.

Alternative flash content

Requirements

Get Adobe Flash player

Ошибка
  • JUser: :_load: Не удалось загрузить пользователя с ID: 527
Шанбе, 26 Август 2017 10:56

«Просто бизнес»

Магар камбағал дигар таҳсил накунад?!

- Ба синфи якум рафтан аз ба донишгоҳ шомил шудан мушкил аст, мегӯяд як дӯстам, ки писараш имсол мактабрав шудааст.
- Аз аввали сол мо ба ҷустуҷӯи мактаби мувофиқ барои писарамон шудем,- мегӯяд ӯ ва меафзояд:- Мо мехостем, ки писарамонро ба мактабе диҳем, ки синфи русӣ дошта бошад ва дар ҳар як гурӯҳ аз 25 нафар зиёд набошад. Албатта, мехостем, ки мактаб намунавӣ бошад ва дар сатҳи зарурӣ дар он раванди таълиму тарбия сурат гирад. Вале ба имконияти мо, ки ману завҷаам дар муассисаҳои давлатӣ кор мекунем, чунин мактаб пайдо накардем. Дар аксари мактабҳои давлатии гирду атрофамон дар шаҳри Душанбе синфҳои русиро бастаанд. Ба чанд мактаби хусусӣ муроҷиат кардем, вале нархҳои дандоншикани онҳо барои мо мувофиқ набуд. Аксари онҳо барои 10 моҳи таълим 12 ҳазор сомонӣ мехостанд, ки ин хеле гарон аст. Масалан, дар мактаби хусусии «Андешаҳои пок», ки дар гузаргоҳи дуюми кӯчаи Зеҳнӣ воқеъ аст, барои таҳсили хонандаи синфи якум 12 ҳазор сомонӣ мехостанд. Албатта, аксари ин муассисаҳо аз соати 8 то 16 хонандаро ба машғулияту бозӣ фаро мегиранд.
- Моҳи май аз рӯи эълон кӯдакистон - мактаби «Омина»-ро дар рӯ ба рӯи Сафорати ИМА дар Душанбе пайдо кардем,- суханашро идома дод дӯстам.- Боғчаи мазкур бори аввал ба синфи якум хонанда қабул мекард. Шарти мактаби мазкур ба мо писанд омад. Дар ин мактаб синфи русӣ кушода мешуд ва аз синфи аввал забони англисӣ дарс дода мешуд. Ба мо ваъда доданд, ки дар як синф аз 20 нафар зиёд хонанда таҳсил намекунад ва онҳо то соати 16 дар мактаб мемонанд. Ба мактаббачаҳо як маротиба хӯроки гарм медиҳанд ва барои ҳамаи ин моҳе 500 сомонӣ мегиранд, ки солона 5 ҳазор сомонӣ мешавад. Мо ба ин шарт розӣ шуда, писарамонро номнавис кардем. Вале аввали моҳи август ба мо гуфтанд, ки шарти таҳсил дигар шудааст. Мактабро Муборакхон ном муаллимаи соҳибкор иҷора гирифтааст.
Ӯ волидонро ҷамъ карда гуфт, ки «шарти таҳсил дигар мешавад. Кӯдакони шумо аз соати 9 то 12 таҳсил мекунанд ва тӯли 6 моҳ нархи пешина - моҳе 500 сомонӣ боқӣ мемонад. Баъд нархро зиёд мекунем. Агар то соати 16 кӯдаконатон дар мактаб монанд, пас мактабпулӣ 1 ҳазору дусад сомонӣ дар як моҳ мешавад».
Шарти мазкур барои мо мақбул набуд. Аввалан, мо бояд соати 8 дар ҷои кор шавем. Дуввум, то соати 8 кӯдак куҷо меистад ва соати 12 ӯро кӣ аз мактаб мегирад? Сеюм, нархи таҳсил боло мерафт ва мо онро пардохта наметавонистем. Мо ба ин шарт розӣ нашуда, ҳуҷҷатҳои писарамонро гирифтем ва ба мактаби маҳаллаамон супоридем,- гуфт дӯстам.
Воқеан ҳам, ҳоло волидон барои пайдо кардани мактаби мувофиқ барои кӯдаконашон ба мушкилӣ гирифторанд. Волидоне, ки кор мекунанд, наметавонанд фарзандашонро ба мактаби таҳсилоти умумии давлатӣ монанд, зеро кӯдак баъди 3-4 соати дарс дар кӯча мемонад. Барои кӯдакони чунин ашхос бояд синфҳои таҳсилаш то бегоҳ ташкил карда шаванд. Зеро кӯдакро наметавонӣ дар хона танҳо монд. Дар мактабҳои хусусӣ бошад, нархи таҳсил аз донишгоҳҳо ҳам гаронтар аст. Соли равон таҳсил дар аксари донишкадаву донишгоҳҳои Тоҷикистон ба ҳисоби миёна аз 6 то 8 ҳазор сомонӣ дар як сол аст. Масалан, таҳсили шартномавӣ дар факултаи муолиҷавии ДДТТ ба номи Абӯалӣ Ибни Сино солона 8 ҳазор сомонӣ муқаррар шудааст.
Суоли дигаре ба миён меояд: Чаро солҳои охир дар шаҳри Душанбе синфҳои русӣ дар мактабу кӯдакистонҳои давлатӣ баста шуданд? Ин дар ҳолест, ки Асосгузори сулҳу ваҳдати миллӣ - Пешвои миллат, Президенти Тоҷикистон Эмомалӣ Раҳмон борҳо дар суханрониҳои худ аз омӯзиши забонҳои хориҷӣ ҳарф мезанад ва ба донистани чанд забон даъват мекунад. Аз ҷониби дигар, тибқи моддаи 2-юми Конститутсияи Тоҷикистон, «Забони давлатии Тоҷикистон забони тоҷикӣ аст. Забони русӣ ҳамчун забони муоширати байни миллатҳо амал мекунад. Ҳамаи миллатҳо ва халқиятҳое, ки дар ҳудуди ҷумҳурӣ зиндагӣ мекунанд, ҳуқуқ доранд аз забони модариашон озодона истифода кунанд».
Ман шогирдоне дорам, ки ба забони англисӣ ва баъзе ба арабӣ озод муошират мекунанд, вале забони русиро надониста, ба мушкилот рӯ ба рӯ мешаванд. Зеро дар мактаб забони русӣ нахондаанд ва ё ба он таваҷҷӯҳ накардаанд.

