.

Alternative flash content

Requirements

Get Adobe Flash player

Ҷомеъа

 Ҳамсуҳбати мо Махфират Бозорова - сокини шаҳри Душанбе мегуяд:
Вақте бозори бозичаҳои кӯдаконаро мушоҳида мекунед, ҳолати аҷиберо мебинед: албастиву аҷузкампир ва дигар махлуқоти ғайриоддӣ ва бозичаҳои даҳшатнок онро фаро гирифтааст. Онҳо тадриҷан ба бозичаҳои дӯстдоштаи кӯдакон мубаддал гашта, маликаҳои нексиришт, хирсаку сагча ва гурбачаҳо бошанд, торафт маъруфияти кам пайдо намуда истодаанд. Кӯдакони имрӯза ба бозичаҳои даҳшатовар майл доранд…

Бале, мутаассифона ҳақ бар ҷониби мусоҳиби мост. Воқеан, имрӯз бозори маҳсулоти кӯдакона, хусусан бозичаҳоро молу маҳсулоти пастсифат ва зараровар ишғол намудааст. Қисми зиёди онҳо барои саломатӣ ва рушди зеҳнии кӯдакон осеб мерасонанд. Вале бархе аз тоҷирон ба хотири пули бедарду миён ба ин амалҳои нангин даст мезананд…

Парвиз Муҳибов - муовини сардори нозироти савдои Агентии Тоҷикстандарт мегӯяд, вобаста ба ҳимояи бозори истеъмолӣ аз воридоти молҳои пастсифат ва хатарнок, аз ҷумла бозичаҳои воридотӣ, ки асосан аз Ҷумҳурии Мардумии Чин ворид карда мешаванд, нозирони Агентӣ дар бозорҳо ва нуктаҳои савдо санҷиш гузаронида, ба миқдори 13 300 дона бозичаҳои ба тариқи кочоқ ба қаламрави кишвар воридшударо ошкор намуда, аз муомилот гирифтанд. Нисбати воридкунандагон ва соҳибкороне, ки бозичаҳоро бе ҳуҷчати тасдиқкунандаи сифат ва бехатарӣ ба муомилот баровардаанд, тибқи Кодекси ҳуқуқвайронкунии маъмурӣ тадбирҳои мушахаас андешида шуданд ва айни замон корҳо дар ин самт идома доранд. Ҳамзамон, дар асоси дархости Прокуратураи генералии Ҷумҳурии Тоҷикистон ва зерсохторҳои он дар 27 ҳолат нисбати бозичаҳо барои чораҷӯӣ хулосаи ташхисии ғайристандартӣ пешниҳод карда шудааст. Илова бар ин, ҷиҳати муқаррарнамудани талаботи ҳатмӣ ба бозичаҳо бо мақсади ҳифзи ҳаёт ва саломатии кӯдакон, ҳамчунин огоҳ намудани амалҳое, ки истифодабарандагони (истеъмолкунандагони) бозичаҳоро нисбат ба таъинот ва бехатарии онҳо ва ҳифзи муҳити зист ба иштибоҳ мебаранд, дар асоси Қонуни Ҷумҳурии Тоҷикистон «Дар бораи ба меъёрдарории техникӣ» аз тарафи Агентии Тоҷикстандарт регламенти техникии Ҷумҳурии Тоҷикистон «Бехатарии бозичаҳо» таҳия гардида, бо қарори Ҳукумати Ҷумҳурии Тоҷикистон аз 23 августи соли 2016 таҳти № 375 қабул карда шуд, ки аз моҳи феврали соли ҷорӣ мавриди амал қарор дода мешавад ва минбаъд ҳамаи талабот нисбати бозичаҳо тибқи Регламенти техникии мазкур амалӣ карда мешавад. Дар бораи қабул ва татбиқи он тавассути телевизионҳо барномаҳо низ пахш гардид.

Парвиз Мухибов- масъули “Точикстандарт”

Ба гуфтаи масъулини Тоҷикстандарт, бо вуҷуди тақвият додани корҳои назоратӣ дар бозору нуктаҳои савдо то ҳол воридшавии бозичаҳо ба таври коҷоқ аз Чин идома доранд. Хуршед Бобоев - сардори Раёсати ташкилию бозрасии Хадамоти гумруки назди Ҳукумати Ҷумҳурии Тоҷикистон омили асосии ғайриқонунӣ ворид намудани молу маҳсулоти пастсифат ба қаламрави гумрукии Тоҷикистон, махсусан бозичаҳои кӯдаконаро ба даст овардани фоида арзёбӣ намуд. Мавсуф зикр кард, ки молҳои мазкур арзиши паст дошта, ба талаботи муқарраргашта ҷавобгӯ нестанд. Аз ин хотир барои ба даст овардани маблағи муайян шахсоне ҳастанд, ки молҳоро ғайриқонунӣ ва бо роҳи кочоқ ба қаламрави ҷумҳурӣ ворид менамоянд.

