.

Alternative flash content

Requirements

Get Adobe Flash player

Фарҳанг

Чаро Далер Назаров унвон надорад?

Ба ин савол кӣ метавонад посухи мушаххас диҳад? Ё ҳанӯз ҳам бузургонро пас аз марг қадрдонӣ мекунанд?

Ин андешае, ки мо баён доштем, андешаи як нафар нест, балки саволест, ки аз ҳар як мухлиси сарояндаи нотакрор Далер Назаров шунида мешавад.

Бе унвон ҳам Далер Назаров сарояндаи мардумист, сарояндаи дӯстдоштаи миллати тоҷик ва дигар миллатҳост. Шахсан ман Далер Назаровро аз соли 1986 мешиносаму сурудҳояшро гӯш мекунам. Далер Назаров ба қуллае расидааст, ки болотар аз он қуллае нест, яъне рисолати сарояндагии худро бешубҳа ба ҷо овардааст.

Барои унвони давлатиро соҳиб шудан барои Далер Назаров чӣ намерасад? Ба Далер Назаров надодани унвон ва қадр накардани ин сарояндаи беназир инкор кардани ҳунари волои сарояндагии ӯст!

Хуллас, баҳси ин мавзуъро хоҳонам.

 

Бо эҳтиром, шоир Ромиши Хуҷандӣ, аз шаҳри бостонии Хуҷанд

Хонданд 123
Муаллим-ҷоне дар ҷисми дониш

Коллеҷи омӯзгории ноҳияи Рашт

Коллеҷи омӯзгории ноҳияи Рашт аз зумраи таълимгоҳҳои куҳантарини Тоҷикистони шӯравӣ ба шумор меравад, ки таърихи пурғановат дорад. Он соли 1932 ҳамчун омӯзишгоҳи муаллимтайёркунӣ ба фаъолият оғоз намуда, дар омодасозии аввалин омӯзгорон барои минтақа ва як қатор навоҳии ҳудуди имрӯзаи Бадахшон саҳми арзанда гузоштааст. Боиси ифтихор ва фараҳмандист, ки чанде ходимони давлатӣ ва олимони сатҳи ҷумҳуриявӣ маҳз аз остонаи ҳамин даргоҳи муқаддас боли парвоз кушодаанд. Дар ин қатор метавон аз шахсиятҳои фарҳехтае чун Сайдалӣ Ҷумъаев, Маҳмадулло Холов, Усмон Ҳасанов, Искандаршо Сулаймонов, Одил Бердиев, Ҳақназар Назаров, Ҳайдаршо Пирумшоев, Бурҳон Раҳмон, Меҳмон Бахтӣ, Мирзохӯҷа Пиров, Додихудо Саймиддинов, Холназар Муҳаббатов ва даҳҳо нафари дигарро ном бурд, ки хатмкардаи Коллеҷи омӯзгории ноҳияи Рашт ҳастанд ва аксашон даромадгоҳи ин даргоҳро зеб медиҳад.

Тавре зимни суҳбат директори Колеҷи мазкур Файзиддин Аминов зикр намуд, имрӯзҳо низ маъмурияти муассиса новобаста аз мушкилот анъанаи омодасозии кадрҳои болаёқат ва мутобиқ ба шароити кунуниро дуруст ба роҳ монда, талош доранд, ин эстафетаро идома бахшанд.

Тибқи фармоиши директори коллеҷ бо мақсади таъмини Нақшаи чорабиниҳои Ҳукумати Ҷумҳурии Тоҷикистон, мақомоти иҷроияи ҳокимияти давлатии ноҳияи Рашт, Вазорати маориф ва илм оид ба стратегияҳо, консепсия, барномаҳои давлатӣ, дастуру супоришҳои Президенти Ҷумҳурии Тоҷикистон ва дигар нақшаи чорабиниҳои соҳавӣ нақша-чорабиниҳои коллеҷ ба тавсиб расонда шуда, назорати онҳо ба зимаи масъулини коллеҷ вобаста карда шуда, пайваста рафти иҷрои онҳо дар ҷаласаҳои ҳарҳафтаина, моҳона, Шӯрои омӯзгорон ва методӣ мавриди баррасӣ қарор дода шуда, хулосаи ин ҷалласаҳо-маводҳо дар ҷузвдонҳои алоҳида нигоҳ дошта шудаанд. 

Дар ин замина масъалаи ба корҳои илмӣ-эҷодӣ бештар фаро гирифтани омӯзгорон дар мадди назар қарор дорад. Ин аст, ки мақолаҳои омӯзгорон: Аминов Д., Қувватов Р., Қаландаров С., Ҳасанов Ҳ., Саидов О. дар рӯзномаҳои ноҳиявӣ ва ҷумҳуриявӣ ба чоп расиданд.

Дар муқоиса ба ҳамин давраи соли 2017 ҷудо намудани маблағ барои такмили ихтисос ва бозомӯзии омӯзгорон, таъмиру тармими биноҳо ва харидории таҷҳизоти таълимӣ беҳтар гардид. Дар ҳамин давра омӯгорон-Аминов Ф., Ҳокимов Д.,  Саидова С., Одилов Р., Бобиев М., Азимов С., Одилов Р. ва Ҳасанов Н. аз курси такмили ихтисос дар шаҳри Душанбе  гузаштанд. 

Ҷиҳати амалишавии Барномаи давлатии такмил ва омӯзиши забонҳои русӣ ва англисӣ дар Ҷумҳурии Тоҷикистон дар коллеҷ нақшаи чорабиниҳо тартиб дода шуда, баҳри амалӣ гардидани он як қатор корҳо ба анҷом расонда шудааст.

Ҳар рӯзи душанбеи ҳафта рӯзи забони русӣ ва чоршанбеи ҳафта рӯзи забони англисӣ эълон шуда, дар ин рӯзҳо чорабиниҳои мухталиф гузаронда мешаванд. Гузарондани ҳафтаҳои фаннӣ ва шабнишиниҳои ҳармоҳа аз ин фанҳо дар коллеҷ ба ҳукми анъана даромадааст. Аҳдномаи байни донишҷӯён ва директори коллеҷ бобати ҳар рӯз аз бар намудани 15 луғат аз ҷониби донишҷӯён, ки тӯли ҳафт соли охир амалӣ мешавад, ҳамчун падидаи навоварона дар самти беҳтаршавии дараҷаи забондонии донишҷӯён мусоидат намуда истодааст. 

Соли ҷорӣ синфхонаҳои забони русӣ ва забони англисӣ бо овезаҳо ва маводҳои таълимӣ пурра муҷаҳҳаз гардонда шуданд. Аз ҷониби омӯзгорон истифодаи маҷмуаи ҷадвалҳои таълимӣ аз фанни забони англисӣ, ки аз 23 ҷадвал иборат мебошад ва аз ҷониби Вазорати маориф ва илми Ҷумҳурии Тоҷикистон таҳия гардидааст ба сифат ва самаранокии машғулиятҳои ин фан таъсири мусбат расонд.

Дар доираи иҷрои “Консепсияи миллии тарбия дар Ҷумҳурии Тоҷикистон” ва Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” як қатор чорабиниҳо гузаронда шуданд. Аз ҷумла, қайди соли нави мелодӣ, рӯзи Артиши миллӣ, Рӯзи Модар, Наврӯзи байналмилалӣ, Рӯзи ҷавонон, Рӯзи Ваҳдати миллӣ, вохӯрӣ бо шоиру нависандагон, вохӯрӣ бо кормандони ҳифзи  ҳуқуқ, аёдати иштирокчиёни ҶБВ ва мадад ба онҳо, иштирок дар чорабиниҳои варзишӣ ва фарҳангӣ, гузарондани маҷлиси якҷояи волидайн, донишҷӯён, омӯзгорон ва кормандони дигари коллеҷ, ташриф ба хонаи волидайне, ки фарзандонашон дар таҳсил ба мадади иловагӣ ниёз доранд, суҳбатҳои фардӣ бо волидайни донишҷӯёни алоҳида, намоиши дониши донишҷӯён аз фанҳои таълимӣ, конференсияҳои илмӣ ва ғайра.

Ҳамчунин, аз ҷониби директор ва омӯзгорони коллеҷ дар мактабҳои ноҳия ва ноҳияҳои минтақаи Рашт бо хатмкунандагон ва волидону аҳли ҷамоатчигӣ вохӯриҳо доир карда шуд, ки дар онҳо намояндаи шуъбаи маориф, коллеҷ ва маъмурияти мактабҳою ҷамоатҳо ширкат доштанд.

Коллеҷ дар соли таҳсили 2017-2018 низ аз рӯи шиори “Бо пайраҳаи варзиш ба қуллаи дониш” фаъолият намуд, ки барои иҷрои Барномаи давлатии рушди тарбияи ҷисмонӣ ва варзиш равона гардида буд. Дар муассиса ба масъалаи таъминоти асбобҳои варзишӣ, ташкили дастаҳои волейбол, футбол, варзиши сабук диққати ҷиддӣ дода мешавад. Гӯшаҳои “Варзишгарони мо”, “Варзиш-саломатӣ”, ки дар роҳрави бинои таълимӣ мавҷуд буд аз нав ҷиҳозонида шуд.

