.

Alternative flash content

Requirements

Get Adobe Flash player

Farhat

Ба тасвиб расидани фармоиши вазоратҳои корҳои дохилӣ ва нақлиёт «Дар бораи ташкил ва танзими ҳаракати воситаҳои нақлиёти автомобилӣ дар роҳи автомобилгарди Душанбе - Чаноқ» аз муҳимияти масъалаи мавриди назар ва хоса будани таваҷҷуҳ ба он шаҳодат медиҳад

Тавре қаблан иттилоъ дода будем, шуруъ аз 8-уми октябри соли равон дар масири роҳи автомобилгарди Душанбе - Чаноқ боридани барф оғоз гардида, кормандони филиали Ширкат тамоми кӯшишҳоро ба харҷ дода истодаанд, то ҳаракати муназзаму бехатари воситаҳои нақлиёт таъмин бошад. Бо дарки масъулият мегӯем, ки дар ҷода комёбем, зеро омодагии филиали Ширкат ба мавсими тирамоҳу зимистони солҳои 2018 - 2019 ҷиддӣ ва ҳамаҷониба аст.

Дар намояндагиҳои филиали Ширкат зиёда аз 10 ҳазор метри кубӣ маводи зиддилағжиш, 260 ҳазор литр маводи сӯзишворӣ, 85 тонна ангишт ва дигар маводи зарурӣ захира шуда, ин омил замина фароҳам меорад, ки фаъолият дар сатҳи хубу сифати баланд роҳандозӣ шавад.

Мо тамоми кӯшишҳоро ба харҷ хохем дод, то рафтуомади бемонеа ва муназзами шаҳрвандон тариқи роҳи автомобилгарди мавриди назар таъмин бошад, вале дар сурати ҷиддӣ ва беист будани хавфи тармафароӣ мо ба ҳеҷ ваҷҳ ҳавасманд нестем, ки ҳамватанони мо ба сафар бароянд, зеро ҳифзи ҳаёти онҳо бароямон аз дигар омилҳо болотар ва авлотар аст.

Айни замон, сарфи назар аз бардавом ва бошиддат будани бориши барфу борон дар роҳи Душанбе - Чаноқ ҳаракати воситаҳои нақлиёт таъмин буда, кормандони мо муназзам будани ин раванд ҷаҳду талош доранд.

Чанде пеш дар асоси талаботи қонунҳои Ҷумҳурии Тоҷикистон «Дар бораи ҳаракат дар роҳ», «Дар бораи роҳҳои автомобилгард ва фаъолияти роҳдорӣ», Қарори Ҳукумати Ҷумҳурии Тоҷикистон №147 аз 27-уми марти соли 2018 «Дар бораи саривақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2018 - 2019» ва талаботи банди 33-и моддаи 3-юми Шартномаи Консессионӣ байни Ҳукумати Ҷумҳурии Тоҷикистон ва Филиали Ширкати саҳомии «Инновейтив Роуд Солюзшнз ЛТД» дар Ҷумҳурии Тоҷикистон бо мақсади андешидани тадбирҳои иловагӣ ҷиҳати таъмини бехатарии ҳаракати воситаҳои нақлиёт ҳангоми номусоидии обу ҳаво фармоиши Вазорати корҳои дохилӣ ва Вазорати нақлиёти мамлакат «Дар бораи ташкил ва танзими ҳаракати воситаҳои нақлиёти автомобилӣ дар роҳи автомобилгарди Душанбе - Чаноқ» ба тасвиб расид. Тибқи талаботи он, ҳангоми номусоидии обу ҳаво, боришоти барфи зиёд, яхбандӣ ва пай дар пай фаромадани тарма, ки барои ҳаракати воситаҳои нақлиёт мушкилот ба миён меорад, дар масири роҳи автомобилгарди «Душанбе - Чаноқ» аз ҳисоби масъулини вазоратҳои корҳои дохилӣ, нақлиёти Ҷумҳурии Тоҷикистон, Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ва Филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон ситод ташкил шуда, аз деҳаи «Ҳушёрӣ»-и ноҳияи Варзоб (км 44) то деҳаи «Такфон»-и ноҳияи Айнӣ (км 95) ва аз км 136 ноҳияи Айнӣ то км 181 ноҳияи Шаҳристон танҳо ҳаракати воситаҳои нақлиёте, ки ду ва зиёда тирҳои пешбаранда доранд ё чархҳои пешбарандаашон бо таҷҳизоти зиддилағжиш ҷиҳозонида шудааст, инчунин автомашинаҳои боркаше, ки вазни умумиашон зиёда аз 3,5 тонна буда, ядакҳои иловагӣ, нимядак надоранд ва бо лавозимоти эҳтиётӣ (симтобаи кашолкунӣ, болиштаки зиддиғелиш ва ғайра) муҷаҳҳаз мебошанд, иҷозат дода мешавад.

Илова бар ин, фармоиши мавриди назар масъулинро вазифадор намудааст, ки дар мувофиқа бо Агентии обуҳавошиносӣ ҳаракати воситаҳои нақлиётро дар минтақаҳои мушкилгузари роҳ - аз мавзеи «Ҳушёрӣ»-и ноҳияи Варзоб то деҳаи «Такфон»-и ноҳияи Айнӣ ва аз мавзеи «Ҳушёрӣ»-и ноҳияи Айнӣ то мавзеи «Охтанги»-и ноҳияи Шаҳристон зери назорати доимӣ қарор дода, ҳангоми вазнин гардидани шароити ташкили ҳаракат дар роҳ, дар асоси қарори якҷояи масъулини вазоратҳои корҳои дохилӣ ва нақлиёти Ҷумҳурии Тоҷикистон дар мувофиқа бо Филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон реҷаи махсуси ҳаракати воситаҳои нақлиёт - рӯзҳои тоқи моҳ аз вилояти Суғд ба самти шаҳри Душанбе ва рӯзҳои ҷуфти моҳ аз шаҳри Душанбе ба самти вилояти Суғдро ба роҳ монанд.

Қобили зикр аст, ки дар ҳолатҳои зарурӣ ба реҷаи болозикр вобаста аз шароити роҳ, дар мувофиқа бо масъулини вазоратои корҳои дохилӣ, нақлиёти Ҷумурии Тоҷикистон ва филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон тағйиру иловаҳо ворид карда мешавад.

Сардорони РБДА ВКД Ҷумҳурии Тоҷикистон, РВКД дар вилояти Суғд ва ШВКД дар ноҳияи Варзоб тибқи ин фармоиш муваззафанд, ки дар мувофиқа бо Филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон дидбонгоҳҳои муваққатиро дар километри 100-уми роҳи автомобилгарди номбурда аз ҳисоби кормандони ШБДА РВК дар шаҳри Душанбе, дар километри 44 ва 62-юм аз ҳисоби кормандони РБДА ВКД Ҷумҳурии Тоҷикистон ва ШВКД дар ноҳияи Варзоб, аз километри 62 то км 72-юм патрулӣ автомобилӣ аз ҳисоби кормандони РБДА ВКД Ҷумҳурии Тоҷикистон, дар километри 82-юм (мавзеи «Зимарғ»-и ноҳияи Айнӣ) ва дар километри 100 (деҳаи «Такфон»-и ноҳияи Айнӣ) аз ҳисоби ҳайати шахсии ШБДА РВКД дар вилояти Суғд ва ШВКД дар дар ноҳияи Айнӣ, дар километри 136 аз ҳисоби кормандони ШВКД дар ноҳияи Айнӣ, дар километри 181 (Нуқтаи вазнченкунии филиали Ширкат) аз ҳисоби ҳайати шахсии ШБДА РВКД дар вилояти Суғд ва ШВКД дар ноҳияи Шаҳристон ташкил намуда, қувва ва воситаҳои заруриро аз ҳисоби кормандони БДА ва дигар хадамоти милитсия сафарбар намоянд.

