.

Alternative flash content

Requirements

Get Adobe Flash player

Слайд

Аз “сагҷанг” – и Ҳабиб то қаҳрамонии Муҳриддин

“Дар замони пеш ғуломони Инсон  бо ҳам меҷангиданд, имрӯз ғуломони пул”.

(Рустам Гулов, рӯзноманигор)

Ба ҷуз футбол ба ягон намуди дигари варзиш мухлис нестам ва ҳавас надорам. Махсусан он намудҳои варзишеро, ки бо хунрезию задану нимкушта кардани ҳамдигар тамом мешаванд ва бе риояи қонуну қойида ҳамдигарро ба хотири пул задану кӯфтан сурат мегирад. Онҳоеро, ки бераҳмона ҳамдигарро мезананду нимкушта мекунанд, дар асрҳои пеш “гладиатор” меномиданд, ҳозир варзишро олуда ба хунрезӣ карда, варзиш мегӯянд ва хато мекунанд. Муҳориба бидуни қойида аз паҳншудатарин ин намудҳо аст. 

Чанд ҳафтаи охир шояд дар Тоҷикистони кӯчаки мо ҳам нафари огоҳе аз шабакаҳои иҷтимоӣ набошад, ки аз “набарди аср” миёни Ҳабиб Нурмуҳаммадови доғистонӣ ва Конор Макгрегори ирландӣ нагуфта бошад. 

Ин ҳама таваҷҷӯҳ барои чист? Як занозании бидуни қойидаро ба хотири пул ҷомаи динӣ пӯшонидан ба манфиати кист? Кисаи кӣ баъди ин муҳориба хароб шуду кӣ аз ин моҷаро фойида дид?

Муҳорибаи бидуни қоидаи ин ду нафар шаби шашуми октябр дар шаҳри Лас-Вегаси Амрико дойир гардид. Рақиби Нурмуҳаммадов  аз Ирландия Конор Макргрегор мисли футболбоз Бекхэми инглис мавриди таваҷҷӯҳи ҷомеа буданро дӯст медорад  ва кӯшиш мекунад ба хотири бештар ҷамъ кардани сармоя мисли футболбоз Марадона аз Аргентина баёнияҳои тунд нисбати рақибонаш пахш кунад. Макгрегор дар даври чаҳоруми рақобат  ба фишори сахт ва нафасгиркунандаи Ҳабиб Нурмуҳаммадов тоб наовард ва таслим шуд. Баъди пирӯзии Ҳабиб  дар байни аъзои гуруҳи ҳарду рақиб ҷанҷолу занозанӣ бархост ва аз ин сабаб мусоҳиба бо ғолиби бозӣ ва маросими супурдани камарбанд дар ҳузури мухлисонро бекор  карданд. Ғолиб  барои  ширкат дар ин мусобиқа 2 миллион доллар ҷоиза бояд мегирифт. Мегӯянд Ҳабиб то ин дам боре шикаст нахӯрдааст ва ягон бор даври аввали рақобатро набохтааст. Чун Макгрегор ӯро тарсончак номида буду барои тарғиби ӯ (ва дар ҳамин ҳол барои пур кардани киссаи хеш) зиёд кӯшиш кард, ВАО-и рус бо вуҷуди он ки ба мардуми Қафқоз рӯйи хуш намедиҳад, аммо дар шароити имрӯз ба хотири аз мушкили асосии Руссия дур кардани таваҷҷӯҳи мардум водор шуд дар ин маврид зиёд гӯяд. Ҳам масъулони идеологии Кремл ва ҳам оташандозони ҷанги динӣ аз ин фурсат хуб истифода карданд ва киссаи букмекеронро пур карданд. Дар шабакаҳои иҷтимоии тоҷикӣ ҷомеа чун ҳамеша ба ду тақсим шуд: Онҳое ки зери таъсири идеологияи динӣ пуштибонӣ аз Ҳабиб карданд ва онҳое ки бо дарки воқеият рабт додани муҳорибаи бидуни қойидаро ба ислом маҳкум намуданд.

