.

Alternative flash content

Requirements

Get Adobe Flash player

Минтақа

Ба таваҷҷуҳи вазири корҳои дохилии ҶТ, муҳтарам Рамазон Раҳимзода

Ба таваҷҷуҳи вазири нақлиёти ҶТ, муҳтарам Худоёрзода Худоёр

Бархе аз ронандагон пешниҳод доранд, ки ҳаракати нақлиёт дар Тоҷикистон бо чароғи дур (дальний фар) аз тарафи кормандони Бозрасии давлатии автомобилӣ назорат ва танзим карда шавад. Ва ё барои онҳое, ки чунин чароғҳоро ба нақлиёташон мечаспонанд, ҷазои сангин муқаррар гардад.

Ба андешаи ронандагон, ҳаракати нақлиёт бо нурҳои дур ва ё баланд дар роҳҳои кишвар, бахусус дар шоҳроҳҳо ва ағбаҳои мамлакат, боиси ба вуҷуд омадани хатарҳо ва сар задани садамаҳои нақлиётӣ мегардад. Аҳмадҷон Восихов, як нафар аз ронандагоне, ки ба гуфтаи худаш, собиқаи 30-сола дорад, вақтҳои охир дар нақлиёт насби чароғҳои баланд, аз ҷумла галогену ксенон ва дигар намуди чароғҳое, ки ба ронандагони самти муқобил халал мерасонанд, мӯд шудааст.
- Ман бисёр вақт дар сафар ҳастам. Бештар шабона дар ағба ҳаракат мекунам. Бахусус дар ин вақт он нақлиёте, ки чунин чароғҳоро насб кардаанд, ба ҳаракати муқобил халал эҷод мекунанд ва ба чашми ронандагон зарар мерасонанд. Кормандони БДА бояд назоратро дар ин самт пурзӯр намояд ва ронандагонеро, ки ба мошинҳои хеш чароғҳои аз стандарт берун ва баланду ба чашм зарарнокро насб мекунанд, ҷазои сахт диҳанд. Зеро ин гуна одамон ба ҳаёти дигарон хатар эҷод мекунанд,- мегӯяд Восихов.
Ба андешаи ронандагони солхӯрда, дар гузашта, яъне солҳои шӯравӣ насби чунин чароғҳо дар нақлиёт иҷозат набуд. Ҳамзамон, истифодаи чароғ дар нақлиёт аз тарафи ронандагон батартиб мегузашт.
Мансур, як тан аз ронандагон мегӯяд, ки дар Русия таҳсил карда ва аз он ҷо ҳуҷҷати ронандагиро гирифтааст. Ба қавли ӯ, тибқи Қоидаи ҳаракат дар роҳ дар Русия, ронанда уҳдадор аст, ки ҳатто рӯзона чароғи наздикбин (ближний фар)-и нақлиёташро даргирон монад.
- Албатта, дар Тоҷикистон ронандагони нохонда зиёданд, ки имрӯз қоидаро надониста, паси чанбараки нақлиёт нишастаанд. Онҳо баъзе аломатҳои роҳоро сарфаҳм намераванд, намедонанд, ки кай ва дар кадом вақт бояд чароғҳоро иваз кунанд ва аз ин сабаб ба мошинҳои худ ҳатто чароғҳои ғайристандартиро мечаспонанду ба замми ин, чунин ҳолатҳо аз тарафи нозирони БДА назорат карда намешавад,- меафзояд ӯ.
Ба андешаи чанд нафар аз ронандагоне, ки дар Русия ба ин касб машғуланд, дар ин давлат аз рӯи қоидаи ҳаракат дар роҳ дар якчанд маврид ронандагон уҳдадоранд, ки қоидаҳои гузариш аз фари дур ба фари наздикро риоя кунанд. Аз ҷумла: дар ҷойҳои аҳолинишин, агар роҳ равшанӣ дошта бошад, дар вақти аз пеш намудор шудани нақлиёти муқобил на камтар аз 150 метр, агар одамон дар роҳ бошанд ва ғайраву ҳоказо.
Ҷовид Облоқулов, ронандаи дигар, ки ба гуфтаи худаш пайваста аз Хуҷанд бор мекашонад, дар шоҳроҳи Душанбе - Чаноқ нақлиёти дорои чароғҳои баланду ба чашм зараррасон ҳини ҳаракат ба ронандагони самти муқобил халали ҷиддӣ мерасонанд ва он боиси пайдо шудани ҳолатҳои садамавӣ мегардад.
- Ҳарчанд аз дур «маргат» мекунӣ, ки чароғашро кушад, вале баъзе ронандагони нохонда намефаҳманд. Худам шоҳиди он будам, ки нақлиёт бо ҳамин сабаб, ки нақлиёти муқобилаш чашми ронандаро бурд, ба садама дучор гардид,- мегӯяд ин ҳамсуҳбати мо.
Як нафар аз кормандони БДА мегӯяд, ки «бештар вақт барои вайрон кардани қоидаи истифодаи чароғҳои дурбин ба ронандагон огоҳӣ дода мешавад. Пештар мо чунин ронандагонро бо моддаи 315-и Кодекси маъмурӣ ҷарима мекардем. Вале дар сурати лозима нисбати онҳо тибқи моддаи 333-и Кодекси ҳуқуқвайронкунии маъмурӣ протокол тартиб медиҳем».
Вале як нафар аз ронандагон, ки ҳуқуқшинос будааст, мегӯяд, ин гуна ронандагонро мешавад бо моддаи 324 (Риоя накардани талаботи аломатҳои роҳ, нишонаҳои қисми роҳ ва дигар қоидаҳои ҳаракат дар роҳ), моддаи 326 (Аз тарафи ронандагони воситаҳои нақлиёт ба вуҷуд овардани ҳолати садамавӣ)-и Кодеси маъмурӣ ҷазо дод, то ислоҳ гарданд.
Ба ақидаи ронандагон, рӯз аз рӯз сафи нақлиёт бо насби чароғҳои баланд дар роҳҳои кишвар афзуда истодааст ва хеле хуб мебуд, агар кормандони БДА шабона рейд гузаронида, чунин ронандагонро ҷазои сангин диҳанд. Чунки шабонгоҳ ингуна нақлиётро дар роҳҳо пайдо намудан осонтар аст.
- Боварӣ дорем, ки вазири корҳои дохилии кишвар муҳтарам Рамазон Раҳимзода пас аз хондани муроҷиати мо барои ислоҳи ин камбудӣ даст ба кор мешаванд,- мегӯянд ронандагон.

