.

Alternative flash content

Requirements

Get Adobe Flash player

Муроҷиати шаҳрвандон

Варзоб: Додамро ба кӣ гӯям?

Окт 06, 2018
Хонданд: 2375
Варзоб: Додамро ба кӣ гӯям?

Дар деҳаи Хоҷа Обигарм таваллуд шуда, ба воя расидам. Соли 1977 ман ба Ҷабборов Ширин, ки бо роҳхати Вазорати тандурустӣ баъди хатми донишгоҳи тиббӣ ба осоишгоҳ ба кор омада буд, ба шавҳар баромадам. Соҳиби чор фарзанд шудем. Зиндагиамон ширин мегузашт. Вале ба ҳамаи ин чашм расид магар, ки баъди 8 соли зиндагиамон  рӯзҳои сиёҳи ман сар шуданд. 

Соли 1985 аввал модарам баъди бемории дарозмуддат дар синни 47-солагӣ аз дунё даргузашт. Чор фарзанди ӯ дар тарбияи ман монд. Соли 1986 бошад, дар вақти кор шавҳари маро Норов Раҳматулло, ки ронандаи осоишгоҳ буд, бо автобусаш пахш карда, кушт. Ман аз ин ба тамоми даргоҳҳо шикоят бурдам, вале ба доди ман касе нарасид. Ба тақдир тан додаму шукри фарзандонамро кардам. Ҳамаи ин солҳо мо дар хонае зиндагӣ мекардем, ки онро соли 1977 ба ману шавҳарам ҳамчун ба оилаи навбунёд дода буданд.

Пагоҳии 12 марти соли 1992 фарзандамро ба мактаб гуселонида, худам бо ҳамроҳии бародарам ба Душанбе барои дар беморхона хобида табобат гирифтан рафтам, зеро аз ғаму дард ба бемории асабу ҷоғар гирифтор шуда будам. Нисфирӯзии ҳамон рӯз ронандаи мошини сардухтури осоишгоҳ Назаров Саидалӣ бо ҳамроҳии писарамакам Беков Зиёдулло ба назди ман омада гуфтанд, ки бибиат вафот кардаасту рафтанат даркор ва рост маро ба хонаам оварданд. Дар хона маълум шуд, ки фарзанди калониам-Рустамҷонро Одинаев Аслам дар вақти дарси иловагӣ бо мушт ба сараш зада, куштааст. Ман аз ин мусибат низ ба суди ноҳияи Варзоб шикоят овардам, вале суд ҳалнома баровард, ки писари ман дору хӯрда нобуд шудааст. Дар натиҷа асли воқеаро аниқ накарданду аз Одинаев Аслам 30 сӯм ҷарима ситониданду халос. Ман аз ин қарори суд ба Суди олӣ шикоят бурдам.Вале он баррасӣ нагардид. Дар ин мусибат низ аз шикоятҳои ман хақ ба ҳақдор нарасиду ман аз тарсу ҳароси Норов Р. ва Одинаев А. Ба шаҳри Душанбе кӯчида омадам. Иҷоранишин шудам. Дар хонаам бошад, бародарам Беков Тағоймуродро бо аҳли оилааш шинондам. Аз баски завҷаи бародарам русзабон буд, онҳо соли 1996 ба Русия кӯчида рафтанд. Ман хонаамро ягон кас аз худ накунад гуфта, дар он писари тағоям Сангов Шамсиддинро шинондам. 

Вале гоҳе омада, хонаро хабар мегирифтам. 12 марти ҳар сол ёдбуди писарамро  дар ҳамин ҷо мегузаронидам. Якуми октябри соли 2006 ба сарам боз мусибат омад. Фарзанди дувумам-Дилафрӯз аз бемории вазнин оламро тарк карду ду фарзанди хурдсолаш ба ман монд. Чӣ кор кунам, дар тақдирам як умр фақат сағирапарварӣ будааст.

Баъди ин мусибат ман дар Душанбе истода натавонистам ва хостам ба зодгоҳам баргардам. Дар ҳамин вақт фарзанди савумам-Манижаро, ки касби падарро интихоб карда буд, баъди хатми донишгоҳи тиббӣ бо роҳҳат ба ҷои истиқомат (ӯ дар қайди ҳамон хона аст), яъне бо осоишгоҳи Хоҷа Оби гарм барои кор фиристоданд. Ман аз писари тағоям Шамсиддин хоҳиш кардам, ки хонаро холӣ кунад, зеро акнун мо худ дар он ҷо зиндагӣ хоҳем кард. Вале ӯ ба ман хабар дод, ки хона хонаи ӯст, зеро хонаро харидааст ва дар қайди он низ ҳаст. Ман ба назди сардухтури осоишгоҳ Қосимова Чоригул рафтам . Ӯ дар назди коргарони он ҷо Т Ғафуров ва М. Баҳриддинов ба ман гуфт, ки ба суд муроҷиат кунам.

