.

Alternative flash content

Requirements

Get Adobe Flash player

Иқтисод

Ҳамгироӣ ба рафъи бетаъхири мушкилот мусоидат мекунад

Ба тасвиб расидани фармоиши вазоратҳои корҳои дохилӣ ва нақлиёт «Дар бораи ташкил ва танзими ҳаракати воситаҳои нақлиёти автомобилӣ дар роҳи автомобилгарди Душанбе - Чаноқ» аз муҳимияти масъалаи мавриди назар ва хоса будани таваҷҷуҳ ба он шаҳодат медиҳад

Тавре қаблан иттилоъ дода будем, шуруъ аз 8-уми октябри соли равон дар масири роҳи автомобилгарди Душанбе - Чаноқ боридани барф оғоз гардида, кормандони филиали Ширкат тамоми кӯшишҳоро ба харҷ дода истодаанд, то ҳаракати муназзаму бехатари воситаҳои нақлиёт таъмин бошад. Бо дарки масъулият мегӯем, ки дар ҷода комёбем, зеро омодагии филиали Ширкат ба мавсими тирамоҳу зимистони солҳои 2018 - 2019 ҷиддӣ ва ҳамаҷониба аст.

Дар намояндагиҳои филиали Ширкат зиёда аз 10 ҳазор метри кубӣ маводи зиддилағжиш, 260 ҳазор литр маводи сӯзишворӣ, 85 тонна ангишт ва дигар маводи зарурӣ захира шуда, ин омил замина фароҳам меорад, ки фаъолият дар сатҳи хубу сифати баланд роҳандозӣ шавад.

Мо тамоми кӯшишҳоро ба харҷ хохем дод, то рафтуомади бемонеа ва муназзами шаҳрвандон тариқи роҳи автомобилгарди мавриди назар таъмин бошад, вале дар сурати ҷиддӣ ва беист будани хавфи тармафароӣ мо ба ҳеҷ ваҷҳ ҳавасманд нестем, ки ҳамватанони мо ба сафар бароянд, зеро ҳифзи ҳаёти онҳо бароямон аз дигар омилҳо болотар ва авлотар аст.

Айни замон, сарфи назар аз бардавом ва бошиддат будани бориши барфу борон дар роҳи Душанбе - Чаноқ ҳаракати воситаҳои нақлиёт таъмин буда, кормандони мо муназзам будани ин раванд ҷаҳду талош доранд.

Чанде пеш дар асоси талаботи қонунҳои Ҷумҳурии Тоҷикистон «Дар бораи ҳаракат дар роҳ», «Дар бораи роҳҳои автомобилгард ва фаъолияти роҳдорӣ», Қарори Ҳукумати Ҷумҳурии Тоҷикистон №147 аз 27-уми марти соли 2018 «Дар бораи саривақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2018 - 2019» ва талаботи банди 33-и моддаи 3-юми Шартномаи Консессионӣ байни Ҳукумати Ҷумҳурии Тоҷикистон ва Филиали Ширкати саҳомии «Инновейтив Роуд Солюзшнз ЛТД» дар Ҷумҳурии Тоҷикистон бо мақсади андешидани тадбирҳои иловагӣ ҷиҳати таъмини бехатарии ҳаракати воситаҳои нақлиёт ҳангоми номусоидии обу ҳаво фармоиши Вазорати корҳои дохилӣ ва Вазорати нақлиёти мамлакат «Дар бораи ташкил ва танзими ҳаракати воситаҳои нақлиёти автомобилӣ дар роҳи автомобилгарди Душанбе - Чаноқ» ба тасвиб расид. Тибқи талаботи он, ҳангоми номусоидии обу ҳаво, боришоти барфи зиёд, яхбандӣ ва пай дар пай фаромадани тарма, ки барои ҳаракати воситаҳои нақлиёт мушкилот ба миён меорад, дар масири роҳи автомобилгарди «Душанбе - Чаноқ» аз ҳисоби масъулини вазоратҳои корҳои дохилӣ, нақлиёти Ҷумҳурии Тоҷикистон, Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ва Филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон ситод ташкил шуда, аз деҳаи «Ҳушёрӣ»-и ноҳияи Варзоб (км 44) то деҳаи «Такфон»-и ноҳияи Айнӣ (км 95) ва аз км 136 ноҳияи Айнӣ то км 181 ноҳияи Шаҳристон танҳо ҳаракати воситаҳои нақлиёте, ки ду ва зиёда тирҳои пешбаранда доранд ё чархҳои пешбарандаашон бо таҷҳизоти зиддилағжиш ҷиҳозонида шудааст, инчунин автомашинаҳои боркаше, ки вазни умумиашон зиёда аз 3,5 тонна буда, ядакҳои иловагӣ, нимядак надоранд ва бо лавозимоти эҳтиётӣ (симтобаи кашолкунӣ, болиштаки зиддиғелиш ва ғайра) муҷаҳҳаз мебошанд, иҷозат дода мешавад.

Илова бар ин, фармоиши мавриди назар масъулинро вазифадор намудааст, ки дар мувофиқа бо Агентии обуҳавошиносӣ ҳаракати воситаҳои нақлиётро дар минтақаҳои мушкилгузари роҳ - аз мавзеи «Ҳушёрӣ»-и ноҳияи Варзоб то деҳаи «Такфон»-и ноҳияи Айнӣ ва аз мавзеи «Ҳушёрӣ»-и ноҳияи Айнӣ то мавзеи «Охтанги»-и ноҳияи Шаҳристон зери назорати доимӣ қарор дода, ҳангоми вазнин гардидани шароити ташкили ҳаракат дар роҳ, дар асоси қарори якҷояи масъулини вазоратҳои корҳои дохилӣ ва нақлиёти Ҷумҳурии Тоҷикистон дар мувофиқа бо Филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон реҷаи махсуси ҳаракати воситаҳои нақлиёт - рӯзҳои тоқи моҳ аз вилояти Суғд ба самти шаҳри Душанбе ва рӯзҳои ҷуфти моҳ аз шаҳри Душанбе ба самти вилояти Суғдро ба роҳ монанд.

Қобили зикр аст, ки дар ҳолатҳои зарурӣ ба реҷаи болозикр вобаста аз шароити роҳ, дар мувофиқа бо масъулини вазоратои корҳои дохилӣ, нақлиёти Ҷумурии Тоҷикистон ва филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон тағйиру иловаҳо ворид карда мешавад.

Сардорони РБДА ВКД Ҷумҳурии Тоҷикистон, РВКД дар вилояти Суғд ва ШВКД дар ноҳияи Варзоб тибқи ин фармоиш муваззафанд, ки дар мувофиқа бо Филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон дидбонгоҳҳои муваққатиро дар километри 100-уми роҳи автомобилгарди номбурда аз ҳисоби кормандони ШБДА РВК дар шаҳри Душанбе, дар километри 44 ва 62-юм аз ҳисоби кормандони РБДА ВКД Ҷумҳурии Тоҷикистон ва ШВКД дар ноҳияи Варзоб, аз километри 62 то км 72-юм патрулӣ автомобилӣ аз ҳисоби кормандони РБДА ВКД Ҷумҳурии Тоҷикистон, дар километри 82-юм (мавзеи «Зимарғ»-и ноҳияи Айнӣ) ва дар километри 100 (деҳаи «Такфон»-и ноҳияи Айнӣ) аз ҳисоби ҳайати шахсии ШБДА РВКД дар вилояти Суғд ва ШВКД дар дар ноҳияи Айнӣ, дар километри 136 аз ҳисоби кормандони ШВКД дар ноҳияи Айнӣ, дар километри 181 (Нуқтаи вазнченкунии филиали Ширкат) аз ҳисоби ҳайати шахсии ШБДА РВКД дар вилояти Суғд ва ШВКД дар ноҳияи Шаҳристон ташкил намуда, қувва ва воситаҳои заруриро аз ҳисоби кормандони БДА ва дигар хадамоти милитсия сафарбар намоянд.

