.

Alternative flash content

Requirements

Get Adobe Flash player

Ҷомеъа

“IRS”: САФАР БЕ ОМОДАГӢ МАСЛИҲАТ НЕСТ

Филиали ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон, ки нигоҳдории роҳи Душанбе-Чанок ба зиммааш вогузор аст, сарфи назар аз вазъи обу ҳаво, фаъолияташро чун ҳарвақта дар сатҳи хуб ва сифати баланд ба роҳ мондааст. 

Ин аст, ки бо вуҷуди номусоидии иқлим роҳи Душанбе-Чанок кушода буда, ҳаракати воситаҳои нақлиёт таъмин аст. Танҳо ба хотири ба вуҷуд наомадани тамбашавии воситаҳои нақлиёт бо назардошти вазъият барои муҳлати кӯтоҳ ҳаракати воситаҳои нақлиёти притсепдор ва “Фура”-ҳо муваққатан боздошта мешавад. Борҳо гуфта будем ва иловатан таъкид менамоем, ки маҳз бетафовутии як идда ба тавсияҳои мо-бобати бе омодагии ҷиддӣ ба роҳ набаромадан, худдорӣ кардан аз сафар бо воситаҳои нақлиёти бидуни тири пешбаранда, ба ҷой овардани эҳтироми ҳамдигар боиси ба вуҷуд омадани тамбашавӣ дар роҳи Душанбе-Чаноқ мегардад. 

Табиист, ки дар чунин ҳолат ашхоси аз асли масъала ноогоҳ борони маломатро сари филиали Ширкат мерезанд, ҳол он ки мо рисолати худро дар сатҳи хубу сифати баланд ва ҳисси баланди масъулиятшиносӣ пеш бурда истодаем.  Аз ҷониби дигар, дар ҳолати мазкур техникаҳои пуриқтидори филиали Ширкат наметавонанд сари вақт ба маконе, ки дар он ҷо боришот шадид аст, сафарбар шаванд. 

Мутаассифона, ҳастанд нафароне, ки гуфтаҳои мазкурро ҷиддӣ қабул накарда, аксар маврид онро худсафедкунӣ арзёбӣ менамоянд. 

Ёдовар мешавем, ки Кумитаи ҳолатҳои фавқулода ва мудофиаи граждании назди Ҳукумати ҷумҳурӣ аз ҳавои ноустувор дар кишвар ҳушдор дода, таъкид намуда буд дар ҷумҳурӣ ҳарорати ҳаво якбора паст шуда, боридани барф дар назар аст. Дар баробари Кумитаи ҳолатҳои фавқулода ва мудофиаи граждании назди Ҳукумати ҷумҳурӣ, Бозрасии давлатии автомобилии Вазорати корҳои дохилии мамлакат низ аз ронандаҳо даъват кард, ки воситаҳои нақлиёти худро барои истифода ба фасли зимистон омода намоянд. 

Бо назардошти гуфтаҳои боло, роҳбарият ва кормандони Филиали ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон шаҳрвандонро бовар мекунонанд, ки сарфи назар аз вазъи обу ҳаво фаъолияти филиали Ширкат чун ҳарвақта дар сатҳи хуб ва сифати баланд сурат хоҳад гирифт. Барои ин шароиту имконоти зарурӣ фароҳам буда, омодагӣ ба мавсими мавриди назар ҷиддӣ аст. Бо дарки масъулият мегӯем, ки Филиали ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон, ба мавсими зимистон омодагии ҷиддӣ ва ҳамаҷониба дидааст. Ҳамватанони азиз хуб дар хотир доранд, ки солҳои қаблӣ роҳи мазкур ҳамасола ба муддати 6-7 моҳ аз сабаби фаромадани тарма ва ҳодисаҳои дигари табиӣ баста мешуд. Замони мавҷуд набудани роҳи муносиб дар ин самт истифодабарандагони роҳ ҳамарӯза бо мушкилоти зиёд дучор гашта, шумораи зиёди одамон ҳатто ҷонашонро аз даст медоданд. Имрӯз бо  шарофати фароҳам омадани шароити муносиб хатарҳои қаблан мавҷудбуда бартараф шуда, аҳолӣ аз роҳи автомобилгарди ба меъёрҳо ҷавобгӯ бархӯрдор мебошанд. 

Замоне ки филиали Ширкати «Инновейтив Роуд Солюшнз» (IRS) дар Тоҷикистон дар асоси шартномаи консесионӣ бо Ҳукумати Ҷумҳурии Тоҷикистон нигоҳдории шоҳроҳи Душанбе-Хуҷанд-Чанокро ба уҳда гирифт, буданд нафароне, ки изҳори норозигӣ мекарданд. Зеро барои гузариши автомобилҳо вобаста ба категорияашон маблағ пардохт мешавад ва мардум гумон мекарданд, ки он ба болоравии роҳкиро сабаб мегардад. Албатта, ин як раванди табиӣ буд, зеро он вақт ҳанӯз моҳияти пулакӣ шудани роҳро мардум хуб дарк накарда буданд. Хушбахтона, бо гузашти вақт сафи норозиён на танҳо коста гардид, балки қариб аз байн рафту ҳоло ҳоло қисмати аъзами мардум аз фаъолияти филиали ин Ширкат изҳори қаноатмандӣ менамоянд. 