Як маълумотнома - 10 сомонӣ
- Вақте фарзандамро ба синфи якум бурдам, аз стансияи санитариву эпидемиологии ноҳия маълумотнома талаб карданд,- мегӯяд як шиноси ман.- Ҳол он ки, картаи тиббии кӯдакро пешниҳод карда будам. Вақте ба Стансияи санитарию эпидемиологии ноҳияи Сино омадам, волидони зиёде дар навбати маълумотномагирӣ меистоданд. Чун навбатам расид, котиба зодномаи фарзандамро гирифта ҳамту маълумотнома навишт, ки тӯли 21 рӯзи охир касе аз ин хонавода бемории сироятӣ нашудааст. Ӯ барои ин амал 10 сомонӣ хизматона гирифт.
Воқеан, ин маълумотнома ба хотири чист? Агар мабодо касе аз оила ба касалии сироятӣ гирифтор бошад, магар фарзанди ин хонадонро ба мактаб намегиранд?
Тибқи моддаи 41-уми Конститутсияи Тоҷикистон, «Ҳар шахс ҳуқуқи таҳсил дорад. Таълими умумии асосӣ ҳатмист. Давлат таълими умумии асосии ҳатмии ройгонро дар муассисаҳои таълимии давлатӣ кафолат медиҳад». Дар моддаи 6-уми Қонуни Ҷумҳурии Тоҷикистон «Дар бораи маориф» низ ин нукта тасдиқи худро ёфтааст.
Магар ин поймолкунии ҳуқуқи конститутсионии шаҳрванд ба таҳсил нест?
Ё ин ба қавле «просто бинес аст». Тасаввур кунед, ки агар дар як ноҳия 10 ҳазор нафар ба синфи якум раванд, 10 сомонӣ сари касе ин маблағ 100 ҳазор сомонӣ мешавад. Маблағи мазкур ба кисаи кӣ медарояд? Зеро барои ин амал квитансия дода намешавад. Ва билохира, магар як маълумотнома 10 сомонӣ арзиш дорад?!

Либоси ҳатмии мактабӣ
Соли равон дар муассисаҳои таҳсилоти умумии шаҳри Душанбе либоси ҳатмии мактабӣ талаб карда истодаанд. Ҳар мактаб муқаррар кардааст, ки хонандагону муаллимонаш бояд ҳатман аз як ширкати хусусии дӯзандагӣ либос харанд. Масалан, хонандагону муаллимони макотиби ноҳияи Сино бояд ҳатман аз Ширкати «Тоҷ» воқеъ дар маҳаллаи 102-юм либоси мактабӣ бихаранд. Аз шогирдони синфи якум талаб карда мешавад, ки камаш ба 175 сомонӣ аз ин ҷо барои либоси мактабӣ чек оранд. Барои синфҳои болоӣ ин маблағ зиёд мешавад. Муаллимон бошанд, бояд на камтар аз 350 сомонӣ чеки либос оранд.
Бояд гуфт, ки чек танҳо барои харидани шиму костюм ва кофтаю юбка дода мешавад. Агар курта ва шими иловагӣ гиред, ба он чек намедиҳанд. Маълум, ки бо ин роҳ мехоҳанд иҷборан шиму костюми дӯхтаи худро ба мактаббачаҳо фурӯшанд. Волидон аз ин амал изҳори норозигӣ мекунанд, ки ба маблағи мазкур аз бозори «Корвон» сарулибоси беҳтар ва арзонро харидан мумкин аст.
Воқеан, чаро волидон ва умуман муаллимон бояд маҳз аз ширкатҳои муқарраркардаи мактабҳо либос харанд?! Чаро шаҳрвандон дар хариди либоси мактабӣ озод нестанд? Шояд дар таги коса нимкосае бошад?
Воқеан, ин ширкатҳои либосфурӯшӣ ба кӣ тааллуқ доранд ва кӣ аз ин манфиат мебинад? Директорони мактаб оё дар ин бизнес ҳамроҳанд ё онҳоро аз боло супориш додаанд?
Чунин ба назар мерасад, ки мансабдорон ба ҷои осон кардани мушкили мардум бо ҳар роҳу восита мехоҳанд онҳоро корафтодаи худ бикунанд.

Ҷовид МУҚИМ 

Тавре хонандагони гиромӣ огоҳанд, ҳафтаномаи «Фараж» ду шумора пеш (№30 (556), аз 26-уми июли соли 2017) аз суханҳои ҷолиби дар нишастҳои матбуотӣ садодода иқтибосҳо оварда буд. Тасмим гирифтем дар ин шумора низ чанд «масалгуфтор»-ро, ки лоиқи баҳсу мулоҳиза ҳастанд, ба табъ расонем.

1. Гавҳар ШАРОФЗОДА, раиси Кумитаи забон ва истилоҳоти назди Ҳукумати Ҷумҳурии Тоҷикистон:
А. Дар нимсолаи аввал аз ҷониби гурӯҳи корӣ ба 26 муроҷиати шаҳрвандон оид ба номгузории фарзандонашон хулоса пешниҳод гардид, ки аз он ба ду муроҷиат посухи рад дода шуд. Ду номи радшуда Асмоа ва Облоқул мебошанд. Облоқул шакли шикастаи Аллоҳу Акбар мебошад, ки шакли талаффузи туркиро гирифтааст. Дигар Асмоа буд, ки аз нигоҳи маънӣ ҷамъи исмҳост, ки чандон ба меъёр мувофиқ набуд. Дар мавриди номҳои ғайримуқаррарӣ, аз ҷумла Ардвирасура ба манобеи қадимии суғдию бохтарӣ муроҷиат кунед, дар он Ардивасура номи яке аз фариштаҳост.
Б. Дар ҳар қадам меъёр хато, гуфтор хато, навиштор хато аст, ман мебинам. Дар асоси низомномаи Кумитаи забон ва истилоҳоти назди Ҳукумати Ҷумҳурии Тоҷикистон, мо назораткунандаи иҷрои ин талабот ҳастем. Шумо ба кумита занг бизанед, санг бизанед, маломат кунед, ки дар фалон гузаргоҳ, дар фалон таблиғгоҳ, шабакаҳо, рӯзномаҳо меъёри забони адабӣ вайрон шуда истодааст, Кумитаи забон куҷоро нигоҳ карда истодааст? Мо дар асоси муроҷиати шумо тавонем равем ва татбиқи назорати қонунро ба роҳ монем!

2. Зариф АЛИЗОДА, Ваколатдор оид ба ҳуқуқи инсон дар Тоҷикистон:
А. Иштирок дар маршировкаҳо ихтиёрӣ ва барои ҷавонону ҷомеа манфиатовар аст. Мо қадамҳои аввалро дар ин самт гузошта истодаем. Муассисаҳое, ки ҷавононро ба маршировка сафарбар мекунанд, бояд донанд, ки кадом кӯдак имконият надораду бемор аст, ё ягон узри дигар дорад ва бояд ҷалб карда нашавад. Бояд ғамхорӣ карда, кӯдаконро бо обу дигар лавозимот таъмин кунанд.
Б. Зӯроварӣ на танҳо нисбати занону кӯдакон, балки нисбати мардон низ ҷой дорад. Ҳолатҳое ҷой доранд, ки мардон даст ба худкушӣ задаанд. Зӯроварии ҳам ҷисмонӣ ва ҳам рӯҳӣ нисбати мардон ҷой дорад. Бештар албатта азоби рӯҳӣ медиҳанд. Мегӯянд, ки ин одам ин хел карду ту карда наметавонӣ! Баъзан мардон имконият надоранд, аммо занҳо талаб мекунанд. Пойро ба андозаи кӯрпа дароз кардан даркор. Бояд тамоми масоили хонаводагӣ бо маслиҳат ҳал шаванд. Дар солҳои охир баҳсҳои оилавӣ махсусан сари молу мулк зиёд шудааст.

3. Раҷабмоҳ ҲАБИБУЛЛОҲЗОДА, Ваколатдор оид ба ҳуқуқи кӯдак дар Тоҷикистон:
Дар мавриди ҷалби иҷбории ноболиғон ба «маршировка»-ҳо шикояте дарёфт накардаем. Маълумот дар мавриди ҳалокати як хонандаи мактаб дар натиҷаи маршировка дар шаҳри Ваҳдат барои ҷашни Ваҳдати миллиро мо надорем.
Ҳар шахс бояд ҳисси миллӣ дошта бошад ва кӯдакону калонсолон бояд дар ҷашнҳои сатҳи миллӣ иштирок кунанд. Ин ҷо ягон поймолкунии ҳуқуқи кӯдакон дида намешавад.

