.

Alternative flash content

Requirements

Get Adobe Flash player

Минтақа

Муассисаҳои тандурустии ноҳияи Рашт самти асосии фаъолияти кории худро оид ба хизматрасонии тиббӣ ба аҳолии ноҳия тибқи дастуру супоришҳои Ҳукумати ҶТ, Вазорати тандурустӣ ва ҳифзи иҷтимоии аҳолии ҶТ, мақомоти иҷроияи ҳокимияти давлатии ноҳия ба роҳ монда, аз рӯи нақша-чорабиниҳои мавҷуда фаъолият карда истодааст. Тибқи нақшаи моҳи январи соли равон дар ҷаласаи Шӯрои тиббии Беморхонаи марказӣ, нақшаи ҷаласаҳои шӯрои тиббии Беморхонаи марказии ноҳияи Рашт, Шӯроҳои ҳамоҳангсозии татбиқи барномаҳои миллӣ, маҷлисҳои машваратӣ, комиссияҳо, аз ҷумла комиссияи таҳлили марганҷомӣ, комиссияи машварати тиббӣ тасдиқ карда шудаанд.
Дар ноҳия 6 адад муассисаҳои госпиталӣ фаъолият доранд, ки дорои 366 кат мебошанд. Аз он ҷумла, беморхонаи марказии ноҳия - 1 адад, дорои 226 кат, беморхонаи минтақавӣ - 4 адад, дорои 85 кат, беморхонаи байниноҳиявии бемориҳои руҳӣ воқеъ дар шаҳраки Навобод дорои 60 кат.
Ноҳияи Рашт дар маркази минтақаи Раштонзамин ҷойгир буда, муассисаҳои тандурустии он чун муассисаҳои минтақавӣ ба мардуми панҷ ноҳия ва шоҳроҳи байналмилалии Душанбе-Ғарм-Лахш-Қирғизистон хизмати тиббӣ мерасонанд. Давоми соли 2016 шумораи умумии беморон, ки дар муассисаҳои статсионарӣ табобат гирифтаанд, 4968 нафарро ташкил менамояд, ки ин рақам дар 9-моҳаи соли 2017-ум 3653 нафарро ташкил менамояд. Аз он агар дар соли 2016-ум 3965 нафар дар беморхонаи марказии ноҳия табобат гирифта бошанд, ин рақм дар нӯҳмоҳаи соли 2017-ум 3096 нафарро ташкил менамояд. Сатҳи таваллуд дар 12 моҳи соли 2016-ум 3446 навзодро ташкил менамояд, ки ин рақам дар 9 моҳи соли 2017-ум 2205 таваллуди навзодонро дар бар мегирад. Сол аз сол дар ноҳияи Рашт таваллуди хонагӣ кам шуда, шумораи онҳое, ки таваллудро дар системаи статсионарӣ авло медонанд, зиёд шуда истодааст. Агар дар соли 2016 таваллуди беморхонагӣ нисбат ба соли 2015-ум 5% зиёд шуда бошад, ин рақам дар 9-моҳаи соли 2017-ум 7,7% зиёд шудааст, ки ин аз хизмати арзандаи системаи тандурустии ноҳияи Рашт гувоҳӣ медиҳад. Аз ҷумла, нисбат ба солҳои гузашта таваллудкунӣ 9% зиёд шудааст. Баҳри ҳимояи модару кӯдак дар системаи тандурустии ноҳияи Рашт зиёд корҳо ба сомон расонида шудааст. Аз ҷумла, қатъ кардани таваллуди пеш аз муҳлат ва ё пешгирии таваллудҳои бармаҳал яке аз корҳои асосӣ ба шумор меравад.
Бо мақсади пешгирии бемории кӯдакон рӯзҳои 15-26-уми майи соли ҷорӣ байни кӯдакони синни 1-9-сола рӯзҳои миллии эмгузаронӣ бар зидди бемории сурхча ва гулафшон гузаронида шудааст, ки 99,2%-и кӯдакон эмгузаронӣ карда шудаанд.
Давоми соли 2016-ум 2434 маротиба автомашинаҳои ёрии таъҷилии системаи тандурустии ноҳияи Рашт барои ёрӣ даъват карда шудаанд, ки аз он 31 дафъа барои ёрӣ расонидан ба садамаҳои нақлиётӣ, 17 дафъа барои овардани шахсони заҳролудшуда ва 2320 дафъа барои ёрӣ расонидан ба дигар беморон даъват карда шудаанд. Ин рақам дар 9-моҳаи соли ҷорӣ 1323 даъват ба қайд гирифта шудааст, ки ба 1323 нафар шахсон ёрии таъҷилии тиббӣ расонида шудааст. Аз он 18 дафъа барои ёрӣ расонидан ба садамаҳои роҳу нақлиётӣ, 8 дафъа барои шахсони заҳролудшуда ва 1251 дафъа ба дигар беморон хизмати таъҷилӣ - тиббӣ расонида шудааст. Бадбахтона, ҳоло ҳам автомашинаҳои ёрии таъҷилӣ барои овардани шахсони машруботнӯшида даъват карда мешаванд, ки соли 2016-ум 98 нафар ва дар 9-моҳаи соли ҷорӣ ба 46 нафар шахсони дар ҳолати мастӣ қарордошта хизмати хуби тиббӣ расонида шудааст.
Яке аз самтҳои фаъолияти асосии системаи тандурустӣ - ин ташхис мебошад. Давоми соли 2016 дар шуъбаи озмоишгоҳи клиникӣ ва функсионалӣ 39768 нафар аз ташхис гузаштаанд, ки аз онҳо дар озмоишгоҳҳои клиникӣ 32442 нафар, акси ренгенӣ - 811 нафар, ҳуҷраи ултрасадо - 6908 нафар ва ҳуҷраи даруннигорӣ - 122 нафар аз ташхис гузаронида шудаанд. Ин рақамҳо дар 9-моҳаи соли 2017-ум 59820 нафарро ташкил менамояд, ки аз он дар озмоишгоҳҳои клиникӣ 49320 нафар, акси ренгенӣ - 893 нафар, ҳуҷраҳои ултрасадо - 9513 нафар ва ҳуҷраи даруннигорӣ 263 нафарро ташкил менамояд, ки ин аз хизмати арзанда ва хушсифати кормандони соҳаи тандурустии ноҳияи Рашт гувоҳӣ медиҳад.