Роҳи мавриди назар, ки аз минтақаҳои куҳӣ мегузарад, қаблан дар фасли зимистон барфи зиёд боридаву тармаҳои азим фаромада онро банд мекард. Борҳо шоҳид будем, ки дар чунин ҳолатҳо «IRS» дар муддати кӯтоҳтарин ҳаракатро дар роҳ таъмин кардааст. Муҳимтар аз ҳама, пулакӣ шудани роҳ нархи роҳкироро на афзоиш, балки коҳиш дод. Бо роҳкирое, ки имрӯз ба шаҳру ноҳияҳои вилояти Суғд сафар мекунед, пеш аз «пулакӣ» шудани роҳ сафар кардан ғайриимкон буд. 

Дар баробари нигаҳдории роҳ Ширкат, ҳамчунин корхонаҳои истеҳсоли масолеҳи сохтмонии худро дорад. Корхонаҳои қуму сангреза ва истеҳсоли асфалт бо сармоягузории Ширкат таъсис ёфтаву алъон фаъолияти пурмаҳсул доранд. 

Техникаву механизмҳои филиали Ширкат, ки теъдодашон 181 ададро ташкил медиҳад, роҳсозии замонавии Ширкат имкон фароҳам оварданд, ки мушкилоти дар роҳ бавуҷудомада дар муддати кӯтоҳ бартараф карда шавад. Коршиносон ва журналистон низ эътироф карданд, ки “филиали Ширкат дар давоми фаъолият аз имтиҳонҳои ҷиддӣ гузаштааст. Зеро дар муқоиса ба дигар роҳҳои ҷумҳурӣ, ки нигаҳдориашон ба зиммаи муассисаҳои давлатии нигоҳдории роҳҳои мақомоти иҷроияи ҳокимияти давлатии шаҳру ноҳияҳо гузошта шудааст, роҳи Душанбе-Чанок аз офатҳои табиӣ зиёд осебпазир аст. Дар давоми чанд соли охир бо вуҷуди лағжиши куҳпора ва фаромадани тармаҳои бузург баста нашудани роҳ дар муқоиса ба солҳои пеш қобили мулоҳиза ва арзандаи ситоиш аст.  Айни ҳол дар мувозинаи муассисаҳои давлатии нигоҳдории роҳҳои шаҳру навоҳии мамлакат ҳамагӣ чанд техника мавҷуд аст, ки дар давоми сол шояд ҳамагӣ се-чор маротиба истифода мешаванду халос ва боқимондаи рӯзҳо, бинобар набудани сӯзишворӣ, дар канори роҳ «хоб» мекунанд. Аз ин ҷост, ки роҳҳои дар тавозуни муассисаҳои мазкурбуда хароб буда, умуман ба талабот ҷавобгӯ нест. Чунин тарзи корро дида, мардум аз фаъолияти филиали Ширкати «IRS» дар Тоҷикистон изҳори қаноатмандӣ мекунанд, зеро бо чунин фаъолияти муассисаҳои давлатии нигоҳдории роҳҳои ноҳияи шафати роҳи Душанбе-Чанок шояд шоҳроҳи байналмилалии зикршуда кайҳо хароб мегардид”.

Фаъолияти филиали ширкат аз оғози фаъолият инҷониб собит намуд, ки  бунёди роҳи автомобилгарди мутобиқ ба меъёрҳои ҷаҳонӣ, таъмини ҳаракати озоду бехатари нақлиёт дар роҳҳои мошингарди мамлакат, рушди инфрасохтори роҳҳо аз ҳадафҳои Ширкати саҳомии «Инновейтив Роуд Солюшнз ЛТД» дар Тоҷикистон мебошанд. То ин замон барои фаъолият муназзаму пурмаҳсул дар фаслҳои тирамоҳу зимистон 10 ҳазор  метри мукааб маводи зиддилағжиш, 260 ҳазор литр сӯзишвории дизелӣ, 85 тонна ангишт ва ба миқдори зарурӣ сарулибоси зимистонаи махусус барои кормандон ва ғайра захира шуда, ин омил имкон медиҳад, ки рисолати ширкат, яъне нигоҳдории шоҳроҳ дар сатҳи хуб ва сифати баланд амалӣ гардад. Таҷрибаи чанд соли охир далели возеҳи он аст, ки маҳз дар заминаи ҷаҳду талош ва меҳнати шабонарӯзии кормандони  филиали ширкати фавқуззикр шоҳроҳи мазкур баста набуд. Бинобар ин, аз ронандагон хоҳиш менамоем, ки бидуни омодагие, ки фасли сармо тақозо дорад ва бо автомобилҳое, ки тири пешбар надоранд ба роҳ набароянд, зеро дар баробари он ки худашон ба мушкил мувоҷеҳ мегарданд, ҳамзамон ба ҳаракати дигар воситаҳои нақлиёт монеа эҷод менамоянд.

Табиат қонунҳои нонавиштаи худро дорад, ки аксар вақт инсон дар қиболи он оҷиз аст. Шоҳиди он ҳастем, ки дар баъзе маврид сокинони кишварҳои пешрафтаи олам низ дар робита ба офатҳои табиӣ ба мушкил мувоҷеҳ гардида, ба фаъолияту зиндагиашон латма ворид мегардад.

Бо назардошти ин гуфта муътақидем, ки ҳамватанонамон вазъиятро дуруст дарк намуда, ба он баҳои мунсифона медиҳанд.

