.

Alternative flash content

Requirements

Get Adobe Flash player

Слайд

Вахш: Касе масъулияти партовгоҳҳоро ба зимма намегирад

Дар маркази ноҳияи Вахш назди биноҳои истиқоматӣ партовгоҳҳои зиёде мавҷуданд, ки ба гуфти сокинони ноҳия моҳҳо тоза карда намешаванд ва аз буйи ғализи онҳо нафас кашидан душвор аст.

Ин ҳолатро рузи 8-ноябри соли 2018, зимни як сафари корӣ, дар маркази маъмурии ноҳияи Вахш мушоҳида ва аксбардори кардем.

Партовҳое, ки дар маркази ноҳияи Вахш мавҷуданд,  гирду аторофашон маҳкам набуда, қутиҳои партов  дар онҳо дида намешаванд. 

Ин ҳолат боиси сар задани ҳар гуна бемориҳои сироятӣ мегардад, зеро кӯдакони биноҳои баландошиён ҳамаруза дар назди чунин ғарави партов ба бозӣ мағуланд.

Барои огаҳӣ пайдо кардан, ки чаро ин партовгоҳҳо тоза намешаванд, ба корхонаи манзилию коммуналии ноҳияи Вахш роҳсипор шудем, аммо роҳбари ин корхонаро дар утоқи кориаш пайдо кардан натавонистем.

Пас аз тамосҳои бешумори тилфонӣ ӯро дар кӯча пайдо кардем ва ӯ гуфт, дар ихтиёри корхонааш 16 нуқтаи партов мавҷуд аст, ки онҳо ба навбат тоза карда мешаванд.

Барои рӯшанӣ андохтан ба мавзӯъ ба назди сардори маркази назорати давлатии санитарию эпидемиологии ноҳия низ рафтем ва ӯро низ дар ҷойи кораш наёфем. Роҳбари ин марказ дар тамоси тилфонӣ гуфт, ки  нигоҳубини партовгоҳҳо ба зимаи онҳо нест.

Барои рафъи мушкилии ҷойдошта ва тоза намудани партовҳо масъулини идораҳои дахлдорро зарур аст, ки саривақт ҷораҷӯӣ намоянд,  зеро саломатии инсон аз ҳама ҷизи гаронарзиш аст.

Раҳмоналӣ Додархӯҷаев

Хонданд 108

Дӯстиро ҷустуҷӯ дорем мо!

Нояб 07, 2018
Хонданд: 107
Дӯстиро ҷустуҷӯ дорем мо!

Пас аз чандин соли интизориҳои халқҳои тоҷику ӯзбек моҳи марти соли 2018 байни ду давлати дӯсту бародар - Тоҷикистону Ӯзбекистон марҳилаи сифатан нави ҳамкориҳои  судманд оғоз гардид, ки дар таърихи даврони соҳибистиқлолии ин кишварҳои собиқ шӯравӣ назир надошту надорад. 

Дигаргуниҳое, ки дар таҳкими муносиботи дӯстонаи ду кишвар иттифоқ афтод, арзишҳои дӯстиву ҳамсоядории накуи мардумони тоҷику ӯзбекро ба асли хеш баргардонд ва исбот намуд, ки ба қавли бузургон “об агар садпора гардад, боз бо ҳам ошност”. Воқеан тоҷикону ӯзбекҳо таърихан дӯсту бародар буда, тамаддуни муштарак доранд.

Ифтитоҳи гузаргоҳҳои сарҳадӣ ва таъмини рафтуомади бемонеаи шаҳрвандони ду кишвар ба қаламрави якдигар суруру шодмониҳои зиёдеро ба бор овард, ки аз баракати сиёсати некбинонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон муҳтарам Шавкат Мирзиёев рақам зада мешавад.

Президенти Ҷумҳурии Тоҷикистон муҳтарам Эмомалӣ Раҳмон изҳор доштанд, ки «Мо масъалаҳои ҳифзи мероси маънавӣ ва фарҳангии ду халқи бародар ва фароҳам овардани шароити мусоид барои ба роҳ мондани робитаҳои миёни ходимони фарҳангӣ, илмӣ ва маорифро баррасӣ намудем».