Аз рӯи суханони Абдураззоқ ном сокини деҳаи Шаҳринави ҷамоати деҳоти Қалъанаки ноҳияи Рашт, «дар чанд соли пешин минтақаи Рашт маркази даргириҳои гуруҳҳои мусаллаҳи мухолифин бо ҳукумати конститутсионӣ буд. Гуруҳҳои мусаллаҳи мухолифин қариб ки пурра системаи тандурустиро талаву ғорат намуда, тамоми амволи табобатӣ ва беморхонаҳоро вайрону валангор намуда буданд ва табиби бечора барои онҳо заррае қадру қимат надошт. Ин буд, ки қисми зиёди табибон минтақаро тарк намуда, ба дигар минтақаҳо ва дигар давлатҳо рафтанд. Маҳз дастгирии бевоситаи Асосгузори сулҳу ваҳдати миллӣ - Пешвои миллат, Президенти Тоҷикистон, муҳтарам Эмомалӣ Раҳмон сабаб гардид, ки кулли системаи тандурустӣ аз нав барқарор карда шуда, гузашта аз ин, даҳҳо муассисаҳои нави табобативу профилактикӣ ва омӯзишгоҳи беҳтарини тиббӣ на ин ки дар минтақа, балки берун аз он ҳам дар Раштонзамин сохта ба истифода дода шавад. Ин як қадами устувор дар сатҳи боз ҳам бештару хубтар хизмати тиббӣ расонидан ба мардум шуд».
Дар ноҳия шуъбаи таълимии маркази ҷумҳуриявии таълимию клиникии тиби оилавӣ фаъолият дорад, ки то имрӯз 183 нафарро ҳамчун мутахассисони тиби оилавӣ тайёр намудааст. Аз онҳо 12 нафарашон табибон ва 172 нафарашон кормандони миёнаи тиб мебошанд.
Имрӯз дар муассисаҳои тандурустии ноҳия 546 нафар кормандони тиббӣ фаъолият доранд. Аз онҳо 134 нафарашон духтурони маълумоти олидор мебошанд, ки занҳо 30 нафарро ташкил менамоянд. Аз шумораи умумии духтурон 33 нафар духтурони дараҷаи олӣ, 20 нафар дараҷаи 1 ва 18 нафар дараҷаи 2-ро доро мебошанд. Кормандони миёнаи тиб, ки 412 нафарро ташкил менамоянд, аз он 49 нафар дараҷаи олӣ, 66 нафар дараҷаи 1 ва 102 нафар дараҷаи 2-и тахассусиро доро мебошанд, ки ин дар шароити куҳистон яке аз бехтарин нишондодҳо ба шумор меравад.
Баҳри пешгирии бемориҳои паразитӣ тибқи супориши Вазорати тандурустӣ ва ҳифзи иҷтимоии аҳолӣ ба 24990 нафар кӯдакон ҳаби албендазол 400 ройгон тақсим карда шудааст, ки 99,6 фоизи нақшаро ташкил менамояд. Аз тарафи мутахассисони маркази тропикӣ дар муассисаҳои кӯмаки аввалияи тиббии санитарӣ ва беморхонаҳои ноҳия тибқи нақшаи корӣ 14 маротиба сафарҳои санҷишӣ гузаронида шуда, оид ба назорати миллӣ, огаҳӣ, пешгӯии хурӯҷи беморӣ, ташхиси пешакӣ, табобати саривақтӣ, мубориза бар зидди паҳнкунандагони бемории вараҷа ва паразитҳо суҳбатҳо ва мизҳои мудаввар гузаронида шудааст. Дар ноҳия давоми соли 2016-ум 7 маротиба маҷлисҳои шӯрои тиббии ноҳиявӣ гузаронида шудааст, ки ин рақам дар 9 моҳи соли ҷорӣ низ 7 ҷаласаҳо ва маҷлисҳои Шӯрои тиббии ноҳияро ташкил медиҳад.
Ба гуфтаи сартабиби Беморхонаи марказии ноҳияи Рашт Солиҳов Алимаҳмад, «мардуми Раштонзамин аз Пешвои муаззами худ барои сулҳу салоҳ ва амнияти минтақа басо сипосгузоранд. Маҳз оромӣ ва суботу корҳои бунёдкорӣ ва созандагии доҳии тоҷикони ҷаҳон сабаб гардид, ки имрӯз сатҳи хизматрасонии соҳаи тандурустии ноҳияи Рашт то ба он дараҷае боло рафт, ки онро мо дар гузашта дар хоб орзу мекардем. Имрӯз дилхоҳ бемор дар худи муассисаҳои тандурустии ноҳияи Рашт табобати хушсифат гирифта, гузашта аз он, бо потенсиали кадрии худ мо дигар беморони шаҳру навоҳии минтақаро низ ба табобат фаро гирифтаем. Дар ин самт метавон хизмати арзандаи кормандони шуъбаи таваллудхонаи Беморхонаи марказиро номбар кард. Давоми чанд соли охир дар мо фавти модару кӯдак ба қайд гирифта нашудааст. Ман ҳамчун табиб ва ҳамчун роҳбар миннатдории худро ба Пешвои муаззами миллат, доҳии тоҷикони ҷаҳон муҳтарам Эмомалӣ Раҳмон, ба вазири тандурустӣ ва ҳифзи иҷтимоии аҳолии кишвар муҳтарам Олимзода Насим Хоҷа ва ба раиси ноҳияи Рашт муҳтарам Лоиқзода Қаноатшоҳ барои ёрии арзандаашон иброз намуда, онҳоро бовар мекунонам, ки мо кормандони соҳаи тандурустии ноҳияи Раштонзамин омодаи хизмати доимӣ ба мардумем ва чун ворисони Синои бузург ба қасами худ содиқ мемонем».