 

Маркази матбуоти филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон

Хонданд 50
Пирӯзии Ганҷина Аъзамова - духтари муштзани тоҷик дар Тошканд

Аз 22-юм то 25-уми ноябр дар шаҳри Тошканди Ҷумҳурии Ӯзбекистон мусобиқаи байналмилалӣ дар навъи варзиши муайтай (бокси таиландӣ) миёни занон баргузор гардид, ки дар он Ганҷина Аъзамова, духтари шоир Фурӯзонфар дар вазни 54 кг  соҳиби ҷои аввал шуд ва медали тиллои ин мусобиқаро ба гардан овехта, Парчами миллии кишварро бо садо додани Суруди миллии Тоҷикистони маҳбуб баланд бардошт.  

Ин аввалин пирӯзии Ганҷина баъд аз тамрини дусола бо роҳбарии мураббии шинохта Нормуратов Шерзод дар арсаи байналмилалист. Ганҷина Аъзамова, ки дар муассисаи таҳсилоти миёнаи умумии № 93-и пойтахт таҳсил мекунад, духтари зодагони деҳаи Каздони ноҳияи Айнӣ ва нахустин духтари муштзан аз ин минтақаи кӯҳистон ва водии Зарафшон аст, ки гом ба майдонҳои байналмилалӣ мегузорад. 

Тавре рӯзноманигори тоҷик Мирзо Салимпур дар сомонаи худ “Akhbor.com” навиштааст, “Ганҷина Аъзамова, муштзани ҷавони навраси тоҷик дар саҳифааш дар Инстаграм хабар дод, ки дар мусобиқаи байналмилалии бокси таиландӣ дар шаҳри Тошканд соҳиби ҷои якум ва медали тилои ин мусобиқа шудааст. Ганҷина ба устодаш Н. Шерзод барои омода кардани ӯ ба ин мусобиқа изҳори сипос карда ва бо ифтихор навиштааст, ки "ман шуморо сархам накардам!”. 

Ганҷина Аъзамова духтари шоир Фурӯзонфар, яке аз муқаррабони шоири шаҳиди тоҷик Махсум Олимӣ мебошад. Ӯ дар синфи 11 таҳсил ва дар толори варзишии "Чарх”-и шаҳри Душанбе машқ мекунад. 

Падари ӯ Фурӯзонфар ҳамеша дар суҳбатҳои хоса бо мо изҳори умед мекард, ки духтараш як рӯз ҳатман парчамбардори миллат мешавад ва инак, бо нахустин пирӯзиаш дар арсаи байналмилалӣ Ганҷина орзуи падарро ҷомаи амал пӯшонд.  

Ганҷина, ки пирӯзии гурдофаридона дорад, нахустин духтар аз рустои Каздон ва водии Зарафшон аст, ки дар варзиши муштзанӣ ба чунин мақом расида, боиси ифтихори каздониҳо, зарафшониҳо ва болотар аз ҳама муҷиби ифтихори миллати тоҷик гардидааст.

Бояд гуфт, ки то кунун дар варзиши муштзанӣ комёбии аз ҳама баландро Мавзуна Чориева ба даст овардааст, ки соли 2012 дар Олимпиадаи Лондон сазовори медали биринҷӣ шуд. Умед бар он дорем, ки Ганҷина Аъзамова аз ҷониби Кумитаи олимпии Тоҷикистон ва Мақомоти иҷроияи ҳокимияти давлатии ноҳияи Айнӣ бо Ифтихорнома ва туҳфаҳои хотиравӣ сарфароз мегардад. Зеро дартоварди он боиси қадршиносӣ ва сипосгузорӣ аст. Аммо то куҷо ин мақомоти дахлдор ба ин музаффарият таваҷҷуҳ мекунанд, вақт нишон хоҳад дод.

Бори дигар пирӯзии гурдофаридонаат муборак, хоҳари азиз! Бароят пирӯзиҳои бештарро орзуманд ҳастем.

Ш. ОЛИМОВ,

Х. ШОҲСАИДОВ

Хонданд 91

Ҳамқадами замон

Дек 08, 2018
Хонданд: 111
Ҳамқадами замон

Коллеҷи технологии шаҳри Душанбе,

Замони муосир замони илму техника ва технология буда, дилхоҳ кишвар бе тарбияи мутахассисони сатҳи ҷаҳонӣ ва бе рушди соҳаи илму техника наметавонад рақобатпазирии худро бо кишварҳои дигар таъмин намояд ва ё ҳамеша дар рушду нумуъ бошад. Танҳо тарбияи саривақтии кадрҳои баландихтисос, омӯзиши илми дақиқи техникаву технологияи навтарин имконият медиҳад, ки мо ҳамқадами замон бошем. Маҳз дар чунин як давраи рушди бемайлони илму техника ташкил шудани Коллеҷи технологии шаҳри Душанбе худ аз он гувоҳӣ медиҳад, ки коллеҷи мазкур бо рисолати махсус барои тарбияи кадрҳои баландихтисос дар соҳаи иқтисодиёт, технология ва хизматрасонӣ таъсис дода шудааст.

 

Муассисаи мазкур ҳанӯз аз соли 1939 ҳамчун мактаби киномеханикӣ амал мекард ва аз 11 июни соли 1974 ба омӯзишгоҳи касбию-техникии №57 табдил дода шуда, дар баробари соҳибистиқлол шудани Ҷумҳурии Тоҷикистон соли 1992 ба литсейи техникии №62 ва аз 12.09.2004 ба литсейи технологии шаҳри Душанбе табдили ном кардааст.

