.

Alternative flash content

Requirements

Get Adobe Flash player

Минтақа

Ё чаро «Агроинвестбонк» ҳатто ба мизоҷони бемораш маблағи пулие намедиҳад?

Чанде пеш дар назди даромадгоҳи филиали ҶСК «Агроинвестбонк» дар шаҳри Панҷакент бо сокини ноҳияи Панҷакент Наврӯзова Бибинисо рӯ ба рӯ шудам, ки дар даст коғазҳои бисёре бо ҳоли хароб нишаста буд. Вақте аҳволпурсӣ кардам, гуфт:

- Ба бемории гепатити вируси В гирифтор шуда, дар беморхонаи сироятии шаҳри Панҷакент бистарӣ шудам. Чун маблағе барои табобат надоштам, бо умеде бо ариза ба раиси ҶСК «Агроинвестбонк» Муродалӣ Алимардон ва ба сардори филиали ин бонк дар шаҳри Панҷакент Аҳроров М. С. муроҷиат намудам, то ақаллан барои табобатам аз депозити худам ба ман маблағе ҷудо намоянд. Дар баробари ариза нусхаи маълумотномаро аз беморхонае пешниҳод кардам, ки дар он хобида будам ва табобат мегирифтам. Сабаби ба ариза замима кардани маълумотномаи духтур он буд, ки масъулини бонк ба аризаам беэтиноӣ накунанд ва чун бемориам вазнину сироятӣ аст, бароям фавран маблағи пулӣ ҷудо намоянд. Дар ариза аз ҷумла навиштам, ки «муҳтарам Муродалӣ Алимардон! Аз рӯзи 17.09.2017 бо бемории вазнине дар табобатхона бистариаму ҳатто барои харидории дорувориҳоям наметавонам маблағ ёбам ва зиёд қарздор шудаам. Бинобар ин, бевосита ба Шумо муроҷиат намуда, ба арзи Шумо мерасонам, ки ба кӯмаки фаврии пулӣ сахт ниёз дорам».
Инак, аз аризаи ман 20 рӯз гузашт, аз шифохона баромадам, вале ин «кӯмаки фаврӣ» то ҳол ба дарозо тӯл мекашаду масъулини беинсофи бонк бароям як сомонӣ ҳам ҷудо намекунанд.
- Алъон чӣ ҳод доред? Аз шифохона ҷавоб доданд?
- Бале, ҷавобам доданд. Аммо гепатити В (зардпарвин) бемориест, ки бояд 50 рӯз зери назорати духтурон бошӣ ва дору истеъмол куниву дармонро идома диҳӣ. Алҳол на пуле барои харидани доруворӣ дорам, ки табобатро давом диҳам, на имконияти сафар ба Душанбе, ки фарзанди беморамро низ барои ташхис барам.
- Ба муроҷиататон дар бонк чӣ ҷавоб доданд? Оё ба Шумо ягон ҷавоби расмӣ пешниҳод карданд?
Наврӯзова нусхаи ҷавоберо нишон дод, ки бо имзои муовини раиси «Агроинвестбонк» Исмоилова М. Н. ба воситаи почта ба ӯ ирсол кардаанд. Дар он навишта шудааст: «Бояд қай кард, ки давомёбии буҳрони молиявӣ таъсири худро ба низоми бонкии кишвар, аз ҷумла ҶСК «Агроинвестбонк» расонидааст, ки дар натиҷа фаъолияти субъектҳои хоҷагидориро суст гардонида, сабаби зиёд шудани қарзҳои ғайрифаъол ва паст гардидани сатҳи қарзадокунии мизоҷон гаштааст. Вале ба ин нигоҳ накарда, бонк кӯшиш намуда истодааст, ки дар доираи шароиту имконияти ҷойдошта, уҳдадории худро дар назди мизоҷон иҷро намояд. Аз ин лиҳоз, дархости Шумо мувофиқи ҷадвали пардохтҳое, ки аз тарафи филиали бонк дар шаҳри Панҷакент ба нақша гирифта шудааст, ба қайд гирифта шуда ва дар доираи имконият марҳила ба марҳила ба роҳ монда мешавад».
- Хайр, дар навбат мондаанд-ку! Ин маънои онро дорад, ки ба Шумо ягон рӯз (солу моҳаш маълум нест) ва дар доираи имконият маблағ медиҳанд, вале алҳол ҳамин гуна имкониятро бонк надоштааст ва кай чунин имконият пайдо мешавад ва ё чунин имконият пайдо мешавад ё не, инашро худо медонад.
