.

Alternative flash content

Requirements

Get Adobe Flash player

Иқтисод

Мо деҳқононро маҷбур карда наметавонем, ки ин ё он навъи таҷҳизоти кишоварзиро харидорӣ кунанд, зеро интихоб аз онҳост. Лекин то ҳадди имкон ҳаракат мекунем, ки корхонаҳои истеҳсолкунандаи ватаниро дастгирӣ намоем. Мутаассифона, на ҳамаи таҷҳизоти истеҳсолнамудаи кохонаҳои ватанӣ рақобатпазир шуда метавонанд. Бо вуҷуди он ки нархи таҷҳизотҳои ватанӣ нисбатан арзон аст, деҳқонони мо ҳаракат мекунанд, ки бештар таҷҳизоти воридшударо харидорӣ намоянд. 

Ин нуктаро Юсуф Акрамзода, директории Корхонаи воҳиди давлатии ҷумҳуриявии (КВДҶ) «Тоҷикагролизинг» зимни нишасти матбуотӣ дар ҷамъи хабарнигорон баён намуд.
Мавсуф мегӯяд, ки хушбахтона мо дар марказҳои хизматрасонии худ истеҳсоли якчанд намуди таҷҳизотҳоро ба роҳ мондаем, ки рақобатпазир мебошанд. Чунки дар ҷумҳурӣ шахсони ботаҷриба ва мутахассисони варзида зиёд ҳастанд. Махсусан дар ноҳияи Абдураҳмонӣ Ҷомӣ истеҳсоли алакай 5 намуди таҷҳизоти соҳаи кишоварзӣ ба роҳ монда шудааст. Дар назар аст, ки ояндаи наздик дар маркази хизматрасонии ноҳияи Вахш ва дигар ноҳияҳо истеҳсоли боз якчанд намуди таҷҳизоти соҳа ба роҳ монда шавад. Зеро яке аз мақсадҳои асосии мо дар асоси дастуру супоришҳои Роҳбари давлат пеш аз ҳама дастгирии корхонаҳои истеҳсолкунандаи ватанӣ мебошад. Лекин боз таъкид мекунем, ки таҷҳизоти истеҳсолнамудаи корхонаҳои ватанӣ бояд рақобатпазир бошанд.
Ҳамзамон зикр шуд, ки КВДҶ «Тоҷикагролизинг» имконият дорад, ки дар мавсими шудгору кишти зироати ғалладонагӣ ва дигар намуди зироат дар асоси дархости хоҷагиҳои деҳқонии минтақаҳои ҷумҳурӣ хизматрасонии техникиро нисбат ба хоҷагиҳои хусусӣ то 20 дарсад арзон иҷро кунад. Инчунин маъракаҳои шудгор, кишти баҳорию тирамоҳӣ, такрорӣ ва дигар корҳои агротехникиро босифат ва сари вақт анҷом дода, ба хоҷагиҳои деҳқонӣ мадади амалии техникӣ расонад.
Тавре иттилоъ дода шуд, соли сипаришуда аз ҳисоби маблағҳои буҷетӣ 20 адад комбайнҳои ғалладарави тамғаи «Нива- Эффект», 165 адад тракторҳои гуногунтамғаи МТЗ ба корхона ворид карда шуданд. Инчунин дар асоси шартномаи тарафайн байни КВДҶ «Тоҷкагролизинг» ва ширкати «Агралис»-и Германия 10 адад комбайнҳои тасмачарх ва чархдори навъи «Класс-Тигер» барои ҷамъоварии шолӣ ва аз Ҷумҳурии Чин 8 адад тракторҳои тасмачархи белдор ба ҷумҳурӣ ворид ва пешкаши хоҷагиҳои деҳқонӣ гардонида шуданд.
«Феълан бо дастгирии Ҳукумати Ҷумҳурии Тоҷикистон ва Вазорати кишоварзии ҷумҳурӣ бо Агентии японии ҳамкории байналмилалӣ оид ба ҷудо намудани 10 миллион доллари амрикоӣ ҷиҳати харидории техникаю таҷҳизоти кишоварзӣ ба хотири таъсису мукаммал намудани марказҳои хизматрасонии техникӣ дар шаҳру ноҳияҳои ҷумҳурӣ лоиҳа пешниҳод карда шудааст».- илова намуд Юсуф Акрамзода.