Бо қарори Ҳукумати Ҷумҳурии Тоҷикистон аз 28 декабри соли 2006 муассаи мазкур аз сохтори Вазорати меҳнат ва шуғли аҳолии Ҷумҳурии Тоҷикистон ба сохтори Вазорати маорифи Ҷумҳурии Тоҷикистон шомил карда шуда, аз соли 2012 литсейи технологии шаҳри Душанбе ба Коллеҷи технологии шаҳри Душанбе табдил дода шуд. Муассиси «Коллеҷи технологии шаҳри Душанбе» Вазорати маориф ва илми Ҷумҳурии Тоҷикистон мебошад. 

Айни замон дар муассисаи номбурда 116 нафар омӯзгорону кормандон ба таълиму тарбияи наврасону ҷавонон машғул мебошанд. Аз ин шумора 82 нафар омӯзгорон, 14 нафар кормандони техникӣ, 20 нафар кормандони хоҷагидорӣ, 2 нафар номзади илм, 23 нафар омӯзгорони дараҷаи олӣ, 9 нафар дараҷаи якум, 6 нафар дараҷаи дуюм ва 14 нафар аълочиёни соҳаи маориф ва илм буда, инчунин 51 нафар омӯзгорон дорои тахасуси олии касбӣ мебошанд.

 

Факултетҳо ва шуъбаҳои коллеҷ

Коллеҷи мазкур дар асоси сохтори намунавие, ки аз ҷониби Вазорати маориф ва илми Ҷумҳурии Тоҷикистон тасдиқ шудааст ва дар асоси Қонуни Ҷумҳурии Тоҷикистон «Дар бораи маориф», «Низомномаи намунавии муассисаҳои таҳсилоти миёнаи касбии Ҷумҳурии Тоҷикистон», «Стандарти давлатии таҳсилоти миёнаи касбии Ҷумҳурии Тоҷикистон» ва дигар санадҳои меъёрию ҳуқуқие, ки фаъолияти муассисаҳои таълимиро ба танзим медарорад, фаъолият менамояд. 

Дар Коллеҷ факултетҳо ва шуъбаҳои зерин амал мекунанд:

шуъбаи таълим, шуъбаи ташкилию тарбиявӣ ва кор бо ҷавонон, шуъбаи илм ва робитаҳои хориҷӣ, шуъбаи кадрҳо, корҳои махсус ва бойгонӣ, шуъбаи муҳосибот, шуъбаи хоҷагидорӣ, шуъбаи таҳсилоти ибтидоии касбӣ, маркази бақайдгирӣ ва машварат, факултети технологияи иттилоотӣ ва хизматрасонӣ, факултети баҳисобгирӣ ва иқтисодиёт.

 

Ихтисосҳое, ки дар коллеҷ омӯхта мешаванд.

Дар Коллеҷи технологии шаҳри Душанбе донишҷӯён ва хонандагон аз рӯи 10 ихтисоси амалкунанда дар зинаи таҳсилоти миёнаи касбӣ ва 3 ихтисоси амалкунанда дар зинаи таҳсилоти ибтидоии касбӣ ба таҳсил фаро гирифта шудаанд.

Ихтисосҳои дар зинаи тасилоти миёнаи касбӣ амалкунанда:

2-400101 - Таъминоти барномавии технологияи иттилоотӣ;

2-400101.35 - Таъминоти барномавии коркарди маълумотҳои иқтисодӣ ва иттилооти корӣ; 

2-020601.03 - Технология (меҳнати хизматрасонӣ);

2-500135 - Технологияи истеҳсолоти дӯзандагӣ;

2-500135.01 - Технологияи масолеҳи дӯзандагӣ;

2-500134.06 - Тарроҳӣ ва поракунии либоси нассоҷӣ (равияи тарроҳии либосҳои миллии тоҷикӣ); 

2-250135 - Ҳисоби муҳосибӣ, таҳлил ва назорат;

2-250131 - Молия;

2-250131.02 - Андоз ва андозбандӣ;

2-250132 - Кори бонкӣ.

Ихтисосҳои дар зинаи тасилоти ибтидоии касбӣ амалкунанда:

3-400252.01- Системаи компютерӣ ва интернет-технология;

3-250152.02 - Муҳосиб (бо донистани компютер);

3-500155 - Дӯзанда; 

Бояд қайд кард, ки ихтисосҳои мазкур комилан ихтисосҳои замонавӣ буда, дар ҷомеа талабот ба онҳо хеле зиёд аст ва дар бозори меҳнат рақобатпазир мебошанд. Аз рӯи ихтисосҳои номбурда 1370 нафар донишҷӯён ва хонанадагон ба таҳсил фаро гирифта шудаанд, ки аз ин шумора 360 нафар донишҷӯён дар шуъбаи ғоибона ва 1010 нафар дар шуъбаи рӯзона таҳсил мекунанд. 

Коллеҷ тибқи иҷозатнома оид ба ҳуқуқи пешбурди фаъолияти таълимӣ ба хатмкунандагони муассиса ҳуҷҷати намунаи давлатӣ (диплом)-и дараҷаи миёнаи касбӣ медиҳад ва хатмкунандагони коллеҷ метавонанд тибқи равия ба муассисаҳои таҳсилоти олии касби ҷумҳурӣ таҳсили худро давом диҳанд.