- То он вақт агар ман худро табобат карда натавониста, ба ҳалокат расам чӣ? Ё ба кӯдаки беморам зиёне расад чӣ?,- гӯён, оби чашмашро пок карда, суханашро ҷамъбаст намуд ҳамсуҳбатам.
Ӯро аз ин ҳолат бароварданӣ шуда, бо шӯхӣ гуфтам:
- Не, не, намуред! Агар худо накарда муред ҳам, ба қавли устод Сайёф «Алимардон ба тобутпулӣ ҳам чизе намедиҳад».
Хулас, аз суҳбат маълум шуд, ки натиҷаи сарсониҳои Наврӯзова бенатиҷа анҷом ёфта, «Агроинвестбонк» на дар давраи дар беморхона хоб буданаш ва на баъди аз шифохона баромаданаш ҳанӯз ба ӯ ҳатто як сомонӣ ҳам надодааст. Сардори раёсати филиали бонк дар Панҷакент Аҳроров М. С. ҳамеша аз ӯ мегурезад ва ба ҷои ӯ котибааш ҳамеша як хел ҷавоб медиҳад: «Раис назди қарздорҳо ба ҷустуҷӯи пул рафтанд».
Лекин, хушбахтона, дар шаҳри Панҷакент доруфурӯшҳои шинос ба ҳоли ӯ раҳм карда, дорувориҳоро нася додаанд, то табобат гирад. Агар доруфурӯшҳо барояш дорувориҳоро нася намедоданд, ба қавли худаш, «ба умеди пули «Агроинвестбонк» мемурдам…».
Наход имрӯз вазъи ҶCК «Агроинвестбонк» ба ҳамин дараҷае расида бошад, ки ҳатто ба мизоҷони бемор, бемороне, ки мубталои бемории сироятиву вазнин гардидаанд ва ба табобати фаврӣ ниёз доранд, аз пасандози худи онҳо як кӯмаке карда натавонад? Чаро «Агроинвестбонк» дар чунин ҳолатҳо аз «Тоҷиксодиротбонк» ибрат намегирад? То ҷое огоҳем, «Тоҷиксодиротбонк» дар чунин ҳолатҳо новобаста ба вазъи душвори худ, аз хазина якбора то 3 ҳазор сомонӣ ҳам пули нақд медиҳад ва ҳам ба корти пластикиашон пул мегузаронад, ки ҳар рӯз аз он то 200 сомонӣ гирифта тавонанд.
Овозаҳое мавҷуданд, ки вазъи «Агроинвестбонк» имрӯз на беҳтар аз «Фононбонк»-у «Тоҷпромбонк» аст. Наход «Агроинвестбонк»-ро ҳам муфлис эълон кунанд?
Дар суҳбат бо банда яке аз масъулини «Агроинвестбонк» ба шарти наовардани номаш иброз дошт, ки ин бонк воқеан дар вазъи шадиди буҳронӣ қарор дорад ва эҳтимоли муфлис эълон карданаш низ вуҷуд дорад. Худи ҳамин муроҷиати мизоҷи бемор ва ба ӯ «дар доираи имконият» ҷудо накардани як маблағи ночиз гувоҳ аз он аст, ки ин бонк дар ҳолати хеле бад қарор дорад ва фарзияи муфлисшавиро тасдиқ мекунад.
Субҳон Мирзоалиев, корманди ҳамин бонк дар суҳбат бо банда иброз дошт, ки вазъи филиали «Агроинвестбонк» дар Панҷакент барои он аз ҳама вазнинтар аст, ки ин филиал аз ҳама бештар амонатгузор дорад.
Ин маънои онро дорад, ки сокинони Панҷакент аз ҳама бештар ба ин бонк бовар кардаву ҳама буду нобуди худро дар ин бонк пасандоз кардаанд ва маҳз ҳамин боварии онҳо имрӯз дарди сари онҳо шудааст. Ба фикри ман, агар Ҳукумати Ҷумҳурии Тоҷикистон фавран тақдири ин бонкро мавриди баррасӣ қарор дода, ба он кӯмак накунад, вазъ аз ин ҳам бадтар хоҳад шуд. Ҳукуматро зарур аст, ки ба воситаи Бонки миллӣ ба «Агроинвестбонк» фавран кӯмак кунад, ки ҳар моҳ ба андозаи муайян барои мизоҷон як маблағе ҷудо намояд, ҳатто агар ин маблағ хеле ночиз ҳам бошад. Охир, магар беинсофӣ аз ин бештар мешавад, ки дар бонк пул дошта бошиву дар рӯзҳои сахти ба сарат омада, ҳатто барои табобат 100 доллар бароят надиҳанд!? Ин воқеан даҳшат аст!

