.

Alternative flash content

Requirements

Get Adobe Flash player

Слайд

Бозорҳои вилояти Хатлон дар арафаи Иди Қурбон нарху навои маҳсулоти хӯрокворӣ ва меваҷотро боло бурдаанд, ки ин амал сокинони минтақаро нигарон кардааст.

Фарорасии Иди Қурбон агар аз як сӯ боиси шодмонии сокинони Хатлонзамин шуда бошад, болоравии нархи наво дар бозору фурӯшгоҳҳо онҳоро озурда кардааст. Дар ин ид низ афзоиши нархи маводи ғизоӣ, нӯшобаҳо, сабзавот ва шириниҳо ба мушоҳида мерасад. Алишер, сокини шаҳри Бохтар, мегӯяд, соҳибкорон аз фарорасии ид истифода карда, нархи наворо боло мекунанд. Ба гуфти ҳамсуҳбати мо, имрӯз нархи ҳама намуд маҳсулоти ниёзи мардум дар бозорҳои шаҳри Бохтар гарон шудааст. Як дона харбуза аз 30 то 50 сомонӣ, тарбуз аз 25 то 40 сомонӣ, шафтолу аз 10 то 15 сомонӣ, ангур аз 4 то 8 сомонӣ боло рафта, арзиши помидор, бодиринг ва ҳатто шириниҳо низ гарон шудааст.

Нархи баланди бозорҳои шаҳру навоҳии вилоят ҳоло нигарониҳои аксар аз сокинони маҳаллиро ба бор овардааст. “Агар қабл аз Иди Курбон як кило гӯшт 35-36 сомонӣ арзиш дошт, ҳоло он 38-40 сомонӣ фурӯхта мешавад”, - мегӯяд Ашӯр Қурбонов як сокини Бохтар. Ӯ гуфт, баъзе соҳибкорон медонанд, ки сокинон маҷбуранд, дар ид харид кунанд, ба таври сунъӣ нархро баланд мебардоранд. Гулнора Исмоилова, сокини шаҳри Бохтарро гаронии нархи маҳсулоти ғизоӣ дар бозор нороҳат карда, зеро бо фарорасии Иди Қурбон тавони хонаводаи ӯ барои хариди маводи ниёзи аввалия маҳдуд шудааст. Ӯ мегӯяд: “Агар дар тамоми дунё нархи бозор ба хотири Иди Қурбон арзон шавад, дар мо, баракс, гарон мешавад. Фурӯшандаҳои бозор ҳар хел баҳона мекунанд, ки бор аз Америка ё аз Хитой, гарон омадаааст. Мехоҳем арзонӣ шавад, фурӯшандаҳо ҳам савоби мардумро гиранд, ба одамон ҳам ин қадар зулм нашавад. Президенти мамлакатамон, кормандони ҳукумат, домуллоҳо ҳар рӯз дар телевизион  гап мезананд, ки бозор арзонӣ шавад, халқ азоб накашад, вале инҳо баракс нархро баланд мебардоранд”. 

Ҳамзамон, ӯ афзуд, ки бо фаро расидани ҳар иду ҷашн соҳибкорон бо беқарорӣ интизори баланд бардоштани нарху наво мешаванд. Тоҷирону фурӯшандаҳои бозор мегӯянд, ки имкони амалии кам кардани нархро надоранд. Соҳибкорон дар шарҳи ин ҳол мегӯянд, гаронии сӯзишворӣ ва қиммати роҳкиро, ҳамчунин афзоиши хароҷоти парваришу истеҳсоли маводи ғизоӣ сабаби афзоиши нархи наво дар бозор шудааст. Тоҷири дигари бозори Бохтар, ки нахост номаш зикр шавад, иқрор шуд, ки гуруҳе аз соҳибкорон ба хотири ба даст овардани даромади бештар дар Иди Қурбон, ки одатан бозори маводи озуқа ҷӯш мезанад, қиммати маҳсулотро ба таври сунъӣ боло мебаранд. Ба иддаои ӯ, азбаски маъмулан маводи фурӯшии бозор моли дасту дуюму сеюм аст, назорат кардан, ё ба таври иҷборӣ поин бурдани қиммати он имконнопазир аст. 