Ба маълумоти ронандагони гиромӣ мерасонем, ки дар ин дидбонгоҳҳо ҳолати техникии воситаҳои нақлиёт, риояи талабот ва меъёрҳои муқарраршудаи бехатарии ҳаракат дар роҳ, аз он ҷумла ба лавозимоти ҳимоявӣ (симтобаи кашолакунӣ, занҷир, болиштаки зиддиғелиш ва ғайра) муҷаҳҳаз будани онҳо назорати ҷиддӣ мешавад.

Боварӣ дорем, ки ронандагону мусофирони гиромӣ ба иқдоми мазкур, ки идомаи мантиқии ибтикори амалишуда дар самти таъмини ҳаракати муназзаму бехатари воситаҳои нақлиёт дар роҳи зикршуда маҳсуб мешавад, бо ҳисси ҳамдигарфаҳмӣ муносибат хоҳанд кард.

 

Маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон

Донишгоҳи давлатии омӯзгории Тоҷикистон ба номи Садриддин Айнӣ аз куҳантарин ва бузургтарин муассисаҳои олии касбии ҷумҳурӣ буда, ҳамчун нахустин мактаби олии Ҷумҳурии Тоҷикистон, яке аз поягузорони асосии илму маърифат ва фарҳанги халқи тоҷик шинохта шуда, дар тайёр намудани мутахассисони илмию омӯзгории кишвар саҳми бузург гузоштааст. Моҳи июли соли равон ин кохи маърифати ҷумҳурӣ 88-сола мешавад. 

Нахустин мактаби олии Тоҷикистон, ки имрӯз дар борааш менависем, бори нахуст 18-уми июли соли 1931 дар асоси қарори Кумитаи роҳбарии муассисаҳои илмию таълимии КИМ ИҶШС бо номи Донишкадаи олии агропедагогии тоҷик дар заминаи шуъбаҳои таъриху иқтисодиёт ва адабиёту забоншиносии факултети педагогикаи Донишгоҳи давлатии Осиёи Миёна таъсис дода шуда буд. Тибқи қарори мазкур аз ҳайати донишгоҳи мазкур 195 нафар донишҷӯён ва 29 нафар омӯзгорон, аз ҷумла 4 профессор, 8 дотсент ва 16 ассистент ба донишкадаи навтаъсис гузаронида шуданд.

6-уми ноябри соли 1931 Донишкадаи олии агропедагогии тоҷик ба Комбинати таълимии агропедагогӣ табдил ёфт, ки он донишкадаи педагогӣ, омӯзишгоҳи педагогии Тошканд ва курсҳои  кӯтоҳмуддати тайёркунии ташкилотчиён ва методистони дараҷаи ноҳиявии маорифи халқро дар ихтиёр дошт. 23-юми сентябри соли 1932 Комбинати олии агропедагогии тоҷик ба Академияи педагогӣ табдил ёфт ва фаъолияти худро дар пойтахт (шаҳри Сталинобод) бо 125 нафар донишҷӯ оғоз намуда, соли 1939 номи Донишкадаи педагогии шаҳри Сталинобод ба номи нависандаи машҳури Украина Т. Г. Шевченкоро гирифт.

Бо ба даст овардани соҳибистиқлолӣ, 29-уми августи соли 1992 Донишкадаи омӯзгорӣ ба Донишгоҳи давлатии омӯзгории ба номи Қ. Ҷӯраев табдили ном карда, 3-юми апрели соли 2007 номи Донишгоҳи давлатии омӯзгории Тоҷикистон ба номи Садриддин Айниро гирифт ва аз соли таҳсили 2007/08 чун дигар мактабҳои олии ҷумҳурӣ, донишгоҳ тадриҷан ба низоми кредитии таҳсилот гузашт. Дар донишгоҳ алъон барои таълиму тарбияи донишҷӯён 796 нафар профессорону омӯзгорон машғуланд, ки 55 нафари онро докторҳои илм, профессор ва 173 номзади илм, дотсентон ташкил медиҳанд. Дар айни замон доктори илмҳои филология, профессор, академики Академияи илмҳои Ҷумҳурии Тоҷикистон Юсуфзода Носирҷон Салимӣ ректори донишгоҳ мебошад.

 

Факултетҳо ва шуъбаҳои донишгоҳ

Аз суҳбат бо маъмурияти донишгоҳ маълум шуд, ки таълимгоҳи мазкур айни замон дорои 13 факултет: математика, физика, химия, биология, география, технология ва иқтисодиёт, таърих, филологияи тоҷик, забони англисӣ, забонҳои романӣ-германӣ, забон ва адабиёти рус, таҳсилоти томактабӣ ва ибтидоӣ, психология ва таҳсилоти фарогир; 4 раёсат: раёсати таълим, раёсати илм ва инноватсия, раёсати кадрҳо ва корҳои махсус, раёсати муҳосибот, 20 шуъба, 4 марказ, 9 бахш, бунгоҳи тиббӣ, парки технологӣ, боғи таҷрибавии “Агробиологӣ”, 60 кафедраи тахассусиву умумидонишгоҳӣ, Коллеҷи омӯзгории шаҳри Душанбе мебошад.

Аз соли таҳсили 1996/97 сар карда, донишгоҳ мутобиқи Стандарти давлатии маълумоти олии касбии Ҷумҳурии Тоҷикистон ба низоми бисёрзинагии таҳсилоти олии касбӣ гузашт ва алъон аз рӯи 68 ихтисоси омӯзгорӣ мутахассис тайёр менамояд. 

 

Ихтисосҳое, ки дар Донишгоҳи давлатии омӯзгории Тоҷикистон ба номи Садриддин Айнӣ омӯхта мешаванд:

Рамзи ихтисос

Номгӯи ихтисосҳо

 
 
 

1

1020501

Математика

 

2

102050302

Математика. Информатика

 

3

102050301

Математика. Физика

 

4

108010107

Таълими касбӣ (информатика)

 

5

108010106

Таълими касбӣ (агромуҳандисӣ)

 

6

102060102

Технология (меҳнати техникӣ ва нақшакашӣ)

 

7

1020602

Технология. Омӯзгор-муҳандис

 

8

1020601

Технология. Соҳибкорӣ

 

9

1020502

Физика

 

10

102050402

Физика. Информатика

 

11

102050401

Физика. Математика

 

12

108010102

Таълими касбӣ (радиоэлектроника)

 

13

108010103

Таълими касбӣ (энергетика)

 

14

108010107

Таълими касбӣқтисодиёт ва идоракунӣ)

 

15

125010818

Баҳисобгирии бухгалтерӣ, таҳлил ва аудит дар соҳаи маориф

 

16

126020217

Менеҷменти молиявӣ дар соҳаи маориф

 

17

1020402

География

 

18

102040504

География. Ҳифзи табиат

 

19

1020405

География. Иқлимшиносӣ

 

20

102040503

География. Иқтисодиёт

 

21

1020405

География. Хариташиносӣ

 

22

1020405

География. Яхшиносӣ

 

23

102040501

География-биология

 

24

1890101

Саёҳат ва меҳмондорӣ

 

25

11901010501

Дизайни маҳсулоти дӯзандагӣ

 

26

1020304

Забон ва адабиёти рус дар мактабҳои миллӣ

 

27

102030404

Забон ва адабиёти рус. Забони англисӣ

 

28

1020301

Забон ва адабиёти тоҷик

 

29

1020303

Забон ва адабиёти тоҷик. Алифбои ниёгон

 

30

102030302

Забон ва адабиёти тоҷик. Забони арабӣ

 

31

121050106

Забон ва адабиёти ӯзбек

 

32

1020306

Забони англисӣ

 

33

1020307

Забони англисӣ. Забони кореягӣ

 

34

1020307

Забони англисӣ. Забони хитоӣ

 

35

121060102

Забони муосири хитоӣ (тарҷума)

 

36

121060102

Забони муосири олмонӣ (тарҷума)

 

37

121060102

Забони муосири фаронсавӣ (тарҷума)

 

38

102030602

Забони олмонӣ. Забони англисӣ

 

39

102030604

Забони фаронсавӣ. Забони англисӣ

 

40

121050208

Забони хориҷӣ (забони олмонӣ)

 

41

121050208

Забони хориҷӣ (забони фаронсавӣ)