Маҳз татбиқи амалии ин гуфтаҳои Пешвои муаззами миллат Эмомалӣ Раҳмон буд, ки имрӯз ман – як духтари оддии деҳотӣ, хатмкардаи МТМУ №12-и ҷамоати деҳоти Мастчоҳи ноҳияи Мастчоҳ дар Академияи олии тиббии шаҳри Тошкенти Ҷумҳурии Ӯзбекистон таҳсил намуда истодаам. Таҳсил берун аз ватан ва падару модару хешу табор, албатта, каме мушкил аст, дилам ба ёди волидайну дӯстон ва устодону ҳамсинфон гум мезанад, вале ифтихор дорам, ки ман аввалин ва ҳоло ягона духтари масчоӣ ҳастам, ки бо шарофати сиёсати пурфайзи сарони ду давлати дӯсту ҳамсоя дар Ҷумҳурии Ӯзбекистон таҳсил менамоям. Дар ин ҷо, дар шаҳри Тошкент мардум моро эҳиром мекунанд, устодону ҳамкурсон ҳамеша оид ба дӯстии абадии як халқу ду миллати бузург – тоҷикону ӯзбекҳо сухан мегӯянд. Сафорати Тоҷикистон дар Ӯзбекистон барои шаҳрвандону донишҷӯёни кишвар таваҷҷуҳи ҳамешагӣ равона кардааст ва дар ҳамаи масоил ба эшон дасти ёриву мадад дароз мекунад. Махсусан, сафири муҳтарами мо дар ҷумҳурии бародарии Ӯзбекистон Имоми Содиқ мунтазам аз ҳоли мо – донишҷён бохабар мешаванд ва ҳамеша таъкид мекунанд, ки шумо, донишҷӯён, намояндаҳои фарҳанги Тоҷикистон маҳсуб меёбед, аз ин рӯ кӯшиш намоед, ки бо рафтору таҳсили худ намунаи ибрат ва номбардори ватани азизи хеш бошед. Маҳз дастгирии сафири муҳтарам буд, ки ман дар як муддати кутоҳ раводиди донишҷӯиро дастрас намуда, саривақт ба дарс ҳозир шудам.

Имрӯзҳо дар тамоми кишвари азизи мо барои истиқболи сазовори 30-солагии Истиқлолияти давлатии Ҷумҳурии Тоҷикистон иқдомҳои наҷиб амалӣ мешаванд, корҳои созандагию бунёдкорӣ дар авҷанд.  Бо ташаббуси раиси муҳтарами вилояти Суғд  Раҷаббой Аҳмадзода дар қаламрави вилоят 1300 рӯзи меҳнати зарбдор ба истиқболи 30-солагии Истиқлолияти давлатии Ҷумҳурии Тоҷикистон эълон гардидааст, ки воқеан ҳам ҳар фарди ватандӯстро ба ободкорию созандагӣ таҳрик медиҳад. Сокинони ноҳияи Мастчоҳ низ бо дили гарму азми қавӣ ташаббусҳои созандагиро дастгирию пайравӣ намуда, ҳар яке бо қадри имкону тавон дар ободии диёри худ саҳм мегузоранд.

Ман низ дар қатори дигар ҳамдиёрони бунёдкори худ тасмим гирифтам, ки аз ҳисоби маблағҳои стипендияи президентӣ, ки ба гирифтани он ҳангоми таҳсил дар синфи 11 мушарраф шуда будам ва дастгирии падари азизам, ки худ низ дастпарвари МТМУ №12 мебошанд, маҷлисгоҳи ин муассисаи таълимиро, ки солҳо ноободу зери барфу борон буд,  аз таъмири куллӣ баровардем, ки дар арафаи Рӯзи Конститутсияи Ҷумҳурии Тоҷикистон ба истифода дода шуд.

Бо зикри  ин нукта мехоҳам бигӯям, ки ин ҳама ободиҳо, хурсандиҳо, дастовардҳои соҳаҳои мухталиф ва аз ҳама муҳим оғози муносиботи дӯстонаи байни ду давлати ҳамсоя, шарики стратегӣ эълон шудани Тоҷикистону Ӯзбекистон аз баракати Истиқлолияти давлатӣ ва сиёсати хирадмандонаи Аосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад. Мо насли даврони истиқлол бояд ба қадри ин ҳама неъматҳои бузург бирасем ва шукрона кунем, ки чунин Ватан, чунин Пешвои бузург ва давлати қавӣ дорем. Зинда бод Тоҷикистони озоду соҳибистиқлол, поянда бод дӯстии бародаронаи авлоди Ҷомию Навоӣ!