 

Синфхонаҳои муҷаҳҳазгардонидашуда ва китобхонаҳои муассиса

Синфхонаҳои муассисаи таълимӣ бо проектор ва тахтаҳои электронӣ муҷаҳҳаз гардонида шуда, ҳар кадоме синфхонаҳо бо 10 компютер ва таҷҳизотҳои дигари техникӣ комилан таъмин мебошанд, ки ба сари 6 нафар донишҷӯ 1 компютер рост меояд, ки дар муқоиса бо дигар муассисаҳои таълимии ҷумҳурӣ нишондоди назаррас аст. Инчунин дар муассиса як маркази тестӣ фаъолият мекунад, ки аз 26 адад компютер ва 6 адад тахтаҳои электронӣ бо проекторҳо иборат аст.

Сайругашти мо дар коллеҷ нишон дод, ки ҳама утоқҳои кории кормандон ва кафедраҳо пурра бо компютерҳо ва принтерҳо таъмин карда шудаанд ва ин кори омӯзгорон ва кормандони техникиро боз ҳам осонтару муносибтар гардонидааст.

Муассисаи таълимӣ дорои китобхонаи анъанавӣ ва электронӣ буда, шумораи умумии китобҳои китобхона 6504 ва китобҳои электронӣ 7000 ададро ташкил медиҳанд, ки муҳассилин пурра бо китобҳои дарсӣ, тахассусӣ, илмӣ-методӣ, ҷамъиятӣ-сиёсӣ, модулҳо ва китобҳои бадеӣ таъмин буда, аз он устодону донишҷӯён самаранок истифода мебаранд. Толори васеъу барҳавои китобхона имконият медиҳад, ки донишҷӯёну устодон дар вақтҳои ба худ муносиб, дилхоҳ китобҳоро интихоб карда, мутолиа намоянд ва дарсҳои худро ҳаматарафа тайёр намоянд. 

 

Усули муосири гузаронидани дарсҳои таҷрибавӣ

Таҷрибаомӯзӣ қисми муҳим ва ҷудонашавандаи таълим, барои тайёр кардани мутахасисони соҳибмаълумот дар Коллеҷи технологӣ ба шумор рафта, аз тарафи устодони соҳибтаҷриба бо мақсади шиносоӣ бо истеҳсолот, пайвастани назария бо амалия ва баланд бардоштани маҳорати касбии донишҷӯён ба роҳ монда шудааст. Ҳамаи дарсҳои амалӣ нахуст дар синфхонаҳои комилан муҷаҳҳазгардонидашуда гузаронида шуда, донишҷӯёни курсҳои якум, дуюм ва сеюми коллеҷи мазкур баъди бомувафақият супоридани сесияи аттестатсионии нимсолаи дуюм, ба таҷрибаомӯзии таълимӣ аз рӯи 2-кредит (32 ва 48 соат) ба муҳлати ду ҳафта сафарбар карда мешаванд. 

Сафарбарнамоии донишҷӯёни муассиса дар асоси талаботи нақшаи таълимӣ ва тартиби таҷибаомӯзии хонандагону донишҷӯёни муассисаҳои таҳсилоти ибтидоӣ ва миёнаи касбӣ, ки аз ҷониби вазири маориф ва илми Ҷумҳурии Тоҷикистон тасдиқ гардидааст, ба роҳ монда шудааст. Раванди таҷрибаомӯзии донишҷӯён аз ҷониби роҳбарият ва роҳбарони таҷрибаомӯзӣ ҳамеша таҳти назорат буда, ба донишҷӯён оиди тартиби гузаштани таҷрибаомӯзӣ ва таҳия намудани ҳисобот тавсияҳои методӣ дода мешавад. 

Дар коллеҷи технологии шаҳри Душанбе ҳангоми ба таҷрибаомӯзӣ сафарбар намудани донишҷӯён ба онҳо барномаи таҷрибаомӯзӣ, рӯзнома ва роҳхат дода мешавад. Мувофиқи ҷадвали қабули ҳисоботҳои таҷрибаомӯзӣ донишҷӯён дар назди кафедра комиссияи ташкил карда шуда, ҳисоботҳои пешниҳоднамудаи донишҷӯёнро таҳлил намуда, ба онҳо ҳайати комиссия баҳогузорӣ менамоянд. Натиҷаи кори комиссияи назди кафедра дар варақаи баҳогузории донишҷӯён сабт гардида, дар офиси бақайдгирӣ ва машваратӣ нигоҳ дошта мешавад.

 

Хобгоҳи муҷаҳҳаз бо шароитҳои зарурӣ

Коллеҷ дорои хобгоҳи 4-ошёна мебошад, ки дар ҳудуди худи коллеҷ бунёд шуда, аз 108 ҳуҷра иборат аст. Дар ошёнаи дуюм 104 нафар донишҷӯёни коллеҷ зиндагӣ мекунанд, ки аз шаҳру навоҳии гуногуни кишвар барои таҳсил фаро гирифта шудаанд. Ҳамзамон 21 нафар устодони коллеҷ бо оилаҳояшон зиндагӣ мекунанд. Дар ҳар ошёнаи хобгоҳ ҷои махсус барои омода намудани таом ва шустушӯ ҷудо карда шуда, бо ҳамаи ашёҳои зарурӣ таъмин карда шудааст. Дар хобгоҳ инчунин толори махсус барои дарстайёркунӣ ҷудо карда шудааст. 