Холиқи МУҲАММАДНАЗАР,
Душанбе-Панҷакент-Душанбе

Хонданд 1564

Муассисаҳои тандурустии ноҳияи Рашт самти асосии фаъолияти кории худро оид ба хизматрасонии тиббӣ ба аҳолии ноҳия тибқи дастуру супоришҳои Ҳукумати ҶТ, Вазорати тандурустӣ ва ҳифзи иҷтимоии аҳолии ҶТ, мақомоти иҷроияи ҳокимияти давлатии ноҳия ба роҳ монда, аз рӯи нақша-чорабиниҳои мавҷуда фаъолият карда истодааст. Тибқи нақшаи моҳи январи соли равон дар ҷаласаи Шӯрои тиббии Беморхонаи марказӣ, нақшаи ҷаласаҳои шӯрои тиббии Беморхонаи марказии ноҳияи Рашт, Шӯроҳои ҳамоҳангсозии татбиқи барномаҳои миллӣ, маҷлисҳои машваратӣ, комиссияҳо, аз ҷумла комиссияи таҳлили марганҷомӣ, комиссияи машварати тиббӣ тасдиқ карда шудаанд.
Дар ноҳия 6 адад муассисаҳои госпиталӣ фаъолият доранд, ки дорои 366 кат мебошанд. Аз он ҷумла, беморхонаи марказии ноҳия - 1 адад, дорои 226 кат, беморхонаи минтақавӣ - 4 адад, дорои 85 кат, беморхонаи байниноҳиявии бемориҳои руҳӣ воқеъ дар шаҳраки Навобод дорои 60 кат.
Ноҳияи Рашт дар маркази минтақаи Раштонзамин ҷойгир буда, муассисаҳои тандурустии он чун муассисаҳои минтақавӣ ба мардуми панҷ ноҳия ва шоҳроҳи байналмилалии Душанбе-Ғарм-Лахш-Қирғизистон хизмати тиббӣ мерасонанд. Давоми соли 2016 шумораи умумии беморон, ки дар муассисаҳои статсионарӣ табобат гирифтаанд, 4968 нафарро ташкил менамояд, ки ин рақам дар 9-моҳаи соли 2017-ум 3653 нафарро ташкил менамояд. Аз он агар дар соли 2016-ум 3965 нафар дар беморхонаи марказии ноҳия табобат гирифта бошанд, ин рақм дар нӯҳмоҳаи соли 2017-ум 3096 нафарро ташкил менамояд. Сатҳи таваллуд дар 12 моҳи соли 2016-ум 3446 навзодро ташкил менамояд, ки ин рақам дар 9 моҳи соли 2017-ум 2205 таваллуди навзодонро дар бар мегирад. Сол аз сол дар ноҳияи Рашт таваллуди хонагӣ кам шуда, шумораи онҳое, ки таваллудро дар системаи статсионарӣ авло медонанд, зиёд шуда истодааст. Агар дар соли 2016 таваллуди беморхонагӣ нисбат ба соли 2015-ум 5% зиёд шуда бошад, ин рақам дар 9-моҳаи соли 2017-ум 7,7% зиёд шудааст, ки ин аз хизмати арзандаи системаи тандурустии ноҳияи Рашт гувоҳӣ медиҳад. Аз ҷумла, нисбат ба солҳои гузашта таваллудкунӣ 9% зиёд шудааст. Баҳри ҳимояи модару кӯдак дар системаи тандурустии ноҳияи Рашт зиёд корҳо ба сомон расонида шудааст. Аз ҷумла, қатъ кардани таваллуди пеш аз муҳлат ва ё пешгирии таваллудҳои бармаҳал яке аз корҳои асосӣ ба шумор меравад.
Бо мақсади пешгирии бемории кӯдакон рӯзҳои 15-26-уми майи соли ҷорӣ байни кӯдакони синни 1-9-сола рӯзҳои миллии эмгузаронӣ бар зидди бемории сурхча ва гулафшон гузаронида шудааст, ки 99,2%-и кӯдакон эмгузаронӣ карда шудаанд.
Давоми соли 2016-ум 2434 маротиба автомашинаҳои ёрии таъҷилии системаи тандурустии ноҳияи Рашт барои ёрӣ даъват карда шудаанд, ки аз он 31 дафъа барои ёрӣ расонидан ба садамаҳои нақлиётӣ, 17 дафъа барои овардани шахсони заҳролудшуда ва 2320 дафъа барои ёрӣ расонидан ба дигар беморон даъват карда шудаанд. Ин рақам дар 9-моҳаи соли ҷорӣ 1323 даъват ба қайд гирифта шудааст, ки ба 1323 нафар шахсон ёрии таъҷилии тиббӣ расонида шудааст. Аз он 18 дафъа барои ёрӣ расонидан ба садамаҳои роҳу нақлиётӣ, 8 дафъа барои шахсони заҳролудшуда ва 1251 дафъа ба дигар беморон хизмати таъҷилӣ - тиббӣ расонида шудааст. Бадбахтона, ҳоло ҳам автомашинаҳои ёрии таъҷилӣ барои овардани шахсони машруботнӯшида даъват карда мешаванд, ки соли 2016-ум 98 нафар ва дар 9-моҳаи соли ҷорӣ ба 46 нафар шахсони дар ҳолати мастӣ қарордошта хизмати хуби тиббӣ расонида шудааст.
Яке аз самтҳои фаъолияти асосии системаи тандурустӣ - ин ташхис мебошад. Давоми соли 2016 дар шуъбаи озмоишгоҳи клиникӣ ва функсионалӣ 39768 нафар аз ташхис гузаштаанд, ки аз онҳо дар озмоишгоҳҳои клиникӣ 32442 нафар, акси ренгенӣ - 811 нафар, ҳуҷраи ултрасадо - 6908 нафар ва ҳуҷраи даруннигорӣ - 122 нафар аз ташхис гузаронида шудаанд. Ин рақамҳо дар 9-моҳаи соли 2017-ум 59820 нафарро ташкил менамояд, ки аз он дар озмоишгоҳҳои клиникӣ 49320 нафар, акси ренгенӣ - 893 нафар, ҳуҷраҳои ултрасадо - 9513 нафар ва ҳуҷраи даруннигорӣ 263 нафарро ташкил менамояд, ки ин аз хизмати арзанда ва хушсифати кормандони соҳаи тандурустии ноҳияи Рашт гувоҳӣ медиҳад.
