.

Alternative flash content

Requirements

Get Adobe Flash player

Хабари-рӯз

Шикояти кормандони нигаҳдории роҳҳои ноҳияи Фирдавсӣ аз надодани мукофотпулӣ

Кормандони нигаҳдории роҳҳо (ДЭУ)-и ноҳияи Фирдавсии Душанбе ба faraj.tj шикоят аз он карданд, ки дар арафаи соли нави мелодӣ ба кормандони нигаҳдории роҳҳои ноҳияҳои Исмоили Сомонӣ, Сино ва Шоҳмансур ба маблағи 300-400 сомонӣ мукофотпулӣ аз ҷониби фонди захиравии ноҳияҳо ҷудо карда шуд, вале ба онҳо ин маблағро то ҳол надодаанд.    

Сокини ноҳияи Фирдавсӣ Бекова Сафаргул, яке аз корманди нигаҳдории роҳҳо дар суҳбат бо мо чунин гуфт: “Мо аз корамон розӣ ҳастем, вале аз раисҳоямон не, чунки дар вақташ маошамонро намедиҳанд. Дар арафаи Соли нав бояд ба мо мукофотпулӣ медоданд, вале аз он то ҳол хабаре нест. Ин ҳаққи мо аст, меҳнат мекунем, ҳама корҳоро анҷом медиҳем. Трактор, зоғнӯл, ҷорӯб ва дигар асбобҳои корӣ сари вақт дода намешавад. Ба раиси ноҳия борҳо навиштаем, аммо то ҳол ҷавобе нест”.

Ба гуфтаи ин ҳамсуҳбати мо, баъди ба кор омадани раиси нави ноҳия корашон бад шудаасту беҳ не. Ӯ афзуд: “Аз рӯи соати корӣ мо бояд 8 соат кор кунем, вале баъзан то соати 6-8-и рӯз кор мефармоянд. Дар соли нав ба кормандони нигаҳдории роҳҳои н. Сино 300-400-сомонӣ мукофотпулӣ доданд, вале ба мо то ҳол мегӯянд, ки сабр кунед, аммо сабр то ба кай? Ҳамаи мо гуфтан мехоҳем, аммо метарсем, чунки аз кор пеш мекунанд”.

Яке аз мутасаддиёни Раёсати нигаҳдории роҳҳои ноҳия Раҳмонов Абдулло дар суҳбат бо мо чунин гуфт: “Аз рӯи низомнома 8 соати корӣ ва аз рӯи 8 соат маош медиҳем. Ва мукофотпулие, ки дигар ноҳияҳо гирифтаанд, он аз рӯи фонди захиравии ноҳия дода шудааст. Дар раёсати мо фонди захиравӣ нест, чунки штатҳои мо ҳама пуранд, вакансияи ҷойи холӣ нест”.

Ҳамзамон, номбурда афзуд: “Аз тарафи иттифоқи касабаи ноҳия кормандонро ба осоишгоҳҳо равон мекунем. Аммо кормандон мегӯянд, ки ин ба ҳар кас насиб намешавад. Ҳастанд одамоне, ки 15 сол кор карда истодаанд, аммо боре ҳам барои истироҳат фиристода нашудаанд”. 

Як корманди дигари нигаҳдории роҳҳои ноҳия Бекова Моҳшариф ба МТЖТ омада, чунин шикоят кард: “Ноҳияҳои Сино, Исмоили Сомонӣ ва Шоҳмансур мукофоти пулӣ бо маблағи 300-400-сомонӣ гирифтанд, аммо ба мо надоданд, ин пулҳо куҷо мераванд, номаълум. Сари вақт асбобҳои даркориро намедиҳанд. Рӯзе,ки бемор мешавӣ, ҷавоб медиҳанд, мегӯянд асбобҳои даркориро биёр. Ман фикр мекунам, назар ба дигар ноҳияҳо, зулм дар ноҳияи Фирдавсӣ бисёр аст. Гунаҳгори асосӣ дар инҷо раис не, ҳамон прораб аст. Рӯзе раис ҷавоб диҳад, прораб мегӯянд не “хар борин кор мекунанд, маош мегиранд”. Прораби нави мо Бобошеров Олим дашномҳои қабеҳ медиҳад ва бисёри занҳоро гирён мекунад ва мегӯяд, ки рафта ҳар куҷое шикоят мекунед, кунед, ман дар болои сарам раису таға дорам. Мо бояд дар 1 сол ду маротиба либос гирем, дар як маротиба медиҳанд. Хизматрасонии нақлиётиашон рӯзона аст, барои шабона не, мегӯянд сӯзишворӣ нест, аз ҳукумат ҷудо нашудааст. То ҷое, ки мо мебинем, машруткаҳои №30-и Гулбутта аз сӯзишвории раёсати мо таъмин аст, дуздида мефурӯшанд”.

Дар идомаи суҳбат ҳамсуҳбати мо гуфт, ки он шумораи кормандоне, ки бояд штатӣ кор кунанд, аз будаш зиёд нишон дода шудааст, вале дар асл қариб нисфи онҳо кор намекунанд.   “Аз рӯи штат 72 нафар аст, лекин 72 нафар дар кор нест, 50 нафар аст, 22 нафари онро мехӯранд, то 60-нафара агар ягон тафтиш шавад, мебароранд. Одаме аст бо номи Шаҳноза, 1 сол шуд нест, аммо пулашро мегирад, мегӯянд вай дар декрет аст. Мо медонем, ду Шаҳноза аст, пули онҳоро мегирад, онҳо пули ин коргаронро байни худ тақсим мекунанд”.