- Ин нархҳоро мо аз пеши худ баланд накардаем. Аз боло ба чӣ қиммате ба мо борро меоранд, ҳамин қадар мефурӯшем. Агар маҳсулот, ки сифати хуб дошта бошад, қимматаш ҳам боло меравад. Албатта, фарорасии Иди Қурбон ҳам сабаби болоравии нархҳо аст, чунки бозор гарм мешавад, соҳибкорон аз ин истифода мекунанд, - афзуд соҳибкор.

Сокини дигари ноҳияи Кӯшониён Муҳаммад Алиев чунин мегуяд: “Дар аксар кишварҳои мусулмонии ҷаҳон ва ҳатто давлати Русия ва дигар давлатҳое, ки ғайримусалмонист, дар Иди Қурбон нархи ҳама намуди хӯроквориро ба хотири оне, ки мусулмонон дар он ҷо зиндагӣ мекунанд, арзон мекунанд, вале дар бозорҳои мо ба ҷойи поён бурдани нархи маҳсулоти ниёзи марудм, баракс, аз тарафи баъзе соҳибкорон боло бардошта мешавад. Худи ман дар Русия борҳо шоҳиди он шудам, ки дар Иди Рамазон ва Қурбон дар фурӯшгоҳҳо нархҳо 15 -20 дарсад арзон карда мешаванд”.

Ба ин суол мо ба масъулони бозори “Фаровон”-и шаҳри Бохтар муроҷат кардем, ки “Оё аз ҷониби шумо назорат аз болои нархи наво ҳаст, ё ин ки аз тарифи масъулини бозор ягон мағозаи хӯрокворӣ ва маҳсулоти кишоварзӣ бо нархи арзон барои харидорон кушода шудааст?”. Масъулони ҷамъияти дорои масъулияташ маҳдуди бозори “Фаровон” гуфтанд, ки ҳамарӯза назоратро аз болои соҳибкорон пурзӯр намуда, намегузоранд, ки нархҳоро дар арафаи ин ид худсарона баланд бардоранд.

Аз нигоҳи дини ислом, ҳар як инсон бояд аз роҳи ҳалол ризқу рӯзии худро ҷустуҷӯ намояд, зеро луқмаи ҳалол сабаби нозил гаштани баракати Худованд дар рӯзгор ва хонадони ӯ мегардад. Бахусус, сарватмандону тоҷирон агар дар роҳи савоб кӯшиш намуда, дари хайру саховатро боз кунанд ва молу маҳсулоти худро ба бародарони муъмин арзонӣ фармоянд, бар ивази он сазовори аҷри азим аз ҷониби Худованд хоҳанд шуд. Маҳз дар адлу инсоф ва сидқу вафои тоҷир, устувории имон ва эътиқоди ӯ ба арзишҳои исломӣ равшан мегардад. Аммо мутаассифона, ин дар бозору фурӯшгоҳҳои мо баракс аст.

Раҳмоналӣ Додархӯҷаев

Хонданд 533

Суди федералии Швейтсария 31-уми июл шикояти духтари президенти нахустини Ӯзбекистон Гулнора Каримоваро рад кард. Ин қарори суд раванди бозгардони 800 миллион франки швейтсарии Каримоваро ба Тошканд хоҳад тезонд.

Грегуара Манжа, адвокати Каримова, дар шаҳри Женева зидди қарори Прокуратураи федералии Швейтсария барои мусодираи ҳудуди 701 миллион доллари шахси зерҳимояаш дар бонкҳои ин кишвар ба суд шикоят бурда буд.

Пркуратураи Швейтсария 22-юми майи соли равон қарор баровард, аз 800 миллион франки Каримова, ки дар бонкҳои Женева ва Сюрих аз соли 2012 то инҷониб ба ҳабс гирифта шудаанд, 687,7 миллионаш мусодира ва ба Тошканд баргардонида шавад.