Аз рӯи суханони Абдураззоқ ном сокини деҳаи Шаҳринави ҷамоати деҳоти Қалъанаки ноҳияи Рашт, «дар чанд соли пешин минтақаи Рашт маркази даргириҳои гуруҳҳои мусаллаҳи мухолифин бо ҳукумати конститутсионӣ буд. Гуруҳҳои мусаллаҳи мухолифин қариб ки пурра системаи тандурустиро талаву ғорат намуда, тамоми амволи табобатӣ ва беморхонаҳоро вайрону валангор намуда буданд ва табиби бечора барои онҳо заррае қадру қимат надошт. Ин буд, ки қисми зиёди табибон минтақаро тарк намуда, ба дигар минтақаҳо ва дигар давлатҳо рафтанд. Маҳз дастгирии бевоситаи Асосгузори сулҳу ваҳдати миллӣ - Пешвои миллат, Президенти Тоҷикистон, муҳтарам Эмомалӣ Раҳмон сабаб гардид, ки кулли системаи тандурустӣ аз нав барқарор карда шуда, гузашта аз ин, даҳҳо муассисаҳои нави табобативу профилактикӣ ва омӯзишгоҳи беҳтарини тиббӣ на ин ки дар минтақа, балки берун аз он ҳам дар Раштонзамин сохта ба истифода дода шавад. Ин як қадами устувор дар сатҳи боз ҳам бештару хубтар хизмати тиббӣ расонидан ба мардум шуд».
Дар ноҳия шуъбаи таълимии маркази ҷумҳуриявии таълимию клиникии тиби оилавӣ фаъолият дорад, ки то имрӯз 183 нафарро ҳамчун мутахассисони тиби оилавӣ тайёр намудааст. Аз онҳо 12 нафарашон табибон ва 172 нафарашон кормандони миёнаи тиб мебошанд.
Имрӯз дар муассисаҳои тандурустии ноҳия 546 нафар кормандони тиббӣ фаъолият доранд. Аз онҳо 134 нафарашон духтурони маълумоти олидор мебошанд, ки занҳо 30 нафарро ташкил менамоянд. Аз шумораи умумии духтурон 33 нафар духтурони дараҷаи олӣ, 20 нафар дараҷаи 1 ва 18 нафар дараҷаи 2-ро доро мебошанд. Кормандони миёнаи тиб, ки 412 нафарро ташкил менамоянд, аз он 49 нафар дараҷаи олӣ, 66 нафар дараҷаи 1 ва 102 нафар дараҷаи 2-и тахассусиро доро мебошанд, ки ин дар шароити куҳистон яке аз бехтарин нишондодҳо ба шумор меравад.
Баҳри пешгирии бемориҳои паразитӣ тибқи супориши Вазорати тандурустӣ ва ҳифзи иҷтимоии аҳолӣ ба 24990 нафар кӯдакон ҳаби албендазол 400 ройгон тақсим карда шудааст, ки 99,6 фоизи нақшаро ташкил менамояд. Аз тарафи мутахассисони маркази тропикӣ дар муассисаҳои кӯмаки аввалияи тиббии санитарӣ ва беморхонаҳои ноҳия тибқи нақшаи корӣ 14 маротиба сафарҳои санҷишӣ гузаронида шуда, оид ба назорати миллӣ, огаҳӣ, пешгӯии хурӯҷи беморӣ, ташхиси пешакӣ, табобати саривақтӣ, мубориза бар зидди паҳнкунандагони бемории вараҷа ва паразитҳо суҳбатҳо ва мизҳои мудаввар гузаронида шудааст. Дар ноҳия давоми соли 2016-ум 7 маротиба маҷлисҳои шӯрои тиббии ноҳиявӣ гузаронида шудааст, ки ин рақам дар 9 моҳи соли ҷорӣ низ 7 ҷаласаҳо ва маҷлисҳои Шӯрои тиббии ноҳияро ташкил медиҳад.
Ба гуфтаи сартабиби Беморхонаи марказии ноҳияи Рашт Солиҳов Алимаҳмад, «мардуми Раштонзамин аз Пешвои муаззами худ барои сулҳу салоҳ ва амнияти минтақа басо сипосгузоранд. Маҳз оромӣ ва суботу корҳои бунёдкорӣ ва созандагии доҳии тоҷикони ҷаҳон сабаб гардид, ки имрӯз сатҳи хизматрасонии соҳаи тандурустии ноҳияи Рашт то ба он дараҷае боло рафт, ки онро мо дар гузашта дар хоб орзу мекардем. Имрӯз дилхоҳ бемор дар худи муассисаҳои тандурустии ноҳияи Рашт табобати хушсифат гирифта, гузашта аз он, бо потенсиали кадрии худ мо дигар беморони шаҳру навоҳии минтақаро низ ба табобат фаро гирифтаем. Дар ин самт метавон хизмати арзандаи кормандони шуъбаи таваллудхонаи Беморхонаи марказиро номбар кард. Давоми чанд соли охир дар мо фавти модару кӯдак ба қайд гирифта нашудааст. Ман ҳамчун табиб ва ҳамчун роҳбар миннатдории худро ба Пешвои муаззами миллат, доҳии тоҷикони ҷаҳон муҳтарам Эмомалӣ Раҳмон, ба вазири тандурустӣ ва ҳифзи иҷтимоии аҳолии кишвар муҳтарам Олимзода Насим Хоҷа ва ба раиси ноҳияи Рашт муҳтарам Лоиқзода Қаноатшоҳ барои ёрии арзандаашон иброз намуда, онҳоро бовар мекунонам, ки мо кормандони соҳаи тандурустии ноҳияи Раштонзамин омодаи хизмати доимӣ ба мардумем ва чун ворисони Синои бузург ба қасами худ содиқ мемонем».

