.

Alternative flash content

Requirements

Get Adobe Flash player

Ҷомеъа

Розигии Худо дар чист?

Фев 03, 2018
Хонданд: 853

Яке аз писарони Бердибой бо номи Ашӯр дар шаҳри Хуҷанд чандин сол боз ба хариду фурӯши мошинҳои аз хориҷи кишвар ба ҷумҳурӣ воридшуда машғул аст ва аз ин кор даромади хуб мегирад. Ӯро барои нархҳои боинсофона, меҳмондӯстӣ ва хулқу рафтори хубаш тамоми бачаҳое, ки аз ҷануб барои харидории мошинҳо ба шаҳри Хуҷанд меоянд, нағз мебинанд.

Роҳат як муштарии доимии Ашӯр ба ҳисоб меравад ва ҳамавақт мошинҳоро аз ӯ харидорӣ менамояд. Муносибатҳои тиҷоратии онҳо солҳои тӯлонӣ идома дошта, ин робитаи дӯстонаро аҳли хонавода низ медонанд.
Се моҳ пеш падари Роҳат аз олам гузашт. Ашӯр дар Олмон буд ва дар ҷаноза иштирок карда натавонист. Пас аз се моҳ бо Роҳат вохӯрда, ҳамдардӣ баён намуд.
Ҳар дафъа Роҳат Ашӯрро ба меҳмонӣ ба зодгоҳаш таклиф менамуд. Ашӯр ваъда мекард, ки ҳатман меравад, вале бо ҳар баҳона намерафт. Ин дафъа дар дил азм намуд, ки бояд равад ва ба руҳи падари Роҳат дуо кунад. Дар бораи ин азмаш падарро низ хабардор намуд. Бердибой ин азми писарро кори хубу савоб ҳисобид ва баъди каме андеша гуфт:
- Намешавад маро низ ҳамроҳ баред?
- Чаро не? Албатта мебарем,- гуфт Ашӯр.
Ҳамин тавр, як рӯз Ашӯр ҳамроҳи падар ба сафар баромаданд. Баъди панҷ - шаш соат роҳи тӯлонӣ ниҳоят бегоҳӣ ба манзили Роҳат расиданд. Баъди хӯроки шом Бердибой ва Ашӯр барвақт хуфта, саҳар бо Роҳату бародаронаш наҳорӣ намуданд. Нисфирӯзӣ Роҳат чанд ҷӯраашро таклиф намуда ва меҳмондории асосии Ашӯру Бердибойро низ дар хӯроки нисфирӯзӣ гузошта буд.
Баъди намози пешин ва хӯроки нисфирӯзӣ меҳмонон, ки ҳамагӣ ҷавонон буданд, дар долони меҳмонхона байни ҳам баҳсҳо намуданд. Баҳсҳои эшон на сари тиҷорат ва ё муаммое, балки сари масоили шариату дин мерафт. Яке мегуфт, почаи дароз намоз гузоштан гуноҳ аст, бояд ҳатман почаи кӯтоҳ намоз хонда шавад. Дигарӣ мегуфт, ки агар риш мегузоред, ҳатман бояд дароз гузошта шавад, суннати риш як қабза аст. Савумӣ мехост дар бораи кадом моли иронӣ таъриф кунад, ки нафаре гуфт: «Шариф, магар ту шиа шудаӣ?». Ин дам дар бораи хатари шиа баҳс доман гирифт. Аз Эрон як душмани бузург ва ашаддӣ ба вуҷуд оварданд. Агарчи Ашӯр як «ҳа» ё «не» гуфта ҷавоб диҳад, дигар тамоми ҷавонон дар мубоҳиса иштирок намуда, ақидаҳои худро баён менамуданд. Танҳо Бердибой буд, ки ба баҳсҳо ҳамроҳ намешуд. Ӯ сараввал ба ҷавонон бо диққат гӯш дода, ба дил шукрона намуд, ки бачаҳои кӯчаи ӯ чунин баҳсҳо намекунанд. Баъд ба ҳотаи калони назди ҳавлӣ нигарист. Манзараҳои атроф ва баҳси ҷавонон ӯро ба дарёи фикру андеша ғӯттавар намуда буд. Дар ҳоле, ки ҷавонон дар бораи почаи боло намоз хондану риши дароз ва ё шиаву сунӣ баҳс менамуданд, ӯ андеша мекард, ки чаро баҳор ним шудаасту касе ин заминро шудгор намекунад? Чаро шиғи (забори) гирди ҳавлӣ ҳар ҷо - ҳар ҷо валангор шудаасту касе онро дуруст намекунад? Чаро аз ҷои валангори шиғи ҳавлӣ говҳои бегона медароянд ва ин чиз касе аз соҳибхонаҳоро халалдор намесозад? Ба атроф нигариста, ба дил меандешид: «Ин замини наздиҳавлигӣ, ки тахминан 10 сотиқ масоҳат дорад ва ҷӯйбори об аз наздикиаш мегузарад, барои пиёзкорӣ хеле мувофиқ аст. Агар дар он пиёз корида шавад, метавон дар ҳаҷми 5 тонна пиёз ҳосил гирифт. Чунки ин минтақа бисёр офтобрӯя ва ҳосилхез аст. Алъон дар бозор пиёз 3 сомонӣ. Ҳосили гирифташуда 15 000 сомониро ташкил медиҳад. Баъд аз ҷамъоварии пиёз метавон ҷуворимакка ва ё тарбуз дар он кишт намуд. Агар аз ҳосили дуввум тахминан 1000 дона тарбуз гирифта шавад, аз сари замин ҳар донаи онро метавон бо маблағи 5 сомонӣ ба фурӯш гузошт. Дар натиҷа фоидаи ба даст омада 5000 сомониро ташкил медиҳад…».
Баҳси ҷавонон ҳамоно идома дошт. «Бояд розигии Худоро дарёфт»,- қариб ки дод зада мегуфт яке аз ҷавонони кӯсариш. Ин дам ғалоғула зиёдтар шуд ва гӯё ҳама якбора ба баҳс даромаданд. Баъд нохост бародари калонии Роҳат - Саид гуфт: «Биёед ҳамин масъаларо аз Бердибой ако мепурсем. Ин кас шахси пуртаҷриба ва калонсол ҳастанд, зиндагиро хуб мефаҳманд. Медонанд, ки розигии Худо дар чист».
Ҳама ба Бердибой рӯ оварданд. Бердибой дақиқае хомӯш истод. Гӯё намехост сухан гӯяд, вале ҷавонони мунтазири ҳарфи ӯ бударо дида, оҳиста ба сухан оғоз намуд:
- Ман чунин фикр мекунам, ки агар ҳамин замини назди ҳавлиатонро шудгор менамудеду ягон намуд зироат мекоридед, бехи ниҳолҳоро нарм менамудед, ки ҳосилхез мешуданд, шиғи хонаатонро дуруст менамудед, ки говҳои бегона намедаромаданд, ба фикрам аз ҳама бештар розигии Худо дар ана ҳамин мебуд.
Ҷавонон нохост хомӯш шуданд. Саид бо суоли додааш дар ҳолати ногувор монд.

