.

Alternative flash content

Requirements

Get Adobe Flash player

Слайд

Барф дар Бадахшон ба 75 см расида, роҳҳоро бастааст

Қитъаи роҳ дар роҳи сатҳи байналмилалии Хоруғ-Душанбе ба далели боришоти беисти барф дар шабонарӯзи охир баста шуда, ҳаракати нақлиёт мутаваққиф гардидааст.

Раёсати Кумитаи ҳолатҳои фавқулода ва мудофиаи граждании ВМКБ иттилоъ медиҳад, ки роҳи сатҳи байналмилалии Хоруғ-Душанбе дар ҳудуди ноҳияҳои Дарвозу Рӯшон ва Шуғнон бинобар сабаби фаромадани тармаю кӯҳпораҳо баста мебошад.

Ҳамчунин, роҳҳои Хоруғ-Ишкошим ва Хоруғ-Мурғоб низ банд шуда, бориши бошиддати барф дар ҳудуди вилоят  идома дорад.

Гуфта мешавад, ки ғафсии қабати барф дар маркази маъмурии вилоят шаҳри Хоруғ 35 сантиметрро ташкил медиҳад. Дар маҷмӯъ ғафсии қабати барф дар вилоят то ба 75 сантиметр расида,боисии ташвиши сокинон гардидаст. Дар айни замон бошандагон ба тоза кардани бомпӯшҳои биноҳои истоқоматӣ машғул мебошанд.

Дар ҳудуди Ҷамоати деҳоти Ғарибшоҳ Шаҳбозови ноҳияи Шуғнон болопӯши ҳафт манзили истиқоматӣ хароб гардида, ҳар лаҳза фаромадани тарма дар роҳҳо аз эҳтимол дур нест.

Хонданд 649
Ҷонибек Муродов ба Қадами Қурбон клип ваъда кард

Сарояндаи маъруфи Тоҷикистон Ҷонибек Муродов, молики ширкати “ҶМ компания”, ба мухлисони сарояндаи зарифи тӯйҳо Қадами Қурбон ваъда кард, ки бо иштироки ӯ як клип забт хоҳад кард.

Дирӯз дар муроҷиати видеоӣ худи Ҷонибек Муродов ин хабарро дар ҳоле расонд, ки сари як миз бо Қадами Қурбон менишаст. Ӯ гуфт, ки то ҷашни Наврӯз ин клип омода ва пешкаши тамошобинон хоҳад шуд.

Қадами Қурбон, омӯзгори мусиқии як мактаб дар Сари Чашмаи ноҳияи Шамсиддини Шоҳин аст, ки дар тӯйҳо бо сурудҳои шӯх табъи ҳозиринро болида мегардонад. Вақтҳои охир атрофи номи ӯ сару садоҳо зиёд шуданд. Ӯро барои нақзи қонуни танзим ҷарима ҳам карданд. Худи Қадами Қурбон дар сӯҳбат дар шабакаи иҷтимоии Youtube низ вайрон кардани қонуни танзимро тасдиқ кард. Дар ин забти нимсоата ин ҳунарманд хоксору самимӣ будани худро намоиш медиҳад ва ин сӯҳбати ӯ боис шуда, ки назари аксари мардум ба шахсияти Қадами Қурбон тағйир кунад. Ҳоло ӯ аз маҳбубтарин ситораҳои тоҷикӣ дар Youtube  ба шумор меравад. 

Хонданд 274
Дуздҳое, ки шабона шишаҳои мошинҳоро мешикастанд, дастгир шудаанд

Вақтҳои охир аз беназорат будани автомашинаҳо дар назди баландошёнаҳо истифода карда, нафарони ҷиноятпеша шабона бо шикастани шишаи мошинҳо аз дохили он маблағҳои пулию телефони мобилӣ, аккамулятору дигар қисмҳои эҳтиётӣ ва ҳар ашёи арзишмандро медуздиданд.

Ин ҷиноятҳо дар ҳудуди пойтахт шаҳрвандонро ба ташвиш гузошта, ба кормандони милитсия муроҷиат кардаанд. Маркази матбуоти ВКД хабар медиҳад, ки аз ҷониби кормандони милитсияи пойтахт муайян ва ошкор карда шуд, ки як гурӯҳ ҷавонон даст ба чунин кирдорҳои ғайриқонунӣ задаанд.