Саиди Ҳайдар, МТЖТ,
Душанбе-Рашт-Душанбе

ШАРҲИ МО:
Солиҳов Алимаҳмад Маҳмадович 19-уми сентябри соли 1962 дар шаҳраки Навободи ноҳияи Ғарм таваллуд шудааст. Соли 1969 ба мактаби миёнаи №8 рафта, онро соли 1979 бо баҳои аъло хатм намудааст. Солҳои 1979-1985 дар Донишгоҳи давлатии тиббии Тоҷикистон ба номи Сино таҳсил намуда, онро бо ихтисоси духтури бемориҳои қалб хатм намудааст. Солҳои 1985-86 интернатура дар беморхонаи клиникии №2-и шаҳри Душанбе, солҳои 1986-88 духтури минтақавӣ дар поликлиникаи марказии ноҳияи Ғарм, солҳои 1988-89 духтури бемориҳои қалб дар поликлиникаи марказӣ, солҳои 1989-91 мудири шуъбаи реаниматсия дар Беморхонаи марказии ноҳияи Ғарм, солҳои 1991-93 муовини сардухтури ноҳия оид ба комиссияи машваратии тиббӣ, солҳои 1993-2015 сартабиби Беморхонаи минтақавии шаҳраки Навободи ноҳияи Рашт, аз моҳи апрели соли 2015 то ин ҷониб сартабиби Беморхонаи марказии ноҳияи Рашт. Аълочии тандурустии ҶТ, дорандаи медали «Шафқат», духтури дараҷаи олӣ, роҳбар ва оиладори намунавӣ, падари 6 фарзанд, ки аз онҳо 2 нафарашон табибанд.

Хонданд 362

Агарчи аз охирон дастури раиси шаҳри Панҷакент Ислом Зиёзода оид ба таҳияи хати сайр ва партовгоҳ дар охирон нишасти матбуотӣ се моҳ сипарӣ мешавад, вале ин дастур то кунун ба иҷро нарасидааст. 