Олимҷон САФОЛОВ

Хонданд 853

NGN-ро пурра тафтиш бояд кард!

Фев 03, 2018
Хонданд: 316

Ростӣ, чизеро, ки намедонам, дар борааш навиштан ҳам намехоҳам, аммо пас аз баҳсҳои журналистони кишвар дар бобати басташавии NGN аз тарафи масъулин, хостам як-ду сухан гӯям.

Худи роҳбарияти Хадамоти алоқа дар нишасти матбуотиаш бо намояндагони ВАО-и кишвар иброз дошт, ки «мо NGN-ро қонунӣ бастаем ва ин низ муваққатӣ аст». Яъне, сабаби баста шудани шабакаи NGN дар ғайриимкон будани назорати зангҳо тавассути интернет, гузаштани зангҳо, истифодашавии рақамгузории маҳаллӣ барои зангҳои байналмилалӣ, пурра фароҳам наовардани шароит барои чораҳои фаврӣ-ҷустуҷӯӣ, риоя нашудани талаботи сифати алоқа, бе қайд ва шиноснома пайваст кардани муштариён ва пешгирии истифодаи шабака барои ҷалби ҷавонон ба созмонҳои террористӣ-экстримистӣ мебошад. Аз ин бармеояд, ки басташавии шабака ҳамагӣ аз рӯйи қонун анҷом ёфтааст ва дар баробари ин, хатари беназорат будани NGN ба амнияти кишвар хатар дорад. Аммо аз чӣ сабаб бошад, ки муҳтарам баъзе аз намояндагони ВАО инро яктарафа баҳо медиҳанд. Барои аслӣ будани беназоратии шабака масъулин далелҳои дақиқро низ пешниҳод карданд, дар мисоли ҳама дар матбуот менависанд, ки истифодабарандагони ин шабака ба 1 миллион нафар мерасад, аммо дар асл ин тавр нест. Ба тафтиши аслии кормандон нигоҳ кунем, шумораи умумии 34 ҳазор нафарро ташкил медиҳад. Пас худ бояд хулоса кард, ки боқимонда шумораи истифодабарандагон ҳамагӣ ғайриқонуниянд. Фаъол будани зиёда аз 60 ҳазор муштарӣ, ки қисми зиёди онҳоро боз муҳоҷирони бурунмарзӣ ташкил медиҳанд, магар хатаре ба амнияти кишвар надорад? Ман сад фисад тарафдори ин тасмими пешгирифтаи Хадамоти алоқа ҳастам, зеро шахс чи тавр бе доштани ҳуҷҷати аслии тасдиқкунандаи шахсияти худ дағдаға карда мегӯяд, ки «ман фалонӣ, бисмадонӣ, фалонзода ҳастам»?
Ба нуқтаи дигари масъала рӯй меорем, ки ин баста шудани қисме аз мессенҷерҳои фаъоли ҷумҳурӣ - Viber, IMО, Telegram ва WhatsApp мебошад. Аввалан бояд таъкид кард, ки аз мессенҷер истифодабарандагони мардуми тоҷик на аз ҷиҳати манфиатовар, балки барои дуздии вақти худ истифода мебаранд. Албатта, гуфтанӣ нестем, ки ҳамаи ин барномаҳо вақдузди мо ҳастанд, аммо на ҳама аз ҷиҳатҳои хуби инҳо истифода мебаранд. Хусусан имрӯз донишҷӯёни тоҷик соатҳо вақти худро дар ин барномаҳо мегузаронанд, ҳатто китобхониро низ қариб ки аз байн бурдааст.
Ҳар тасмиме, ки аз тарафи масъулини мақомоти ҷумҳурӣ гирифта мешавад, танҳо барои беҳбудӣ ва бехатарии мардуми худи мост. Фикр мекунам, зарурати ба кори онҳо дахолат кардан нест. Чун ҳама дар ҷомеа дар мақоми худ масъулу вазифадоранд ва бояд вазифаи худро аз рӯйи виҷдон иҷро кунанд. Зарурате ба валвала ва овозаҳои бардурӯғ паҳн кардан дар сомона ва шабакаҳои иҷтимоӣ нест. Зеро худи роҳбарияти Хадамоти алоқа иброз доштанд, ки дар ҳолати ба пуррагӣ рафъ кардани камбудиҳои ҷойдоштаи шабакаи NGN, онро аз нав фаъол мекунанд.
Хуб мешуд, ки ҳар яке аз мо кори худро мекард, муаллим муаллимиашро, подабон подабониашро, қассоб қассобиашро… Ин фикру андешаи ман перомуни мушкилот буд, боқӣ, фикру андешаи ҳар яки шумост.