Дӯстиро ҷустуҷӯ дорем мо,

Аз амонӣ гуфтугӯ дорем мо!

Ҳангомаи АЗИЗЗОДА,

донишҷӯи Академияи тиббии шаҳри Тошкент

Хонданд 107

Сарбоз 13 сол зиндонӣ шуд

Нояб 03, 2018
Хонданд: 578
Сарбоз 13 сол зиндонӣ шуд

Суди гарнизони ҳарбии шаҳри Хоруғ пас аз баргузории 2 мурофиаи озод бо ҳузури сарбозону афсарони зиёди қисмҳои низомӣ дар саҳни бинояш Абдуллоев Бахтовар Нуралиевич - як сарбози Қӯшунҳои марзбониро дар латукӯб ва ба ҳалокат расонидани ҳамхизматаш Ёдгорзода Абдуқаюм гунаҳгор дониста, ба 13 соли зиндони низомаш шадид маҳкум кард.

Ин мурофиаҳои судӣ рӯзҳои 24 -ум ва 25-уми октябр баргузор шуданд.

Фоҷиа ду моҳ қабл, 20-уми август, дар арафаи Иди Қурбон дар дидбонгоҳи 11-уми қисми ҳарбии Қӯшунҳои сарҳадии КДАМ дар минтақаи Язғуломи ноҳияи Ванҷ рух дод ва пас аз санҷиши ҳолати кор ва ҷои ҳодиса, Прокуратураи ҳарбии гарнизони Хоруғ бо ду моддаи Кодекси ҷиноятии ҶТ -373 қ. 2, банди “д” «Вайрон кардани қоидаҳои оинномавии муносибатҳои  байниҳамдигарии хизматчиёни ҳарбӣ дар ҳолати набудани тобеияти хизматӣ дар байни онҳо» ва 110 қ. 3, «Қасдан расонидани зарари вазнин ба саломатӣ» банду баст карда, ба суд ирсол намуд. Ин моддаҳои Кодекси ҷиноятӣ ба шахси гунаҳкор аз 5 то 10 ва аз 12 то 15 соли зиндонро пешбинӣ мекунад.

Марҳум Ёдгорзода Абдуқаюм баҳори соли равон ихтиёрӣ аз Комиссариати ҳарбии ноҳияи Панҷи вилояти Хатлон ба сафи Қувваҳои мусаллаҳи кишвар сафарбар гардидааст. Ҳамхизмати ӯ Абдуллоев Бахтовар бошад, зодаи маҳаллаи Заҳматободи ноҳияи Исмоили Сомонии шаҳри Душанбе аст ва шаш моҳ қабл аз марҳум ба аскарӣ рафтааст.

Кӯшиши зиёди гирифтани тамос ва фаҳмидани ҷузъиёти ҳодиса бо баррасикунандаи парванда, судя Манзаршо Ошурбек бенатиҷа анҷом ёфт, аммо тибқи иттилои як манбаъ аз прокуратураи ин гарнизон, судшаванда иқрор шудааст, ки амали латукӯби ҳамхизматашро бар пояи дашному ҳақорат ва гирифтани қасос анҷом додааст ва аз карда пушаймон аст.

 

Ҳодиса чӣ гуна рух додааст?

Ёдгоров Шаша, падари марҳум Абдуқаюм, пас аз иштирок дар мурофиаи судӣ дар суҳбати телефонӣ иброз дошт, ки “Судшаванда дар мурофиа гуфт, ҳамхизматаш, яъне писари ман, гӯё ӯро дашном дода бошад ва барои ин амалаш худсарона хостааст ӯро ҷазо диҳад:

-Абдуллоев гӯё гуфтааст, ки як сӯзан биёрад, то ҷои даридаи шимашро бидӯзад, вале Абдуқаюм нофармонӣ кардасту онтарафтар рафта, дашном додааст. Пас аз ин, ӯ нақшаи гирифтани қасосро кашидааст. Рӯзи 20-уми август, сарбозҳо барои Иди Қурбон тайёрӣ дида, картошка тоза мекардаанд ва Абдуқаюм сатили партовро ба партовгоҳ бурдааст. Ин замон Бахтовар аз қафои Қаюм рафтаасту дар паси девор ӯро латукӯб кардааст,- гуфт падари марҳум Абдуқаюм.