Бобати иҷроиши фармоиши вазири маориф ва илми Ҷумҳурии Тоҷикистон оиди ташкили курси нуҳмоҳаи аз худ намудани компютер дар муассисаҳои таълимӣ корҳои муайян ба анҷом расонда шуд. Тибқи фармоиши мазкур бояд ҳамаи кормандони муассисаҳо ин курсро гузаранд. Бо ин мақсад кабинети компютерӣ бо 8 адад компютер (чор блоки системавии нав) як адад принтери тамғаи Рanasonic (се бар як) ва як адад асбоби дафтартайёркунӣ муҷаҳҳаз шудааст. Ҳамаи компютерҳо дар ҳолати хуби корианд. Дарсҳои амалии омӯзгорон Аминов Д. ва Беков Ҷ. аз фанни технология дар кабинети компютерӣ гузаронда мешаванд. 

Натиҷаи корҷӯёнаи маъмурият, омӯзгорон ба раванди таълиму тарбия ва рӯз ба рӯз беҳтар шудани сатҳи сифати дониши донишҷӯён, риояи қоидаҳои донишҷӯӣ аз ҷониби онҳо баръало ба чашм мерасад.

Шароити манзилӣ-маишии донишҷӯён нисбат ба солҳои қаблӣ ба таври диданӣ беҳтар гашт. Бо ҷаҳду талошҳои роҳбарияти коллеҷ ва ҷалби ашхоси саховатманд барои донишҷӯёни роҳдур ҳар сари чанд вақт хӯроки гарми ройгон дода мешавад. Шаҳрвандон Мақсудов Қурбоналӣ, Низомов Маъруф, Бобоҷонов Муҳиб, Гиёсов Мирзохӯҷа, Абдуғаффоров Сайраҳмон, Ҳодиев Муллоҷон аз ҷумлаи ин ашхоси хайрхоҳанд. Бобоҷонов Муҳиб дар арафаи Иди Наврӯз ба кулли омӯзгорон ва донишҷӯёни коллеҷ ба маблағи 100 (сад) сомонӣ мадади молиявӣ расонд. Сияров Маҳдихӯҷа ба тамоми омӯзгорон ва коркунони хоҷагии коллеҷ ба миқдори як халта орд ва 5 литр равған дар арафаи Иди Рамазон тақдим намуд. Ин иқдоми некро сокини шаҳраки Навобод Идиев Қамариддин идома дод. Рӯзҳои шанбе ва якшанбе сокинони шаҳрак ва деҳаҳои атрофи он ба донишҷуён маводи ғизоӣ пешниҳод мегардонанд. Ҳамаи ин ҷавобан ба муроҷиатҳои Президенти мамлакат оид ба дастгирии табақаҳои муҳтоҷ сурат мегиранд. Шаст фоизи донишҷӯён стипендияи муқаррарӣ мегиранд.

Дар коллеҷ 2 донишҷӯи ятими кул, 30 нафар донишҷӯёни нимятим (бемодар-10 нафар, 20 нафар бепадар) таҳсил доранд, ки пайваста ба онҳо ёриҳои моддӣ расонида мешавад. Дар назди хобгоҳ майдончаи варзишӣ мавҷуд аст, ки ба талабот чандон ҷавобгӯ нестанд. Дар коллеҷ ошхонаи ба талабот ҷавобгӯ амал мекунад ва донишҷӯёни роҳдур аз он истифода мебаранд ва гоҳе аз ҳисоби мадади хайрхоҳон бо ҷаҳду талошҳои маъмурият ва иттифоқи касаба бо хӯроки гарми ройгон таъмин карда мешаванд. 

Мушкилоти боқимонда-дар ҳарду хобгоҳҳо мавҷуд набудани бинои мувофиқ барои шустушӯйи донишҷӯён ва ҷойи мувофиқ барои хушкондани либос ва анҷоми шусташуда мебошад. Набудани чунин биноҳо ба вазъи саломатии донишҷӯён ва ҳолати беҳдоштии хонаҳои хоби донишҷӯён таъсири бад мерасонад. Дар хобгоҳи № 1 сохтани бинои алоҳида барои пухтупаз низ зарур аст.

Дар китобхонаи коллеҷ чорабиниҳое гузаронда мешаванд, ки ба сатҳи маърифатнокӣ ва ҷаҳонбинии донишҷӯён то андозае таъсири мусбӣ расонида тавонистанд. Мудири китобхона ҳамарӯза дар байни донишҷӯён дар бораи китобхонӣ ва аҳамияти он дар рушди ҳамаҷонибаи инсон суҳбатҳо доир менамояд. Дар китобхона зиёда аз 2000 нусха китобҳои дарсӣ, илмию оммавӣ, методӣ ва бадеӣ мавҷуданд. Дар китобхона қариб ҳамаи донишҷӯён ва омӯзгорони коллеҷ аъзо мебошанд. Ҳоло ҷамъи аъзоёни китобхона ба 200 нафар ва гардиши китоб бошад, ба 1100 адад расидааст. Дар ин давра ба масъалаи китоби бадеихонии донишҷӯён диққати зиёд дода шуд. Ҳар рӯз пеш аз дарсҳо бо навбат ҳар гуруҳ дар бораи китобҳои хондаашон маълумот медиҳанд. Ин чорабинӣ барои бедор шудани шавқи китобхонии донишҷӯён таъсири ҷиддӣ расонд. Гузаронидани маҳфилҳои адабӣ аз рӯи асарҳои ба гуруҳҳои таълимӣ тавсиядодашуда барои беҳтаршавии ин кор мусоидат намуда истодааст. Ба корҳои анҷомдода нигоҳ накарда, камбудиҳо низ мавҷуданд: китобхона-қироатхонаи коллеҷ бо сабаби норасогии ҷой дар бинои начандон мувофиқ фаъолият мекунад.

Масъалаи таъминоти кадрӣ рӯ ба беҳбудӣ овардааст. Ҳоло дар коллеҷ 27 нафар омӯзгорон ба таълиму тарбияи донишҷӯён машғул мебошанд. Аз шумораи умумии омӯзгорон 26 нафарашон маълумоти олӣ дошта, 1 нафар бо маълумоти олии нопурра фаъолият намуда истодаанд. 9 нафар омӯзгорон дорандаи нишони сарисинагии «Аълочии маорифи Ҷумҳурии Тоҷикистон» мебошанд ва 15 нафар дараҷаи тахассусии олӣ, 4 нафар  дараҷаи тахассусии якум доранд. Онҳо пайваста худомӯзӣ намуда, донишашонро баланд мебардоранд. 

Дар муқоиса ба ҳамин давраи соли гузашта масъалаи ҷудо гаштани маблағ барои такмили ихтисоси омӯзгорон беҳтар гашт. Агар соли гузашта ба ин самт маблағ пешбинӣ нашуда бошад, имсол барои такмили ихтисос 3500 сомони пешбинӣ гардид.

Тавре директори Колеҷ Ф. Аминов иброз дошт, дар ин самт мушкилоти бо мутахасисони ҷавон таъмин намудани коллеҷ бо назардошти синну соли нафақавии қисме аз омӯзгорон ҷой дорад, ки барои барҳам задани он тавассути коллеҷҳои соҳаи фарҳанг таъмин намудани ихтисосмандон -омӯзгорон аз ҷумлаи хатмкунандагони ин муассисаҳои таълимӣ зарур аст.                                                                                                         

Айни ҳол дар шуъбаи рӯзонаи коллеҷ 287 нафар, аз ҷумла духтарон 77 нафар, дар шуъбаи ғоибона 145 нафар, аз ҷумла 83 нафар духтарон таҳсил намуда истодаанд. 

Гузаронидани мусобиқаҳои дониш аз фанҳои мухталиф байни гуруҳҳои таълимӣ ва намоиши дониши донишҷӯён аз ҳамаи фанҳои таълимӣ низ дар давоми ин ёздаҳ моҳи нимаи дуюми соли 2018 барои беҳтаршавии сатҳи дониши донишҷӯён мусоидат намуд. Дар давоми ёздаҳ моҳи нимаи дуюми соли 2018 24 дарси кушод аз фанҳои таълимӣ, инчунин 4 маҳфили фаннии кушод, 5 дарси тарбиявии кушод гузаронида шуданд, ки барои муайян намудани омӯзгорони навовар ва ивази таҷрибаи ҳамдигар хеле манфиатовар буданд.

Бо мақсади амалӣ гаштани фармоиши вазири маориф ва илми Ҷумҳурии Тоҷикистон барои иштирок дар олимпиадаи ҷумҳуриявӣ як қатор донишҷӯёни коллеҷ аз фаннҳои таърихи халқи тоҷик -Гадоева Дилором, забони русӣ-Бороников Муҳаммад, Неъматов Иброҳим – математика, забони англисӣ –Қосимзода Қадриддин иштирок намуданд, ки ба натиҷаҳои назаррас ноил гаштанд.