Зоҳири САЙФУЛЛО

Хонданд 1153

Аз қадимулаём барои мардуми тоҷик бозор мавқеи хоса дошта, он ҷои табодули молу коло, савдо, қонеъ кардани ниёзи мардум, ҷои фаҳмидани воқеаҳои гуногун, қонеъ кардани талаботи рӯзмарраи шаҳрвандону меҳмонон ба шумор мерафт. Бисёр шаҳру ноҳияҳои аморати Бухороро маҳз аз рӯи номи бозорҳо метавон шинохт. Инро дар мисоли Янгибозору Душанбе ва Янгиюлу Шаҳрисабз ва ғайраҳо метавон ном бурд.
Соли 1924 ба ҳайси пойтахти Республикаи автономии Тоҷикистон роҳбарони болшевикҳо маҳз деҳаи хурди Душанберо интихоб намуданд, ки рӯзҳои Душанбе дар ин деҳа бозор баргузор мешуд. Дар гузашта дар бозорҳо асосан анвои хӯрдании кишоварзӣ ва чорво савдо мекарданду мардум ниёзи худро ба маҳсулоти саноатӣ асосан бо роҳи шиносбозиву хешутаборгарӣ аз мағозаву дӯконҳо ва базаҳои савдои кооператсияи матлубот ва савдои давлатӣ қонеъ менамуданд. Нархи молу колои саноатӣ чанд баробари нархи муайянкардаи давлат ба фурӯш гузошта мешуду савдогарону мудирони базаҳо, мағозаву дӯконҳои он замон шахсони аз ҳама соҳибэҳтироми вақт ба шумор мерафтанд. Ҳол он ки, дар қонунгузории вақти шӯравӣ ҳатто барои 0,01 тин ҷазо ҷиноятӣ пешбинӣ карда шуда буд, вале ҳатто чунин ҷазоҳои сангин пеши роҳи қаллобону ҷаллобонро гирифта наметавонист. Савдогарон низ мардуми соҳибэҳтиром ба шумор мерафтанд, ки доим мардум пеши ин табақа хору мазлум буданд. Танҳо бозсозии даврони горбачёвӣ низоми давлатдориро ба раванди бо номи «Иқтисодиёти бозорӣ» равона намуду дарҳои оҳанини шӯравиро шикаст ва ба мардум як озодии том бахшид. Байни мардум бозорҳое аз қабили ҷумъабозорҳою якшанбебозорҳо ба вуҷуд омаданд. Кам-кам мардум он ҷо либосаворию пойафзолҳои хориҷаи дуру наздикро савдо менамуданд.
Аз солҳои 80-ум ва аввали соли 90-ум системаи сотсиалистии болшевикону коммунистон аз пӯсидашавиашон дарак доданд. Аллакай системаи савдои давлатию кооператсияи матлубот дар таъмини аҳолӣ ҳатто бо маҳсулоти аввалияи рӯзгор мушкилӣ мекашид. Ин буд, ки худи роҳбарон ва падарони демократияи шӯравӣ қулфҳоро шикаста, аввалин маротиба касби тамоман навро бо номҳои тоҷирону савдогарони бозор ва воридкунандагону содиркунандагон ба амал бароварданд. Дар муҳлатҳои басо кӯтоҳ қариб ки пурра тамоми истеҳсолкунандаҳои ватанӣ аз байн рафтанд, ки ҳатто коғази ташнобу тамоми анвои хӯрданиву ниёзи аввалиндараҷа аз хориҷи кишвар ворид карда мешуд. Ин ҷо агар сабаби асосӣ канда шудани робитаҳои иқтисодӣ ё кооператсияи тарафайни молу коло бошад, тарафи дигари масъала - ин ҷанги бародаркуш ба шумор мерафт. Ин буд, ки дар иҷлосияи таърихии 16-уми Шӯрои олии кишвар, ки дар шаҳри бостонии Хуҷанд моҳи ноябри соли 1992 баргузор гардид, ба мардум раиси Шӯрои олии тозатаъин ваъдаи сулҳу салоҳу озодии комилро дод.
Аввалин нуқтаву бозорҳои нав дар шаҳри Душанбе солҳои 1992-93 дар минтақаи роҳи оҳани шаҳри Душанбе ва хонаи хизмати маишии «Садбарг» ва меҳмонхонаи Душанбе (Пойтахт) кушода шуда буд. Баъдан чунин бозорҳо бо номи «Ганҷина»-ю «Панҷшер» дар минтақаи бозори «Саховат» кушода шуданд, ки роҳбарони ин бозорҳою марказҳои савдо ҳар сари чанд вақт гӯё дар ин бозорҳо навсозиву бозсозӣ намуда, то метавонистанд аз соҳибкорон маблағ ҷамъоварӣ менамуданд. Соҳибкор байни ҳавою замин гӯё муаллақ монда буду имрӯзу пагоҳ ба сарашон чӣ меояд, намедонист.
Соли 2002-юм дар моҳҳои сентябр-октябр бинобар мутобиқат накардани бозорҳои «Ганҷина» ва Панҷшер» ба меъёрҳои бехатарӣ аз сӯхтору беҳдошти санитарӣ баста шуданд ва бо амри раиси шаҳри Душанбе тахрибу бозсозӣ намудани ин ду бозор оғоз гардид. Дар натиҷа соҳибкори ватанӣ зарарҳои басо ҷиддӣ дид. Аз ҳамон вақт сар карда раиси пешини ноҳияи Ленин (Рӯдакии ҳозира) Холмуҳаммад Машрабов ба сохтмони бозори намунавӣ оғоз намуд, ки дар он замон ҳамто надошт. Аллакай аз моҳи январи соли 2003-юм сар карда бозори «Корвон» оҳиста-оҳиста ба кор сар намуд. Нахуст дар қисми аввали бозор, ки дар вайронаҳо обод карда шуда буд, дар майдони 8 га замин бозори замонавӣ бо тамоми инфраструктурааш сохта ба истифода дода шуд. Хубии ин бозор дар он буд, ки берун аз шаҳр сохта шуда буд ва ба ҳамаи самтҳои Тоҷикистон роҳ кушода ва тавқифгоҳҳои бузурги нақлиётиро низ доро буд. Барои ҳар гуруҳи молҳо ҷойҳои алоҳида пешниҳод карда шуда буд. Инро дар мисоли ҷойҳои махсуси фурӯши мол, аз қабили пойафзоли занона, мардона, кӯдакона ва варзишӣ метавон зикр намуд, ки ҳар кадом дар алоҳидагӣ ба савдо гузошта шудаанд. Ё матову ҷавоҳирот, молҳои маишӣ ва телевизору асбобҳои хоҷагию рӯзгор бо молҳои барқию фарфору шишагин ҳар кадом дар алоҳидагӣ ба фурӯш бароварда мешаванд.