Ман ҳамин тавр низ кардам. Судяи суди ноҳияи Исмоили Сомонӣ Маҳмудов Зубайд аризаи маро баррасӣ карда, 12 июни соли 2008 қарорро ғайримунсифона ба фоидаи писари тағоям баровард. 16 июни соли 2008 ман бо аризаи кассатсионӣ муроҷиат кардам, ки парвандаро ба суди шаҳрӣ фиристонанд, аммо то ҳол ҷавоб наомадааст.

Ҳоло ман намедонам ба куҷо ариза нависаму шикоят кунаму дар куҷо зиндагӣ намоям. Ҳамчунон намедонам, ки ба ман касе ёрӣ дода метавонад ё не?

Ин ҳасратномаамро барои он навиштам, ки ягон масъуле мехонаду ба додам мерасад.. Албатта, агар дил дошта бошаду дарди инсонро ҳис кунад.

 

Т.Ҷабборова,

сокини деҳаи Хоҷаобигарм

Хонданд 2375
КӢ МӮЙРО АЗ ХАМИР ҶУДО МЕКУНАД?

Ба таваҷҷуҳи Прокурори генералии Ҷумҳурии  Тоҷикистон Раҳмон Юсуф Аҳмадзод

 

Ба маълумоти Шумо мерасонам, ки ман чандин маротиба ба Прокуратураи генералии Ҷумҳурии Тоҷикистон оиди бо роҳи лату куб ба худкушӣ расондан ё худ овезонда куштани марҳум бародарам Камолов Аҳадалӣ Камолович, соли таваллудаш 1962 муроҷиат карда будам. Вале мутаассифона, ҳанӯз ҳам ҷинояти мазкур нокушода боқӣ мондааст ва онҳое, ки бародарамро ба худкушӣ расонидаанд, ба ҷавобгарӣ кашида нашудаанд. 

Маротиба аввал 1 феврали соли 2016 аз ҷониби прокуратураи ноҳияи Деваштич қарор оиди рад кардан аз оғози парвандаи ҷиноятӣқабул карда шуда буд, ки он дар асоси шикояти мо бинобар ғайриқонунӣ, беасос ва бармаҳал буданаш бекор карда шуд. 

Маротибаи дуюм 3 марти соли 2016 қарор оиди рад кардан аз оғози парвандаи ҷиноятӣ, ки такроран аз ҷониби прокуратураи ноҳияи Деваштич қабул шуда буд, дар асоси шикояти мо бинобар ғайриқонунӣ, беасос ва бармаҳал буданаш бекор карда шуд. 

Бори сеюм прокуратураи н. Деваштич 24 ваҷҳи мушаххаси пешовардаи моро ҳамаҷониба, пурра ва холисона тафтиш накарда, 13 июни соли 2016 бори дигар қарор дар бораи рад кардан аз оғози парвандаи ҷиноятӣқабул кард. Дар асоси шикояти мо қарори қабулнамудаи зикршуда такроран бинобар ғайриқонунӣ, беасос ва бармаҳал буданаш бекор карда шуд, ки он бо қарорҳои қаблан қабулнамуда мухолифат мекунад.

Ҳамин тариқ, маротибаи чорум прокуратураи вилояти Суғд бидуни тафтиши ҳаматарафа, пурра ва холисона қарор дар бораи рад кардани оғози парвандаи ҷиноятироқабул кард. Аз ин қарори қабулшуда мо розӣ нашуда, бо шикоят ба унвони Прокурори генералии Ҷумҳурии Тоҷикистон муроҷиат намудем. Моҳи ноябри соли 2016 қарори масъулини Прокуратураи генералии Ҷумҳурии Тоҷикистон дар бораи бекор кардани қарор оиди рад намудан аз оғози парвандаи ҷиноятӣ аз 10 августи соли 2016 ва ба санҷиши иловагӣ баргардонидани он қабул карда шуда, маводҳо барои санҷиши иловагӣ ба прокуратураи вилояти Суғд ирсол карда шуд.  

Прокуратураи вилояти Суғд бархилофи талаботи моддаи 21 КМҶҶумҳурии Тоҷикистон санҷиши ҳамаҷониба, пурра ва холисонаи ҳолатҳои корро ҳангоми санҷиши иловагӣ ба роҳ намонда, 28 декабри соли 2016 такроран қарор дар бораи рад кардан аз оғози парвандаи ҷиноятӣ нисбати Норбутаев Ш. ва дигаронроқабул кард. 