Аз ҷумла, дар гурӯҳи аввал кормандони милитсияи пойтахт дар ҳудуди ноҳияи Сино як нафар пешсудшуда, шаҳрванд Полвонов Диловар Зафарович, соли таваллудаш 1998, сокини шаҳри Ҳисор, ҷамоати деҳоти М.Ризоро санаи 8 январи соли 2019 шабона ҳангоми содир намудани ҷинояти навбатӣ дастгир кардаанд. Номбурда дар рӯй ниқоб пӯшида, бо мурваттобу болға мусаллаҳ гашта, дар ҳудуди кӯчаи Испечаки ноҳияи Сино силсилаҷиноятҳои дуздиро содир кардааст. Ӯ асосан воситаҳои нақлиёти ҷамъиятии тамғаи «Мерседес-Спринтер»-ро мавриди дуздӣ қарор дода, аз дохили зиёда аз 15 воситаи нақлиёт маблағҳои пулӣ ва телефонҳои мобилиро рабудааст.

Дар ҳудуди ноҳияи Сино гурӯҳи дуюм дар ҳайати ду нафар, шаҳрвандон Наврӯзи Шералӣ, соли таваллудаш 1993, сокини ноҳияи Шамсиддин Шоҳин ва Валиев Фирӯз, соли таваллудаш 1997, истиқоматкунандаи ноҳияи Восеъро ҳамчун гумонбар дар содир намудани як қатор ҷиноятҳои дуздӣ санаи 3 январи соли 2019 дастгир шудаанд. Номбурдагон асосан дар ҳудуди маҳаллаи Гипрозем, кӯчаҳои Ҷомӣ ва Расулов, шабона бо маслиҳати пешакӣ бо тариқи шикастани шишаи воситаҳои нақлиёт маблағҳои пуливу дигар ашёҳои арзишмандро рабудаанд. Инҳо дар содир намудани 21 ҳолати ҷинояти дуздӣ гумонбар дониста шуда, зарари ба шаҳрвандон расонидаи онҳо зиёда аз 20 ҳазор сомониро ташкил медиҳад.

Гурӯҳи сеюми ҷиноятӣ дар ҳудуди ноҳияи Фирдавсӣ, низ дар ҳайати ду нафар ҷинояткор, шаҳрвандон Шарипов Толиб Ҷумаевич, соли таваллудаш 1995, истиқоматкунандаи шаҳри Душанбе, кӯчаи Фирдавсӣ ва Алиев Бахтиёр Неъматович, соли таваллудаш 1998 истиқоматкунандаи шаҳри Душанбе, кӯчаи Деҳотӣ санаи 8 январи соли ҷорӣ бо гумони содир намудани ҷинояти дуздӣ дастгир карда шудаанд. Онҳо танҳо дар як шаб шишаи 6 мошинро шикаста маблағҳои пуливу дигар ашёҳои арзишмандро дуздидаанд.

Тибқи таҳлилҳо танҳо давоми 8 рӯзи аввали соли 2019 аз ҷониби кормандони милитсияи пойтахт 42 ҳолати шикастани шишаи автомашинаҳо ва рабудани ашёву маблағҳои пулӣ аз ҷониби нафарони ҷиноятпеша ошкор карда шуда, корҳои тафтишотиву чорабиниҳои оперативӣ-ҷустуҷӯӣ дар ин самт идома доранд.

Хонданд 264
Вахш: Ба доди табибон кӣ мерасад?

Фарсудагии таҷҳизоти тиббӣ ва ҷудо накардани маблағ барои таъмири Беморхонаи марказии ноҳияи Вахш нигаронии табибонро ба бор овардааст. Муддати се соли охир барои таъмири бинои беморхона аз буҷети мақомоти маҳаллии ноҳия тамоман маблағ ҷудо намегардад.

Дар даврони соҳибистиқлолӣ дар мамлакат даҳҳо муассисаи табобатии муосири муҷаҳҳаз бо таҷҳизоти зарурӣ сохта шуд, ки ин аз рушди соҳаи тандурустӣ дарак медиҳад. Вале дар ноҳияи Вахш ба ин соҳа чандон аҳамият дода намешавад. Бинои беморхонаи марказии ноҳия се сол аст, ки таъмир намешавад ва имрӯз ҳоли табоҳ дорад.

Ба гуфтаи иҷрокунандаи вазифаи сардухтури беморхонаи мазкур Амиралӣ Сафаров, барои таъмири бинои беморхона аз тарафи буҷет беш аз 3 сол аст, ки маблағ ҷудо намекунанд. Ҳоло беруни бино ба таъмиру бозсозӣ ниёз дорад. Вале, ба замми ин мушкилӣ, табибони беморхона ба корафтодагон хизмати тиббӣ расонида истодаанд.