«Бозори Корвон» на танҳо чун ҷои савдо машҳур аст, балки он ҷои таҷрибаи пешқадами тиҷорат байни мардум пазируфта шудааст. Қисми зиёди молу коло дар тамоми марзҳои ҷумҳурӣ аз «Бозори Корвон» гирифта мешаванд. Аз ҳама асосиаш давоми 16 соли охир маҳз туфайли ин бозор як касабаи нав бо номи тоҷир ё соҳибкор ба миён омада, ба тамоми ҳудудҳои Тоҷикистони азиз ва берун аз он интиқол ёфт. Маҳз дар «Бозори Корвон» роҳҳои пешқадами рекламаи молу коло ба роҳ монда шудааст. Дар гузаштаи начандон дур, то соли 2016 дар ин бозор, ки дар 23,4 га замин фаъолияти корӣ дошт, 9 ҳазор соҳибкорон соҳиби ҷои кори доимӣ буданд. Зиёд маблағҳоро ба буҷети шаҳри Душанбе маҳз соҳибкорону соҳибмулкони ин бозор пардохт менамуданд.
Мувофиқи иттилои сардори Нозироти андоз дар ноҳияи Фирдавсии шаҳри Душанбе Аҳлиддин Давлатзода, «саҳми ҶДММ «Бозори Корвон» ва соҳибкорони дар ғанӣ гардонидани буҷаи кишвар басо калон буда, нақши директори он муҳтарама Мавлонова Ҳалима беназир мебошад. Зеро муаллимаи азиз худашон дастпарвардаи мақомати андоз буда, то ба вазифаи муовини Раиси Кумитаи андози назди Ҳукумати кишвар фаъолияти корӣ доштанд. Ин аст, ки ягон вақт мақомоти андози ҷумҳурӣ дар ин бозор проблема оид ба пардохтҳои давлатӣ надоштанд. Пардохти ҳамаи андозҳо дар вақташ ва бо сифати баланд ба иҷро расонида мешавад. Он кас чун мураббию устоди азизи мо ҳамеша мададгори кормандони мақомоти андоз мебошанд. Дар “Бозори Корвон” барои онҳое, ки аз пардохти андоз сарпечӣ менамоянд ё пардохтҳои давлатиро дар вақташ пардохт наменамоянд, ҷой нест, чунки муаллима худ намунаи ибрати дигарон буда, дар масъалаи дар вақташ супоридани андозҳо бисёр сахтгиранд”.
Боз, фарқияти “Бозори Корвон” аз дигар бозорҳои дар гузашта маъруф аз он иборат аст, ки соҳибкор бору колои худро дар ҷои ба ӯ додашуда ба савдо гузошта, баъди тамом шудани вақти корӣ онро ба нигоҳбонҳои бозор супорида, орому осуда ба манзилаш меравад. Дар гузашта бошад, ҳазорон аробаҳои ғунҷоишашон гуногунро баъди итмоми рӯзи кории савдо молҳоро ҳар бегоҳ барои нигаҳдорӣ ба дигар ҷойҳо интиқол медоданд, ки ҳам оромии шаҳрвандон вайрон мешуду ҳам бехатарии роҳу ронандагон. Гузашта аз ин, худи соҳибони мол ё фурӯшандагон баҳри бехатарии молу колои худ дар азоб буданд.
Баъди ҷудо шудани ҶДММ “Бозори Корвон” аз “Корвон+” масоҳати умумии ҳозираи бозор 8 га-ро ташкил намуда, дар он ҳамагӣ 2850 соҳибкор кору фаъолият намуда, зиндагии худро пеш мебаранд. ҶДММ “Бозори Корвон” дар ҳама корҳои ободкорию эҳсонкориҳои шаҳрдорию ҷумҳурӣ фаъолона иштирок менамояд, ки агар ном ба ном ҳар яки онро номбар кунем, чанд дафтар пур мешавад. Мо ҳамагӣ се кори онҳоро номбар менамоем. Давоми солҳои зиёд ин муассисаи бонуфуз ба мактаб-интернати томактабии №2-и шаҳри Душанбе ба таври доимӣ ёрии амалии худро расонида омада, аз соли нави 2018-ум ёрии доимии худро ба беморхонаи ҷумҳуриявии касалиҳои руҳии ноҳияи Рӯдаки низ оғоз намуд. Гузашта аз ин, соҳибмулки ин бозор Нуршедҷон Машрабов дар деҳаи Оби Шифои ҷамоати деҳоти Чоргултеппаи ноҳияи Рӯдакӣ мактаби замонавиро бо ғунҷоиши 640 хонанда дар як баст ва бо тамоми шароитҳои хониш, аз қабили ошхонаҳо, майдони варзишию толори варзиш, маҷлисгоҳу утоқҳои фаннӣ пурра аз ҳисоби маблағҳои худ сохта истодаанд, ки маблағи умумии хароҷотҳои соҳибмулк беш аз 8,7 миллион сомониро ташкил медиҳад.
Ба ғайр аз ин, ҶДММ «Бозори Корвон» қисми 47-уми ҳарбикунонидашудаи сӯхторхомушкуниро бо ду автомашинаи сӯхторхомушкунию хароҷотҳои техникии ин қисмро ба зимма дорад ва барои нигаҳдории тартиботи ҷамъиятию оромии шаҳрвандон шуъбачаи милисаи “Корвон”-ро иборат аз 10 нафар хароҷотҳоро пардохт менамояд.
Баҳри ғанӣ гардонидани буҷаи кишвар моҳе танҳо аз ҳисоби худи бозор маблағҳои беш аз 250 ҳазор сомонӣ ба буҷа интиқол дода мешавад. Танҳо дар сӯхтори соли гузашта на ин ки соҳибкорон, балки худи бозор низ аз ҳисоби амволи худ зарари басо ҷиддӣ дида буд. Вале ба ин нигоҳ накарда, аз тарафи маъмурият ва соҳибмулк бо харҷи аз 850 ҳазор то 1 млн сомонӣ 400 ҷойи тиҷоратӣ дар кӯтоҳтарин муҳлат сохта ба истифода дода шуданд, ки имрӯз он соҳибкороне, ки зарар дида буданд, пурра ба фаъолият машғуланд. Тибқи қарори дахлдор ин соҳибкорон 2 сол аз пардохти иҷора ва чекҳои якдафъаина озод карда шудаанд. Гарчанде ҳеҷ вақт офат аз омадани худ моро хабар накунад, вале соҳибмулк тамоми кори аз дасташ омадаро баҳри сабукиҳо овардан ба соҳибкорон иҷро намуд, зеро онҳо низ дар пайи ин офат зарари басо ҷиддӣ дида буданд. Зиндагӣ ҷараён дорад ва имрӯз харидори тоҷик ниёз ба як шароити боз ҳам хубу қулай ва дар доираи меъёрҳои байналмилалӣ мебошад. Ин аст, ки тибқи қарори ҷаласаи проколии ҳукумати кишвар “Бозори Корвон” давоми се соли минбаъда бояд бозсозӣ карда шавад.