Сухангӯи Кумитаи дин Афшини Муқим дар Фейсбук навишт:

“Дӯсте гуфт:

Ҳабиб рамзи пирӯзии уммати исломӣ! 

Мегӯям, ҳамон чечену доғистониҳое, ки дар қазия ва куштори шаҳрвандони Тоҷикистон дар оромгоҳи "Хованский"- и Русия даст доштанд, онҳо ҳам "рамзи пирӯзии уммати исломӣ" буданд ё "қотили уммати исломӣ?”.

Дар тақвияти ин андешаҳо рӯзноманигор Далери Абдураҳим гуфтааст:

“Мо мусулмонон (албатта на ҳама. Д. А) то ҳамон рӯз пойбанди аҳкоми шариъати Ислом ҳастем, ки ниёзманди он бошем. Агар мушкиле пеш омаду мухолифи боварҳоямон ҳам бошад, фардо демократ ё коммунисти суп-сурх мешавем. Ва ин ҳам то рӯзи эҳтиёҷамон бароварда шудан. Дар акси ҳол, дидаву дониста як намуди варзишро (агар воқеъан варзиш бошад), ки зидди меъёрҳои исломӣ аст, пӯшиши исломӣ намедодем. 

Ҷор задему гуфтем,ки "Ҳабиб рамзи пирӯзии уммати исломӣ". Охир инҷо набарди як варзишгари мусулмон бо варзишгари ғайримусулмон барои пирӯзии динҳояшон набуд -ку?! Пас пирӯзӣ бар кӣ? Ҳардуяш ҳам барои гонорар (ҳаққи қалам. Аз редаксия) мубориза бурданд. Ва баъдан мувофиқи ривоёти динӣ пайгамбари Ислом фармудаанд, ки "уммати исломӣ дар ҳамон вақт пирӯз мешавад, ки рӯ биёрад ба фармудаҳои Қуръону пайравӣ кунад аз суннатҳои пайғамбар”, на ин ки пирӯзиро дар "хурӯсҷанг"-и ду нафар бинад.

Дигар ин ки дӯстон гуфтанд, ки Ҳабиб ба тоҷикон эҳтиром дорад. Мо низ ба ӯ ва ҳунари ӯ арҷ мегузорем ва ҳеҷ хусумате нисбати вай надорем. Шумо низ мухлисӣ кунед, ба ин ҳақ доред, вале на мухлисии кур-курона. Варзишгарро барои ҳунараш мухлисӣ мекунанд, на барои эътиқоду бовараш”.

Таҳлилгари дигари ин баҳс Рустам Гулов дар блоги худ овардааст:

“ Дар мавриди ғалабаи Ҳабиб зиёд гуфтанд. Он андеша маро бехуд мекунад, ки инро ба ислом рабт медиҳанд. Ислом ин намудҳои “варзиш” - ро иҷоза намедиҳад. Онеро ки Шумо “ифтихори ислом” меномед, ба ҷуз аз занозанӣ чизе нест ва ислом маҳз ин нуктаро манъ кардааст. 

Нурмуҳаммадов барои обрӯи ислом ва мусалмон мубориза набурдааст, ки фаъолияти ӯро ба дини мо рабт диҳед. Вай бештар ба рақибаш Макгрегор монандӣ дорад нисбат ба як мусалмони сатҳи миёна. Онҳо ҳарду:

А) Барои эътиқоди худ не, барои пул мубориза бурданд. Барои Ислом ё дини христианӣ не. Ҳабиб барои ширкат дар ин ҷанг бояд ду миллион доллар ва фойиз аз намоиши пулакӣ бояд бигирад.

Б) Он чӣ дар майдони ин муҳориба дойир мешавад, варзиш номидан комилан нодуруст аст. Ин аз ҷанги гладиаторҳо фарқ надорад. Танҳо он замон ғуломони Инсон меҷангиданд, ҳоло ғуломони пул.

В) Он амале, ки Ҳабиб баъди муҳориба алайҳи мухлисони Конор анҷом дод, аз рафтори Макгрегор фарқе надорад: Ҳарду ҳам нафарони бетарбия ҳастанд ва лоиқ ба пайравию омӯхтан нестанд.