4. Ҷумъа ДАВЛАТОВ, раиси Агентии хизмати давлатии назди Президенти Тоҷикистон:
А. Санҷишҳои дар ҳукуматҳои маҳаллии навоҳии Лахш, Айнӣ, Қубодиён, Ёвон, Роштқалъа, шаҳри Панҷакент ва раёсатҳои адлия ва шуғли аҳолии ВМКБ гузаронидашуда муайян кард, ки дар мақомоти иҷроияи ноҳияи Лахш аз соли 2013 то 2016 озмун барои ишғоли мансабҳои холӣ нагузаронида, кормандон бидуни озмун ба мансабҳо таъин шудаанд. Мудири шӯъбаи кишоварзии ноҳияи Лахш бо таҳсилоти олии нопурраи омӯзгорӣ, мудири бахши сармоягузорӣ ва идораи амволи давлатӣ бо ихтисоси меъмор-муҳандис, котиби комиссия оид ба ҳуқуқи кӯдаки ноҳия бо ихтисоси технологияи истеҳсолоти полиграфӣ, раиси ҷамоати шаҳраки Ваҳдат бо таҳсилоти олии нопурра, сармуҳосиби ин ҷамоат бо таҳсилоти миёнаи касбӣ таъин шудаанд. Бархе раисони навоҳӣ мансабдоронро бидуни мувофиқа бо мақомоти марказӣ таъин кардаанд. Барои камбудиҳо дар соҳаи хизмати давлатӣ 3 нафар ба ҷавобгарӣ кашида шудаанд.
Б. Нисбати мансабдорони соҳиби душаҳрвандӣ дар мақомоти давлатӣ фишоре нест. Имконияти интихоб дода шудааст. Нафароне, ки шаҳрвандии давлати дигарро доранд, метавонанд яке аз шаҳрвандиро интихоб кунанд ва ҳангоми интихоби шаҳрвандии Тоҷикистон метавонанд дар хизмати давлатӣ боқӣ монанд. Фикр мекунам, ин масъала ташвишовар нест. Миёни 20 ҳазор хизматчии давлатӣ ҳамагӣ 20 нафар дорои душаҳрвандӣ буданд, ки ин боиси ташвиш нест.

5. Маҳмад РАҲИМЗОДА, роҳбари Маркази миллии қонунгузории назди Президенти Тоҷикистон:
А. Шахсан набераамро Ашкиноз ном ниҳодам, ки дар Феҳрасти номҳои миллӣ нест. Номро қабул карданд, шаҳодатнома гирифтам. Дар сурати зарурӣ комиссия номи пешниҳодкардаи волидонро баррасӣ мекунад, агар номи зебо бошад, қабул мекунад. Ин ба манфиати мо аст. Ҳатто дар Русия нисбат ба тарзи дурусти номгузорӣ як таваҷҷӯҳи хоса пайдо шудааст.
Б. Дар Кодекси нави ҷиноятӣ дар бисёри ҳолатҳо ҷарима ҷои ҳабсро мегирад. Башардӯстӣ дар қонунҳои кишвар бартарият дорад. Дар Конститутсия ҳуқуқу озодиҳои инсон арзиши олӣ муайян шудаанд. Дар 25 соли Истиқлолият ҳар 1,5 сол дар Тоҷикистон авф татбиқ мешавад, ин гуманизм аст. Инсонро танҳо бо ҳабс кардан тарбия кардан мумкин нест, аммо куллан бидуни ҳабс ҳам намешавад. Баъзе роҳҳои дигари тарбия вуҷуд дорад. Дар қонунгузорӣ принсипи оқилона пешбинӣ шудааст. Вазифаи мо тарбияи инсон аст, на қатлу ҷазо.

6. Файзиддин ҚАҲҲОРЗОДА, раиси Кумитаи сармоягузорӣ ва идораи амволи давлатии Тоҷикистон:
А. Барои фаъолияти ширкатҳои эронӣ ҳеҷ маҳдудияте вуҷуд надорад. Тоҷикистон баръакс ҳавасманд аст, то соҳибкорони эронӣ дар иқтисодиёти кишвар сармоягузорӣ намоянд. Ширкатҳои эронӣ имрӯз дар иншооти мо хуб фаъолият доранд, вале дақиқан гуфта наметавонам, ки барои чӣ онҳо имрӯз дар Тоҷикистон маблағгузорӣ карда наметавонанд. Агар имрӯз таваҷҷӯҳ карда бошед, теъдоди хеле зиёди ширкатҳо дар Тоҷикистон фаъолият доранд, ки барои фаъолияташон ягон монеае нест. Ба қарибӣ бо соҳибкорони ҶИЭ оид ба таъсиси корхонаи коркарди партовҳои сахти маишӣ дар шаҳри Душанбе чанд вохӯрӣ доштем. Омодагӣ доранд, ки ҳудуди 100 миллион доллар барои таъсиси чунин як корхона дар Тоҷикистон ҳамкорӣ намоянд. Ин масъала ҳоло ҳам дар сатҳи кумита ва ҳам дар сатҳи мақомоти шаҳри Душанбе мавриди баррасӣ қарор дорад.
Б. Мӯҳлати фурӯши корхонаҳои “Сементи тоҷик”, осоишгоҳи Хоҷаобигарм ва корхонаи дӯзандагии “Гулистон” то поёни соли ҷорӣ дароз карда шудааст. Ҳоло вобаста ба ин иншоот корҳои барномарезӣ идома доранд. Корхонаи дӯзандагии “Гулистон” аз “Фононбонк” ва “Амонатбонк” қарздор аст ва айни замон сари ин масъала гуфтушунид идома дорад ва дар назар аст, то охири сол оид ба истифодаи минбаъдаи он ба мувофиқа бирасем. Корхона айни ҳол фаъолият дорад. Дар як қисми бино бо эҳтиёҷмандии корхонаҳои давлатӣ, як қатор корхонаҳои давлатӣ ҷойгир карда шудаанд ва қисмати дигари корхона фаъолияти пурсамар дорад.

7. Шералӣ ГАНҶАЛЗОДА, муовини вазири нақлиёти Тоҷикистон:
А. Маҳз ширкатҳои чиптафурӯшӣ аз тармафароиҳо ва роҳбандии Душанбе-Хуҷанд сӯйистифода карда, нархи чиптаро боло бурданд. Ширкатҳои ҳавоӣ манфиатдор нестанд, ки дар чунин ҳолатҳо нархро боло баранд, чун онҳо аллакай нархи номиналиро пештар муайян кардаанд. Дар чунин рӯзҳо аз нуқтаҳои чиптафурӯшии назди “Сомон Эйр”-у “Тоҷик Эйр” истифода намоед, чун он ҷо сӯйистифода намешавад. Одатан дар рӯзҳои парвоз нархи чиптаи ҳавопаймо боло меравад. Тартиби ҷаҳонӣ аст, ки агар 80 фоиз чиптаҳо фурӯхта шаванд, нархи 20 фоизи дигар қимат мешавад. Супориш додем, ки болоравии якбораи нархи чиптаи ҳавопаймо дар рӯзҳои роҳбандӣ таҳқиқ шавад.