Дар Коллеҷи технолгии шаҳри Душанбе ятимони кул вобаста ба имконият, аз ҷониби роҳбарияти муассиса ва омӯзгорон дастгири ёфта, ба онҳо дар хобгоҳи коллеҷ утоқи зист барои истиқомат ройгон дода мешавад ва бо идрорпулӣ таъмин карда шуда, дар арафаи иду ҷашнҳо ба онҳо либос ва лавозимоти хониш тақдим карда мешаванд, ки ин иқдом қобили дастгирӣ аст. 

 

Дастовардҳо

Коллеҷи технологии шаҳри Душанбе ҳамчун муассисаи давлатии таълимӣ дар самти фаъолияти худ ба дастовардҳои назаррас ноил гардида, барои фароҳам овардани шароити мусоиди таълим, дар доираи имкониятҳои мавҷуда ҳамаҷониба кӯшиш менамояд. Дар соли таҳсили 2016-2017 бинои асосии муассисаи таълимӣ пурра аз таъмир бароварда шуда, мавриди истифода қарор гирифт ва муассиса ба шабакаи гармидиҳии шаҳри Душанбе бо барқарорсозии қубурҳои обгузар пайваст карда шуд. Ҳамчунин коллеҷ аз моҳи январи соли 2016 ба Маркази миллиии тестии назди Президенти Ҷумҳурии Тоҷикистон дохил шуда, қабули довталабон ба муассисаи таълимӣ, тариқи имтиҳонҳои марказонидашудаи дохилшавии ММТ ба роҳ монда шудааст. Дар Коллеҷ донишҷӯён аз тамоми манотиқи кишвар барои таҳсил ҷалб шудаанд, ки ин обрӯву нуфузи муассисаи мазкурро боз ҳам боло мебарад. 

Дастоварди дигаре, ки мавриди зикр қарор дорад, бахшида ба эълон гардидани соли 2018 “Соли рушди сайёҳӣ ва ҳунарҳои мардумӣ” мебошад, бо дастгирии Вазорати маориф ва илми Ҷумҳурии Тоҷикистон дар Коллеҷ чор ихтисоси нав (ихтисоси “Таъминоти барномавии коркарди маълумотҳои иқтисодӣ ва иттилоотӣ - корӣ”, “Дӯзанда”, “Системаи компютерӣ ва интернет-технология” ва “Муҳосиб бо тавоноии кор дар компютер”) кушода шуданд, ки мақсад аз кушодани чунин ихтисосҳо, ба роҳ мондани низоми самарабахши таълим ва ҷалби ҷавонон ба касбу ҳунар мебошад. 

 

Ҷойҳои беҳтарин дар олимпиадаҳо

Ҳамасола донишҷӯёни Коллеҷи технологии шаҳри Душанбе дар олимпиадаҳои дохилӣ ва ҷумҳуриявӣ фаъолона иштирок намуда ҷойҳои намоён ва ифтихориро соҳиб мегарданд. Соли таҳсили 2017-2018 донишҷӯёни Коллеҷ дар олимпиадаи рафиқона байни муассисаҳои таълимии шаҳри Душанбе иштирок намуданд. Аз он ҷумла ҷойҳои 2-юм-ро аз фанҳои химия, забони англисӣ, информатика ва физика донишҷӯёни бахши якум Ҷомиев Тоҳир, Раҷабова Зулайхо, донишҷӯи бахши сеюм Маҳмудова Гулрухсор соҳиб шуданд. Ҷои сеюм бошад насиби Ҷабборова Ганҷина аз фанни забони русӣ гардид.

 

Баҳои баланд аз тарифи Пешвои миллат

Дастоварди беназире, ки муҳасилини Коллеҷи технологии шаҳри Душанбе дар баробари дигар муассисаҳои таҳсилоти миёна ва олии касбии Ҷумҳурии Тоҷикистон ба даст оварданд, ин гирифтани баҳои баланд аз ҷониби Президенти Ҷумҳурии Тоҷикистон Эмомалӣ Раҳмон ҷиҳати саҳмгузорӣ ва иштироки фаъолонаи муҳассилини Коллеҷ бо як ҳисси баланди ватандорӣ дар чорабинии театркунонидашуда бахшида ба Рӯзи президенти Ҷумҳурии Тоҷикистон ва мавриди истифода қарор гирифтани иншооти бузурги Аср-чархаи аввалини НБО-и “Роғун” мебошад.

 

“МТЖТ”

Хонданд 111

ВНМО марговар нест, агар…

Дек 01, 2018
Хонданд: 254
ВНМО марговар нест, агар…

Муттахассисони соҳа мегӯянд, вируси норасоии масунияти одам (ВНМО) марговар нест, ба шарте, ки нафарони олуда ба ин вирус таҳти назорати ҷиддӣ бошанд, сари вақт дар дармонгоҳҳо доруҳои махсуси ин бемориро истеъмол кунанд. Бино ба гуфтаи онҳо, дар 7-8 соли аввали олудашавӣ ба ин вирус одам, ба мисли дигар бемориҳои сироятӣ, ягон дардро эҳсос намекунад. Монанди одамони солим ҳаёти маъмулӣ пеш мебарад, фарзанддор мешавад ва ғайра.