Нуралӣ КАРИМ

Алоқаҳои бе(ҳ)сифат

Роҳбарияти Хадамоти алоқа то имрӯз чӣ хизмате барои беҳтар кардани сифати воситаҳои алоқа кардаанд, ки роҳҳои осону арзони тамосро мебанданд. Бо бастани NGN, Viber, IMO ва дигар роҳҳои тамос чиро муҳофизат кардан мехоҳанд, ҳамаро ҳайрон кардааст?!

Амният
Чунин вонамуд мекунанд, ки мессенҷерҳо ба амнияти кишвар хатар доранд. Чӣ гуна хатар? Ягона хатар ин аст, ки бо ин роҳ ҷавононро ба гуруҳҳои ифротгаро ҷалб мекунанд, аммо ин баҳонае беш нест ва сабаб шуда наметавонад, ки онҳо баста шаванд. Ҷалби ҷавонон ба гуруҳҳои тундрав дар аксар ҳолат тариқи шабакаҳои иҷтимоӣ (масалан "Одноклассники") сурат мегирад ва маҳдуд кардани дастрасӣ ба шабакаҳои иҷтимоӣ имконнопазир аст, зеро барномаҳои махсус барои таъмин кардани дастрасӣ мавҷуданд. Ҳама аз ин гуна барномаҳо истифода бурда метавонанд.

Сифат
Сабаби дигари бастани ин воситаҳои тамосро ба сифати пасти онҳо рабт медиҳанд, вале воқеият дигар аст. Дар таҷриба дидаем, ки Viber яке аз босифаттарин воситаҳои алоқа аст. Ба воситаи мессенҷерҳо ҳам маводи садоӣ ва ҳам тасвирию видеоӣ фиристода мешавад. Сифати кори мессенҷерҳо ба ширкатҳои мобилӣ вобаста аст, на ба худи онҳо. Агар суръати интернет хуб бошад, суръати кори инҳо ҳам хеле хуб мешавад. Бар замми ин, мессенҷерҳо бо «суръати сангпуштвор»-и интернет ҳам кор мекунанд.
Тавре мебинем, сабабе вуҷуд надорад, ки ин роҳҳои тамос баста шаванд.
Инро ҳам набояд фаромӯш кард, ки то имрӯз дастрасӣ ба ҳар чизе маҳдуд шуда бошад, он бештар маҳбуб шудааст.

Хайёми САРАХОН

Хонданд 316

“Шоу”-и бебарор

Фев 03, 2018
Хонданд: 509

“Танин” чӣ иштибоҳ кард?

Мурофиаи судии як сокини шаҳри Хуҷанд ва телевизиони “Танин” ба анҷом расид. 23-юми январ Суди шаҳри Хуҷанд 6 нафар - се масъули телевизион ва се ҳамсуҳбати онро 23 ҳазор сомонӣ ҷарима баст. Кормандони ТВ ҳар яке 5-ҳазорӣ, ҳамсари собиқи даъвогар низ 5, модари 79-солаи ӯ - 1 ва раиси занони маҳаллаи онҳо - 2 ҳазор сомонӣ ҷарима шуданд. Тибқи қарори суд, ин ҷуброни хисороти маънавӣ бояд ба ҷабрдида Гулнора Аминова супорида шавад. Илова бар ин, аз ТВ “Танин” тақозо мешавад, ки раддия пахш кунад.
Ҳарчанд феҳристи ҷаримашудагон баёнгари як парвандаи соддаи оилавист, дар асл беш аз як сол тӯл кашидани он ишора ба содда набуданаш мекунад. Ин як баҳси марбут ба рӯзноманигорист, аммо гиреҳхӯрда бо масоили оилавӣ. Маҳз ин нукта Маркази тадқиқоти журналистии Тоҷикистонро ба пайгирии парванда таҳрик дод. Ҳамон натиҷае ба даст омад, ки аз оғоз дар ҳадсу гумонҳои мо вуҷуд дошт. Мо ҳам бештар рӯи баҳси марбут ба пешаи худ - рӯзноманигорӣ тамаркуз кардем ва ҳоло хулосаи мо.

“Зулму ситам”
20 (21)-уми декабри соли 2016 ТВ “Танин” барномае аз рӯзгори як марди “бесарпаноҳ”-ро пахш кард. Қурбон Миробидов - ҳамсари собиқи Гулнора Аминова дар ин барнома (сабташ дар ихтиёри мо қарор дорад) нақл мекунад, ки дар гузашта соҳиби чанд хонаву дар буд, аммо дар пайи “ҷабру зулм”-и ҳамсари собиқ умуман бехона монда, худ дар манзили модар ва ҳамсари кунуниаш бо тифли 11-моҳа дар хонаи падар, ҷудо аз ҳам зиндагӣ мекунанд. Дидани ин навор ҳиссеро ба вуҷуд меорад, ки маҳз “зулму ситам”-и ҳамсари собиқаш ӯро дарбадар кардааст ва ҳам ин сарнавиштро барои ӯ суд аз роҳи қонун рақам задааст. Дар баҳсҳои қаблии судии ин оилаи собиқ як ҳавлӣ, ду ҳуҷра дар баландманзил, 3 гараж, ҳатто дӯкони тиҷоратии оилаи собиқи ӯ моли як тараф - Гулнора Аминова ва се фарзандаш эътироф шудаанд. Аз нақли Қурбон ва модару ҳамсараш бармеомад, ки суд ҳама корро кардааст, то аз ҳама чӣ маҳрум ва дар кӯча монанд.
10-уми январи соли равон Гулнора Аминова аз ТВ “Танин” ва ҳамсуҳбатҳояш ба Суди шаҳри Хуҷанд шикоят бурда, 800 ҳазор сомонӣ, бештар аз 90 ҳазор доллар, ҷуброни маънавӣ талаб кард.
Дар нигоҳи аввал, барномае, ки “Танин” омода кардааст, як ҳисси раҳму ҳамдилӣ ба Қурбон ва бадбинӣ ба Гулнораро ба вуҷуд меорад. Аммо он чӣ Гулнора бо мо дар миён гузошт...
Ӯ моҳи июл ба МТЖТ муроҷиат кард. Ин ҳама пас аз он буд, ки ташхисҳои мақомоти зидахл дар амри ошкор кардани ҳақиқати кор ба ҷое нарасиданд. Як таҳқиқи хурди қаблии МТЖТ нишон дод, ки ин барномаи “Танин” ҳақиқатро комилан чаппа нишон дода, як мушкили ошно, аммо таърифнашудае дар рӯзноманигории моро бармало кардааст...

