Прокуратураи генералии Тоҷикистон қарор дар бораи рад намудан аз оғози парвандаи ҷиноятӣ оид ба шиканҷаро, ки аз ҷониби сокини ноҳияи Ёвон Шаҳбоз Аҳмадов шикоят шуда буд, бекор кард. Мақомоти назоратӣ прокуратураи ноҳияи Ёвонро уҳдадор кард, ки санҷиши иловагии далелҳои сокини маҳаллиро гузаронад.

31-уми июли соли 2018 сокини ноҳияи Ёвон Шаҳбоз Аҳмадов барои дастрас кардани ёрии ҳуқуқӣ ба Гуруҳи кӯмаки ҳуқуқии Эътилофи ҷомеаи шаҳрвандӣ зидди шиканҷа ва беҷазоӣ дар Тоҷикистон муроҷиат кардааст. Ба гуфтаи номбурда, ӯ аз 16 то 20-уми июли соли 2018 дар ШВКД-и ноҳияи Ёвон ғайриқонунӣ нигоҳ дошта шуда, ба шиканҷа ва муносибати бераҳмона дучор гардидааст. Муроҷиаткунанда тасдиқ кард, ки ӯро бо дасту пой зада ва бо қувваи барқ шиканҷа кардаанд. Ба гуфтаи ӯ, дарди сахти ҷисмониро тоқат наоварда, иқрор кардааст, ки барқасдона бо корд шахсро зада, ба ӯ зарари вазнини ҷисмонӣ расонидааст. Ин амалҳо ба нишонаи ҷиноятҳое мувофиқ меоянд, ки моддаи 110, қисми 1-и КҶ ҶТ (Барқасдона расонидани зарари вазнин ба саломатӣ) муқаррар намудааст.

Аммо, аллакай 20-уми июл ӯро ба хона раҳо карданд, чун шахсияти нафаре, ки дар ҷиноят гумонбар дониста мешуд, маълум гардид. Худи ҷабрдида, ки дар беморхона қарор дошт, дар симои Аҳмадов нафари ҳуҷумкунандаро надид. Ҳамин тавр, Аҳмадов Ш. дар мавриди содир гардидани ҷинояте, ки «софдилона иқрор шуда буд», бегуноҳ баромад.

Ташхисгари бахши байниноҳиявии ташхиси судӣ-тиббӣ барои ноҳияҳои Ҷомӣ, Хуросон ва Ёвон Наҷмиддинов С. Ш., ки Аҳмадов ба ӯ муроҷиат карда буд, 25.07.2018 чунин хулоса баровард: «… Дар бадани Аҳмадов Ш. ҷароҳатҳои ҷисмонӣ дар шакли харошидагӣ ба мушоҳида расиданд… Хислати ҷароҳатҳо аз он шаҳодат медиҳанд, ки онҳо дар натиҷаи истифода аз асбобҳои кунд ва сахт эҳтимол рӯзи 17-уми июли соли 2018 ба вуҷуд омадаанд».

6-уми августи соли 2018 Прокуратураи ноҳияи Ёвон аз рӯи аризаи адвокат дар бораи амалҳои ғайриқонунии кормандони милитсияи ШВКД-и ноҳияи Ёвон нисбати Аҳмадов Ш. санҷиши муқаддамотӣ оғоз намуд. Дар натиҷа, бо сабаби он, ки дар амалҳои милисаҳо таркиби ҷиноят муайян нагардид, дар бораи рад кардан аз оғози парвандаи ҷиноятӣ қарор бароварда шуд.

Дар натиҷаи фаъолияти адвокат, 17-уми августи соли 2018 Прокуратураи генералии ҶТ маводҳои парвандаро талаб карда гирифт ва онҳоро омӯхта, қарор дар бораи рад кардан аз оғози парвандаи ҷиноятиро бо ин асос бекор намуд: «… бо сабаби ғайриқонунӣ будан ва саросемавор қабул шудан».

Парванда боз барои тафтиши иловагӣ ба Прокуратураи вилояти Хатлон ирсол карда шуд. Эътилоф нақша дорад дар ҳамкорӣ бо адвокат тамоми ваҷҳу далелҳоро пешниҳод намояд, то нафароне, ки дар истифодаи шиканҷа гунаҳгоранд, ба ҷавобгарӣ ҷалб карда шаванд.

Добавить комментарий