.

Alternative flash content

Requirements

Get Adobe Flash player

Хабари-рӯз

Панҷ: Дар масоҳати 6 гектар гармхона бунёд мешавад

Дар ноҳияи Панҷи вилояти Хатлон аз тарафи соҳибкори маҳаллӣ то ҷашни 30-солагии Истиқлолияти давлатии кишвар дар масоҳати 6 га бунёди гармхона ба нақша гирифта шудааст. То имруз дар майдони  1, 5 га замин гармхонаи замонавӣ бунёд шуда, 20 нафар бо ҷойи кор таъмин гардидаанд.

Бино ба иттилои раиси ҷамоати деҳоти Сайфиддин Кабутови ноҳияи Панҷ Сайчаъфар Гурезов бо бунёди гархонаҳо дар майдони 6 га замин истеҳсоли маҳсулоти хушсифати маҳаллӣ афзоиш ёфта, шумораи ба кор фаро гирифтани сокинон ба 100 нафар хоҳад расид.

Ба гуфти ӯ, дар ин гармхонаҳо бештар помидор, бодиринг, қаламфури булғорӣ  ва дигар зироати кишоварзӣ парвариш карда мешавад, ки ин дар таъмини аҳолӣ бо маҳсулоти хушсифат дар ҳама фаслҳои сол нақши муассир мегузорад.

Соҳибкор дар баробари бунёди гархона, сохтмонӣ сардхонаро ба нақша гирифтааст, ки дар нигоҳдорӣ ва таъмини бозори истеъмолии мамлакат бо маҳсулоти кишоварзӣ дар тамоми фасли сол мусоидат менамояд.  

Ин тадбири муҳим ба хотири шоиста истиқбол кардан аз 30-юмин солгарди Истиқлолияти давлатии Ҷумҳурии Тоҷикистон рӯи кор омада, дар ин баробар дар коҳиш додани сатҳи бокорӣ ва содироти маҳсулот ба дигар манотиқи кишвар нақши бориз хоҳад гузошт.

Раҳмоналӣ Додархӯҷаев

Хонданд 172
Ғалабаи футболбозони ҷавони тоҷик бар Эрон

Дастаи мунтахаби олимпии Тоҷикистон (U-23) дар аввалин бозиаш дар мусобиқаи байналмилалии “Чор миллат” дар Доҳа бар дастаи мунтахаби олимпии Эрон ғалаба кард.

Бозӣ дар майдони футболи Академияи «Aspire» баргузор шуд. Ҳисобро дар дақиқаи 4-ум ҳуҷумкунандаи дастаи Эрон Воҳид Номдорӣ кушод. Дар охири нимаи аввали бозӣ капитани дастаи мунтахаби Тоҷикистон Эҳсони Панҷшанбе аз хатои ниммуҳофизатгари эронӣ истифода ва ҳисобро баробар кард. Дар оғози нимаи дуюм, дар дақиқаи 50-ум, ҳуҷумкунандаи дастаи “Истиқлол”-и Душанбе Шериддин Бобоев бо дарвозабони ҳариф як ба як баромад ва тӯбро ба кунҷи дарвоза ворид кард. Дар дақиқаҳои боқимонда бозингарони эронӣ барои наҷот додани дастаашон кӯшиш карданд, вале футболбозони мо хати ҳимояро пурзӯр ва ғалабаи дастаро таъмин карданд – 2:1.

Дар бозии дигари даври аввали мусобиқа дастаи олимпии Қатар бар тими Кувайт бо ҳисоби 3:1 ғалаба кард.

Бозиҳои даври дуюми мусобиқаи “Чор миллат” дар Доҳа 18 январ доир мегарданд. Ин бор дастаи мунтахаби олимпии Тоҷикистон муқобили дастаи мизбон Қатар вориди майдон мешавад. Оғози бозӣ соати 21:30 бо вақти Душанбе аст.

Сармураббии дастаи мунтахаби олимпии Тоҷикистон (U-23) Усмон Тошев баъд аз бозӣ андешаҳояшро чунин баён кард:

“Оғози мусобиқа бо ғалаба аз нигоҳи равонӣ бисёр хуб аст. Бачаҳо эҳсос карданд, ки метавонанд бозӣ кунанд ва ғолиб оянд, вале хато бисёр аст. Ба ҳар сурат, ҳаяҷонро дар бозии аввал як тараф гузошта, бозӣ кардан ва се хол ба даст овардан зарур буд. Бачаҳо кӯшиш карданд, ман аз бозиашон дар майдон ва худфидоияшон розиам. Бозӣ бисёр ҷолиб буд. Бачаҳо тавонистанд худро нишон диҳанд ва ду гол заданд. Ин аз ҳар ҷиҳат муҳим аст. Бозии мо аз бозии идеалӣ бисёр дур аст, бинобар ин тамрин ва рушд кардан даркор. Аз ҳама муҳим - бо тамоми қувва ба марҳилаи интихобии чемпионати Осиё-2020, ки 22-26-уми март дар Тошканд баргузор мешавад, омодагӣ дидан зарур аст”.

Мусобиқаи байналмилалии “Чор миллат” дар Доҳа

Даври 1-ум

Эрон – Тоҷикистон – 1:2

Голҳо: Воҳид Номдорӣ, 4 (1:0). Эҳсони Панҷшанбе, 39 (1:1). Шериддин Бобоев, 50 (1:2).