Бино ба эътирофи судшаванда Абдуллоев, ки дар сухани охиринаш иброз доштааст, ӯ ҳамхизматашро ба девор рост карда, як мушти сахти ногаҳонӣ ба гулӯ - роҳи нафасаш задааст. Пас аз он ки Ёдгорзода хам шудааст, боз чанд мушти дигар ба пушти гардан ва сараш задааст. Ҳамин тавр, ӯ ба замин афтидааст.

-Пас аз он ки Абдуллоев мебинад, роҳи нафаси Абдуқаюм баставу кабуд шудааст, ба дигарон хабар медиҳад, ки аллакай дер шудааст,-гуфт падари Абдуқаюм, замоне, ки гиря дар гулӯяш дармемонд.

 

Наздикони Абдуллоев: Ӯ ин коррро накардааст, онро ба сараш бор кардаанд

Эътирофи гуноҳ ба марги ҳамхизматаш аз ҷониби сарбоз Абдуллоев Бахтовар дар ҳолест, ки наздиконаш бовар надоранд, ӯ ин ҷиноятро содир карда бошад. Онҳо аз ӯ ҳамчун як бачаи оромтабиат, камгап ва хушахлоқ тавсиф мекунанд.

Барои огоҳӣ ва шиносоӣ аз вазъи хонаводагии оилаи Абдуллоевҳо сӯи маҳаллаи Заҳматободи ноҳияи Исмоили Сомонӣ, ки дар талу теппаҳои шимолии шаҳри Душанбе ҷойгир аст ва яке аз маҳаллаҳои сераҳолӣ ба шумор меравад, роҳ пеш гирифтем.

Тавре аз мушоҳидаҳо бармеояд, оилаи Абдуллоевҳо хонаводаҳои доро ва сарватманд нестанд ва дар як гӯшаи баланди ин маҳалла зиндагӣ доранд.

Ин хонавода аз панҷ нафар: 4 писар ва 1 духтар иборат аст. Нуралӣ Абдуллоев, падари оила, дар ҳар сохтмоне, ки рост ояд, кор карда, барои таъмини хонавода қути лоямуте ба даст меорад. Модар бошад, дар идораи давлатие ба ҳайси фаррош фаъолият мекунад.

Бародари калонии Бахтовар - Қурбон Абдуллоев 25 сол дорад ва ӯ низ мегӯяд, сохтмончӣ аст, вале ҷои кори аниқ надорад. Гоҳ-гоҳ дар сохтмонҳо кор пайдо карда, иҷро мекунад.

Бино ба гуфтаи Қурбон, Бахтовар 19 сол дорад ва ихтиёран ба хизмати аскарӣ рафтааст.

-Ӯ пас аз хатми синфи 9 дар мактаби ронандагӣ таҳсил карда, соҳиби шаҳодатнома гардид. Тӯли як сол ба ҳайси “почталён” кор кард. Ягон ҳаракати ноҷо, ҷангу ҷанҷол намекард, оромтабиат буд. Бо хоҳиши худаш ба Комиссариати ҳарбии ноҳияи Исмоили Сомонӣ ариза дода, ба хизмат рафт. Доим занг зада, гап мезадем. Тӯли як соли хизматаш ягон гапу хабари зиёдатӣ набуд. Намедонам, чӣ сабаб шуд, ки ба чунин амал даст задааст. Ман гумон мекунам, ки ин амали нангинро нафари дигар содир кардааст ва ба сари додари ман бор кардаанд. Ҳеҷ гоҳ одам бо як мушт намемурад. Бино ба хабарҳо, аскари марҳум “приступ”-и дил доштааст, -гуфт бародари Бахтовар.

Номбурда сабаби дар мурофиаи судӣ иштирок накарданашонро ба вазъи иқтисодии оила рабт дод ва гуфт, “Вақте ки мурофиаи аввалинаш дар рӯзи 16-уми октябр таъйин гардида буд, модар ва холаам рӯзи 15-ум ба шаҳри Хоруғ  рафтанд. Бемасъулиятии кормандони судро бинед, як рӯз пеш аз мурофиа хабар доданд, ки мурофиа ба як ҳафта қафо монда шуд. Ин вақт модарам аллакай дар ними роҳ ба Хоруғ буд. Вазъи зиндагии мардумро фикр накарданд, нагуфтанд, ки роҳи каму андаке нест, ақаллан ду рӯз пеш бояд моро огоҳ месохтанд. Ба ҳар ҳол модару холаам аз роҳ нагаштанд, рафта Бахтоварро диданд ва ду рӯз баъд баргаштанд. Барои 10 рӯз дар он ҷо мондан маблағи зиёд даркор аст”, - гуфт Қурбон Абдуллоев.