Масъалаи давомоти донишҷӯён пайваста зери назорат қарор дошта давра ба давра рӯ ба беҳбудӣ оварда истодааст. Дар давоми соли 2018  бо фармоиши директор нисбат ба 30 нафар донишҷӯён муҷозоти интизомӣ андешида шуд. Назорати корҳои тарбиявӣ дар хобгоҳҳо аз ҷониби мураббиён ва омӯзгорон ҳаррӯза ба роҳ монда шудааст. Инчунин донишҷӯёни дар ҳуҷраҳои иҷора истиқоматдошта низ пайваста таҳти назорат қарор доранд. 

Яке аз самтҳои асосӣ ва муҳими фаъолияти коллеҷ ташкили кори таҷрибаомӯзии донишҷӯён мебошад. Донишҷӯён таҷрибаомӯзии пешаздипломиашонро дар заминаи мактабҳои ноҳияҳои водии Рашт гузаронданд. Мактабҳо аз фаъолияти донишҷӯёни таҷрибаомӯз қаноатманд мебошанд. 

Дар фароварди суҳбат директори Колеҷи омӯзгории ноҳияи Рашт Файзиддин Аминов иброз дошт, ки «Ба корҳои анҷомдода нигоҳ накарда, дар коллеҷ проблема ва мушкилотҳое мавҷуданд, ки баҳри бартараф намудани онҳо мададу дастгирии Вазорати маориф ва илм ва мақомоти иҷроияи ҳокимияти давлатии ноҳияи Рашт зарур аст. Инҳо набудани ҳаммом барои донишҷӯёни дар хобгоҳ истиқоматдошта ва дар ҳолати садамавӣ қарор доштани биное, ки муҳосибот, хазина ва анборҳо ҷойгиранд».     

-Вале бо вуҷуди ин, маъмурият, коллективи омӯзгорон ва кормандони коллеҷ тамоми имконоти мавҷударо барои иҷрои вазифаҳои гузошташуда ва омода намудани мутахассисони варзида сафарбар хоҳанд кард, - бо итминон моро бовар кунонид Ф. Аминов.

 

«МТЖТ»

Хонданд 46
Кохи муҳташами илму дониш дар Кӯлоб

Донишгоҳи давлатии Кӯлоб ба номи Абӯабдуллоҳи Рӯдакӣ яке аз аввалин муассисаи олӣ дар минтақаи Кӯлоб буда, таърихи 73-сола дорад. Донишгоҳ нахустин маротиба 15-уми августи соли 1945 бо номи Институти давлатии дусолаи муаллимтайёркунии Кӯлоб дар заминаи Омӯзишгоҳи омӯзгории Кӯлоб таъсис ёфта, баъдан бо Қарори Вазорати маорифи СССР аз моҳи августи соли 1953 ба Донишкадаи давлатии омӯзгории чаҳорсола ва дар соли таҳсили 1956-1957 ба таҳсили панҷсолаи ҳамгиро гузашта, дар тӯли фаъолияти худ зиёда аз 40 ҳазор мутахассисони дорои маълумоти олиро тарбия намуда, дар хизмати халқу ватан қарор додааст. Бо соҳибистиқлол шудани Ҷумҳурии Тоҷикистон ба Донишкадаи давлатии омӯзгории шаҳри Кӯлоб мақоми донишгоҳӣ дода шуда, 24-уми июли соли 1992 ба Донишгоҳи давлатии Кӯлоб табдили ном кард ва аз 24-уми апрели соли 2009 ба номи Абӯабдуллоҳи Рӯдакӣ гузошта шуд.

Дар муддати 73 соли фаъолияти хеш ин боргоҳи илму маърифат тавонист теъдоди донишҷӯёнро аз 48 нафар то ба 11 ҳазор нафар, шумораи устодону муаллимонро аз 9 ба 635 нафар, миқдори кадрҳои дараҷа ва унвони илмидорро аз 5 номзади илм ба 130 нафар ва докторони илму профессоронро аз сифр ба 29 расонад. Алъон доктори илми физика ва математика, профессор, Узви вобастаи АИ ҶТ Абдулло Ҳабибулло ректори донишгоҳ мебошанд.

 

Шумораи устодон ва донишҷӯён

Феълан дар 28 кафедраи донишгоҳ (23 кафедраи тахассусӣ ва 5 кафедраи умумидонишгоҳӣ), зиёда аз 635 кормандони илмӣ ва омӯзгорон, аз ҷумла 10 нафар докторони илму профессорон ва 85 нафар номзадҳои илм, 358 нафар ассистентон фаъолият мекунанд.

Шумораи донишҷӯёни донишгоҳ дар соли таҳсили 2018-2019-ум 9658 нафар, аз ҷумла дар таълими рӯзона 5745 ва дар таълими ғоибона 3913 нафарро ташкил медиҳад (буҷавӣ 2741 нафар, шартномавӣ 6362 нафар). Ҳоло донишгоҳ дорои 9 факулта буда, таълим ва тадрис дар 7 бинои таълимӣ ва ду баст сурат мегирад. Дар донишгоҳ 426 нафар (аз ҷумла 280 духтар) донишҷӯён тибқи квотаи Президентӣ ба таҳсил фаро гирифта шудаанд, ки ҳамагӣ бо хобгоҳ ва идрорпулии ҳармоҳа таъмин мебошанд.

Дар донишгоҳ 15 нафар донишҷӯ барандагони стипендияҳои (идрорпулиҳои) номӣ мебошанд, аз ҷумла 5 нафар гирандаи идрорпулии Президентӣ, 5 нафар гирандаи идрорпулии раиси вилояти Хатлон, 1 нафар гирандаи идрорпулии Кумитаи ҷавонон ва варзиши назди Ҳукумати Ҷумҳурии Тоҷикистон, 10 нафар нафар гирандаи идрорпулии ректори донишгоҳ, 2 нафар гирандаи идрорпулии раиси Кумитаи занон ва оилаи назди Ҳукумати Ҷумҳурии Тоҷикистон, 2 нафар гирандаи идрорпулии раиси КИ ҲХДТ дар вилояти Хатлон. Дар соли 2018 гирандагони стипендияи вилоятӣ аз ҳисоби олимони донишгоҳ 11 нафарро ташкил медиҳад.

 

Факултетҳо ва ихтисосҳо

Дар Донишгоҳи давлатии Кӯлоб факултаҳои филологияи тоҷик ва журналистика, филологияи рус, филологияи хориҷӣ, таърих, хуқуқ ва муносибатҳои байналмилалӣ, химия-биология ва география, физика-математика ва информатика, омӯзгорӣ, тарбияи ҷисмонӣ ва омодагии дифои ҳарбӣ, молиявию иқтисодӣ ва 28 кафедра амал мекунад, ки кафедраҳои фалсафа, сиёсатшиносӣ, педагогика, психология, забонҳои хориҷӣ, тарбияи ҷисмонӣ, забони русӣ ба кафедраҳои умумидонишгоҳӣ ва дигар кафедраҳо марбути факултаҳо мебошанд.

Дар донишгоҳ 51 ихтисоси амалкунанда мавҷуд аст, 48 ихтисос дар таълими рӯзона, 25 ихтисос дар таълими ғоибона, аз ҷумла фосилавӣ, 24 ихтисос дар зинаи магистратура, 5 ихтисос дар зинаи аспирантура, 11 ихтисос дар зинаи докторантураи PhD.

Дар шуъбаҳои таълими рӯзона ва таълими ғоибонаи донишгоҳ 36 ихтисос - забон ва адабиёти тоҷик, рӯзноманигорӣ, забоншиносӣ ва технологияи нави иттилоотӣ, забон ва адабиёти рус (дар мактабҳои миллӣ), забони англисӣ, таҳсилоти томактабӣ, таҳсилоти ибтидоӣ, таҳсилоти ибтидоӣ бо ихтисоси иловагӣ, таҳсилоти ибтидоӣ - санъати мусиқӣ, тарбияи ҷисмонӣ, дефектология, логопедия, сурдопедагогика, олигфренопедагогика, тарбияи ҷисмонӣ ва омодагии дифои ҳарбӣ, химия-биология, химия-экология, биология-экология, географияи сайёҳӣ ва менеҷменти саёҳат, география, таърих, таърих ва ҳуқуқ, муносибатҳои байналмилалӣ, физика-математика, технология (аз рӯи самтҳо), математика, математикаи амалӣ (фаъолияти илмӣ-педагогӣ), информатика, менеҷменти иҷтимоӣ, маркетинг, иқтисодиёт ва идора дар корхона, фаъолияти бонкӣ, молия ва қарз, менеҷменти инвеститсионӣ, иқтисодиёт ва идора дар корхонаи комплекси агросаноатӣ, иқтисодиёт ва идора дар корхонаҳои хурду миёна, баҳисобгирии бухгалтерӣ, таҳлил ва аудит дар муассиаҳои буҷетӣ ва илмӣ амал менамоянд.