Мувофиқи суханони директори ҶДММ «Бозори Корвон» Мавлонова Ҳалима, «аллакай баъди ҷаласа ва гирифтани супориши лозима мо чанд намуд лоиҳаю тарҳҳоро омода намудаем, ки яке аз дигаре зеботару қулайтар мебошанд. Ман фикр мекунам, ҳар яке аз ин лоиҳаю тарҳҳо ба зебогии Душанбешаҳр як зебогии дигар зам мекунанд. Баъди омӯхтани як комиссияи салоҳиятнок мо корро оғоз хоҳем кард ва “Бозори Корвон» дар се марҳила бозсозӣ карда хоҳад шуд, ки он аз таҳхонаву таваққуфгоҳҳо ва се ошёна иборат буда, барои фаъолияти соҳибкорӣ ва харидор тамоми шароити лозима фароҳам оварда мешавад. Ин бозори нав дар доираи тамоми навовариҳои тиҷоратию хизматрасонӣ ва нигоҳдории молу коло ба роҳ монда шуда, ҳар як гуруҳи мол дар ҷои барои он пешбинишуда чун дар намоишгоҳҳо гузошта мешавад. Яъне дар ин бозор, чун намоишгоҳ фурӯшгоҳҳо дар як комплекси басо бузург сохта мешаванд, ки назираш дар минтақа нест».
Ба изҳори Ҳалима Мавлонова, “кулли пешравию озодии соҳибкорон ва гулгулшукуфоиву амнияти кишвар - ин хизмати Пешвои муаззами миллат ва доҳии тоҷикони ҷаҳон муҳтарам Эмомалӣ Раҳмон мебошад. Дар ин раванд, хизмати раиси шаҳри Душанбе муҳтарам Рустами Эмомалӣ, ки баҳри ободии пойтахти кишвар хизмат намуда истодаанд, шоисаи таҳсин аст”.
Ҳоло дар ин бозор 160 нафар коргарон фаъолияти корӣ доранд, ки ба ҳар яке аз онҳо қитъаҳои алоҳида вобаста карда шудааст. Амният ва нигоҳбонии бозорро бошад, ниҳоди махсус нигоҳбонӣ менамояд. Ҳар як ваҷаб ҳудуди бозор зери назари дурбинҳои назоратӣ қарор дошта, дилхоҳ қонуншикан ва ё вайронкунандаи тартиботи ҷамъиятӣ ба зудӣ муайян карда мешавад. Яъне ин бозор яке аз амнтарин нуқтаҳо дар кишвар ба ҳисоб меравад ва тамоми коргарони ин ниҳод бо сарулибоси махсуси фарқкунанда ва лавозимоти техникии хабаркунанда таъмин мебошанду бо кормандони милиса робитаи хуби корӣ ба роҳ монда шудааст. Сарварии ин ниҳодро Юсупов Баҳовиддин, ки аз рӯзҳои аввали сохташавии бозор дар он фаъолият менамояд, ба ӯҳда дошта, худи ӯ тамоми бозорро бо ҷузъиёти хурдтаринаш хуб медонад.
Асоси рисолати ҶДММ «Бозори Корвон» аз он иборат аст, ки аввалин маротиба дар Тоҷикистони соҳибистиқлол соҳибкор ё тоҷиру фурӯшанда батамом худро озод ҳис намуда, дар воридоти молу коло таҳти ҳимояи пурраи давлат қарор дорад ва соҳибмулку роҳбарияти бозор дар масъалаи ҳимояи ӯ тамоми чораҳои заруриро андешидаанд. Дилхоҳ молро тоҷирон дар асоси маркетинг ё омӯзиши талаботи бозор вобаста ба сармояашон ворид менамоянд. Танҳо аз тарафи давлат онҳо вазифадор карда шудаанд, ки сари вақт андозҳо ва дигар пардохтҳои ҳатмиро пардохт намоянду халос.
Аз рӯи суханони Нурхон ном ҳамсуҳбатамон, ки тоҷири “Бозори Корвон» буду зодаи ноҳияи Термурмалик аст, «ман муддати беш аз 16 сол боз дар “Бозори Корвон” бо се фарзандам ва як келинам фаъолияти соҳибкорӣ дорем. Тӯли ин солҳо фақат ва фақат аз тарафи соҳибмулк ва роҳбарияти бозор аз тамоми ҷиҳатҳо ба мо кӯмак расонида мешавад. Давоми ин солҳо мо ҳам соҳиби хона шудему ҳам чанд тӯй карда, фарзандҳоро оиладор намудем. Ин бозор бисёр нафаронро соҳиби сармоя намуду соҳиби пулу мол ва обрӯ, бинобар ин, ман ба соҳибмулк ва роҳбарияти бозор аз даргоҳи Худованд фақат умри дарозу саломатиро хоҳонам”.
Ба гуфтаи Қарахонов Шералӣ, сокини маҳаллаи 65-уми пойтахт, “хизмати Холмуҳаммад Машрабов ва писарашон Нурмуҳаммад, ки “Бозори Корвон”-ро дар як вайрона аз сифр бунёд намудаанд, пеши соҳибкорону тоҷирон басо бузург мебошад. Чунки дар гузашта давоми даҳ сол мо соҳибкорон ҷои аниқи тиҷорату даромад надоштем. Соли 2002, вақте корҳои сохтмонӣ оғоз гардиданд, ман аз аввал то охир дар ин сохтмонҳо саҳми худро гузоштам. Ва ин ободиву фаровоние, ки мебинед, хизмати оилаи Машрабовҳо мебошад. Воқеан, Холмуҳаммад Машрабов яке аз вафодортарин нафар дар командаи кории Пешвои муаззами миллат, Президенти кишвар Эмомалӣ Раҳмон ба шумор мерафт ва хизматҳояшон дар назди ин миллату давлат басо зиёд аст”.
Аз рӯйи суханони Шералӣ ном сокини кӯчаи Ҷомӣ, ки дар гузашта сокини шаҳри Кӯлоб, кӯчаи Тамошотеппа будааст, «охири соли 2002 ман як нуқтачаро гирифта, ба тиҷорати либоси кӯдакона машғул гардидам. Баъдан ду бародару чанд хеши дигарамро низ ба фаъолияти соҳибкорӣ ҷалб намудам. Имрӯз мо ҳамагӣ ба туфайли осмони софу тинҷиву оромӣ ва хизматҳои арзандаи Пешвои муаззами миллату соҳибмулки ин бозор соҳиби хонаву дари ободу мошину дару дӯконҳо гардидаем, ки дар гузашта онро дар хоб ҳам орзу карда наметавонистем. Барои мо тамоми шароит муҳайё карда шудааст. Савдо шудани молу коло ин аз худи мо соҳибкорон вобаста аст, ки оё талаботи бозорро ба инобат гирифтаем ё на? Бояд соҳибкори имрӯза ҳам аз ҷиҳати ақлонӣ ва ҳам аз ҷиҳати руҳӣ пурра ба рақобати бозор омода бошад. Агар мо талаботи ҳаррӯзаи бозорро аз назар дур монем, дар андак вақт мумкин аст, ки муфлис гардем. Яъне ин ҷо менеҷмент - талаботи бозорро ҳамеша дар назар бояд гирифт. “Бозори Корвон” асоси тамоми бозорҳои минтақа буда, нарху навои ин ва ё он мол танҳо тавассути ин бозор риоя карда мешавад. Ман аз бобои раис ва фарзандонашон, ки барои мо чунин шароитҳои беҳтаринро муҳайё кардаанд, миннатдор буда, ҳамеша хоҳони саломатиашон ҳастам”.