 

42

121060102

Забонҳои муосири хориҷӣ (тарҷума)

 

43

103030502

Логопедия. Таҳсилоти ибтидоӣ

 

44

1030304

Олигофренопедагогика. Таърих

 

45

1030306

Сурдопедагогика. Информатика

 

46

1010201

Таҳсилоти ибтидоӣ

 

47

101020204

Таҳсилоти ибтидоӣ. Забон ва адабиёти тоҷик

 

48

101020203

Таҳсилоти ибтидоӣ. Санъати мусиқӣ

 

49

1010101

Таҳсилоти томактабӣ

 

50

101010203

Таҳсилоти томактабӣ. Забони англисӣ

 

51

101010206

Таҳсилоти томактабӣ. Равоншиносӣ

 

52

123010402

Психологияи иҷтимоӣ

 

53

123010406

Психологияи муносибатҳои оилавӣ

 

54

123010404

Психологияи педагогӣ

 

55

123010401

Психологияи умумӣ

 

56

1030304

Равоншиносии амалӣ

 

57

124010211

Танзими ҳуқуқии муносибатҳои меҳнатӣ

 

58

1020101

Таърих

 

59

102010204

Таърих. Забони англисӣ

 

60

1020102

Таърих. Ихтисоси иловагӣ (ҳуқуқ)

 

61

1230101

Муносибатҳои байналмилалӣ

 

62

1020401

Биология

 

63

1330101

Биология. Экология

 

64

102040401

Биология. Химия

 

65

13101010221

Биохимияи тиббӣ

 

66

1020403

Химия

 

67

102040601

Химия. Биология

 

68

131050104

Химия. Экология

 

Шумораи умумии муҳассилин

Теъдоди донишҷӯёни донишгоҳ 17660 нафарро ташкил медиҳад, ки 8172 нафари он дар шуъбаи рӯзона ва 7369 нафар дар шуъбаи ғоибона ва 2119 нафар дар шуъбаи фосилавӣ таҳсил мекунанд. Аз ин шумора дар гуруҳҳои буҷавӣ 5844 нафар ва дар гуруҳҳои шартномавӣ 11816 нафар таҳсил мекунанд. Дар донишгоҳ 2713 нафар шаҳрвандон аз хориҷи кишвар таҳсил мекунанд, 2045 нафар дар шуъбаи рӯзона, 36 нафар дар шуъбаи ғоибона, 632 нафар дар шуъбаи таҳсилоти фосилавӣ.

 

Шуъбаи аспирантура

Шуъбаи аспирантура дар Донишгоҳи давлатии омӯзгории Тоҷикистон ба номи Садриддин Айнӣ яке аз сохторҳои асосии тайёр намудани кадрҳои илмӣ ба шумор меравад ва айни ҳол дар шуъбаи аспирантура ва докторантура барои тайёр намудани кадрҳои илмӣ ва илмию педагогӣ аз тарафи Хадамоти давлатии назорат дар соҳаи маориф зинаи доктор аз рӯи ихтисос (PhD) таъсис дода шуд, ки барои тайёр намудани кадрҳои илмӣ ва илмию педагогӣ аз рӯи 43 ихтисос иҷозатнома дода шудааст. Таҳсил дар шуъбаи рӯзонаи аспирантураи донишгоҳ 3 сол ва дар шуъбаи ғоибона - 4 сол мебошад. Ҳамасола зиёда аз 60 нафар довталабон ба шуъбаи аспирантура қабул шуда, пайи тадқиқи рисолаҳои илмии хеш мешаванд. Дар назди донишгоҳ 6 (шаш) Шӯрои ҳимоя аз рӯи ихтисоҳои педагогика, методикаи таълим, филология, география ва забонҳои хориҷӣ амал карда истодааст ва аспирантон вобаста ба муҳлат рисолаҳои худро дар Шӯрои мазкур дифоъ менамоянд. Дар донишгоҳ инчунин шуъбаи магистратура амал мекунад, ки рӯзона ва муҳлати таҳсилоташ 2-сола мебошад.

 

Озмоишгоҳҳо, устохонаҳо ва коргоҳҳои таълимӣ-истеҳсолии донишгоҳ

Донишгоҳ дорои озмоишгоҳҳо, устохонаҳо ва коргоҳҳои таълимӣ-истеҳсолии бо техникаву технологияи муосир муҷаҳҳазгардонидае мебошад, ки барои сайқал додани донишҳои назариявӣ ва амалии донишҷӯён фаъолона истифода бурда мешаванд. Озмоишгоҳҳои таълимии «Механика», «Физикаи молекуллавӣ», «Электрик», «Физикаи атомӣ ва ядроӣ», «Оптика», «Физикаи гармо», «Таҷрибаҳои намоишии физикаи мактабӣ», «Практикуми физикӣ», «Радиотехника», «Физикаи полимерҳо», «Электротехника», «Омӯзиши системаҳои обӣ-намакӣ, коркарди ашёи минералии табиӣ-техникӣ», озмоишгоҳи илмӣ-тадқиқотии «Химияи пайвастагиҳои металл-органикӣ», «Химияи органикӣ», Озмоишгоҳи формасевтӣ (дорутайёркунӣ) ва устохонаи таълимӣ-илмии «Ихтироъкор» ба донишҷӯён имконият медиҳанд, ки дараҷаи касбияти худро баланд бардошта, чун мутахассисони хуб ба воя расанд. Донишгоҳ инчунин дорои боғи агробиолабораториявии “Агробиология” аст, ки дар дараи Ромит ҷойгир буда, дар он донишҷӯён ва устодони факултаҳои табиатшиносӣ таҷрибаҳои илмӣ-истеҳсолӣ мегузаронанд. 

 

Маркази такмили ихтисос

Дар асоси мактуби Вазорати маориф ва илми Ҷумҳурии Тоҷикистон аз  20.04.2010 №5/1 552 дар назди донишгоҳ Маркази такмили ихтисос ва бозомӯзии омӯзгорони муассисаҳои таҳсилоти ибтидоӣ, миёна ва олии касбии педагогӣ аз рӯйи ихтисосҳои филологияи тоҷик, забони англисӣ, математика, педагогика, химия, биология, география, технология, забонҳои романию германӣ, таърих ва ҳуқуқ таъсис дода шуд. Маркази мазкур барои баланд бардоштани сатҳи донишу малакаҳои касбии омӯзгорони муассисаҳои таҳсилоти ибтидоӣ, миёнаи касбӣ, миёнаи махсус ва олии касбӣ, дигар муассисаҳои таълимӣ, инчунин ташкили курси кӯтоҳмуддат, семинар, машғулиятҳои амалӣ, лексия, экскурсияҳои таълимӣ, машваратҳои фардӣ, гуруҳӣ, хонишҳои педагогӣ, конференсияҳои илмию амалӣ, илмию методӣ ва ғайра хизмат мекунад.

Аз 1-уми апрели соли 2012 дар назди Марказ курси кӯтоҳмуддати ихтисосҳои «Сартарош», «Дӯзанда», «Кафшергари барқӣ - газӣ», «Қаннодӣ», «Устои барқ» ташкил карда шуд. Аз рӯйи ихтисосҳои пешниҳодшуда нақшаи таълимии 1-моҳа, 2-моҳа, 3-моҳа дар ҳаҷми 432 соат таҳия карда шуд. 

 

Парки технологӣ

Парки технологии ДДОТ ба номи Садриддин Айнӣ бо мақсади дар амал татбиқ намудани сиёсати давлатии фаъолияти илмӣ-инноватсионӣ, ба даст овардани натиҷаҳои самарабахши илмии донишҷӯён, мутахассисони ҷавон, омӯзгорон, ташкили корхонаҳои хурди миёнаи инноватсионӣ, дастгирии корхонаҳои хурду миёнаи дигари ватанию хориҷӣ амал менамояд ва фаъолияти худро дар асоси «Шаҳодатнома дар бораи бақайдгирии давлатии таъсисёбии шахси ҳуқуқӣ» ва дастуру супоришҳои раёсати донишгоҳ ба роҳ монда, дар ҳайати худ чунин воҳидҳои сохториро муттаҳид намудааст:

- Матбаа; Курсҳои кӯтоҳмуддати забономӯзӣ; Шуъбаи тайёрӣ ва хизматрасонии репетиторӣ; Сехи сангтарошӣ; Сехи дӯзандагӣ; Маркази таксир ва маводҳои таълимӣ; Устохонаи коркарди чӯбу тахта.