 

Таҳсилоти фосилавӣ

Ҷиҳати ба роҳ мондани таҳсили фосилавӣ дар донишгоҳ сомонаи низоми таҳсилоти фосилавӣ “MOODLE” таъсис дода шуда, дар шабакаи Интернет бо суроғаи fosilavi.kgu.tj аз аввали соли таҳсили 2017-2018 фаъолият карда истодааст. Зиёда аз 380 нафар донишҷӯи низоми таҳсилоти фосилавӣ ва 54 нафар омӯзгори донишгоҳ сомонаи мазкурро фаъолона истифода мебаранд. Маводҳои дарсии мултимедиявӣ, тестҳо, сабти видеоӣ ва дигар маводҳои таълимии электронӣ дар сомона аз тарафи омӯзгорон ҷой карда шудаанд.

 

Пояи моддӣ-техникии донишгоҳ

Пояи моддӣ-техникии донишгоҳ давра ба давра мустаҳкам гардида, яке аз асосҳои баланд гардидани сатҳу сифати таълим маҳсуб меёбад. Донишгоҳ ба шабакаи Интернет пайваст буда, омӯзгорону донишҷӯён пайваста аз он истифода мебаранд. Китобхонаҳо ва толорҳои хониши донишгоҳ ҳамеша дар хизмати донишҷӯёну омӯзгорон буда, дорои беш аз 473507 адад адабиёти илмӣ, таълимӣ, сиёсӣ, бадеӣ аст. Бо мақсади мустаҳкам намудани заминаи моддӣ-техникии донишгоҳ ҳамаи синфхонаҳо ва озмоишгоҳҳо ва лабораторияҳо бо воситаҳои техникию таълимӣ ва дигар таҷҳизоти муосири технологӣ муҷаҳҳаз гардонида шуда, 7 лабораторияи компютерӣ дар ҳолати хуби корӣ қарор доранд. Ҳамзамон, толори бузурги фарҳангӣ, толорҳои хурди маҷлисӣ дар шафати толори фарҳангӣ, дафтарҳои кории шуъбаҳо, толори варзишии клуби «Ҷасорат», боғи фароғатии «Дониш», майдончаи варзишии тобистона, толори шӯрои олимон, Маркази омӯзиши забонҳо (англисӣ ва русӣ) бо синфхонаи компютерӣ, синфхонаҳои муосири комютерӣ дар факултаи филологияи хориҷӣ, толори маҷлисӣ бо 120 ҷои нишаст дар факултаи таърих, ҳуқуқ ва муносибатҳои байналмилалӣ, осоишгоҳи табобатии донишгоҳ, коргоҳҳои дӯзандагӣ, ҳарротӣ дар хизмати донишҷӯёну устодон қарор дорад. 

 

Муносибатҳои байналмилалӣ

Донишгоҳ бо зиёда аз 50 донишгоҳҳои кишварҳои хориҷӣ, ба мисли Федератсияи Русия, Олмон, Испания, Чехия, Белгия, Италия, Англия, ИМА, Белорусия, Қазоқистон, Қирғизистон, Ӯзбекистон, Туркманистон, Украина, Австрия ва Эрон шартномаҳои ҳамкорӣ дошта, дар доираи 5 лоиҳаи байналмилалӣ, ки ба онҳо донишгоҳҳои Осиёи Марказӣ ва Аврупо шомиланд, бомуваффақият ширкат дорад. Бо мақсади васеъ намудани доираи фаъолият ва баланд бардоштани нақши донишгоҳ дар сатҳи байналхалқӣ, тайёр намудани ҳарчи бештари мутахассисони донишгоҳ дар хориҷи кишвар тавассути ҳамкориҳои дуҷонибаи мустақим бо созмонҳои байналмилалӣ, донишгоҳҳо ва дигар муассисаҳои илмии кишварҳои хориҷӣ дар тайёр намудани мутахассисон ва гузаронидани пажуҳишҳо шуъбаи равобити байналмилалии Донишгоҳи давлатии Кӯлоб ба номи Абӯабдуллоҳи Рӯдакӣ дар ҳамкорӣ бо барномаҳои Фонди Аврупо Темпус ва Эрасмус Мундус (акнун ЭРАСМУС+), як қатор донишгоҳҳои Федератсияи Русия, донишгоҳҳои бонуфузи давлатҳои Осиёи Миёна, Сафорати Ҷумҳурии Ҳиндустон, Сафорати Ҷумҳурии Чин дар Душанбе ҳамкорӣ дорад.

Айни замон дар доираи барномаи аврупоии ERASMUS Донишгоҳи давлатии Кӯлоб ду лоиҳаро амалӣ карда истодааст. Лоиҳаи Erasmus + PAWER (“Роҳ ба сӯи табодули байниминтақавӣ ва таъмини дастрасӣ ба аҳамиятнокӣ, сифатнокӣ ва баробарҳуқуқӣ”).

Мақсади асосии барномаи Аврупоии ERASMUS+ PAWER - “Роҳ ба сӯи табодули байниминтақавӣ ва таъмини дастрасӣ ба аҳамиятнокӣ, сифатнокӣ ва баробарҳуқуқӣ” - ин зиёд намудани шумораи донишҷӯёне мебошад, ки ба донишгоҳҳои минтақавӣ ва хориҷи кишвар ба воситаи барномаҳои табодули донишҷӯён равон карда мешаванд. 

Ҳамкориҳои зич дар доираи лоиҳаи барномаҳои аврупоии “Excellence in Engineering Education through Teacher Training and New Pedagogic Approaches in Russia and Tajikistan / EXTEND”  низ ба роҳ монда шудааст. 

 

Сертификат ва Ҷоизаи байналмилалии сифати Аврупо

Бо Қарори Ташкилоти байналмилалии сертификати сифати аврупоии Институти Шветсариягӣ (Донишгоҳи Оксфорди Британияи Кабир) Донишгоҳи давлатии Кӯлоб ба номи Абӯабдуллоҳи Рӯдакӣ соҳиби иҷозатнома (литсензия ва Сертификати байналмилалии сифати Аврупо (Ҷоиза) гардид.

Ин иҷозатнома ва Ҷоиза бар пояи саҳми назарраси донишгоҳ дар сатҳи байналмилалӣ ва ширкати кормандон дар лоиҳаҳои таълимӣ, чопи мақолаҳо дар маҷаллаҳои хориҷи кишвар дода шуда, мавқеъ, нуфуз ва рейтинги донишгоҳро боз ҳам балантар мегардонад.

 

Раёсати илм ва инноватсия

Раёсати илм ва инноватсия яке аз сохторҳои таркибии донишгоҳ буда, бо мақсади фаъолияти илмӣ-тадқиқотӣ ва нашрии профессорону устодон ва донишҷӯён ташкил карда шудааст. Дар донишгоҳ муҳаққиқон аз рӯи 24 равия, 28 масъала ва 32 мавзуи илмӣ ба корҳои илмӣ-тадқиқотӣ дар соҳаҳои илмҳои мухталиф, аз ҷумла илмҳои дақиқ, гуманитарӣ ва табиатшиносӣ кор бурда истодаанд. Аз 28 кафедраи амалкунанда кормандони 26-тои онҳо ба корҳои илмӣ-тадқиқотӣ машғуланд. Дар донишгоҳ 323 нафар, аз ҷумла 18 нафар доктори илм, 2 академики Академияи байналмилалии педагогӣ, 1 академики АМ ФР ва Арбоби илму техникаи ҶТ, 1 нафар узви вобастаи АИ ҶТ, 2 нафар узви вобастаи АИП, 10 нафар профессор, 85 нафар номзадҳои илм (35 нафарашон дотсент), 33 нафар аспирант (10 нафар аспиранти таҳсилоти рӯзона ва 23 нафар аспиранти таҳсилоти ғоибона), 76 нафар унвонҷӯ ба пажуҳиши илмӣ шуғл доранд.

Самти дигари фаъолияти олимони донишгоҳ тайёр кардани мутахассисон тавассути магистратура, аспирантура, докторантура мебошад. 

Дар донишгоҳ ҷамъияти илмии донишҷӯён фаъолият дорад. Беҳтарин олимони ҷавон ва донишҷӯ дар ҷамъомадҳои он ширкат ва маърӯзаҳо карда, натиҷаи маърӯзаҳои илмии онҳо бо ифтихорномаю дипломҳо қадр карда шудааст. Ҳайати профессорону омӯзгорони донишгоҳ дар муддати як соли таҳсили 2018-2019-ум 277 таълифоти илмӣ, 21 монография, 5 китоби дарсӣ, 12 дастури таълимӣ, 19 тавсияи методӣ нашр намудаанд ва 14 таклифи навоварӣ пешниҳод карда, соҳиби 2 патент шудаанд. Раёсати илм ва инноватсия дар ҳайати худ сохторҳои зеринро дорад: Рӯзномаи «Анвори дониш», маҷаллаи илмии “Паёми Донишгоҳи давлатии Кӯлоб ба номи Абӯабдуллоҳи Рӯдакӣ”, Маркази истеъдодҳои ҷавон, Маркази рушди касбият ва инноватсия, Китобхонаи донишгоҳ ва Парки технологӣ.