Ба маълумоти ронандагони гиромӣ мерасонем, ки дар ин дидбонгоҳҳо ҳолати техникии воситаҳои нақлиёт, риояи талабот ва меъёрҳои муқарраршудаи бехатарии ҳаракат дар роҳ, аз он ҷумла ба лавозимоти ҳимоявӣ (симтобаи кашолакунӣ, занҷир, болиштаки зиддиғелиш ва ғайра) муҷаҳҳаз будани онҳо назорати ҷиддӣ мешавад.

Боварӣ дорем, ки ронандагону мусофирони гиромӣ ба иқдоми мазкур, ки идомаи мантиқии ибтикори амалишуда дар самти таъмини ҳаракати муназзаму бехатари воситаҳои нақлиёт дар роҳи зикршуда маҳсуб мешавад, бо ҳисси ҳамдигарфаҳмӣ муносибат хоҳанд кард.

 

Маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон

Хонданд 89

Дилсардӣ

Янв 05, 2019
Хонданд: 192
Дилсардӣ

Аз якуми январи соли 2019 дар саросари Россия ва барои намояндагони дигар кишварҳое, ки шаҳрвандии ин давлатро доранд, ислоҳоти куллӣ ба амал омад. Ин ба яку якбора панҷ сол боло бардоштани синну соли нафақа марбут мебошад. Лоиҳаи ислоҳот якум маротиба 16-уми июни соли 2018 ироа ва қабул гардид, ки ин бесабаб набуд. Дар ҳамин шабу рӯз қаҳрамонии ҷаҳон дар Россия оғоз гардида буд. Дар шаҳрҳои калони Россия, ки ин мусобиқа барои ҷоми қаҳрамонӣ оғоз гардида буд, кормандони сохторҳои қудратӣ ҳамаи рӯйдодҳои ҳаррӯза ва соатинаро зери назар доштанд. Гузаронидани митингу ҳамоишҳои оммавӣ ва дигар чорабиниҳо аз тарафи муқобилони ислоҳоти ҳукуматӣ дар бораи баланд бардоштани синну соли нафақа маъние надошт.

Бо супориши сарвазири Ҳукумати Россия Дмитрий Медведев лоиҳа дар якум хониш қабул гардид. Ногуфта намонад, ки президенти Россия Владимир Путин ҳанӯз соли 2005 ба тамоми шаҳрвандони Россия ваъда дода буд, ки то он вақте, ки ӯ президенти Россия аст, синну соли нафақа баланд бардошта намешавад. Ана қавлу ана вафо!!!

Тибқи нақша аз 1-уми январи соли 2019 синну соли ба нафақа баромадан барои мардон 65 сол ва занҳо 63 сол муқаррар гардида буд. Шуруъ аз қабули ислоҳот дар лоиҳаи қонун дилсардии шаҳрвандони Россия нисбат ба Путин ва ҳукумати ӯ оғоз гардид. Путин медонист, ки занҳо дар Россия дар оила ва дар ҷилави оиладорӣ нақши асосӣ мебозанд. Аз ин рӯ, барои нарм намудани дили бонуҳои рус, дар он пешниҳодҳое, ки 300 иловаҳо ба ислоҳотро доштанд, «таклиф» ба миён гузошт, ки синну соли нафақаи занҳо 3 сол кам, яъне то ба 60-солагӣ ва серфарзандон то 56-солагӣ муайян гардад. Инро як навъ «гузашт»-и путинӣ низ номидан мумкин аст.

Дар ироаи дуюми лоиҳа, ки 26-уми сентябр мавриди баррасӣ қарор гирифта буд, қонун аз тарафи ҳизби «Россияи воҳид» («Единая Россия») қабул гардид. Ба ҳама маълум аст, ки дар Думаи давлатии Россия сафи якаросҳо хело зиёд аст. 27-уми сентябр оҷилона ироаи сеюми лоиҳа баргузор гардидаву қабул шуд. 3-юми октябр лоиҳаи қонун аз тарафи Шӯрои Федератсия дастгирӣ ёфта, ҳамон рӯз президент Путин ба ин қонун барои амалӣ гардиданаш имзо гузошт. Мавриди таваҷҷуҳ аст, ки то интихоботи президентӣ, ки 18-уми марти соли 2018 баргузор гардида буд, дар бораи ба синну соли ба нафақа баромадан тамоман кам ҳарф зада мешуд.

Ҳамин тариқ, ногаҳонӣ ва бидуни тариқи райъпурсиву ҷамъ овардани афкори умум ислоҳот даровардан дар ин қонун боварии шаҳрвандони Россияро нисбати Ҳукумат, парламент ва бахусус президент ба костагӣ оварда расонид. Аллакай дар ду ҳафтаи баъди эълони ислоҳот Путин 14 фисади рейтингашро тибқи райъпурсии гуруҳҳои муайян аз даст дод (62% - 14 = 48 %). Кӯшишҳои ҳукуматӣ барои бартарӣ доштани ин ислоҳот фоида набахшид. Ба ғайр аз дилсардии шаҳрвандони одӣ, мутахассисони соҳавӣ арз доштанд, ки он далелҳое, ки ҳукумат тариқи ҳисоботҳои оморӣ мехоҳад худсафедкунӣ кунад, бемавриду беасос мебошанд. Дар ҳамин ҷода мутахассисони рус исбот намуданд, ки қисми зиёди аҳолии Россия (бахусус мардон) то синни нафақа (65-солагӣ) намезиянд (омор ҳисоби миёнаи умри русҳоро 72,5 сол муайян кардааст).

Пиршавии аҳолӣ на танҳо масоили дардовари Россия аст, балки дар аксарияти давлатҳои пешрафтаи ҷаҳон ба ин ҳолат оварда расонидааст. Баъзан дар ин ҳолатҳо давлат маҷбур мешавад, ки синну соли нафақаро боло бардорад.

Аммо далелҳои дар боло овардаи муаллифони қонун номуайян аст. Давлате, ки дар ҷаҳон аз ҳама зиёд замину боигарӣ, нефту газ, канданиҳои фоиданок, тиллову нуқра, уран, ҷангал ва даҳҳо дигар боигариҳо дорад, оё метавонад шиква аз камбизоатӣ, ё худ нарасидани маблағ барои нафақапулии қисми қариб мадфуншавандаи аҳолиаш намояд? Ба як саволе хонандаи гиромӣ мебоист ҷавоб ёбад, ки чи тавр боло бурдани синну соли нафақа ҳолати демографӣ, таваллудро зиёд мекарда бошад, вафотро камтар мекарда бошад, ба муқобили шаробнӯшии марговар мебаромада бошад?