Моҳи январи соли 2017 мо бо аризаи шикоятӣ аз болои қарори рад кардан аз оғози парвандаи ҷиноятӣ моҳи декабри соли 2016 ба қабули шахсии Прокурори генералии Ҷумҳурии Тоҷикистон даромада будем. Дар натиҷа, қарори рад кардан аз оғози парвандаи ҷиноятӣ аз 28 декабри соли 2016 нисбати Норбуттаев Ш. ва дигарон бинобар ғайриқонунӣ буданаш бекор карда шуда, нисбати Норбутаев Ш. ва дигарон бо моддаи 112 КҶҶумҳурии Тоҷикистон парвандаи ҷиноятӣ оғоз карда шуда, барои тафтиш ба прокуратураи вилояти Суғд ирсол карда шуд. Қарор дар бораи бекор кардани қарор оиди рад намудан аз оғози парвандаи ҷиноятӣ ва оғози парвандаи ҷиноятӣ аз 19 январи соли 2017 аз ҷониби прокурори Раёсати назорати тафтишоти пешакӣ дар мақомоти прокуратура қабул карда шудааст.

Прокуратураи н. Деваштич ва ШВКД-и ноҳия 90 ваҷҳи пешниҳоднамудаи моро ба инобат нагирифта бинобар татбиқи Қонуни Ҷумҳурии Тоҷикистон “Дар бораи авф” танҳо нисбати Шералӣ Норбӯтаев қарор қабул кард. Қарори зикршуда аз ҷониби ШВКД Ҷумҳурии Тоҷикистон дар н. Деваштич тасдиқ шуд. 

Аз ҷониби прокуратураи вилояти Суғд дар асоси аризаи шикоятии мо қарор дар бораи қатъ кардани парвандаи ҷиноятии № 24423 бинобар татбиқи Қонуни Ҷумҳурии Тоҷикистон “Дар бораи авф” аз 4 марти соли 2017 бо моддаи 112 КҶҶумҳурии Тоҷикистон нисбати Норбутаев Ш. бинобар бармаҳал буданаш бекор карда шуда, барои гузаронидани тафтиши иловагӣ ба ШТ РВКД Ҷумҳурии Тоҷикистон дар вилояти Суғд ирсол карда шуд. Маълум шуд, ки парвандаи ҷиноятии №24423 дар истеҳсолоти таҳқиқбарандаи РВКД Ҷумҳурии Тоҷикистон қарор дорад. Ҳол он, ки дар асоси супориши прокуратураи вилояти Суғд парвандаи ҷиноятии зикршуда барои гузаронидани тафтиши иловагӣ танҳо ба ШТ РВКД Ҷумҳурии Тоҷикистон дар вилояти Суғд ирсол карда шудааст. 

Ҳамин тавр, маротибаи ҳафтум низ қарор дар бораи қатъ кардани парвандаи ҷиноятии зикршуда бе баррасии ваҷҳҳои пешниҳод намудаи мо қабул карда шудааст. 

Парвандаи ҷиноятии № 24423 бо моддаи 112 КҶҶумҳурии Тоҷикистон аз ҷониби Прокуратураи генералии Ҷумҳурии Тоҷикистон нисбати Норбутаев Ш. ва дигарон 19 январи соли 2017 оғоз карда шуда буд. Бо сабабҳои номаълум парвандаи ҷиноятии зикршуда қатъ карда шудааст. Аз ин бармеояд, ки нисбати дигар шарикони Норбутаев Ш. баъд аз оғоз шудани парвандаи ҷиноятӣқарори дахлдор қабул карда нашудааст.

Қарор дар бораи қатъ кардани парвандаи ҷиноятии зикршуда бинобар татбиқи Қонуни Ҷумҳурии Тоҷикистон “Дар бораи авф” аз ҷониби  ШТ РВКД Ҷумҳурии Тоҷикистон дар вилояти Суғд қабул шудааст. Ман бо қарори зикршуда бинобар сабаби ғайриқонунӣ, беасос ва бармаҳал буданаш норозӣ буда аз Шумо муҳтарам Прокурори генералӣ бекор кардани қарори музкурро хоҳиш менамоям. Далелҳои зиёде пешиниҳод карда метавонам, ки барои бекор кардани қарори мазкур асос шуда метавонад. Умедворам, ки оид ба ин масъалаи мазкур ёрии амалии худро дареғ намедоред.