Г) Ин гуна варзишгарон ва ин намуди “варзиш” барои ҷавонон арзишеро намеомӯзонад. Ин тарғиби бераҳмию  ҳайвонӣ асту бас!”.

Ба андешаи Рустам Гулов, ин таври баҳодиҳӣ ва ин гуна “қаҳрамонон” ба раванди ҳаммаъно донистани ислом ва терроризм мусоидат мекунад ва як далели дигаре барои тарғибгарони ин андеша мешавад. 

Аммо, дар ҳамин ҳол, бархеи дигар, минҷумла овозхон Манижаи Давлат танҳо ба он хотир аз Нурмуҳаммадов дастгирӣ мекунад, ки ӯ мусалмон аст. Номбурда дар саҳифааш дар шабакаи интернетии Инстаграм навиштааст:

 “Чанд сол боз аст, ки рақобатҳои Конор Макгрегорро тамошо мекунам ва баъзеҳо пай бурдаанд, ки мухлиси ӯ ҳастам ва барои ман қаҳрамон фақат ӯст”.

Аммо, гуфтааст Манижаи Давлат, мехоҳад дар набарди ӯ бо Ҳабиби доғистонӣ, варзишгари рус пирӯз шавад, чун ба навиштаи Манижа “Ҳоло сухан дар бораи виҷдон, номус ва шарафи ман меравад... Сухан дар бораи дини ман меравад, чун ҳеҷ касе ҳақ надорад, онро таҳқир кунад. Ҳар кас, ки набошад, ҳатто касе ки барои ман маҳбуб аст. Худо кунад, ки Макгрегор шикаст хӯрад". 

Мавқеъгирии ҷавонони тоҷик дар ин занозанӣ махсусан дар Русия ба баъзе аз суолҳои дигар посух мегӯяд. Ҷавонони мо дар муҳоҷират бештар зери таъсири мардуми мусалмони қафқозӣ ҳастанд. Ба масҷиде, ки чечен ё доғистонӣ сохтааст мераванд ва панду насиҳати эшонро гӯш мекунанд, ба муттаҳидии онҳо ҳасад мебаранд, мусиқии онҳоро гӯш мекунанду зери навои он мерақсанд, бо роҳнамоии эшон ба “ҳимояи ислом” дар ин ё он гӯшаи дунё мераванд, хостаҳои эшонро ба сари оилаашон таҳмил мекунанд. 

Агар не, дар ин шабу рӯз Муин Ғафурови тоҷик чемпиони ҷаҳон дар самбои муҳорибавӣ шуд, аммо кам касе дар ин маврид гуфт, дастаи футболбозони тоҷики то 16 сола ба финали чемпионати Осиё бори нахуст раҳ ёфт, вале чашми фанатикҳои Ҳабиб гуиё ин ҳамаро надид. Дарвозабони ин даста Муҳриддин дар ду бозӣ бо Кореяи ҷанубӣ ва шимолӣ зарбаи ёздаҳметраро гардонида, ғалабаи дастаашро таъмин кард ва кам касе муваффақияти номбурдаро дид. Ин журналисти маъруфи тоҷик Илҳоми Ҷамолиёнро водор кард то нависад:

“Ҳой, мардуми азизи Тоҷикистон! Қаҳрамони худро бишносед. Муин Ғафуров-Тоҷик, чемпиони ҷаҳон дар самбои муҳорибавӣ! Ба ифтихори ғалабаҳояш Парчами давлати мо парафшонӣ мекунад. Ӯ ифтихори мост ва бо Ӯ бояд на камтар аз Ҳабиб ФАХР кард! Офаринат бод Муин Ғафуров!!!”.

Мухлиси дигаре нафаси сабук кашид:

"Сагҷанг"-и бемаънӣ ба итмом расид. Варзиши воқеъӣ футбол аст ва қаҳрамони ҳақиқӣ футболбозони навраси тоҷик. Бояд бештар аз онҳо гуфт”. 