Таҳлилҳо бозгӯйи онанд, ки аксари ҳолатҳои интиқоли ғайриқонунии молу маҳсулот ба кишварамон тавассути нуқтаҳои беназорат, назораташон суст ё осебпазири марзи давлатии Тоҷикистон бо Қирғизистон, ки дорои беш аз 40 чапроҳа дар ҳудуди ҳар як ноҳияи наздисарҳадӣ аст, ба назар меарсанд, - мегӯяд Х. Бобоев. Ҳамзамон бо шомил гардидани Қирғизистон ба Иттиҳоди гумрукӣ воридоти ғайриқонунии молҳои ниёзи мардум тавассути сарҳади Тоҷикистон аз тариқи чапроҳаҳо афзоиш ёфтааст, ки ин ба амнияти иқтисодии кишварамон хатар эҷод намуда, боиси болоравии нархҳо дар бозорҳои дохилии ҷумҳурӣ гашта истодааст.
Рустам Шамсиддинов - муовини директор оид ба хизматрасонии тиббӣ ба модару кӯдаки Маркази саломатии шаҳрӣ дар ин масъала чунин изҳор дошт:

Солҳои охир аз кишварҳои хориҷа барои фурӯш ба кишвари мо бозичаҳои гуногун хеле зиёд ворид мешавад. Аз падару модарон хоҳиш мекардем, ки қабл аз харидорӣ ҳатман ба сифат ва таркиби онҳо эътибор диҳанд. Қисми зиёди бозичаҳое, ки аз Ҷумҳурии Мардумии Чин ворид мешаванд, бештар пластмассӣ мебошанд. Вақте дар хона мегузоред, ҳавои хонаро низ дигаргун мекунанд. Вақте кӯдак бо онҳо бозӣ мекунад ва ё ба даҳони худ мебарад, метавонад ба бемориҳои сироятӣ оварда расонад. Чунин бозичаҳо ба саломатии кӯдакон хавфи калон доранд. Мутассифона волидони мо имкони харидории молҳои хушсифатро надоранд ва бо бозичаҳои камсифати чинӣ мехоҳанд хотири кӯдакони худро шод намоянд.

Бино ба иттилои раёсати омори Хадамоти гумруки назди Ҳукумати Ҷумҳурии Тоҷикистон танҳо дар зарфи 5 моҳи соли 2016 аз хориҷи кишвар ба ҷумҳурӣ бо маблағи беш аз 1,8 миллион доллар ва зиёда аз 500 тонна бозичаҳои кӯдакона ва дастгоҳҳои варзишию бозӣ ворид шуда буданд. Молҳои содиршуда асосан аз кишварҳои Чин, Россия, Эрон, Олмон, Туркия, Дания, ИМА, Белгия, Латвия, Литва, Испания, Майлайзия, Корея, Аморати Муттаҳидаи Араб ва кишварҳои ИДМ мебошанд.

 

Ба иттилои Холмурод Алиҷонов - Сардори шуъбаи гигиенаи коммуналӣ ва гигиенаи кӯдакону наврасони Хадамоти назорати давлатии санитарию эпидемиологӣ аз тарафи мутахассисони Хадамот ва Марказҳои назорати давлатии санитарию эпидемиологии вилоятҳо ва шаҳру ноҳияҳо дар давраи соли сипаришуда 274 санҷишҳо дар нуқтаҳои савдои бозичаҳои кӯдакона, хӯрокаю нӯшокиҳо дар намуди бозичаҳо, фӯруш ва истифодаи онҳо дар марказҳои савдою бозорҳо, инчунин дар муассисаҳои таълимию томактабӣ (боғчаҳо, кӯдакистонҳо, хона-интернатҳои кӯдакона) истифода бо усул ва озмоишҳои лабораторӣ гузаронида шудааст.
Бинобар сабаби риоя накардани талаботҳои талаботи моддаи 11-и Қонуни Ҷумҳурии Тоҷикистон аз 01.08.2012с, №890 “Дар бораи бехатарии маҳсулоти хӯрокворӣ” ва регламети техникии бехатарии бозичаҳо ва маҳсулотҳои қаннодӣ дар намуди бозичаҳо, фаъолияти 48 нуқтаҳои савдои кӯчагӣ манъ карда шуда, барои қонунвайронкуниҳо 112 протоколҳои ҳуқуқвайронкунии маъмурӣ тартиб дода нисбати 112 нафар шахсони масъул қарорҳо оид ба ҷаримабандӣ ба маблағи умумии 16400 сомонӣ бароварда шудааст, ки маблағи номбурда пурра ситонидашуда ба буҷаи давлат ворид карда шудааст.

Инчунин зиёда аз 185 кг маҳсулотҳои пастсифату мӯҳлати истеъмолиашон гузашта ба маблағи 18680 сомонӣ аз муомилот гирифта шудаанд. Тариқи лабораторию инструменталӣ бошад 189 намуна ба озмоишгоҳҳои санитарию кимиёвии МНДСЭ-и шаҳру ноҳияҳои ҷумҳурӣ дастрас карда шудааст, ки натиҷаҳои онҳо аз ҷиҳати нишондодҳои органолептикӣ, кимиёвӣ ва бактериологӣ манфӣ арзёбӣ шудааст.