Иҷро нашудани супориши раиси шаҳр боиси нигаронии сокинони маҳаллаи Навбунёд гардидааст. Онҳо мегӯянд, агарчи қариб 20 сол мешавад, ки дар ин маҳалла ҳудуди 500 хоҷагӣ умр ба сар мебаранд, вале на хатисайр мавҷуд асту на партовгоҳ. Аз ин хотир, онҳо маҷбуранд ҳар субҳ то ба масири асосии шаҳр ҳудуди 1,5-2 км роҳро пиёда тай намоянд ва баъд аз он тавассути хатсайрҳои кӯчаи асосӣ паси кори хеш раванд. Ҳамчунин, онҳо бинобар набудани партовгоҳ дар маркази маҳалла маҷбур будаанд, ки ҳамарӯза масофаи беш аз 2 километрро тай намуда, партовҳояшонро дар партовгоҳи ягонаи назди биноҳои баландошёна оварда партоянд.
Як тан аз сокинони ин маҳалла, ки нахост номаш ифшо шавад, мегӯяд, беш аз 10 сол аст, ки дар ин маҳалла иморат сохтаву зиндагӣ мекунад.- Ман як чизро намефаҳмам,- мегӯяд ӯ,- вақте ки ба мо ин заминҳои наздиҳавлигиро тақсим карда доданд, барои бунёди роҳ, хати оби нӯшокӣ, барқ ва ташкили хати сайри мошинҳои мусофиркашон аз мо маблағҳои ҳангуфт гирифтанд ва мутасаддиёни кумитаи заминсозӣ ва ҳамчунин идораҳои вежае, ки ин заминҳои наздиҳавлигиро ба нақша гирифтаву онро гӯё тахту ҳамвор намудаанд, ваъда карда буданд, ки дар кӯтоҳтарин муддат тамоми коммуникатсияҳои дар боло номбаршударо дар ин маҳалла ташкил менамоянд. Аз ин ваъдаҳо ҳудуди 20 сол ҳам сипарӣ шуд. Мо бошандагон худамон аз сари нав маблағ ҷамъ кардаву хати барқу обу роҳро ташкил намудем. Дар ин муддат се раиси ҳукумат бадал шуданд. Ҳар кадоме, вақте муроҷиат мекардем, мегуфтанд, ки «дар кӯтоҳтарин муддат ин пешниҳодҳои шумо оид ба партовгоҳ, хати сайр ва гузоштани трансформатори баландшиддат ба иҷро мерасад». Баъд ба дастандаркорону муовинони хеш супоришҳо медоданд. Онҳо дастҳо пеши бар дар китобчаҳояшон ин гуфтаҳои раисони шаҳрро навишта мегирифтанду «хуб, иҷро мекунем» мегуфтанд. Чун ба берун мерафтанду китобчаашонро мепӯшиданд, ин гуфтаҳо ҳам дар дохили ин китобча моҳҳову солҳо боқӣ мемонду ба иҷро намерасид.
Ба гуфтаи сокинон, чунин будааст рафтори масъулону роҳбарон нисбати мушкилоти мардум.
Ахиран раиси шаҳри Панҷакент Ислом Зиёзода замоне, ки аз ҷониби рӯзноманигорон роҷеъ ба ин мушкилоти сокинони ин маҳалла ва арзи онҳо дар нишасти матбуотӣ ёдовар шуд, ба муовини аввали хеш М. Сафарзода ва масъулони дигар супориш дод, ки дар муҳлати як ҳафта ин мушкилотро дида баромада, ҳаллу фасл намоянд. Ҷаноби Сафарзода баъди як ҳафтаи сипаришуда дар нишасти матбуотие, ки бо кормандони соҳаи саноату хадамот баргузор гардид ва рӯзноманигорон чун оид ба ҳалли ин дастури раис, ки чаро иҷро нашуд, пурсон шуданд, гуфт, ки «бинобар набудани ҷой барои партовгоҳ, бигзор мардуми ин маҳалла дар он партовгоҳе, ки то ба имрӯз партов мерезанд, оварда рехтан гиранд». Ба қавли ӯ, 2 км чандон масофаи зиёд нест ва барои мардум ин масофа «ҳеҷ душворие пеш намеорад». Ба гуфтаи ин ҷаноб, гӯё замоне, ки ӯ дар шаҳри Чкаловски вилояти Суғд ифои вазифа менамудааст, мардуми онҷо то ба масофаи беш аз 3 км партовҳояшонро оварда мерехтаанд ва барои онҳо ин амал ҳеҷ мушкиле надоштааст. Нисбати хати сайр бошад, оқои Сафарзода гуфт, ки шахсан худаш машғул мешаваду хати сайрро ташкил менамояд. Ӯ мушаххасан нагуфт, ки кай ин корро амалӣ мекунаду хати сайр ташкил мешавад. Чунин буд муносибати муовини аввал нисбати супориши раиси шаҳр ва ҳалли мушкилоти мардум.
Ба гуфтаи сокинони маҳалла, ин мушкилот зиёда аз 10 сол аст, ки идома дораду касе то ба имрӯз онро ҳаллу фасл намекунад. Мо вақте ин арзи мардумро дар мақола навишта мекардем, ба хулосае омадем, ки шояд баъди хондани ин мавод роҳбарони шаҳри Панҷакенту кормандони масъул ин мушкили мардумро ҳаллу фасл намоянд?! Ё нишасти матбуотии дигарро мунтазир мешаванд, ки рӯзноманигорон боз аз мушкилот ёдовар шаванд?