Бо дарназардошти гуфтаҳои боло, бо мақсади таҳкими қонуният ва тартиботи ҳуқуқӣ, эҳтироми қонун, ҳуқуқу озодиҳои инсон ва шаҳрванд аз Шумо эҳтиромона хоҳиш менамоям, ки қарор дар бораи қатъ кардани парвандаи ҷиноятии зикршуда бинобар татбиқи Қонуни Ҷумҳурии Тоҷикистон “Дар бораи авф” бо моддаи 112 нисбати Норбуттаев Ш., ки аз ҷониби  муфаттиши калони ШТ РВКД Ҷумҳурии Тоҷикистон дар вилояти Суғд подполковники милитсия Рӯзиев Ш.қабул шудааст ва оиди қабули қарори зикршуда 12 январи соли 2018 и.в. муовини прокурори вилояти Суғд мушовири адлияи дараҷаи 1 Ҳикматуллозода А. розигӣ додааст, бинобар бармаҳал ва ғайриқонунӣ буданаш бекор карда шавад. Хоҳишмандам минбаъд тафтиши пешакии парвандаи ҷиноятии № 24423 аз тарафи муфаттишони Прокуратураи генералии Ҷумҳурии Тоҷикистон ба роҳ монда шуда, нисбати Норбуттаев Ш. ва дигарон қарори қонунӣ ва асоснок қабул карда шавадд. Зеро Норбутаев Шералӣ пас аз ҷинояти мазкур давоми як сол худашро айбдор намеҳисобид, аммо пас аз боз шудани парвандаи ҷиноятӣ худашро гунаҳгор ҳисобида, дар аризаи худ талаб намудааст, ки авф карда шавад. Ҳоло он ки марҳум бародарам Аҳадалӣ Камолов шаби 21-22 январ соли 2016 бо бардоштани 14 ҷарроҳат дар баданаш ба ҳалокат расидааст. Вале субҳи 22 январи соли 2016 ҷасади ӯро дар оғилхонааш овезон пайдо карданд. Гӯиё, ки ӯ худкушӣ карда бошад ва ҳамин тариқ мақомоти тафтишотӣ ҳодисаи мазкурро айбдоркунии хусусӣ эълон намуданд. 

Дар шумораи № 31 (1167)-и ҳафтаномаи “Минбари халқ” аз якуми августи соли 2018 низ оид ба қазияи мазкур номаи ман ба унвонии Прокуратураи генералии Ҷумҳурии Тоҷикистон ба табъ расида буд ва умедвор будам, ки аз мақомоти прокуратура пусухи мушаххас мегирам, вале мутаассифона то ба ҳол ба мактуби ман навиштаи ман посух наомадааст.  

Аскаралӣ Бойбобоев

Хонданд 2320
Ваҳдат: Чаро ҳалномаи суд ях кард?

Ба Роҳбари Дастгоҳи иҷроияи

 Президенти ҶТ, мӯҳтарама  Раҳмон Озода Эмомалӣ

Аз редаксия: Вобаста ба он ки чӣ гуна соли 2008 бародарон Қурбоновҳо бе ягон ҳуҷҷати қонунан тасдиқшуда, бо роҳи сохтакорӣ намудани ҳуҷҷатҳо ва гумроҳ сохтани Комиссияи қонунигардонии молу мулк ҳуҷҷати ғасби заминҳои хоҷагии деҳқонии «Хушдилон»-ро соҳиб шуданд, Маркази тадқиқоти журналистии Тоҷикистон шаш сол қабл тадқиқоти журналистӣ гузаронида, дар шумораи №47 (312) аз санаи 21 ноябри соли 2012 ҳафтаномаи «Фараж» таҳти унвони «Иштибоҳи қонунӣ?!» ба нашр расонид. Воқеан, дар иртибот ба ҳамин масъала ҳисоботи прокуратураи генералии ҶТ аз соли 2009 ба Ҳукумати ҷумҳурӣ низ мавҷуд мебошад. Баъди се соли баҳсҳои судӣ, оқибат суд «мӯйро аз хамир ҷудо намуд»-а ба қавле адолатро барқарор кард, ки дар ин маврид низ тавассути ҳафтаномаи «Фараж» (№17 (438) аз 22 апрели соли 2015) таҳти унвони «Ҳақ ба ҳақдор расид» мақолае нашр гардид. Вале мутаассифона дар муҳити имрӯзаи кишвар чунин менамояд, ки новобаста ба ҳалномаҳои судӣ ва амру қарори прокурору раиси мақомоти иҷроияи ҳокимияти давлатӣ, то зинаи мақоми олии кишвар ҳали мушкилро таҳти назорати худ нагирад, мушкил тавре буд, ҳамон гуна боқӣ мемонад. Муаллифи муроҷиати мазкур тӯли се соли охир даҳҳо бор ба мақомоти гуногуни кишвар вобаста ба иҷрои ҳалномаи судӣ муроҷиат намудааст, аммо мақомот бо ҳар гуна баҳона ва ё надидаву ношунида гирифтан то имрӯз сари ин масъала хомӯшиву беамалиро ихтиёр намудаанд. Суоле ба миён меояд, баъди мавҷуд будани ҳалномаҳои судӣ, ки аз ғайриқонунӣ ғасб намудани замин, қалбакӣ будани ҳуҷҷатҳои ҷониби муқобил ва бартараф намудани монеаҳои эҷоднамуда дарак медиҳанд ва амру қарорҳои дахлдори прокурору раиси шаҳр оиди иҷрои ҳалнома кадом қуввае дар шаҳри Ваҳдат вуҷуд дорад, ки пеши роҳи иҷроиши онҳоро бастааст? Ин навбат ҳафтаномаи «Фараж» муроҷиати бевоситаи шаҳрванд Собиров Гулмаҳмадро ба Роҳбари Дастгоҳи иҷроияи Президенти ҶТ Раҳмон Озода Эмомалӣ, ки санаи  19 сентябр ба Дастгоҳи иҷроияи Президенти ҶТ Раҳмон супорида шудааст, нашр менамояд. Боварии комил дорем, ки таваҷҷӯҳи бевоситаи Роҳбари Дастгоҳи иҷроияи Президенти ҶТ ба масъалаи мазкур дар таъмини адолати судӣ ва ичроиши амру қарорҳои дахлдор мусоидат хоҳад намуд.     