Бояд қайд намуд, ки нашрияи донишгоҳ - рӯзномаи “Анвори дониш” яке аз рӯзномаҳои хонданбоб дар минтақа буда, бо теъдоди 5000 нусха дар як моҳ ду маротиба чоп мешавад.

 

Озмоишгоҳҳо

Дар донишгоҳ озмоишгоҳҳо аз фанҳои оптика, радиотехника, химияи органикӣ ва ғайриорганикӣ, физикаи ҷисмҳои сахт, механика, электроника, физикаи молекулавӣ, барқ, физикаи атом, микроэлектроника, таҳлилкунии техникӣ ва моделсозӣ, назарияи лапиш ва протсесҳои мавҷӣ, дастгоҳҳои радиошунавонӣ ва ТВ, физикаи мактабӣ, методикаи таълими физика, дастгоҳҳои харротӣ, нақлиёт, саноати қаннодӣ фаъолият намуда, ба қадри зарурӣ таҷҳизонида шудаанд. 

Дар таълими фанҳои дақиқ ва табиатшиносӣ воситаҳои нави техникӣ васеъ истифода мешаванд. Озмоишгоҳҳои оптика ва раидоэлектроника, биология, химия, лингофонӣ, кабинети воситаҳои техникӣ, маркази омӯзиш, 4 синфхонаи компютерӣ фаъолият намуда, ба қадри зарурӣ таҷҳизонида шуданд.

 

Китобхона

Фонди китобхонаи донишгоҳ 473507 нусха китобро дар бар мегирад, ки аз ин шумора 24462 адад китобҳои тахассусӣ, 112540 адад китобҳои таълимӣ, 11000 адад китобҳои методӣ, 11002 адад китобҳои сиёсӣ, 14221 адад китобҳои бадеӣ ва 10015 адад дастурҳои таълимиянд.

Аз шумораи умумии китобҳо 20250 адад бо забони тоҷикӣ, 159583 адад бо забони русӣ ва 3407 адад бо дигар забонҳо мебошанд. Гардиши китобҳо аз 60% то 74,9%-ро ташкил мекунад.

Дар “Китобхонаи электронӣ” зиёда аз 190000 (як саду навад ҳазор) нусха китобҳои электронӣ вобаста ба факултаҳо - ихтисосҳо вуҷуд доранд. Инчунин, дар толори хониши китобхонаи электронӣ теъдоди 25 адад ноутбук ба шабакаи глобалии (шабакаи умумиҷаҳонӣ) интернет низ пайваст мебошанд. 

 

Дарсҳои таҷрибавӣ

Парки технологии донишгоҳ дорои сехи коркарди оҳан, коркарди регу шағал, коркарди чӯбу тахта, таъмири радиотехникӣ, дӯзандагӣ, ошхона, сартарошхона ва лагери истироҳатӣ-фароғатии “Истиқлол” буда, таҷрибаҳои истеҳсолӣ ва саҳроии донишҷӯён дар ҳамин лагер сурат мегирад. Бояд қайд кард, ки Истироҳатгоҳи истеҳсолӣ - таҷрибавии «Истиқлол» ҳамчун сохтори «Парки технологӣ» дар маркази диққати маъмурияти донишгоҳ қарор дорад ва ба яке аз ҷойҳои фарҳангию фароғатӣ табдил дода шудааст. Соли 2018-ум 50 нафар фарзандони омӯзгорон ва кормандони донишгоҳ дар фароғатгоҳ ба истироҳат фаро гирифта шудаанд.

Бо ташаббуси роҳбарият ва иттифоқҳои касабаи омӯзгорону кормандони донишгоҳ осоишгоҳи табобатӣ бо таҷҳизоти муосири тиббӣ ҷиҳозонида шуда, ба кормандони донишгоҳ ва мизоҷон хизмати тиббӣ мерасонад. Ҳамчунин, дафтари кории шуъбаи рӯзноманигории факултаи филологияи тоҷик ва журналистика бо воситаҳои техникии ҳозиразамон ҷиҳозонида шуда, донишҷӯён аз онҳо ба таври васеъ истифода мебаранд.

 

Ташкили ҷамъиятҳо ва маҳфилҳо

Дар донишгоҳ як силсила ҷамъиятҳои илмӣ ва маҳфилҳо амал мекунанд, ки нақши онҳо дар баланд бардоштани сатҳи равшанандешони донишгоҳӣ чашмгир аст. Ба ҷамъияти илмии донишҷӯён (ҶИД) 110 нафар донишҷӯёни ба пажуҳишҳои илмӣ рағбатдошта гирд омада, ҳар моҳ ду бор конференсияҳои илмӣ - амалӣ доир менамоянд. Мавзуҳои мавриди муҳокима қарордодаи ҶИД таваҷҷуҳи расонаҳои хабарии шаҳр ва ҷумҳуриро ба худ ҷалб карда, пиромуни онҳо дар саҳифаҳои рӯзномаҳо ва шабакаҳои телевизионии ҷумҳуриявӣ маводи иттилоотӣ интишор гардидаанд. ҶИД дар муҳокимаи мавзуҳои баҳсбарангез ва барои солимии ҷомеа зарур донишҷӯёни хоҳишмандеро, ки аъзои ҷамъият нестанд, даъват менамояд. Аз ҷумла, дар муҳокимаи мавзуҳои “Бонкҳо ва аҳамияти онҳо ба ҷомеа”, “Маҳсулоти қарзии бонкҳо”, “Зуҳуроти номатлуби ҷомеа - терроризм ва экстремизми динӣ”, “Ҳадафи аслии ифротгароён терроризм ва қатлу куштор аст”, “Дигарандешии солим ва дигарандешии носолим”, “Зансолории аврупоиён дар муқоиса бо тоҷикон ва эронитаборони Бостон”, “Ҷаҳонишавӣ ва таъсири он ба ҷомеа” ва ғайра донишҷӯён ва устодони зиёде ширкат варзида, соли ҷорӣ 5 нафар аз аъзои фаъоли ҶИД ба докторантураи Донишгоҳи миллии Тоҷикистон шомил гаштаанд. 6 нафар аъзои ҶИД пас аз хатми донишгоҳ ба корҳои илмӣ машғул гаштаанд.

Дар донишгоҳ соли дуюм аст, ки маҳфилҳои «Шоҳномахонӣ», «Дӯшизагон», «Ҷавонмардон», «(Конуни) Пурсишу посух» амал мекунанд. Аъзои ин маҳфилҳо дар баробари гуфтугӯву пурсишҳо аз мавзуҳои «Шоҳнома», ба баланд бардоштани одоби муошират, ахлоқи ҳамида, ойини ҷавонмардӣ, ойини оиладорӣ, фарҳанги меҳмонпазирӣ ва монанди он таваҷҷуҳи вижа зоҳир мекунанд.

Ректори донишгоҳ дар аксари конференсияҳои ҶИД шахсан ҳамчун шунаванда иштирок менамояд.

 

Кӯмакпулиҳо, идрорпулиҳо ва мукофтотпулиҳо

Дар донишгоҳ барои дастгирии ҳаматарафа ва ҳавасмандгардонии устодон ва донишҷӯён мукофотпулиҳо ва кӯмакпулиҳои гуногун амал мекунанд, аз ҷумла, идрорпулии иҷтимоӣ ба ятимони кулл, идрорпулии иҷтимоӣ ба донишҷӯёни камбизоат, ба иштирокчиёни ҷанги Афғонистон. Инчунин, мукофотпулиҳо барои иштироки фаъолона дар мусобиқаҳои варзишии ҷумҳуриявӣ ва байналмиллалӣ бахшида ба Иди модарон, озмуни «Маликаи донишгоҳ», бахшида ба рӯзи Артиши миллӣ, бахшида ба спартакиадаҳои ҷумҳуриявӣ, бахшида ба Рӯзи Ваҳдати миллӣ, бахшида ба Рӯзи илми тоҷик, бахшида ба Иди Сайиди фитр ва иди Ваҳдати миллӣ амал мекунанд. 