Саиди ҲАЙДАР, МТЖТ

ШАРҲИ МО:
Мавлонова Ҳалима Файзиевна 8-уми марти соли 1956 дар ноҳияи Ҳисор дар оилаи журналист таваллуд шудааст. Соли 1973 мактаби рақами 2 ба номи С. Айниро бо баҳои аъло хатм намуда, худи ҳамон сол ба Донишкадаи политехникии Тоҷикистон аз рӯи ихтисоси муҳандиси сохтмон ва иқтисодчӣ дохил гардида, онро соли 1978 бо баҳои аъло хатм намудааст. Солҳои 1978-81 - Раёсати омори шаҳри Душанбе, иқтисодчии калон. Солҳои 1981-90 - Шуъбаи молияи ноҳияи Роҳи оҳани шаҳри Душанбе, иқтисодчии калон. Солҳои 1990-91 - сардори шуъба дар Шуъбаи молияи ноҳияи Роҳи оҳан. Солҳои 1991-93 иқтисодчии калони Вазорати молия. Солҳои 1993-96 сардори Нозироти андози ноҳияи Роҳи оҳани шаҳри Душанбе. Солҳои 1996-99 сардори Раёсати Кумитаи андози назди Ҳукумати ҷумҳурӣ. Солҳои 1999-2002 муовини раиси Кумитаи андози назди Ҳукумати ҶТ. Аз соли 2002 то имрӯз директори ҶДММ “Бозори Корвон”. Ду навбат депутати шаҳрӣ, як навбат депутати ноҳияи Фирдавсӣ. Оиладор ва роҳбари намунавӣ. Модари 3 фарзанд ва бибии 8 набера.

Хонданд 703

Ваъдаҳои нави Тоҷиддин Пирзода…

Фев 10, 2018
Диданд: 882

Муродалӣ Алимардон чӣ мегуфта бошад?