 

Ҳамкориҳои ДДОТ бо донишгоҳҳову донишкадаҳои хориҷӣ

Шуъбаи робитаҳои байналмилалӣ фаъолияти худро аз моҳи феврали соли 1996 оғоз намуда, самти асосии фаъолияти шуъба ҳамоҳангсозии таҳсил, бозомӯзӣ ва такмили ихтисоси шаҳрвандони хориҷӣ дар факултетҳои донишгоҳ, мубодилаи донишҷӯён, баланд бардоштани маҳорати касбии омӯзгорон, аспирантон ва унвонҷӯён, коромӯзию иҷрои якҷояи корҳои тадқиқотӣ, тартиб додани лоиҳаҳои байналмилалии ҷустуҷӯйӣ ва дигар шаклҳои ҳамкорӣ дар арсаи байналмилалӣ, тайёр намудани рухсатномаҳои хориҷӣ дар ҳамкорӣ бо сафоратхонаҳои хориҷии муқими Ҷумҳурии Тоҷикистон, ба имзо расонидани созишномаҳои ҳамкорӣ байни донишгоҳҳо, донишкадаҳо ва муассисаҳои таълимиву илмии кишварҳои бурунмарзии Ҷумҳурии Тоҷикистон ба шумор меравад. Натиҷаи кӯшишҳои кормандони шуъба буд, ки соли 2006 дар донишгоҳ Маркази Шӯрои Британия кушода шуд, ки дар он омӯзгорон ва донишҷӯён аз адабиёти гуногуни ин марказ истифода бурда, худи ҳамон сол Маркази забон ва адабиёти ӯзбек, Маркази фарҳангии Эрон таъсис дода шуд. Дар ҳамкорӣ бо Вазорати маориф ва илми Ҷумҳурии Тоҷикистон ва Хазинаи забони русӣ соли 2008 дар донишгоҳ Маркази забони русӣ бунёд гардид. Марказ бо техникаи ҳозиразамон, 1000 номгӯи китобҳо ва мизу курсиҳо таъмин карда шудааст.

Донишгоҳ бо 13 мамлакати хориҷии дуру наздик қарордоди ҳамкорӣ дошта, 65 созишнома ба имзо расонидаст. Аз ҷумла, Донишгоҳи давлатии омӯзгории Москва, Донишгоҳи давлатии омӯзгории Бошқирдистони ба номи М. Акмулаев, Донишгоҳи давлатии омӯзгории Томск, Донишгоҳи давлатии омӯзгории Тула, Донишгоҳи давлатии Корея, Донишгоҳи Ҷумҳурии халқии Чин дар шаҳри Пекин, Донишгоҳи Тартуи Ҷумҳурии Эстония ва дигар донишгоҳҳои хориҷи кишвар, дар маҷмуъ бо зиёда аз 54 донишгоҳ ҳамкориҳои дуҷонибаро ба роҳ мондааст.

Қабули донишҷӯёни хориҷӣ дар асоси қоидаҳои қабули довталабон, ки аз ҷониби Вазорати маориф ва илми Ҷумҳурии Тоҷикистон ва Ҳукумати Ҷумҳурии Тоҷикистон тасдиқ гардидаанд, ба таври шартномавӣ ба роҳ монда мешавад ва айни замон дар донишгоҳ 2713 нафар шаҳрвандон аз хориҷи кишвар таҳсил мекунанд.

 

Китобхона

Китобхонаи донишгоҳ дорои 6 толор - толори олимон, аспирантон ва магистрантҳо, толори хониш ва толори электронӣ, толори матбуоти даврӣ буда, 357 ҷои нишаст дорад. Китобхонаи электронии он дорои 42 адад компютерҳои пайваст ба шабакаи интернет мебошад. Фонди умумии китобҳои электронӣ зиёда аз 300 000 ададро ташкил медиҳад.

 

Маҳфилҳо ва озмунҳои илмӣ

Тибқи нақшаи кории Раёсати илм ва инноватсия дар донишгоҳ 51 маҳфили илмӣ дар назди кафедраҳои факултетӣ ва 10 маҳфили илмӣ дар назди кафедраҳои умумидонишгоҳӣ фаъолият мекунанд. Ҳамаи роҳбарони маҳфилҳои амалкунанда дар мувофиқа бо Раёсати донишгоҳ нақшаи кори худро мураттаб сохта, фаъолияти худро аз рӯи он амалӣ намуда истодаанд.

Дар донишгоҳ инчунин озмуни «Донишҷӯ ва пешрафти илмию техникӣ - 2018», дар асоси дастури Вазорати маориф ва илми Ҷумҳурии Тоҷикистон баргузор гардид. Комиссияи озмунӣ аз байни 40 кори илмӣ - пажуҳишии пешниҳодшудаи донишҷӯён 7 кори беҳтаринро барои пешниҳод ба Вазорати маориф ва илми Ҷумҳурии Тоҷикистон тавсия намуд. Тибқи дастури Вазорати маориф ва илми Ҷумҳурии Тоҷикистон ва салоҳдиди Раёсати донишгоҳ аз санаи 30.05.2018 то 05.06.2018 дар факултетҳои донишгоҳ озмуни қироати шеър таҳти унвони «Сухани созанда» доир гардид, ки дар он донишҷӯёни курсҳои 1-3 иштирок намуданд. 

 

Дастаи ихтироъкорон

Баҳри васеъ ба роҳ мондани корҳои илмӣ - тадқиқотӣ аз ҷониби донишҷӯён дар назди кафедраи физика озмоишгоҳи “Ихтироъкорони ҷавон” ташкил ёфтааст. Донишҷӯёну устодон ҳамасола корҳои илмӣ - тадқиқотӣ ва пажуҳишии худро дар озмунҳои донишгоҳӣ, шаҳрӣ ва ҷумҳуриявӣ пешниҳод менамоянд. Соли равон омӯзгори ҷавони кафедраи физикаи умумӣ Абдуҷалилзода Ф. бо дастгоҳи ихтироъкардаи худ - “Дастгоҳи комплексии офтобӣ барои ҳосил намудани энергияи гармӣ ва барқ” соҳиби ҷоизаи олӣ дар озмун-фестивали ҷумҳуриявии “Навоварон ва ихтироъкорони наврас ва ҷавон” таҳти унвони “Ҷавонон - созандаи Ватан” дар Маркази патент ва иттилооти назди Ҳукумати Ҷумҳурии Тоҷикистон гардид. Инчунин, донишҷӯи курси 3-юми факултети физика Раупов З. барои иштироки фаъолона ва ихтироъи дастгоҳи “Шаҳраки аз ҷиҳати экологӣ тоза” сазовори дипломи дараҷаи 1 гардид.