Ба гуфтаи таҳлилгарон, боло бардоштани синну соли нафақа марбут ба буҳрони иқтисодӣ мебошад. Як гуруҳи дигари таҳлилгарон бошанд, ба хатоҳо роҳ додани сиёсати берунаи Россияро нисбати масъалаи Қрим асос медонанд. Ҳамчунин, хароҷоти зиёда дар гузаронидани қаҳрамонии ҷаҳон оид ба футбол ва олимпиадаи Сочиро сабаби буҳрони иқтисодӣ мехонанд.

Раиси Думаи давлатии Россия Вячеслав Володин ба саволҳои намояндагони васоити ахбори омма бе ягон мулоҳиза чунин ҷавоб дод, ки агар аҳвол ҳамин бошад, аҷаб нест дар Россия умуман нафақа барҳам дода шавад. Магар чунин ақида аз тарафи як мансабдори сатҳи олӣ дуруст аст?

Аммо раиси Ҳизби коммунистӣ Г. А. Зюганов дигар ақида баён намуда буд. Ба гуфтаи ӯ, сабаб ва далелҳои пешниҳодгардида аз тарафи ислоҳотгарон бардурӯғ нишон дода шудааст. Тибқи гуфтаи сарвари коммунистон, андози зиёда, дуздии олигархҳо, кам накардани шумораи мансабдорон, ба хориҷа интиқол додани боигарӣ ва қоғазҳои қиматнок сабабгори буҳрони иқтисодӣ гардидааст.

Фраксияи «Россияи боадолат» («Справедливая Россия») 19-уми июн ба Думаи давлатӣ лоиҳаи алтернативиро пешниҳод намуд, ки дар он баланд бардоштани синну соли нафақа то соли 2030 бояд мавқуф гузошта шавад.

Дар мамлакати бойтарини дунё аз ҷиҳати боигарӣ, сармоя, нефту газ ва замин чунин як баҳонаҳое эҷод намудан ногуфтанист. Дар ҳошияи ҳамин ақида гуфтанием, ки мансабдороне чун Г. Греф, О. Василев ва вазири молия А. Силуанов ислоҳотро дастгирӣ намуданд.

Ҳизбҳои оппозитсионии ЛДПР (В. Жириновский), СР (С. Миронов), КПРФ (Г. Зюганов) муқобили қабули ин қонун баромаданд. О. Дмитриева ва О. Шеин оид ба нодуруст будани ислоҳот дар қонун рӯирост баромад карданд.

Мавриди тазаккур аст, ки ба 85 субъекти Россия оид ба ин лоиҳа ҳуҷҷатҳо барои назарпурсӣ равона гардида буд, барои он ки то 17-уми июл ба Думаи давлатӣ пешниҳодҳояшонро ирсол намоянд. Чунин ҷавобҳо танҳо аз 77 минтақа ворид гардиданд. Губернатори вилояти Иркутск Сергей Левченко зидди ислоҳоти ҳукуматӣ баромад карда, гуфт, ки нафақаро аз рӯи зиёд намудани истеҳсолоти меҳнат таҳти назар гирифтан зарур аст.

Қисми зиёди шаҳрвандони Россия аз ҳама минтақаҳо, иттифоқҳои касабаи хурд (духтурон, омӯзгорон, кормандони Академияи илмҳо ва дигарон) зидди баланд бардоштани синну соли нафақа баромаданд. Губернаторони вилоятҳо ислоҳотро дастгирӣ карда, аз тарси вазифа ақидаҳояшонро ошкор накарданд.

Мувофиқи баъзе маълумотҳо, Думаи Ярославл ба Думаи давлатӣ ҷавоб навишт, ки лоиҳа қобили қабул нест, ислоҳот дар ҷомеа шӯр мехезонад, боварии шаҳрвандонро аз ҳукумат мегардонад. Пас аз чунин ибрози назар сардори шуъбаи вилоятии «Россияи воҳид» Михаил Боритский аз вазифа барканор карда шуд.

Моҳи октябр пас аз қабули ислоҳот дар қонун, намояндагони Ҳизби коммунистӣ арз доштанд, ки ба Суди Конститутсионӣ муроҷиат менамоянд.

Кормандони россиягии иттифоқҳои касабаи фарҳанг ба президент муроҷиат карда, талаб намуданд, ки аз ҷиҳати илмию тиббӣ синну соли ба нафақа баромадан бо далелҳои оморӣ дар бораи касалиҳое, ки дар мавриди кор ба ҳисоб гирифта мешаванд, асоснок гардонида шавад.

Аввалин маротиба дар муддати дурудароз дар 4 вилоят интихоби губернаторонро дуюмбора гузаронидан зарур омад. Дар марҳилаи дуюм номзадҳо ба курсии губернаторӣ, ки намояндагони ҳизби «Россияи воҳид» буданд, дар Хабаровск ва вилояти Владимир аз тарафи Ҳизби либералӣ (ЛДПР) мағлуб гардиданд. Ҳизби ҳукуматӣ дар интихоботҳои минтақавӣ овозҳои афзалиятнокро аз даст дод. Ин ҳолат дар минтақаҳои Хакасия, Иркутск ва Уляновск мушоҳида гардид.

Дар ҳамоиши кӯчагӣ, ки дар шаҳри Москва 28-уми август гузашта буд, 20 ҳазор эътирозгарон иштирок намуданд. Аз лаҳзаи ироаи якуми ислоҳот дар қонун (16-уми июн) то қабули он дар саросари Россия митингу ҳамоишҳо бар зидди қабули ин ислоҳот гузаронида шуданд. 28-уми июл ҳамоишҳои эътирозии серодам оид ба қабули тағйирот дар қонуни нафақа дар Санкт - Петербург, Москва, Нижний Новгород, Қазон, Уфа, Перм, Сиктивкар, Кострома ва Челябинск гузаштанд. Дар семоҳаи дуюм ва сеюми соли 2018-ум 1174 аксияҳои эътирозӣ муқобили ислоҳот ба назар гирифта шудааст. Дар ҳамоиши дар Москва таърихи 28-уми июл гузаронидашуда ба шӯр омадагон истеъфои ҳукумат ва президентро талаб намуданд.

Хонандаи гиромии рӯзнома шояд донад, ки дар аксарияти шаҳрҳои Россия, аз Москва то Якутск муҳоҷирони тоҷике, ки дуюм шаҳрвандӣ - шаҳрвандии Россияро қабул кардаанд ва имконияти ба нафақа баромаданро доранд, меҳнату кор мекунанд. Тоҷикон, ки корҳои вазнину назарногирро бар дӯш доранд, ба умеди он буданд, ки барвақттар, дар синни 60-солагӣ (мардон), 50 - 55-солагӣ (занон) ба нафақа баромада, дами пириро дар ватани худ мегузаронанд. Аммо синну соли нафақа дар Россия якбора 5 сол боло бардошта шуд. Ногуфта намонад, ки тибқи баъзе маълумотҳо, зиёда аз 400 ҳазор тоҷикистонӣ шаҳрвандии Россияро қабул кардаанд ва қисме аз онҳо дар арафаи ба нафақа баромадан қарор доштанд.