8. Худоёр ХУДОЁРЗОДА, вазири нақлиёти Тоҷикистон:
А. Дар кишвар, бахусус дар шаҳри Душанбе ҳолатҳои дағалии ронандаю пулчинакҳои нақлиёти мусофирбар ҷой дорад. Давоми 8 сол ба ҳайси муовини вазири нақлиёт кор кардам ва рӯзҳои шанбею якшанбе аз хидматрасонии нақлиёти ҷамъиятӣ истифода мебурдам. Рӯзе ба нақлиёти мусофирбар савор шудам, то гардиши микрорайони 33 маро бурд. Он ҷо дар нақлиёт танҳо мондам, ки ба ронанда занг заданд. Баъд ӯ ба ман гуфт, ки фаро ман бояд баргардам. Гуфтам, чӣ хел фароям, бояд маро то охир барӣ. Оқибат маро фуровард, ман номери «Тангем»-ро гирифтам, рӯзи дигар хадамоти давлатии назорат он ронандаро ба утоқи кориям оварданд. Ӯ маро дида, монанди муш меларзид. Гуфт, ман гумон намекардам, ки муовини вазир ҳам ба «Тангем» савор мешавад. Гуфтам, ман ҳамчун муовини вазир не, ҳамчун шаҳрванд савори нақлиёти ҷамъиятӣ шудам. Иҷозатномаи он мардро гирифтанд, хеле гиряю нола кард.
Б. Аз ду ҷониб “Узбакистон ҳаво йуларӣ” ва “Сомон Эйр” иҷозатномаи 2 парвоз дар як ҳафтаро гирифтаанд, аммо ба далели камбуди мусофирон “Узбакистон ҳаво йулларӣ” низ ҳамагӣ ҳафтае як маротиба рӯзҳои сешанбе парвоз анҷом дода истодааст. Созишнома миёни Ҳукумати Тоҷикистон ва Ӯзбекистон ба имзо нарасидааст ва парвозҳо дар асоси протокол амалӣ мешаванд. Дар пайи анҷоми тамоми расмиёт “Сомон Эйр” низ парвозҳоро амалӣ хоҳад кард.

9. Абдувосид ЮЛДОШЕВ, ёвари директори Маркази миллии тестии назди Президенти Тоҷикистон:
- Довталабу наздиконашон бояд ҳушёр бошанд, зиракиро аз даст надиҳанд. Дар низоми имтиҳони марказонидашудаи дохилшавӣ, касе қодир нест, ки ба натиҷаи довталабон таъсир расонад. Қаллобӣ дар ҳар давру замон буд, пеши инро ҳеҷ кас гирифта наметавонад. Аммо ин амалҳо ҳеҷ рабте ба Маркази миллии тестӣ надоранд.

10. Илҳомҷон АТОЕВ, муовини аввали раиси Хадамоти алоқа:
- Сардори Хадамоти алоқа тибқи талаботи маъмурӣ рӯзҳои қабул доранд. Агар хоҳед бо ӯ мулоқот кунед, муроҷиат кунед, мо ташкил мекунем. Бег Сабур дар сафари хидматӣ қарор доранд.

11. Мирзо ИСМОИЛЗОДА, раиси ширкати “Барқи тоҷик”:
- Барои нигоҳдории иншооти энергетикӣ ва беҳбуди вазъи молию техникӣ ниёз ба болобарии нархи барқ вуҷуд дорад. Лекин зиёд намудани нархи нерӯи барқ аз тарафи Хадамоти зиддиинҳисорӣ дар мувофиқа бо ниҳодҳои дигар бо қарори Ҳукумати Тоҷикистон амалӣ мешавад. Ҳозир ин масъала мавриди баррасӣ қарор дорад. Агар бо қарори ҳукумат нарх зиёд шавад, мо ҳамчун иҷрокунанда ин қарори ҳукуматро амалӣ мекунем.

Таҳияи Шамсулло ФОЗИЛОВ

Шанбе, 14 Октябр 2017 11:00

Зиёев ва К°

Пасандози мизоҷони “Тоҷпромбонк” дар куҷост?

Ба Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон 

Ба Раиси Кумитаи давлатии амнияти миллии Тоҷикистон, генерал-лейтенант Саймумин Ятимов