Саиди Ҳайдар, МТЖТ,
Душанбе-Рашт-Душанбе

ШАРҲИ МО:
Солиҳов Алимаҳмад Маҳмадович 19-уми сентябри соли 1962 дар шаҳраки Навободи ноҳияи Ғарм таваллуд шудааст. Соли 1969 ба мактаби миёнаи №8 рафта, онро соли 1979 бо баҳои аъло хатм намудааст. Солҳои 1979-1985 дар Донишгоҳи давлатии тиббии Тоҷикистон ба номи Сино таҳсил намуда, онро бо ихтисоси духтури бемориҳои қалб хатм намудааст. Солҳои 1985-86 интернатура дар беморхонаи клиникии №2-и шаҳри Душанбе, солҳои 1986-88 духтури минтақавӣ дар поликлиникаи марказии ноҳияи Ғарм, солҳои 1988-89 духтури бемориҳои қалб дар поликлиникаи марказӣ, солҳои 1989-91 мудири шуъбаи реаниматсия дар Беморхонаи марказии ноҳияи Ғарм, солҳои 1991-93 муовини сардухтури ноҳия оид ба комиссияи машваратии тиббӣ, солҳои 1993-2015 сартабиби Беморхонаи минтақавии шаҳраки Навободи ноҳияи Рашт, аз моҳи апрели соли 2015 то ин ҷониб сартабиби Беморхонаи марказии ноҳияи Рашт. Аълочии тандурустии ҶТ, дорандаи медали «Шафқат», духтури дараҷаи олӣ, роҳбар ва оиладори намунавӣ, падари 6 фарзанд, ки аз онҳо 2 нафарашон табибанд.

Хонданд 390

Агарчи аз охирон дастури раиси шаҳри Панҷакент Ислом Зиёзода оид ба таҳияи хати сайр ва партовгоҳ дар охирон нишасти матбуотӣ се моҳ сипарӣ мешавад, вале ин дастур то кунун ба иҷро нарасидааст. 