Дар вохӯрии пешазсолинавиаш бо рӯзноманигорон ва дигар намояндагони ВАО президенти Россия В. В. Путин оид ба ҳамин масъала ҷавоб гардонида истода, гӯё ҳеҷ гапе нашуда бошад, гуфт, ки «худам низ муқобили қабули ислоҳот дар қонун мебошам». Аммо нагуфт, ки яке аз сабабҳои асосӣ - ин дар дасти олигархҳо қарор доштани тамоми боигарии Россия аст. Ин боигарӣ ба хориҷа интиқол мегардад. Андозситонӣ ба таври зарурӣ ба роҳ монда нашудааст. Ҳоло ҳам тариқи конверт маош додан мушоҳида мешавад.

Ба ҳамаи ин нигоҳ накарда, бояд иқрор гардид, ки Путин сиёсатмадори барҷаста ва зирак аст. Аз ҳама об доим хушк мебарояд. Дилсардии шаҳрвандонашро каме нагузашта бо дигар амалҳояш нарм месозад. Худи русҳо хуб мефаҳманд, ки айни замон Путин ивазнашаванда аст. Дар Россия, ба ақидаи аксарияти сиёсатшиносон, одаме, ки айни замон ҷои ӯро иваз мекарда бошад, ба назар намерасад.

 

Убайдулло РАҲИМОВ, «ФАРАЖ»

Хонданд 192
«Роғун» умри «Норак»-ро дароз мекунад

Чанде қабл дар таърихи навини давлати соҳибистиқлоли тоҷикон боз як санаи фаромӯшнопазир ва рӯйдоди шодмонкунандаи сокинони хурду бузурги кишвар ба вуқуъ пайваст. Яъне, дар таърихи 16-уми ноябри соли 2018 бо иштироки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон агрегати якуми НБО-и «Роғун» ба кор дароварда шуд.

Дар тантанаҳое, ки ба ин муносибат дар шаҳри Роғун, пойтахти кишварамон - шаҳри Душанбе ва дигар минтақаҳои мамлакат барпо гардид, роҳбарияти Ҳукумати Ҷумҳурии Тоҷикистон, намояндагони корпусҳои дипломатӣ, гуруҳи калони меҳмонони олиқадр аз давлатҳои бо мо дӯсту ҳамсоя, роҳбарони вазорату идораҳои ҷумҳуриявӣ, вакилони парлумон, олимону адибони шинохтаю аҳли ҷамоатчигии ҷумҳурӣ ҳузур доштанд ва бори дигар ба ҷаҳониён мардуми ободкору созанда будани миллати тоҷик муаррифӣ карда шуд.

Хеле рамзист, ки ба истифода додани чархаи аввалини ин кохи нур бо ҷашни «Рӯзи Президент» ва санаи оғози кори Иҷлосияи таърихию наҷотбахши XVI-уми Шӯрои Олии Ҷумҳурии Тоҷикистон рост омад, зеро ҳамагон хуб медонанд, ки аслан Сарвари давлатамон Эмомалӣ Раҳмон ташаббускори асосии барқарорсозии корҳои сохтмонии ин иншооти бесобиқаи минтақавӣ ва нозири серталаби сатҳу сифати баланду ба талаботҳои байналмилалӣ ҷавобгӯи корҳо дар нерӯгоҳи мазкур буданду ҳастанд. Маҳз бо иродаи қавӣ ва дурбинии сиёсии Президенти кишвар, соли 2009 идомадиҳии корҳои сохтмонӣ дар ин иншооти бузург идеяи миллӣ дониста шуда, новобаста аз мавҷудияти тамоми мушкилоти объективию субъективӣ, баҳри бунёди комплекси энергетикии мазкур ҳамчун асоси ба истиқлолияти энергетикӣ расидани мамлакат, таваҷҷуҳи хосаи мардум ҷалб карда шуд. Бо иқдоми Сарвари давлат баҳри ҷалби сармояҳои дохилию хориҷӣ тадбирҳои муҳим андешида шуд, ки яке аз онҳо ба фурӯш баровардани саҳмияҳои ҶСК «НБО-и Роғун» мебошад.

Ҳамчун яке аз шахсони дар амалигардонии ин тадбирҳо бевосита ширкатдошта, хуб дар ёд дорам, ки охирҳои соли 2009 тибқи қарори Ҳукумати Ҷумҳурии Тоҷикистон бобати ба фурӯш баровардани саҳмияҳои ҶСК «НБО-и Роғун» дар ҳама шаҳру ноҳияҳо омодагиҳо идома дошт ва бақайдгирии давлатии сертификати саҳмияҳо ба зиммаи ходимони мақомоти молияи кишвар вогузор гардида буд. Он солҳо, ки банда ба ҳайси сардори Раёсати молияи шаҳри Чкалов (алҳол Бӯстон) фаъолият доштам, якҷоя бо роҳбарияти шаҳр, масъулини шуъбаи БДА «Амонатбонк» ва дигар сохторҳои дахлдор ба амалигардонии ин тадбирҳо хеле хуб омодагӣ дида, аз санаи 4-уми январи соли 2010 ба фурӯши саҳмияҳои ҶСК «НБО-и Роғун» ба аҳолию дигар субъектҳои хоҷагидорӣ оғоз намуда будем. Ба ҳама шаҳру ноҳияҳо намояндагони Ҳукумати Ҷумҳурии Тоҷикистон вобаста гардида буданд ва фаъолияти ситоди вилоятиро собиқ муовини аввали Сарвазири Ҷумҳурии Тоҷикистон Асадулло Ғуломов роҳбарӣ мекарданд. Ҷоизи зикр аст, ки марҳум Ғуломов А. (руҳашон шод бод!) бисёр шахси ватанпараст, инсони донишманду дилёб буданд ва дар ҳамаи ҷаласаю мулоқотҳо танҳо таъкид мекарданд, ки ин иқдоми Сарвари давлат баҳри ҳарчи тезтар ҳал намудани муаммоҳои зиндагии мардум аст, бинобар он, мо бояд ташаббуси Президенти кишвар Эмомалӣ Раҳмонро ҳамакаса дастгирӣ намоем. Чунин тарзи муроҷиат ва корбарии ин фарди мардумсолор имконият фароҳам овард, ки сокинони вилояти Суғд дар харидории саҳмияҳо фаъол бошанд ва мо шоҳиди он будем, ки дар саросари Ҷумҳурии Тоҷикистон ин иқдоми Пешвои миллат Эмомалӣ Раҳмон ҳамовозию дастгирӣ ёфта, ба маблағҳои калон саҳмияҳои НБО-и «Роғун» харидорӣ карда шуданд.

Дар хотир дорам, ки як рӯз қабл аз оғози санаи фурӯши саҳмияҳо, Асадулло Ғуломов ҳамроҳи собиқ раиси вилояти Суғд (алҳол Сарвазири Ҷумҳурии Тоҷикистон) Қоҳир Расулзода ба шаҳри Чкалов ташриф оварда буданд ва мо якҷоя бо раиси ҳамонвақтаи шаҳр Шавкат Бобозода корҳои омодагии дар ин самтҳо анҷомдодашударо ба онҳо нишон медодем. Ҳангоми суҳбат марҳум Асадулло Ғуломов шӯхиомез аз ман пурсон шуданд, ки «худатон ба чанд сомонӣ саҳмияҳоро харидорӣ мекунед?». Дар ҷавоб ба он кас гуфтам, ки «ману ҳамсарам нияти ба Ҳаҷ рафтанро доштем, вале бо он маблағҳо саҳмияҳои «Роғун»-ро харидорӣ хоҳам кард». Аз шунидани чунин посух Асадулло Ғуломов хеле қаноатманд гардида, сипоси хешро баён карданд.