Хуршед ФОЗИЛОВ 

Хонданд 891

Фархор: «Ҳосилот» кай наҷот меёбад?

Окт 21, 2017
Диданд: 451

Оё мушкилоти дастаи «Ҳосилот»-и ноҳияи Фархор дар соли 2018 идома меёбад? Ё шояд роҳбарияти ноҳияи Фархор ин маротиб дар ҳалли мушкилоти молиявии дастаи овозадораш ёрии хешро дареғ намедорад?!

Футбол варзиши рақами як дар ҷаҳон маҳсуб ёфта, мухлисони сершумор дорад. Дар Тоҷикистони азизи мо низ мухлисони ин навъи варзиш кам нестанд. Футболи тоҷик таърихи беш аз 80 соларо дорост ва дар ин муддати тӯлонӣ марҳилаҳои гуногунро аз сар гузаронидааст. Бо ба даст овардани Истиқлолияти давлатии Ҷумҳурии Тоҷикистон ва бо фароҳам омадани фазои сулҳу оромӣ дар мамлакат, инчунин бо дастгирӣ ва ғамхориҳои ҳамешагии Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ин соҳаи муҳими варзиш дар диёрамон зина ба зина рушд карда истодааст. Дар ин муддат дастаҳои зиёде таъсис ёфтаву то кунун фаъолият доранд ва ба музаффариятҳои назаррасе ноил гаштаанд, инчунин ба ифтихори ҳар як ғолибияташон парчами миллат боло шуда, суруди миллии кишварамон садо медиҳад, ки ин барои ҳар як сокини кишварамон боиси ифтихору сарбаландӣ мебошад. Аммо, ин ҷо мехоҳам дар мавриди дастовардҳои дастаи «Ҳосилот»-и ноҳияи Фархор чанд ҳарфе бигӯям. Ин дастаро низ, дар қатори дигар дастаҳои футболи тоҷик ба монанди «Равшан»-и шаҳри Кӯлоб, «КМВА-Помир»-и шаҳри Душанбе, «Регар -ТАДАЗ»-и шаҳри Турсунзода, «Хуҷанд»-и шаҳри Хуҷанд ва «Истиқлол»-и шаҳри Душанбе метавон ифтихори футболи тоҷик шумурд.