Иҷро нашудани супориши раиси шаҳр боиси нигаронии сокинони маҳаллаи Навбунёд гардидааст. Онҳо мегӯянд, агарчи қариб 20 сол мешавад, ки дар ин маҳалла ҳудуди 500 хоҷагӣ умр ба сар мебаранд, вале на хатисайр мавҷуд асту на партовгоҳ. Аз ин хотир, онҳо маҷбуранд ҳар субҳ то ба масири асосии шаҳр ҳудуди 1,5-2 км роҳро пиёда тай намоянд ва баъд аз он тавассути хатсайрҳои кӯчаи асосӣ паси кори хеш раванд. Ҳамчунин, онҳо бинобар набудани партовгоҳ дар маркази маҳалла маҷбур будаанд, ки ҳамарӯза масофаи беш аз 2 километрро тай намуда, партовҳояшонро дар партовгоҳи ягонаи назди биноҳои баландошёна оварда партоянд.
Як тан аз сокинони ин маҳалла, ки нахост номаш ифшо шавад, мегӯяд, беш аз 10 сол аст, ки дар ин маҳалла иморат сохтаву зиндагӣ мекунад.- Ман як чизро намефаҳмам,- мегӯяд ӯ,- вақте ки ба мо ин заминҳои наздиҳавлигиро тақсим карда доданд, барои бунёди роҳ, хати оби нӯшокӣ, барқ ва ташкили хати сайри мошинҳои мусофиркашон аз мо маблағҳои ҳангуфт гирифтанд ва мутасаддиёни кумитаи заминсозӣ ва ҳамчунин идораҳои вежае, ки ин заминҳои наздиҳавлигиро ба нақша гирифтаву онро гӯё тахту ҳамвор намудаанд, ваъда карда буданд, ки дар кӯтоҳтарин муддат тамоми коммуникатсияҳои дар боло номбаршударо дар ин маҳалла ташкил менамоянд. Аз ин ваъдаҳо ҳудуди 20 сол ҳам сипарӣ шуд. Мо бошандагон худамон аз сари нав маблағ ҷамъ кардаву хати барқу обу роҳро ташкил намудем. Дар ин муддат се раиси ҳукумат бадал шуданд. Ҳар кадоме, вақте муроҷиат мекардем, мегуфтанд, ки «дар кӯтоҳтарин муддат ин пешниҳодҳои шумо оид ба партовгоҳ, хати сайр ва гузоштани трансформатори баландшиддат ба иҷро мерасад». Баъд ба дастандаркорону муовинони хеш супоришҳо медоданд. Онҳо дастҳо пеши бар дар китобчаҳояшон ин гуфтаҳои раисони шаҳрро навишта мегирифтанду «хуб, иҷро мекунем» мегуфтанд. Чун ба берун мерафтанду китобчаашонро мепӯшиданд, ин гуфтаҳо ҳам дар дохили ин китобча моҳҳову солҳо боқӣ мемонду ба иҷро намерасид.
Ба гуфтаи сокинон, чунин будааст рафтори масъулону роҳбарон нисбати мушкилоти мардум.
Ахиран раиси шаҳри Панҷакент Ислом Зиёзода замоне, ки аз ҷониби рӯзноманигорон роҷеъ ба ин мушкилоти сокинони ин маҳалла ва арзи онҳо дар нишасти матбуотӣ ёдовар шуд, ба муовини аввали хеш М. Сафарзода ва масъулони дигар супориш дод, ки дар муҳлати як ҳафта ин мушкилотро дида баромада, ҳаллу фасл намоянд. Ҷаноби Сафарзода баъди як ҳафтаи сипаришуда дар нишасти матбуотие, ки бо кормандони соҳаи саноату хадамот баргузор гардид ва рӯзноманигорон чун оид ба ҳалли ин дастури раис, ки чаро иҷро нашуд, пурсон шуданд, гуфт, ки «бинобар набудани ҷой барои партовгоҳ, бигзор мардуми ин маҳалла дар он партовгоҳе, ки то ба имрӯз партов мерезанд, оварда рехтан гиранд». Ба қавли ӯ, 2 км чандон масофаи зиёд нест ва барои мардум ин масофа «ҳеҷ душворие пеш намеорад». Ба гуфтаи ин ҷаноб, гӯё замоне, ки ӯ дар шаҳри Чкаловски вилояти Суғд ифои вазифа менамудааст, мардуми онҷо то ба масофаи беш аз 3 км партовҳояшонро оварда мерехтаанд ва барои онҳо ин амал ҳеҷ мушкиле надоштааст. Нисбати хати сайр бошад, оқои Сафарзода гуфт, ки шахсан худаш машғул мешаваду хати сайрро ташкил менамояд. Ӯ мушаххасан нагуфт, ки кай ин корро амалӣ мекунаду хати сайр ташкил мешавад. Чунин буд муносибати муовини аввал нисбати супориши раиси шаҳр ва ҳалли мушкилоти мардум.
Ба гуфтаи сокинони маҳалла, ин мушкилот зиёда аз 10 сол аст, ки идома дораду касе то ба имрӯз онро ҳаллу фасл намекунад. Мо вақте ин арзи мардумро дар мақола навишта мекардем, ба хулосае омадем, ки шояд баъди хондани ин мавод роҳбарони шаҳри Панҷакенту кормандони масъул ин мушкили мардумро ҳаллу фасл намоянд?! Ё нишасти матбуотии дигарро мунтазир мешаванд, ки рӯзноманигорон боз аз мушкилот ёдовар шаванд?