Далер Абдураҳим афзуд:

“Барои ман шахсан Муин Ғафуров ва он бачаҳое, ки имрӯз бо Ҷопон дар риштаи футбол сабқат карданд, қаҳрамонанд, чунки онҳо парчами кишвари моро баланд бардоштанд. Онҳо обрӯйи миллатро мебардоранд.Онҳоро тоҷику тоҷикистонӣ мегӯянд.Онҳо ифтихорофаринони мо ҳастанд! На кадом Ҳабибе! “.

Аммо, бештару беҳтар аз ҳама футболбоз Месси андешаи худро баён намуд. Вақте аз ӯ пурсиданд, ки “Шумо ба Ҳабиб мухлисӣ мекунед?”, ҳайратзада посух дод:

“Тенис? Не, ман ҳамеша аз футбол фикр мекунам”.

Хуршед Атовулло,

Маркази тадқиқоти журналистии Тоҷикистон

Хонданд 192

Дар Бадахшон чӣ гап?

Окт 12, 2018
Хонданд: 192
Дар Бадахшон чӣ гап?

Ситоди байниидоравӣ дар Бадахшон аз аҳолӣ 136 адад силоҳ гирифта, 2468 далели қоидавайронкунӣ дар роҳҳро ошкор ва 11 нафар ҷинояткорро моил кардааст, ки ихтиёран худро таслими қонун кунанд.

Аз 15-уми сентябри соли 2018 дар Вилояти Мухтори Кӯҳистони Бадахшон Ситоди байниидоравӣ барои таъмини волоияти қонун, тартиботи ҷамъиятӣ, амнияти шаҳрвандон, мусодираи силоҳу аслиҳаи ғайриқонунӣ, дастгир ё ба мақомот ҳозир намудани ҷинояткорони дар ҷустуҷӯбуда, ошкор ва пешгирӣ намудани ҷиноятҳои марбут ба ғайриқонунӣ нигоҳ доштан ва истифодаи силоҳи оташфишон ва маводи мухаддир амал менамояд.

Дар ҳолати то 11-уми октябри соли равон аз саркардагони гурӯҳҳои муташаккили ҷиноятӣ ва сокинони алоҳидаи шаҳру ноҳияҳои вилоят, бахусус шаҳри Хоруғ 136 адад силоҳи оташфишон, аз ҷумла: 57 адад «Автомат Калашников», 2 адад «Пулемёт», 2 адад гулулаандоз (Гранатамёт), 1 адад комплекси зенитӣ, 27 адад «Таппонча», 8 адад Карабин, 29 адад силоҳи суфтамили «ТОЗ», 1 адад силоҳи истеҳсоли хориҷӣ ва бештар аз 2686 адад лавозимоти ҷангӣ, инчунин 500 гр маводи тарканда мусодира шудааст.

Аз 21 нафар ҷинояткорони дар кофтуков қарордошта, 11 нафари онҳо ихтиёран бо аризаи худиқрорӣ ба мақомотҳои ҳифзи ҳуқуқ ҳозир шуданд, ки ба қатори онҳо шаҳрвандон Акимбеков Акимбек Азизмамадович, Бозоров Комрон Ватаншоевич, Мирзоев Фируз Маҳмудхонович, Шейхов Пулод Тиллоевич, Каримбеков Рустамбек Давлатбекович, Некқадамов Шертан Саидқадамович, Болиев Шоҳғариб Додхудоевич, Худоназаров Некруз Ғуломалиевич, Ҳамиди Ташриф ва Давлатқадамов Музаффар Имомназарович дохил мешаванд.

Ба нафароне, ки то ҳанӯз дар ҷустуҷӯи расмӣ қарор дошта, ба мақомот ҳозир нашудаанд, бори дигар таъкид мегардад, ки аз ҳолатҳои сабуккунандае, ки  қонун пешбинӣ намудааст,  истифода карда, ба мақомотҳои ҳифзи ҳуқуқ ҳозир шаванд. Чунки баъди ба охир расидани мӯҳлати муайянгардида  пушаймонӣ суд надорад.