Сокини пойтахт Мақсуда (номи шартӣ) 30 сол ва 2 фарзанди ноболиғ дорад. Ӯ ва ҷигарбандонаш- ҳар се олудаи вируси ВНМО мебошанд.

Бо номбурда, ки дар хонааш суҳбат оростем, гуфт, миёни мардум овозаҳо дар мавриди он ки ба ин вирус танҳо занони сабукпо олуда мешаванд, нодуруст аст. Ӯ чунин мепиндорад, ки аз олудашавӣ ба ин вирус касе пурра дар амон буда наметавонад.

Бо Мақсуда дар хонааш суҳбат оростем. Номбуда гуфт, 18 сол дошт, ки падараш ӯро ба як ҷавони хешашон, ки аз вай 9 сол калон буд, ба занӣ дод.

-Соли 2005 падарам маро ба шавҳар дод. Ҷавонро қаблан дуруст намешинохтам, ӯ чанд сол боз дар Русия буд. Шаш сол зиндагии якҷоя доштем. Аввалҳои зиндагиямон дилбеҳузурӣ дошт, гоҳ-гоҳ табаш баланд мешуд, бештар хоб мекард. Фикр мекардам, ки бемор аст, аммо ба беморхона рафтан намехост. Баъдан фаҳмидем, ки муътоди маводи мухаддир будаасту онро ба воситаи сӯзандору ба баданаш мегузаронидааст. Ҳамин тавр, соли 2007 писарам ва соли 2009 духтарчаам таваллуд шуд. Соли 2010 шавҳарам ба бемории сил гирифтор шуд ва барои табобат дар беморхона лозим шуд, то аз ташхиси ВНМО гузарад. Вақте ба Маркази ҷумҳуриявии бар зидди ВНМО муроҷиат кардем, дар хунаш вирус пайдо шуд. Сипас ба ман ва кӯдакон ҳам супориш доданд, ки хун супорем. Дар хуни мо ин вирус пайдо шуд. Ҳолатеро, ки он замон, пас аз фаҳмидани олудашавиям доштам, бо сухан тасвир карда намешавад. Зистан намехостам, вале ба хотири фарзандон чӣ кор карданамро намедонистам. Тоқат накардаму чанд рӯз пас ба падару модарам гуфтам. Маро фаҳмиданд, аз ман дурӣ наҷустанд. Аз ҳамон рӯз эътиборан бо фарзандонам ба қайди марказ ҳастем ва сари вақт доруҳои тавсияшударо истеъмол мекунем. Шавҳарам, ки болои ин боз ба бемори сил ва гепатит мубтало шуда буд, соли 2011 вафот кард,-гуфт Мақсуда.

Ҳамсуҳбати мо мегӯяд, зиндагии маъмулӣ дорад, вале доим аз эҳтиёт кор мегирад. Ба ҷуз наздикон касе аз ҳамсояҳо дар бораи олуда буданаш ба ин вирус хабар надоранд. Бино ба гуфтаи Мақсуда, фарзандонаш дар мактаби ҳамагонӣ таҳсил мекунанд, аълохон ҳастанд, вале дар бораи беморияшон касе дар мактаб намедонад.

Ман фарзандонамро аз ҳоло барои фаҳмидан дар бораи беморияшон тайёр карда истодаам. Ба онҳо дурӯғ намегӯям. Айни ҳол онҳо медонанд, ки дар хунашон вирус ҳаст, вале кадом навъи вирус намедонанд. Баъдтар, вақте калонтар мешаванд, хоҳам гуфт. Онҳо медонанд, ки агар ё дар мактаб ё саҳни ҳавлӣ ҳангоми бозӣ афтида, бинӣ ё ягон ҷои баданашон хун ояд, бояд касе ба онҳо даст нарасонад, танҳо худашон онро пок кунанд. Инро ман доимо ба онҳо таъкид мекунам,-гуфт дар идома Мақсуда.

Мақсуда мегӯяд, илова бар ин 6 сол мешавад, дар Маркази ҷумҳуриявии бемориҳои ВНМО ба ҳайси машваратчӣ кор мекунад. Ӯ бо нафароне, ки тоза аз олудашавияшон огоҳ мешаванду дар ҳолати бади равонӣ қарор доранд, суҳбат мекунад ва мекӯшад, онҳоро мутмаин созад, ки дар сурати зери назорати духтурон будан, сари вақт истеъмол кардани доруҳо ва идора кардани вирус ин беморӣ ҳалокатбор нест.