Мавриди зикр аст, ки баҳри пешгириии ҳаргуна бемориҳои алергологӣ ва заҳролудшавии кӯдакон аз бозичаҳое, ки ба талаботҳои санитарию гигиенӣ ҷавобгӯ нестанд, махсусан бозичаҳое, ки истеҳсоли Ҷумҳурии халқии Чин мебошанд, аз тарафи Хадамот мактуби расмӣ ба сохторҳои марбута ирсол гардидааст.

Аз руи таҳлилҳои физикию кимиёвӣ ва бактериологӣ, аз ҷумла зиёд будани фенол дар таркиби баъзе бозичаҳои истеҳсоли Ҷумҳурии Чин Қарори сардори ХНДСЭ аз соли 2011 “Оиди ҳама намудҳои бозичаҳое, ки бе ҳуҷҷатҳои тасдиқкунандаи сифат ва бехатарии маҳсулот, инчунин бе гузаронидани экспертизаи санитарию гигиении пешакӣ ва бе хулосаи санитарию эпидемиологӣ воридот, истифода ва фуруши онҳо манъ карда шавад” ба тавсиб расидааст.

 Дар озмоишгохи “Точикстандарт”

Новобаста аз ин, ҳаргуна намуди қаннодиҳо ва нӯшокиҳо дар намуди бозичаҳо ба шаҳру ноҳияҳои ҷумҳурӣ аз ҷумҳурии Чин ба таври қоҷоқ ворид мегарданд, ки дар таркибашон ҳаргуна ингредиентҳо мавҷуд буда, барои афзоиш ва солимии кӯдакон хатарнок мебошанд.

Дар баробари ин, аз тарафи мутахассисони Хадамот ва Марказҳои назорати давлатии санитарию эпидемиологии вилоятҳо ва шаҳру ноҳияҳои ҷумҳурӣ дар рафти санҷишҳо баҳри дуруст интихоб намудани бозичаҳо ва тарзи дуруст шустушӯ ва безараргардонии онҳо мунтазам дар муассисаҳои томактабӣ ва хонаҳои кӯдакон корҳои фаҳмондадиҳӣ гузаронида мешавад.

Мусоҳиби дигари мо М. Каримова- сокини ноҳияи Синои пойтахт мегӯяд:

- Ман бо кӯдакон зиёд сару кор гирифтам ва ба волидон ҳамеша тавсия медиҳам, ки дар интихоби бозичаҳо хато накунанд.. Масалан, дар фурӯш мурғобии гапзананда ҳаст. Барои он, ки аз мурғобӣ садо барояд, бояд кӯдак онро буғӣ намояд. Оё ин амал барои бештар намудани хисси ғазаб ва бераҳмӣ дар кӯдакон мусоидат намекунад? Ё тортанаки азимҷуссае пайдо шуда буд, ки бо пахш намудан чашмонаш медурахшид. Пас аз ин кӯдак то дер аз ваҳшат хоб намерафт. Имрӯз бозичаҳое, ки аз ҷиҳати экологӣ безарар мебошанд, гаронанд ва шояд ҳамин сабаб шудааст, ки падару модарон бештар ба бозичаҳои чинӣ майл доранд.

Ҳуқуқшиноси Иттифоқи истеъмолкунандагони Тоҷикистон Шодком Махсумов мегӯяд, боре ҳам ба онҳо муроҷиати шаҳрвандон дар робита ба харидории бозичаи бесифат қайд нашудааст: — Вале иттифоқи мо омода аст, ки дар ин масъала ҳамкориро бо шаҳрвандон ва сохторҳои дигар ба роҳ монад, — афзуд номбурда.

Бозичахои бесифат ба партов мубаддал мегарданд…

Тахлилхо нишон медихад, ки бозичахои пастсифати пластмасси ба кишвар ворид гашта, пас аз шикаста ё корношоям шудан ба партов фиристода мешаванд. Ва зарарнокии онхо дар партовчойхо низ боки монда, боиси олуда гаштани мухити атроф мегарданд. Ин як таъсири дигари бозичахои пастсифат ба мухити атроф аст…
Азза Қаноат- ҳунарманди мардумиест, ки ба сохтани лӯхтакҳо машғул мебшад ва борҳо намоиши ҳунари дастии ӯ доир гаштааст. Номбурда мегӯяд, бозичаҳо дар рушди зеҳният ва завқи эстетикии кӯдакон нақши бузург мебозанд. Ҳар як кӯдак бозичаи дӯстдоштаи худро дорад ва онро ба оғӯш гирифта, мебӯсаду ба даҳон мебарад. Аз ин хотир он бояд бехатар бошад. Бочизаи бехатартарин ин бозичахои миллии точики мебошанд, ки аз карбос омода шудааст.