Солҳои 2013-2016 давраи рушду инкишофи дастаи «Ҳосилот» ба шумор мерафт. Ҳар гоҳе аз сокинони ноҳия ва мухлисони футбол сабаби ин ҳама комёбиҳову дастовардҳоро пурсон мешудем, бо як ҷаҳон меҳру ихлосу муҳаббат номи Раъно Раҳимзодаро, ки дар он солҳо масъулияти раиси ноҳияи Фархорро бар дӯш доштанд, ба забон меоварданд. Маҳз бо дастгирии ин зани ғаюру далер ва мушкилнописанд симои ноҳия куллан тағийр ёфта, дар тамоми соҳаҳои хоҷагии халқи ноҳия пешравиҳо дида мешуд, пешравию комёбиҳои дастаро низ ба ин зани донишманду тавоно рабт медоданд. Воқеан ӯ тавонист, ки бо қобилият ва маҳорати кордонии худ ва бо ҷалби соҳибкорони маҳаллӣ ин дастаи овозадору шуҳратёрро дубора эҳё кунад. Ва даста аз буҷети маҳаллӣ қисман маблағгузорӣ мешуд. Ситоди мурраббиён ва бозингарон аз мададу ғамхориҳои ин зани фазилатпеша пайваста бархӯрдор буданд. Раъно Раҳимзода то ҷое нозукиҳои ин соҳаро хуб медонист, чунки ҳамсари мушфиқу меҳрубонаш Тағай Дӯстов замоне дар ин дастаи овозадор бозӣ мекарду дили ҳазорҳо мухлисашро бо бозигузориҳои зебояш шод менамуду бонуи хонадон бо маоши омӯзгорӣ ва марди хонадон бошад бо маоши футболбозӣ фарзандонашонро ба воя расониданду соҳибмаълумот карданд. Ҳамин буд, ки ба қадри заҳмати ҳар як бозингар мерасиду аз комёбиҳояшон шод мегашт, ё ба истилоҳи дигар гӯем «Қимати ҳампешаро ҳампеша медонаду бас».
Сабаби дигари муваффақияти ин дастаро бо ба сари кор омадани Нурулло Маҳмудов ба ҳайси президенти бошгоҳи «Ҳосилот» низ гуфтан ҷоиз аст. Ин ҷавони чашми кордон, бо истифода аз донишу малакаи хеш таҳти ғамхориҳои роҳбарияти Мақомоти иҷроияи маҳаллии ҳокимияти давлатии ноҳияи Фархор, соҳибкорону тоҷирон ва сокинони бонангу номуси ноҳия ва бо ҷалби муррабиёни соҳибтаҷриба, футболбозони касбӣ тавонист, ки дастаро ба нерӯмандтарин даста дар қаламрави ҷумҳурӣ табдил диҳад ва бо бозигузорҳои хуб ва бо гирифтани имтиёзҳои назаррас аз Лигаи якум ба Лигаи Олӣ роҳхат гирифт. Ва баъди дастаи овозадори «Истиқлол»-и шаҳри Душанбе, дар ҷадвали мусобиқа мақоми дуюмро соҳибӣ намуда, ягона рақиби аслии ин дастаи овозадор гашт, бо гирифтани медали нуқраи мусобиқа сарфароз гардид ва имкони иштирок дар бозиҳои Ҷоми «Конфедератсияи «Осиё-2016-ро низ пайдо намуда, қаҳрамони Ҷумҳурии Исломии Афғонистон «Шоҳин Осмои»-ро бо ҳисоби 1:0 шикаст дода, ҳуқуқи ба даври дигар гузаштанро пайдо кард, бо дастаи «Дордой»-и Ҷумҳурии Қирғизистон вориди рақобат гашта, дар сафар бо ҳисоби 1:0 шикаст хӯрда, дар бозии ҷавобӣ бозиро мусовӣ: 1:1 намуд, ҳамин тариқ аз идомаи сабқат дар Ҷоми «Конфедератсияи Осиё-2016» маҳрум гашт. Мағлубият ба «Дордой» руҳу иродаи роҳбарияти даста ва бозингаронро нашикаст. Даста омодагиро барои соҳиб шудан ба «Шоҳҷом-2016» (Суперкубок) дида, дар натиҷа баъди тамринҳои хуб бо дастаи «Истиқлол»-и шаҳри Душанбе вориди майдони сабқат гашта, бо ҳисоби 2:1 «Ҳосилот» ғолибият ба даст оварда, ин Ҷоми олии мусобиқаро соҳиб гашт. Ин буд он ҳама дастовардҳои таърихии «Ҳосилот» дар замони роҳбарии Раъно Раҳимзода ба ҳайси раиси ноҳияи Фархор ва фаъолияти Нурулло Маҳмудов дар вазифаи президенти бошгоҳи «Ҳосилот».