Ғайр аз ин, донишгоҳ баҳри дастгирии олимони ҷавон барои ҳимояи рисолаи номзадӣ бо маблағи 3000 сомонӣ ва барои ҳимояи рисолаи докторӣ 5000 сомонӣ ба онҳо кӯмаки яквақтаина мерасонад. Ба донишҷӯёне, ки дар маҳфилҳои гуногун, аз ҷумла маҳфили “Зарифон”, мусобиқаҳои варзишӣ ва дигар чорабиниҳо иштироки фаъолона доранд, барои ҳавсмандгардонӣ мукофотпулӣ дода мешавад. Масалан, Сорбон Латифов, донишҷӯи соли 4-уми факултаи тарбияи ҷисмонӣ ва омодагии дифои ҳарбӣ, ки дар Чемпионати ҷаҳон (шаҳри Сочӣ) дар вазни 62 кило дар риштаи самбои размӣ қувваозмоӣ карда, сазовори ҷойи 3-юм ва барандаи медали биринҷӣ гардида буд, 3000 сомонӣ, ба донишҷӯи соли 3-юми факултаи тарбияи ҷисмонӣ ва омодагии дифои ҳарбӣ Раҳимов Биноӣ, ки дар мусобиқаи байналмилалии варзишие, ки миёни давлатҳои Осиё дар Ҷумҳурии Қирғизистон баргузор гардид, аз риштаи варзиши Тхэквондо иштирок намуда, сазовори ҷойи аввал ва медали тилло гардид, 3000 сомонӣ ва ба донишҷӯи соли 2-юми факултаи молиявию иқтисодӣ Муродов Фазлиддин, ки дар вазни 73 кило дар мусобиқаи байналмилалӣ ҷои аввал ва медали тиллоро насиб гашт, 5000 сомонӣ мукофотпулӣ дода шуд.

 

Кӯдакистони “Ситора”

Кӯдакистон “Ситора” ҳамчун муассисисаи томактабӣ дар назди донишгоҳ фаъолият намуда, 150 нафар кӯдакро фаро гирифтааст. Кӯдакистон асосан барои кӯдакони устодону омӯзгорон ва кормандони донишгоҳ таъсис дода шуда, ҳамзамон ҳамчун базаи таҷрибавии наздидонишгоҳӣ барои донишҷӯёни факултаи омӯзгорӣ, шуъбаи таҳсилоти томактабӣ фаъолият менамояд.

 

Маркази таълимии касбомӯзӣ

Дар назди донишгоҳ Маркази таълимии касбомӯзӣ дар ноҳияи Муъминобод фаъолият менамояд, ки дар он гуруҳҳои синни 15-24-сола ба касбҳои дӯзандагӣ, муҳосиб бо донистани компютер, бофанда, гулдӯз, фурӯшанда-ташкилотчӣ, қаннод, инчунин гуруҳҳои синни 24-49-сола дар гуруҳҳои технологияи истеҳсоли консерва, дӯзанда, қаннод ва гулдӯз фаъолият менамоянд.

 

Ба ҷои хулоса

Донишгоҳи давлатии Кӯлоб аз ҷумлаи беҳтарин ва бузургтарин муассисаҳои олии касбии Ҷумҳурии Тоҷикистон ба ҳисоб рафта, бо интихоби ихтисосҳои мавҷуда хоҳишмандон метавонанд соҳиби маълумоти олӣ дар равияҳои филологию фарҳангӣ, рӯзноманигорӣ, омӯзгорию равоншиносӣ, таъриху ҳуқуқ, муносибатҳои байналмилалӣ, риёзию табиӣ, молиявию иқтисодӣ, варзишӣ, менеҷменту сайёҳат, китобхонашиносию таҳсилоти фарогир гардида, донишу маҳорат ва малакаҳои тахассусии хешро бо Стандартҳои байналмилалии таҳсилот мутобиқ созанд. Рамзи Донишгоҳи давлатии Кӯлоб ба номи Абӯабдуллоҳи Рӯдакӣ дар ММТ 111 мебошад.

Интихоби Донишгоҳи давлатии Кӯлоб ба номи Абӯабдуллоҳи Рӯдакӣ равзанаи фардои дурахшони ҳар як интихобкунанда хоҳад буд.

 

МТЖТ

Хонданд 73

Фурӯғи ирфонии Хатлонзамин

Дек 22, 2018
Хонданд: 38
Фурӯғи ирфонии Хатлонзамин

Коллеҷи омӯзгории Донишгоҳи давлатии Кӯлоб ба номи Абӯабдуллоҳи Рӯдакӣ

Коллеҷи омӯзгории Донишгоҳи давлатии Кӯлоб ба номи Абӯабдуллоҳи Рӯдакӣ аз куҳантарин муассисаҳои таълимии миёнаи касбӣ буда, таърихи бою ғанӣ дорад. Гузориши мо аз ин даргоҳи илму маърифат рӯзе оғоз шуд, ки маъмурияти коллеҷ дар якҷоягӣ бо устодону донишҷӯён 55-солагии фаъолияти эҷодии яке аз хатмкунандагони шинохтаи ин муассиса, Шоири халқии Тоҷикистон, барандаи Ҷоизаи давлатии ба номи Абӯабдуллоҳи Рӯдакӣ, раиси бахши хатлонии Иттифоқи нависандагони Тоҷикистон Ҳақназар Ғоибро ҷашн мегирифтанд. Воқеан, ин даргоҳ даргоҳи муқаддасест, ки чандин нафар шахсиятҳои бузургеро чун Ҳақназар Ғоиб ба воя расонида, обрӯи муассисаро на танҳо дар минтақа, балки дар кулли ҷумҳурӣ ва берун аз он ҳам баланд бардоштааст. 

Имрӯз коллеҷи омӯзгории Донишгоҳи давлатии Кӯлоб ба номи Абӯабдуллоҳи Рӯдакӣ бо номи узви вобастаи АИ Тоҷикистон, профессор Соҳиб Табаров, академик Самариддин Каримов, профессорон Саймуҳаммад Одинаев, Худойназар Асозода, Раҳимҷон Саидов, Абдукарим Ҳалимов, Раҳматулло Акбаров, Абдукибор Гадозода, Каримҷон Қодиров, номзадҳои илм Аҳмад Алиев, Барот Нозимов, Борон Файзиев, Қодир Рустамов, Барот Латифов, ходимони намоёни давлатӣ Низорамо Зарифова, Бозгул Додхудоева, Мирзо Бекматов, Султон Мирзошоев, адибону ҳунармандон Шараф Шароф, Ҳақназар Ғоиб, Муҳаммад Ғоиб, Азизулло Авзалов, Салими Хатлонӣ, Сафар Аюбзодаи Маҳзун, Муқим Салимов ва дигарон ифтихор дорад, ки эшон номи муассисаи худро ба қуллаҳои баланди мурод расондаанд. Дар радифи  ин бузургон метавон аз устодони зиёде ёдовар шуд, ки бештари фаъолияти худро сарфи хидмати ин муассисаи куҳанбунёд намуда, ба дастовардҳои назаррас ноил гардидаанд. Нусратулло Неъматов, Соҷидамо Аккалаева, Абдукарим Ҳалимов, Тобусбӣ Ахмедова, Арӯс Абдураҳмонова, Фарҳод Шафизода, Қурбонбӣ Ҳамроева, Акрамхон Мираков ва дигарон дар ин боргоҳи маърифат хидмати шоиставу сазовор кардаанд.  

 

Назаре ба таърих

Моҳи октябри соли 1931 нахустин маротиба дар шаҳри Кӯлоб курси педагогӣ таъсис дода шуд. Баъдан, 28 ноябри соли 1934 курси педагогӣ ба техникуми педагогӣ, 5 июли соли 1935 техникуми педагогӣ ба комбинати педагогӣ мубаддал гашт. Соли 1938 комбинати педагогӣ номи Омӯзишгоҳи омӯзгориро гирифт. Бо Қарори ҲҶТ аз 1 июли соли 1999 таҳти №262 ва Фармони Вазорати маорифи Ҷумҳурии Тоҷикистон аз 17.08.1999 таҳти №449 Омӯзишгоҳи омӯзгории шаҳри Кӯлоб ба Муассисаи давлатии таълимии Коллеҷи омӯзгории Донишгоҳи давлатии Кӯлоб ба номи Абӯабдуллоҳи Рӯдакӣ табдил дода шуд. 

Бояд зикр кард, ки соли 1936 дар заминаи маҳфили ҳаваскорони санъати ин муассисаи таълимӣ Театри вилоятии мазҳака-мусиқии ба номи Сайдалӣ Вализодаи шаҳри Кӯлоб таъсис ёфтааст.

Муассисаи мазкур дар минтақаи Кӯлоб он вақтҳо аввалин муассисае буд, ки барои тамоми соҳаҳои хоҷагии халқ мутахассис тайёр мекард. Ин маркази илмиву таълимӣ аз рӯзҳои нахустини фаъолияти худ тарбияи маънавии ҷомеа ва баланд бардоштани сатҳи маърифати мардуми ҷануби Тоҷикистони азизамонро вазифаи муқаддас ва рисолати таърихии худ медонист. Ба ин хотир, аз оғози амри таъсиси он устодони ин боргоҳи илму маърифат кӯшиш бар он доштанд, ки дар заминаи тарбияи мутахассисони баландпоя раванди инқилоби мадании ҷануби Тоҷикистонро суръат бахшанд. 