- Россия аз бочизаҳои бесифати чинӣ халос шуда истодааст, вале дар мо ҳанӯз ин раванд идома дорад. Ба волидон пешниҳод мекардам, ки барои кӯдакони худ аз матои табиӣ, аз қабили карбос бозича дастрас намоянд, — мегӯяд А. Каноат

Аз мушоҳидаҳо:

Вақте ба фурӯшгоҳи “Baby shop”-и пойтахт рафтем, бозичаҳои гарон ва хушсифат дар фурӯш буданд ва таркиби онҳо бо забони тоҷикӣ нишон дода шуда буд. Дар маркази савдои “Рӯдакӣ плаза” бошад, ба мо сертификати сифати бозичаҳоро нишон дода натавонистанд. Фурӯшандагон изҳор доштанд, ки касе аз харидорон ба сифати бозичаҳо аҳамият намедиҳанд ва ё ҳуҷҷате талаб намекунанд…

Тавсия барои харидории бозичаҳо:

Чӣ тавр бозичаро бояд интихоб намуд?

- намуди зоҳирӣ; бозичаи хуб бояд дар кунҷу канори худ сахтӣ надошта бошад. Барои кӯдакони то 3 сола набояд бозичае харид, ки аз ашёҳои хурд иборат бошад. Зеро кӯдак метавонад онро фурӯ барад. Бозичаҳое, ки ранги равшан доранд, шояд дар таркии худ элементҳои свинетс ва кадмий доранд.
- дар бозичаҳо бояд ҳатман рақами тамос ва суроғаи истеҳсоли он, санаи истеҳсол ва муҳлати он қайд гашта бошад;
- ҳангоми хариди бозичаҳо тавассути интернет ба таркиби он аҳамият диҳед. Агар дар таркиби он ягон унсури бароятон нофаҳмо навишта шуда бошад, ҳатман дар бораи он маълумот кобед.


Мутриба ТӮЙЧИЗОДА
Насрулло ТӮЙЧИЗОДА
Маводи мазкур бо дастгирии Иттиҳоди Аврупо таҳия шудааст. Масъулияти муҳтавои ин мавод ба дӯши муаллифон вогузор шуда, мавқеъи Иттиҳоди Аврупоро инъикос намекунад.

Хонданд 613

УРНА

Сен 23, 2017
Хонданд: 454

 Ё чӣ бояд кард, то пойтахти азизамонро тозаву озода нигоҳ дорем?