Қобили қайд аст, ки дастаи «Ҳосилот» аз оғози соли 2017 то имрӯз ба мушкилиҳои зиёди молиявӣ дучор гашта, баъди муроҷиатҳои бенатиҷаи ситоди мураббиён ва мухлисони «Ҳосилот» ба роҳбарияти кунунии Мақомоти иҷроияи маҳаллии ҳокимияти давлатии ноҳияи Фархор ва баъзе аз соҳибкорони ин ноҳия, ки ба ҷуз ваъдаҳои хушку холӣ дигар коре карда натавонистанд, боис ба он гашт, ки аксарияти бозингарони калидӣ ва ҳирфаӣ дастаро тарк намуда, ба дигар дастаҳо гузаштанд. Бояд гуфт, ки имсол барои ин дастаи муқтадири футболи тоҷик на он қадар соли бобарор буд, чунки дар аксарияти қувваозмоиҳо бо шикастҳои калон рӯбарӯ мегашт. Шояд хонандаи азиз суолеро ба миён гузорад, модоме ки даста маблағ намеёбад, пас бозиҳои сафарӣ ва дигар хароҷотҳоро аз кадом ҳисоб рӯйпӯш менамояд? Бояд гуфт, ки аксар хароҷотҳои молиявии даста аз ҳисоби мардуми қатории ноҳияи Фархор ва баъзе шахсоне, ки каме имконияти хуби молиявӣ доранд таъмин карда мешуд. Боиси зикр аст, ки ҳангоме дастаи «Ҳосилот» дучори мушкилоти молиявӣ мегашт аз ҷониби Федератсияи футболи Тоҷикистон пайваста ғамхориву дастгириҳо эҳсос карда мешуд, ба наздикӣ аз ҷониби масъулони ин ниҳод мадади молиявӣ расонида шуд, то ин ки дастаи «Ҳосилот» ду бозии боқимонда ва дигар хароҷотҳои худро рӯйпӯш намояд. Аз ин рӯ, мо мухлисони дастаи «Ҳосилот» бо камоли эҳтиром ва мамнунияти бепоён, бо як ҷаҳон сипосу садоқат миннатдории хешро ба президенти Федератсияи футболи Тоҷикистон муҳтарам Рустами Эмомалӣ ва ноибашон Алишер Урунов иброз менамоем, ки дастаро дар лаҳзаҳои душвор танҳо нагузоштанд ва ба фаъолияти минбаъдаашон барору комёбиҳои беназир орзумандем ва ин ҳама ғамхориҳо натиҷа аз дастгирии сиёсати варзишпарваронаи Ҳукумати Ҷумҳурии Тоҷикистон мебошад.
Фархори бостонӣ бо фарзандони бонангу номусаш, ки ҳамагӣ аҳли адабу фарҳанганд, бо соҳибкорону сармоядорони саховатпеша, ходимони давлатию сиёсии машҳуру маҳбуб ифтихори мо ҷавонон аст. Мардуми сарбаланди Фархори бостонӣ дар фазои сулҳу оромӣ, дар партави сиёсати хирадмандонаи Пешвои миллат муҳтарам Эмомалӣ Раҳмон кору фаъолият намуда, саҳми арзандаи худро дар рушду ободии диёри ҳамешабаҳорамон гузошта истодаанд. Бояд хотирнишон кард, ки ноҳияи Фархор бо дастгириҳои рӯзафзуни роҳбарияти олии мамлакат рӯз то рӯз ободу зебо гашта истодааст. Пешравӣ дар низоми тарбияи ҷисмонии ноҳия низ дида мешавад. Мисоли ин гуфтаҳоро мо дар тармиму таҷдиди варзишгоҳи марказии ноҳия, ки дар солҳои 2012-2013 бо мададу ғамхориҳои Пешвои миллат тармиму таҷдид карда шуд дида метавонем. Дар майдоне, ки аз файзи дастони Роҳбари саховатпешаву хирадманд ободу зебо гаштааст, ғалабаву зафар бояд кард.
Бовар дорам, ки шуруъ аз соли 2018 соҳибкорону сармоядорони маҳаллӣ дар якҷоягӣ бо роҳбарияти Мақомоти иҷроияи маҳаллии ҳокимияти давлатии ноҳияи Фархор, сари нангу номус омада, дар қатори дигар амалҳои созандаву бунёдкорона ҳидоятҳои падаронаи Пешвои миллат, муҳтарам Эмомалӣ Раҳмонро, ки ҳамеша соҳибкоронро барои дастгирӣ ва рушду инкишофи соҳаи варзиш ҳидоят мекунанд, сармашқи кори худ намуда, ёрии беғаразонаи худро ба ин дастаи овозадору сермухлис дареғ намедоранд. Ҳамчунин, хеле ба маврид мешуд, ки варзишгоҳи марказии ноҳия ба ихтиёри «Мактаби маҳорати варзишии ҷавонон ва наврасони»-и ноҳия ва ё ба дастаи «Ҳосилот» дода мешуд.
Дар сурати каме дастгирӣ намудани дастаи «Ҳосилот» аминам, ки даста бо ҷалби бозингарони соҳибтаҷриба метавонад обрӯю нуфузи футболи тоҷикро боз ҳам боло бардораду ба муваффақиятҳои назаррас ноил гардад ва шарафи футболи тоҷикро берун аз кишварамон сазовор муаарифӣ намояд.