Бибиҷон АШӮРОВА, Панҷакент,
махсус барои «Фараж»

Хонданд 625

Боз Ализода...

Окт 07, 2017
Хонданд: 376

МИҲД-и шаҳри Хуҷанд ва вилояти Суғд бозичаи дасти судя Эраҷ Ализодаанд?

Дар Суди шаҳри Хуҷанд аризаи даъвогии Зокирова Д. Ҷ., сокини шаҳри Хуҷанд, оид ба бекор кардани қарори раиси шаҳри Хуҷанд таҳти №409 аз 05.06.2015 “Дар бораи дигар намудани мақсади истифодаи замин ва вобаста намудан” ба масоҳати умумии 1109,8 м.м. ба шаҳрванд Яқубов Х. Ф. ба имзо расида, бо Сертификати ҳуқуқи истифодаи замин аз 27.08.2015 №2565 таъмин шудааст, ба баррасӣ гузошта шуд. Талаби даъвогар аз он иборат буд, ки гӯё ин қарори раиси шаҳр, ки ба шаҳрванд Яқубов Х. Ф. соҳибмулки замини собиқ қаҳвахонаи “Равшан” ва “Гармхона” мебошад, иҷозаи сохтмони 9-ошёна додааст, ки он ба рафти корҳои сохтмонии ӯву ҶДММ “Диёри Хуҷанд”, ки шартномаи ҳамкорӣ бастаанд, монеъ мешавад. Ҳамчунин, онҳо ба суд даъво пеш овардаанд, ки ин қарори раиси шаҳр барои даъвати сармоягузор барои сохтмони маҷмааи тасдиқшуда монеа эҷод карда, ба онҳо зарар мерасонад ва он бояд бекор карда шавад.
Ин даъвои ӯву ҶДММ “Диёри Хуҷанд”-ро судя Ализода Эраҷ амиқ ва ҳаматарафа наомӯхта, санаи 27.09.2017 қарор баровард, ки аз чанд ҷиҳат хилофи қонуну хилофи мантиқ мебошад.
Судя Эраҷ Ализода бояд ҳама ваҷҳҳои дар парванда ҳамроҳшударо дуруст меомӯхт, ки наомӯхт. Судя ҳатто маълум накард, ки тибқи қарори раиси шаҳри Хуҷанд аз 19.06.2015 таҳти №440 ба ҶДММ “Диёри Хуҷанд” барои сохтмони бинои истиқоматии 12-ошёна бо маркази савдо дар хиёбони И. Сомонии шаҳри Хуҷанд танҳо ба масоҳати умумии 656,0 м.м. иҷоза дода шудаасту халос. Ва ҶДММ ”Диёри Хуҷанд” барои анҷом додани корҳои сохтмонӣ дар кӯчаи Зариф ва Солеҳ Раҷабовҳо дар ҳудуди собиқ қаҳвахонаи “Равшан” ва “Гармхона” ягон ҳуҷҷати ҳуқуқмуайянкунандаи соҳибмулкӣ надорад. Ҳол он ки, дар атрофи ин кӯчаҳо иншооти давлатии Раёсати Донишгоҳи давлатии Хуҷанд ба номи академик Б. Ғафуров, Идораи палатаи савдо ва саноати вилояти Суғд ва бонки “Имон интернешнл”, меҳмонхонаҳои “Ваҳдат”, “Хуҷанд”, қаҳвахонаи “Хони Хуҷанд” ва хонаҳои истиқоматии сокинон воқеанд ва чи гуна мешавад ба ҷои 656,0 м.м. масоҳати барои сохтмон иҷозашуда дар кӯчаи И. Сомонӣ, замини ин идораҳои давлатиро, ки дар кӯчаи дигар воқеанд, гирифту бинои истиқоматии ошёнадор сохт?
Тибқи тартиби муқаррарнамудаи қонун иҷрои сохтмон танҳо бо иҷозаи мақомоти маҳалии ҳокимияти давлатӣ ва идораҳои дахлдори он ба сохтмон сурат мегирад.
ҶДММ “Диёри Хуҷанд” барои иҷрои сохтмон дар кӯчаҳои Зариф ва Солеҳ Раҷабовҳои Хуҷанд ягон ҳуҷҷати расмӣ аз мақомоти ҳокимияти давлатии шаҳри Хуҷанд надорад.