АРИЗА

Муҳтарам Ҷаноби Президент, Пешвои миллат!
Бо арзи эҳтироми зиёд ба Шумо, Президенти Тоҷикистон ва Пешвои миллат ва бо ҷонибдорӣ аз сиёсати пайгиронаатон дар амри беҳбуди некӯаҳволии аҳолӣ ва мубориза бо коррупсия дар кишвар, боз бо як аризаи навбатӣ муроҷиат мекунам. Бовар дорам, ки ин мавзуъ таваҷҷуҳатонро ҳамчун Сарвари давлат ҷалб менамояд.
Дар робита ба аҳамияти ҷамъиятӣ доштани масъала эҳтиромона хоҳиш менамоям, ки ба Кумитаи давлатии амнияти миллии ҶТ супориш диҳед, то нисбати собиқ раиси Ҷамъияти саҳомии “Тоҷпромбонк” Зиёев Ҷамшед Азизович ва аъзои гуруҳи ӯ парвандаи ҷиноӣ оғоз намуда, онҳоро барои дуздии воситаҳои пулии ман ва садҳо миллион маблағи аҳолии Тоҷикистон (670 нафар), ки ҳамчун пасандоз дар ихтиёри бонки ӯ гузошта шуда буданд, ба ҷавобгарии ҷиноятӣ кашанд.
Факту далелҳо нишон медиҳанд, ки Зиёев ва гуруҳи ӯ бо роҳи фиреб ва сӯйистифода аз боварии амонатгузорон воситаҳои пулии шаҳрвандонро аз рӯи нақшаи қаблан тарҳрезишуда бо ин роҳҳо дуздидаанд:
1. Дар шаҳри Душанбе, ноҳияҳои Ҳисор, Варзоб ва дигар ноҳияҳои ҷумҳурӣ аз ҳисоби пасандози амонатгузорон барои истифодаи шахсӣ ӯ барои худ ва хешовандонаш даҳҳо истироҳатгоҳ, хона, биноҳои гаронқимат, тарабхона ва нуқтаҳои савдо харидаву бунёд кардааст. Барои рӯйпӯш намудани дуздии маблағҳои амонатгузорон бошад, ӯ арзиши аслии иншооти ба ихтиёри бонк гирифта ва харидашударо зиёд нишон додааст, маблағҳои зиёд нишондодашударо бошад, аз худ кардааст!
Ҳамзамон, гӯё ба манфиати давлат ва ҷамъият кор мекарда бошад, боз ҳам бо мақсади шахсан бой шудан ва манфиати наздиконаш амал намудааст. Маблағҳои амонатгузоронро барои сохтмони корхонаҳои саноатӣ, ки қудрати истеҳсоли маҳсулотро надоранд ё ин ки фоидаовар нестанд, сарф намуда, ҳаҷм ва нархи онҳоро зиёд нишон додаасту зиёдатиашро боз аз они худ намудааст.
Яъне:
2. Ба номи шахсони дигар дар Маскав як бонки тиҷоратиро ташкил дода, он ҷо худ, ҳамсар ва писарашро ҳамчун саҳом ва сармоягузор ба расмият дароварда, бо роҳи ҳиллаҳои тиҷорӣ ва амалиётҳои бонкии гуногун, ғайриқонунӣ ба он ҷо (аз рӯи баъзе маълумотҳо ба Англия низ) амонатҳои пулии аҳолии Тоҷикистонро дар ҳаҷми даҳҳо миллион доллар интиқол додааст.
3. Аз ин ҳисоб дар маркази шаҳри Маскав як квартира, як хонаи боҳашаммати гаронқимат (қариб 3 миллион доллари ИМА) дар як ноҳияи ашрофнишини шаҳр ва дар Подмосковйе як маҷмааи тиҷоратиро харидааст.
4. Бо мақсади шустан (отмывание)-и пулҳои бо роҳи ҷиноӣ ба даст овардашуда ва тамоман рӯйпӯш намудани дуздии маблағҳои амонатгузорон, бо баҳонаи буҳрони иқтисодӣ (бо пуштибонҳояш аз мақомоти болоӣ ва маъмурияти муваққатии “Тоҷпромбонк”), фаъолияти ин бонкро барҳам дода, ӯ муфлисии сохтаро расман эълон намуда, арзиши моликияти бонкро, ки барои барқарор кардани пасандози амонатгузорон бояд фурӯхта шаванд, ба таври сунъӣ 2-3 баробар зиёд кардааст. Ин ҷо ҳам Зиёев нақшаеро истифода бурдааст, ки амалан пардохти маблағҳои амонатгузоронро номумкин мекунад ва тамоми фикру андешаи ӯ барои пӯшидани дуздии қаблан анҷомдодааш равона шудааст, ки ин идомаи фаъолияти ӯ ва ғорати аҳолӣ то риштаи охиринаш мебошад!
Акнун ба баъзе факту далели ҳуҷҷатӣ рӯ меорем.
1. Соли 2016 дар ҳоле ки пасандозҳои аҳолиро аз рӯи талабот ва ба охир расидани муҳлати шартномаҳо намедод, ӯ ва аъзои гуруҳаш дидаву дониста арзиши воқеиву бозории моликияти худ (автомашинаҳо, мағозаҳо, хонаҳову биноҳо ва дигар амволи ғайриманқул)-ро 2-3 маротиба боло нишон дода, ба амонатгузорон пешниҳод намуд, ки онҳоро ба ҷои қарз бо нархҳои осмонӣ бигиранд!? Масалан: мошинаи сабукрави куҳнаи «Опел»-ро, ки арзиши аслиаш аз 400 доллар зиёд нест, ба 3 ҳазор доллар пешниҳод намуданд. Қимати “Мерседес (Сечка)”, мошинҳои боркаш ё дигар намуди техника, хонаҳо ва амволи ғайриманқулро на камтар аз ду баробар зиёд нишон доданд. Бо ин кор тарроҳони нақша амонатгузоронро маҷбур карда, барои онҳо ҳеҷ имкони интихобро нагузоштанд, ба ғайр аз он ки ба шартҳои бонк розӣ шаванд.
Як қисми амонатгузорон ҳатто аз фоизҳои худ даст кашиданд ва маҷбур ҳар чиро, ки пеш омад, гирифтанд, то билкулл маҳрум намонанд ва ҳамин тавр, ҳисороти ҷиддии моддӣ диданд. Амонатгузорони дигар, ки дар миёни онҳо ман ва писарам Соиб Ҷӯраев (чемпиони чандинкаратаи Тоҷикистон оид ба шоҳмот, ки дар синни ҷавонӣ касбашро аз сабаби набудани маблағ барои такмил додани малака, пардохти ҳаққи мураббиён ва ширкат дар мусобиқаҳои байналмилалӣ тарк кард) ҳам будем. Аммо мо талаб кардем, ки бонк уҳдадориҳои шартномавии худро иҷро кунаду маблағи моро баргардонад.
Соли 2013 писаронам хонаашонро фурӯхтанд ва барои мардикорӣ ба Россия рафтанд. Қисми маблағашон - 45 ҳазор доллари ИМА-ро бошад, мо дар “Тоҷпромбонк” амонат гузоштем. Тайи ду соли ахир ман, писарам ва намояндаамон тариқи ваколатнома 79 маротиба (!) ба бонк муроҷиат кардем, то амонати моро баргардонанд. Чандин маротиба тариқи ариза, аз ҷумла ба раиси Бонки миллии ҶТ (нусхаҳояш пешниҳод мешаванд) муроҷиат карда, хоҳиш намудам, ки лоақал 20 ҳазор доллари онро диҳанд, то ҳаққи чопи китоби худ - “Ман муфаттишам!”-ро дар нашриёти “Молодая гвардия”-и Маскав пардохт кунам. Раҳбарони бонк - Зиёев ва Эшов, ҳамчунин мудири муваққатии бонк ва муовини ӯ, ҳар дафъа моро бо суханони “ана, имрӯз, ана, пагоҳ” гӯл мезаданд! Ҳамин тавр, ба ман, амонатгузорони дигар, нафақахӯрон ва камбизоатон пасандозҳоямонро надоданд, аммо ба сарватмандон ва мизоҷони бахусус доро, бо камоли майл ва бидуни ягон мушкил маблағҳояшонро доданд! Зиёев ва Эшов ба ман ва намояндаам худро хеле сафед карданд, ки чаро ба эҳтиёҷмандон тангае надоданд, аммо 300 ҳазор долларро ба “одамони муътабар” доданд!...