Акбар Абдусамадов

Хонданд 451

Шаҳри Сарбанд яке аз шаҳрҳои зебоманзар ва рушдкардаи кишвари азизамон маҳсуб меёбад. Дар ин диёри зархез мардумонаш бо заҳматпеша будан ва ҳувияти баланди миллӣ ном баровардаанд. Тинҷию амонӣ, рушди бомароми соҳаҳои иҷтимоӣ ва интихоби роҳи дурусту сиёсати созандаи ҳукумати мамлакатамон бо шарофати сиёсати хирадмандона ва пойдори сиёсатмадори сатҳи ҷаҳонӣ, Асосгузори сулҳу ваҳдати миллӣ - Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон муяссарамон шудааст. Ҳамин аст, ки тақрибан ҳар рӯзи ҳаёти мардуми шарифи мамлакат ба ид табдил ёфта, замоне фаро расидааст, ки орзую хоҳишҳояшон бе мамониат ва бе душворӣ ҷомаи амал мепӯшад.

Соли 2017 барои мардуми шарифи кишварамон соли навигариҳо ва созандагиҳо буда, барои пешрафту ояндаи Ҷумҳурии Тоҷикистони барои ҳамаамон азиз замони мусоид фароҳам омадааст.
Ҳукумати мамлакат аз аввали таъсисёбиаш то кунун ҷиҳати қадрдонӣ ва ҷовидона гардондани номи шахсиятҳои барҷаста, маъруф ва барои миллату давлат хизматҳои арзанда баанҷомрасонда иқдоми наҷиберо роҳандозӣ намудааст, ки шоистаи таҳсин мебошад. Чунончи, кӯчаю гулгашт, муассисаю корхонаҳо, шаҳру ноҳия, мавзеъҳои таърихиро бо номи чунин шахсиятҳо мегузоранд ва бо ин васила хизмату саҳми барои рушди ҳаёти ҷомеа, имрӯзу фардои мамлакат гузоштаи онҳо қадрдонӣ ва абадӣ гардонда мешавад. Бо ин васила ҳисси ифтихор, дилгармӣ ва нигоҳи нек ба ояндаи босаодат дар ботини мардум, алалхусус ҷавонону наврасон бедор карда мешавад. Дар вобастагӣ ба ин вакилони Маҷлиси вакилони халқи шаҳри Сарбанд барои гиромидошти хотираи неки фарзандони содиқи Ватан Давлатҷон Гиёев, Содиқҷон Каримов ва Аброр Зоҳир бо қарори якҷояи хеш литсейҳои давлатии рақами 1 ва 2-и шаҳр ва муассисаи таҳсилоти миёнаи умумии рақами 4-ро бо исми онҳо номгузорӣ намуданд.
Ду ҷавони диловар Давлатҷон Гиёев ва Содиқҷон Каримов чанд сол муқаддам зимни адои хизмати Модар - Ватан дар деҳаи Камароби ноҳияи Рашт бо гуруҳи террористон, ки қасди ноором кардани авзои ҷомеаро доштанд, рӯ ба рӯ омада, барои пойдории Истиқлолият ва оромиву осудагии ҳаммилатони худ сина сипар намуданд. Ин рӯзе буд, ки бадхоҳон муқовимати сахти диловарони ватанро бо чашми сар диданд. Ин рӯзест, ки ҳамеша ҳамчун муборизаи беамони фарзандони баору номуси тоҷик ба муқобили бадхоҳони миллат дар хотираҳо сахт нақш бастааст. Ин ду ҷавон дар дил орзую мақсадҳои зиёди наҷиб доштанд, аммо бадхоҳони миллат ин орзую ормонҳои онҳоро бо тири заҳрогини худ дар нимароҳ монданд.
Имомов Аброр Зоҳирович (тахаллуси адабиаш Аброр Зоҳир) 15-уми январи соли 1965 дар деҳаи Боҳтурободи Ҷамоати деҳоти «Гулистон»-и шаҳри Сарбанд ба дунё омадааст. Фаъолияти кориашро соли 1982 ба ҳайси мусаҳҳеҳи рӯзномаи вилоятии «Ҳақиқати Қӯрғонтеппа» сар карда, соли 1984 ба Донишгоҳи давлатии Тоҷикистон дохил шуда, онро соли 1989 ба итмом расонда ва ҳамон сол дар рӯзномаи вилоятии «Ҳақиқати Хатлон» ба фаъолият шуруъ мекунад. Сипас дар Кумитаи комсомолии вилоят, ҳафтаномаи «Адабиёт ва санъат», Иттиҳодияи ҷумҳуриявии кино ва видеои «Тоҷиккино» ба ҳайси сардори раёсат кор ва фаъолият кардааст. Аз соли 1998 то соли 2000 сармуҳаррири ҳафтаномаи «Ҷаҳони паём», солҳои 2000 - 2004 директори телевизиони Тоҷикистон, солҳои 2004 - 2005 директори киностудияи «Тоҷикфилм», солҳои 2005 - 2007 сармутахассиси шуъбаи иттилоотӣ - таҳлилии Дастгоҳи иҷроияи Президенти Ҷумҳурии Тоҷикистон, солҳои 2007 - 2012 директори китобхонаи марказии шаҳрии ба номи А. Лоҳутӣ ва аз соли 2012 то соли 2015 директори Муассисаи давлатии «Фурӯш ва паҳни китобу нашрияҳои даврӣ»-и шаҳри Душанбе шуда, кору фаъолият намудааст. Узви Иттифоқи нависандагони Тоҷикистон, узви Иттифоқи киноматографистон ва Иттифоқи журналистони Тоҷикистон, Аълочии фарҳанги Ҷумҳурии Тоҷикистон ва Аълочии матбуоти Тоҷикистон мебошад. Аброр Зоҳир муаллифи даҳҳо китоб, аз ҷумла 30 роман, 20 повест, очерку ҳикояҳои зиёд ва филмномаву намоишномаҳои телевизионӣ ва театрӣ мебошад. Романҳои серхонандаи ӯ «Майдон», «Душанбе», «Рақс дар сояи девори оҳанин», «Шикасти зулмот», «Муҷассамаи ишқ», «Васвасаи дунё», «Мунтасир», «Бозгашт», «Арсаи набарди гургон», «Нӯхтаи нафс», «Ёри ғор», «Мотами гурбаи сиёҳ», «Дар ҷустуҷӯи инсон», «Дунёи бесомон», «Ибни Лодан», «Дар ҷилди одам», «Охирин сайди сайёд», «Коммунист», «Муқовимат», «Хокпайванд» ва монанди ин буда, инчунин куҳи дастхатҳои номатбуъ дорад.
Аброр Зоҳир яке аз адибони сермаҳсул ва рангинхаёли замони соҳибистиқлолии тоҷик буда, умдатан, ба мавзуҳои номакшуф, ҷолиб ва мубрам дахл намудааст. Дар асарҳо асосан ба дунёи ботинии персонажҳо дахл мекунад ва бо тобишҳои гуногун онро ба риштаи тасвир мекашад. Ӯ дар нигориш ба сабки асарофарии адибони амрикои лотинӣ майл мекунад ва ба масоили глобалӣ дахл намуда, ба он аз дидгоҳу манофеи миллӣ нигариста, моҳиятан руҳи миллиро ба риштаи тасвир мекашад. Асарҳои номбурда таҷассумгари руҳия ва маънавиёти миллати тоҷик буда, аз ғаразҳои шахсию гуруҳӣ орӣ мебошанд.
Қайд кардан зарур аст, ки ӯ яке аз ташаббускорони таъсиси яке аз муассисаҳои бонуфузу муҳими пойтахт - Муассисаи давлатии «Фурӯш ва паҳни китобу нашрияҳои даврӣ»-и шаҳри Душанбе ба шумор мерафт ва аз рӯзҳои аввали таъсисёбӣ то ба фаъолияти бонизом гузаштани он ва то рӯзи вафот сарварии ин муассисаро ба зимма дошт. Соли 2013 дар назди Муассисаи давлатии «Фурӯш ва паҳни китобу нашрияҳои даврӣ»-и Мақомоти маҳаллии ҳокимияти давлатӣ дар шаҳри Душанбе маҷаллаи илмӣ - оммавӣ ва бадеӣ - публисистии «Душанбе»-ро таъсис дода, аз нахустин сармуҳарирони он буд. Ин маҷалла ҳамчун минбари эҷодкорони пойтахт маъруфият пайдо кардааст ва то кунун ба табъ мерасад.
Ҳаёт ва эҷодиёти ӯ дар қомусҳои (энсиклопедияҳои) гуногун сабт шудааст, алалхусус дар «Қомуси миллии Тоҷик», ҷилди 1, «Қомуси адабиёт ва санъати тоҷик», «Донишномаи телевизион ва радиои Тоҷикистон», китоби «Таърихи Боҳтуробод» сайтҳои соҳавии интернетӣ, хусусан «Википедия - донишномаи озод» сабт гардида, доир ба эҷодиёту ҳаёташ (мазмуну муҳтавои асарҳояш) тақризу тафсирҳои зиёде дар матбуоти даврӣ ба табъ расидаанд.
Вакилони Маҷлиси вакилони халқи шаҳри Сарбанд бо ин ташаббуси наҷиби худ баҳри гиромидошти фарзандони номбардори диёр ва бо ин васила ҷиҳати татбиқ ва идомаи сиёсати хирадмандонаи Пешвои миллат саҳми арзанда гузоштанд. Масъалаи ба номи Аброр Зоҳир гузоштани мактаби миёнаи №4-и шаҳри Сарбанд чанде пеш дар расонаҳои хабарии мамлакат ба таври густурда инъикос ва ташвиқ шуда буд. Ҳамовозӣ аз тарафи яке аз воситаҳои иттилоотрасони бонуфузи кишвар - «Ҷумҳурият» сабаб шуд, то ин пешниҳодро маҷлиси вакилони халқи шаҳри Сарбанд ва Маҷлиси вакилони вилояти Хатлон баррасӣ ва тасдиқ намоянд.