Бо гузашти солҳо, як чизро низ дарк намудам, ки ҳар амали неки баҳри ҷомеа мекардаи инсонҳо бо подошҳои зиёде бармегардад. Соли 2014 ба ману ҳамсарам муяссар шуд, ки ба зиёрати хонаи Худо низ рафта, ба номи ҳоҷигӣ шарафманд гардем.

Ёдоварӣ аз он солҳоро дар ин рӯзҳои барои мардуми мо хеле пурмуҳтаво ва фараҳбахш барои он зарур мешуморам, ки ҳар як иқдоми Сарвари кишвари мо хеле дурандешона ва судманд буда, бешубҳа боиси натанҳо дастгирии сокинони мамлакат, балки созмонҳои байналмилалию дигар давлатҳои дуру наздик мегардад.

Ҳамагон хуб медонем, ки бо ибтикори Сарвари давлати мо лоиҳаи бунёди НБО-и «Роғун» аз чандин ташхисҳои байналмилалӣ гузаронида шуда, дар тӯли ин солҳо Пешвои миллат сифати корҳои анҷомдодашавандаи ин иншооти бузурги асрро шахсан назорат мекунанд. Ҳатто, санаи 29-уми октябри соли 2016 ҳангоми бастани маҷрои дарёи Вахш барои идомаи сохтмони ин нерӯгоҳ, шахсан ба сари чанбараки техникаи калонҳаҷм (булдозер) нишаста, корҳои сохтмониро ба иҷро расониданд (ки на ҳар роҳбар чунин ҷасорату мардонагӣ дорад) ва ба тамоми ҷаҳониён (алалхусус, ба давлатҳои ҳамсоя) бо итминони қавӣ изҳор доштанд, ки Тоҷикистон ҳеҷ гоҳ сокинони давлатҳои ҳамсояи худро бе об нахоҳад монд.

Ҳангоми ташрифи худ ба ҷумҳурии ба мо дӯсту бародари Ӯзбекистон, Пешвои миллат масъалаҳои дар оянда якҷоя истифодабарии захираҳои обии кишвари моро (аз ҷумла, сохтани нерӯгоҳҳои хурди барқии обии Ӯзбекистон дар қаламрави Тоҷикистон ва истифодаи оби ошомидании кӯли Сарез) баррасӣ намуданд, ки ин далели дӯстпарварию муносибати некхоҳонаи Эмомалӣ Раҳмон бо ҳама давлатҳои сайёра мебошад.

Дар ин рӯзи таърихию ниҳоят хотирмони мардуми тоҷик, бо истифода аз маводҳои мавҷудаи таҳлилию лоиҳаи иншооти мазкур таваҷҷуҳи хонандаи гиромиқадрро ба аҳамияти бесобиқаи ин нерӯгоҳи бузурги аср ҷалб карданӣ ҳастам.

НБО-и «Роғун» ҳатто бо ҳамин марҳилаи нахустинаш кишвари азизи моро аз камбудии барқ наҷот дода, ниёзи дохилиро ба қувваи барқ пурра таъмин хоҳад кард. Пас, «Роғун» кафили истиқлолияти энергетикии мост.

Аз сабаби он, ки талаботи аҳолии сайёра сол то сол ба нерӯи барқ меафзояд ва конҳои нафту газ ҳаргиз манбаъҳои доимӣ ва боэътимоди энергия нестанд, пешбинӣ мешавад, ки дар оянда (ё худ, то замоне, ки мо “Роғун”-ро пурра месозему минтақаро бо барқ таъмин мекунем) арзиши содиротии нерӯи барқ ба таври пешбининашаванда боло хоҳад рафт. Пас, «Роғун» такягоҳи боэътимоди буҷети давлатию хазинаи пурғановати Тоҷикистон хоҳад буд.

Иқтидори комили истеҳсолии НБО-и «Роғун» мувофиқи ҳисобу китоби мутахассисон 3600 меговат, яъне баробар бо қудрати се нерӯгоҳи атомӣ аст. Бо ба итмом расонидани сохтмони нерӯгоҳи «Роғун» ва таъмини барқи доимӣ дар кишвар, якбора иқтидори корхонаҳои истеҳсолӣ афзоиш ёфта, сармоягузорони дохилию хориҷӣ дар Тоҷикистон, ба хотири нерӯи корию барқи доимии арзон, иқдоми қатъӣ ба бунёди корхонаҳои хурду бузург хоҳанд кард. Пас, дар оянда «Роғун» муҳаррики асосии рушди иқтисодиёт ва тавсеабахши ба давлати индустриявию аграрӣ табдил ёфтани кишвари мо хоҳад шуд.

Нерӯгоҳи барқии обии “Роғун” пас аз такмили сохташ, бо тавлиди солонаи 13 миллиард киловат/соат нерӯи барқ давлати моро дар минтақа ба бузургтарин содиркунандаи энерегияи арзон ва аз назари экологӣ тоза ва ба дунболи он, ба яке аз муайянкунандагони сиёсати энергетикии минтақа табдил хоҳад дод. Пас, ин иншооти бузурги аср истеҳкомбахши ҷойгоҳи минтақавии мо шуда метавонад.

Тибқи хулосаи мутахассисон, обанбори бузурги НБО-и “Роғун” бо соф кардани об ва наҷоти нерӯгоҳи “Норак” аз тагшинҳо, умри муфиди НБО-и “Норак”-ро 100 соли дигар дароз карда, бо таъсиргузорӣ ба иқлим, пиряхҳои моро, ки манбаи аслии оби минтақа ҳастанд, аз обшавӣ то ҳудуди зиёде бозмедорад. Пас, кохи нури мазкур калиди ҳалли бахше аз мушкилоти экологӣ низ хоҳад шуд.

Дар шафати нерӯгоҳ ба вуҷуд омадани баҳре дар майдони 70 километр саҳнаест барои гузаронидани мусобиқаҳои шиноварӣ, заврақронӣ ва амсоли он, инчунин имкониятест барои тавсеаи моҳипарварӣ, ташкили осоишгоҳҳою истироҳатгоҳҳои соҳилӣ дар ҳавои тоза, ки дар як тараф куҳҳои сарсабз истодаанду дар дигар тараф баҳре бо оби ширину мусаффо. Илова бар он, баландии садди (плотинаи) “Роғун” 335 метр буда, он дар навъи худ (дар миёни нерӯгоҳҳои обӣ) дар ҷаҳон аз ҳама баландтарин ба шумор меравад, ки ин ва дигар омилҳои зикргардида ба рушди сайёҳӣ дар ин минтақаи ҷумҳуриамон мусоидат менамояд.