Марҳамат, бубинед, ки дар идома ин гуруҳи муташаккил чӣ гуна амал мекунад!
1. Соли 2017 баъд аз он, ки қарори барҳам додани бонк ва фурӯши дороиҳои он содир шуд, Зиёев боз ҳам тариқи созиш бо аъзои гуруҳаш ва ширкати баъзе роҳбарони Комиссияи барҳамдиҳӣ даст ба дуздии моликияти бонк зад, ки барои соҳибӣ, ихтиёрдорӣ ва истифодаи онҳо аллакай ҳақ надошт.
А) Моҳи май Комиссияи барҳамдиҳӣ ба амонатузорон рӯйхати дороиҳои бонк ва арзиши мушаххаси онҳоро барои фурӯхтан пешниҳод кард. Охири моҳи май ба ҷои бақияи пасандозам дар ҳаҷми қариб 39 ҳазор доллар ман розӣ шудам, ки хонаи сеҳуҷрагии пешниҳодшуда воқеъ дар кӯчаи Алишер Навоӣ, бинои 12/1, 68-ро бигирам. Аммо соҳиби аслии он Камолов маро ронд... Пас ба ман як дуҳуҷрагиро дар хонаи навбунёди ҳанӯз нотамом, воқеъ дар кӯчаи Бухоро-29 ба қимати 365 ҳазор сомонӣ пешниҳод карданд (рӯйхати хонаҳо ва нархи онҳо вуҷуд дорад). Хонаи навсохтро аз назар гузаронида, розигии худро додам. Маро ба назди Зиёев, ки ваъдаи ҳалли мусбати масъаларо дода буд, фиристоданд. Бар хилофи интизориҳои ман, ӯ пешам ин шартро гузошт: “Ё ин хонаро ба нархи нав мехарӣ, яъне на ба 365 ҳазор, балки ду баробар гаронтар - 727 ҳазор сомонӣ ё шартномаи “қонунӣ”-и интиқоли пулҳои туро ба заводи ман мебандем ва ту пулҳоятро дар давоми 5 сол хоҳӣ гирифт!”. Ман розӣ нашудам ва гуфтам, ки дар ин муддат ё ман мемирам, ё ту! Нархи моликияти бонкро, ки аллакай аз сӯи комиссия барои амонатгузорон, онҳое, ки пешашон бонк қарздор аст, муайян шудааст, ҳуқуқи зиёд кардан надорӣ; харҷи маблағҳои амонатгузорон барои эҳтиёҷоти худ, сохтани заводу корхона, тарабхонаву мағоза, харидани бӯстонсарову хонаҳои гаронқимат (аз як корманди КДАМ дар кӯчаи Бухоро) амали ғайриқонунӣ ва бойшавии шахсан худат асту халос!
Ман ҳушдор додам, ки оид ба азонихудкунӣ ва исрофкунии маблағҳои амонатгузорон ба Прокуратураи генералӣ ва Агентии мубориза бо коррупсия шикоят мекунам ва ту пушаймон мешавӣ!
Дар посух Зиёев бешармона гуфт: «Ҳар чӣ ман кардам ва сохтам, бо дастури Президент ва Ҳукумат анҷом додам! Одамон ҳатто ба таври дастаҷамъӣ ба Президент навиштанд. Чӣ шуд?! Агентӣ ва Прокуратураи генералӣ як соли тамом садҳо шикоятро санҷиданд. Омаданду рафтанд!... Ягона одаме, ки шикоят нанавишта монд, ту будӣ! Навис ба ҳар куҷову ҳар кӣ мехоҳӣ!».
Бо ин суханонаш ӯ ба ман фаҳмонд, ки ҳамаро харидааст, ба ҳама кор қодир аст ва ба ӯ чизе таҳдид намекунад! Ман ба ӯ вақт додам, ки фикр кунад. Пас аз се рӯз боз ҳамроҳии вакилам ба бонк омадам. Зиёев набуд. Намояндаи бонк, ки се рӯз пеш ба ман ба ҷои пасандозам хонаро пешниҳод карда буд, акнун гуфт: «Нархи амволи ғайриманқули мо боло рафт! Пешакӣ барои ширкат дар тендер 1700 сомонӣ пардохт кунед ва он ҷо хонаҳои қаблан пешниҳодшударо дар баробари дигарон бо нархи ду баробар зиёд, ба пули нақд харед!...». Ҳамин тавр, ин кас, чун Зиёев, маро аз амонатгузор ба харидор табдил дод. Пеши ман як коғази аҷибро гузошт, ки чунин ном дорад: “Рӯйхати моликияти “Тоҷпромбонк”, ки ба тендер барои фурӯш дар таърихи 02. 06. 2017 гузошта мешавад!». Дар ин рӯйхат ҳудуди 100 номгӯй моликият зикр шуда буд, ки дар бозори амволи ғайриманқул талабот надоранд, аммо нархҳояшон осмониянд!
Ҳайрон мешавед! Чӣ тавр дар давоми як рӯз нархи хонаҳои ба ман пешниҳодшуда, амволи ғайриманқул ва дигар моликияти бонк 2-3 маротиба боло рафт, дар ҳоле ки дар бозор ин нархҳо ҳар рӯз поён мешаванд? Ва чаро моликияте, ки бо пули амонатгузорон харида шудааст, бояд ба худи онҳо дар тендер се ва ҳатто чор маротиба гаронтар фурӯхта шавад?
Лутфан ба ин факту далелҳо ва ҳуҷҷатҳои бонк таваҷҷуҳ намоед!
1. Ба арзиши филиали бонк дар шаҳраки Бӯстони ноҳияи Мастчоҳ, ки комиссия моҳи май 1 млн 920 ҳазор сомонӣ нарх монда буд, 3 млн 838000 сомонӣ зам шудааст ва аз ҳаво нархи онро 5 млн 758800 сомонӣ муайян карданд. Дар арзиши бинои Мастчоҳи Куҳӣ, ки 2 млн 270 ҳазор сомонӣ муайян шуда буд, 4 млн 537402 сомонӣ изофа навишта, арзиши онро ба 6 млн 807402 сомонӣ баровардаанд;
2. Ба арзиши филиалҳои бонк дар Тоҷикобод - 4 млн 810 ҳазору 17 сомонӣ, Айнӣ - 4 млн 619 ҳазору 271 сомонӣ, Панҷакент - 1 млн 682 ҳазору 744 сомонӣ ва ғ.ҳ. илова шудаанд.
Ба ҳамин роҳ, Зиёев ва аъзои гуруҳи ӯ танҳо аз ҳудуди 100 амволи ғайриманқуле, ки барои фурӯш гузоштанд, бе ягон асос арзиши онҳоро ба 95 млн сомонӣ зиёд карда, бо ин восита пасандозҳои қаблан дуздидашудаи амонатгузоронро рӯйпӯш намуда, боз ба дуздии моликияти шаҳрвандон даст задаанд ва ё мехоҳанд боз онҳоро ғорат кунанд!
Инак: Зиёев истироҳатгоҳҳоеро, ки қаблан бо нархҳои арзон аз пули бонк харидорӣ намуда, ба номи наздиконаш ҳамчун саҳомони бонк ҳуҷҷат карда буд, моҳи майи соли 2017 намоишкорона ҳамчун амволи ғайриманқули бонк, эҳтимол ба хотири пӯшонидани камбуди маблағ, ба фурӯш гузошт:
1. Истироҳатгоҳ дар деҳаи Фанфароғи дараи Варзоб. Он ба номи Зиёева Т. ба расмият дароварда шудааст, ки арзишаш 4 млн 610000 сомонӣ нархгузорӣ шудааст (дар асл ин иморати шахсӣ бо се бинои боҳашаммат, саунаҳо, ошхона, варзишгоҳи хурд ва тарабхонааш дар сари роҳи калон, на камтар аз 3 миллион доллари амрикоӣ меистад);