Ҳамзамон, рӯзи 2 октябри соли 2018 дар натиҷаи гузаронидани чорабиниҳои оперативӣ-ҷустуҷӯӣ аз ҷониби кормандони Раёсати Кумитаи давлатии амнияти миллии Ҷумҳурии Тоҷикистон дар ВМКБ аъмоли ҷиноятии аъзоёни гурӯҳҳои муташаккили ҷиноятии Ҷумҳурии Исломии Афғонистон ва ноҳияи Шуғнони Ҷумҳурии Тоҷикистон, ки мақсад доштанд  миқдори зиёди силоҳу лавозимоти ҷангӣ ва маводи мухаддирро аз Ҷумҳурии Исломии Афғонистон ба ноҳияи Шуғнони ВМКБ ҶТ интиқол диҳанд, ошкор ва пешгирӣ гардид.

Дар натиҷаи амалиёт ва задухӯрди мусаллаҳона дар минтақаи наздисарҳадии Барчиди ҷамоати деҳоти Поршневи ноҳияи Шуғнон қочоқбарон аз торикии шаб истифода карда, аз ҷои ҳодиса фирор намуданд.

Ҳангоми азназаргузаронии ҷои ҳодиса 2 борхалта, ки дар дохили онҳо 4 адад силоҳи оташфишони автомати «Калашников» ва 25 кг воситаҳои нашъадор, аз ҷумла 10 кг маводи мухаддири навъи «героин», 13 кг маводи нашъадори навъи «ҳашиш» ва 2 кг воситаи нашъадори навъи «афюн» ҷой кунонида шуда буд, дарёфт ва мусодира гардид.

Тибқи маълумоти бозсанҷишудаи Ситод гурӯҳҳои муташаккили ҷиноятии ноҳияи Шуғнон ва шаҳри Хоруғ айни замон кӯшиши аз Ҷумҳурии Исломии Афғонистон ва дигар минтақаҳо ворид намудани  силоҳ, муҳимот ва маводи мухадирро доранд. Ба ҳамин хотир қотеъона таъкид карда мешавад, ки чунин аъмоли ҷинояткорона вазъиятро мураккаб ва раванди қабул кардани чораҳои қонуниро нисбат ба ташкилкунандагони чунин ҷиноят ба воқеъият наздик месозад.

Самти дигари фаъолияти Ситоди байниидоравӣ ба таври қотеъона ба низом даровардани ҳаракати воситаҳои нақлиёт ва аз байн бурдани қоидавайронкуниҳо мебошад.

Дар натиҷаи гузаронидани чорабиниҳои мақсаднок 2468 далели қоидавайронкуниҳои ҳаракат дар роҳ ошкор карда шудааст. Аз ҷумла, 27 воситаи нақлиёти сиёҳшишаи ғайриқонунӣ, 40 воситаи нақлиёти бе рақами давлатӣ ва дорои  рақами бегона, 10 ҳолати идора кардани воситаҳои нақлиёт бе шаҳодатномаи ронандагӣ, 110 далели бо суръати баланд рондани мошин, 27 ҳолати итоат накардан ба талаботи корманди милитсия, 5 далели дар ҳолати мастӣ рондани мошин ва 2249  намуди дигари қоидавайронкуниҳо ошкор ва ҳуҷҷатгузорӣ гардиданд.

Мавриди зикр аст, ки аксарияти шаҳрвандон аз ҳаракатҳои ғайриқонунии худ хулосаи зарурӣ бароварда, соҳибони воситаҳои нақлиёти шахсӣ дар 203 автомашина шишаҳои сиёҳро ихтиёран тоза намуданд.

Дар баробари ин то ҳанӯз ҳастанд соҳибони воситаҳои нақлиёти сиёҳшиша, бе рақами қайди давлатӣ, ки қоидаҳои харакати роҳро вайрон намуда, ба саломатии сокинони шаҳри Хоруғ хатар эҷод мекунанд.