 

Шуъбаи таҷрибаомӯзӣ

Шуъбаи таҷрибаомӯзӣ ва кор бо мутахассисони ҷавони Донишгоҳи давлатии омӯзгории Тоҷикистон ба номи Садриддин Айнӣ воҳиди сохтори қисми таълимӣ ба шумор рафта, ба мустаҳкам намудани донишҳои назариявии азбаркардаи донишҷӯён дар раванди таҳсил ва ба даст овардани малакаю маҳорати амалӣ дар касби интихобкарда равона шудааст. Барои расидан ба мақсад дар доираи фаъолияти худ шуъба вазифаҳои зеринро иҷро менамояд: ташаккули ҷаҳонбинии дурусти илмӣ ва идеявии донишҷӯён, аз худ намудани намудҳои маъмули фаъолияти тарбияи идеявӣ; бадастории сифатҳои касбии шахсияти омӯзгори оянда ва сифатҳои шахсии мутахассис, ки ба талаботи ҷамъият ҷавобгӯ бошанд; тарбияи муҳаббат ва иззату эҳтироми донишҷӯён нисбати ихтисоси омӯзгорӣ; ба роҳ мондани фаъолияти амалии донишҷӯён, ташаккули маҳорату малакаҳои касбӣ, ки асоси ташкили хуби корҳои таълимӣ - тарбиявӣ ба ҳисоб мераванд, аз бар намудани усулҳои таълиму тарбия; дар амал ба роҳ мондан ва мустаҳкам намудани алоқаи фанҳои назариявӣ, ки донишҷӯён ҳангоми омӯзиши фанҳои ҷамъиятӣ, тахассусӣ ва равоншиносиву омӯзгорӣ аз худ намудаанд; шиносоии донишҷӯён бо ҳолати корҳои таълимӣ - тарбиявӣ дар муассисаҳои таълимиву тарбиявӣ ва раҳнамоии донишҷӯён дар ҳаллу фасли масъалҳои таълимиву тарбиявӣ; ба роҳ мондани муносибатҳои ҳамкории донишҷӯён бо талабагон, омӯзиши хислатҳои синнусолӣ ва фардии онҳо; коркарди муносибати эҷодӣ ва тадқиқотӣ нисбат ба фаъолияти омӯзгорӣ, аз худ намудани малакаҳои таҳлилӣ, натиҷаҳои кори худ, ба роҳ мондани талабот ба худомӯзӣ.

Тӯли се сол аст, ки Раёсати донишгоҳ дар муассисаҳои таҳсилоти миёнаи умумии шаҳри Душанбе ва кӯдакистону мактаб-интернатҳо вобаста ба ихтисосҳои табиӣ-риёзӣ, гуманитарӣ ва ихтисосҳои махсус кафедраҳои пойгоҳӣ таъсис дода, баробар бо баргузории таҷрибаомӯзии омӯзгории донишҷӯён гузаронидани дарсҳои таҷрибавиро барои омӯзгорони кафедраҳои амалкунандаи донишгоҳ ва муассисаҳои таҳсилотии зикршуда доир ба масъалаҳои меҳварии фанҳои таълимӣ ба роҳ мондааст. 

 

Хобгоҳ

Донишгоҳ дорои хобгоҳи замонавӣ буда, айни замон дар он 1260 нафар донишҷӯён зиндагӣ мекунанд. Хобгоҳ бо ҳама шароитҳои лозимӣ барои истиқомат таъмин буда, маблағи солонаи истиқомат дар хобгоҳ 800 сомониро ташкил медиҳад. Дар донишгоҳ 40 нафар ятими кулл (18 духтар, 22 писар) таҳсил мекунанд, ки ҳамаи онҳо дар хобгоҳ ба таври ройгон ҷой карда шудаанд ва ҳар моҳ аз ҳисоби маблағҳои махсуси донишгоҳ ба онҳо ба маблағи 100 сомонӣ идрорпулӣ (стипендия) дода мешавад.

 

Дараҷаи тахассус ва ба кор таъминкунии хатмкунандагони донишгоҳ

Донишҷӯёне, ки аз рӯи ихтисосҳои амалкунанда тавассути буҷаи давлатӣ таҳсил менамоянд, дар асоси шартномаи сетарафа ва роҳхат ба муассисаҳои таҳсилоти миёнаи умумии минтақаҳои гуногуни кишвар барои оғоз бахшидан ба фаъолияти омӯзгорӣ сафарбар карда мешаванд. Донишҷӯёне, ки тибқи квотаи Президентӣ ихтисосҳои амалкунандаи донишгоҳро хатм менамоянд, вобаста ба талаботи шартномаи сеҷониба ба муассисаи таҳсилоти миёнаи умумии пешниҳодкардаи мақомоти ҳокимияти маҳаллии шаҳру ноҳияҳо фиристонида мешаванд.

 

Иштироки донишҷӯён дар олимпиадаҳои дохилӣ ва хориҷӣ

Донишҷӯёни донишгоҳ ҳар сол дар олимпиадаҳои гуногун, озмунҳо ва чорабиниҳои ҷашнӣ фаъолона ширкат варзида, ҷойҳои намоёнро ба даст меоранд. Инчунин, дар худи донишгоҳ ба хотири ҷалби донишҷӯён ба корҳои илмӣ ва пажуҳишӣ аз оғози соли 2018 гузаронидани озмунҳо ва сабқатҳои гуногун дар байни донишҷӯён ба роҳ монда шуд. Аз ҷумла, бахшида ба ҷашни Наврӯз озмуни хониши китоби «Чеҳраҳои мондагор»-и Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, озмуни «Иншои беҳтарин» ба ифтихори 140-солагии сардафтари адабиёти муосири тоҷик устод Садриддин Айнӣ ва эълон гардидани соли 2018 “Соли рушди сайёҳӣ ва ҳунарҳои мардумӣ” баргузор гашта, ғолибон аз тарафи Раёсати донишгоҳ бо мукофоти пулӣ сарфароз гардиданд.

Ҳар сол рӯзи 5-уми октябр ба ифтихори “Рӯзи забон” дар донишгоҳ диктанти ягона гузаронида мешавад, ки дар он тамоми омӯзгорон, донишҷӯён ва кормандони муассиса ширкат меварзанд.

Донишгоҳ дар байни 35 муассисаи таҳсилоти олии касбии Ҷумҳурии Тоҷикистон аз рӯи натиҷаи ҷамъбасти даври ниҳоии олимпиадаи фаннии донишҷӯёни муассисаҳои таҳсилоти олии касбии Ҷумҳурии Тоҷикистон дар соли таҳсили 2017-2018 ҷои 3-юмро ишғол намуд. Чунин мисолҳо хеле зиёданд.

 

Ба ҷои хулоса

Донишгоҳи давлатии омӯзгории Тоҷикистон ба номи Садриддин Айнӣ яке аз поягузорони асосии илму маърифат ва фарҳанги халқи тоҷик маҳсуб ёфта, дар тайёр намудани мутахассисони илмию омӯзгорӣ ҳам дар замони шӯравӣ ва ҳам дар давраи соҳибистиқлолӣ саҳми бузург гузоштааст. Таҳсил дар чунин як муассисаи пурнуфуз орзӯи ҳар як шахси соҳибмаърифат буда, чи тавре, ки Пешвои миллат, Асосгузори сулҳу ваҳдат, Президенти Ҷумҳурии Тоҷикистон Эмомалӣ Раҳмон гуфтаанд, “Миллате, ки омӯзгори асил надорад, ҳеҷ гоҳ ба ягон мартаба намерасад. Ифтихор ва сари баланди мост, ки тоҷикон аз қадим соҳиби китобу қалам, илму маърифат ва олиму омӯзгор буданд, ҳастанд ва дар оянда низ хоҳанд монд”.

Агар омӯзгори асил шудан мехоҳед, агар дар ҷодаи илму маърифат соҳиби обрӯву муваффақият гардидану ба зинаҳои баланди илму маориф даст ёфтан хоҳед, марҳамат ба ДДОТ ба номи Садриддин Айнӣ. Рамзи Донишгоҳ дар Маркази миллии тестии назди Ҳукумати Ҷумҳурии Тоҷикистон 102 мебошад. 

 

Холиқи МУҲАММАДНАЗАР, МТЖТ

Шанбе, 12 Январ 2019 11:12

“Роғун” - арсаи ному нанг

“Оғози кори агрегати якуми Нерӯгоҳи барқи обии “Роғун” барои тамоми сокинони Тоҷикистони соҳибистиқлол санаи фаромӯшнашаванда ва рӯзи таърихӣ мебошад”.