Бибиҷон АШӮРОВА, Панҷакент,
махсус барои «Фараж»

Хонданд 639

Боз Ализода...

Окт 07, 2017
Хонданд: 395

МИҲД-и шаҳри Хуҷанд ва вилояти Суғд бозичаи дасти судя Эраҷ Ализодаанд?

Дар Суди шаҳри Хуҷанд аризаи даъвогии Зокирова Д. Ҷ., сокини шаҳри Хуҷанд, оид ба бекор кардани қарори раиси шаҳри Хуҷанд таҳти №409 аз 05.06.2015 “Дар бораи дигар намудани мақсади истифодаи замин ва вобаста намудан” ба масоҳати умумии 1109,8 м.м. ба шаҳрванд Яқубов Х. Ф. ба имзо расида, бо Сертификати ҳуқуқи истифодаи замин аз 27.08.2015 №2565 таъмин шудааст, ба баррасӣ гузошта шуд. Талаби даъвогар аз он иборат буд, ки гӯё ин қарори раиси шаҳр, ки ба шаҳрванд Яқубов Х. Ф. соҳибмулки замини собиқ қаҳвахонаи “Равшан” ва “Гармхона” мебошад, иҷозаи сохтмони 9-ошёна додааст, ки он ба рафти корҳои сохтмонии ӯву ҶДММ “Диёри Хуҷанд”, ки шартномаи ҳамкорӣ бастаанд, монеъ мешавад. Ҳамчунин, онҳо ба суд даъво пеш овардаанд, ки ин қарори раиси шаҳр барои даъвати сармоягузор барои сохтмони маҷмааи тасдиқшуда монеа эҷод карда, ба онҳо зарар мерасонад ва он бояд бекор карда шавад.
Ин даъвои ӯву ҶДММ “Диёри Хуҷанд”-ро судя Ализода Эраҷ амиқ ва ҳаматарафа наомӯхта, санаи 27.09.2017 қарор баровард, ки аз чанд ҷиҳат хилофи қонуну хилофи мантиқ мебошад.
Судя Эраҷ Ализода бояд ҳама ваҷҳҳои дар парванда ҳамроҳшударо дуруст меомӯхт, ки наомӯхт. Судя ҳатто маълум накард, ки тибқи қарори раиси шаҳри Хуҷанд аз 19.06.2015 таҳти №440 ба ҶДММ “Диёри Хуҷанд” барои сохтмони бинои истиқоматии 12-ошёна бо маркази савдо дар хиёбони И. Сомонии шаҳри Хуҷанд танҳо ба масоҳати умумии 656,0 м.м. иҷоза дода шудаасту халос. Ва ҶДММ ”Диёри Хуҷанд” барои анҷом додани корҳои сохтмонӣ дар кӯчаи Зариф ва Солеҳ Раҷабовҳо дар ҳудуди собиқ қаҳвахонаи “Равшан” ва “Гармхона” ягон ҳуҷҷати ҳуқуқмуайянкунандаи соҳибмулкӣ надорад. Ҳол он ки, дар атрофи ин кӯчаҳо иншооти давлатии Раёсати Донишгоҳи давлатии Хуҷанд ба номи академик Б. Ғафуров, Идораи палатаи савдо ва саноати вилояти Суғд ва бонки “Имон интернешнл”, меҳмонхонаҳои “Ваҳдат”, “Хуҷанд”, қаҳвахонаи “Хони Хуҷанд” ва хонаҳои истиқоматии сокинон воқеанд ва чи гуна мешавад ба ҷои 656,0 м.м. масоҳати барои сохтмон иҷозашуда дар кӯчаи И. Сомонӣ, замини ин идораҳои давлатиро, ки дар кӯчаи дигар воқеанд, гирифту бинои истиқоматии ошёнадор сохт?
Тибқи тартиби муқаррарнамудаи қонун иҷрои сохтмон танҳо бо иҷозаи мақомоти маҳалии ҳокимияти давлатӣ ва идораҳои дахлдори он ба сохтмон сурат мегирад.
ҶДММ “Диёри Хуҷанд” барои иҷрои сохтмон дар кӯчаҳои Зариф ва Солеҳ Раҷабовҳои Хуҷанд ягон ҳуҷҷати расмӣ аз мақомоти ҳокимияти давлатии шаҳри Хуҷанд надорад.