Бо ҳамин ҷурм рӯзҳои 2-юм ва 6-уми октябри соли равон сокинони шаҳри Хоруғ Имомназаров Соҳибназар Султонназарович бо ҷурми идора кардани воситаи нақлиёти сиёҳшишаи бе иҷозат, итоат накардан ба кормандони милитсия, нишон додани муқобилият ва гирифта гаштани лавозимоти ҷангӣ (2 корд ва 1 дона норинҷак), Додихудоев Муслим Ризвоншоевич ва Музаффаров Соҳибмамлюк Имомназарович бо ҷурми идораи воситаи нақлиёти сиёҳшишаи бе иҷозат, итоат накардан ва нишон додани муқобилият ба кормандони милитсия боздошт ва нисбати онҳо   бо моддаҳои 195, қисми 1 ва 328, қисми 1-и Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, номбурдагон ба ҳабси пешакӣ гирифта шуданд.

Аз ҷониби Ситоди байниидоравӣ муайян карда шуд, ки ба ҳолати имрӯза маблағҳои кредитии баргардониданашудаи бонкҳо дар маҷмӯъ 71 млн сомониро ташкил медиҳад, ки он ба ҶСК «Ориёнбонк» 1 млн 338 ҳазору 671 сомонӣ, «Амонатбонк» 4 млн 414 ҳазору 916 сомонӣ, «Аввалин бонки молиявии хурд» 3 млн 81 ҳазору 132 сомонӣ, «Агроинвестбонк» 13 млн 191 ҳазору 271 сомонӣ, «Тоҷиксодиротбонк» 48 млн 953 ҳазору 488 сомонӣ рост меояд.

Хонданд 192
Зарари иқтисодӣ аз офатҳои табиӣ дар Тоҷикистон афзоиш ёфтааст

Тибқи таҳлилҳои Созмони Миллали Мутаҳид шумори қурбониёни офатҳои табиӣ дар 20 соли охир ба 1.3 млн нафар расида, 4.4 млрд сокини дунё дар паи ин ҳодисаҳо ҷароҳат бардоштанд, хонаҳои худро аз даст доданд ва ё маҷбур шудаанд дар макони дигар паногоҳ дарёфт кунанд. Бо ин вуҷуд кам касоне зарарҳои иқтисодиро ба инобат мегирад, ки  тибқи ҳисобатҳо дуюним баробар афзоиш ёфта 2.9 трлн долари амрикоиро ташкил намуданд.

Муаллифони гузориши нави Дафтари Созмони Миллали Муттаҳид оид ба коҳиши хатари офатҳои табии (USRD) оид ба оқибатҳои иқтисодии офатҳои табиӣ иттилоотро аз соли 1998 то соли 2017 таҳлил намудаанд ва нишон доданд, ки эҳтимолияти фавт дар натиҷаи офатҳои табиӣ дар байни сокинони камбизоат дар муқоиса бо шаҳрвандони мамлакатҳои сарватманд ҳафт маротиба зиёдтар аст ва хатари ҷароҳати ҷисмонӣ, талафи манзил ё муҳоҷирати маҷбурӣ 6 маротиба зиёд мебошад.

Оқибатҳои иқтисодии офатҳои табиӣ дар кишварҳои камбизоат хеле харобиовар аст. Дар фаҳмиши умум, бузургтарин талафот дар кишварҳои рӯшдёфта, ба монанди  ИМА, Чин ва Ҷопон рух медиҳад. Аммо, агар мо ин хисоротро ҳамчун як қисми маҷмӯи маҳсулоти умумимиллии ин кишварҳо арзёбӣ кунем, тасвир ранги дигар мегирад.  Дар Ҳаитӣ (Гаити) ин нишондиҳанда ба 17,5 %, Ҳондурас (Гундурас) - 7 %, Куба - 4,6, дар Гурҷистон - 3,5 ва дар Тоҷикистон - 2,7 фоиз аз маҷмӯи маҳсулоти умумимиллиро ташкил медиҳад.

"Аз тағйирёбии иқлим бештар аз ҳама кишварҳое осеб мебинанд, ки аз онҳо ҳаҷми ҳадди аққали газҳои зарарасон ба фазо паҳн мегардад ", - мегӯяд профессор Дебарати Гу-Сапир, мудири Маркази тадқиқоти илмӣ дар самти эпидемиологияи офатҳои табиӣ. "Дар ҳамин ҳол талафоти иқтисодӣ дар кишварҳои даромади аҳолиашон кам ва миёна ба вазнинтарин оқибатҳо, ки ба рӯшди онҳо таъсир мегузорад оварда мерасонад."