Ногуфта намонад, ки тибқи дастуру супоришҳои Роҳбари давлат, имрӯзҳо дар тамоми манотиқи кишвар корҳои ободонию созандагӣ ба истиқболи ҷашни 30-солагии Истиқлолияти давлатии Ҷумҳурии Тоҷикистон бомаром идома дорад ва пешбинӣ гардидааст, ки то фарорасии ин ҷашн садҳо корхонаҳои замонавии истеҳсолӣ, биноҳои муассисаҳои маориф, тандурустӣ, варзишию солимгардонӣ ва дигар иншооти хурду бузург бунёд карда мешаванд. Ба истифода додани агрегати якуми НБО-и «Роғун» ва дар оянда пурра ба фаъолият омодасозии дигар чархаҳои ин нерӯгоҳ имконият фароҳам меорад, ки иншооти амалкунандаю иловатан бунёдшаванда мунтазам бо қувваи барқи аз ҷиҳати экологӣ тозаи истеҳсоли ватанӣ таъмин бошанд ва аз ҳисоби фурӯши барқи изофагӣ ба дигар давлатҳои минтақа қисми даромади буҷети кишварамон хеле ғанӣ хоҳад гардид.

Ҳамчун як шаҳрванди ин диёри зебоманзар орзуи онро дорам, ки давлати соҳибистиқлоли тоҷикон таҳти сарварии Пешвои Худоназаркардаи миллат, муҳтарам Эмомалӣ Раҳмон боз ҳам рушду нумуъ ёфта, ҳадафи олии стратегии Ҳукумати Ҷумҳурии Тоҷикистон - таъмини зиндагии шоистаи ҳар як сокини мамлакат ҳарчи тезтар амалӣ гардад.

Рушди босуботи иқтисодию оромии сиёсии кишвар заминаи асосии иҷроиши саривақтии барномаҳои иҷтимоӣ ва дигар ҳадафҳои стратегии давлату Ҳукумат буда, якояки моро низ зарур аст, ки дар ин самтҳо фаъолона саҳмгузор бошем.

 

Карамулло ОДИЛОВ,

собиқадори хизмати давлатӣ, Корманди шоистаи Тоҷикистон, Аълочии молияи Иттиҳоди Шӯравӣ ва Ҷумҳурии Тоҷикистон, узви ИЖТ

Хонданд 173

Як кишвару ду қонун

Дек 15, 2018
Хонданд: 355
Як кишвару ду қонун

Гардиши нав дар баҳси судии марбут ба “Тоҷпромбонк”

Адвокат вазоратҳои молияву адлия, Маҷлиси намояндагони Маҷлиси Олӣ ва Прокуратураи генералии Тоҷикистонро барои беэътиноӣ ба қарори Суди конститутсионӣ муттаҳам кард. Ин изҳорот ҳангоми мурофиаи судии амонатгузорони “Тоҷпромбонк” алайҳи вазоратҳои молияву адлия дар Суди ноҳияи Шоҳмансур садо дод. Вазоратҳо барои ғайриқонунӣ беш аз як сол манъ кардани фурӯши амволи “Тоҷпромбонк” муттаҳам мешаванд, ки ба қавли даъвогар, ин далелро ҳатто Прокуратураи генералӣ низ муайян ва эътироф намудааст. Беш аз 400 амонатгузори “Тоҷпромбонк” соли дуюм аст, ки наметавонанд миллионҳо сомонии худро аз ин бонки муфлисшуда ситонанд ва онҳо бар инанд, ки дар ин амр вазоратҳои фавқуззикр низ дахил ҳастанд.

Солеҳҷон Ҷӯраев, узви Иттиҳодияи байнулмилалии адвокатҳо, даъвогари аслӣ мегӯяд, яке аз сабабҳои асосии ба бадбахтиву мусибати молиявию иҷтимоӣ ва руҳонӣ дучор шудани мардум мухолифати муқаррароти банди дуюми қисми 1, моддаи 65-и Кодекси гражданӣ бо сархати сеюми қисми 1, моддаи 35-и Қонуни Ҷумҳурии Тоҷикистон “Дар бораи барҳамдиҳии ташкилоти қарзӣ” мебошад.

Кодекси гражданӣ мегӯяд, ки ташкилоти қарзии муфлисшуда дар навбати аввал бояд маблағи амонатгузорони қаториро пардохт кунад, аммо Қонун “Дар бораи барҳамдиҳии ташкилоти қарзӣ” онҳоро дар мақоми чоруми ҷабрдидаҳо қарор додааст.

Вазорати молия, ки дар “Тоҷпромбонк” 100 миллион сомонӣ сармоя гузоштааст, моҳи апрели соли 2017 ба теъдоди 117 иншооти бонкро, ки 572 миллион сомонӣ арзиш доранд, бо мусоидати Вазорати адлия ба ҳабс гузошт ва фурӯши онро қатъ кард. Аммо то ба ҳол ин суол посухи равшан наёфтааст, ки чаро Вазорати молия барои 100 миллион сомонӣ амволи бо арзиши 572 миллионро ба ҳабс гирифтааст?

Адвокат бар ин аст, ки сабаби ба ҳамчунин иқдом даст задани Вазорати молия қабл аз ҳама муқаррароти Қонун “Дар бораи барҳамдиҳии ташкилоти қарзӣ” аст, ки тибқи он, муассисаҳои буҷавӣ ҳақ доранд қабл аз шаҳрвандони қатории амонатгузор ҳаққи худро аз бонк ба даст оранд, ҳол он ки, Кодекси гражданӣ баръакс амонатгузорони оддиро дар навбати аввал мегузорад. 

Солеҳҷон Ҷӯраев, ки худ амонатгузори “Тоҷпромбонк” низ мебошад, мегӯяд, ҳарчанд Суди конститутсионӣ ҳанӯз 22-юми майи соли 2018 таъиноти қатъӣ содир карда буд, ки ин мухолифатро қонунбарор - Маҷлиси намояндагони Маҷлиси Олӣ бартараф кунад, на фақат Маҷлиси намояндагон, балки вазоратҳои молияву адлия ва Прокуратураи генералии Тоҷикистон низ онро нодида гирифтанд, ҳол он ки, қарори Суди конститутсионӣ бояд бечунучаро иҷро шавад ва ҳатто тибқи қонун, шикоят бурдан, онро ба баҳсу мунозира кашидан ва зери шубҳа гузоштан қатъиян мумкин нест. Вай мегӯяд, “Қонун “Дар бораи барҳамдиҳии ташкилоти қарзӣ” (аз соли 2011) пас аз қабули Кодекси гражданӣ (соли 1999) аз тарафи вакилони Маҷлиси Олӣ кӯр-кӯрона, бар зарари аҳолӣ қабул карда шудааст”. Вай гуфт: “То ҳол бартараф накардани ихтилофи мазкури қонунҳо аз тарафи худи қонунэҷодкунанда, ин нишон додан ва фароҳам овардани имкони мусоиди як роҳи дуздӣ ба коррупсионерҳо мебошад. Ва онҳо барои ғорат кардани мардум дар амал собит сохтанд, ки қонунро ба кадом тараф хоҳанд, ба ҳамон тараф тоб медиҳанд!?”.

Адвокат мегӯяд, беамалии Маҷлиси намояндагони Маҷлиси Олии ҶТ дар ҳолест, ки худи Президенти Тоҷикистон чанд маротиба бар бартараф намудани ихтилоф миёни қонунҳо таъкид карда буд ва Таъиноти Суди конститутсионии Ҷумҳурии Тоҷикистон мушаххас ба бартараф намудани вайронкунии ҳуқуқи конститутсиониии шаҳрвандон - амонатгузорон ба моликият ангушт гузоштааст.