Шаҳри Душанбе солҳои охир чунон тез ба як шаҳри зебову дилкаш табдил ёфта истодааст, ки воқеан агар ободкорӣ бо ин суръат идома ёбад, дар 10-15 соли оянда ба як шаҳри пешрафтаву шинохтанашаванда табдил хоҳад ёфт. Ободу васеъ шудани кӯчаву хиёбонҳои дохилишаҳрӣ, қад афрохтани биноҳои баландошёнаву замонавӣ, гулгашт шудани хиёбонҳову боғҳои фароғатӣ ва даҳҳо тағйироти дигари мусбатро мушоҳида намудан мумкин аст, ки ду даҳсола пеш дида намешуд. На танҳо сайёҳону меҳмонони хориҷӣ, балки сокинони худи пойтахт низ аз чунин пешрафт хушнуданду сукунат дар пойтахтро боиси ифтихор медонанд.
Банда қариб ҳар ҳафта аз ин ё он гӯшаи шаҳр дидан мекунам, боғҳои фароғатии шаҳрро зиёрат намуда, аз сайру тамошои он ҳаловат мебарам. Аз натиҷаи мушоҳидаҳои худ ба хулосае омадам, як камбудии хеле ҷиддие вуҷуд дорад, ки ҳам ҳусни шаҳрро коста мекунад ва ҳам боиси ташвиши меҳмонону сокинон мегардад, ки фавран бояд бартараф карда шавад. Ин ҳам бошад, дар кӯчаву паскӯчаҳои шаҳр набудани партовқуттиҳо барои коғазпораву баклашкаҳо ва ё умуман чизҳои хурди зиёдатӣ аст. Шояд мавзуи мазкурро ҷиддӣ нагирем, вале мегӯянд, ки ба маданияти ҳар халқ аз шаҳрдорӣ ва тозагии кӯчаҳои шаҳрҳо, бахусус пойтахташ баҳо медиҳанд. Агар воқеан чунин аст, меҳмонони хориҷӣ ва сайёҳон вақте ба кӯчаҳои пур аз коғазпораву ҷӯйборҳои пур аз баклашкаҳои шаҳри Душанбе нигаранд, ба мо чӣ гуна баҳо медода бошанд? Аз ҳама муҳим он ки, вақте мардум дар кӯчаву паскӯчаҳо коғазпораҳои худро зери дарахтону даруни ҷуйборҳо мепартоянд, кӣ бояд посух гӯяд?
Барои ба ин савол ҷавоб ёфтан бо коғазпорае дар даст ба шаҳр баромадам ва ба худ аҳд кардам, ки то ёфтани ҷои махсусе, ки барои гузоштани чизҳои нозарур муайян шуда бошад, онро намепартоям. Аз назди гардиши маъруф бо номи «Танка» то истгоҳи Сирк пиёда омадам, дар ҳеҷ куҷое як партовқуттӣ (урна) наёфтам, ки онро партоям. Роҳро пиёда то охирин истгоҳи маршрути 13 (ГАИ) идома додам. Ҷустуҷӯи партовқуттӣ (урна) ба назар бефоида намуд. Ин аст, ки коғазпораро ба ҷайбам гузошта, ба хона даромадам. Субҳ бо ҳамон коғазпора боз ба нақлиёти 13 савор шудам ва дар истгоҳи назди бинои асосии «Тоҷиксодиротбонк» фаромада, то назди фурӯшгоҳи «Олами китоб» пиёда омадам. Дар инҷо низ ягон партовқуттӣ (урна) пайдо накарда, ба самти меҳмонхонаи «Серена» ҳаракат кардам ва танҳо дар назди ҳамин меҳмонхона партовқуттиеро пайдо кардам, ки он ҳам ба худи меҳмонхона тааллуқ дошт.
Баъди ин мушоҳида ба хулосае омадам, ки мардуми мо дар ифлосшавии кӯчаҳои пойтахти азизамон ҳеҷ гуноҳе надоранд. Зеро, агар хоҳанд ҳам, онҳо барои партофтани коғазпораву баклашкаҳои дасти худ ҷуз зери дарахтон, дохили ҷӯйбор ва ҷойҳои дигар, ҷое намеёбанд.
Нафаре нақл кард, ки «ҳар бегоҳ, вақте дар маҳаллаи 82 кӯдаконамро аз боғча мегирам, ҳатман барояшон шириниву об мегирам. Қариб якуним километрро пиёда тай карда, то хона меравем ва ҳеҷ ҷое барои партофтани коғазпора намеёбем. Гоҳо ноилоҷ чизҳои партофтаниамонро то хона мебарем ва гоҳо зери ягон дарахте мепартоем».
Воқеан, агар мо дар тамоми кӯчаҳои пойтахт сайр кунем ҳам, ҷуз хиёбонҳои марказӣ ва боғҳои истироҳатӣ, кам ҷое пайдо мекунем, ки дар он партовқуттиҳо (урнаҳо) гузошта шуда бошанд. Ба фикри ман, барои он ки масъулин ба мардум маданияти тоза нигоҳ доштани шаҳрро ёд диҳанд, бояд нахуст шаҳрро бо партовқуттиҳо (урнаҳо) таъмин намоянд. Ман боварӣ дорам, ки агар пойтахти азизамон шаҳди Душанбе чун шаҳрҳои кишварҳои дигар бо партовқуттиҳо таъмин карда шавад, ҳеҷ як нафаре партовҳои худро ба кӯчаҳо намепартояд.
Ин масъала, на танҳо нозук, балки хеле ҷиддӣ низ ҳаст. Мардуми мо одат кардаанд, ки дар сурати набудани партовқуттиҳо, чизҳои зиёдатии худро ба ҳар куҷое рост ояд, партоянд, вале меҳмони хориҷиро ин камбудӣ хеле азият медиҳад. Зеро меҳмони хориҷӣ дар кишвари худ ба он одат кардааст, ки чизҳои зиёдатии худро танҳо ба партовқуттиҳо партояд, вале чун дар пойтахти мо чунин партовқуттиҳоро намебинад, маҷбур мешавад, ки ҳатто агар обе бинӯшад, баклашкаи холишудаи обро бозпас ба меҳмонхона барад. Бояд ин камбудиро масъулин хеле зуд бартараф кунанд ва дар ҳама кӯчаҳову хиёбонҳои шаҳр партовқуттиҳо гузошта, мардумро бо оини шаҳрдорӣ шинос кунанд. Дар акси ҳол, аҳвол чуноне, ки ҳаст, боқӣ хоҳад монду ҳама ободкориҳо ва заҳматҳо дар назар пинҳон мемонанд.

Холиқи МУҲАММАДНАЗАР

Хонданд 454

Аз ин ба баъд сокинони Тоҷикистонро зарур аст аз рӯи тартиби нави маросими азодорӣ ва таъзия амал намоянд, ки аз ташхиси давлатии диншиносӣ гузаштааст ва бар асоси мазҳаби ҳанафӣ таҳия шудааст. Бино ба гуфтаи масъулини Кумитаи оид ба корҳои дин, танзими анъана ва ҷашну маросимҳои миллии кишвар, тартиби маросими азодорӣ ва таъзия тамоми амалҳоро аз лаҳзаи вафоти шахс то маросимҳои азодории ӯ дар бар мегирад.