Зарари иқтисодӣ аз офатҳои табииро дақиқ баҳогузорӣ кардан мушкил аст, зеро ҳамаи кишварҳои ҷаҳон чунин маълумотро ҷамъ намеоранд. Аммо, тибқи арзёбии Бонки ҷаҳонӣ, дар саросари дунё 520 миллиард доллари ИМА ва ҳар сол 26 миллион нафар дар сатҳи камбизоатӣ қарор мегиранд.

Дар ин ҷо гап  ҳам сари офатҳои табиӣ дар натиҷаи тағёирёбии иқлим ба вуҷуд оянда, (хушксолӣ, обхезӣ, гирдбод)  ва ҳам зуҳуроти геофизикӣ, ба монанди зилзилаҳо ва сунамиӣ меравад.  Ҳарчанд 77 дарсади талафоти иқтисодӣ аз офатҳои табиии гуруҳи аввал ба амал меоянд. Барои муқоиса, дар давраи 1978-1997. ин рақам танҳо 68 дарсад буд.

"Ҳисобот бараъло нишон медиҳад, ки зарари иқтисодӣ аз ҳодисаҳои фавқулоддаи обу ҳаво низ барои давлатҳо монеаи ҷиддие барои паст кардани сатҳи камбизоатӣ аст", - мегӯяд Мами Мисутори, сардори идораи коҳиши хатари офатҳои табиӣ.

Созмони Миллали Муттаҳид дар ин самт бо давлатҳо кор мебарад, то ки онҳо битавонанд маълумотҳои дақиқтар ҷамъоварӣ кунанд. Муаллифони тадқиқот қайд мекунанд, бо доштани тасаввуроти пурра дар бораи талафоти молиявӣ, ҳукуматҳо эҳтимол дорад, ки барои пешгирии офатҳои табиӣ тадбирҳо андешанд.

Манбаъ: СММ

Хонданд 379
Номаи як модар ба президент: «Ҷаноби олӣ, ману фарзандонамро аз зиндаҷудоӣ раҳонед»

Сокини ноҳияи Роштқалъаи ВМКБ ва модари чор фарзанд Шаҳло Хӯҷаназарова  бо навиштани як нома аз президенти Тоҷикистон хостааст, то барои соҳиб шудани як ҳуҷраи кӯчак ба ӯ кумак намояд. Ӯ дар як мактуби пур аз дард ба унвонии Эмомалӣ Раҳмон аз зиндагиии вазнини худ шикоят карда илтиҷо намудааст, то ӯро аз зиндаҷудоӣ бо фарзандонаш раҳо бахшад.

“...тӯли ин солҳо бидуни шавҳар фарзандонамро дар як шароити тоқатфарсои оилавӣ, яъне бидуни хонаи зист, танҳо калон кардам. Алъон фарзанди хурдиям дар синфи нӯҳ мехонад. Чун хонаи шаваҳарам ба номи холааш буд, пас аз вафоташ он ба мо нарасид ва мо бе макони зист мондем. Ҳоло оилаи мо дар чаҳор сӯй парешон аст ва ман ҳамчун модар наметавонам ҷигарбандҳоямро ҷамъ карда, зери боме зиндагӣ кунам”- менависед Шаҳло Хӯҷаназарова.

Мактуби ин сокини ноҳияи Роштқалъа ба роҳбари кишвар дар ҳоелет, ки  пештар аз ин маҳз  бо дахолати Дастгоҳи иҷроияи президент ба ӯ хона ҷой дода буданд, аммо он барои бунёди манзил тамоман мусоид нест. Ӯ аз ҷумла дар мактуби худ навиштааст: “Аз аҳволи хеш чандин маротиба ба ҳукумати ноҳияи Роштқалъа ариза дода будам, танҳо баъди дахолати Дастгоҳи иҷроияи президенти Тоҷикистон ба ман ҷой барои хона доданд, аммо дар мавзеъи санглохе, ки ҳар хоросангаш баробари як ҳуҷра мебошад”.