Муҳтарам Роҳбари Дастгоҳи иҷроияи Президенти Ҷумҳурии Тоҷикистон!

Хоҷагии деҳқонии «Хушдилон» воқеъ дар шаҳри Ваҳдат, ҷамоати деҳоти Баҳор, деҳаи Пистамазор, дар асоси Қарори Раиси шаҳри Кофарниҳон аз 29 сентябри соли 1994 таҳти № 430 дар қитъаи замини масоҳаташ 1,94 га ташкил дода шудааст. Бо Қарори Раиси шаҳри Ваҳдат №26 аз 13 январи соли 2010 аз ҳисоби заминҳои хоҷагии «Баҳор» қитъаи замини иловагӣ 0,78 га ба хоҷагии деҳқонии «Хушдилон» вобаста карда шудааст. 

Хоҷагии деҳқонии мазкур аз тарафи саҳмдорон самаранок истифода шуда, ҳамасола ҳосили хуб рӯёнида мешуд. Пардохтҳо ва молиёти муайяннамудаи давлат аз рӯзи ташкилёбии хоҷагии деҳқонӣ пардохт карда мешаванд. Илова бар ин, дар асоси дастуру супоришҳои Асосгузори сулҳу ваҳдати миллӣ - Пешвои миллат, муҳтарам Президенти Ҷумҳурии Тоҷикистон аз ҳисоби шахсии кормандони хоҷагии деҳқонӣ дар заминҳои лалмӣ тахминан дар масоҳати қариб 2,0 га замин боғи дарахтҳои мевадиҳанда ва сояафкан ташкил карда шудааст. Мутаассифона, новобаста аз мавҷуд будани ҳалномахои суди тули чанд соли охир ашхоси маълум бо амалҳои ғайриқонунӣ бо роҳи сохтакорӣ намудани ҳуҷҷатҳо ба фаъолияти муназзами хоҷагии деҳқонии мо монеа эҷод мекунанд. Аз ҷумла, бародарон Қурбоновҳо, - Камолиддин ва Абдувоҳид, истиқоматкунандагони шаҳри Ваҳдат, ҷамоати деҳоти Симиганҷ, деҳаи Сари чинор, сохторҳои давлатиро бо пешниҳоди ҳуҷҷатҳои сохтакоришуда ва аз ҷониби суд ва мақомоти дахлдор бекор гардида, ба иштибоҳ андохта, монеи фаъолияти хоҷагии деҳқонии мо шуда истодаанд.

Бояд гуфт, соли 2008 Қурбоновҳо Қарори Раиси шаҳри Кофарниҳон таҳти № 432 аз 14 декабри соли 2002-ро сохтакорӣ намуда, масоҳати замини 0,36 гектарро ба 1,66 га табдил дода, пас аз сохтакорӣ намудани қарорҳои Раиси шаҳри Кофарниҳон,  Қурбонов Абдувоҳид бо истифода аз хуҷҷатхои сохтакорикардашуда ба Комиссияи қонунигардонии молу мулк дар шаҳри Ваҳдат муроҷиат намуда, моҳи декабри соли 2008 онҳоро қонунӣ гардонидааст. Моҳи январи соли 2009 мо аз қонунигардонии молу мулки Қурбонов А. огоҳ шуда, якчанд маротиба ба Комиссияи қонунигардонии молу мулки шаҳри Ваҳдат муроҷиат намуда, хоҳиш кардем, ки қарори комиссия оид ба қонунигардонии молу мулки Қурбонов А.-ро бекор кунанд, мутаассифона онҳо ягон чора наандешиданд. Маҷбур ба Комиссияи ҳамоҳангсоз оид ба қонунигардонии молу мулк дар назди Ҳукумати Ҷумҳурии Тоҷикистон муроҷиат намудем. 

Дар натиҷаи санҷиш аз тарафи масъулини ин Комиссияи босалоҳият камбудиҳои комиссияи қонунигардонии молу мулки шаҳри Ваҳдат ошкор карда шуда, санаи 27 феврали соли 2009 ба шаҳодатномаи қонунигардонии молу мулк аз 10 декабри соли 2008 №377, ки ба шаҳрванд Қурбонов Камолиддин дода шудааст, тағйирот ворид карда шуда,  молу мулки онҳо дар масоҳати замини 0,28 га эътироф карда шуд.