Солеҳҷон Ҷӯраев тавзеҳоти раиси Кумитаи Маҷлиси намояндагони Маҷлиси Олии Тоҷикистон Шариф Раҳимзодаро мисол меорад, ки ӯ талаботи моддаҳои номбурдаи Кодекси гражданиро, пеш аз ҳама моддаи 65-ро дар амал рад намуда, супориши Президенти кишвар ва қарори Ҳукуматро аз 7-уми сентябри соли 2017 комилан беэътибор гузоштааст. “Ҳатто Таъиноти Суди конститутсионӣ, ки иҷрои он қатъӣ буда, нисбат ба он шикоят овардан мумкин нест, худи вакили мардум ва раиси кумитаи Маҷлиси намояндагон зери шубҳа гузоштааст. Зеро Қонунҳоро барои ҳама навиштаанд, онҳоро як хел, ҳам шоҳу гадо, ҳокиму тобеъ ва шахсони оддӣ бояд баробар риоя кунанд”,- гуфт ӯ.

Тибқи талаботи Қонуни Ҷумҳурии Тоҷикистон “Дар бораи санадҳои меъёрии ҳуқуқӣ” дар навбати аввал худи қонунгузор - Маҷлиси Олӣ вазифадор аст, ки мухолифати қонунҳоро бинобар номувофиқатӣ барҳам диҳад.

 

Аз суханронии адвокат Ҷӯраев дар суд:

“Оид ба беамалии Прокуратураи генералӣ! 

1. Мақомоти прокуратураи Тоҷикистон вазифаи конститутсионии худро оид ба назорати риояи дақиқ ва иҷрои якхелаи қонунҳо аз ҷониби вазоратҳо, кумитаҳои давлатӣ ва дигар идораҳои Ҷумҳурии Тоҷикистон, бонкҳо, иттиҳодияҳои ҷамъиятӣ, аз тарафи шахсони мансабдори онҳо, инчунин ба қонунҳо мутобиқ будани санадҳои ҳуқуқие, ки назорат ба риояи ҳуқуқу озодиҳои инсон ва шаҳрванд, ки ҳамчун арзиши олӣ эътироф гардидаанд, иҷро накардааст.

2. Аз соли 2017 ва пас аз қабули Таъиноти Суди конститутсионии Ҷумҳурии Тоҷикистон (аз 22-юми майи соли 2018) ҳам, то аз ҷониби Суди ноҳияи Шоҳмансур оғоз нагардидани парвандаи гражданӣ оид ба амалҳои ғайриконстутсионии мансабдорони давлатии вазоратҳои адлия ва молияи Ҷумҳурии Тоҷикистон, ки боиси вайрон шудани ҳуқуқу манфиатҳои ҳазорҳо шаҳрвандон - пасандозгузорон гардида, дар таҷриба ба таври дахлдор амалӣ шудани ҳимояи ҳуқуқу манфиатҳои конститутсионии шахс ба моликият монеа гардидааст, дидаю дониста ягон чораҷӯӣ накардааст.

3. Ба беамалии Маҷлиси намояндагони Маҷлиси Олии Ҷумҳурии Тоҷикистон вобаста ба иҷрои Таъиноти қатъии Суди конститутсионии Ҷумҳурии Тоҷикистон аз 22-юми майи соли 2018 чашм пӯшида, то ҳол ихтилофи қонунҳо бартараф карда нашудааст.

4. Барои пешгирии ҷиноятҳои ошкор ва ба ҳама аёни Зиёев Ҷамшед (раиси собиқи “Тоҷпромбонк”) ва гуруҳи муташаккили ҷиноии ӯ дар давоми ду соли тӯлонӣ ба аризаи садҳо шаҳрванд ва ман нигоҳ накарда, чора наандешидааст. 

а) Пас аз ҳабси Зиёев бошад (моҳи апрели соли 2018), ҷиноятҳои зиёди ӯ ва гуруҳи коррупсионии муташаккил оид ба тасарруфи маблағи садҳо шаҳрвандон, аз он ҷумла, дуздии маблағҳои ману писарамро рӯйпӯш намуда, ба Зиёев айб эълон ва моёнро ҳамчун ҷабрдида эътироф накардааст. Ҳатто ба аризаи чандкаратаи ман оид ба ин талабҳо, ба супориши Роҳбарияти Дастгоҳи иҷроияи президенти Ҷумҳурии Тоҷикистон нигоҳ накарда, аз моҳи июли соли 2017 то имрӯз ягон ҷавоб надодааст. 

б) Тафтишро бошад, ҳамаҷониба ва пурра ба манфиати ҳамаи ҷабрдидагони “Тоҷпромбонк” нагузаронида, бараъло интихобӣ, ба зарари шаҳрвандон ва ба манфиати Зиёев ва ҳаммаслакони ӯ гузаронида истодааст! 

в) Роҳбари гуруҳи тафтишотии ӯ Саидов Рустам бошад, ба ҷое, ки дузди калон Зиёевро ба пушти панҷара андозад, аз ҳадди ваколатҳои мансабии худ бараъло берун баромада, бо нархҳои осмонӣ ба фурӯши молу мулки Зиёев машғул шуда, ҷиноятҳои бараъло ба худ аёни дуздонро рӯйпӯш кардааст!

 

Пешниҳоди ғайриоддӣ

Як воқеияти ҷолиби баҳси “Тоҷпромбонк” ин аст, ки амволи он аз сӯи экспертҳои Вазорати адлия аз буд зиёд нархгузорӣ шудаанд. Ин дар ҳолест, ки раиси собиқи он Ҷамшед Зиёев ҳоло дар ҳабс қарор дорад ва раиси наваш ё вакили махсус Ташриф Шарипов аз роҳи ҳамтои қаблии худ пеш меравад. Аз ин хотир, адвокат Ҷӯраев мегӯяд, “факту далелҳои дар мурофиаи судӣ таҳқиқшуда нишон медиҳад, ки Шарипов на он ки ҳаммаслаки Зиёев будааст, балки худаш бо нақшаи пешакӣ тарҳрезишуда амал намуда, ба тасарруфи маблағи амонатгузорон даст зада, мардумро фиреб, судро бошад кӯшиши гумроҳ кардан дорад ва бо мақсади ғаразнок ва пешниҳоди сохтакориҳои далелҳои қалбакӣ, ҷиноятҳо ба муқобили адолати судӣ содир менамояд”.