Ҳамчунин, ин зан дар мактуби худ аз муроҷиат ба Идораи хоҷагии нигаҳдории роҳҳои минтақаи Бадахшон ва посухи рад гирифтанаш хабар додааст. “…Ба  идораи хоҷагии нигаҳдории роҳҳои минтақаи Бадахшон барои кӯмак муроҷиат кардам, аммо булдозер надоданд. Гуфтанд ин сангҳоро таркондан даркор, зӯри трактор намерасад. Мутаассифона арзиши хизмати таркондан хеле гарон буда, иҷозати махсус мехостааст”. 

Ҳоло ин модари бехона аз президенти кишвар хоҳиш дорад, то барои соҳиб гаштани ақалан як ҳуҷра шахсан ба ӯ кӯмак намояд, зеро ба гуфти худаш дигар ба касе умед надорад.

"Аз Шумо бо сад илтиҷо хоҳиш мекунам, ки дар Хоруғ ё Роштқалъа, ақаллан барои соҳиби як ҳуҷраи кӯчак шудан ба мо кӯмаки хешро бирасонед. Дигар аз касе умед надорем!.”

Матни пурраи мактуби Шаҳло Хӯҷаназарова ба Президент:

Ба Пешвои миллат, Асосгузори сулҳу ваҳдат, Президенти Ҷумҳурии Тоҷикистон,  Ҷаноби олӣ, мӯҳтарам Эмомалӣ Раҳмон.

Аз сокини ноҳияи Роштқалъаи ВМКБ,  модари чаҳор фарзанд,.

АРЗИ ҲОЛ

Ҷаноби Олӣ, бо ин номаи хеш ба Шумо арз менамоям, ки ман модари чаҳор фарзанд, тӯли ин солҳо бидуни шавҳар фарзандонамро дар як шароити тоқатфарсои оилавӣ, яъне бидуни хонаи зист танҳо калон кардам. Алъон фарзанди хурдиям дар синфи нӯҳ мехонад. Чун хонаи шаваҳарам ба номи холааш буд, пас аз вафоташ он ба мо нарасид ва мо бе макони зист мондем. Ҳоло оилаи мо дар чаҳор сӯй парешон аст ва ман ҳамчун модар наметавонам ҷигарбандҳоямро ҷамъ карда, зери боме зиндагӣ кунам. Аз аҳволи хеш чандин маротиба ба ҳукумати ноҳияи Роштқалъа ариза дода будам, танҳо баъди дахолати Дастгоҳи иҷроияи Президенти Тоҷикистон ба ман хонаҷой доданд. Аммо дар мавзеъи санглохе, ки ҳар хоросангаш баробари як ҳуҷра мебошад. Ба Идораи хоҷагии нигаҳдории роҳҳои минтақаи Бадахшон барои кӯмак муроҷиат кардам, аммо булдозер надоданд. Гуфтанд ин сангҳоро таркондан даркор, зӯри трактор намерасад. Мутаассифона арзиши хизмати таркондан хеле гарон буда, иҷозати махсус мехостааст.

Хулоса хона сохта наметавонистам. Алъон як писарам дар Роштқалъа, писари дигарам дар Бартанг ва ману ду фарзанди дигарам, ки дар Хоруғ иҷоранишин будем, ба сабаби беэҳтиромӣ аз ҷониби соҳибхона онро тарк карда, ҳоло тамоман парешон ҳастем. Наметавонем бо ҳам зери як боме чун як оила зиндагӣ кунем. Чун модар дигар ин вазъиятро тоқат карда наметавонам. Аз Шумо бо сад илтиҷо хоҳиш мекунам, ки дар Хоруғ ё Роштқалъа, ақаллан барои соҳиби як ҳуҷраи кӯчак шудан ба мо кӯмаки хешро бирасонед. Дигар аз касе умед надорем.

Бо эҳтироми беандоза ва умеду боварӣ ба Шумо Шаҳло Хӯҷаназарова

ш. Хоруғ, 10 октябр 2018

Хонданд 1669

Хабари-рӯз

Минбари сардабир

  • симКАРта

    Дар ҳафтае, ки гузашт, дар шабакаҳои иҷтимоӣ ин калима аз…

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.