Дар тӯли 87 соли фаъолияти хеш ин махзани илму ирфонро шумораи  зиёди донишҷӯён бомуваффақият хатм намуда, дар соҳаҳои гуногуни илм, маориф маданият ва ғайра кору фаъолият карда, ба мартабаҳои баланди илмӣ мушарраф шудаанд. Тайи ин солҳо муассисаи мазкур на танҳо ҳамчун маркази асосии тарбияи мутахассисони таҳсилоти ибтидоӣ маъруф гардид, балки як зумра дастпарварони он ҳамчун олимону донишмандони номӣ, ҳунармандону адибони барҷаста, омӯзгорони шинохтаи ҷумҳурӣ тавонистанд симои ҳақиқии ин махзани илму ирфонро дар Тоҷикистон ва берун аз он дар беҳтарин ваҷҳ муаррифӣ намоянд. 

 

Факултетҳо ва ихтисосҳо

То ба коллеҷ табдил ёфтан омӯзишгоҳ ҳамагӣ аз рӯйи 2 ихтисос - муаллими синфҳои ибтидоӣ ва мураббии боғчаи бачагона муаллим тайёр мекард, ҳоло дар муассиса 2 факултет-гуманитарӣ ва табиатшиносӣ амал мекунад, ки аз рӯйи 8 ихтисос донишҷӯёнро ба таҳсил фаро гирифтааст. 

Ихтисосҳои факултети гуманитарӣ:

 2-020301 - забон ва адабиёти тоҷик

 2-020302 - забон ва адабиёти рус (барои мактабҳои миллӣ)

 2-020306 - забони англисӣ

Факултети табиатшиносӣ:

2-010100 - математика, 

2-010201 - таҳсилоти ибтидоӣ, 

2-010101 - таҳсилоти томактабӣ

2-400101 - таъмини барномавии технологияи иттилоотӣ

2-020101 - таърих

Ҳамаи ихтисосҳои мазкур бозоргир буда, хатмкунандагон баъд аз хатми коллеҷ ба муассисаҳои таълимӣ ба кор фаро гирифта мешаванд ва онҳо метавонанд дар муассисаҳои таҳсилоти миёнаи умумӣ ба сифати омӯзгор фаъолият намоянд.

 

Синфхонаҳои муосир

Муассиса дорои 103 адад компютер, 24 адад принтер, 9 адад воситаи нусхабардорӣ, 7 адад проектор, 4 адад тахтаи электронӣ, 1 адад крайнштейн мебошад. Факултетҳо, шуъбаҳо, кафедраҳо пурра бо компютер ва принтер таъминанд. Дар коллеҷ 3 синфхонаи бо асбобҳои аёнии муосир муҷаҳҳазгардонидашуда, 2 синфхонаи компютерӣ бо шумораи 11 ададӣ компютерҳо, 2 синфхона барои қабули имтиҳонҳо (маркази тестӣ), китобхонаи электронӣ, кабинетҳои фанни расм, таълими меҳнат, физика, мусиқӣ, майдончаи варзишӣ, толори хурди варзишии теннис ва шоҳмот фаъолият менамоянд. 

Дарсҳои амалӣ дар синфхонаҳо ва кабинетҳои фаннӣ гузаронида мешаванд. Таҷрибаомӯзии донишҷӯён дар асоси шартнома бо раёсати маорифи шаҳри Кӯлоб дар муассисаҳои таҳсилоти миёнаи умумӣ гузаронида мешавад. Дар муассисаи таҳсилоти миёнаи умумии №1 шаҳри Кӯлоб аз ҷониби коллеҷ кафедраи педагогика ва методикаи таълими фанҳои хусусӣ таъсис дода шудааст, ки ба таҷрибаомӯзон ёрии методӣ мерасонад.

 

Васеъшавии доираи фаъолияти коллеҷ

Соли 1999 дар ҳаёти омӯзишгоҳ воқеаи муҳимми таърихӣ ба вуқуъ пайваст. Табдили мақоми омӯзишгоҳи омӯзгорӣ ба коллеҷи омӯзгории Донишгоҳи давлатии Кӯлоб имкон дод, ки доираи фаъолияти ин маркази илмию таълимӣ васеъ гардида, талабот ба раванди таълиму тарбия суръати куллии худро дигаргун намояд. Дар робита ба ин  дигаргунсозии сохторӣ таваҷҷуҳ ба ихтисосҳои мавҷуда ва такмили сифати таълиму тарбия дар фаъолияти коллеҷ афзалият пайдо намуд. Коллеҷ вазифаи муҳим-тарбияи мутахассисон барои ихтисосҳои омӯзгориро ҳадафи фаъолияти худ қарор дода, ба раванди таълим беҳтарин олимону омӯзгоронро ҷалб намудааст.

Имрӯз дар коллеҷи омӯзгорӣ ҳамагӣ 180 нафар корманд, фаъолият менамояд. Аз инҳо 129 нафар омӯзгорон буда, 10 нафарашон ҳамкоронанд. Аз инҳо 12 номзади илм, 1 нафар доктор, профессор, 12 нафар аълочиёни маориф, 2 нафар Корманди шоистаи ҶТ, 1 нафар дорои Ифтихорномаи ҶТ мебошанд.

Шумораи донишҷӯён ҳамагӣ 2695 нафарро ташкил медиҳанд, ки аз ин миқдор 2222 нафарашонро духтарон ташкил медиҳанд. Дар шуъбаи рӯзона 1083 нафар, дар шуъбаи ғоибона 1004 нафар ва дар гуруҳҳои мақсаднок 608 нафар донишҷӯ ба таҳсил фаро гирифта шудаанд. Ҷалби духтарон аз ҷониби муассисаи таълимӣ бо ҳадафи иҷрои сиёсати Президенти Ҷумҳурии Тоҷикистон дар мавриди ба таҳсил фаро гирифтани духтарон ҳамаҷониба пазироӣ мегардад.

 

Тадқиқотҳои илмӣ

Марҳалаи кунунии инкишофи Тоҷикистон аз устодону омӯзгорон саҳми бештареро дар ҳалли масоили мухталифи иқтисодиву маънавии кишвар тақозо дорад. Барои ҷавобгӯ будан ба талаботи замон зарур аст, ки мактабҳои таҳсилоти миёнаи касбӣ ва олӣ дар баробари он ки боргоҳи таълиму тарбия ҳастанд, марказҳои бонуфузи илмӣ низ бошанд. Дар шаҳри Кӯлоб низ барои тавсияи нақшу нуфузи донишкадаҳо дар пешбурди риштаҳои гуногуни илм замина ва имконоти зарурӣ мавҷуданд. Дар ин замина тӯли солҳои охир ҷустуҷӯи шаклҳои муфиду самарабахши гузориши тадқиқоти илмӣ дар коллеҷ сурат гирифт ва самараи аввалини он падидор омад. Се нафар омӯзгорони коллеҷ Шафизода Фарҳод, Латифов Барот рисолаҳои номзадӣ ва Ҳалимов Абдукарим (руҳаш шод бод) рисолаи доктории хешро дифоъ намуданд. Омӯзгорон Сабзаали Раҷаб, Чоршанбиева Зайнабхон, Мирзоев Ҷумахон, Раҳимов Абулқосим, Мавлонов Нурмамед, Шарифов Шуҳрат, Гулямов Ҳайдар дар арафаи ҳимояи рисолаҳои номзадӣ қарор доранд.

Омӯзгорони коллеҷ донишу малакаи худро ҳарчӣ бештар барои такмили вазъи таълиму тарбия харҷ намуда, кӯшиш намуда истодаанд, ки ҷавобан ба ғамхориҳои Сарвари маҳбубамон ба дастовардҳои нав ба нави илмиву таълимӣ ноил шаванд.

 

Китобхона

Дар Коллеҷи омӯзгории Донишгоҳи давлатии Кӯлоб ба номи Абӯабдуллоҳи Рӯдакӣ китобхона ва қироатхона амал мекунад, ки талаботи донишҷӯён ва омӯзгоронро то андозае қонеъ мегардонад. Миқдори умумии китобҳо 20681 ададро ташкил медиҳанд. Аз инҳо 1950 адад китобҳои тахассусӣ, 4850 адад китобҳои умумитаълимӣ, 2881 адад китобҳои бадеӣ, 8500 адад китобҳои методӣ, 2500 адад китобҳои сиёсӣ мебошанд. Китобхона дорои 5 адад компютер, 1 адад принтер буда, ба хати интернет пайваст аст ва китобхонаи электронӣ низ фаъолият менамояд.

 

Хобгоҳ

Хобгоҳи коллеҷ аз 4 ошёна иборат буда, дар назди биноҳои таълимии муассиса воқеъ аст. Дар ошёнаи якум писарҳо, дар се ошёнаи дигар духтарҳо истиқомат мекунанд. Шумораи умумии донишҷӯёни дар хобгоҳ истиқоматкунанда 320 нафарро ташкил медиҳад. Аз инҳо 227 нафарашон духтарон мебошанд. 