“Дар барномаи оянда...”
Он ҳам адами тавозун ё баланс аст, ки ин барномаи “Танин”-ро метавон намунаи барҷастатаринаш номид. Қурбони 40-сола, модари 79-солааш Саиднисо Рустамова ва ҳамсари кунуниаш Зулайхои 28-сола, ҳамагӣ сокини деҳаи Унҷии ноҳияи Бобоҷон Ғафуров, Гулнора Аминова ва Суди шаҳри Хуҷандро дар мушкилоти худ, қабл аз ҳама бесарпаноҳӣ, гунаҳкор медонанд. Хуб, ҳақ доранд! Аммо аҷобат дар ин аст, ки аз аввал то охир, расо 30 дақиқа, на номи Гулнора Аминова зикр мешавад ва на суду судяи шаҳр ё ноҳияе, ки ҳукмро содир кардаанд!
Аз ин роҳ гӯё ТВ хостааст хатарҳои эҳтимолиро аз худ дур кунад, аммо инро ба назар нагирифт, ки як доираи муайян аз наздикон ва ё ҳамдеҳаву ҳамшаҳриҳо мухотаби онҳоро ҳатман мешиносанд. Дигар ин, ки дар ҳамчунин баҳсҳо мухотаб хаёлӣ буда наметавонад.
Муаллиф Парвона Аҳророва дар интиҳои барнома зикр мекунад, ки “дар барномаи оянда” назари “ҳуқуқшинос, иҷрочии суд ва ҳамсари собиқаш”, манзур Гулнора Аминоваро ҳам хоҳанд овард. Ҳатто вақте муаллиф мегӯяд, ҳадаф аз овардани ин саргузашт “поймол кардани ҳуқуқи ягон тараф нест” ва таҳиягарон ҳар як барномаро “аз чаҳорчӯбаи қонун набаромада” таҳия мекунанд, бехабар мондааст, ки хеле барвақт ҳуқуқи “ягон тараф”-ро поймол кардаву аз чаҳорчӯбаи қонун ҳам баромада рафтааст. Қисса кӯтоҳ, барнома бидуни тавозуну яктарафа пахш шуд ва ба таври худкор, ба Гулнора Аминова заминаи ба суд кашидани ТВ “Танин”-ро фароҳам сохт.

Чиро гуфт...
Ҳамсуҳбатони “Танин” - Қурбон, модар ва ҳамсари кунуниаш аз ҳукми Суди шаҳри Хуҷанд, ҳамзамон Гулнора Аминова интиқод карданд. Ҳаққи қонунӣ доранд, аммо вақте иттиҳом зада мешавад, бояд далелу ҳуҷҷат низ медошт. Аз наворе, ки дар ихтиёри мост, чанд нуктаи асосиро мавриди зикр медонем, то рӯшан шавад, ки асли гап чӣ асту иштибоҳ дар куҷо содир шудааст. Муҳимтарин нуктаҳо, ки аз даъвои Қурбон ва бар асоси маводи “Танин” бармеоянд, чунинанд: 1) Ӯву Гулнора соли 1997 хонадор шуданд. Соли 2000 бо хоҳару додар ва ҳамсарони бародарони Қурбон муросо накарда, дар микрорайони 32-и шаҳри Хуҷанд як дуҳуҷрагӣ харида, кӯчида рафтанд; 2) Як сол баъд дар шафати дуҳуҷрагӣ Қурбон боз як якутоқа харид; 3) Соли 2010 ҳамсараш Гулнора “хасу чӯб”-у латукӯбро баҳона карда, тақозои ҷудошавӣ намуд; 4) 3 гараж дошт, ки Гулнора онҳоро пас аз ҷудо шудан фурӯхт; 5) Қурбон ҳамон ду ва якҳуҷрагиро ба фарзандонаш, ки аллакай се нафар (як писар ва ду духтар) шуда буданд, бахшид; 6) Писарашон Далер бо ӯ монд. Аммо пас аз дигарбора хонадор шудани падар дар соли 2013 ба назди модар рафт. Сабаб: латукӯб шудани ӯ аз сӯи падар ба он хотир, ки ҳар гапе, ки дар хонаи ӯ мешуд, писар ба модараш хабар медод. Модараш Гулнора писарашро ба экспертиза бурда, зидди падараш тавтиа кард; 7) 8 ҳазор долларро аз хонааш дар баландманзил дуздиданд; 8) Ҳавлии падариашро Гулнора тақсим карда, дар миён девор андохт. Хона мероси падари Қурбон буда, ба 7 меросхӯри ӯ тааллуқ дорад, на фақат Қурбон, аммо Гулнора нисфи онро соҳиб шуд; 9) Баъди як моҳи рафтани писар Гулнора дӯкони Қурбонро “кашида гирифт”. 1 - 1,5 сол бар дараш “муҳр заданд”, дар ҳоле ки Қурбон аз бонк қарздор буд ва ҳар моҳ бояд 600 сомонӣ алимент месупурд; 10) Дӯкон ё “контейнер”-е, ки Гулнора “кашида гирифт”, 120 ҳазор сомонӣ мол дошт ва бояд тақсим мешуд; 10) Қарори суд “сохтакорона” буд. Тамоми амволи муштаракро ба Гулнора дод, ҳатто дӯкон ё “контейнер”-еро, ки ба номи модараш - Саиднисо Рустамова буд. Ҳамин тавр, 2 хона дар баландманзил, 3 сотих ҳавлӣ бо хонаи истиқоматӣ ва 3 гараж (1 - 1,5-ҳазордолларӣ) пурра ба Гулнора гузашт. Маблағи “контейнер” (80 ҳазор сомонӣ) ва мошини “Жигули” (5 ҳазор сомонӣ) миёни онҳо тақсим шуд ва Қурбон ҳаққашро пурра барои алименти фарзандонаш пардохт намуд...
Он чӣ овардем, нуктаҳои асосии баҳс буд, ки рӯзноманигори “Танин” ба таври ҳатмӣ бояд месанҷид, сарашон тамаркуз мекард, зеро ин ҳама маҳз ба обрӯву эътибори Гулнора Аминова ва ҳукми суд рабт дошт. Кори сангин аст, аммо даъвоҳо бояд бо ҳуҷҷат тасдиқ мешуданд.