Аммо сардори шуъбаи кадрҳо Шокиров Абдукарим дар суҳбат бо мо гуфт, ки ин иддаоҳо дугӯғ ва беасос аст: “Аз рӯзе, ки ман ба кор омадам, ҳамаи ин корҳои ғайриқонуниро шикаста, аз рӯи қонун кор мекунем. Ҳастанд дар байнашон як-ду зани шикояткунанда, ки гапҳои онҳо асос надорад”.

Чандин маротиба кӯшиш кардем бо сардори ин корхона Ҳоҷиев Искандар Холмуродович суҳбат кунем, вале номбурда “корам бисёр аст” гуфта, баҳона ҷӯст.

Нури Саид

Хонданд 1016
Саразм ба 5500-солагӣ омода мешавад

Дар доираи таҷлили ҷашни 5500-солагии Саразм дар мавзеъи мамнуъгоҳи он бинои нави Осорхонаи замонавии сеошёна бунёд мегардад.

9-уми  январ бо мақсади шиносоӣ бо ҷараёни корҳои ободониву созандагӣ ба истиқболи ҷашни 30-солагии Истиқлолияти давлатии Ҷумҳурии Тоҷикистон ва ҳамзамон ҷараёни корҳои омодагӣ ба таҷлили 5500-солагии шаҳри қадимаи Саразм раиси вилояти Суғд Раҷаббой Аҳмадзода ба ин ҷо сафари корӣ кардааст.

Дар ин рӯз зимни боздид аз Мамнуъгоҳи таърихӣ-бостоншиносии Саразм аз ҷониби раиси вилояти Суғд бо иштироки намояндагони мақомоти иҷроияи ҳокимияти давлатӣ ва фаъолони шаҳри Панҷакент барои сохтмони пойдевори бинои Осорхонаи замонавии сеошёна дар ҳудуди Мамнуъгоҳи Саразм санги асос гузошта шуд. Инчунин, дар доираи лоиҳаи корҳои сохтмонӣ бунёди меҳмонхонаи муосир бо тарзи меъмории шарқӣ, деворпанҷараву дарвозаи мамнунгоҳ ва чанд бинои иловагии дигар низ дар назар аст.

Дар доираи сафари кории раиси вилояти Суғд ба шаҳри Панҷакент ҳамзамон ду коргоҳи хурди истеҳсолӣ ба истифода дода шуда, ба сохтмони Беморхонаи нави марказии шаҳри Панҷакент ва биноҳои нави мактабҳои №47 ва №72, воқеъ дар шаҳраки Саразм санги асос гузошта шуд.

Хонданд 140
Агентии мубориза бо коррупсия шаҳрдории Душанберо месанҷад

Раиси шаҳри Душанбе Рустами Эмомалӣ аз Агентии назорати давлатии молиявӣ ва мубориза бо коррупсияи Ҷумҳурии Тоҷикистон ҷиҳати санҷиши фаъолияти молиявию хоҷагидории мақомоти иҷроияи ҳокимияти давлатии шаҳри Душанбе дархост кардааст.

Гуфта мешавад, ки дархости мазкур бо мақсади таъмини шаффофият ва самаранокии истифодаи мақсадноки маблағҳои буҷетии мақомоти иҷроияи ҳокимияти давлатии шаҳри Душанбе дар соли 2018 ба ин Агентӣ пешниҳод шудааст.

Хонданд 176
Рақамҳои қайди давлатии мошинҳо чоррақама мемонанд, ё серақама мешаванд?

Раёсати Бозрасии давлатии автомобилии Вазорати корҳои дохилии Тоҷикистон овозаҳо дар бораи беэътибор шудани рақамҳои қайди давлатии чоррақамаро беасос хонд, аммо ҷорӣ шудани рақамҳои қайди давлатии серақамро инкор ҳам накард.

Дар эъломияи ин ниҳод шуфта мешавад, ки инобар норасоии рақамҳои бақайдгирии давлатӣ барои автомобилҳои сабукрав, боркаш, мусофиркаш ва автобусҳои шахсони воқеӣ, Раёсати бозрасии давлатии автомобили Вазорати корҳои дохилӣ мутобиқи моддаи 11, Қонуни Ҷумҳурии Тоҷикистон «Дар бораи стандартонӣ» аз 29 декабри соли 2010, №668 ба унвони Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон пешниҳод дар бораи илова ба СТ ҶТ 1020-2013 «Аломатҳои қайди давлатии воситаҳои нақлиёт», «Намуд ва андозаи асосӣ», ва «Талаботи техникӣ»-ро таҳия намуда, пешниҳод кардааст.

Гуфта мешавад, ки айни замон дар воҳидҳои бақайдгирию имтиҳонотии Бозрасии давлатии автомобилии ВКД Ҷумҳурии Тоҷикистон ба воситаҳои нақлиёт рақамҳои бақайдгирии давлатии намуди «1А» (чоррақама), ки пештар дода мешуд, дода мешавад. Рақамҳои қайди давлатии намуди нав ҳоло ҷорӣ нашудаанд.

Новобаста дар оянда ҷорӣ гардидани рақамҳои қайди давлатии намуди «1А/1», (серақама) эътиборнокии рақамҳои қайди давлатии амалкунанда идома меёбад.

Хонданд 230

Хабари-рӯз

Минбари сардабир

  • ДАВоДАВ

    Масофаи роҳ бо машинае, ки 150 ҳазор доллар нарх дорад…

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.