Неъмати РАҲМАТ,
сокини шаҳри Душанбе 

Хонданд 437

Гулистони афсонавӣ

Окт 14, 2017
Диданд: 387

Кормандони муассисаҳои кӯмаки аввалияи тиббию санитарии шаҳри Гулистон дар давраи ҳисоботӣ дар якҷоягӣ бо мақомоти маҳаллӣ баҳри сазовор дар амал тадбиқ намудани дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, иҷрои санадҳои меъёриву ҳуқуқии Ҳукумати Ҷумҳурии Тоҷикистон, татбиқи Барномаҳои милливу соҳавӣ, Стратегияҳо, Нақшаҳои миллӣ, таъмиру барқарорсозии муассисаҳои тандурустӣ, тарғиби доимии ташаккули тарзи ҳаёти солим, пешгирии бемориҳои сироятӣ ва ғайрисироятӣ бештар фаъолият намудаанд.

Аҳолии шаҳри Гулистон ҳамагӣ 44 ҳазору 700 нафар буда, аз ин теъдод 21900 нафар мардҳо, 22800 нафар занҳо мебошанд. Дар шаҳр 7 адад маркази саломатӣ, 3 адад бунгоҳи саломатӣ ва Маркази ташхисию табобатии ба номи Закариёи Розӣ ба шаҳрвандон хизмати тиббӣ мерасонанд.
Бо ибтикори раиси вилояти Суғд соли 2016 «Соли фарди солим» эълон гардидааст. Вобаста ба ин қарори раиси вилояти Суғд №553 аз санаи 23-юми декабри соли 2015 дар бораи Барномаи вилоятии «Соли 2016 - Соли фарди солим», қарори раиси шаҳри Гулистон таҳти №08 аз санаи 18-уми январи соли 2016 дар бораи Барномаи шаҳрии «Соли 2016 - Соли фарди солим» ба тасвиб расида, нақшаи чорабиниҳои амалигардонии ин барнома таҳия ва тасдиқ карда шудааст.
Давоми соли гузашта ва нуҳмоҳаи соли ҷорӣ баҳри таъмир ва таҷдиди марказҳои саломатӣ (КАТС) корҳои зиёде ба сомон расонида шудааст. Аз ҷумла, маркази саломатии шаҳр пурра аз таъмири косметикӣ бароварда шуда, ҳудудҳои он аз ҳисоби маблағҳои ҷудонамудаи ҳукумати маҳаллӣ пурра сафолпӯш карда шудаанд. Таъмири маркази саломатии шаҳраки Навгарзан пурра ба итмом расонида шудааст. Бо ин мақсад аз буҷаи шаҳр беш аз 300 ҳазор сомонӣ харҷ карда шудааст. Дар Маркази саломатии шаҳраки Консой бо хароҷоти беш аз 120 ҳазор сомонӣ корҳои таъмиру таҷдид ва ободонӣ оғоз карда шудааст.
Давоми соли 2016 барои муассисаҳои КАТС-и шаҳри Гулистон ба маблағи беш аз 148 ҳазору 775 сомонӣ таҷҳизоти табобатӣ ва профилактикӣ харидорӣ карда шудааст, ки аз он аз ҳисоби соҳибкорони маҳаллӣ ба маблағи 52 ҳазору 512 сомонӣ таҷҳизоти тиббӣ харидорӣ карда шудааст. Дар нуҳмоҳаи соли 2017 бошад, ба маблағи 11 ҳазору 770 сомонӣ таҷҳизоти тиббӣ харидорӣ карда шудааст. Аз ҳисоби буҷаи маҳаллӣ бошад, ба маблағи 33 ҳазору 150 сомонӣ дастгоҳи портативии ташхиси рентгенӣ, тамғаи DLх120 харидорӣ карда шуда, иловатан боз ба маблағи 8 ҳазору 85 сомонӣ се адад яхдонҳои махсус харидорӣ карда шудааст. Аз ҳисоби ҶСП «Апреловка» ба маблағи 4240 сомонӣ барои Маркази саломатии Консой таҷҳизоти тиббӣ харидорӣ карда шудааст. Инчунин, аз тарафи ҶДММ «Равшан» ҳамаи кормандони Маркази саломатии Консой бо сарулибоси махсуси тиббӣ таъмин карда шудаанд.
Ҳоло дар муассисаҳои тандурустии шаҳри Гулистон 47 нафар табиб ва 124 нафар кормандони миёнаи тиб барои аҳолии 45 ҳазору 600-нафараи шаҳри Гулистон хизмати тиббӣ мерасонанд. Барои навхонадорон, ки барои ташхиси тиббӣ ба марказҳои саломатӣ муроҷиат менамоянд, хизмати тиббии ройгон расонида мешавад.
Сол аз сол малака ва дараҷанокии кормандони соҳаи тандурустӣ дар муассисаҳои тахассусӣ баланд бардошта мешавад. Ҳоло нишондиҳандаи тахассусии табибон беш аз 75% ва кормандони миёнаи тиб зиёда аз 72%-ро ташкил медиҳад. Давоми 9 моҳи соли ҷорӣ 3 нафар табиб ва 11 нафар кормандони миёнаи тиб аз курсҳои такмили ихтисос ва бозомӯзӣ гузаштаанд.