2. Дар ҳамон ҷо як истироҳатгоҳи дигар 3 млн 790 ҳазор сомонӣ нарх гузошта шудааст, ки ба номи Зиёев А. ҳуҷҷатгузорӣ шуда буд;
3. Истироҳатгоҳ дар дараи Ҳаррангон (ба қавли ҳамсояҳо, амалан ба 200 ҳазор сомонӣ харида шуда, 400 ҳазор ҳуҷҷат шудааст) - 7 млн 900 ҳазор сомонӣ;
4. Истироҳатгоҳ дар дараи Ғусғарф - 7 млн 702 ҳазор сомонӣ;
5. Истироҳатгоҳ дар дараи Кондара - 5 млн 700 ҳазор сомонӣ.
Акнун бинед! Пас аз он, ки аз ҳисоби беасос боло бурдани арзиши дороиҳои бонк ба маблағи ҳудуди 95 миллион сомонӣ пули зиёдатӣ ба вуҷуд омад, аз ин ҳисоб Зиёев моҳи июн ин панҷ истироҳатгоҳро ба фурӯш набароварда, онҳоро ҳамчун амволи зиёдатӣ боз аз они худ кардааст!
Аз рӯи дигар маълумотҳои боэътимод, таъмир, таҷдид, сохтмонҳои иловагӣ, пардохти музди посбонон ва таъмини дигар хароҷоти панҷ истироҳатгоҳе, ки ба Зиёев ва хешовандони ӯ тааллуқ доранд, аз ҳисоби бонк - пулҳои амонатгузорон ба анҷом расонида шудаанд.
Яъне бо як ҳилла дар як рӯз Зиёев 70 миллион сомонӣ бой шуду майишати худро мебинад, аммо ба амонатгузорони камбизоату солхӯрда ва бемор ӯ ҳатто пули дарду дармон ва нонашонро намедиҳад! Ва ҳар касе, ки бо зориву тавалло амонати худро талаб мекунаду мекӯшад аз ҳаққу ҳуқуқи худ дифоъ кунад, тавре ки расонаҳо навиштанд, таҳқир, ҳатто латукӯб мешавад!
Сабаби муфлисии бонк ва барҳам додани фаъолияти он дар чист?
Ин, ба истилоҳ, буҳрони бонкӣ буд ё натиҷаи дуздиву фаъолияти коррупсионии афроди дахолатнопазир? Ин аст он чӣ, ки амонатгузорон ва меҳнаткашони оддӣ мехоҳанд донанд! Албатта, Президенти кишвар ҳам!
Ман қаблан ҳам ба Шумо дар ин бора навишта будам, ки атрофиёни Шумо, инчунин ба Рустами Эмомалӣ ҳақиқатро намегӯянд ва инро парвандаи порахӯрону ғоратгарони мардуми худ дар Агентии мубориза бо коррупсия собит кард!? Тавре ки инҳо парвандаҳои қалбакӣ, ба мисли кори сохта нисбат ба шаҳрванди хитойӣ Ин Сюандэ, пешниҳод мекарданду ба Шумо маълумоти дурӯғро мегуфтанд, Зиёев ба президенти кишвар - Пешвои миллат корхонаҳо ва иншооти корношоям ва бефоидаро пешниҳод карда буд!
Таҳқиқи шахсии ман ва далелҳои овардаам бараъло аз он шаҳодат медиҳанд, ки Зиёев ҳамеша ба манфиати шахсии худ амал намуда, дар ин ҷо ҳам бар зарари давлат ва ҷамъият, зидди сиёсати Президенти кишвар оид ба беҳбудии аҳолӣ кор кардааст.
Ҳамчун мисоли барҷастаи фиреб фабрикаи дӯзандагии “Шарофат” дар ноҳияи Ҳисорро меорем, ки дар расми ба истифода доданаш соли 2015 шахсан Шумо, Президенти кишвар - Пешвои миллат ширкат доштед!
Дар хабарҳои расмии давлатӣ чунин навишта буданд: “Дар маркази ноҳияи Ҳисор бо иштироки Президенти кишвар Эмомалӣ Раҳмон корхонаи дӯзандагии “Шарофат” мавриди баҳрабардорӣ қарор гирифт, ки бузургтарин дар ноҳия буда, дорои беш аз 400 ҷойи корӣ барои занону духтарони маҳаллӣ мебошад. Сарвари давлат Эмомалӣ Раҳмон бо буридани лентаи рамзӣ ба фаъолияти ин иншооти саноатӣ, ки ба ифтихори 3000-солагии Ҳисори шодмон бунёд шудааст, оғози расмӣ бахшид. Зикр гардид, ки корхонаи мазкур аз ҷониби соҳибкори маҳаллӣ Ҷамшед Зиёев дар майдони як гектар доман густурдааст, бо харҷи 7 миллион сомонӣ бо санъати баланд ба анҷом расонида шуд. Дар назди ин корхона меҳмонхонаи замонавӣ, ошхона, маркази хизматрасонии бонкӣ, нуқтаи фурӯши маҳсулоти рӯзгор, корхонаи рангуборкунии матоъ ва коргоҳи хурди дӯзандагӣ бо 100 ҷойи корӣ мебошад...”.
Қабули ин корхона чандин бор тариқи телевизион нишон дода шуд ва ба таври васеъ дар ВАО бозтоб ёфт. Даҳҳо овезаи аксҳои Зиёев бо Президент, ки худро ҳамчун қаҳрамон ва одами пурқудрати наздик ба Президент ба намоиш гузоштааст, на фақат дар атрофи ин корхонаи қалбакӣ овехта шудаанд, балки деворҳои дохили ин бинои бузург низ бо ин фотосессияҳо оро дода шудааст. Аммо ин ”каҳрамон” ҳам монанди коррупсионерҳои аслӣ, муфаттишони Агентӣ, ки ҳатто аз сӯи Прокуратураи генералӣ муборизони ҳақиқии зидди коррупсия муаррифӣ шуда буданд, қалбакӣ баромад.
Оё ягон кас инро таҳқиқ кард, ки корхонае, ки дар маросими ифтитоҳаш худи Президент - Пешвои миллат ҳузур доштанд, кор мекунад ё не? Ва чӣ қадар пули амонатгузорон дар сохтмони ин иншооте, ки ҳоло ба фурӯш гузошта шудааст, обу лой шудаанд?
Ҳеҷ кас ҳисоб накардааст! То ба ҳол фабрикаи дӯзандагии “Шарофат”, ягон корхонаи атрофи он ва нуқтаҳои савдо кор намекунанд! Пас ягон одам ҳам бо кор таъмин нашудааст. Фоидаеро ҳам касе аз Зиёев надидааст, ба ҷуз зиён ва азоби алиме, ки аз дасти ӯ 670 амонатгузор мекашанд! Охир аз қабули намоишкоронаи истифодаи иншоот ду сол гузаштаву дороиҳои корхонаи маъруфи “Шарофат” ба шумули дастгоҳҳои дӯзандагӣ, қисм ба қисм фурӯхта мешаванд, аммо нархи онҳо осмонист!
Марҳамат, далели навтарину раднашаванда!
Фабрикаи дӯзандагии “Шарофат”, ки дар вақти кабули он 7 млн сомонӣ арзиш дошт, аз сӯи Зиёев ва Комиссияи барҳамдиҳӣ бо нархи 31 млн 700 ҳазор сомонӣ моҳи майи соли 2017 ба фурӯш гузошта шуда буд. Аммо пас аз ду рӯз, яъне 2 июн, дар хуҷҷатҳои расмии худ арзиши ин корхонаи рӯ ба харобиро ба ҳуҷҷатҳои бонкиаш 9 маротиба, ба 63 млн 400 ҳазор сомонӣ боло бардошта, ба амонатгузорон ва харидорон пешниҳод намудаанд.
Эҳтимол ҳаст, як вақте мешаваду харидорони соддалавҳе пайдо мешаванд ва ин корхонаву дигар амволи ғайриманқули бонкро бо қимати гӯшношунид мехаранд, аммо ин муъҷизаро амонатгузорони ғорату фирефташуда ҳеҷ гоҳ нахоҳанд дид!...