Қурбонов Абдувоҳид аз номи бародараш баромад намуда моҳи майи соли 2010 ба суди шаҳри Ваҳдат аз болои қарори комиссияи қонунигардонии молу мулк аз 27 феврали соли 2009 муроҷиат карда, бо ҳалномаи суд аз 18 августи соли 2010 қарори Комиссияи қонунигардонии молу мулки шаҳри Ваҳдат бекор карда шуд. Ин ҷо бояд қайд намуд, ки гарчанд байни хоҷагии деҳқонии «Хушдилон» ва Қурбоновҳо баҳс вуҷуд дошта бошад ҳам, ба мурофиаи судии суди шаҳри Ваҳдат моро ягон маротиба даъват накарданд. 

Дар асоси шикояти назоратии мо бо Қарори марҳилаи назоратии Суди Олии Ҷумҳурии Тоҷикистон аз 18 апрели соли 2013  ҳалномаи суди шаҳри Ваҳдат аз 18 августи соли 2010 бекор карда шуда, парвандаи гражданӣ барои аз сари нав баррасӣ намудан ба суди ноҳияи Рашт фиристонида шуд. 

Бо ҳалномаи суди ноҳияи Рашт аз 6 январи соли 2015 даъвои Қурбонов Камолиддин Азизуллоевич бо ҷавобгарии Комиссияи қонунигардонии молу мулки Мақомоти иҷроияи маҳаллии ҳокимияти давлатии шаҳри Ваҳдат дар бораи бекор кардани қарори Комиссияи қонунигардонии молу мулки Мақомоти иҷроияи маҳаллии ҳокимияти давлатии шаҳри Ваҳдат №1 аз 27 феврали соли 2009 ва шаҳодатномаи қонунигардонии молу мулк аз 4 марти соли 2009 бинобар беасос буданаш рад карда шуд. 

Даъвои хоҷагии деҳқонии «Хушдилон» бо ҷавобгарии Қурбонов Камолиддин Азизуллоевич, ҳамҷавобгарии Мақомоти иҷроияи маҳаллии ҳокимияти давлатии шаҳри Ваҳдат, Кумитаи заминсозии шаҳри Ваҳдат дар бораи бекор кардани қарори Комиссияи қонунигардонии молу мулки шаҳри Ваҳдат №359 аз 5 декабри соли 2008 ва Шаҳодатнома дар бораи қонунигардонии молу мулки Қурбонов Камолиддин №377 аз 10 декабри соли 2008, ки аз тарафи Комиссияи қонунигардонии молу мулки шаҳри Ваҳдат дода шудааст, қонеъ карда шуда, вобаста ба танзим даровардани қитъаи замини иловагӣ 0,78 га, ки бо Қарори Раиси шаҳри Ваҳдат №26 аз 13 январи соли 2010 аз ҳисоби заминҳои хоҷагии «Баҳор» ба хоҷагии деҳқонии «Хушдилон» вобаста гардидааст, ҳалнома бароварда шуд.

Пас аз он, ки мо хостем ба истифодабарии замин идома диҳем. Қурбоновҳо боз бо ҳар роҳу восита ба истифодабарии замин монеа эҷод намуданд. Дар асоси аризаи даъвогии мо 5 декабри  соли 2016 суди шаҳри Ваҳдат вобаста ба бартараф намудани монеаҳо ва уҳдадор намудани Курбоновҳо ҷиҳати эҷод накардани монеаҳои минбаъда ҳалнома баровард. Мутаасифона, боз ҳам бо “шарофати” Қурбоновҳо то имрӯз мо замини ба хоҷагии деҳқонии “Хушдилон” вобасташударо истифода бурда наметавонем.

Дар асоси амри Прокурори шаҳри Ваҳдат “Оиди бетаъхир бартараф намудани  қонунвайронкунӣ” аз 26 феврали соли 2018 таҳти №1/1-171сод аз тарафи Раиси шаҳри Ваҳдат  бо қарор аз 30 апрели соли 2018  таҳти №1118  дар ҳайати 7 нафар кормандони масъули Мақомоти иҷроияи ҳокимияти давлатӣ дар шаҳри Ваҳдат комиссия  ташкил гардид. 

Гарчанде вазифаи асоси комиссияи ташкилкардашуда бартараф намудани монеагӣ бошад ҳам, аз моҳи апрели соли 2018 то имрӯз комиссия ягон маротиба ба сари замини баҳсӣ нарафтааст, бо ман ҳамчун шаҳси  истифодабарандаи замин ва Қурбоновҳо ҳамчун шахси  эҷодкунандаи монеа  сӯҳбат накардааст.  