Тоҷикистон: Рустам Ятимов, Алишер Баротов, Табрези Давлатмир, Манучеҳр Сафаров, Зоир Ҷурабоев, Кароматулло Саидов, Шарафҷон Солеҳов, Муҳаммадҷон Раҳимов, Далер Ёдгоров, Эҳсони Панҷшанбе (Амирҷон Сафаров, 87), Шериддин Бобоев.

Сардовар: Абду Ал-Ҳодӣ Ал-Роял (Қатар).

15 январ. Доҳа. Майдони футболи Академии «Aspire». 100 бинанда.

Қатар – Кувайт – 3:1

Тақвими бозиҳои оянда:

Даври 2-юм

18 январ (ҷумъа)

19:30. Эрон – Кувайт

21:30. Қатар – Тоҷикистон

Даври 3-юм

21 январ (душанбе)

19:30. Тоҷикистон – Кувайт

21:30. Қатар – Эрон

Хонданд 149
«Сомон эйр» сарпарасти расмии ФФТ шуд

Дирӯз дар Душанбе маросими баимзорасонии Ёддошти ҳамкории ширкати ҳавопаймоии «Сомон Эйр» ва Федератсияи футболи Тоҷикистон барои соли 2019 баргузор гашт, ки тибқи ҳуҷҷати мазкур, ширкати ҳавопаймоии“Сомон Эйр” мақоми худро ҳамчун сарпарасти расмии Федератсияи футболи Тоҷикистон мустаҳкам мекунад.

Дар доираи сарпарастӣ дар соли 2018 ширкати ҳавопаймоӣ 440 варзишгарро барои иштирок дар мусобиқаҳои байналмилалӣ интиқол додааст.

Дар суханронии худ директори тиҷоратии ширкати ҳавопаймоии “Сомон Эйр” Абдулқосим Валиев чунин иброз дошт: «Ширкати ҳавопаймоии «Сомон Эйр” ҳамеша кӯшиш мекунад, ки рушди соҳаи варзишро дар Тоҷикистон дастгирӣ кунад. Асосгузори сулҳу ваҳдати миллӣ – Пешвои миллат, Президенти ҶумҳурииТоҷикистон муҳтарам Эмомалӣ Раҳмон пайваста таъкид менамояд, ки варзиш дар ҳаёти аҳли ҷомеа, бахусус ҷавонон ҳамчун омили тавонои тарбияи ҷисми руҳи солим, инчунин мактаби муҳими ҷаҳонфаҳмӣ, ташвиқи арзишҳои олии инсонӣ ва муҳимтар аз ҳама ба таблиғи тарзи ҳаёти солим хизмат мекунад. Мо ба роҳбарияти Федератсияи футболи Тоҷикистон, ки барои солимгардонии ҷомеа ва тарбияи ҷисмониву руҳии насли ҷавон чунин хизмати шоён мекунад, миннатдории худро иброз медорем. Футбол дар кишвари мо аз маҳбубтарин намуди варзиш аст ва мо имрӯз шоҳиди он гардида истодаем, ки футболи тоҷик аз нав эҳё мегардад. Қобили қайд аст, ки ба туфайли иқдомҳои Федератсия дастаи мунтахаби Тоҷикистон мавқеи худро дар рейтинги ФИФА хело ҳам беҳтар кардааст, мунтахаби наврасони Тоҷикистон бошад ба Қаҳрамонии ҷаҳон 2019 роҳхат гирифт».

Дар навбати худ ноиби президенти ФФТ Дилшод Ҷураев дар суханронии худ ба роҳбарияти ширкати ҳавопаймоӣ миннатдории Федератсияро барои рушди футболи тоҷик иброз намуда, қайд намуд, ки саҳми ширкати ҳавопаймоии “Сомон Эйр” дар баромадани мунтахаби наврасони ҶТ ба Қаҳрамонии ҷаҳон (U-16) низ беандоза мебошад.

Ёдовар мешавем, ки айни ҳол ширкати ҳавопаймоии “Сомон Эйр” парвозҳоро аз Тоҷикистон ба Олмон, АМА, Туркия, Чин, Русия, Қазоқистон ва Ӯзбекистон анҷом медиҳад. Парки ҳавопаймоии ширкат аз ҳавопаймоҳои Боинг 737 – 300, -800 ва -900 иборат мебошад.

Хонданд 212

Ин навбат дар маҳфили «Гуфтугӯи тамаддунҳо» мавзӯи “Вожаи “тоҷик” дар сарчашмаҳои бостон” баррасӣ мегардад. 

Дар назар аст, ки маҳфили навбатии «Гуфтугӯи тамаддунҳо» рӯзи 17-уми январ (панҷшанбе, соати 17:00) дар Кохи афсарон баргузор гардад.

Дар ин маҳфил муҳақиқ Муҳтарам Ҳотам дар мавзӯи «Вожаи «тоҷик» дар сарчашмаҳои бостон» андешаронӣ хоҳад кард.

Ба маҳфил, ҳамчунин, намояндагони сафоратхонаҳои кишварҳои хориҷа дар Тоҷикистон, намояндагони ВАО-и кишвар, олимон, таҳлилгарон ва намояндагони аҳзоби сиёсии кишвар даъват гардидаанд.

Хонданд 279

Хабари-рӯз

Минбари сардабир

  • ДАВоДАВ

    Масофаи роҳ бо машинае, ки 150 ҳазор доллар нарх дорад…

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.