Раиси маҳаллаи Заҳматобод Зафаралӣ Исмоилов низ аз Бахтовар ҳамчун як нафари оромтабиат тавсиф кард ва гуфт, дар корҳои ҷамъиятии маҳалла ҳамеша фаъол будааст.

-Ӯ бо хоҳиши худаш ба хизмат рафт ва то ин вақт хонда, шаҳодатномаи ронандагӣ ҳам гирифт ва тӯли қариб ду сол ба ҳайси “почталён” (номарасон) ҳам кор кард. Хеле бачаи орому ботамкин буд. Сатҳи зиндагӣ ва вазъи иқтисодии оилаашон мисли оилаҳои зиёди маҳалла миёна аст. Ба рӯйхати оилаҳои камбизоат низ шомиланд. Касе бовар надошт, ки чунин ҳолат бо Бахтовар рух медиҳад. Ҳамсояҳо то рӯзи ба хизмат рафтанаш аз ӯ ягон шикоят накардаанд, овози баланд ва суханони қабеҳ ҳам нашунидаанд, - гуфт раиси маҳаллаи Заҳматобод Исмоилов З.

Мутаассифона, бо сабаби дар кор будани падару модари ин хонавода натавонистем бо эшон суҳбат кунем ва назарашонро вобаста ба ин қазия бифаҳмем, аммо бародари дигари Бахтовар, Бахшулло Абдуллоев, ки дар як корхонаи хиштбарорӣ боркаш шуда кор мекунад, дар як тамоси телефонӣ аз ҳукми содиркардаи судя изҳори норозигӣ кард ва гуфт, пас аз дастрас кардани нусхаи он ҳатман ба зинаҳои болоии судӣ муроҷиат хоҳанд бурд.

 

Падари Абдуқаюм: Дигар чӣ кор ҳам кунем? Аз ҳукм розием.

Норозигии наздикони Бахтовар аз ҳукми суд дар ҳолест, ки падари Абдуқаюм дар як тамоси телефонӣ ҳангоми бозгашт аз Хоруғ гуфт, аз ҳукм розӣ аст:

-Дигар чӣ кор кунем, писарамро зинда карда намешавад. Касе ҷиноят кардааст, бигузор ҷазояшро гирад. Прокурор 15 сол пурсид, вале судя барои худиқрорӣ ва пушаймонӣ 2 солашро кам кард, - гуфт падари марҳум Абдуқаюм.

 

Шикояткунанда «буз» аст?

«Дедовшина» ё сарбозозорӣ қонуни нонавишта ва падидаи номатлуб дар қисмҳои ҳарбии Тоҷикистон буда, аз замони Шӯравӣ мерос мондааст. Дар аксар ҳолатҳо он сарбозон, хусусан навскаронро, ҳатто ба худкушӣ оварда мерасонад ва онҳо наметавонанд ба афсаронашон шикоят баранд.

Бино ба қавли онҳое, ки аллакай хизмати аскариро ба анҷом расонида, ба ҳаёти мулкӣ баргаштаанд, шикояткунандаро дар қисми ҳарбӣ «буз» меноманд, ҳатто агар ҷабрдида мавриди латукӯб ва азоби тоқатфарсои «дед»-ҳо ҳам қарор гирифта бошад. Бинобар ҳамин, наваскарон кӯшиш мекунанд, ба ҳама азобу шиканҷаи хизмат тоб биёранд, то ин тахаллуси нангинро ба худ нагиранд. Дар ҳамин ҳол, фаъолони ҷомеаи шаҳрвандӣ бар ин назаранд, ки маҳз ҳамин падидаи номатлуб монеи ихтиёрӣ ба хизмати аскарӣ рафтани ҷавонон мегардад ва «облава» барои ҷалби ҷавонон ба хизмати ҳарбӣ ба таври ғайриқонунӣ сурат мегирад.

Ёқуб Ҳалимов, рӯзноманигор мегӯяд, «дедовшина” ё сарбозозориро мешавад барҳам дод ва ҳатман бояд барҳам дода шавад.