Вобаста ба ғайриқонунӣ ғасб кардани замин ва сохтакорӣ кардани ҳуҷҷатҳо бо қарори Прокурори шаҳри Ваҳдат нисбати Қурбонов К.А. чанд сол пеш бо моддаҳои 338 ва 340 Кодекси Ҷиноятии Ҷумҳурии Тоҷикистон парвандаи ҷиноятӣ оғоз карда шуда, аз сабаби гузаштани мӯҳлат пешбурди он дар истеҳсолот қатъ карда шудааст.  Дар асоси аризаю шикоятҳои якчанд маротибаи мо ба унвони Дастгоҳи иҷроияи Президенти Ҷумҳурии Тоҷикистон ва Прокурори гененралии Ҷумҳурии Тоҷикистон ин қарори ғайриқонунии Прокурори шаҳри Ваҳдат бекор карда шуда, пешбурди  парвандаи ҷиноятӣ аз нав оғоз карда шуда буд. 

Аз мактуби Прокуратураи генералии Ҷумҳурии Тоҷикистон таҳти №12/88 -16 аз 18 майи соли 2016 бармеояд, ки қарори собиқ муфаттиши Прокуратураи шаҳри Ваҳдат аз 30 октябри соли 2009 ҳамчун ғайриқонунӣ бекор карда шуда, барои гузаронидани тафтишоти иловагӣ ба ҳамон ҷо ирсол карда шудааст. Пас аз ин, аз ман якчанд маротиба баёнот гирифта бошанд ҳам,  аз натиҷаи гузаронидани тафтишоти иловагӣ ва тақдири парвандаи ҷиноятӣ ман ҳамчун ҷабрдида ягон хабар надорам.

Тавре огох гардидед, то имрӯз ҳалномаи суди ноҳияи Рашт аз 6 январи соли 2015, амри Прокурори шаҳри Ваҳдат аз 26 феврали соли 2018 таҳти №1/1-171сод ва Қарори Раиси шаҳри Ваҳдат аз 30 апрели соли 2018 таҳти №1118 бо сабабҳои гуногун то имрӯз иҷро карда намешаванд.  

Бобати ба иҷро расонидани санадҳои дар боло зикргардида, шахсан давоми соли 2018 чор маротиба хаттӣ, се маротиба ба рӯзи қабули Раиси шаҳри Ваҳдат, зиёда аз 30 маротиба ба қабули муовини Раиси шаҳри Ваҳдат Холиқзода Д ва шаш маротиба ба Прокурори шаҳри Ваҳдат муроҷиат намудам. Мутаасифона, онҳо маро бо ҳар баҳона гусел карда, аз иҷрои қарори қабулнамудаи худашон худдорӣ карда истодаанд.

Аз ин лиҳоз, аз ШУМО эҳтиромона хоҳиш менамоям, ки ҷиҳати ба иҷро расонидани ҳалномаи суди ноҳияи Рашт аз 6 январи соли 2015, амри Прокурори шаҳри Ваҳдат аз  26 феврали соли 2018 ва Қарори Раиси шаҳри Ваҳдат аз 30 апрели соли 2018 мусоидат намоед.  

Бо эҳтиром: Собиров Гулаҳмад

Замима мегарданд:

1)ҳалномаи суди ноҳияи Рашт

2)ҳалномаи суди ноҳияи Ваҳдат

3)амри прокурори шаҳри Ваҳдат

4)қарори раиси шаҳри Ваҳдат

5)ҷавоби суди шаҳри Ваҳдат

Хонданд 2976
ЧАРО ГУНАҲГОР ҶАБРДИДА ЭЪТИРОФ МЕШАВАД?

Ба таваҷҷӯҳи Маҷлиси намояндагони Маҷлиси Олии ҷумҳурии Тоҷикистон

Сардори шуъбаи тафтишотии Раёсати ВКД дар вилояти Хатлон Некрӯз Ғоибов нисбати ронанда Нураҳмад Қурбонов, ки дар садамаи нақлиётии ба миён омадаи ӯ, як нафар ҳалоку дигаре ҷароҳати вазнин бардошт, якчанд банду қисми моддаҳои Қонуни ҶТ «Дар бораи ҳаракат дар роҳ» - ро ба эътибор нагирифтааст.

Агарчӣ дар садамаи нақлиётии рӯзи 28.04.2018 дар ноҳияи Данғара сокини ҳамин ноҳия гунаҳгор, ба кораш иқрор, ронанда Сафар Шарифов бошад ҳам, аммо омилҳое мавҷуд аст, ки сокини шаҳри Кулоб ронанда Н.Қурбонов низ меъёрҳои муқаррарнамудаи қоидаҳои ҳаракат дар роҳро риоя накарда, ба ҷои он ки аз ҳуқуқи идоракунии воситаҳои нақлиёт тибқи қонунгузории Ҷумҳурии Тоҷикистон маҳрум карда шавад, баръакс, ҷабрдида эътироф шуд (моддаи 15, қисми 2 – и қонуни дар боло зикршуда).