... ва чиро нагуфт?
Аммо ҳуҷҷату асноде, ки Гулнора Аминова дар ихтиёри мо гузошт, тамоми даъвоҳои болоро ботил бароварданд. Аз рӯи ҳуҷҷатҳо, даъвоҳо на фақат сиҳат надоранд ё таҳриф шудаанд, балки ба дурӯғи маҳз табдил меёбанд ва барнома ҳам ба як матлаби ғайриҳирфаӣ. Далелҳои Аминова бояд дар баробари ҳар нуктаи даъвоҳои Қурбон ва наздикони ӯ оварда мешуданд. Ҳоло бубинед, ки Гулнора Аминова дар муқобили онҳо чӣ пешниҳод кард: 1) Хонаи дуҳуҷрагиро дар микрорайони 32-и шаҳри Хуҷанд на ӯву Қурбон, балки падари Гулнора харидааст. Онҳо ҳеҷ ҳаққе ба ин хона надоштанд, балки иҷоранишин буданд; 2) Якҳуҷрагии шафати онро ҳам на Қурбон, балки падар ва бародари Гулнора барои нигоҳ доштани моли тиҷораташон хариданд. Ҳарду хона ба номи модари Гулнора - Биҳурмат Аминова ҳуҷҷат шудаанд; 3) Соли 2010 Гулнора на барои “хасу чӯб”, балки дар пайи латукӯб (бино ба хулосаи Маркази экспертизаи вилояти Суғд аз соли 2010) ва дигар далелҳо тақозои талоқ кард; 4) “3 гараж” ба Қурбон рабте надоранд. Дар асл гап дар бораи 2 гараж меравад, ки моли падари Гулнора буданд; 5) Вақте хонаҳо аз Қурбон набуданд, мантиқан, ҳаққи бахшидани онҳоро ба фарзандонаш надошт; 6) Писараш Далер бо падар монд. Аммо пас аз дигарбора хонадор шудани ӯ дар моҳи январи соли 2013 моҳи майи ҳамон сол ба назди модар омад. Сабаб (ба қавли Гулнора): а) писар бо падару моиндар рост нагирифт; б) Далер бо падар ва соҳиби тиҷорат буд. Аммо пас аз соли 2013 Қурбон ӯро аз тиҷорат барканор карда, ба ҷои ӯ ҳамсари кунуниашро мегузорад. Далер аз ин кор ранҷида, ба назди модараш меояд; 7) 8 ҳазор долларе, ки дуздида шуд, ба қавли Гулнора, ҳеҷ рабте ба Қурбон надорад. Он чӣ ба яғмо рафт, ҷавоҳирот ва либосҳои пурқимати Гулнора буд, ки ниҳоят пайдо нашуд; 8) Ҳавлии падарии Қурбон дар асл 13 сотих аст, ки бародаронаш 6 сотихи онро ба ӯ дода буданд, яъне ҳеҷ кас ба он даъво надорад. Хонаро соли 2004 - 2007 онҳо (Гулнора ва Қурбон) бо пули тиҷорати худ сохтанд, на соли 2013, ки Қурбон мегӯяд. Ҳасан ва Комил Миробидовҳо, бародарони Қурбон дар суд эътироф кардаанд, ки ин хона солҳои 2004 - 2007 сохта шудааст, на 2013; 9) Дӯконро Гулнора бо кӯмаки падараш дар “Евроряд”-и бозори “Сомон”-и шаҳри Чкаловск ба 4 ҳазор доллар харида, соли 2009 ба номи Қурбон ҳуҷҷат кардааст; 10) “Контейнер” ҳамагӣ 20 ҳазору 300 сомонӣ бор дошт, ки ҳама бо ширкати ҷонибҳо (Гулнора ва Қурбон) ва иҷрочии судӣ ҳисоб шудааст.
Як нуктаи дигар ҳам ба суд рабт мегирад, аммо азбаски суд қарори худро баровардааст, онро дар барнома мешуд ҳамчун посухи расмӣ овард. Гулнора мегӯяд: 11) “Азбаски суд ошкор кард, ки аксарияти амвол ба ӯ тааллуқ дорад ва ҳама бар асоси ҳуҷҷат аст, чунин қарор баровард. Дӯкон ё “контейнер”-е, ки соли 2009 ба номи Қурбон сабт шуда буд, соли 2013, вақте гапи ҷудоии ҳамсарон баромад, бо таърихи гузашта - соли 2009 - ба номи модараш - Саиднисо Рустамова ҳуҷҷат шудааст. Ин сохтакорӣ аст. Ҳоҷӣ Карим, собиқ соҳибмулки бозори “Сомон” дар суд шаҳодат додааст, ки дӯкон ё “контейнер” танҳо як бор соли 2009 ба Қурбон Миробидов фурӯхта шудааст ва танҳо соли 2013 бо Саиднисо Рустамова шартномаи хариду фурӯш ва иҷора бастаанд. Суд маблағи “контейнер” (80 ҳазор сомонӣ) ва мошини “Жигули” (5 ҳазор сомонӣ)-ро, ки аллакай фурӯхта шуда буд, миёни онҳо тақсим кард ва ҳаққи Қурбон пурра барои алименти фарзандонаш то 18-солагиашон дода шуд...
Ин ҳама далелҳои Гулнора аст, ки тавре гуфтем, бо ҳуҷҷатҳо тасдиқ шудаанд. Мо ҷузъиёти масъаларо намеорем, зеро ҳамаро суд баҳсу баррасӣ карда, хулоса баровардаст, аммо он ҳама аз сӯи “Танин” нодида гирифта шуданд. Агар рӯзноманигор ин ҳамаро ба назар мегирифт, ҳам як барномаи “кори калон” мекард ва ҳам кораш ба суд намекашид. Вақте чунин хатоҳои сирф касбӣ содир мешаванд, дигар ҷойи баҳс ҳам бо ҳукме, ки баромад, намемонад.