Чизе, ки ба Шӯрои шаҳрсозии Кумитаи меъморӣ ва сохтмони назди Ҳукумати Ҷумҳурии Тоҷикистон аз ҷониби ҶДММ “Диёри Хуҷанд” ба баррасӣ гузоштааст, ангораи шаҳрсозӣ аст, ки он маънои дақиқи иҷозат ба сохтмонро доро буда наметавонад. Ҳатто дар посухи расмӣ доир ба додани хулосаи мусбат барои сохтмони шаҳрванд Яқуб Х. Ф. №2 / 17 12 аз 31.07.2017 Кумитаи меъморӣ ва сохтмони назди Ҳукумати Ҷумҳурии Тоҷикистон ба ҶДММ “Диёри Хуҷанд” расонидааст, ки “бояд қайд намуд, ки лоиҳаи ангоравии Нақшаи муфассали маҳали аҳолинишин ва нақшаи иморатсозии як қисми кӯчаҳои И. Сомонӣ, Зариф ва Солеҳ Раҷабовҳо, Мавлонбек ва Фирдавсии шаҳри Хуҷанд дар Шӯрои шаҳрсозии Кумита санаи 11-уми марти соли 2015 №3 қобили қабул ҳисобида шуда, барои тасдиқ ба Маҷлиси вакилони халқи шаҳри Хуҷанд пешниҳод карда шудааст. Нақшаи тасдиқшуда ҳуҷҷати асосии шаҳрсозӣ ба ҳисоб рафта, сохтмони бинову иншоот бояд дар асоси нақшаи мазкур ва талаботҳои меъёру қоидаҳои шаҳрсозӣ (МҚШ ҶТ 30.01.2015 Шаҳрсозӣ, банақшагирӣ ва бунёди маҳалҳои аҳолинишин) ба роҳ монда шавад. Аз ин рӯ, Кумита бунёди бинову иншоотро танҳо дар доираи нақшаи тасдиқшуда ба мақсад мувофиқ меҳисобад”.
Заминистифодабаранда Яқубов Х. Ф. дорои Сертификати ҳуқуқи истифодаи замин ба масоҳати 1109, 8 м.м. барои сохтмони бинои 9-ошёна ва маркази хизматрасонӣ бо таваққуфгоҳи нақлиёти сабукрав мебошад, ки санаи 27.07. 2015 аз тарафи Кумитаи идораи замини шаҳри Хуҷанд таҳти №2565 дода шудааст.
Аз тарафи Раёсати экспертизаи давлатии ғайриидоравӣ ҳуҷҷатҳои лоиҳавии шаҳрсозии Кумитаи меъморӣ ва сохтмони назди Ҳукумати Ҷумҳурии Тоҷикистон ба лоиҳаи кории фармоишгар Яқубов Х. Ф. санаи 28.12.2016 хулосаи мусбат дода шудааст.
Санаи 29.05.2017 аз ҷониби шуъбаи меъморӣ ва шаҳрсозии шаҳри Хуҷанд ва ҳам вилояти Суғд ба Яқубов Х. Ф. барои пешбурди корҳои сохтмонӣ иҷозат дода шудааст.
Ализода Эраҷ, судяи Суди шаҳри Хуҷанд ҳангоми баррасии аризаи даъвогии Зокирова Д. Ҷ. ва ҶДММ “Диёри Хуҷанд” натанҳо ба дурусту қонунӣ будани кори сохтмонӣ аҳамият надодааст, балки пешниҳоди ҳама идораҳои давлатӣ, сар аз шӯъбаи меъморӣ ва шаҳрсозии шаҳри Хуҷанд, то пешниҳоди муовини раиси вилояти Суғд Анвар Яқубӣ ва пешниҳоди Кумитаи меъморӣ ва сохтмони назди Ҳукумати Ҷумҳурии Тоҷикистонро ба сифр баробар донист?! Агар не, яке аз пешниҳоди чунин ниҳодҳоро меомӯхт ва хулосаи мантиқан дуруст мебаровард.

“ФАРАЖ”

P. S. Дар маркази шаҳри Хуҷанд ба мушкил печидани иҷрои кори сохтмонӣ аҷиб аст. Бинобар ин, “Фараж” барои таҳқиқи ин мавзуи судӣ дар оянда низ талош хоҳад кард.

Хонданд 376

Хабари-рӯз

Календар

« Октябрь 2018 »
Пн Вт Ср Чт Пт Сб Вс
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

Минбари сардабир

  • симКАРта

    Дар ҳафтае, ки гузашт, дар шабакаҳои иҷтимоӣ ин калима аз…

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.