Дирӯз дар шаҳри Душанбе бозиҳои даври сеюми Чемпионати Ассотсиатсияи футболи Осиёи Марказӣ (CAFA) миёни ҷавонони то 19-сола баргузор шуд, ки ҷавонони Тоҷикистон ин навбат ҳамсолони афғонистонии худро ноком карданд.

Дастаи мунтахаби ҷавонони Тоҷикистон бо роҳбарии сармураббӣ Зайниддин Раҳимов бар дастаи мунтахаби ҷавонони Афғонистон бо ҳисоби 3:1 ғалаба кард. Голҳоро дар ҳайати дастаи мунтахаби ҷавонони Тоҷикистон Ислом Зоиров (дар дақиқаи 8-ум), Шаҳром Самиев (36) ва Абдулмуъмин Забиров (68) заданд.

Дар бозии дигари давр Эрон ба дарвозаи Туркманистон 4 голи беҷавоб зад.

Футболбозони ҷавони кишвар дар даври дуюм бо Туркманистон бозӣ карданд ва дар ҳоле, ки дар аввали бозӣ бо натиҷаи 0:1 мағлуб мешуданд, дар вақти боқимонда ба дарвозаи ҳариф 5 гол заданд ва пирӯзӣ ба даст оварданд..

Имрӯз, 13-уми август, дар даври чорум Эрон бо Афғонистон (соати 17:00), Тоҷикистон бо Узбекистон (20:00) вомехуранд.

Чемпионати Ассотсиатсияи футболи Осиёи Марказӣ бо иштироки дастаҳои мунтахаби ҷавонони (U-19) Тоҷикистон, Эрон, Узбекистон, Афғонистон ва Туркманистон дар шаҳри Душанбе ҷараён дорад. Мусобиқа тибқи системаи даврӣ дар як давр баргузор мешавад ва дастае, ки холҳои бештар ба даст меорад, ғолиб мегардад.

ЯК ҶАВОБ ТАРК

Please enter your comment!
Please enter your name here