Ба ин қарор баёноти ду шахси боэътимоди Гулнора Каримова - Гаяне Авакян ва Рустам Мадумаров сабаб шуд. Онҳо ҳангоми бозпурсӣ гуфтанд, ки пулҳои ҳабсшудаи Каримова бо роҳи ғайриқонунӣ дар Ӯзбекистон ба даст омадаанд ва бояд баргардонида шаванд.

Вале Манжа дар робита ба қарори мазкур эътироз баён карда, гуфт, он ҳуқуқи шахси зерҳимояашро ба мурофиаҳои одилонаи судӣ нақз мекунад. Ба гуфтаи адвокати Каримова, баёноти Авакян ва Мадумаров дар зиндонҳои Ӯзбекистон барои баргардондани пулҳои ҳабсшудаи шахси зери ҳимояаш ба Тошканд кофӣ нест.

Дар бораи тақдири худи Гулнора Каримова прокуратураи генералии Ӯзбекистон бори охир 28-уми июли соли 2017 иттилоъ дода буд. Бар асоси он, суди Тошканд моҳи августи соли 2015 Каримоваро бо ҷурми саркашӣ аз пардохти андоз, сохтакории ҳуҷҷат, тамаъҷуӣ ва дуздӣ ба 5 соли зиндон маҳкум кардааст.

Хонданд 473

Шаҳри Хуҷанди бостонӣ дар таърихи халқи тоҷик мақоми хосаро доро буда, яке аз шаҳрҳои қадимтарин ба ҳисоб меравад.

Мақомоти иҷроияи ҳокимияти давлатии вилояти Суғд ва шаҳри Хуҷанд баҳри ободу зебо гардонидани маркази вилоят ва ба шаҳри ҳамешабаҳор табдил додани ин ганҷинаи миллат корҳои зиёдеро ба сомон расонидаанд. Мардум аз ин зебоиҳову гулкориҳо роҳат намуда, шомгоҳон аз ҳавои форами Сирдарё ва сабзазорон тану ҷони худро роҳату истироҳат медиҳанд. Ин мавзеъҳо ҷои дӯстдоштаи сайёҳону меҳмонон низ гардидааст.

Саиди Ҳайдар, МТЖТ

Хонданд 179

Овозхони шинохтаи тоҷик Парвиз Назаров, ки айни ҳол дар Қазоқистон умр ба сар мебарад, имсол 30-мин солгарди овозхонии худро бо барномаҳои консертӣ дар Душанбе баргузор менамояд. 

Имрӯз дар толори калони “Шарқи озод” вохурии журналистони тоҷик бо ин ҳунарманди шинохта баргузор гардид.

Ба гуфтаи худи ҳунарманд барномаҳои консертиаш, ки аллакай дар Қазоқистон шуда гузашт, акнун дар Душанбе, Кӯлоб ва Хуҷанди Тоҷикистон гузаронида мешавад.

“Бо сабаби баъзе мушкилҳо ва ҳамзамон масъалаи молӣ наметавонам дар Хоруғ барномаи консертӣ диҳем”, - иброз намуд овозхон.

Ба гуфтаи ӯ, барномаҳои консертӣ дар Душанбе, Кӯлоб ва шаҳри Хуҷанд бо овози зинда ва бе истифодаи фонограмма гузаронида мешаванд.

Ҳамзамон ӯ қайд намуд, ки дар барномаҳои консертиаш овозхонҳои шинохтаи тоҷик Баҳроми Ғаффурӣ, Зикриоллоҳи Ҳаким ва Таҳмина Рамазонова низ суруд мехонанд.

Сарпарастии барномаҳои консертии Парвиз Назаровро Медиа-Альянси Тоҷикистон ба уҳда гирифтааст.   

Хонданд 1023

Хабари рӯз

Минбари сардабир

  • симКАРта

    Дар ҳафтае, ки гузашт, дар шабакаҳои иҷтимоӣ ин калима аз…

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.