷ аз Хадамоти алоқа хоҳиш дорам, ҳама ширкатҳои мобилиро баста, ба ҳамон телефонҳои бобои Ленин баргардад. Ҳатман ба ҳамон шакли коммутаториаш, яъне як кас дар марказ “сентрални” шуда мешинаду дигарон аз нуқтаҳо чархаашро ғар-ғар гардонида, тавассути коммутатор тамос мегиранд. Дар ин сурат назорати зангҳо осон мешаваду гуфтугӯи мардумро бемалол сабт кардан ҳам имкон дорад. Сониян, ба гузашта арҷ гузоштан ҳам қарзу ҳам фарз, ӯртоқҳо! Бо он телефонҳои табаррукӣ Ленину Сталин, Нусратулло Махсуму Шоҳтемурҳо гап задаанд! Айфону кайфону ким-чиҳоро дида, ба он телефонҳо ношукрӣ накунем. Агар ба ҳамон телефонҳои қадима баргардем, шояд моро ба китоби рекордҳои Гиннес ворид намоянд.
Хоҳиши дигар ин ки, вакилони муҳтарам ҳарчи зудтар Қонуни танзими телефонҳоро қабул карда, ҳукумат дубора нуқтаҳои гуфтугӯ -“переговорний пункт”-ҳоро барқарор намояд. Як “переговорний пункт”-и ақиби “Почтамт”-и Душанберо ба ёд оред. Ҳар касеро гум мекардӣ, аз ҳамон ҷо меёфтӣ. Аз субҳ то шом интизор мешудӣ, аммо бекор намемондӣ, бо дӯстон суҳбат мекардӣ, духтарони зеборо таги чашм мекардӣ. Эҳ-ҳе, чи қадар одамон бахти худро ин ҷо ёфтаанд. Ҳоло ҳам садои телефончидухтарон бехи гӯшам садо медиҳад: “Канибадам - вторая кабина”, “Куляб - десятая”, “Мургаб не отвечает, ждите”, “Хорог - связь отсутсвует”.
Хуллас, ҳамин хел гапҳо! Баъде ки масъалаи тилфонҳои мобилиро ҳал карда, саросар ба тилфонҳои ленинӣ гузаштем, масъалаи тракторҳоро ба чиниҳо, барои оҳанпора супурда, бо ҷуфти гов рондани заминҳоро ба миён мегузорем. Баъд бо асп бурдани хату хабару рӯзномаҳоро. Эҳ, перспектива бисёр, ҷанобон!