Чизе, ки ба Шӯрои шаҳрсозии Кумитаи меъморӣ ва сохтмони назди Ҳукумати Ҷумҳурии Тоҷикистон аз ҷониби ҶДММ “Диёри Хуҷанд” ба баррасӣ гузоштааст, ангораи шаҳрсозӣ аст, ки он маънои дақиқи иҷозат ба сохтмонро доро буда наметавонад. Ҳатто дар посухи расмӣ доир ба додани хулосаи мусбат барои сохтмони шаҳрванд Яқуб Х. Ф. №2 / 17 12 аз 31.07.2017 Кумитаи меъморӣ ва сохтмони назди Ҳукумати Ҷумҳурии Тоҷикистон ба ҶДММ “Диёри Хуҷанд” расонидааст, ки “бояд қайд намуд, ки лоиҳаи ангоравии Нақшаи муфассали маҳали аҳолинишин ва нақшаи иморатсозии як қисми кӯчаҳои И. Сомонӣ, Зариф ва Солеҳ Раҷабовҳо, Мавлонбек ва Фирдавсии шаҳри Хуҷанд дар Шӯрои шаҳрсозии Кумита санаи 11-уми марти соли 2015 №3 қобили қабул ҳисобида шуда, барои тасдиқ ба Маҷлиси вакилони халқи шаҳри Хуҷанд пешниҳод карда шудааст. Нақшаи тасдиқшуда ҳуҷҷати асосии шаҳрсозӣ ба ҳисоб рафта, сохтмони бинову иншоот бояд дар асоси нақшаи мазкур ва талаботҳои меъёру қоидаҳои шаҳрсозӣ (МҚШ ҶТ 30.01.2015 Шаҳрсозӣ, банақшагирӣ ва бунёди маҳалҳои аҳолинишин) ба роҳ монда шавад. Аз ин рӯ, Кумита бунёди бинову иншоотро танҳо дар доираи нақшаи тасдиқшуда ба мақсад мувофиқ меҳисобад”.
Заминистифодабаранда Яқубов Х. Ф. дорои Сертификати ҳуқуқи истифодаи замин ба масоҳати 1109, 8 м.м. барои сохтмони бинои 9-ошёна ва маркази хизматрасонӣ бо таваққуфгоҳи нақлиёти сабукрав мебошад, ки санаи 27.07. 2015 аз тарафи Кумитаи идораи замини шаҳри Хуҷанд таҳти №2565 дода шудааст.
Аз тарафи Раёсати экспертизаи давлатии ғайриидоравӣ ҳуҷҷатҳои лоиҳавии шаҳрсозии Кумитаи меъморӣ ва сохтмони назди Ҳукумати Ҷумҳурии Тоҷикистон ба лоиҳаи кории фармоишгар Яқубов Х. Ф. санаи 28.12.2016 хулосаи мусбат дода шудааст.
Санаи 29.05.2017 аз ҷониби шуъбаи меъморӣ ва шаҳрсозии шаҳри Хуҷанд ва ҳам вилояти Суғд ба Яқубов Х. Ф. барои пешбурди корҳои сохтмонӣ иҷозат дода шудааст.
Ализода Эраҷ, судяи Суди шаҳри Хуҷанд ҳангоми баррасии аризаи даъвогии Зокирова Д. Ҷ. ва ҶДММ “Диёри Хуҷанд” натанҳо ба дурусту қонунӣ будани кори сохтмонӣ аҳамият надодааст, балки пешниҳоди ҳама идораҳои давлатӣ, сар аз шӯъбаи меъморӣ ва шаҳрсозии шаҳри Хуҷанд, то пешниҳоди муовини раиси вилояти Суғд Анвар Яқубӣ ва пешниҳоди Кумитаи меъморӣ ва сохтмони назди Ҳукумати Ҷумҳурии Тоҷикистонро ба сифр баробар донист?! Агар не, яке аз пешниҳоди чунин ниҳодҳоро меомӯхт ва хулосаи мантиқан дуруст мебаровард.

“ФАРАЖ”

P. S. Дар маркази шаҳри Хуҷанд ба мушкил печидани иҷрои кори сохтмонӣ аҷиб аст. Бинобар ин, “Фараж” барои таҳқиқи ин мавзуи судӣ дар оянда низ талош хоҳад кард.