Ҳамин тавр, ҳеҷ як аз корхонаҳое, ки гӯё Зиёев барои мардум сохтааст, амалан кор намекунанд, аммо корхонаҳои шахсии ӯ, як бонк дар Маскав, тарабхонаҳо ва корхонаҳои тиҷоратӣ фаъоланд ва аз ин роҳ сарвати ӯ ва хешовандонаш аз ҳисоби маблағҳои амонатгузорон меафзояд. Кӣ ба ӯ иҷозат дод, ки дар Душанбе аз ҳисоби маблағи амонатгузорон корхонаи истеҳсоли обҳои минералӣ созад, дар сурате, ки аксарияти онҳо наметавонанд аз дасти бойбача Зиёев пулҳои худро гиранду гуруснаву ташна мегарданд?
Ҳатто барои як соддалавҳ рӯшан аст, ки корчаллону ҳиллагари бузурге ба монанди Зиёев, ки ҳамаро фиреб додаву гумроҳ кардааст, тариқи зиёд нишон додани ҳаҷми корҳои сохтмонӣ пулҳои ҳангуфтро аз они худ мекунад!
Роҳҳои дигари талаву тороҷ шудани маблағҳои амонатгузорон дар мисоли қарзҳои беасос додашуда низ вуҷуд доранд, ки қонунӣ будани онҳо шубҳаи бармалоро ба миён меорад. Масалан, Зиёев ва ҳаммаслакони ӯ оид ба истироҳатгоҳҳои минтақавӣ, ки дар асл вуҷуд надоштанд, ҳуҷҷатҳои сохта тартиб дода, бо роҳи ба гарав мондани қитъаҳои заминҳои холӣ дар деҳаи Даҳанаи дараи Ромит даҳҳо қарзи ғайриқонунӣ додаанд, ҳол он ки, замин моликияти шахсии шаҳрвандон ва предмети дороӣ барои ба гарав гузоштан буда наметавонад.
Аҷоиб! Муфаттишони Агентии мубориза бо коррупсия, Прокуратураи генералӣ ва мансабдорони боломақоми ҳукумат чӣ тавр далелҳои дуздии ошкору боигарии беҳисоб, гӯлзаданҳои аҳолӣ, ҳатто фиреб додани ҳукумат ва худи Президентро аз сӯи Зиёев надиданд? Ва то ҳол намебинанд! Ва ҳеҷ кас аз Зиёев намепурсад, ки чаро амонатгузорон муфлис шуданду ӯ бо панҷ истироҳатгоҳ дар дараи Варзоб, иморати бошукуҳи иборат аз се бинои зист, саунаҳову шаршараҳо, варзишгоҳ ва ғайраву ҳоказо ба таври афсонавӣ сарватманд шуда рафт.
Ва магар чунин як гӯлзании мардум ва ҳукумати кишварро ҳам “муборизони зидди коррупсия”, ҳам мансабдорони давлатӣ, ки ба муфлисии сохтаи бонк муносибат доранд, намебинанд!? Зиёда аз ин, худи онҳо амонатгузорон ва аҳолиро гӯл зада, мегӯянд, ки сабаби муфлисии бонк буҳрони иқтисодӣ аст, на дуздӣ ва харҷи беҳудаи маблағҳои амонтгузорон ба мақсадҳои нолозим ва ба мардум зарарнок!
Албатта, фактҳои овардашуда ва фарзияи шахсии ман санҷиши ҳаматарафа ва холисонаро аз ҷониби муфаттиши бовиҷдон ва мақомоте, ки ба он мардум бовар мекунанд, талаб менамоянд.
Бояд зикр кард, ки қаблан Агентии мубориза бо коррупсия ва Прокуратураи генералӣ арзу шикоятҳои амонатгузоронро тафтиш карда, дар амали роҳбарияти “Тоҷпромбонк” ягон ҷиноятро ошкор нанамудаанд. Инчунин, онҳо даҳҳо аризаи ман (се адад ба унвони Президент)-ро дар бораи ҷиноятҳои муфаттишони Агентӣ рӯйпӯш карда буданд.
Зиёда аз ин, амри Шумову дастури хаттии роҳбари Дастгоҳи иҷроияи Президенти Ҷумҳурии Тоҷикистон таҳти №30/Ч350-16 аз 18-уми январи соли 2016-ро бо далелҳои ҳуҷҷатии ман дар ҳаҷми 108 варақ, ки барои тафтиш шахсан ба Прокурори генералӣ Юсуф Раҳмон дода шуда буд, бидуни ягон санҷишу ҳалли қонунӣ ва посух ба муроҷиаткунанда, бе иҷро монданд.
Гузашта аз ин, далелҳо ва аризаи кушодаи ба номи Президент навиштаамро Прокуратураи генералӣ ва мақомоти Агентӣ то ҳадди шинохтанашаванда таҳриф карда, ҳатто мактуби аз номи Рустами Эмомалӣ бо имзои қалбакиву дурӯғ навиштаро аз номи Агентӣ ва Прокуратураи генералӣ бе ягон дигаргунӣ дар ВАО чоп карда, бидуни ягон асос маро туҳматгар ва ҷинояткори давлатӣ эълон намуданд. Гӯё ман муфаттишони “тозаю баобрӯ”-и Агентӣ - Фирдавс Ниёзбадалов, Умед Раҳмонов, сардори онҳо Фирӯз Холмуродов ва муовини прокурори генералӣ, генерали адлия В. Ваҳҳобовро, ки аз болои корҳои ин муфаттишони Агентӣ назорати прокурориро “дуруст” бурда будааст, аз он ҷумла, мансабдорони “бовиҷдон”-и баландмартабаи давлатиро беобрӯ карда бошам. Аммо фактҳои парвандабофӣ, аз ҷумла, дар мурофиаи судии шаҳри Душанбе гуноҳи шаҳрванди хитойӣ Ин Сюандэ бо ягон далел тасдиқ нашуда бошад ҳам, ӯ зери фишори бевоситаи муфаттишони алҳол зиндонӣ “говсуд” карда шуд ва ин ҳама то ҳозир бе эътибори Прокурори генералӣ мондаанд.
Аз ин рӯ, факту далелҳои овардашуда ба ман асос мешаванд, ки шахсан ба ин хел “ростгӯён”, яъне Прокуратураи генералӣ ва мақомоти Агентӣ бовар накунам.
Бо ин асос, ба манфиати 670 амонатгузор ва ҷамъият, ки интизори ҳақиқат ҳастанд, самимона аз Шумо, Президенти кишвар ва Пешвои миллат, хоҳиш мекунам, ки тафтиши парвандаро ба Кумитаи давлатии амнияти миллии Ҷумҳурии Тоҷикистон супоред.
Дар асоси гузориши зикрёфта, аз КДАМ-и Тоҷикистон хоҳиш мекунам:
1. Алайҳи Зиёев Ҷамшед Азизович ва гуруҳи ӯ аз рӯи моддаҳои 314, қисми 2, 245, қисми 4, 247, қисми 4, 262, қисми 3, 265 ва 271-и Кодекси ҷиноии ҶТ парвандаи ҷиноятӣ кушода, онҳо ба ҷавобгарии ҷиноятӣ кашида шаванд.
2. Ҳангоми ревизияи ҳуҷҷатии фаъолияти молиявию хоҷагии бонк, санҷиши ҳар як ҳолати додани қарз ва қонунӣ будани харҷи маблағҳо ба ҳайати комиссияи тафтишотӣ намояндагони ҷониби манфиатдор - амонатгузорони ҷабрдида дохил карда шаванд.

Замима:
1. Ҳуҷҷатҳое, ки дар матн ёдовар шудаанд.
2. Нусхаи шикоятҳо ба Президент ва дастури хаттии роҳбари Дастгоҳи иҷроияи Президенти Ҷумҳурии Тоҷикистон ба Прокурори генералӣ Юсуф Раҳмон.

Бо эҳтиром,
аризадиҳанда Солеҳҷон Ҷӯраев,
шаҳрванд, узви раёсати Иттиҳоди байналмилалии адвокатҳо

саҳ 113 аз 113

Хабари рӯз

Минбари сардабир

  • симКАРта

    Дар ҳафтае, ки гузашт, дар шабакаҳои иҷтимоӣ ин калима аз…

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.