Мусофири ҷароҳатбардошта Абдулҳаким Сафаров мегӯяд: “Н.Қурбонов мошинро беҳад бо суръати баланд меронд ва аз ӯ чанд бор хоҳиш кардам, ки оҳиста ронад. Вале як оҳиста мекарду боз баланд меронд…” Инчунин тибқи иттилои шоҳидон Н.Қурбонов қоидаҳои бозистиро риоя накарда, ба ин васила, боиси халалдор кардани ҳаракат дар роҳ гардидаст (моддаи 30, қисми 2, банди 4 – и қонуни дар боло зикршуда). Ва боз иҷозатнома (литсензия) – и мусофиркашонӣ ҳам надорад. 

Таҳлилҳо ва ҳисоботҳои омории ҳодисаҳои роҳу нақлиёт нишон медиҳад, ки аксари ҳодисаҳои роҳу нақлиёт маҳз дар ҳолати аз меъёри муқаррарӣ тез рондан ба вуқуъ мепайвандад. Вале муфатиш Н.Ғоибов далоили моро рад кард ва ба мақолае, ки марбут ба ин ҳодиса буд (“…Ороми ҷонам меравад!” рӯзномаи “Ҷавонони Тоҷикистон”. 21.06.2018) вокуниш мебоист навишт, вале ӯ ҳатто аз он мавод хабар ҳам надошт. Мегӯяд: “Дар таркиби амали Н.Қурбонов ягон намуди ҷиноят дида намешавад ва хулосаҳои ташхиси судиву техникӣ ҳам инро нишон медиҳад”. 

Дар сомонаи news.tj иқтибосе омадааст: 

Ғулом Бобоев, раиси Коллегияи адвокатҳои вилояти Хатлон мегӯяд: «Ман, аслан ба хулосаҳои судиву тиббӣ эътимод надорам, аз ҷумла, ба хулосаи ташхиси судиву тиббии вилояти Хатлон. Зеро дар аксари ҳолатҳо як хулосаашон ба дигараш мухолифат мекунад». 

Ин ҳолат боз ҳам дар ташхиси техникии вилояти Хатлон зуҳур кардааст. Зеро хулосаи он мухолифат ба далоил дорад. 

Талаботи моддаи 9, банди 6 – и қонуни дар боло зикршуда мавриди амал набуда, дар моддаи 6, банди 9 – и ҳамин қонун мақомоти ваколатдори давлатӣ уҳдадор шудааст: 

- тадқиқ ва арзёбии ҳодисаҳои роҳу нақлиёт.

Аз ин рӯ, барои муайян намудани амалҳои таркиби ҷиноятдоштаи Н.Қурбонов баррасии ҳодисаҳо, далелҳо аз ҷониби мақомоти ваколатдор ҳатмӣ ва зарурист. Хеле хуб мебуд агар ҳодисаи фалокатбори мазкурро Прокуратураи Генералии Ҷумҳурии Тоҷикистон бори дигар баррасӣ мекард. 

Дар баробари мақолаи тадқиқотӣ ба Ҳукумати мамлакат ҷиҳати коҳиш ёфтани ҳодисаҳои роҳу нақлиёт пешниҳод менамоям, ки талаботи моддаи 15, қисми 2 – и Қонуни ҶТ «Дар бораи ҳаракат дар роҳ» пурзуртар карда шуда, ҳодисаҳои роҳу нақлиёте, ки бо марг фарҷом меёбад, ронандаҳои як ё ҳарду тараф аз ҳуқуқи идоракунии воситаҳои нақлиёт маҳрум карда шаванд. 

Шояд дар ин хусус вакилони Маҷлиси намояндагон вокунише нишон диҳанд.

Саидҷон БАҲРОМОВ, 

рӯзноманигор,

н. Муъминобод.

Хонданд 4212
  •  << 
  •  < 
  •  1 
  •  > 
  •  >> 

Хабари-рӯз

Календар

« Ноябрь 2018 »
Пн Вт Ср Чт Пт Сб Вс
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    

Минбари сардабир

  • симКАРта

    Дар ҳафтае, ки гузашт, дар шабакаҳои иҷтимоӣ ин калима аз…

Нигоҳи хос

Парадокс

Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ...
Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ба ...
Гуфтед? Мегӯянд! (№3
Бег САБУР, раиси Хадамоти алоқа:- Ман қарорамро бекор накардаам.Танз: Офарин ба Шумо, оғои Бег ...
Гуфтед? Мегӯянд! (№2
Аскар ҲАКИМ, Шоири халқии Тоҷикистон:- Дар замони шӯравӣ мо асареро пайдо намекунем, ки дар ...
Гуфтед? Мегӯянд! (№1
Абдуалим ИСМОИЛЗОДА, раиси шаҳри Қӯрғонтеппа Хонандаи беҳтарин- Кӯшиш мекунам ҳар рӯз лоақал ...

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.