-Дар ҷаҳони муосир шаҳрҳо ва давлатҳоро тавассути дурбинҳои назоратӣ ба танзим медароранд, чаро қисмҳои низомиро ба танзим даровардан ва аз “дедовшина” пешгирӣ кардан имкон надоштааст? Барои ман нофаҳмост, ки чаро афсарон беаҳамиятӣ мекунанд ё ҳавасманданд, ки “дедовшина” дар қисмҳои низомӣ вуҷуд дошта бошад? Бояд аз онҳо пурсид, вале афсарон барои шиканҷаи сарбозон бояд ҷавобгӯ бошанд, зеро масъул ҳастанд,- мегӯяд Ёқуб Ҳалимов.

Хилватшоҳ Маҳмуд, ҷомеашинос бар он назар аст, ки “барои комилан барҳам додани “дедовшина” дар қисмҳои низомӣ варианти беҳтарин ба роҳ мондани хидмати алтернативӣ дар сафи Қувваҳои мусаллаҳ ва ё ҳамон хидмати шартномавӣ аст. Дар сурати акс, вазъ ба гунае боқӣ мемонад, ки солҳои қаблӣ вуҷуд дошт. Ин падидаи номатлуб қариб дар ҳама кишварҳои пасошӯравӣ, ки Тоҷикистон низ шомили он аст, вуҷуд дорад. Дуруст аст, ки дар бархе кишварҳо, аз қабили давлатҳои Назди Балтик ва Гурҷистон ин мушкил барвақттар ҳал шуда, артиши онҳо артиши касбӣ шуда истодааст. Маргу мири аскарон (сарбозон) дар дохили қисми низомӣ новобаста аз он ки дар он вақт афсар дар қисм буд ё не, масъулиятро аз дӯши фармондеҳон (қумандонҳо) соқит наменамояд. Баробар ба муҷримин бояд афсарон низ дар назди қонун ҷавоб гӯянд. Зеро волидайн фарзандашонро барои ду сол ба хидмат мефиристанд ва ба афсарон бовар мекунанд, ки ҳаёти фарзанди онҳо зери хатар нест”.

Ин дар ҳолест, ки наздикони марҳум Ёдгорзода Абдуқаюм барои беназоратӣ ва бемасъулиятӣ аз болои афсарони қисми низомии Қушунҳои сарҳадии КДАМ дар ноҳияи Ванҷ, ки фарзандашон он ҷо хизмат мекард, ба Дастгоҳи иҷроияи Президенти Тоҷикистон ва Прокуратураи генералии кишвар шикоят бурдаанд. Онҳо аз мақомоти салоҳиятдор тақозо намуданд, ки ба чунин амалҳо дар қисмҳои ҳарбии Тоҷикистон хотима дода шавад ва афсарони ин қисми ҳарбӣ ҳам ба ҷавобгарӣ кашида шаванд, вале аз мақомоти Прокуратураи генералӣ ҷавоб гирифтаанд, ки пас аз санҷиш дар кирдори ягон афсари қисми ҳарбӣ ҳолатҳои ғайриқонунӣ ошкор нагардидааст.

Шамсулло ФОЗИЛОВ “ФАРАЖ”

Хонданд 578
Хатлон: Бунгоҳҳои тиббиро мефурӯшанд

Дар вилояти Хатлон 74 бунгоҳи  тиббӣ ва марказҳои саломатӣ пурра дар ҳолати садамавӣ қарор дошта,  ниёз ба таъмир доранд. Ин вазъият сокинону корафтодагонро нигарон кардааст. 

 

30 бунгоҳи тиббӣ дар хона

Зимни суҳбат муовини сардори Раёсати тандурустии вилояти Хатлон Матлуба Шоҳназарова бо изҳори ташвиш изҳор дошт, ки 74 бунгоҳи  тиббӣ ва марказҳои саломатӣ вазъи хароб доранд. Аз ин шумора, 4 бунгоҳ дар вагон, 30 бунгоҳ дар хонаҳои шахсӣ, 20 бунгоҳ дар муассисаҳои таълимӣ ва 12 бунгоҳи тиббӣ дар ҷойҳои номувофиқ ҷойгиранд. Аз ин бунгоҳҳои тиббӣ имрӯз сокинон аз ноилоҷӣ истифода мебаранд.

Тавре мавсуф афзуд: “Чунин бунгоҳҳои тиббӣ дар шаҳру  ноҳияҳои   Кӯлоб 6, Ҳамадонӣ 8, Муъминобод 12, Балҷувон 10, Кӯшониён 5,  Дӯстӣ 5, Қубодиён 5, Панҷ 5 ва ноҳияи Ҷалолиддини Балхӣ 4 адад ҷойгиранд, ки сокинон аз сифати пасти хизматрасонии онҳо нигаронанд”. 