Эмомалӣ Раҳмон

Ҳукумати кишвар дар шароите барои сохтмони Нерӯгоҳи барқи обии “Роғун” тасмим гирифт, ки ҳанӯз мамлакат мушкилоти зиёди молиявию иқтисодиро паси сар менамуд. Дар кишвари маҳбубамон Тоҷикистон якдигарфаҳмӣ ва сулҳу салоҳ ҳукумфармо гардида, бартарафкунии оқибатҳои ҷанги бемаънии шаҳрвандӣ идома дошт. Дар ин баробар давоми шуруи корҳои сохтмонӣ ва барқароркунии НБО “Роғун” чандин маротиба ҷомеаи ҷаҳониро буҳрони шадиди иқтисодӣ фаро гирифт, ки иқтисоди миллии кишварҳои дар ҳоли рушд зери фишор қарор дошт. Сарвари давлат ба ҳамаи ин мушкилиҳо ва монеаҳо нигоҳ накарда, онро иншооти сарнавишсоз ва сохтмони аср эълон карданд.

16-уми ноябри соли равон дар саҳифаи таъхири миллати тамаддунофари тоҷик як рӯйдоди муҳим, яъне агрегати нахустини Нерӯгоҳи барқи обии “Роғун” ба истифода дода шуд, ки он бо хатҳои заррин сабт гардид.

Ба истифода додани нахустин агрегати НБО “Роғун” - ин нишонаи расидан ба орзуву ормонҳои деринаи миллати тоҷик, дарёфти ризқу рӯзии фаровон, файзу баракати зиндагӣ ва гузоштани қадамҳои нахустин ба остонаи саодату пешрафти босуръати кишвари азизамон - Тоҷикистони соҳибистиқлол мебошад. Ин рӯйдоди ҳаётан муҳим боиси баҳамоӣ, муттаҳидӣ ва хушҳолию хушнудии тамоми сокинони кишварамон Тоҷикистон гардид.

Нахустин фазилати марҳилаи оғози “Роғун” - ин кишварро аз норасоии барқ наҷот дода, эҳтиёҷоти дохилиро бо барқ пурра таъмин хоҳад кард. Иқтидори пурраи истеҳсолии “Роғун” 3600 мегаватро дар бар гирифта, яъне ба се (!) нерӯгоҳи атомӣ баробар аст. Бо пурра ба истифода додани НбО “Роғун” дар кишвар якбора иқтидори корхонаҳои саноатӣ вусъат ёфта, сармоягузории дохилию хориҷӣ дар Тоҷикистон, ба хотири нерӯи кор ва барқи доимию арзон, шароити арзанда фароҳам оварда, ба сохтани корхонаҳои хурду бузург дар кишвари азизамон замина мегузорад.

Ин нерӯгоҳи азими аср пас аз пурра ба кор даромадан, дар як сол ба миқдори 13 миллиард киловат/соат нерӯи барқ истеҳсол намуда, дар минтақа моро ба бузургтарин содиркунандаи энергияи арзон, ба яке аз таъминкунандагони сиёсати энергетикӣ табдил хоҳад дод.

Ба гуфтаи коршиносони минтақавии Осиёи Марказӣ, нерӯгоҳи “Роғун” усули наве барои ба роҳ мондани муносибатҳои Тоҷикистону Ӯзбекистон ва дигар кишварҳои Осиёи Марказӣ маҳсуб меёбад.

Муовини директори Институти Осиёи Марказӣ оид ба тадқиқоти стратегӣ Фарҳод Одинаев дар вохӯрии минтақавии коршиносон, ки доир ба гидроэнергетика дар шаҳри Душанбе баргузор гардид, андешаҳояшро баён доштааст. Ба гуфтаи ин таҳлилгар, иродаи сиёсӣ буд, ки нерӯгоҳи “Роғун” дар муддати кӯтоҳ сохта ба истифода дода шуд. Ҳамзамон, ӯ қайд мекунад, ки сохмони нерӯгоҳи “Роғун” барои аз буҳрони энергетикӣ баромадани Тоҷикистон ёрӣ мерасонад ва он барои 150 сол кор хоҳад кард. Сохмони нерӯгоҳи “Роғун” барои аз буҳрони энергетикӣ баромадани Тоҷикистон кӯмакрасон аст. 

Ба андешаи мутахасисон, обанбори “Роғун” ба соф ва тоза намудани об ва наҷоти нерӯгоҳи Норак аз тагшинҳо, умри онро садсолаҳои дигар дароз хоҳад кард. Ба вуҷуд омадани баҳре ба дарози 70 километр,  майдонест барои варзишҳои шиноварӣ ва амсоли он, инчунин имкониятест барои нигоҳубин ва парвариши моҳӣ, ташкили санаторияву истироҳатгоҳҳои соҳилӣ дар ҳавои тозаи ин гӯшаи зебои ватанамон.

Гуфтан бамаврид аст, ки бисёре аз кишварҳои минтақа ба нерӯи барқи арзон эҳтиёҷ доранд. Алҳол Ҷумҳурии Тоҷикистон ба Ҷумҳурии исломии Афғонистон, Ҷумҳурии Қирғизистон, Ҷумҳурии Ӯзбекистон барқ содир мекунад. Ҳамчунин, ба қисмати ғарбии Ҷумҳурии халқии Хитой, ки дар он бештар аз 100 миллион аҳолӣ зиндагӣ мекунанд, камбудии нерӯи барқ эҳсос мегардад. Тоҷикистон солона 1,5 миллиард кВт.ст ба кишварҳои хориҷӣ нерӯи барқ содир менамояд. Имрӯзҳо таъмини аҳолии кишвар бо нерӯи барқ яке аз ҳадафҳои стратегии Ҳукумати Ҷумҳурии Тоҷикистон маҳсуб меёбад.

Дар стратегияи рушди миллии Ҷумҳурии Тоҷикистон барои то давраи соли 2030 зиёд намудани нерӯи барқ, сохтмони чархаи дуюми НБО “Роғун” ба нақша гирифта шудааст, ки тибқи он соли 2030 дар Ҷумҳурии Тоҷикистон бештар аз 45 миллиард кВт нерӯи барқ истеҳсол мешавад. Ин нишондод дар қиёс бо соли 2015 се маротиба зиёд хоҳад буд.

Имрӯзҳо Тоҷикистон дар қиёс ба дигар кишварҳои истеҳсолкунандаи нерӯи барқ дар нерӯгоҳҳои барқӣ-обӣ, имконияти бештар дорад. Аз ин рӯ, ҳар як фарди Тоҷикистонро мебояд, ки бобати саҳм гузоштан дар бунёди ин нерӯгоҳи аср ҷаҳду талош намоянд ва ҳиссаи арзандаи худро гузоранд. Заҳматҳои шабонарӯзии коргарону мутахассисон ва муҳандисон мояи ифтихору шараф аст.

Бо кӯшиш ва заҳмату талошҳои Пешвои миллат агрегати якуми НОБ “Роғун” ба истифода дода шуда, давра ба давра агрегатҳои боқимондаи он низ ба кор медароянд ва он рӯз дур нахоҳад буд, ки кишвари мо аз давлати рӯ ба рушд ба давлати пешрафтаи дунё табдил меёбад.

 

Талабшо АЗИЗОВ,

омӯзгори фанни таърих ва ҳуқуқи МТМУ №15-и ҷамоати деҳоти Сағирдашти ноҳияи Дарвоз

«Пешрафти минбаъдаи ҷомеа ва амалӣ намудани мақсаду вазифаҳои дарпешистода кафолати ҳамачонибаи адолати судиро талаб мекунад».

 Эмомалӣ Раҳмон

 

ТАЪРИХ

Бо ҳалномаи Суди шаҳри Хуҷанд Ализода Эраҷ аз 25.09.2017 сол, №2-598/17 аризаи даъвогии Зокирова Д. Ҷ., истиқоматкунандаи ш. Хуҷанд, кӯчаи И. Сомонӣ бинои 12, хонаи 40 нисбати ҷавобгар Мақомоти иҷроияи ҳокимияти давлатии шаҳри Хуҷанд дар бораи бекор кардани Қарори Раиси шаҳр таҳти №409 аз 05.06.2015 сол “Оид ба иваз намудани мақсади истифодаи қитъаи замин аз истифодабарии қаҳвахонаи “Кафе Равшан” ва Гармхона” ба истифодаи бинои истиқоматии 9-ошёна воқеъ дар шаҳри Хуҷанд, кӯчаи З. С. Раҷабовҳо ба масоҳати умумии 1109,8 метри мураббаъ, барои истифодаи бемуҳлат, лоиҳакашӣ ва сохтмон иҷозат додан” қонеъ карда шуда, санади мазкур беэътибор дониста шудааст.