“Обрӯ”
7 моҳе, ки ин қазияро МТЖТ пайгирӣ мекард, бархе иттифоқоти ҷолибе низ афтода буданд. Аз ҷумла, мо натавонистем ниҳоят муайян кунем, ки “Танин” пас аз пахши барнома пушти вокуниши Гулнора Аминова шуд ё не, зеро аз ҳарду ҷониб ҷавоби мухталиф гирифтем: ТВ мегӯяд, ки даъвогарро даъват кардем, наомад, аммо ба суд дод, аммо даъвогар мегӯяд, ки то муроҷиаташ ба суд даъват нашудааст, балки эътирози ӯро нодида гирифтанд (чизе монанд ба “ҳар куҷое хоҳӣ, рав муроҷиат кун!”) ва маҷбур шудааст, ки ба суд муроҷиат кунад.
Дар ин миён, Шӯрои ВАО-и Тоҷикистон низ аризаи Гулнора Аминова ва вакили дифоъашро дар мавриди ҳамон барномаи “Оила”-и “Танин” ба баррасӣ гирифт ва ба ТВ маслиҳат дод, ки раддия нашр кунад. Зимни тамосҳои мустақими мо бо масъулини “Танин” (мудири ТВ - Шермуҳаммад Шерматов ва сармуҳаррир Қудратуллоҳ Раҳматуллоев), ба мо гуфтанд, ки омодаанд раддия пахш кунанд, аммо Гулнора Аминова онро қабул накардааст. Замоне, ки баҳси раддия мерафт, мурофиаи судӣ баргузор шуд ва қарори худро баровард.
Дар замони мо фоҷиаҳои оилавӣ кам нестанд. Ин хоси як ҷомеаи зинда аст. Аммо азбаски дар Тоҷикистон бахусус вақтҳои охир ин мавзуҳо ҳассос шудаанд ва зиёд мушоҳида мешавад, ки рӯзноманигорон маъмулан аз як ҷониб иттилоъ пахш мекунанд, хавфи дастбагиребониҳои судӣ низ ба миён меоянд. Зану шавҳар метавонанд тариқи суд ё муомилаҳои инсонӣ ба ҷое расанд, зеро ё фикри ояндаи худу фарзандонашонро мекунанд, ё сари ягон иттифоқи назаре меоянд. Аммо иштибоҳеро, ки рӯзноманигор мекунад, оё метавон ҷуброн кард?
Ҳанӯз дар оғози таҳқиқ Гулнора Аминова дар посух ба суоли мо - “чаро аз ҳалли мусолиматомези баҳсаш бо “Танин” худдорӣ кард ё ҳадафаш рӯёндани ҷуброни калон дар ҳаҷми 800 ҳазор сомонӣ аст?” чунин посух дода буд: “Агар боигарии дунёро диҳед ҳам, обрӯи инсонро баргардонда наметавонед”.
Шояд ТВ “Танин” бар ин буд, ки як “шоу”-и монанд ба барномаҳои русӣ кунад, аммо хатои ҳирфаӣ кард ва ҳоло бояд бо қарори суд онро ислоҳ кунад...

Маркази тадқиқоти журналистии Тоҷикистон

Хонданд 509

РОҲИ БЕБОЗГАШТИ РУХШОНА

Фев 03, 2018
Хонданд: 410

Ин воқеа дар деҳаи калону ободи назди маркази вилоят рух дод. Ҷавонзан Рухшона пагоҳӣ ҳамроҳи ду кӯдакаш Рухсораи сесола ва Далери яксола ба хонаи дугона ва ҳамсояаш Нигина омад. Нигина, ҷавонзани боодоби меҳмондӯст аз ташрифи дугонааш хурсанд шуда, Далерро аз дасти ӯ гирифта, Рухшонаро ба оғӯш кашида бӯсиду ҳис кард, ки чашмони меҳмон аз гиря сурх, рӯяш варам аст, аён мегашт, ки вай хеле ашк рехтааст.