Маҳмуди АШӮРМУҲАММАД

Хонданд 788

Қонуне, ки интизораш будем

Янв 20, 2018
Хонданд: 870

Дар Кохи Борбади шаҳри Душанбе Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон Эмомалӣ Раҳмон дар мулоқоти худ бо фаъолон ва намояндагони ҳамаи табақаҳои ҷомеаи кишвар бахшида ба 10-солагии қабули Қонуни ҶТ «Дар бораи танзими анъана ва ҷашну маросимҳо дар Тоҷикистон» изҳор дошт, ки яке аз сабабҳои қабули қонуни мазкур аз он иборат буд, ки бо пайдо шудани равияҳои мазҳабии дорои хусусияти ифротӣ ва вусъат гирифтани тарғиботи зарарнок тавассути баъзе шабакаҳои интернет дар кишвар зуҳуроти бегонапарастиву тақлид ва хатар ба забону фарҳанг, бахусус, расму ойинҳои миллӣ ва ҳатто тарзи либоспӯшии мардуми мо, аз ҷумла занон, торафт қувват гирифта, таассубу зиёдаравӣ ҳангоми баргузории як қатор маросиму маъракаҳо ба ҳукми анъана даромада буд.
Дар ҳақиқат, бо қабули қонуни мазкур ҳодисаҳои бетартибӣ дар тӯйҳо, то ҳадди содир шудани ҷиноятҳои вазнини авбошӣ ва одамкушӣ, вайрон гардидани қоидаҳои ҳаракат дар роҳҳо ва садамаҳои нақлиётӣ ҳангоми ҳаракати мошинҳои арӯсу домод асосан аз байн рафтанд.
Дар даҳ соли амалӣ гардидани қонун беш аз 1 400 000 маърака ба қайд гирифта шудааст, ки барои баргузории онҳо ба ҳисоби миёна 4 500 000 000 сомонӣ харҷ гардида, сарфаи умумӣ аз ҳамаи намуди маъракаву маросимҳо беш аз 18 миллиард сомонӣ (беш аз 2 млрд доллар)-ро ташкил кардааст.
Ба гуфтаи Сарвари давлат, тибқи маълумоти оморӣ, танҳо дар шаш моҳи баъди қабули қонун шумораи ақди никоҳ дар кишвар то 23 ҳазор зиёд гардида, соли 2007 ба 97 ҳазор ва соли 2008 ба 106 ҳазор расид.
Парлумони Тоҷикистон моҳи августи соли 2017 тағйиру иловаҳо ба Қонуни танзими расму ойинҳоро қабул кард. Бар асоси ин тағйирот, забҳи чорво ва додани таом дар маъракаҳои азодорӣ комилан манъ шуда, тӯйи хатна аз ин ба баъд бидуни даъвати санъаткорон бояд доир шавад. Бо тӯйи дигар муштарак кардани хатнасӯр ҳам акнун манъ мешавад.
Хуб, чаро забҳи чорво ва додани таом дар тамоми маъракаҳои азодорӣ, бо шумули ҳафту чил ва сол манъ шуда, маросими тӯйи хатнаи кӯдакон бидуни даъвати санъаткорон баргузор карда мешавад? Ба ин сабаб пеш аз ҳама зиёдаравӣ, худнамоӣ, харҷи беҳуда, латтабозию латтапарасии занон, дурӯғу воҳимаҳои бебунёд шуданд. Ҳамоно баъди қабул шудани ин Қонун бо тағйироту иловаҳо мардум ҳис кард, ки бо шарофати танзим зиндагиашон чӣ қадар беҳтар шуд. Ин Қонун ва ҳеҷ кадоме аз тағйироти пешниҳодшуда мухолиф ба муқаррароти дини Ислом нест, баръакс, пеши роҳи хурофотро гирифт, зеро бисёре аз маъракаҳоро иштибоҳан исломӣ фикр карда, анҷом медоданд. Дар назар аст, ки бо манъи бисёре аз ин маъракаҳо ба муҳоҷирати корӣ рафтани шаҳрвандони Тоҷикистон коҳиш меёбад, зеро онҳо асосан барои пӯшондани хароҷоти маъракаҳо ва пардохтани қарзҳои миёншиканашон ба мардикорӣ мерафтанд.
Чӣ қадар бамаврид ва хуб шуд, ки маъракаи «Ақиқа», «Ҳоҷизиёрат», маъракаҳои «Ноншиканон», «Модарталбон», «Падарталбон», «Чодарканон», «Муборакбодӣ», «Шаҳтоз» (роҳбандон), даъвати санъаткорон ба тӯйи хатна, инчунин даъвати санъаткорон ва забҳи чорво дар маъракаҳои «Номгузорӣ», «Гаҳворабандон», «Чиллагурезон», «Мӯйсаргирони тифл» ва дигар маъракаҳои ба таваллуди кӯдак вобаста, забҳи чорво ва додани таом дар тамоми маросими дафну азодорӣ, аз ҷумла дар маросими «Се», «Чил» ва «Сол», «Оши сари тахта», «Душанбегӣ», «Ҷумъагӣ», «Ҳафт», «Бист» ва «Шашмоҳагӣ» манъ карда шуданд!
Мо худ шоҳидем, ки вақти оростани дастурхон дар идҳо чи қадар маблағ сарф мешуд ва аҳли хонавода, бахусус занон чи қадар заҳмат мекашиданд. Азбаски дар ҳар хона чунин дастурхон ороста мешуд ва мардум мадору имконияти хӯрдану гирифта бурдани ин қадар ғизоро надоштанд, бароварда партофтани ғизо, пӯсидану куҳна шудани он сар мешуд. Бемороне, ки гирифтори бемориҳои меъдаву рӯда, дил, фишорбаландӣ буданд, дар ин рӯз худро комилан бад ҳис мекарданд.
Дар ҳафтаномаи Иттифоқи нависандагони Тоҷикистон ҳикояи ҳаҷвие дар он шабу рӯз ба чоп расида буд, ки мазмунаш чунин буд: марде аз кор ронда мешавад ва то пайдо кардани кори дигар хурсандӣ мекунад, ки бинобар даргузашти ҳамсояи мӯйсафедаш акнун метавонад 120 рӯз бехавотир бошад, зеро дар ин 120 рӯз вай ҳар ҳафта оши душанбегию ҷумъагӣ мехӯрад, аз маъракаи сею ҳафту бисту чилу сол, ки албатта, аз 2 то 4 рӯз доир хоҳанд гашт, низ ишкамашро сер мекунад. Мард дар охир мегӯяд:
- Агар ду кампири бемори дигари маҳалла низ аз олам даргузаранд, 360 рӯз ошхӯрӣ хоҳам кард!
Албатта, ин ҳикояи тахайюлист ва пеш аз ҳама ҳаҷв аст, вале ҳаҷве, ки камбудиву ҷаҳолатро зери тозиёнаи танқид гирифтааст.
Бадтарин коре, ки дар маъракаву оинҳои сохтаву бофтаи солҳои охири мо ба назар мерасиду мушоҳида мегардид, дар маросими азодорӣ муҳобот кардану зиёдаравӣ буд. Рӯзҳои дароз дар пеши дарвоза истодан, тамоми сол сиёҳпӯш шудан, чандин рӯз ба кори давлатӣ нарафтан, ё аз кори дашту саҳро мондан, худро ғамгин вонамудан, забҳи чорво, одатан қарз гирифтан ва худро саховатманду дуоталаб вонамудан аз ҳад гузашта буд.
Бояд иқрор шуд, ки бо гузашти як даҳсола қонуни мазкур барои ҳифзи арзишҳои фарҳанги миллӣ асос гузошт, суннатҳои диниву мардумиро ба танзим даровард, анъана ва маросиму ҷашнҳои миллиро мушаххасу дақиқ намуд, пеши роҳи хурофоту таассуб, худнамоиву зоҳирпарастӣ ва исрофкориву зиёдаравиро гирифт ва ба ҷорӣ гардидани низому тартиботи ягонаи баргузории чорабиниҳои милливу мардумӣ роҳ кушод.