Манбаъ инчунин нигаронӣ аз он кард, ки аз ҳама чизи ташвишовар дар ин беморхона фарсудагии таҷҳизоти тиббӣ ва норасоии онҳо мебошад. Гуфта шуд, ки таҷҳизоти ин беморхона аз солҳои 1976 мебошанд ва имрӯз ба талабот ҷавобгӯ нестанд. Изҳори ташвиш аз он рафт, ки ба ин беморхона танҳо шахсони камбизоат меоянд. Зеро сокинони доро мехоҳанд дар шароити хуб беморонашонро табобат намоянд. Аммо ин шароитро беморхонаи мазкур надорад.

- Беморхонаи марказии ноҳияи Вахш дорои 225 кати хоб мебошад, ки дар ин давра ба беш аз 5 ҳазор беморон хизмати тиббӣ расонидааст,- афзуд ҳамсуҳбати мо.

Дар ҳамин ҳол, мудири шуъбаи эҳёгарии беморхонаи мазкур Шариф Ашӯралиев бо изҳори ташвиш афзуд, ки «мо - табибон аз ноилоҷӣ таҷҳизоти асри гузаштаро истифода мебарем. Дигар чора нест. Умеди ягонаи мо дастгирии молиявии Бонки рушди Олмон аст. Аз ҷониби намояндагони ин бонк ваъда шудааст, ки бояд бинои беморхона таъмир шавад».

Ҳамчунин, ҳамсуҳбати мо гуфт, ки «орзуи ягонаи мо - табибон - ин муҷаҳҳаз сохтани беморхона бо муосиртарин таҷҳизоти тиббӣ аст, ки инро низ ваъда кардаанд. Мо низ монанди табибони беморхонаҳои дигар мехоҳем беморонро дар шароити хуб табобат намоем».

Барои фаҳмидани сабаби ҷудо накардани маблағ давоми се соли охир ба беморхонаи марказии ноҳия ба Раёсати молияи ноҳия рафтем. Аммо сардорро дар ҷойи кор пайдо накардем. Хостем бо муовини он суҳбат намоем. Аммо ӯ гуфт: «Ман бе иҷозати роҳбар суҳбат намекунам». Ин баҳонаест, ки бисёр зердастон ҳангоми муроҷиати журналистон пеш меоранд ва аз посух ба суолҳо мегурезанд. 

Тариқи суҳбати телефонӣ аз раиси ноҳияи Вахш Шарбатуллои Азизулло дар мавриди ҷудо накардани маблағ давоми се сол барои таъмири бинои беморхонаи марказӣ пурсон шудем. Ӯ гуфт: «Ҳамасола мувофиқи хароҷотнома (смета) аз буҷети ноҳия маблағ барои таъмири бино ҷудо карда мешавад. Аммо ин маблағ кам аст. Мо ду сол боз талош дорем беморхонаро бо дастгирии Бонки рушди Олмон таъмир намоем ва дар ин баробар таҷҳизоти муосирро ба беморхона ворид созем. Оғози таъмири бино аз аввали соли 2019 дар назар гирифта шудааст».

Дар ҳамин ҳол, сардори Раёсати тандурустии вилояти Хатлон Маллазода Сайдуло низ қайд намуд, ки дар вилоят чанд бинои беморхонаҳо таъмирталаб мебошанд: «Мо кӯшиш намуда истодаем, ки онҳоро то ҷашни 30-солагии Истиқлолияти давалтии кишвар аз таъмири асосӣ барорему шароити хизматрасониро барои беморон хуб намоем. Аз ҳоли Беморхонаи марказии ноҳияи Вахш мо ба хубӣ огоҳ ҳастем ва дар соли 2019 бинои беморхона аз ҷониби Бонки рушди Олмон таъмири асосӣ шуда, бо муосиртарин таҷҳизоти тиббӣ муҷаҳҳаз гардонида мешавад».

Муовини сардухтури Беморхонаи марказии ноҳияи Вахш Амиралӣ Сафаров бошад, бо нигаронӣ гуфт, ки «аз харобии бинои беморхона ва фарсудагии таҷҳизоти тиббӣ мақомоти иҷроияи ҳокимияти давлатии ноҳия, Раёсати тандурустии вилоят ва ҳатто Вазорати тандурустӣ ва ҳифзи иҷтимоии аҳолии Ҷумҳурии Тоҷикистон огоҳанд. Ҳамеша ба мо ваъда медиҳанд, ки кӯмак мекунем. Аммо ваъдаҳо кай иҷро мешаванд, намедонем».

 

Раҳмоналӣ ДОДАРХӮҶАЕВ, «ФАРАЖ»

Хонданд 258
  •  << 
  •  < 
  •  1 
  •  > 
  •  >> 

Хабари-рӯз

Минбари сардабир

  • ДАВоДАВ

    Масофаи роҳ бо машинае, ки 150 ҳазор доллар нарх дорад…

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.