Ҳамчунон, бо ҳамин ҳалномаи судӣ даъвои директори ҶДММ “Диёри Хуҷанд” ба ҷавобгарии Якубов Х. Ф., Шуъбаи меъморӣ ва шаҳрсозии шаҳри Хуҷанд ва Кумитаи идораи замини шаҳри Хуҷанд дар бораи беэътибор донистани Иҷозат барои сохтмон №25 аз 29.05.2017 с. ва Сертификати ҳуқуқи истифодаи замин аз 27.07.2015 с. таҳти №2565 қаноатбахш карда шуда, ҳуҷҷатҳои ҳуқуқии мазкур ба номи ҷавобгар Якубов Х. Ф. беэътибор дониста шудаанд.

 

ҲАМА АЗ ЯК ТАН

Ҳалнома дар қисмати рад кардани талаботи даъвогии ЧДММ “Диёри Хуҷанд” нисбати МИҲД-и шаҳри Хуҷанд дар бораи уҳдадор кардан ва оид ба вобаста намудани қитъаи замин, воқеъ дар щаҳри Хуҷанд, кӯчаи З. С. Раҷабовҳо ба масоҳати 1109 м.м. ба тариқи кассатсионӣ мавриди баҳс қарор дода нашудааст.

Бо Қарори коллегияи судӣ оид ба парвандаҳои граждании Суди вилояти Суғд аз 28.11.2017 сол ҳалномаи суди зинаи якум бетағйир ва шикояти кассатсионии ҷавобгар Якубов Х. Ф. беқаноат мононда шудааст.

Бо таъиноти судяи Суди вилояти Суғд аз 27.02.2018 сол дар ирсоли парвандаи гражданӣ барои моҳиятан баррасӣ намудан дар суди марҳилаи назоратӣ рад карда шуда, шикояти назоратии Якубов Х. Ф. беқаноат гузошта шудааст. 

Дар раванди омодасозии шикояти назоратӣ нисбати санадҳои судии доир ба баҳси гражданӣ қабулгардида ҳолатҳои ҷиддие ошкор гардиданд, ки дар ҳамин асос ҷавобгар Якубов Ф. Х. барои аз нав баррасӣ намудани ҳалномаи Суди шаҳри Хуҷанд аз 25.09.2017 сол ба суди зинаи якум муроҷиат намудааст.

Новобаста аз тарафи МИҲД-и шаҳри Хуҷанд ва ҳамҷавобгар Якубов Х. Ф. бо дастрасии моддаи 18-и КМГ ҶТ муроҷиат оид ба раддия, яъне иваз кардани судя Ализода Эраҷ дода шуд, ба инобат гирифта нашудааст. Бо таъиноти судяи Суди шаҳри Хуҷанд Ализода Эраҷ аз 12.06.2018 сол аризаи намояндаи ваколатдори Якубов Х. Ф. - Ашуров Б. Н. «Дар бораи вобаста ба ҳолатҳои нав ошкоргардида аз нав баррасӣ намудани ҳалномаи эътибори конунӣ пайдокардаи Суди шаҳри Хуҷанд аз 29.09.2017 сол» рад карда шудааст.  Нисбати таъиноти мазкур бо тартиби кассатсионӣ шикояти хусусӣ оварда нашудааст. 

Далелҳо: Пас аз таҳлили ҳолатҳои баҳси гражданӣ ба хулоса омаданд, ки таъиноти суди марҳилаи аввал ғайриҳуқуқӣ мебошад ва нисбати он шикояти назоратӣ бо асосҳои зерин пешниҳод намоянд.

Чунончи аз матни таъиноти судӣ бармеояд, суди зинаи якум иддао овардааст, ки гӯё Якубов Х. Ф. чун аризадиҳанда дар аризааш ягон ҳолати нав ошкоргардидаро, ки боиси аз нав баррасӣ намудани ҳалномаи Суди шаҳри Хуҷанд аз 25.09.2017 сол мегардад, дарҷ накарда бошад. Бо чунин мулоҳизаронии таъиноти судӣ қатъиян розӣ шудан мумкин нест. Дар аризаи ба суд пешниҳодгардидаи ҷавобгар Якубов Х. Ф. ба таври мушаххас нишон дода шудааст. 

Алалхусус, даъвогар Зокирова Дилором дар аризаи даъвогиаш нисбати МИҲД-и шаҳри Хуҷанд оид ба бекор кардани Қарори раиси шаҳри Хуҷанд таҳти №409 аз 05.06.2015 сол ваҷҳ оварда буд, ки ҳамчун яке аз истиқоматкунандагони шаҳри Хуҷанд, кӯчаи И. Сомонӣ ва З. С. Раҷабовҳо бо ширкати сохтмонии ҶДММ «Диёри Хуҷанд» шартнома оид ба фаъолияти шарикӣ дар сохтмони хонаи бисёрҳуҷрагӣ бастааст. 

Дар давраи баррасии парвандаи гражданӣ дар суди марҳилаи якум ҷавобгар Якубов Х. дар изҳори норозигӣ зикр карда буданд, ки даъвогар Зокирова Д. аз рӯи баҳси мазкур субъекти даъво шуда наметавонад, зеро охирон сокини кӯчаи И. Сомонӣ, бинои 12, ҳуҷраи 40 мебошад ва Қарори Раиси шаҳри Хуҷанд таҳти №409 аз 5.06.2015 сол оид ба Якубов Х. Ф. бо ҳуқуқи ба даст овардани хонаи нав ба ҷои бинои бартарафшавандаи зиндагӣ мекарда, дар кӯчаи И. Сомонӣ ягон дахле надорад ва ҳуқуқҳои манзилии ӯро поймол намекунад.

Барои санҷиши асоснокии масъалаи мазкур намояндаи ваколатдори ҷавобгар Якубов Х. - Ашӯров Б. Н. дар раванди мурофиаи судӣ борҳо аз даъвогарон Зокирова Д. Ҷ. ва ҶДММ «Диёри Хуҷанд» дархост намуда буданд, ки нусхаи (созишномаи) оид ба фаъолияти шарикӣ дар сохтмони хонаи бисёрҳуҷрагӣ барои таҳлилу омӯзиш ба суди зинаи якум пешниҳод намоянд. Аммо даъвогарон Зокирова Д. Ҷ. ва ҶДММ «Диёри Хуҷанд» бе ягон сабаби узрнок нусхаи созишномаи зикргаштаро ба суд ва ба намояндаи ҷавобгар Якубов Ф. дастрас накардаанд.

Танҳо дар раванди омодасозии маводҳои шикояти назоратӣ ба ихтиёри ҷавобгар Якубов Х. Ф. нусхаи Созишномаи байни ҶДММ «Диёри Хуҷанд» ва Зокирова Д. Ҷ. оид ба фаъолияти ғайрисоҳибкории шарикӣ дар сохтмони хонаи бисёрҳуҷрагӣ аз 22.12.2015 сол аз мақомоти корҳои дохилии шаҳри Хуҷанд дар асоси дархост дастрас гардидааст.

Таҳлили ҳуҷҷат собит менамояд, ки матлаби созишнома ин сохтмони хонаи бисёрошёна дар кӯчаи И. Сомонӣ (Аэлита - суроғаи сохтмонӣ) аз тарафи ҶДММ «Диёри Хуҷанд» мебошад ва шаҳрванд Зокирова Д. Ҷ. ва ҶДММ «Диёри Хуҷанд» мавриди баҳс қарор додани санадҳои МИҲД-и шаҳри Хуҷандро, сертификату иҷозатнома ба сохтмонро вобаста ба лоиҳаи сохтмонии Якубов Х. Ф. дар кӯчаи З. С. Раҷабовҳо надоранд.