Қаҳрамони мо бовар дорад, вирусе, ки дар баданаш мавҷуд аст, хуруҷ намекунад, зеро пайваста доруҳои лозимаро истеъмол мекунад.  Ӯ мегӯяд, метавонад оила бунёд карда, зиндагияшро обод кунад. Ба хостгорҳои, ба қавлаш, хира ҳам рӯирост аз беморияш ҳарф мезанад, то аз онҳо огоҳ бошанду худ тасмими ниҳоӣ бигиранд. Мақсуда намехоҳад касеро фиреб диҳад, вале мабодо агар он нафар аз ҷои дигар, масалан тавассути хунгузаронӣ дар беморхона ва ё роҳҳои дигар мубтало шавад, баъдан наздиконаш ӯро гунаҳкор меҳисобанд. Ҳарчанд касе аз олудашавӣ ба ин вирус эмин буда наметаравад. Аз ин рӯ, беҳтар медонад, сабр кунад, то дар оянда шояд назари ҷомеа нисбат ба мубталоён дигар шаваду табъиз миёни аҳолӣ ба барандагони ин вирус аз байн равад. Мақсуда гуфт, ҳолати издивоҷи зани олуда вируси ВНМО-ро ба марди солим медонад, ки зиндагии осудаву хушбахтона доранд. Зан ҳар се моҳ пас аз назорати табибони соҳа мегузарад, доруҳояшро мегирад. Ин ҷуфт чор сол боз бо ҳам зиндагӣ доранд, соҳиби писарчаи дӯстрӯяки солим ҳастанд. Мард ҳар шашмоҳа ташхис мегузарад, аз сабабе, ки вируси занаш фаъол нест, мард олуда намешавад.

Ба фарқ аз Мақсуда, ки мегӯяд, соли 2005 аз шавҳараш сироят ёфтааст ва то ҳоло бо истифода аз доруҳои лозима ва ташхисҳои саривақтӣ ба зиндагии маъмулияш идома дода истодааст, Розия (номи шартӣ)-и 27-сола ҳамсуҳбати дигари мо се моҳ қабл аз олуда буданаш ба ин вирус огоҳ гардидааст.

Мутахассисони соҳа бемори ВНМО-ро яке аз муаммоҳои ташвишовари ҷомеаи ҷаҳонӣ, бахусус Тоҷикистон арзёбӣ мекунанд ва ба қайд гирифтани аввалин нафари олуда ба ин вирусро дар кишвар ба соли 1991 рабт медиҳанд, ки аз он замон то ҳозир хеле доман паҳн кардааст.

Духтури эпидемиолог, мутахассис оид ба арзёбӣ ва баҳодиии Муассисаи давлатии Маркази ҷумҳуриявии пешгирӣ ва мубориза бо бемории ВНМО Камолиддин Боймуродов мегӯяд, нишонаҳои нахустини ВНМО аввали соли 80-уми асри гузашта дар Амрико пайдо шудааст ва аз ҳамин давра ин эпидемия дар ҷаҳон рӯ ба паҳншавӣ ниҳодааст.

Камолиддин Боймуродов мегӯяд, то соли 2010-2011 омили асосии паҳншавии вируси ВНМО дар кишвар ин беморони тазриқӣ, ки тариқи сӯзандору ба баданашон маводи мухаддир ворид мекунанд, буданд. Таҳлилҳо нишон додааст, ки бо истифода аз роҳҳои фаҳмондадиҳӣ, паҳн кардани сӯзандоруҳои яккаратаву рифолаҳо миёни ин табақаи осебпазир фоизи паҳншавии вируси ВНМО аз ин ҳисоб кам гардидааст. Вале ин мутахассиси ҷавон бо таассуф иброз дошт, солҳои охир ин вирус аз ҳисоби расонандагони хизматҳои шаҳвонӣ, фоҳишаҳо, ки ба алоқаи ҷинсии бетартибона машғуланд, ба қайд гирифта шуда истодааст ва беш аз 60 фоизи мубталоён дар ҷумҳурӣ аз ин ҳисобанд.

Тибқи омори расмӣ аз соли 1991 то санаи 1-уми октябри соли равон дар ҷумҳурӣ 10 842 нафар мубталоёни ин вируси ВНМО ба қайд гирифта шудаанд, ки аз ин ҳисоб 65 дарсадро мардон ва 35 фоизашонро занон ташкил медиҳанд. Аз шумораи умумии ба қайдгирифташудагон 2816 нафар аллакай фавтидаанд.

Соли 2016 дар ҷаҳон бар асари ин беморӣ беш аз 1 млн. нафар фавтидааст. Сабти сирояти он бештар дар гурӯҳи осебпазири аҳолӣ-муҳоҷирони корӣ ва аҳли оилаи онҳо дониста мешавад.

Шамсулло ФОЗИЛОВ, “ФАРАЖ”

Хонданд 254

Хабари-рӯз

Календар

« Январ 2019 »
Пн Вт Ср Чт Пт Сб Вс
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      

Минбари сардабир

  • ДАВоДАВ

    Масофаи роҳ бо машинае, ки 150 ҳазор доллар нарх дорад…

Нигоҳи хос

  • Баҳонаи зистан

    Мақсад доштан маънои баҳонае барои нафас гирифтанро дорад. Соли 2018…
  • МАСЛИҲАТ

    Аз дидаву шунида Салом, хонандагони гиромии ҳафтаномаи «Фараж»! Мо аз…

Парадокс

Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ...
Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ба ...
Гуфтед? Мегӯянд! (№3
Бег САБУР, раиси Хадамоти алоқа:- Ман қарорамро бекор накардаам.Танз: Офарин ба Шумо, оғои Бег ...
Гуфтед? Мегӯянд! (№2
Аскар ҲАКИМ, Шоири халқии Тоҷикистон:- Дар замони шӯравӣ мо асареро пайдо намекунем, ки дар ...
Гуфтед? Мегӯянд! (№1
Абдуалим ИСМОИЛЗОДА, раиси шаҳри Қӯрғонтеппа Хонандаи беҳтарин- Кӯшиш мекунам ҳар рӯз лоақал ...

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.