Ҳафтаномаи «Фараж» тасмим гирифт, ки роҷеъ ба чи гуна татбиқ шудани дастури Президенти кишвар оид ба солимгардонии бонкҳои ба буҳрон печида бевосита ба сарони ҶСК «Тоҷиксодиротбонк» ва ҶСК «Агроинвестбонк» муроҷиат карда, аз тасмими минбаъдаи онҳо, барномаҳои таҳияшуда барои солимгардонии бонкҳо ва баргардонидани маблағи муштариён пурсон шавад ва аз натиҷааш мавод омода карда, ба хонандагон пешниҳод намояд. Инак, гузориши нахустини худро дар ин мавзуъ мо аз суҳбат бо Икромӣ Сироҷиддин Салом - муовини Раиси Бонки миллии Тоҷикистон, ки зимни муроҷиати шаҳрвандон дар Бонки миллӣ доир гашт ва Тоҷиддин Пирзода Раиси ҶСК «Тоҷиксодиротбонк» пешкаши мизоҷон ва хонандагони нашрия мегардонем.
Ду соли охир мавзуи ба мушкилӣ дучор шудани бонкҳои кишвар ба яке аз мавзуҳои доғи рӯз табдил ёфта, дар расонаҳои кишвар таҳлилу баррасиҳои гуногун мавриди чоп қарор гирифтанд. Алъон низ чунин ба назар мерасад, ки мизоҷон бо умед ба расонаҳо менигаранд, то ин ки хабарҳои умедворкунандаеро хонанд. Аз суҳбат бо аксари мизоҷоне, ки бо шикоят ба расонаҳо муроҷиат мекунанд, ба хулосае омадан мукин аст, ки худи бонкҳо омода нестанд, ки дар бораи вазъи воқеии худ ба мизоҷонашон маълумот диҳанд ва ё тариқи васоити ахбори омма хулосаҳои умедворкунанда пешниҳод намоянд. Маҳз ҳамин омил сабаб шуда, ки мизоҷон дар бораи бонки худ, на аз тарафи масъулини бонкҳо, балки бевосита тариқи матбуот маълумот гиранд.
Бояд гуфт, ки якбора ба буҳрон гирифтор шудани якчанд бонки кишвар, аз ҷумла «Агроинвестбонк», «Фононбонк», «Агропромбонк», «Тоҷиксодиротбонк» мизоҷони бонкҳоро дар ҳолати ногувор қарор дода, боварӣ ва эътимоди онҳоро коста кард ва мардумро яъсу ноумедии ҷиддие фаро гирифтааст. Инак дар расонаҳо хабари умеворкунандае паҳн шуд, ки Пешвои муаззами миллат, Президенти Ҷумҳурии Тоҷикистон Эмомалӣ Раҳмон дар маҷлиси солонаи Ҳукумати кишвар ба сарони ҳамаи бонкҳои ба мушкилӣ дучоршуда, аз ҷумла ҶСК «Тоҷиксодиротбонк» ва ҶСК «Агроинвестбонк» 2 моҳ муҳлат дода, аз масъулин талаб намудааст, ки барномаи солимгардонии бонкҳои ба буҳрон печидаро ба роҳ монда, усулҳои баргардонидани маблағҳои амонатии мизоҷонро таҳия намоянд ва дар мувофиқа бо Бонки миллӣ ва Вазорати молияи кишвар дар амал татбиқ созанд. Инро рӯзи шанбеи гузашта, зимни қабули муроҷиати шаҳрвадон, дар суҳбат бо банда Икромӣ Сироҷиддин Салом - муовини Раиси Бонки миллӣ тасдиқ карда, иброз дошт, ки Ҳукумати кишвар 2 моҳ муҳлат дод, то ин ки ҶСК «Агроинвестбонк» ва ҶСК «Тоҷиксодиротбонк» барои солимгардонии бонкҳои худ чораандешӣ намоянд. Инчунин аз посухи хаттии мактуби банда ҷиҳати мушкили баргардонидани пасандоз дар ҶСК «Агроинвестбонк» бармеояд, ки айни замон «Бонки миллии Тоҷикистон бо ташкилотҳои молиявии байналмилалӣ барои ҳалли мушкилоти низоми бонкии мамлакат як қатор чорабиниҳои солимгардонӣ андешида истодааст ва умедвор аст, ки дар ояндаи наздик мушкилоти мазкур ҳалли худро хоҳад ёфт».
Ҳафтаномаи «Фараж» тасмим гирифт, ки роҷеъ ба чӣ гуна татбиқ шудани дастури Президенти кишвар роҷеъ ба солимгардонии бонкҳои ба буҳрон печида бевосита ба сарони ҶСК «Тоҷиксодиротбонк» ва ҶСК «Агроинвестбонк» муроҷиат карда, аз тасмими минбаъдаи онҳо, усулҳои ба роҳ монда, барномаҳои таҳияшуда барои солимгардонии бонкҳо ва баргардонидани маблағи муштариён пурсон шавад. Тасмими бевосита ба раисони бонкҳо муроҷиат намудан ба он хотир гирифта шуд, ки мизоҷон аз вазъи воқеии бонкҳои кишвар, аз забони раисони он огоҳ шаванд, на аз забони шахсоне, ки аз чораандешии бонкҳо огоҳӣ надоранд. Бо ин мақсад, мо баъд аз вохӯрӣ бо муовини Раиси Бонки миллӣ ҷаноби Икромӣ, нахуст ба Раиси ҶСК «Тоҷиксодиротбонк» муроҷиат намудем.
Ба саволи мо - «Раёсати ҶСК «Тоҷиксодиротбонк» барои солимгардонии вазъи бонк ва ҳалли мушкилоти ба амал омада дар ояндаи наздик чӣ иқдомҳоеро рӯи даст гирифтааст ва мизоҷони бонки мазкур аз кай метавонанд бемонеа пасандозҳои худро бозпас гиранд?” Раиси ҶСК «Тоҷиксодиротбонк» Тоҷиддин Пирзода изҳор дошт, ки «бо мақсади рафъи буҳрони молиявӣ ва ба эътидол овардани вазъи бонкҳои мушкилдор бо ташаббуси бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати сармоякунонии бонкҳо маблағҳои давлатӣ ҷудо гардид. Тибқи супориши Ҳукумати кишвар роҳбарияи ҶСК «Тоҷиксодиротбонк» дар мувофиқа бо Вазорати молия ва Бонки миллии Тоҷикистон «Нақшаи чорабиниҳо оид ба солимгардонии вазъи молиявии ҶСК «Тоҷиксодиротбонк» барои солҳои 2017-2019» ва «Стратегияи солимгардонии вазъи молиявии ҶСК «Тоҷиксодиротбонк» барои солҳои 2017-2021»-ро таҳия ва қабул намуд. Айни ҳол бонк фаъолияти худро дар асоси ин ду ҳуҷҷати муҳим дар ҳама самтҳо амалӣ намуда истодааст. Яъне, бо пурра амалӣ шудани нақшаи чорабиниҳо оид ба солимгардонии вазъи молиявӣ, бонк ҳамаи мушкилот ва монеаҳои мавҷударо комилан пушти сар мекунад ва дигар натанҳо монеае барои хизматрасониҳои бонкӣ боқӣ нахоҳад монд, балки сатҳу сифати хизматрасониҳои бонкӣ беҳтару хубтар хоҳад шуд».