 

Балхӣ: Мушкил бартараф мешавад    

Ба қавли Азиз Холов, менеҷери Кӯмаки авалияи тиббию санитарии ноҳияи Ҷалолиддини Балхӣ: «Дар ҳақиқат, дар ноҳия  4  бунгоҳи тиббӣ дар ҳолати садамавӣ қарор доранд ва барои таъмиру бозсозии онҳо тадбирҳо андешида истодаем».

Номбурда афзуд, ки: «Дар ноҳия давоми 9 моҳи соли равон бо маблағгузории Бонки умумиҷаҳонӣ 2 маркази саломатии деҳот бо харҷи 150 ҳазор доллари ИМА сохта ба истифода дода шуд. Ҳачунин, сохтмони 2 маркази саломатии дигар бо дастгирии молиявии бонки болозикр бо харҷи 150 ҳазор доллари ИМА  идома дорад. Дар ин баробар, марказҳо бо мошини “Ёрии таъҷилӣ” таъмин гардиданд, ки дар расонидани кӯмаки аввалияи тиббӣ ба беморон мусоидат менамоянд”. 

 

Чаро бунгоҳҳои тиббӣ фурӯхта мешаванд?

Дар ҳамин ҳол, ба қавли Маҳмадхӯҷа - сокини деҳаи Кирови ноҳияи Кӯшониён: «Бунгоҳи тиббии деҳаи моро фурӯхтанд ва бинои онро тахриб карданд. Аз набудани бунгоҳи тибби дар деҳа мо ба куҷо муроҷат карданамонро намедонем». 

Маллазода Сайдулло - сардори Раёсати тандурустӣ дар вилояти Хатлон бо тасдиқи ин хабар гуфт: «Дар ҷамоати деҳоти «Заргар»-и ноҳияи Кӯшониён ду бунгоҳи тиббӣ фурӯхта шудааст. Бунгоҳҳои тиббии мазкур дар мувозинати хоҷагиҳои деҳқонӣ буданд ва аз ҳамин сабаб фурӯхта шудаанд». Ҳамсӯҳбати мо дар идома афзуд, ки «Ҳоло табибони ин ду деҳа сокинонро дар хонаҳояшон хизматрасонӣ менамоянд».

Вале масъулини мақомоти маҳаллии ноҳияи Кӯшониён мегӯянд, барои сохтмони бунгоҳҳои тиббии нав соҳибкорон ҷалб шуда истодаанд ва дар кӯтоҳтарин муҳлат мушкили набудани бунгоҳи тиббӣ дар ин деҳаҳо бартараф мешавад.

 

Норасоии бунгоҳҳои тиббӣ дар 50 деҳа

Бо ин ҳама муовини сардори Раёсати тандурустии вилояти Хатлон Матлуба Шоҳназарова итминон дорад, ки: «Бо зиёд шудани деҳаҳо дар нақша аст, то ҷашни 30 - солагии Истиқлолияти давлатии кишвар дар  54 деҳаи вилояти Хатлон  бунгоҳҳои саломатӣ сохта шаванд”.

Дар баробари ин, сардори Раёсати тандурустии вилояти Хатлон Маллазода Сайдулло зикр намуд, ки: “Барои бартараф кардани мушкили мавҷуда ва баровардани бунгоҳҳои тиббӣ аз хонаҳои шахсӣ ва вагонҳо ба мақомотҳои маҳаллии шаҳру ноҳияҳои вилоят мактуб ирсол карда шудааст ва умед аст, ин масъала ҳалли худро пайдо мекунад. 

Аммо мутахассисон ва ҳолдонҳо бар ин боваранд, ки то се соли оянда бунёди беш аз 50 бунгоҳи тиббӣ ва ҷиҳозонидани онҳо бо таҷҳизоти зарурӣ аз ҳисоби буҷети мақомотҳои маҳалл кори сода нест ва барои амалӣ намудани ин тадбир маблағи зиёд лозим аст.                                       

Раҳмоналӣ Додархӯҷаев, “Фараж”.

Хонданд 191
  •  << 
  •  < 
  •  1 
  •  > 
  •  >> 

Хабари-рӯз

Минбари сардабир

  • симКАРта

    Дар ҳафтае, ки гузашт, дар шабакаҳои иҷтимоӣ ин калима аз…

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.