Дар асоси қарори раиси вилояти Суғд таҳти №4 аз санаи 09.01.2017 ва раиси шаҳри Гулистон №38 аз санаи 14.02.2017 «Дар бораи таъмини кӯдакони синни то 3-сола ва кӯдакони маъюби синни то 18-сола» қарори махсус ба тасвиб расонида шудааст, ки тибқи ин қарор барои ҳар як кӯдаки то 3-сола ва маъюбон маблағи 70 ҳазор сомонӣ пешбинӣ карда шудааст.
Тибқи қарори раиси вилояти Суғд таҳти №3 аз санаи 09.01.2017 ва қарори дахлдори раиси шаҳри Гулистон №39 аз санаи 14.02.2017 тамоми иштирокчиён ва маъюбони ҶБВ ва шахсони ба онҳо баробаркардашуда дар муассисаҳои тандурустии шаҳри Гулистон пурра ройгон табобат карда мешаванд. Ҳоло дар шаҳри Гулистон 41 нафар чунин шахсон зиндагонӣ менамоянд, ки онҳо пурра таҳти назорати табибон қарор доранд.
Ҳифзи саломатии модару кӯдак самти афзалиятноки фаъолияти соҳаи тандурустӣ ба ҳисоб меравад. Яке аз роҳҳои паст намудани беморшавӣ ва фавти кӯдакон - ин пешгирии бемориҳо бо роҳи эмкунӣ мебошад, ки тамоми кӯдакони навзод мувофиқ ба тақвими эмкунӣ эм карда шудаанд.
Дар давоми нуҳмоҳаи соли ҷорӣ дар шаҳри Гулистон 622 нафар навзодон зинда таваллуд шудаанд, ки дар байни онҳо ягон кӯдаки нуқсонҳои модарзодӣ дошта ба қайд гирифта нашудааст. Давоми нуҳ моҳи соли ҷорӣ дар шаҳр 871 нафар занҳои ҳомила ба қайд гирифта шудаанд, ки ҳамаи онҳо таҳти назорати комили табибон то давраи таваллуд фаро гирифта шудаанд.
Аз рӯи суханони Бибиҷон ном сокини шаҳри Гулистон, «соҳаи тандурустии шаҳри Гулистон дар даврони соҳибистиқлолӣ басо рушду нумуъ намуда, махсусан дар ду соли охир, баъди таъини Матлубахон Аминзода ба вазифаи раиси шаҳри Гулистон корҳои ободониву таъмиру таҷдиди соҳаи тандурустии шаҳр дар асоси супоришу дастурҳои бевоситаи Пешвои муаззами миллат, Президенти ҶТ муҳтарам Эмомалӣ Раҳмон боз ҳам ҷоннок карда шуд. Имрӯз муассисаҳои тандурустии шаҳр дар асоси дастгирии бевоситаи раиси шаҳр ва вазири тандурустӣ ва ҳифзи иҷтимоии аҳолии кишвар муҳтарам Олимзода Насим Хоҷа бо дастгоҳу таҷҳизоти сатҳи пешқадами ҷаҳонӣ таъмин карда шуда, баҳри пешрафти соҳа махсусан хизмати мененҷери КАТС Мадаминова Гулшан Кимовна, ки худ дастпарвари соҳаи тандурустии шаҳри Қайроққуманд, басо калон мебошад. Ҳоло ҳудудҳои кулли муассисаҳои тандурустии шаҳри Гулистон ба як гулистони афсонавӣ табдил дода шуда, дар тамоми муассисаҳо, ҳатто дар ҳар як ошёна гӯшаҳои гиёҳдармонии ройгон бо супориши вазири тандурустӣ ва ҳифзи иҷтимоии аҳолии кишвар ташкил карда шудааст, ки ин боиси миннатдории мардум гардидааст».
Мадаминова Гулшан Кимовна, мененҷери КАТС-и шаҳри Гулистон мегӯяд, ки «ман фикр мекунам, дар таърихи миллати тоҷику давлатдории тоҷикон касе ба мисли Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон барои миллату давлат хизмат накардааст. Як худи дар муддати босо кӯтоҳ сохта ба истифода додани маҷмааи табобатии «Истиқлол», пурра таъмиру таҷдид намудан ва азнавсозии Маркази миллии тиббии Тоҷикистон дар шаҳраки Шифокорон, ба истифода додани беморхонаи клиникии ноҳияи Данғара, сохта ба истифода додани Коллеҷи тиббии ноҳияи Рашт, сохта ба истифода додани Маркази саломатии ноҳияи Рӯдакӣ, таъмир ва таҷдиди Осоишгоҳи Зумрад дар шаҳри Исфара, пурра ба истифода дода шудани осоишгоҳи Баҳористон, кушода шудани Бемористони Ибни Сино дар шаҳри Душанбе ва боз чандин иншооти хурду калони соҳаи тандурурстӣ аз хизматҳои арзандаи Пешвои миллат ва доҳии тоҷикони ҷаҳонанд, ки бояд ҳар яки мо аз ин ифтихор кунем. Имрӯз барои мардуми шаҳри Гулистон ва соҳаи тандурустии шаҳри Гулистон раиси шаҳр Матлубахон Аминзода низ хизматҳои худро арзонӣ доштаанд. Мо, кормандони соҳа низ дар ин раванд барои халқу Ватан хизмат хоҳем намуд».