Мо аз ҷаноби Тоҷиддин Пирзода инчунин пурсон шудем, ки «ҶСК «Тоҷиксодиротбонк» то охири моҳи ноябри соли 2017 ба ҳар мизоҷ, новобаста ба маблағи депозитиаш, дар як рӯз то 200 сомонӣ ва дар як моҳ то 2000 сомонӣ пули нақд медод. Вале аз 01.12.2017 бонки мазкур додани пулро барои мизоҷони минтақавии худ комилан қатъ кард ва фаъолияти кортҳои минтақавиро дар пойтахт боздошт. Оё ин тасмими Раиси «Тоҷиксодиротбонк» қонунӣ аст? Оё ин тасмим ҳуқуқи мизоҷони «Тоҷиксодиротбонк»-ро дар минтақаҳо поймол намекунад?».
- Пеш аз ҳама, бояд содиқона бигӯям, ки мо ҳеҷ гоҳ дар пайи поймол кардани ҳуқуқи муштариёни худ нестем,- гуфт ҷаноби Тоҷиддин Пирзода.- Баръакс, мо тамоми чораҳоро дида ва аз тамоми имкониятҳо истифода бурда истодаем, ки дар навбати аввал мушкили мардуми оддиро ҳал кунем ва ин хоҳиши самимонаи дили мост. Беҳтараш биёед бо забони рақам ҳарф бизанем. Лутфан ба ин омор таваҷҷуҳ кунед: бақияи сандуқи амонатӣ дар таърихи 13-уми декабри соли 2016, ки баъд аз анҷоми муҳлати Маъмурияти муваққатии Бонки миллии Тоҷикистон мо дубора ба кор шуркъ кардем, маблағи 3 миллиарду 11 миллион сомонӣ ва дар таърихи 31-уми декабри соли 2017 бошад, маблағи 887,0 миллион сомониро ташкил дод, яъне сандуқи амонатӣ дар ин давра ба маблағи 2 миллиарду 124 миллион сомонӣ, ё ба андозаи 70,5% кам гардидааст. Бақияи маблағҳо дар ҳисобҳои шахсони воқеӣ аз 1 миллиарду 423 миллион сомонӣ ба 767 миллион сомонӣ расида, ба маблағи умумии 656 миллион сомонӣ кам гардидааст. Яъне, ин рақамҳо нишон медиҳанд, ки «Тоҷиксодиротбонк» новобаста аз фишори буҳрони молиявӣ ва мушкилоти ҷойдошта дар фикри иҷрои уҳдадориҳои худ дар назди муштариёни худ мебошад.
Ҷавоб ба ин суол, ки чаро мо додани маблағҳои муштариёни филиалҳоро аз банкоматҳои Сарбонк қатъ кардем, пеш аз ҳама бояд бигӯям, ки ин ҳам як амри муваққатӣ аст ва бо оддӣ шудани вазъияти молиявӣ аз байн меравад. Яке аз ҳадафҳои ин тадбир, боло бурдани масъулияти филиалҳои бонк дар назди муштариён мебошад. Зеро вақте ки муштариён маблағҳои худро аз Сарбонк дарёфт мекунанд, ин то як андоза масъулини филиалҳоро фориғбол мекунад, аз тарафи дигар, муштарӣ маҷбур мешавад, ки барои гирифтани маблағҳои худ бо сарф намудани маблағи иловагӣ ва вақти гаронбаҳои худ аз ноҳия ба марказ биёяд. Барои аз байн бурдани ин ноҳинҷории муштариён мо ба филиалҳо супориш додем, ки ҳар ҳафта рӯзҳои сешанбе ва панҷшанбе маблағҳои муштариёнро тибқи меъёри муқарраршуда пардохт ва аз натиҷаи он дар рӯзи баъдӣ ба Раёсати бонк маълумотнома ирсол намоянд. Айни замон бо ҳамин тартиб мо кор бурда истодаем, вале боз ҳам таъкид мекунам, ки ин як тадбири муваққатист.
Дар соли сипаришуда уҳдадориҳои қарзии муштариён дар назди бонк ба маблағи умумии 1 миллиарду 145 миллион сомонӣ пардохт гардид, ки ин аз «Нақшаи чорабиниҳои солимгардонии вазъи молиявии бонк барои солҳои 2017-2019» то охири соли 2017 пешбинигардида беш аз 2 маротиба зиёд аст. Дар ин давра ҳаҷми умумии уҳдадориҳои бонк, бо дарназардошти қарзҳои субординарӣ, аз 3 миллиарду 882 миллион сомонӣ дар таърихи 13-уми декабри соли 2016 то ба 1 миллиарду 545 миллион сомонӣ поён рафта, ба маблағи 2 миллиарду 337 миллион сомонӣ кам гардид.
Инчунин, аз суҳбат бо Раиси «Тоҷиксодиротбонк» ҷаноби Тоҷиддин Пирзода маълум шуд, ки Роҳбарияти ҶСК «Тоҷиксодиротбонк» соли 2018-ро соли ҷалби сармоя ва фурӯши амволи калони аз қарзҳои калон ба тавозуни бонк гирифташуда эълон кардааст. Мувофиқи маълумоти пешниҳодгардида, кор дар ин ду самти афзалиятнок бо ҷиддият ва қотеияти тамом шуруъ шуда, идома ёфта истодааст ва мо итминони комил дорем, ки бо дастгирии Ҳукумати Ҷумҳурии Тоҷикистон, Бонки миллии Тоҷикистон ва ҳусни тафоҳуми муштариён вазъи молиявии бонкро комилан солим мегардонем.
Ин буд натиҷаи суҳбати мо бо раиси ҶСК «Тоҷиксодиротбонк» Тоҷиддин Пирзода. Мо ҳам умедворем, ки чораҳои андешида мушкилоти ба вуҷуд омадаро дар ҶСК «Тоҷиксодиротбонк» ба зудӣ ҳал мекунад ва мизоҷони бонк бе мушкилӣ пасандозҳои худро бозпас мегиранд.
Ҳафтаномаи «Фараж» ҳафтаҳои наздик аз натиҷаи муроҷиати худ ба раиси ҶСК «Агроинвестбонк» Муродалӣ Алимардон низ оид ба чӣ гуна татбиқшавии дастурҳои Президенти кишвар, вазъи кунунии ҶСК «Агроинвестбонк» ва чораҳои андешидашуда барои солимгардонии бонки мазкур мавод омода карда, пешкаши мизоҷон хоҳад кард.