Мувофиқи тартиби нав, минбаъд дар маросимҳои дафн дод гуфтан, навҳа кашидан, хок бар сар задан, фиғон бардоштан, мӯйканию рӯйканӣ кардан ва овозхон (навҳагар) овардан манъ аст. Ба наздикони шахси вафоткарда дар вақти видоъ барои тасаллии ботинашон танҳо гиря ва ашкрезонӣ иҷозат дода шудааст. Тибқи ин муқаррарот ҳаққи қабркан ва мурдашӯй низ танзим шудааст, ки он дар мувофиқа бо масъулони ваколатдори маҳалла муайян карда мешавад ва соҳибони майит бояд онро пардохт намоянд. «Шабона ҳеҷ кас дар хонаи мурдадор, ба истиснои фарзандон ва хешу табори наздик, ҳуқуқи истодан надорад»,- омадааст дар тартиб.
Инчунин, ба ҷанозагоҳ ва қабристон рафтани занҳо, беҳуда ба назди соҳибони майит даромадану баромадан, баланд садо баровардану ҳарф задан, хандидан, дар маросим пӯшидани либоси сиёҳ аз мамнуоти дигари маросими азодорӣ буда, пӯшидани ҷомаи кабуду дар сар гузоштани тоқӣ ва бо рӯймол бастани миён барои марди азодор, бастани рӯймоли калони кабудча (докаи сафед), куртаю поҷомаи васеи кабуд барои зани азодор (модар, духтар, амма, хола, янга) аз тавсияҳоеянд, ки масъулони кумита ба мардум пешниҳод намудаанд.
Танҳо чизе, ки дар он маҳдудият ҷорӣ нест, шумораи иштирокчиёни маросими ҷаноза аст, ки тибқи мазҳаби ҳанафия савоб шуморида мешавад.
Муовини раиси Кумита Азизулло Мирзозода дар суҳбат бо «Фараж» вобаста ба он, ки дар сурати нақзи тартиб ва муқаррароти маросими азодорӣ ва таъзия сокинонро чи қадар ҷарима интизор аст, гуфт, он чизе дар қонун аст, возеҳ навишта шудааст, вале тартиби маросими азодорӣ тавсиявӣ аст ва истифода аз он ба худи сокинон вобаста мебошад.
Инчунин, гуфта мешавад, намози ҷанозаро сархатиб, имомхатиб, имомхатиби масҷиди панҷвақта бо тартибе, ки мазҳаби ҳанафӣ муқаррар намудааст, мехонанд. Ин дар ҳолест, ки қаблан аз рӯи расму анъанаи миёни мардум роиҷбуда, агар нафаре пеш аз маргаш хондани намози ҷанозаашро ба ягон шахсияти бузург васият намояд, он ҳатман бояд иҷро мешуд. Тибқи ин русум дар сурати иҷро нагардидани васияти марҳум ӯ аз пайвандон норозӣ хоҳад шуд.
Сухангӯи Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон Афшин Муқим гуфт, дар ин маврид қарори Шӯрои уламо аз соли 2004-ум қабул шудааст ва дар маросими ҷаноза пеш аз ҳама авлавият ба эмоми ҳай, яъне эмоми маҳалла дода мешавад. Афшин Муқим мегӯяд, мувофиқи мазҳаби ҳанафия аввал султон метавонад пеш даромада, ҷанозаи майитро хонад. «Аммо аз он ки дар мо султон нест, метавонад раиси Шӯрои уламо пеш дарояд. Дар ҳар сурати дигар авлавият ба эмоми маҳал дода мешавад ва васияти майит ба инобат гирифта намешавад».
Тартиби маросими азодорӣ ва таъзия дар ҳоле қабул мешавад, ки бар асоси тағйироти ахир ба қонуни танзим тамоми маросимҳои азодорӣ дар кишвар бидуни забҳи чорво гузаронида мешаванд.
Ин тавсияҳо шакли қонунӣ мегиранд ё на, вақт нишон медиҳад.

Шамсулло ФОЗИЛОВ, «ФАРАЖ»

Хонданд 1153

Муддати 9 моҳ аст, ки лоиҳаи “Солимии ҷомеа” бо дастгирии Маркази хайриявии «Малик Салмон»-и Арабистони Саудӣ тавассути Ҷамъияти Ҳилоли Аҳмари Тоҷикистон (ҶҲАТ) амалӣ мегардад. Ин лоиҳа яке аз самтҳои муҳими ҶҲАТ буда, он баҳри фароҳам овардани шароити мусоид барои ҷомеаҳои ниёзманди ноҳияҳои Рӯшон, Дарвоз, Ванҷ ва Роштқалаи ВМКБ ва ноҳияи Рашт мусоидат менамояд. 