- Тинҷӣ, ба ту чӣ шуд, чаро ин қадар гиря кардӣ?
- Ҳеҷ гап не, андаке тобам нашуд, - ҷавоб дод Рухшона.
Нигина аз бозуи Рухшона гирифта ба хона даровард ва ба роҳаткурсӣ ҷой кард, Рухсораро ба курсии дигар шинонду дастархон густурд ва онро бо нону мева зеб дод.
- Ташвиш накаш, ман саросема, фақат бо илтимосе наздат омадам, -матлаб гуфт Рухшона.
- Саросемаҳо куҷо рафтанд, ки мо мондем, - ҳазл намуд соҳиби хона. - Ту чанд вақт ин ҷониб ба хонаи мо наомадӣ, пазмонат шудам.
Нигина ба ошхона баромад ва чанде пас дар дасташ чойники чой оварда, рӯ ба рӯи Рухшона нишаста, ба пиёлаҳо чой рехт, ба Рухсора шоколад дароз карда нон шикасту гуфт:
- Ба дастархон нигар, як пиёла чой нӯшу гап зан, ки чӣ воқеа шуд, чаро ошуфтаӣ, гиря кардӣ, кӣ туро ранҷонд?
- Қиссаи ман хеле ҷонкоҳ аст, - як қулт чой нӯшида гуфт Рухшона.
- Маро ба тори туҳмат печонданд…
Рухшона нафасгир шуда, маҷоли гап заданро гум кард, - Нигина наздаш омада ӯро ба оғӯш кашида, тасалло доду хоҳиш кард, ки воқеаро нақл намояд.
- Ҳафтаи гузашта дар хонаи мо пул гум шуд, касе сандуқро кушода маблағи пасандоз кардаи оилаамонро дуздидааст. Хушдоман, хусур, Комил ва хоҳарарӯсамон Асал ҷамъ шуда, хеле ин тарафу он тарафро кофтанду аз пул нишон наёфтанд ва дар охир ба ман бало монданд.
- Чӣ хел аз ту гумонбар шуданд, ягон асос ё далел ёфтанд?
Нигина Рухшонаро хуб мешинохт, аз вақти ба ин хонадон арӯс шуда омаданаш риштаи дӯстӣ пайваста буд, дар ин муддат ягон маротиба кирдори бади ӯро надид ва якбора ин ҷавонзан модари ду кӯдакро дузд хонданро тасаввур намекард. Вай аз қиссаи ба ин деҳа арӯс шуда омадани Рухшона хабар дошт. Дугонааш сокини ноҳияи Ҳисор буд ва чор сол пеш Комил ҳавлии онҳо рафта, ҳавлиашонро сафолакпӯш мекунаду ба духтари хонавода Рухшонаи зебо ошиқ мешавад. Духтар ҳам нисбати ҷавон бетараф набуд ва ба вай дил баст.
Баъди ба анҷом расидани сафолбандии ҳавлӣ Комил ба хонааш бармегардад ва назди волидони Рухшона хостгор мефиристад. Падари духтар, ки марди боғурур буд, розӣ нашуд, аммо модари Рухшона тарафи духтарашро гирифт.
Тахмин мерафт, ки Рухшона модарашро ба гап гирифта розӣ кардааст, фаҳмондааст, вай ба Комил майл дорад ва нисбаташ бетараф нест.
Хостгорон розигии падари духтарро гирифта натавониста баргаштанд, вале Комил онҳоро ба ҳолашон намемонд. Мегуфт, ки ваю Рухшона ҳар рӯз тавассути телефон гуфтугӯ мекунанд, духтару модараш розиянд, фақат розигии падарашро гиранд.
Падар намехост, ки духтарашро ба ҷойи дур баранд, вале ба занашу духтараш зӯраш нарасид ва билохир ба хостгорон розигӣ дод, вале шарт гузошт, ки духтарашро намеранҷонанд, дур аз волидон гӯён зулм намекунанд.
- Не, қудоҷон! Мо Рухшонаро чун гавҳараки чашм эҳтиёт мекунем, -ҷавоб дод модари Комил, қасам, ки келинро баробари духтар мехонем.
Тӯй дар шаҳри Хуҷанд барпо гашт, аз он ҷо арӯсро ба деҳа оварданд. Зиндагии ҷавонон хуш ибтидо гирифт, аз чизе камбудӣ надоштанд. Рухшонаро дар деҳа хуш пазируфтанд, занону духтарон ба вай унс гирифтанд.
Аз байн чор сол гузашт. Комилу Рухшона соҳиби ду фарзанд шуданд ва зиндагии ҷавонон рангинтар гашт. Асал шавҳар кард, вале зиндагиаш нобарор сурат гирифт ва соле пас ба хонаи волидон бо тифлаш баргашт. Вай асабию дағал шуда омад ва нобарориашро дар хонаи волидон гӯё аз дигарон мегирифт.
Якбора ба ин хонадон чашм расид. Он рӯз ба хушдоман пул лозим шуд ва ӯ сандуқро кушода маблағи гузоштаашро наёфту доду вой кард, аҳли оиларо ба наздаш даъват намуд. Аз ҳар яке пурсид, ки пулро нагирифтааст? Зан гоҳ аз яке шубҳа мекард, гоҳ аз дигаре, бо алам мегуфт, ки дар сандуқ ду ҳазор доллар ва даҳ ҳазор сомонӣ маблағ гузошта буд, вай мехост бо ин маблағ мошин харад, вале ба қавли худаш акнун хар ҳам харида наметавонад.
Асал ба хонаи фолбин рафта фол кушода хабар овард, ки ба хона каси бегона наомадааст, дузд аз худӣ аст. Аз ину он шубҳа карданд ва тирчаи шубҳа ба Рухшона расид.