Соира АЗИЗМУРОДОВА,
омӯзгори МТМУ №51, шаҳри Душанбе

Хонданд 870

Хабари-рӯз

Календар

« Декабрь 2018 »
Пн Вт Ср Чт Пт Сб Вс
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Минбари сардабир

  • ДАВоДАВ

    Масофаи роҳ бо машинае, ки 150 ҳазор доллар нарх дорад…

Нигоҳи хос

  • Шӯро

    Ҳафтаи сипаригашта ду ниҳод - Вазорати фарҳанг ва Кумитаи забон…
  • «Шамол»-и Худо

    Инак, моҳи аввали фасли дай фаро расид. Инак, мавсими «рустшавак»…

Парадокс

Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ...
Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ба ...
Гуфтед? Мегӯянд! (№3
Бег САБУР, раиси Хадамоти алоқа:- Ман қарорамро бекор накардаам.Танз: Офарин ба Шумо, оғои Бег ...
Гуфтед? Мегӯянд! (№2
Аскар ҲАКИМ, Шоири халқии Тоҷикистон:- Дар замони шӯравӣ мо асареро пайдо намекунем, ки дар ...
Гуфтед? Мегӯянд! (№1
Абдуалим ИСМОИЛЗОДА, раиси шаҳри Қӯрғонтеппа Хонандаи беҳтарин- Кӯшиш мекунам ҳар рӯз лоақал ...

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.