Лоиҳаи “Солимии ҷомеа” дар муддати 3 сол фаъолияташро дар самтҳои кор бо ҷомеаҳои маҳал оид ба муайян намудани мушкилоти ҷойдоштаи сатҳи маҳаллӣ ва банақшагирии якҷоя дар бартараф намудани онҳо пеш мебарад. Ҳамчунин, ин лоиҳа пурқувват намудани иқтидори бахшҳои ҶҲАТ ва устувор намудани робитаи байни марказҳои саломатӣ, сохторҳои тиббӣ ва дигар сохторҳоро дар ин ноҳияҳо дар назар дорад.
Дар доираи лоиҳа омӯзонидани кӯмаки аввалияи тиббию санитарӣ, ёрии аввал ва омодагӣ ба ҳолатҳои фавқулоддаи тиббӣ ва беҳтар гаштани сифати саломатӣ дар сатҳи маҳал пешбинӣ шудааст. Ин услуб ҷомеаҳо ва ихтиёриёнро барои истифодаи воситаҳои оддии мутобиқ ба шароити маҳал, ҷиҳати ҳалли эҳтиёҷоти солимии ҷомеа сафарбар намуда, ба онҳо имкон медиҳад, ки масъули афзалияти рушд ва натиҷаҳои солимии худ бошанд. Чунин лоиҳаҳо дар саросари ҷаҳон барои таъсис додани ҷомеаҳои солим ва устувор мусоидат мекунанд. Тавассути ин лоиҳа ҶҲАТ ба беҳтар намудани дастрасии аҳолии осебпазир ба оби ошомидании тоза, кашидани хати оби нӯшокӣ ё таъмири қубурҳои мавҷуда, сохтани ҳоҷатхонаҳо барои одамони имконияташон маҳдуд, баланд бардоштани сатҳи огоҳии марбут ба саломатӣ, таълими беҳдоштӣ ва пешгирии бемориҳои сироятӣ, дастгирӣ ва ҷалби одамони имконияташон маҳдуд дар фаъолияти барнома мусоидат менамояд.
Аз оғози татбиқи ин лоиҳа, мувофиқи нақшаи амал дар 5 ноҳияи фарогири барнома вохӯриҳо бо мақомоти иҷроияи ҳокимияти давлатии ҳар як ноҳия гузаронида шудааст. Ҳамчунин, бо намояндагони сохторҳои давлатии ҳар як ноҳия мизи муддавар доир гардид, ки дар он тибқи талаботи барнома аз ҳар як ноҳия 10 деҳа барои амалисозии барнома интихоб гардид. Дар асоси қадамҳои барнома аллакай дар ноҳияҳои мақсаднок фасилитаторон ва ихтиёриёни барнома интихоб гардида, дар амалӣ сохтани барнома кӯмаки худро расонида истодаанд.
Дар барқарорсозии робитаи байни ҶҲАТ ва Маркази хайриявии «Малик Салмон»-и Арабистони Саудӣ ин мавқеи ҷуғрофии Тоҷикистон, ҳолатҳои фавқулодда ва ҳодисаҳои табиие, ки дар кишвар тез-тез рух медиҳанд, сабабгор гашт. Яке аз ин ҳодисаҳои табиӣ заминларзаи ВМКБ буд. Дар натиҷаи ин заминларза, ки 7-уми декабри соли 2015 дар водии Бартанг, ноҳияи Рӯшони ВМКБ рух дод, зиёда аз 750 хоҷагӣ зарар дида, манзили зисти қисми зиёди хоҷагиҳо дар ҳолати садамавӣ қарор доштанд. ҶҲАТ баҳри сари вақт кӯмак расонидан ба аҳолии зарардидаи ин минтақа бисёр талошҳо карда, ҳамеша мекӯшид, ки ягон ташкилоти сарпарасти хориҷие дарёфт намояд. Дар натиҷаи ҷустуҷӯи зиёд тавассути расонаҳои интернетӣ муваффақ гашт, ки бо намояндагони Маркази хайриявии «Малик Салмон»-и Арабистони Саудӣ мулоқот ва гуфтушунид намояд ва дар натиҷа Ёддошти тафоҳум байни ҶҲАТ ва ин Марказ оид ба расонидани кӯмаки хайриявӣ ба зарардидагони офатҳои табиии ВМКБ ва ноҳияи Рашт ба имзо расид. Дар доираи ин Ёддошти тафоҳум намояндагони ин марказ тасмим гирифтаанд, ки ба 1500 оилаи ниёзманди Вилояти Мухтори Куҳистони Бадахшон (ВМКБ) ва водии Рашт, ки тақрибан 7500 нафарро ташкил медиҳанд, кӯмаки ҳам озуқаворӣ ва ҳам ғайри озуқавории худро расонанд.
Тақсимоти кӯмак аз се марҳила иборат буда, марҳилаи аввалини он дар таърихи 28-уми декабри соли 2015 оғоз гардида, марҳилаи ниҳоии он рӯзи 5.05.2016 ба итмом расид. Ҳамаи кӯмакҳо аз ҷониби ихтиёриёни бахши ҶҲАТ дар ВМКБ ва ноҳияи Рашт дар ҳамдастӣ бо намояндагони ҳокимиятҳои маҳал ба мардуми зарардида бо муваффақият тақсим карда шуд.
Баъди иҷрои босамари ин амали хайр ҳамкории ҶҲАТ бо намояндагони Маркази хайриявии «Малик Салмон»-и Арабистони Саудӣ равнақ ёфт. Аллакай рӯзҳои 20-23-юми ноябри соли 2016 намояндагони Марказ ҷиҳати оғоз бахшидан ва ривоҷ додани ҳамкориҳо байни Ҷамъияти Ҳилоли Аҳмари Тоҷикистон ва ин Маркази хайриявӣ ба Ҷумҳурии Тоҷикистон ташриф оварда, зимни он ду Созишнома оид ба татбиқи лоиҳаи “Солимии ҷомеа” ва лоиҳаи “Пешгирии нашъамандӣ ва норасоии масунияти одам” ба имзо расид.
Баъдан, санаи 21-уми феврали соли 2017 дар бинои сафорати Арабистони Саудӣ дар Ҷумҳурии Тоҷикистон чор Созишномаи дигар байни Ҷамъияти Ҳилоли Аҳмари Тоҷикистон ва Маркази хайриявии «Малик Салмон»-и Арабистони Саудӣ дар самтҳои баланд бардоштани савияи дониши ҷавонон оид ба фаъолияти башардӯстӣ, пешгирӣ ва омодагии аҳолӣ ба ҳолатҳои фавқулодда ва ҳодисаҳои табиӣ, парвариши чорвои нодир дар ВМКБ ва баланд бардоштани иқтидори иқтисодиву иҷтимоии ҷамъият ба имзо расид. Яъне дар умум, Маркази хайриявии «Малик Салмон»-и Арабистони Саудӣ 6 лоиҳаи пешниҳоднамудаи Ҷамияти Ҳилоли Аҳмари Тоҷикистонро дастгирӣ менамояд.
Бояд қайд намуд, ки Маркази хайриявии «Малик Салмон»-и Арабистони Саудӣ санаи 13.05.2015 бо ташаббуси аълоҳазрат шоҳи Арабистони Саудӣ ҷиҳати расонидани иқдоми хайриявӣ ба ниёзмандон ва шахсони аз ҳолатҳои фавқулодда зарардида таъсис дода шудааст. Мақсади асосии фаъолияти ин Марказ пеш аз ҳама расонидани кӯмаки байналмилалӣ ва густариши фаъолияти башардӯстона мебошад. Дар ин марказ фаъолият тавассути як гуруҳи барномаҳои тарҳрезишуда ҳамчун як ҷомеаи ҷаҳонӣ, ки метавонанд баҳри иҷрои ҳадафҳо ва нақши муҳими марказ бо пиёда сохтани барномаҳои Шоҳигарии Арабистони Саудӣ барои расонидани кӯмаки байналмилалӣ ва фаъолияти башардӯстона ба ҷомеаҳои осебдида ва барои дастгирию раванди зиндагии осоиштаи мардуми ниёзманди сайёра равона гардидааст, ба роҳ монда шудааст.
Мақсади дигари ин марказ муттаҳид сохтани фаъолияти кӯмаки берунӣ ва ҳамоҳангсозӣ байни тамоми кӯмаккунандагони дахлдор (ҳам давлатӣ ва ҳам ғайридавлатӣ) ва истифодабарии оқилонаи он барои ҷомеаҳои ниёзманд мебошад.
Маркази хайриявии «Малик Салмон» дар умум 231 лоиҳаро тавассути 108 шариконаш дар кишварҳои Амрикои Марказӣ, Осиёи шарқӣ, марказӣ ва ҷанубӣ, Африқои ғарбӣ ва шимолу шарқи Аврупо дастгирӣ менамояд.
Ҷамъияти Ҳилоли Аҳмари Тоҷикистон (ҶҲАТ) яке аз куҳантарин созмонҳои башардӯстона дар кишвар буда, сар аз соли 1927 ба мардуми ниёзманд дасти ёрӣ дароз мекунад. ҶҲАТ дар ироаи ёрии башардӯстона ба қурбониёни офатҳои табиӣ, ба мисли сел, лағзиши замин, хушксолӣ ва зилзилаҳо, ки мутаассифона, зуд-зуд дарТоҷикистон рух медиҳанд, нақши асосӣ мебозад. Ҷамъият ҳамчунин дар омодагӣ ва вокуниши саривақтӣ ба офатҳо дар Тоҷикистон саҳми арзанда дорад. ҶҲАТ шабакаи бузурге иборат аз 69 бахш дар ҳамаи шаҳру навоҳии кишвар буда, беш аз 10 000 ихтиёрӣ дорад.