- Ман пулро чӣ кор мекунам, онро куҷо мебарам, - худро сафед мекард ҷавонзан.- Дар оилаамон серию пурӣ ҳукмфармост, онҳо ба чизе муҳтоҷ нестанд, пули худашон ба зиндагӣ мерасад, сониян ман ба хонаи волидон нарафтаам, онҳо ҳам наздам наомадаанд.
- Дар хонаи мо ягон маротиба пул гум нашудааст,- мегуфт Асал.- Ин бори аввал аст, нафари бегона ба ҳавлиамон наомадааст, ки аз вай шубҳа кунем.
- Магар ту аз ман шубҳа мекунӣ? - ҳайрон шуд Рухшона.- Ман дар умрам тини касеро нагирифтаам ва дар чунин оила ба воя нарасидаам.
- Хушдоман ҳам ба тарафи Асал майл намуду аз ман шубҳа кард,- бо алам ба Нигина гуфт Рухшона. - Ман ба қадрам сӯхтаму ду кӯдакамро гирифта аз хона баромадам.
- Ту вазнин шав, шояд пул аз ягон ҷой барояд,- маслиҳат дод Нигина.
- Ту равӣ онҳоро аз худат гумонбар мекунӣ.
- Бало ба паси гумону шубҳаҳояшон. Медонам, ки як рӯз дузд маълум мешавад, аммо ман ба ин таҳқири кардаашон тоб намеорам, то мурдан инро фаромӯш намекунам.
- Дигар барнамегардӣ? - пурсид Нигина.
- Ҳозир меравам ва роҳи ман бебозгашт аст.
- Ҳозир ман додарамро таклиф мекунам ва мо туро то мошинистгоҳ мебарему роҳкиро дода, гусел мекунем.
Нигина он рӯз Рухшонаю ду кӯдакашро гусел кард, ӯ медонист, ки ба дугонаи мусофираш туҳмат карданд ва аз сабаби бекасӣ нафаре ёфт нашуд, ки тарафи ӯро гирад.
Аз байн ду ҳафта гузашт. Он рӯз пагоҳӣ мошине назди дарвозаи ҳавлии шинос истод ва ҷавони либоси ҳарбипӯш аз дарича дод зад:
- Комил, ту дар куҷоӣ, ин ҷо биё.
Комил назди дарвоза омад ва нозири минтақаи деҳаро дида салом дода, вохӯрӣ карду пурсид:
- Чӣ хизмат сардор?
- Дарвозаро кушо,- фармуд нозир.
Комил дарвозаро кушод ва мошини сияҳшиша ба ҳавлӣ даромад. Аз нишастгоҳи қафо се нафар берун шуданд, ду марди либоси ҳарбӣ дар бар ва марди дар даст завлонадоре. Хушдоман, Асал ва хусур ҳайрон шуда, ба пешвози онҳо омаданд.
- Худаш чӣ гап, тинҷӣ? - пурсид соҳиби хона.
- Не, нотинҷ,- гуфт нозир. - Ба хонаатон дузд даромада пулатонро бурдаасту шумоён ба милитсия хабар надодед ва қозӣ шуда, келинатонро дузд хондеду, аз хона рондед.
- Нафаҳмидам, дузд кӣ будааст?
- Ҳозир ҳамаашро мефаҳмонем,- гуфт нозир ва афзуд. - Комил дарвозаро пӯш.
Марди завлонадорро ба мобайн гирифта, хона дароварданд. Вай сархам буд, маҷоли ба чашми дигарон нигаристан надошт.
- Нишон деҳ, чӣ хел ба хона даромадӣ ва чӣ кор кардӣ?- дӯғ зад ба мард нозир.
- Аз дар даромадам, сандуқро кушодам, пулро гирифтаму ба сандуқ қулфи худашро зада рафтам.
Рафтору гуфтори мардро ба навор гирифтанд. Аҳли оила моту маҳбут буданд, касе маҷоли ҳарф задан надошт.
- Чанд пул гирифтӣ?- пурсид вайро нозир.
- Ду ҳазор доллари амрико ва даҳ ҳазор сомонӣ
Милисаҳо рафтанд. Воқеа дере нагузашта дар деҳа овоза шуд, Нигина ба Рухшона телефон карда ин хабарро расонда афзуд:
- Ҳамашон ба хонаатон рафта, аз ту узр мепурсанд. Тезтар биё дугона, туро пазмон шудем.
- Ман ба ту гуфта будам, ки роҳи ман бе бозгашт, кушанд ҳам барнамегардам, - гиря кард Рухшона.- Волидонам ҳам рафтан намемонанд…
- Гуноҳи Комилро бахш вай дар ин моҷаро айб надорад.
- Чӣ хел айб надорад, марди тарафи занашро нагирифта манфиати ҳамсару ду кӯдакашро ҳифз накарда магар мард аст?...
Оқибати ин моҷаро бо чӣ анҷом меёфта бошад?

Ромиши Фирдавс

Хонданд 410

Хабари-рӯз

Календар

« Ноябрь 2018 »
Пн Вт Ср Чт Пт Сб Вс
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    

Минбари сардабир

  • симКАРта

    Дар ҳафтае, ки гузашт, дар шабакаҳои иҷтимоӣ ин калима аз…

Нигоҳи хос

Парадокс

Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ...
Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ба ...
Гуфтед? Мегӯянд! (№3
Бег САБУР, раиси Хадамоти алоқа:- Ман қарорамро бекор накардаам.Танз: Офарин ба Шумо, оғои Бег ...
Гуфтед? Мегӯянд! (№2
Аскар ҲАКИМ, Шоири халқии Тоҷикистон:- Дар замони шӯравӣ мо асареро пайдо намекунем, ки дар ...
Гуфтед? Мегӯянд! (№1
Абдуалим ИСМОИЛЗОДА, раиси шаҳри Қӯрғонтеппа Хонандаи беҳтарин- Кӯшиш мекунам ҳар рӯз лоақал ...

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.