Саиди ҲАЙДАР, МТЖТ,
Душанбе-Суғд-Душанбе

ШАРҲИ МО:
Мадаминова Гулшан Кимовна соли 1964 дар шаҳри Душанбе, дар оилаи зиёӣ таваллуд шудааст. Соли 1982 мактаби миёнаи №52-и шаҳри Душанберо хатм намуда, худи ҳамон сол ба Донишгоҳи тиббии Тоҷикистон ба номи А. Сино дохил шуда, онро соли 1989 бо ихтисоси духтури кӯдакона хатм намудааст. Солҳои 1989-1994 дар поликлиникаи №10-и шаҳри Душанбе ҳамчун духтури кӯдакона фаъолияти корӣ намудааст. Солҳои 1994-2010 дар Маркази саломатии шаҳри Гулистон духтури бемориҳои кӯдакона буд. Солҳои 2010-2012 табиби оилавии Маркази саломатии шаҳри Гулистон, солҳои 2012-2016 муовини мененҷер оид ба табобат, аз моҳи ноябри соли 2016 ин ҷониб мененҷери КАТС-и шаҳри Гулистон мебошад. Духтури дараҷаи олӣ, модари ду фарзанд.

Хонданд 387

Хабари рӯз

Календар

« Сентябрь 2018 »
Пн Вт Ср Чт Пт Сб Вс
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

Минбари сардабир

  • симКАРта

    Дар ҳафтае, ки гузашт, дар шабакаҳои иҷтимоӣ ин калима аз…

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.