Хонданд 395

Дар партави сиёсати хирадмандона ва дастуру супоришҳои сарвари давлат Эмомалӣ Раҳмон оид ба вусъат бахшидани корҳои ободониву бунёдкорӣ, аз моҳи марти соли 2016 то ҳол дар “Фурудгоҳи байналмилалии Хуҷанд” корҳои зиёди ободониву бунёдкорӣ ба анҷом расидаанд. То имрӯз биноҳову иншооти гуногуни фурудгоҳ азнавсозӣ шуда, он рӯз ба рӯз шукуфтаву ба як гӯшаи ҷолибу зебо ва замонавӣ табдил ёфта истодааст.
Баробари директори генералии “Фурудгоҳи байналмилалии Хуҷанд” таъйин шудани Қурбони Алимардон аз 22-юми феврали соли 2016 корҳои ободониву бунёдкорӣ вусъати тоза гирифтанд. Корҳо аз баровардани партовҳои солҳои тӯлонӣ хобида оғоз шуда, биноҳои куҳнаву шикаста барқарор гардиданд ва таъмири биноҳои хоҷагии фурудгоҳ оғоз ёфт.
Дар муддати кӯтоҳ ҳудуди аэродроми фурудгоҳ аз алафу буттаҳои худрӯй ба масоҳати беш аз 90 000 метри квадратӣ бо таври дастӣ ва истифодаи техникаи махсус тоза карда шуда, инчунин барои бемамониат гузаштани об ҷӯйбору обравҳои минтақаи мазкур ба масофаи 4119 метри квадратӣ тоза ва тармим гашта, деворҳои ҳудуди фурудгоҳ, ки беш аз 10 км дарозӣ доранд, низ таъмир ва аз сари нав сафед гаштанд.
Майдони фурудгоҳ, истгоҳи ҳавопаймоҳо, ки зиёда аз 35 сол таъмир нашуда буданд, бо сарфи 23000 тонна асфалти хоси майдонҳои фурудгоҳӣ мумфарш карда шуданд. Барои истгоҳи нави тайёраҳои меҳмонони воломақом, ки масоҳаташ 4200 м/кв аст, 2700 тонна асфалт масраф гардидааст.
Имрӯзҳо натанҳо майдонҳои ҳавоӣ, балки кӯчаҳои ҳамшафати фурудгоҳ низ таъмир ва аз сари нав мумфарш карда шудаанд. Барои амалисозии корҳои мазкур заводи мум ва бетони фурудгоҳ аз оғози кор то ҳол аз субҳ то шом барои фурудгоҳ асфалт истеҳсол мекунад.
Ҳар нафаре, ки имрӯз аз назди фурудгоҳ мегузарад, мебинад, ки он чи тавр симои зоҳирии худро дигар кардааст ва ба як макони зебову истироҳатӣ бадал шудааст. Дар радифи корҳои ободонӣ, Қурбони Алимардон дар муддати кӯтоҳ тавонист ба бунёди терминали наву муосир, ки ҷавобгӯй ба талаботҳои байналмилалӣ аст ва тарҳи он дар хориҷа омода шудааст, шуруъ намояд. Сохтмони бинои нав босуръат идома дошта, қисми берунаи аэровокзал дар ҳоли анҷомёбист. Азнавсозии бинои аэровокзали фурудгоҳ то ба имрӯз аз ҳисоби маблағҳои худи корхона ба амал бароварда шуда истодааст.
Сохтмони бинои аэровокзали марказии фурудгоҳ мутобиқи стандартҳои байналмилалӣ ва талаботҳои замони муосир аз моҳи майи соли гузашта роҳандозӣ шуда, баъд аз ба истифода додан метавонад дар як соат ба 400 мусофир хизмат расонад.
Мутобиқи нишондиҳандаҳои тарҳи нави бинои мазкур, аэровокзал ба 30х64 метр аз тарафи пеш ва 36х64 аз тарафи перрон васеъ карда шуда, тахминан 14 метр баландӣ хоҳад дошт. Мутобиқи лоиҳа аз ду кунҷи тарафи перрон ду галерея бо дарозии 12 метр ва 4 зинаи телескопӣ барои ҳавопаймоҳои калонҳаҷми тамғаи «Аэробус А320» ва «Боинг 767-300» васл карда мешавад. Дар айни замон корҳои сохтмонию васлкунӣ дар иншооти мазкур идома доранд.
Бо мақсади наздик намудани роҳи мошингард ба аэровокзали фурудгоҳ, роҳи даврӣ сохта ба истифода дода шудааст, ки масоҳати 5900 метри квадратиро ташкил медиҳад. Барои ин кор 1174 тонна асфалт масраф гардид. Имрӯзҳо барои кашонидани бору бағоҷи мусофирон 100 адад аробачаҳои замонавӣ муҳайё карда шуда, кори мусофирон боз ҳам осон карда шудааст.