Нигора САИДБЕКОВА, МТЖТ

P.S. Хонандагони азиз дар бораи фаъолиятҳои дигари ҶҲАТ метавонанд дар шумораи ояндаи ҳафтаномаи «Фараж» матлаби хонданӣ мутолиа намоянд.

Хонданд 695

Хабари-рӯз

Календар

« Ноябрь 2018 »
Пн Вт Ср Чт Пт Сб Вс
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    

Минбари сардабир

  • симКАРта

    Дар ҳафтае, ки гузашт, дар шабакаҳои иҷтимоӣ ин калима аз…

Нигоҳи хос

Парадокс

Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ...
Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ба ...
Гуфтед? Мегӯянд! (№3
Бег САБУР, раиси Хадамоти алоқа:- Ман қарорамро бекор накардаам.Танз: Офарин ба Шумо, оғои Бег ...
Гуфтед? Мегӯянд! (№2
Аскар ҲАКИМ, Шоири халқии Тоҷикистон:- Дар замони шӯравӣ мо асареро пайдо намекунем, ки дар ...
Гуфтед? Мегӯянд! (№1
Абдуалим ИСМОИЛЗОДА, раиси шаҳри Қӯрғонтеппа Хонандаи беҳтарин- Кӯшиш мекунам ҳар рӯз лоақал ...

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.