Ҷӯраев мегӯяд, Ҷамшед Зиёев ҳатто аз маҳбас истода, ҳамоно сарват меандӯзад, ки ба қавли ӯ, Остап Бендер, қаллоби маъруфро ба як нӯл задааст. Бино ба иттилои ӯ, роҳе, ки барои сарватандӯзӣ Зиёев пеш гирифтааст, ҳеҷ ақлгир нест, масалан, ӯ аз ҳисоби “Тоҷпромбонк” ба ширкатҳои мансуб ба наздиконаш («ТПБ АКВА», «ТПБ-ПЭТ», «Даҳбед-Д», «Даҳбед-Д» -2, «Даҳбед-М», «ТПБ АВТО») бидуни гарав 156 миллиону 122 ҳазору 615 сомонӣ (бо фоизҳои ҳисобшудаи пардохтнашудаашон 77 276 637 сомонӣ) дода, рӯирост 233 399 252 сомонии шаҳрвандон - амонатгузоронро аз худ кардааст. Пас аз муфлисшавии бонк ин қарзҳоро низ бо як маҳорати хос пӯшондааст, аз ҷумла бинои меҳмонхонаи “Сарбонк”, воқеъ дар хиёбони Рӯдакӣ 22 «а»-и шаҳри Душанберо, ки ба 635 ҳазору 516 сомонӣ ба ширкати писараш ҶДММ «Азиз Ко ЛТД» (директори он Сайдинов Олег (додари ҳамсараш) фурӯхта буд, пас аз муфлисшавӣ ба 18 миллиону 511 ҳазору 239 сомонӣ ҳамчун пӯшиши қарз ҳуҷҷат кардааст ва бо ҳамин нарх ҳоло ба савдо гузоштааст. Ба ҳамин минвол, нархи бинои меҳмонхонаи “Сарбонк”, ҳамчунин бинои мағозаи «Моҳи нав»-ро 40 маротиба зиёд нишон дода, ба амонатгузоронаш пешниҳод кардааст, ки ба ҷои қарзашон гиранд (“Фараж” дар бораи нархгузориҳои ғайривоқеӣ ва ғайриқонунии амволи “Тоҷпромбонк” дар матлаби “Зиёев ва Ко” (№26 (552), аз 28-уми июни соли 2017) навишта буд. Лутфан, ба он руҷуъ шавад).

Адвокат Ҷӯраев мегӯяд, Зиёев бо ин гуна найранги моҳирона (комбинация) иншооти арзон фурӯхтаашро аз ҳисоби маблағҳои амонотгузорон ба нархи даҳҳо маротиба қиммат харида, ба ҷои пардохти маблағҳои амонатгузорон ба “Тоҷпромбонк” супорида, ҷиноятҳои тасарруф кардаашро бошад, бо мусоидати шахсони манфиатдори вазоратҳои молияву адлия ва Прокуратураи генералӣ аз ин ҳисоб пӯшонида, зиёда аз ин, якҷоя бо вакили махсус Шарипов Тақдир боз маблағҳои амонатгузорони Бонкро дуздидааст ва сӯиқасд ба тасарруфи он кардааст.

Ба қавли Ҷӯраев, Зиёев ин қаллобиҳояшро бо мусоидати “шахсони манфиатдор”-и ниҳодҳои давлатӣ анҷом медиҳад, аз ин хотир, ӯ ба судя пешниҳод кард, ки аз Вазорати молия пурсида шавад, оё омода аст ба 100 миллион қарзаш аз “Тоҷпромбонк” амволи бо нархҳои кайҳонӣ гузоштаи Зиёевро харад? Вай гуфт, вақте ниҳодҳои давлатӣ худ ин нархҳои ғайриқонуниро қабул мекунанд, бузургворӣ мекарданд, ки пеш гузашта, аввал худ онҳоро харанд. Вай афзуд, агар онҳо ин корро кунанд, аз даъво ва ҳатто маблағи худаш даст мекашад (суд Вазорати адлияро, ки эксперташ ин нархгузориҳоро анҷом додааст , муваззаф кард, то қазияро рӯшан кунад).

Дар охири суханронии худ адвокат Ҷӯраев аз Суди ноҳияи Шоҳмансури шаҳри Душанбе аз ҷумла талаб кард, ки 1) ба супориши расмии муовини вазири адлияи Тоҷикистон Мирсайзод Ҳаким Саид аз 19-уми майи соли 2017 ва супориши муовини якуми вазири молияи Ҷумҳурии Тоҷикистон Каримзода Ҷамшед аз 18-уми майи соли 2017 баҳои ҳуқуқӣ дода, онҳоро ҳамчун амали ғайриконститутсионӣ беэътибор донад; 2) аризаи ӯро пурра қонеъ гардонида, Вазорати адлия ҳуҷҷатҳои 117 молу мулки ба ҳабс гузошташудаи “Тоҷпромбонк”-ро ба соҳибмулк баргардонад; 3) нисбати Зиёев Ҷамшед ва вакили махсуси “Тоҷпромбонк” Шарипов Тақдир ва дигарон парвандаи нави ҷиноятӣ оғоз карда, маводҳо барои тафтиш, якҷоя бо парвандаи Зиёев Ҷамшед, ба Прокуратураи генералии Ҷумҳурии Тоҷикистон фиристода шавад; 4) нисбати мутахассисони молшиноси Маркази ҷумҳуриявии экспертизаи судӣ ва криминалистии Вазорати адлияи ҶТ, раёсати ҳуқуқи Вазорати молияи ҶТ ва дигарон барои дидаю дониста додани хулосаи ғалат ба манфиати гуруҳи муташаккили ҷиноятии Ҷамшед Зиёев ва мусоидат барои содир намудани ҷиноятҳои нави тасарруфи маблағҳои шаҳрвандон - пасандозгузорони Бонк бо роҳи қаллобӣ парвандаи ҷиноятӣ кушода, нисбат ба беамалии Маҷлиси намояндагони Маҷлиси Олии Ҷумҳурии Тоҷикистон вобаста ба иҷро мондани Таъиноти қатъии Суди конститутсионии Ҷумҳурии Тоҷикистон ва намояндаи Прокуратураи генералӣ барои сӯйистифода ва баромадан аз ҳадди ваколатҳои мансабии худ, рӯйпӯш кардани ҷиноятҳои дуздии Зиёев Ҷамшед ва мусоидат ба содир намудани ҷиноятҳои нави тасарруфи маблағҳои амонатгузорон баҳои ҳуқуқӣ дода, ба унвони Прокурори генералии Ҷумҳурии Тоҷикистон таъиноти хусусӣ бароварда шавад; 7) нисбати вакили махсуси ҶСП “Тоҷпромбонк” Шарипов Тақдир ба унвони Раиси Бонки милли Ҷумҳурии Тоҷикистон таъиноти хусусӣ бароварда, ӯ барои нобоварӣ, сӯйистифода ва баромадан аз ҳадди ваколатҳои мансабӣ, аз вазифааш сабукдӯш карда шавад.

“ФАРАЖ”

Хонданд 355
  •  << 
  •  < 
  •  1 
  •  > 
  •  >> 

Хабари-рӯз

Календар

« Январ 2019 »
Пн Вт Ср Чт Пт Сб Вс
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      

Минбари сардабир

  • ДАВоДАВ

    Масофаи роҳ бо машинае, ки 150 ҳазор доллар нарх дорад…

Нигоҳи хос

  • Баҳонаи зистан

    Мақсад доштан маънои баҳонае барои нафас гирифтанро дорад. Соли 2018…
  • МАСЛИҲАТ

    Аз дидаву шунида Салом, хонандагони гиромии ҳафтаномаи «Фараж»! Мо аз…

Парадокс

Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ...
Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ба ...
Гуфтед? Мегӯянд! (№3
Бег САБУР, раиси Хадамоти алоқа:- Ман қарорамро бекор накардаам.Танз: Офарин ба Шумо, оғои Бег ...
Гуфтед? Мегӯянд! (№2
Аскар ҲАКИМ, Шоири халқии Тоҷикистон:- Дар замони шӯравӣ мо асареро пайдо намекунем, ки дар ...
Гуфтед? Мегӯянд! (№1
Абдуалим ИСМОИЛЗОДА, раиси шаҳри Қӯрғонтеппа Хонандаи беҳтарин- Кӯшиш мекунам ҳар рӯз лоақал ...

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.