Истгоҳи нақлиёт, ки пештар дар ихтиёри соҳибкорони инфиродӣ дар иҷора қарор дошт, ба фурудгоҳ бозгардонида шуда, дар масоҳати 3510 м/кв асфалтпӯш карда шудааст, ки 501 тонна асфалт масраф гардидааст.
Роҳи протоколӣ дар масоҳати 2496 м/кв васеъ ва рост карда шуда, 376,81 тонна асфалт хобонида шудааст. Дар қади роҳи протоколӣ чароғҳои шабафрӯз қомат афрохта, минтақаи мазкурро боз ҳам зебо ва шабҳангом рушан гардонидаанд. Дар даромади толори вакилони расмӣ панҷараҳои оҳанини замонавӣ дар масоҳати 282,5 м/кв васлу насб карда шуданд. Дар масоҳати 409 м/кв плиткаи пайроҳавӣ (брусчатка) шинонида шудааст. Боми бинои толори вакилони расмӣ аз нав таъмир карда шуда, бино барои қабул ва гусели меҳмонони воломақом пурра аз таъмир бароварда шудааст.
Бо мақсади таъмини бехатарӣ, аз нав сохтан ва мустаҳкам кардани деворҳои гирдогирди ҳудуди фурудгоҳ дастгоҳи истеҳсоли хишти блок дастрас ва васлу насб карда шудааст, ки дар як рӯз 650-700 дона хишт истеҳсол мекунад. Аз ҷониби бинои «СIР»-толори ҶСП «Тоҷик Кейтеринг Сервис» то нуқтаи назоратию рухсатдиҳӣ дар масофаи тақрибан 200 метр деворҳои бетонӣ сохта шудааст.
Бинои маъмурияти фурудгоҳ пурра навсозӣ карда шуда, боми бинои мазкур пурра аз нав сохта ва тарҳи нави бино бо масолеҳи алкопон ороиш дода шудааст. Айни замон дар ошёнаи сеюми бинои маъмурият корҳои сохтмонӣ босуръат идома доранд.
Толори маҷлисгоҳи фурудгоҳ, ки зиёда аз 40 сол таъмири пурраро надида, сақфу фарши он корношоям гардида буд, пурра навсозӣ карда шуда, бо курсиҳои замонавӣ, фарши гарм ва дигар шароитҳои дахлдор муҷаҳҳаз гардонида шудааст. Бинобар эълон гардидани соли 2017 чун “Соли ҷавонон” ба толори нави фурудгоҳ «Толори ҷавонон» ном гузоштаанд. Маҳз бо ташаббус ва талошҳои пайвастаи роҳбари фурудгоҳ дар радифи корҳои ободонӣ ва бунёдкорӣ биное, ки дар шафати толори вакилони расмӣ, ки солиёни зиёд бекор мехобид, таҷдиду муҷаҳҳаз гардонида шуда, ба ифтихори “Соли ҷавонон” тарабхонаи Ҷавонон номгузорӣ карда шуд.
Роҳбарияти фурудгоҳ баробари ободу зебо кардани биною роҳҳо ва гулгаштҳои назди он ба бехатарӣ ва осон кардани низоми парвозу нишасти тайёраҳо аҳамияти ҷиддӣ медиҳад. Аз 5-уми сентябр дар аэродроми ҶСК "Фурудгоҳи байналмилалии Хуҷанд" таҷҳизоти нави рӯшноидиҳӣ ва огоҳкунӣ мавриди истифода қарор дода шуд. Таҷҳизоти мазкур мутобиқ ба талаботи дараҷаи 1-уми ИКАО (Ташкилоти байналхалқии авиатсияи гражданӣ) буда, имкон медиҳад, ки фурудоӣ ва парвози ҳавопаймоҳо дар аэродроми фурудгоҳи Хуҷанд дар вақти шабона бо сифати баланд ба амал бароварда шавад. Васлу насби чароғҳои шуояшон баланд дар хати парвозу фурудоии аэродроми Фурудгоҳи байналмилалии Хуҷанд дар доираи татбиқи Лоиҳаи "Таҷдид ва муҷаҳҳазгардонии техникии аэродроми фурудгоҳи Хуҷанд" амалӣ гардида, корҳо дар ҳамдастӣ бо ширкати русиягии "Радар Га" бо тариқи тендер ва дар асоси шартномаи дуҷониба аз 20-уми майи соли 2016 оғоз гардида, санаи 1-уми июни соли 2017 ба итмом расонида шудаанд.

Насибаи ХУҶАНДӢ

Хонданд 518

Хабари-рӯз

Календар

« Ноябрь 2018 »
Пн Вт Ср Чт Пт Сб Вс
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    

Минбари сардабир

  • симКАРта

    Дар ҳафтае, ки гузашт, дар шабакаҳои иҷтимоӣ ин калима аз…

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.