Дар хобгоҳ 4 қироатхона, 4 ҷойи хӯрокпазӣ мавҷуд буда, донишҷӯён зери назорати доимии маъмурият ва мураббияҳои хобгоҳ қарор доранд.

 

Дастовардҳои коллеҷ дар соли 2018

Бо ибтикори шуъбаи кор бо занон ва оила ва мақомоти иҷроияи ҳокимияти давлатии шаҳри Кӯлоб бо мақсади иҷрои дастуру супоришҳои Пешвои миллат оид ба рушди ҳунарҳои мардумӣ ва омода намудани ҷавондухтарон ба ҳаёти мустақилона, ҳифз ва нигоҳ доштани беҳтарин анъана ва суннатҳои миллӣ дар бахши хонаводагӣ ва кадбонугӣ, тарбияи эҳсоси худшиносӣ ва меҳнатдӯстӣ, шиносоӣ бо таъриху фарҳанг ва тамаддуни миллӣ ва умумибашарӣ, бузургдошти назокат, ободии хонадон ва зебоипарастӣ, баланд бардоштани маърифати оиладории занону духтарон, ҳавасмандгардонӣ ва муаррифии ҷавондухтарони ҳунарманду соҳибистеъдод санаи 13.02.2018 озмуни шаҳрии «Зан-олиҳаи ҳунар» миёни донишҷӯёни Донишгоҳи давлатии Кӯлоб ба номи Абӯабдуллоҳи Рӯдакӣ, Донишкадаи технологӣ ва менеҷменти инноватсионӣ дар шаҳри Кӯлоб, коллеҷҳои тиббию омӯзгорӣ, литсейи касбии техникӣ, раёсати маориф ва ҳамоҳангсозии соҳаи тандурустӣ баргузор гардид. Озмуни мазкур аз даҳ шарт иборат буд. Донишҷӯдухтарони коллеҷи омӯзгорӣ дар ҳамаи бахшҳо иштирок намуда, дар бахшҳои «Гул мондан дар матоъ» Шовализода Д. - донишҷӯи гуруҳи 202 ихтисоси забони англисӣ, «Чакандӯзӣ дар матоъ» -донишҷӯи гуруҳи 101 ихтисоси таърих Қурбонбии Аҳмадшо ва «Ороиши мӯйи сар» - донишҷӯи гуруҳи 102 ихтисоси забон ва адабиёти рус Саъдуллозода Наргис ҷойҳои аввалро ишғол намуда, бо дипломи Ҳукумати шаҳри Кӯлоб ва ифтихорномаи коллеҷ сарфароз гардонида шуданд. 

Дар санаи 3-юми марти соли 2018 бо ибтикори Раёсати кор бо ҷавонон ва варзиши вилояти Хатлон бахшида ба «Рӯзи Модар» ва эълон гардидани соли 2018-«Соли рушди сайёҳӣ ва ҳунарҳои мардумӣ»  Фестивали ҷумҳуриявӣ таҳти унвони «Суруди Модар-Алла» дар толори коллеҷи омӯзгорӣ баргузор гардида, дар ин фестивал-озмун Нимонова Навбаҳор донишҷӯи гуруҳи 101 ихтисоси таърихи факултети табиатшиносӣ сазовори ҷойи аввал гашт.

Бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон рӯзҳои 9-10-уми марти соли 2018 дар шаҳри Душанбе мусобиқаи варзишӣ бахшида ба ҷашни Наврӯзи байналмилалӣ баргузор гардид. Донишҷӯи гуруҳи 102 ихтисоси таҳсилоти томактабӣ Ҳабибаи Амиралӣ дар намуди «Дастхобонӣ» байни калонсолон иштирок намуда, сазовори ҷойи сеюм гардид. Ҳабибаи Амиралӣ бо дипломи Кумитаи кор бо ҷавонон ва варзиши назди ҲҶТ ва аз тарафи маъмурияти коллеҷ бо туҳфаи пулӣ қадрдонӣ гардид.

Аз 03.05 то 05.05 соли 2018 дар шаҳри Кӯлоб марҳилаи ниҳоии Бозиҳои варзишии Ҷумҳурии Тоҷикистон оид ба вазнбардорӣ баргузор гардид. Дар ин мусобиқаи варзишӣ донишҷӯи бахши аввал, ихтисоси математика, факултети табиатшиносӣ Исмонова Натиҷа фаъолона ширкат варзида, сазовори ҷойи аввал гашт.

Барои дар сатҳи зарурӣ таҷлил намудани ҷашни 30 - солагии Истиқлолияти давлатӣ санаи 5-уми сентябри соли равон бо ташаббуси мақомоти иҷроияи ҳокимияти давлатии шаҳри Кӯлоб озмуни «Сурудхони беҳтарин» байни муассисаҳои миёнаи умумӣ, ибтидоӣ, миёна ва олии касбӣ гузаронида шуд. Дар ин озмун донишҷӯёни коллеҷи омӯзгорӣ Абдуллоев Бахтовар ва Нимонова Навбаҳор иштирок намуданд. Донишҷӯ Нимонова Навбаҳор бо гирифтани холи баланд сазовори ҷойи аввал гашт. 

 

Ба ҷойи хулоса

Коллеҷи омӯзгории Донишгоҳи давлатии Кӯлоб ба номи Абӯабдуллоҳи Рӯдакӣ дарахти маърифатест, ки дар шохаҳои он-тахассусҳои ҷудогона меваҳои ширину пурбори маърифат ҷой гирифтааст ва дар радифи дигар мактабҳои миёнаю олии касбии кишварамон рисолати худро дар ҳамин поя шинохтааст ва аз ҳамин пойгоҳ самтҳои фаъолияти илмиву таълимии хешро муайян кардааст. Боварӣ ҳаст, ки ин боргоҳи илму маърифат рисолати таърихии хешро идома дода, минбаъд низ барои соҳаи маорифи кишвар хизматҳои арзанда хоҳад кард. Мо ба ин итминон дорем. Зеро директори коллеҷ, номзади илмҳои филологӣ, Аълочии телевизион ва радиои Тоҷикистон, Аълочии маорифи Тоҷикистон Фарҳод Шафизода дар суҳбат бо мо чунин итминонро дода, гуфтанд: - «Ин даргоҳе, ки ман роҳбарӣ мекунам, барои ман азизу муқаддас аст. Чунки маҳз меҳри омӯзгорӣ аз ин даргоҳ аз дарсҳои устодони таҷрибадор чун Соат Чалишев, Барот Нозимов, Соҷидамо Аккалаева, Аҳмад Алиев, Кимиё Латифова, Майрамбӣ Набиева ҷой гирифт. Кӯшиш ва нерӯи созандаи хешро бо аҳли коллектив баҳри тайёр намудани кадрҳои баландихтисоси соҳаи омӯзгорӣ равона менамоем, то тавонем саҳми арзандаи хешро дар ободию шукуфоии Ватани азиз гузорем ва машъалафрӯзи миллати хеш ва ин даргоҳи муқаддас бошем». 

Марҳамат, ба Муассисаи давлатии таълимии Коллеҷи омӯзгории Донишгоҳи давлатии Кӯлоб ба номи Абӯабдуллоҳи Рӯдакӣ! Рамзи коллеҷ дар Маркази миллии тестии назди Президенти Ҷумҳурии Тоҷикистон 504 аст. 

 

«МТЖТ»

Хонданд 38

Хабари-рӯз

Календар

« Январ 2019 »
Пн Вт Ср Чт Пт Сб Вс
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      

Минбари сардабир

  • ДАВоДАВ

    Масофаи роҳ бо машинае, ки 150 ҳазор доллар нарх дорад…

Нигоҳи хос

  • Баҳонаи зистан

    Мақсад доштан маънои баҳонае барои нафас гирифтанро дорад. Соли 2018…
  • МАСЛИҲАТ

    Аз дидаву шунида Салом, хонандагони гиромии ҳафтаномаи «Фараж»! Мо аз…

Парадокс

Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ...
Гуфтед? Мегӯянд! (№4
Саидмукаррам АБДУҚОДИРЗОДА, раиси Шӯрои уламо - Зиёда аз ин, тавассути тағйиру иловаҳое, ки ба ...
Гуфтед? Мегӯянд! (№3
Бег САБУР, раиси Хадамоти алоқа:- Ман қарорамро бекор накардаам.Танз: Офарин ба Шумо, оғои Бег ...
Гуфтед? Мегӯянд! (№2
Аскар ҲАКИМ, Шоири халқии Тоҷикистон:- Дар замони шӯравӣ мо асареро пайдо намекунем, ки дар ...
Гуфтед? Мегӯянд! (№1
Абдуалим ИСМОИЛЗОДА, раиси шаҳри Қӯрғонтеппа Хонандаи беҳтарин- Кӯшиш мекунам ҳар рӯз лоақал ...

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.