Холиқи МУҲАММАДНАЗАР

Хонданд 882

Танзими нарх дар бозори «Деҳқон»

Фев 03, 2018
Диданд: 410

Паёми Пешвои миллат, Сарвари давлат муҳтарам Эмомалӣ Раҳмон дар ҳама гӯшаву канори мамлакат бо хушнудӣ қабул гардида, баҳри иҷроиши он ҷаҳду талош доранд.
Дар Паём омадааст: «Ман ба қудрати созандаи халқи азизам итминони комил дорам ва дилпурона изҳор менамоям, ки мо бо заҳмату фаъолияти аҳлонаи худ дар ояндаи наздик мушкилотеро, ки дар ҳаёти ҷомеа ва давлатамон вуҷуд дорад, бартараф мекунем ва барои мардумамон шароити боз ҳам беҳтару сазовор месозем».
Баҳри некӯаҳволии мардум, дастрасии маҳсулоти ниёзи мардум, таъминоти хоҷагӣ бо хӯрока бозорҳо хизмат мерасонанд. Дар соли сипаригашта бо фармони раиси шаҳр Рустами Эмомалӣ раисони бозорҳои калонтарини шаҳр - собиқ «Шоҳмансур» ва «Деҳқон» аз вазифаашон канор рафтанд. Чунки дар бозорҳои номбурда сифати хизматрасонӣ ба аҳолӣ на он қадар хуб буд. Нарху наво дар бозорҳо боло рафта буд, тозагии бозорҳо ба талабот ҷавобгӯй набуд, одоби муошират риоя карда намешуд. Раисии бозори «Деҳқон» ба зиммаи марди чашми кордон, хушмуомила ва хоксор, нисбати камбудиҳо серталаб Назаров Сунатулло Алиакбарович гузошта шуд.
Қобили зикр аст, ки тӯли чанд муддат бо дастгирии раиси шаҳр дар бозори «Деҳқон» тағйироти назаррас ба амал омад. Дар даромадгоҳи бозор ярмаркаи фурӯши маҳсулоти деҳқонӣ ташкил карда шудааст, ки нархи ҳар маҳсулот навишта шудааст ва ба он мудом назорат карда мешавад. Тартиботи кории бозор хеле хуб шуда, тозагиаш беҳ гардидааст. Нархи маҳсулоти ниёзи мардум нисбати дигар бозорҳо арзон аст. Одоби муошират беҳ гардида, деҳқонон озодона дар гӯшаи деҳқон фаъолият мекунанд, аксари маҳсулот нархномаи худро доранд ва аз рӯи сифаташон фурӯхта мешаванд.
Чанде пеш оид ба пешравиҳои кор дар бозори «Деҳқон» бо ҷонишини раиси бозор Мастон Шарипов ҳамсуҳбат гардидам. Номбурда қайд намуд, ки «мо масъулони бозор ҳамеша кӯшиш ба харҷ медиҳем, то маҳсулоти бозор босифат бошанд ва бо нархи арзон фурӯхта шаванд. Барои деҳқонон шароит муҳайё сохта, кӯшиш мекунем, ки худи деҳқон маҳсулоташро фурӯшад. Ҳамрӯза нархи маҳсулотро назорат намуда, кӯшиш мекунем, ки маҳсулоти ниёзи мардум ҳарчи арзонтар дастрас гардад ва ба аҳолӣ фурӯхта шавад. Масалан нархи як килограмм гӯшт дар бозори мо вобаста ба сифаташ аз 26 сомонӣ то 36 сомонӣ фурӯхта мешавад ва дар ҳама нуқтаҳои гӯштфурӯшӣ нархнома навишта шудааст. Картошка аз 3 то 3,5 сомонӣ, сабзӣ аз 0,8 то 1,5 сомонӣ фурӯхта мешавад. Ҳамаи маҳсулоти бозор нархномаи худро доранд ва аз болои он масъулон назорат мебаранд. Баҳри боз ҳам беҳ шудани кор, фаровонии маҳсулоти кишоварзӣ ва арзонии нарх дар бозор аз тамоми воситаю имкониятҳо истифода бурда, умед дорем, ки талаботи муштариёнро қонеъ гардонем».
Боварӣ дорем, ки кормандони бозори «Деҳқон» нарху наворо нисбати бозорҳои дигари шаҳр ба танзим оварда, ба сифати маҳсулот диққат медиҳанд, одоби муоширатро сайқал медиҳанд, тартиботи муайянро ҷорӣ мекунанд, ба тозагии гирду атроф диққат дода, ба фурӯши маҳсулоти бесифат хотима мегузоранд.
Баҳри иҷроиши дастуру супоришҳои раиси шаҳр, нишондодҳои Паёми Пешвои миллат ба кормандони бозор бурдборӣ ва комёбиҳо орзу дорем.

Ҷамолиддини ҶАЛОЛИЁН

Хонданд 410

Хабари рӯз

Календар

« Август 2018 »
Пн Вт Ср Чт Пт Сб Вс
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    

Минбари сардабир

  • занакГАП

    Ҳама аз дард менолад, вале ҳар кас ба таври худ,…

Нигоҳи хос

  • ХОСта

    Ба дилхоҳ савол ҷавоб додан мумкин аст, агар дуруст саволгузорӣ…
  • Хоҳиш ва ҳадаф

    «Агар Шумо хоҳед, ки ҳаёти хушбахтона дошта бошед, бояд алоқаманд…

Парадокс

Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ...
Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ба ...
Гуфтед? Мегӯянд! (№3
Бег САБУР, раиси Хадамоти алоқа:- Ман қарорамро бекор накардаам.Танз: Офарин ба Шумо, оғои Бег ...
Гуфтед? Мегӯянд! (№2
Аскар ҲАКИМ, Шоири халқии Тоҷикистон:- Дар замони шӯравӣ мо асареро пайдо намекунем, ки дар ...
Гуфтед? Мегӯянд! (№1
Абдуалим ИСМОИЛЗОДА, раиси шаҳри Қӯрғонтеппа Хонандаи беҳтарин- Кӯшиш мекунам ҳар рӯз лоақал ...

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.