Инчунин, пас аз эътибори қонунӣ пайдо намудани ҳалномаи Суди шаҳри Хуҷанд аз 25.09.2017 сол ба унвони ҷавобгар Якубов Х. Ф. санаи 02.03.2018 сол аз МИҲД-и вилояти Суғд боз нусхаҳои ҳуҷҷатҳои ҳуқуқии вобаста ба лоиҳаи кории «Бинои истиқоматии баландошёна бо маркази савдо ва хизматрасонӣ, воқеъ дар хиёбони И. Сомонӣ, ш. Хуҷанд» фармоишгар ҶДММ «Диёри Хуҷанд», аз он ҷумла хулосаи экспертизаи экологӣ аз 9.10.2015 сол, хулосаи мусбати экспертизаи давлатӣ №557/15Э9681 аз 28.12.2015 сол, Иҷозат барои сохтмон №05 аз 09.02.2016 сол аз Шуъбаи меъморӣ ва шаҳрсозии шаҳри Хуҷанд ва Нақшаи муфассали ҷойгиршавии банақшагирии лоиҳа (ПДП) мутобиқ ба нақшаи генералӣ дастрас гаштааст.

Аз мазмуни ҳамин ҳуҷҷатҳо бараъло дида мешавад, ки ба фармоишгар ҶДММ «Диёри Хуҷанд» барои бунёди бинои баландошёна бо маркази савдо танҳо дар хиёбони И. Сомонӣ аз ҷониби мақомоти салоҳиятдор дар масоҳати 656,0 м.м. иҷозат дода шудаасту халос.

Барои анҷом додани корҳои сохтмонӣ дар қаламрави кӯчаи З. С. Раҷабовҳо дар ҳудуди минтақаи собиқ «Кафе Равшан» ширкати «Диёри Хуҷанд» ягон санади ҳуқуқмуайянкунанда надорад. Ғайр аз ин, дар ҳуҷҷатҳои мазкур оид ба татбиқи лоиҳаи ангоравии даврашакли ҶДММ «Диёри Хуҷанд» ягон сухане намеравад. 

Ҳамчунон, баъд аз эътибори қонунӣ пайдо кардани ҳалномаи Суди шаҳри Хуҷанд аз 25.09.2017 сол оид ба беэътибор донистани Қарори Раиси шаҳр таҳти №409 аз 5.06.2015 сол, Иҷозат барои сохтмон №25 аз 29.05.2015 сол ва Сертификати ҳуқуқи истифодаи замин ба номи ҷавобгар Якубов Х. Ф. охирон ба унвони Кумитаи меъморӣ ва сохтмони назди Ҳукумати Ҷумҳурии Тоҷикистон бо аризаи расмӣ бо замимаи ҳамаи қарордодҳои судии доир ба баҳс қабулшуда ва ҳуҷҷатҳои дахлдор муроҷиат карда буданд.

Мақомоти марказии меъморию сохтмонии мамлакат бо мактуби худ аз 19.02.2018 сол таҳти №2/365 ба Якубов Х.Ф. хабари расмӣ дод, ки аз ҷониби ин ашхос сохтмони бинои истиқоматӣ дар заминаи иншооти «Кафе Равшан» ва «Гармхона», воқеъ дар кӯчаи З. С. Раҷабовҳо №№102/1 ва 98 «а», «б» дар асоси қарори дахлдори Раиси шаҳри Хуҷанд бо риояи талаботҳои амалкунандаи соҳа ҳуҷҷатгузорӣ карда шуда, ҳамзамон лоиҳаи корӣ таҳия ва аз экспертизаи давлатӣ гузаронида шудааст.

Ҷоиз ба ёдоварист, ки ҳамаи хуҷҷатҳои дар боло номбаршуда фақат баъд аз эътибори қонунӣ пайдо кардани ҳалномаи Суди шаҳри Хуҷанд аз 25.09.2017 сол дастраси мо гардидаанд ва дар ҷаласаи суди зинаи якум моҳи сентябри соли 2017 предмети тадқиқоти мурофиаи гражданӣ нашудаанд.

Ногуфта намонад, ки ғайр аз далелҳои дар боло зикршуда, дар ҷаласаи суди зинаи якум боз даҳҳо далелҳои ҷиддӣ нишон дода шуда буд, вале афсӯс, аз тарафи судяи Суди шаҳри Хуҷанд Ализода Эраҷ ба инобат гирифта нашуд.

 

АЗ ПАЁМИ ПЕШВОИ МИЛЛАТ

“Ҳукумати Ҷумҳурии Тоҷикистон фаъолияти худро ба самти ноил шудан ба ҳадафҳои дар Стратегияи миллии рушд пешбинигардида равона карда, баланд бардоштани сатҳу сифати зиндагии мардумро тавассути ҳалли масъалаҳои пешрафти устувори иқтисодӣ, тақвияти нерӯи инсонӣ, такмили низоми идораи давлатӣ, тавсеаи имкониятҳои содиротии мамлакат, беҳтар кардани фазои сармоягузорӣ, инкишофи бахши хусусӣ ва беҳбуди вазъи бозори меҳнат ҳадафи олии худ эълон намудааст”.

Эмомалӣ Раҳмон

 

Таъкид ва гуфтаҳои Пешвои миллат, Президенти Ҷумҳурии Тоҷикистон, муҳтарам Эмомалӣ Рахмон дар саҳмгузории соҳибкор Якубов Х. Ф. дида мешавад:

- Объекти ҷашнӣ ба таҷлили сазовори 30-солагии Истиқлолияти Ҷумҳурии Тоҷикистон бахшида шудааст.

- Ободии маҳал ва зебогии як гӯшаи диёр.

- Эҷод ва таъсиси зиёда аз 100 ҷойи кории доимӣ.

- Таъсис ва эҷоди беш аз 10 корхона.

- Даромади андоз аз фаъолияти соҳибкорӣ ва ғанӣ гардонидани буҷаи мамлакат.

Афсӯс, ки беш аз ду сол боз масъалаи сохтмони бинои истиқоматии 9-ошёна, воқеъ дар маркази шаҳри Хуҷанд, кӯчаи З. С. Раҷабовҳо ҳалли худро наёфтааст.

 

АДОЛАТ

Бо ваҷҳҳои таъиноти суди зинаи якум бобати он, ки масъалаи даъвогар Зокирова Д. Ҷ. ва ҶДММ «Диёри Хуҷанд» субъекти мавриди баҳс қарор додани лоиҳаи сохтмонии Якубов Ф. Х. дар кӯчаи З. С. Раҷабовҳо набудан, дар саҳифаҳои лозимаи ҳалнома хулосабарорӣ карда шудааст, асос барои рад кардани аризаи Якубов Х. Ф. дар бораи аз нав баррасӣ намудани ҳалнома вобаста ба ҳолатҳои нав ошкоргардида шуда наметавонад. Зеро, бори дигар таъкид менамоем, ки номгӯи ҳуҷҷатҳои иловагӣ вобаста ба мавзуи баҳс ба унвони Якубов Ф. Х. танҳо дар марҳилаи омодасозии шикояти назоратӣ дастрас гардид ва он кас чун иштирокчии парвандаи гражданӣ такя ба ҳуқуқҳои мурофиавиашон зарур шумориданд, ки ба суди марҳилаи якум аризаро оид ба бекор кардани ҳалномаи Суди шаҳри Хуҷанд аз рӯи ҳолатҳои нав ошкоргардида ва аз сари нав баррасӣ кардани парвандаи гражданӣ тибқи қонунгузорӣ пешниҳод намоянд.

Мо аз марҳилаи назоратии Суди вилояти Суғд умед дорем, ки доир ба ин қазияи баҳси гражданӣ санади қонуниву адолатнок бароварда мешавад.

 

“ФАРАЖ”

 

P.S. Ба мушкил печидани иҷрои кори сохтмонӣ дар маркази шаҳри Хуҷанд аҷиб аст, бинобар ин, “Фараж» тасмим гирифтааст таҳқиқи мӯшикофонаи ин баҳси судиро дар оянда низ пайгирӣ намояд.

саҳ 2 аз 76

Хабари-рӯз

Минбари сардабир

  • ДАВоДАВ

    Масофаи роҳ бо машинае, ки 150 ҳазор доллар нарх дорад…

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.